ခရစ္စတိုဖာပေါက်ကျိုင်း ၏ အတ္ထုပ္ပတ္တိ (၂၃)

 ပဉ္စမပိုင်း (ပဉ္စမ ၂ နှစ် - ၁)

 

(၉၁) Confined Space

 

            ၀င်ပေါက်ထွက်ပေါက် အကန့်အသတ်ရှိသော၊ လေ၀င်လေထွက်မကောင်းသော၊ အလင်းရောင် အလုံအလောက်မရသော၊ ကတုတ်ကျင်း၊ အခန်းကျဉ်း၊ တိုင်ကီ၊ ပိုက်၊ လိုဏ်ဂူ၊ မြေအောက်လိုဏ်ဂူ စသည်တို့ကို ကွန်ဖိုင်းစပေ့စ် (Confined Space) ဟု ခေါ်ပါသည်။ ထိုနေရာများသည် ၀င်ရန်၊ ထွက်ရန် မလွယ်ကူ။ အသက်ရှူရန်သင့်တော်သည့် အောက်ဆီဂျင် ရှိချင်မှရှိမည်။ အလင်းရောင်အလုံအလောက် မရသောနေရာများဖြစ်မည်။ မီးလောင်တတ်သည့်၊ ပေါက်ကွဲစေတတ်သည့် သို့မဟုတ် လူကိုသေစေတတ်သည့် အဆိပ်ဓါတ်ငွေ့များရှိသည့် နေရာများဖြစ်မည်။ ထိုနေရာများသည် ကြာရှည်လူနေရန်မသင့်။ ထိုနေရာများတွင် ရှေးယခင်ကာလများက ဆောက်လုပ်ခဲ့သည့် နေအိမ် ကြီးများ၊ ဘုရားရှိခိုးကျောင်းကြီးများ စသည်တို့၏ မြေအောက်ခန်းများလည်း ပါဝင်ပါသည်။ မြန်မာလို အလုံပိတ်အခန်းဟု ဘာသာပြန်နိုင် သော်လည်း မပြည့်စုံနိုင်ပါ။     

            နေရာတစ်ခုကို ကွန်ဖိုင်းစပေ့စ် ဟုတ်မဟုတ် အထက်ပါအချက်များနှင့် မည်မျှငြိစွန်းနေသနည်း ဆိုသည်နှင့် စစ်ဆေးရသည်။ အကယ်၍ လေ၀င်လေထွက်မကောင်းပါက ပန်ကာများဖြင့် လေမှုတ်သွင်းခြင်း၊ အိတ်ဇောပန်ကာများဖြင့် အထဲမှ အန္တရာယ်ရှိသော ဓါတ်ငွေ့ များကို စုတ်ထုတ်ခြင်း၊ အလင်းရောင်နည်းနေပါက သို့မဟုတ် မှောင်နေပါက မီးထွန်းပေးခြင်း၊ ၀င်ရန်ထွက်ရန်နေရာသည် အလွယ်တကူ ၀င်၊ ထွက်၍မရလျှင် အ၀င်အထွက်အတွက် ဖန်တီးပေးခြင်း။

            ထို့ထက်ပိုအရေးကြီးသည်မှာ ထိုနေရာတွင် အသက်ရှူရန် အောက်ဆီဂျင်အလုံအလောက်ရှိသလား၊ မီးလောင်တတ်သည့်၊ ပေါက်ကွဲစေတတ်သည့်၊ အသက်အန္တရာယ်ရှိသည့် အဆိပ်ငွေ့ စသည်တို့ရှိနေသလား ဆိုတာဖြစ်ပါသည်။ သည်လိုဓါတ်ငွေ့များမှာ မျက်စိဖြင့် ကြည့်လို့ရတာမဟုတ်။ နှာခေါင်းဖြင့်ရှူပြီး ခန့်မှန်းလို့ရတာမဟုတ်။ ထိုဓါတ်ငွေများကိုတိုင်းတာသည့် ကိရိယာဖြင် တိုင်းတာရခြင်းဖြစ်သည်။ အကယ်၍ အောက်ဆီဂျင်အလုံအလောက် မရှိလျှင် အောက်ဆီဂျင်ရရန် အထောက်အပံ့လုပ်ပေးရမည်။ ပန်ကာဖြင့် လေမှုတ်သွင်းပေး ရမည်။ မီးလောင်နိုင်သည့် သို့မဟုတ် အဆိပ်ဓါတ်ငွေ့များရှိပါက ထိုအဆိပ်ငွေ့များထွက်သွားအောင် ပန်ကာဖြင့် စုပ်ထုတ်ပစ်ရမည်။

Confined Space Safety Assessor ဆိုသည်မှာ အထက်ဖော်ပြပါ confined space များတွင် ၀င်ရောက်အလုပ်လုပ်ရတော့မည် ဆိုပါက ထိုနေရာသည် အလုပ်လုပ်ရန် သင့်တော်မတော်၊ အ၀င်အထွက်ကောင်းမကောင်း၊ အလင်းရောင်လုံလောက်မလောက်၊ အသက်ရှူ ရန် အောက်ဆီဂျင်အလုံအလောက်ရှိမရှိ၊ မီးလောင်တတ်၊ ပေါက်ကွဲတတ်၊ သေစေတတ်သော ဓါတ်ငွေ့များရှိမရှိ စသည်တို့ကို စစ်ဆေးပြီး အကယ်၍ အလင်းရောင်ကောင်းကောင်းမရလျှင် မည်ကဲ့သို့သော မီးကို မည်သည့်နေရာတွင် မည်မျှထွန်းပေးရမည်။ အ၀င်အထွက် မကောင်းလျှင် ကောင်းကောင်း ၀င်၊ ထွက်နိုင်ရန် ၀င်ပေါက်၊ ထွက်ပေါက်များကို မည်ကဲ့သို့စီမံရမည်။ အောက်ဆီဂျင် အလုံအလောက် မရှိပါက လေပမာဏမည်မျှကို မည်ကဲ့သို့သွင်းပေးရမည်။ မည်ကဲ့သို့သော အသက်ရှူအထောက်အကူပြု ကိရိယာများ ၀တ်ဆင်ရမည်။ အဆိပ်ငွေ့များရှိနေလျှင် မည်ကဲ့သို့ စုပ်ထုတ်ရမည်။ ပန်ကာဘယ်နှလုံး တပ်ရမည် စသည်တို့ကို တိုင်းတာတွက်ချက် အကြံပေးခြင်း။ confined space ထဲ ၀င်ရောက်အလုပ်လုပ်မည့်သူများသည် ဖော်ပြထားသော လိုအပ်ချက်များကို ဖြည့်ဆည်းထားမထား။ အကယ်၍ ဖြည့်ဆည်းမထားလျှင် ဖြည့်ဆည်းရန် သတိပေးခြင်း၊ သတိပေးသည့်တိုင် မလိုက်နာပါက အလုပ်လုပ်ခွင့်မပြုခြင်း၊ အလုပ်ကိုရပ်နားခြင်း၊ ပြစ်ဒဏ်ပေးခြင်း စသည်တို့ ပြုလုပ်ပေးရသောသူ ဖြစ်ပါသည်။  

ကျွန်တော် ECC တွင် လုပ်ခဲ့ရစဉ်ကတော့ အနည်းငယ် ပြဿနာရှိ၏။ အနို့မည်သည့်အလုပ်သည် စင်းလုံးချောရှိပါမည်နည်း။ ပြဿနာမှာ JV မှ safety ဖြစ်၏။ JV ဟူသည် ECC ကို တာဝန်ယူလုပ်ပေးသည့် Toyo နှင့် CB&I - Joint venture ဖြစ်သည်။ သူတို့က main contractor၊ ကျွန်တော်တို့က sub-contractor ဖြစ်လေတော့ အားလုံး သူတို့ညွှန်ကြားချက်၊ သူတို့စံနှုံးအတိုင်း လုပ်ရသည်။ သည် စံနှုံးများကို အပြည့်အ၀လိုက်မလုပ်နိုင်တော့ ပြဿနာတက်သည်ပေါ့။ 

            ပြောတော့သာ လွယ်လွယ်ကလေးခင်ဗျား။ တကယ်လုပ်တော့ ပြောသလောက်မလွယ်ပါ။ လက်တွေ့နှင့် စာတွေ့မှာ အလွန် ကွာပါသည်။ သည်တွင် စာရှုသူတို့ ဗဟုသုတရစေရန် ကျွန်တော့်အတွေ့အကြုံများကို ဖောက်သည်ချလိုပါသည်။

            အထက်တွင် ကွန်ဖိုင်းစပေ့စ် ဆိုသည်မှာ ဘာ ဆိုတာကို ပြောခဲ့ပါပြီ။ ကွန်ဖိုင်းစပေ့စ်မှာ အလုပ်လုပ်ရန် မသင့်တော်သည့်အတွက် အလုပ်လုပ်လို့ရအောင် လုပ်ပေးရသည်။ အတိုချုပ်၍ပြောရလျှင် ကောင်းကောင်းဝင်/ထွက်လို့ရအောင် စီစဉ်ပေးရသည်။ အလင်းရောင် ကောင်းကောင်းရစေရန်၊ အောက်ဆီဂျင်အလုံအလောက်ရစေရန်၊ အဆိပ်ငွေ့များမရှိစေရန် စသည်တို့ စီစဉ်ပေးရသည်။ သည်တွင် ကွန်ဖိုင်း စပေ့စ်အတွက် လိုအပ်ချက်များကို အစဉ်လိုက်ပြောပြပါမည်။

လျှာရှည်သည်ဟု မထင်ပါလင့်။ ကျွန်တော်တို့တိုင်းပြည်တွင် ကွန်ဖိုင်းစပေ့အကြောင်းမသိသဖြင့် တရားဝင်သော်လည်းကောင်း၊ တရားမ၀င်သော် လည်းကောင်း၊ လူသိရှင်ကြားသော် လည်းကောင်း၊ လူမသိ၊ ရှင်မကြားသော်လည်းကောင်း သေဆုံးရမှုများ အများအပြား ရှိပါသည်။ ထို့ကြောင့် ကိုပေါက်ကျိုင်း၏ ပရိတ်သတ်များလည်း ကွန်ဖိုင်းစပေ့စ် အကြောင်း ဗဟုသုတရကြစေရန်၊ ရထားသောဗဟုသုတများ ကို အာပေါင်အာရင်းသန်သန်နှင့် လေလုံးထွား (ဟုတ်ပေါင်) ပြန်လည် ဝေငှနိုင်ကြပါစေရန် ရေးသားလိုက်ရခြင်း ဖြစ်ပါကြောင်း။

 

  (၉၁) သင်တန်းများ

ကွန်ဖိုင်းစပေ့စ်အတွင်း၌ အလုပ်လုပ်နိုင်ရန် ပထမဦးဆုံးလိုအပ်ချက်မှာ သင်တန်းများဖြစ်ပါသည်။ ကွန်ဖိုင်းစပေ့စ်နှင့် ပတ်သက် နေသူအားလုံး သက်ဆိုင်ရာသင်တန်းအသီးသီးသို့ တက်ရောက်ထားရန်လို၏။ ထိုသူများထဲတွင် အောက်ပါပုဂ္ဂိုလ်များပါဝင်ပါသည်။

 

၁) ကွန်ဖိုင်းစပေ့စ်အတွင်းသို့ ၀င်ရောက်မည့်သူများ (Entrants)

ကွန်ဖိုင်းစပေ့စ်အတွင်းသို့ ၀င်ရောက်မည့်သူများအနေနှင့် ကွန်ဖိုင်းစပေ့စ်အတွင်းရှိ အန္တရာယ်များအကြောင်း၊ ထိုအန္တရာယ်များကို မည်သို့ကာကွယ်ရမည့်အကြောင်း၊ အရေးပေါ်လာလျှင် မည်ကဲ့သို့ ပြုလုပ်ရမည် ဆိုသည့်အကြောင်းများ သိထားရန် အရေးကြီးပါသည်။ ဤကဲ့သို့သိရန် ကွန်ဖိုင်းစပေ့စ်အတွင်း အလုပ်မလုပ်မီ သင်တန်းတက်ရန်လိုပါသည်။ စင်ကာပူ၌ ထိုသင်တန်းကို Safety Orientation Course (Manhole) ဟုခေါ်၏။ SOC (Manhole) သင်တန်းက ကွန်ဖိုင်းစပေ့စ်နှင့်ပတ်သက်၍ သိသင့်သိထိုက်တာမှန်သမျှ သင်ပေးလိုက် ပါလိမ့်မည်။ သို့သော် အသိသည်အသိသာဖြစ်ပြီး လက်တွေ့မလိုက်နာလျှင်လည်း တန်ဘိုးမရှိပါ။ သိလည်းသိ၊ လက်တွေ့လည်း လုပ်ဘို့ လိုပါသည်။

ကွန်ဖိုင်းစပေ့စ်အတွင်းသို့ ထိုသင်တန်းတက်ပြီးသူမှသာ ၀င်ခွင့်ပြုသည်။ သင်တန်းဆင်းလာသူများကို SOC (Manhole) ကဒ်ပြား ထုတ်ပေးပါသည်။ ကွန်ဖိုင်းစပေ့စ်အတွင်း ၀င်တော့မည်ဆိုသည်နှင့် အ၀င်ဝရှိ ကင်းသမားအား ထိုလက်မှတ်ကဒ်ပြားအားပေးခဲ့ရသည်။ ကင်းသမားက ထိုလက်မှတ်ကို ဘုတ်ပေါ်တွင်ချိတ်ဆွဲထားလိုက်၏။ သို့မှ အတွင်း၌ မည်သူတို့ရှိနေကြောင်း အလွယ်တကူသိနိုင်မည်။ ပြန်အထွက်တွင် ထိုကဒ်ပြားကို ပြန်ပေးလိုက်ရသည်။ ၀င်တိုင်း၊ ထွက်တိုင်း အ၀င်အထွက်မှတ်တမ်းတွင် လက်မှတ်ထိုးသွားရန်လည်း လိုသည်။ 

            ကွန်ဖိုင်းစပေ့စ်အတွင်းဝင်သူများသည် ဓါတ်ငွေ့တိုင်းစက်(မီတာ) ချိတ်သွားရ၏။ ထိုဓါတ်ငွေ့မီတာအား ညကတည်းက အားသွင်း ထားရသည်။ ကွန်ဖိုင်းစပေ့စ်အတွင်းရှိနေသမျှကာလပတ်လုံး ထိုမီတာကို ဖွင့်ထားရသည်။ မီတာက အောက်ဆီဂျင်နှင့် အခြား အဆိပ် ဓါတ်ငွေ့၊ မီးလောင်စေတတ်သည့် ဓါတ်ငွေ့စသည်တို့ကို တိုင်းတာပေးသည်။ အောက်ဆီဂျင်နည်းနေလျှင်သော်လည်းကောင်း၊ အခြား အဆိပ်ငွေ့များ ရှိနေလျှင်သော်လည်းကောင်း အသံဖြင့် သတိပေးသည်။ များသောအားဖြင့် မီတာများတွင် ဓါတ်ငွေ့လေးမျိုးကို တိုင်းပေးသည်။ အောက်ဆီဂျင်၊ ဟိုက်ဒြိုဂျင်ဆာလဖိုဒ်၊ ကာဘွန်မိုနောက်ဆိုဒ် နှင့် မီးလောင်စေတတ်သောဓါတ်ငွေ့ တို့ဖြစ်၏။ 

            ထို့ပြင် ကိုယ်သိုင်းကြိုး၊ အသက်ကယ်ကြိုး၊ ဓါတ်မီး၊ လိုအပ်လျှင် အသက်ရှူကိရိယာ စသည်တို့ကိုလည်း တစ်ပါတည်း ယူဆောင် သွားရန် လိုပါသည်။ အပြင်နှင့်အဆက်အသွယ်လုပ်နိုင်ရန် ခရာသော်လည်းကောင်း၊ ဝေါ်ကီတော်ကီသော်လည်းကောင်း ယူဆောင်သွားရန် လည်း လိုပါသည်။

 

၂) ကယ်ဆယ်ရေးအဖွဲ့ (Rescuers)

            ကွန်ဖိုင်းစပေ့စ်ဟူသည် အန္တရာယ်ရှိသောနေရာဖြစ်၏။ အကယ်၍ အောက်ဆီဂျင်ပြတ်၍သော် လည်းကောင်း၊ မီးလောင်ခဲ့လျှင် သော်လည်းကောင်း၊ မူးဝေအော့အန်ခဲ့၊ မူးလဲခဲ့လျှင်သော် လည်းကောင်း အသက်မဆုံးရှုံးစေရေးအတွက် ကယ်ဆယ်ရေးအဖွဲ့များ လက်လှမ်း တမီတွင် ရှိရပါမည်။ ကယ်ဆယ်ရေးအဖွဲ့ဆိုသည်မှာ အထွေအထူးမဟုတ်ပါ။ ထိုနေရာ၌အလုပ်လုပ်နေသူများ ဖြစ်နိုင်ပါသည်။ ကယ်ဆယ် ရေးအဖွဲ့တွင် ပါမည့်သူများကို ရွေးချယ်ကာ အရေးပေါ်အခြေအနေ၌ မည်ကဲ့သို့လုပ်ဆောင်ရမည်ကို သင်ကြားပေးထားရန် လိုပါသည်။ ထို့နောက် ကွန်ဖိုင်းစပေ့စ်အနီးအနား၌ ကယ်ဆယ်ရေးအဖွဲ့ကို အရေးပေါ် ကယ်ဆယ်ရေးပစ္စည်းများနှင့်တကွ ရှိနေစေရပါမည်။

 

အရေးပေါ်ကယ်ဆယ်ရေးအဖွဲ့တွင် ၄ ဦး သို့မဟုတ် ၅ ဦးပါဝင်နိုင်ပါသည်။ ထိုအဖွဲ့တွင် လုံခြုံရေးကိုယ်သိုင်းကြိုး (Safety Harness)၊ အသက်ရှူအထောက်အကူပြုကိရိယာ (Respirator)၊ အသက်ကယ်ကြိုး (Life Line)၊ ၁၅မိနစ်ခံ အောက်ဆီဂျင်ဘူး၊ ဓါတ်မီး၊ မီးသတ်ဘူး စသည်တို့အဆင်သင့်ရှိရမည်။

            ကွန်ဖိုင်းစပေ့စ်အတွင်း အလုပ်လုပ်နေသမျှကာလပတ်လုံး ထိုကယ်ဆယ်ရေးအဖွဲ့သည် အမြဲအသင့်ရှိနေရမည် ဖြစ်လေရာ ၎င်းတို့အား အခြားသူများကို သီးသန့်ခန့်ထားရန်ဆိုခြင်းမှာ လက်တွေ့မကျပါ။ အရေးပေါ်ကိစ္စဆိုသည်မှာ အမြဲဖြစ်နေသည်မဟုတ်။ ဖြစ်ချင် လည်းဖြစ်မည်။ ဖြစ်ချင်မှလည်း ဖြစ်မည်။ သို့ဖြစ်လေရာ ထိုအဖွဲ့ကိုသာ သီးသီးသန့်သန့်ခန့်ထားမည်ဆိုပါက ၎င်းတို့မှာ တစ်နေကုန် ဘာမှလုပ်စရာမရှိသည်နှင့် ပိုကာဒေါင်းနေရမည်သာ ဖြစ်လေသည်။ ထို့ကြောင့် ကွန်ဖိုင်းစပေ့စ်အနီးအနားတွင် လုပ်ကိုင်နေသူများ၊ စူပါဗိုက်ဆာများ၊ စသူတို့ကို ကယ်ဆယ်ရေးအဖွဲ့ တာဝန်ပေးနိုင်ပါသည်။ သို့သော် ကျန်းမာရေးဗဟုသုတရှိသူ ရှေးဦးသူနာပြုသင်တန်း တက်ထားသူပါလျှင် ပိုကောင်းပါသည်။

 

၃) ကင်းသမား (Attendant – Standby Person Outside)

            အထဲကိုဘယ်သူတွေဝင်သွားသလဲ၊ ဘယ်အချိန်တုံးက ဘယ်နှယောက်ဝင်သွားသလဲ။ ဘယ်သူတွေ ပြန်ထွက်သွားသလဲ။ အလုပ်ပြီးလို့ ပြန်ထွက်လာချိန်မှာ ၀င်သွားတဲ့သူတွေ အကုန်ပြန်ထွက်လာသလား စသဖြင့် စောင့်ကြည့်ရန်သော်လည်းကောင်း။  ကွန်ဖိုင်းစပေ့စ်အတွင်း တစ်စုံတစ်ခုဖြစ်ခဲ့လျှင်သော်လည်းကောင်း။ ကွန်ဖိုင်းစပေ့စ်၏ ပြင်ပတွင်တစ်ခုခုဖြစ်လာလျှင်သော်လည်းကောင်း ကွန်ဖိုင်းစပေ့စ်အတွင်းမှ လူများအား အလျင်အမြန် သတိပေးအကြောင်းကြားရန် သော်လည်းကောင်း ၀င်ပေါက်ဝတွင် ကင်းသမားတစ်ဦး ထားပေးရန်လည်း လိုပါသည်။ ထိုကင်းသမားအားလည်း လိုအပ်သော ကိရိယာများ တပ်ဆင်ပေးထားရမည်ဖြစ်ပါသည်။

ကျွန်တော် Confined Space Assessor လုပ်စဉ်က အပေါက်စောင့်ကောင်လေးများမှာ မာရီယာပမ်၊ နာဂိုကာနီ၊ ဗစ်စ်ဝါနာသမ် စသည့် ကုလားလေးများဖြစ်ပါသည်။ သူတို့နှင့် နှစ်နှစ်ခန့်အတူတွဲလုပ်ခဲ့ရသည်ဖြစ်ရာ ယခုထိတိုင် မှတ်မိနေပါသေး၏။ ကုမ္ပဏီက လည်သည်။ ကင်းစောင့်ထားရမည်ဆိုတော့ စူပါဗိုက်ဆာများအားခေါ်ပြီး ဘယ်ကောင်တွေ အသုံးမတည့်ဆုံးလဲ ဟုမေးကာ လူရွေး၏။ စူပါဗိုက်ဆာများက သိပ်အလုပ်မဖြစ်သော ကုလားကလေး သုံးလေးယောက်ကို ရွေးပေးသည်။ ကျွန်တော်က သူတို့ကိုခေါ်ကာ ကင်းသမား တစ်ယောက်၏ တာဝန်နှင့်ဝတ္တရားများကို ကျကျနန ရှင်းပြသည်။

ဘာလုပ်လုပ် မှတ်တမ်းမှတ်ရာနှင့် အလုပ်လုပ်တတ်စေရန် လေ့ကျင့်ထားပါ။ သူတို့ကို ကျွန်တော်ရှင်းပြထားသည်များအား စာနှင့် ရေးကာ ဘယ်နေ့က ဘယ်နေရာမှာ သင်တန်းပေးကြောင်း၊ ဘာတွေသင်ပေးလိုက်ကြောင်း၊ ဤကဲ့သို့သင်တန်းပေးခြင်းအတွက် အသိသက်သေမည်သူတို့ ရှိကြောင်း၊ သူတို့ကို လက်မှတ်ထိုးခိုင်းထားရပါသည်။ ငါတို့မသိရပါဘူး ဟု မငြင်းနိုင်စေရန် ဖြစ်၏။

ထို့နောက် သူတို့ကို လူအ၀င်အထွက်စာရင်းမှတ်နိုင်ရန် Confinde Space Log Book တစ်ခု၊ ခရာတစ်ခု၊ အောက်ဆီဂျင်ဘူး ပါသည့်အသက်ကယ်အင်္ကျီတစ်ခု၊ အသက်ကယ်ကြိုးတစ်ချောင်း၊ ကဒ်ပြားများချိတ်နိုင်သည့် ဘုတ်ပြားတစ်ခုအစရှိသည့် ပစ္စည်းများ ထုတ်ပေးလိုက်ပါသည်။ သူတို့က ကွန်ဖိုင်းစပေ့စ်အတွင်း လူများရှိနေသမျှကာလပတ်လုံး အပေါက်ဝတွင် စောင့်နေရပါသည်။ အကယ်၍ အိမ်သာသွားလိုလျှင် အခြားသူတစ်ဦးကို လုပ်ရမည့်လုပ်ငန်းတာဝန်များအား အကျဉ်းမျှရှင်းပြလျှက် ၎င်းကိုယ်စား ထားခဲ့ရမည်။ မည်သည့် အခါမှ၊ မည်သည့်အကြောင်းနှင့်မှ ကင်းသမားမရှိတာ မဖြစ်စေရ။ တစ်နည်းပြောရလျှင် အထဲမှလူများ အန္တရာယ်ကင်းစွာ၊ စိတ်ချလက်ချ အလုပ်လုပ်ရရေးသည် ကင်းသမားအပေါ်များစွာ မူတည်နေသည်။

ကင်းသမားကလည်း အပေါက်ဝတွင် ဘာမှလုပ်စရာမရှိဟု အိပ်ငိုက်နေလို့မရ။ မိမိပတ်ဝန်းကျင်ကို အမြဲသတိပြုနေရသည်။ ဓါတ်ငွေ့ယိုစိမ့်ခြင်း၊ မီးလောင်ခြင်းစသော ထူးခြားသောအခြေနေတစ်ခုခုဖြစ်ပါက အထဲမှလူများ အမြန်ဆုံးထွက်လာနိုင်အောင် သတိပေး ရမည်။ အထဲမှလူများအားလည်း ၁၅ မိနစ်ခန့်ကြာတိုင်း “ဟေ့ကောင်တွေ၊ ဘယ့်နဲ့လဲဟေ့၊ အားလုံးအဆင်ပြေကြရဲ့မဟုတ်လား” ဟု အမြဲ စစ်ဆေးနေရမည်။

ထူးခြားလျှင်လည်း ထူးခြားသလို၊ မထူးခြားလျှင်လည်း မထူးခြားသည့်အကြောင်း Confined Space Safety Assessor အား အမြဲ သတင်းပို့နေရန်လည်း တာဝန်ရှိပါသည်။

 

၎) ကွန်ဖိုင်းစပေ့စ်အဆက်ဆာ (ကွန်ဖိုင်းစပေ့စ်ကိုစစ်ဆေးသူ) (Competent Person (Confined Space Safety Assessor))

 

 

ကွန်ဖိုင်းစပေ့စ်ထဲတွင် အလုပ်လုပ်ရန်အတွက် အဓိကအရေးကြီးဆုံးပုဂ္ဂိုလ်ကား Confined Space Safety Assessor ပင် ဖြစ်တော့၏။ သူက သည်နေရာသည် အလုပ်လုပ်ရန်သင့်မသင့် စစ်ဆေးပေးသည်။ အလုပ်လုပ်ရန် မသင့်တော်ဆိုလျှင် အလုပ်လုပ်လို့ ရသညထိ ဘာတွေလုပ်ပေးရမည်ဆိုသည်ကို အကြံပေးသည်။ ထို့နောက် ကွန်ဖိုင်းစပေ့စ်ထဲတွင် အလုပ်လုပ်နေသမျှကာလပတ်လုံး ထိုနေရာ၏ အခြေအနေကို မျက်ခြေမပြတ်စောင့်ကြည့်နေရသည်။ ကွန်ဖိုင်းစပေ့စ်ထဲတွင် လုပ်နေသောအလုပ်အားလုံးပြီး၍ လူအားလုံး ပြန်ထွက်လာမှ သူ့တာဝန်ပြီးဆုံးသည်။ သို့အတွက် သူ့တာဝန်မှာလည်း မသေးလှပါ။ ထို့ကြောင့် Confined Space Assessor ကို အချိန်ပိုင်း ငှားလျှင် အလွန်ဈေးကြီးပါသည်။ တစ်ရက်လျှင် စင်းဒေါ်လာ ၃၀၀ ခန့်ပေါက်ဈေးရှိ၏။

            သို့ဆိုလျှင် Confined Space Safety Assessor တစ်ယောက်အနေနှင့် ဘာတွေလုပ်ရသနည်း။ သည်တွင် အကျဉ်းမျှ ဖော်ပြ လိုက်ပါသည်။ သို့သော် ဤဆောင်းပါးမှာ Safety ဆောင်းပါးမဟုတ်သဖြင့် အသေးစိတ်မဖော်ပြတော့ပဲ အရေးကြီးသည့် အချက်အချို့သာ ဖော်ပြပါမည်။

            Confined Space Safety Assessor တစ်ဦးအနေနှင့် ပထမဦးဆုံးသိထားရမည်မှာ မိမိ စစ်ဆေးမည့် ကွန်ဖိုင်းစပေ့စ် အခြေအနေ နှင့် ထို ကွန်ဖိုင်းစပေ့စ်ထဲတွင် လုပ်မည့်အလုပ်အမျိုးအစားတို့ ဖြစ်၏။ ဤသည်ကိုလိုက်၍ လိုအပ်ချက်များကို စစ်ဆေး ဖြည့်ဆည်းပေး ရသည်။ လုပ်မည့်အလုပ်သည် ငြမ်းဆင်ရန်လိုသလား၊ ဂဟေဆော်ခြင်း၊ ဖြတ်ခြင်းတောက်ခြင်း တို့ပါသလား။ ဓါတုဗေဒဆေးရည်တွေနဲ့ လုပ်ရမှာလား။ ဘယ်လိုဓါတုဆေးရည်တွေလဲ။ လူ့ကျန်းမာရေးအတွက် ဘယ်လောက်အန္တရာယ်ရှိသလဲ။ ကျန်းမာရေးအတွက် ခွင့်ပြုနှုံး (Permissible Limit) ဘယ်လောက်လဲ စသဖြင့်ဖြစ်ပါ၏။

            ဒုတိယအနေနှင့် ကွန်ဖိုင်းစပေ့စ်အတွင်း ၀င်ရောက်အလုပ်လုပ်မည့်သူများ၊ ကင်းသမား၊ ကယ်ဆယ်ရေးအဖွဲ့ စသည်တို့ကို သင်တန်းပေးရန်ဖြစ်ပါသည်။ ထိုသင်တန်းမှတ်တမ်းများကိုလည်း စနစ်တကျ သိမ်းဆည်းထားရန်လိုပါသည်။

            ထို့နောက် ထိုကွန်ဖိုင်းစပေ့စ်အတွင်း ၀င်ရောက်အလုပ်လုပ်ရန် လိုအပ်သောစာရွက်စာတမ်းများ ပြင်ဆင်ခြင်း ဖြစ်ပါ၏။ Risk Assessment, Safe Work Procedure, Emergency Rescue Procedure, Permit To Work (PTW), Entry Log Book, Singnage စသည် တို့ဖြစ်၏။ ဤစာရွက်စာတမ်းများပြင်ဆင်နိုင်ရန် ပြည့်စုံလုံလောက်သော ဗဟုသုတရှိထားရပါမည်။ ဤကဲ့သို့ လုပ်နိုင်ကိုင်နိုင်ရှိသူ၊ တတ်ကျွမ်းသူကို Competent Person ဟုခေါ်သည်။ ကိုယ်သေသေချာချာမသိဘဲ အခြားသူထံမှ ကူးချထားသော စာရွက်စာတမ်းများသည် တန်ဘိုးမရှိပါ။ မိမိမရေးတတ်၍ အခြားသူများထံမှ ကူးချသည်ဆိုစေ၊ ဤသည်တို့မှာ ဘာလဲဆိုတာလောက်တော့ သေသေချာချာ နားလည် သဘောပေါက်ထားရန် လိုပါသည်။

            နောက်တစ်ခုမှာ အန္တရာယ်ကင်းသော နေရာတစ်ခုဖြစ်အောင် ဘယ်လိုလုပ်ပေးရမလဲဆိုတာ တိုင်းတာတွက်ချက်ရခြင်း ဖြစ်၏။ ဤသည်ကို အင်္ဂလိပ်လို assess လုပ်သည်ဟုခေါ်သဖြင့် ဤသို့တိုင်းတာတွက်ချက်သူကို Assessor ဟု ခေါ်ခြင်းဖြစ်ပါသည်။ မိမိတိုင်းတာ တွက်ချက်၍ ရလာသော လိုအပ်ချက်များကို ပံ့ပိုးပေးရန် အုပ်ချုပ်ရေးအဖွဲ့သို့ အကြံပြုတင်ပြရပါသည်။

            ဤသို့တိုင်းရာတွင် အရေးကြီးသော အချက်များရှိ၏။

ပထမတစ်ခုမှာ အောက်ဆီဂျင်ရှိမှုဖြစ်၏။ လူတစ်ဦးအသက်ရှုရန် သင့်တော်သောအောက်ဆီဂျင်မှာ ၁၉.၅% မှ ၂၃.၅% ဖြစ်ပါ သည်။ ထို့ထက်နည်းလျှင်လည်းမကောင်း။ များလျှင်လည်းမကောင်း။ အောက်ဆီဂျင်နည်းလျှင် အသက်ရှူမ၀သဖြင့် မူးမေ့လဲကျတတ်သည်။ အသက်အန္တရာယ်ပင် ရှိပါသည်။ အောက်ဆီဂျင်များလျှင်လည်းမကောင်း။ အောက်ဆီဂျင်ဓါတ်ငွေ့သည် ကိုယ်တိုင်မီးမလောင်နိုင်သော်လည်း မီးလောင်ခြင်းကို အားပေးသည်။ ထို့ကြောင့် အောက်ဆီဂျင်များသည့်နေရာတွင် အလွန်မီးလောင်လွယ်သည်။ ထို့ကြောင့် အောက်ဆီဂျင်ကို သတ်မှတ်ထားသော နှုန်းထားတစ်ခုတွင်ရှိနေစေရန် ထိန်းထားရန် လိုသည်။

နောက်တစ်ခုမှာ ဟိုက်ဒြိုဂျင်ဆာလဖိုဒ်ဓါတ်ငွေ့ဖြစ်၏။ ဤဓါတ်ငွေ့ကား အသက်ဘေးအတွက် အလွန်အန္တရာယ်များသည်။ ထိုဓါတ်ငွေ့သည် ၎င်းရောက်ရာနေရာမှ အောက်ဆီဂျင်ကို တွန်းထုတ်ပစ်လေရာ အချိန်တိုအတွင်း အောက်ဆီဂျင်ပြတ်လပ်မည့် အန္တရာယ်နှင့် ကြုံတွေ့ရနိုင်ပါသည်။ အောက်ဆီဂျင်မရှိသည့်နေရာတွင် အသက်ရှင်ရန် မလွယ်ပါ။ လေထဲတွင် ထိုဓါတ်ငွေ့ပါဝင်နှုံး ၁၅ ppm ထက် မပိုစေရ။ ကြာရှည်အလုပ်လုပ်မည်ဆိုပါက ၁၀ ppm ထက်မပိုစေရ။ သို့သော် ထိုဓါတ်ငွေ့က ကြက်ဥပုပ်နံ့နံသဖြင့် အလွန်သိသာသည်။ မိမိပတ်ဝန်းကျင်တွင် ထိုအနံ့မျိုးရလာပြီဆိုပါက ထိုနေရာမှ အမြန်ဆုံးထွက်ခွါရန် အရေးကြီးပါသည်။

နောက်အန္တရာယ်ရှိသော ဓါတ်ငွေ့တစ်ခုမှာ ကာဗွန်မိုနောက်ဆိုဒ်ဓါတ်ငွေ့ဖြစ်၏။ ဤဓါတ်ငွေ့လည်း အသက်ဘေးအတွက် အန္တရာယ်ရှိပါသည်။ လေထဲတွင် ထိုဓါတ်ငွေ့ပါဝင်နှုံး ၂၅ ppm ထက် မပိုစေရပါ။ ထိုဓါတ်ငွေ့မှာ အင်ဂျင်များမှထုတ်လိုက်သော အိတ်ဇော မီးခိုးငွေ့တွင် ပါသည်။ ထို့ကြောင့် ကွန်ဖိုင်းစပေ့စ်အပေါက်ဝအနီး သို့မဟုတ် ကွန်ဖိုင်းစပေ့စ် အပေါက်ဝဘက်သို့လှည့်ကာ အင်ဂျင်အိတ်ဇော ပိုက်များ မထားမိစေရန် အလွန်အရေးကြီးသည်။ ကွန်ဖိုင်းစပေ့စ်အတွင်းသို့ မီးခိုးများဝင်သွားလျှင် အတွင်း၌ အလုပ်လုပ်နေသူများအတွက် အလွန် အန္တရာယ်များပါသည်။

ဤတွင် ppm ဟူသည် parts per million ဖြစ်ပြီး ပါဝင်နှုံးကို ဖော်ပြသောယူနစ်ဖြစ်၏။ ရေထဲတွင်ဓါတ်ဆား၊ ဓါတုဗေဒပစ္စည်းများ ပါဝင်မှု၊ လေထဲတွင် အမှုန်အမှိုက်များ၊ ဓါတ်ငွေ့များပါဝင်မှု စသဖြင့် ဖြစ်၏။ 

နောက်အရေးကြီးသော ဓါတ်ငွေ့မှာ မီးလောင်စေတတ်၊ ပေါက်ကွဲစေတတ်သော ဓါတ်ငွေ့များရှိမှု ဖြစ်၏။ မီးလောင်နိုင်မှုကို LEL (Lower Flammable Limit) ~ UEL (Upper Flammable Limit) ဖြင့်ပြသည်။

ကွန်ဖိုင်းစပေ့စ်အတွက် တိုင်းတာသော ဓါတ်ငွေ့မီတာတွင် ထိုဓါတ်ငွေ့ ၄ မျိုးအဓိကပါသည်။ ကွန်ဖိုင်းစပေ့စ်အတွင်းမ၀င်မီ ထိုဓါတ်ငွေ့များကို ဦးစွာတိုင်းကြည့်ရသည်။ စိတ်ချရသော အခြေအနေရှိမှ ၀င်ခွင့်ပြုရသည်။ အကယ်၍ ကွန်ဖိုင်းစပေ့စ်အတွင်းတွင် ထိုဓါတ်ငွေ့များ များနေ၊ နည်းနေပါက စိတ်ချရသည့်အခြေအနေရောက်အောင် ပြုပြင်ပေးရသည်။ အဓိကလုပ်ရသည်မှာ လေမှုတ်သွင်းခြင်း ဖြစ်ပါသည်။ ပြင်ပမှ သန့်ရှင်းလတ်ဆတ်သောလေများကို ကွန်ဖိုင်းစပေ့စ်အတွင်း မှုတ်သွင်းလိုက်ပါက မကောင်းသောဓါတ်ငွေ့ဆိုးများ ထွက်သွားမည်။ ထို့အတူ အောက်ဆီဂျင်ပါသော လေသန့်များလည်း ၀င်ရောက်နေရာယူလာမည်။ လေမှုတ်သွင်းပြီးလျှင် ဓါတ်ငွေ့ကို ထပ်မံတိုင်းတာကြည့်ရပါသည်။ စိတ်ချရသည့်အခြေအနေရောက်မှ ၀င်ခွင့်ပြုရသည်။ မဟုတ်လျှင် အသက်အန္တရာယ်ရှိသည်။

            နောက် ကွန်ဖိုင်းစပေ့စ် assessor လုပ်ရသည့်လုပ်ငန်းတစ်ခုမှာ သည် ကွန်ဖိုင်းစပေ့စ်အတွင်းသို့ မသက်ဆိုင်သူများ မ၀င်နိုင်စေ ရန်တားဆီးရေး ဖြစ်ပါသည်။ ၀င်ပေါက်တစ်ခုသာချန်ထားလျှက် အခြားဝင်နိုင်မည့်အပေါက်မှန်သမျှ ခြံခတ်ထား၊ သတိပေးစာတမ်းများ ချိတ်ဆွဲထားရပါသည်။ ၀င်ပေါက်တွင်မူ ကင်းသမားက ၀င်မည့်သူများကို စီစစ်လက်ခံပါလိမ့်မည်။

            မိမိစစ်ဆေးပေးထားသောနေရာသည် အန္တရာယ်ကင်းကင်းရှိနေမနေကိုလည်း ကွန်ဖိုင်းစပေ့စ်အတွင်း၌ အလုပ်သမားများ အလုပ်လုပ်နေစဉ်ကာလပတ်လုံး စောင့်ကြည့်စစ်ဆေးနေရသည်။ အဓိကမှာ အထက်တွင်ဖော်ပြခဲ့သကဲ့သို့ ဓါတ်ငွေ့ပမာဏကို တိုင်းတာခြင်း ပင်ဖြစ်ပါသည်။  

            တစ်နေ့တာကုန်ဆုံး၍ အလုပ်သိမ်းပြီဆိုလျှင် ထိုကွန်ဖိုင်းစပေ့စ်အတွင်းမှ (၀င်သွားသော) လူအားလုံးပြန်ထွက်လာမလာ။ လူများ ကျန်နေမနေ စသည်တို့ကို စစ်ဆေးရသည်။ ထို့နောက် ၀င်ပေါက်ကို သေချာကျနစွာ ပိတ်ခဲ့ရသည်။ မ၀င်ရ ဟူသော ဆိုင်းဘုတ်ကိုလည်း အ၀တွင် ထောင်ခဲ့ရပါမည်။ ထို့နောက် ကွန်ဖိုင်းစပေ့စ်ပါမစ်ကို ရုပ်သိမ်းရသည်။ ဤသို့ပါမစ်ကို ရုပ်သိမ်းလိုက်ခြင်းဖြင့် မည်သူမှ ၀င်ခွင့်မရှိ တော့ပါ။

            ဤသည်တို့ကို Confined Space Safety Assessor Course တွင် သေသေချာချာသင်ပေးပါသည်။ ဓါတ်ငွေ့မီတာ ဖတ်ပုံဖတ် နည်း။ အရေးပေါ်အခြေနေများတွင် အထဲမှလူကို အပြင်ကယ်ထုတ်နည်း စသဖြင့်လည်း လက်တွေ့လုပ်ရပါသည်။ ဤသင်တန်းစာမေးပွဲ အောင်လျှင် လက်မှတ်ထုတ်ပေးပါသည်။ ထိုလက်မှတ်ရှိသူမှသာ ကွန်ဖိုင်းစပေ့စ်ကို စစ်ဆေးသူ (Confined Space Safety Assessor) လုပ်ခွင့် ရှိပါသည်။

 

 (၉၂) ကျွန်ုပ် Confined Space Safety Assessor ဖြစ်ရပြန်ခြင်း

            ကျွန်ုပ်ကား ဘ၀စုံလှ၏။ ယခု ကွန်ဖိုင်းစပေ့စ်အဆက်ဆာ ဆိုလား ဖြစ်ရပြန်ပါသည်။ သည်သင်တန်းကို ၂၀၀၇ သြဂုတ်လ ၆ ရက် မှ ၂၇ ရက်ထိ၊ Red Hill ရှိ NTUC Learning Hub တွင်တက်ရခြင်းဖြစ်သည်။ သင်တန်းပြီးပြီးချင်း လက်မှတ်ရတာမဟုတ်။ စာမေးပွဲ အောင်စာရင်းစောင့်ရသေးသည်။ သို့အတွက် သင်တန်းပြီးနောက် နှစ်ပတ်ကြာမှ လက်မှတ်ရမည်။ သို့သော် အလုပ်ကအရေးကြီးလှပြီ။ ဗိုက်နာနေသော ကိုယ်ဝန်ဆောင်သည် မအောင့်နိုင်တော့သကဲ့သို့ လက်မှတ်ရအောင်ပင် မစောင့်နိုင်တော့ဘဲ သင်တန်းလည်းပြီးရော သင်တန်းပြီးပါပြီဟူသော စာကိုယူခဲ့စေကာ ထိုစာနှင့် ချက်ချင်းစလုပ်စေလေတော့၏။ ဒါတောင် ကျွန်တော်တို့မန်နေဂျာက မင်း၊ စာမေးပွဲ အောင်ပါ့မလား လို့ ဂျေဗီကမေးနေတယ် ဟု ပြောလေရာ ကျွန်ုပ်လည်း စိတ်ချင်ပေါက်လှသည်နှင့် ကုန်းပေါ်မှာမပြောနဲ့၊ ရေထဲမှာငုပ်ပြီး ဖြေရင်တောင်အောင်တယ်လို့ ပြောလိုက်ပါကွာ ဟု အငေါ်တူးလိုက်လေ၏။

သို့နှင့် ၂၀၀၇ ခုနှစ် စက်တင်ဘာလ ၆ ရက်နေ့မှစကာ ကွန်ဖိုင်းစပေ့စ်အဆက်ဆာဘ၀သို့ ကူးပြောင်းရပြန်လေတော့သတည်း။

            အထက်တွင်ပြောခဲ့သလို ကျွန်တော်ပထမဦးဆုံးစလုပ်ရသည်မှာ စာရွက်စာတမ်းကိစ္စများ ပြင်ရခြင်းဖြစ်၏။ သို့သော်လည်း ပေါ့လေ။ သည်စာရွက်စာတမ်းများကို သင်တန်းမပြီးခင် ပြင်ဆင်ထားတာ အားလုံးပြီးနေပါပြီ။ သို့သော်လည်း သူတို့စည်းမျဉ်းစည်းကမ်း အရ တင်လို့မရသေး။ သည်စာရွက်စာတမ်းများကို Certified Competent Person က ပြင်ထားတာပါဟု သက်သေပြလို့ရအောင် သင်တန်းပြီး အောင်စောင့်နေရသေးသည်။ သင်တန်းပြီးသည်နှင့် ကျွန်တော်လက်မှတ်ထိုးကာ ချက်ခြင်းကောက်ကက် တင်လိုက်ခြင်းဖြစ်၏။ ကျန်သည့် ကွန်ဖိုင်းစပေ့စ်တွင်လုပ်ရန်လိုအပ်သော ပစ္စည်းပစ္စယများမှာ အားလုံးအဆင်သင့်ဖြစ်နေပြီ။ ကျွန်တော်သင်တန်းအပြီးကို စောင့်နေရခြင်း ဖြစ်၏။ 

သို့ဆိုလျှင် အဘယ်ကြောင့် သည်မျှအရေးတကြီး လိုနေရပါသနည်း။ မိတ်ဆွေတို့သိအောင် ရှင်းပြပါမည်။ အနည်းငယ်ရှည်လျှင် သည်းခံဖတ်ပါခင်ဗျား။

ကျွန်တော်တို့ကုမ္ပဏီ (ယူနီယမ်အလွိုင်း) မှလုပ်ရသည်မှာ အီးစီစီစက်ရုံကြီးအတွက် မြေအောက်တွင်ပြေးသော အအေးခံရေပိုက် လိုင်းများ သွယ်တန်းပေးရခြင်းဖြစ်ပါသည်။ ပိုက်ဆိုလို့ ကယော်ကမယ်ပိုက်ကလေး မမှတ်ပါနှင့်ခင်ဗျား။ ကျွန်တော်တို့ပိုက်ကြီးမှာ အချင်း ၂.၇ မီတာ (၉ ပေခန့်) ရှိလေရာ အထဲသို့ မြင်းစီးဝင်လို့ရသည်။ ပိုက်အမျိုးအစားမှာ GRP (Glass Reinforced Plastic) ပိုက်ဖြစ်သည်။ ပိုက်များကို ဖန်မျှင်နှင့် ဓါတုဗေဒဆေးရည်များ ပေါင်းစပ်ထုတ်လုပ်ထားခြင်းဖြစ်သည်။ သုံးသော ဓါတုဆေးရည်မှာ ပိုလီယက်စတာ (Polyester Resin) ဖြစ်သည်။

ပိုက်များမှာ အီတလီမှလာသော ပိုက်များဖြစ်၏။ ထိုပိုက်များတပ်ဆင်ရာတွင် ကြီးကြပ်သည့်ကုမ္ပဏီမှာ ဂရုတင့် (Grootint) ဖြစ်၏။ ၎င်းတို့မှာ နယ်သာလင်နိုင်ငံမှ ဖြစ်သည်။ မန်နေဂျာမှာ ဖရင့် (Frank) ဖြစ်သည်။ ဟန်ဂေရီမှ ဖြစ်၏။ ကျွန်တော်တို့ကုမ္ပဏီက ပိုက်များ ဆင်ရေးတာဝန်ယူသည်။ သို့သော်လည်း ကျွန်တော်တို့က ကြည့်ရှု ကြီးကြပ်ပေးရုံသာဖြစ်ပြီး ပိုက်ဆင်လုပ်ငန်းအားလုံးကို ၀ီကွမ်း (Wecom) သို့ပေးထားခြင်းဖြစ်၏။

ဆင်တာက ၀ီကွမ်း၊ ကြီးကြပ်တာက ဂရုတင့် ဆိုတော့ ကျွန်တော်တို့ ယူနီယမ်အလွိုင်းက ဘာမှ လုပ်စရာမလိုပါ။ တကယ်ဆို ယူနီယမ်အလွိုင်းက သည်ပရောဂျက်တွင် ဘယ်နှဦးရှိပါသနည်း။ ပြေးရေကြည့်လိုက်မှ ကျွန်တော်နှင့် ကျွန်တော့်မန်နေဂျာ မယ်လ်ဘင်း နှစ်ဦးသာရှိသည်။ ကျွန်တော်က ပိုက်များဆင်ပြီးသည့်အခြေအနေ မယ်လ်ဘင်းကို သတင်းပို့သည်။ မယ်လ်ဘင်းက ပိုက်ဆံတောင်းသည့် ကိစ္စလုပ်သည်။ အင်မတန်နားအေးပါးအေး ရှိလှ၏။

ပိုက်နှင့်ပိုက်ကို ဆက်ရာတွင်လည်းကောင်း၊ ပိုက်နှင့်ပိုက်ဆက်ပစ္စည်းများကို ဆက်ရာတွင်လည်းကောင်း ဖိုက်ဘာအ၀တ်စနှင့် ပိုလီယက်စတာရီဇင်များသုံး၍ ဆက်ရသည်။ ၎င်းကို လာမနိတ်(laminate) လုပ်သည်ဟုခေါ်သည်။ ယခင်ဆောင်းပါးများတွင်လည်း ဖော်ပြခဲ့ပြီးဖြစ်ပါသည်။

လာမနိတ်လုပ်သည်ဆိုခြင်းမှာ ပိုက်ကြီးများကို ဦးစွာ အပေါ်ယံမျက်နှာပြင်များ ပြောင်သွားအောင် ကျောက်စက်ဖြင့်စားရသည်။ ထို့နောက် လာမနိတ်လုပ်ရာတွင်သုံးမည့် ဆေးကိုစပ်ပြီး ဆေးသုတ်လိုက် ဖိုက်ဘာစများနှင့်ပတ်လိုက်ဖြင့် တစ်ထပ်ပြီးတစ်ထပ် လိုသော အထူရသည်ထိ လုပ်သွားရခြင်း ဖြစ်သည်။

ဆေးတွင် ရီဇင် (resin) နှင့် ကက်တလစ် (catalyst) ဟု နှစ်ပိုင်းရှိသည်။ လာမနိတ်လုပ်တော့မည်ဆိုမှ ရီဇင်နှင့် ကက်တလစ်ကို ၁၀၀း ၁ အချိုးဖြင့် ရောသည်။ မှားလို့မရ။ အရောမှားလျှင် ကောင်းကောင်းဒုက္ခ များမည်။ သည်အကြောင်းများ ရှေ့တွင်ရေခဲ့ပြီးဖြစ်၍ ထပ်လေမရှည်တော့ပါ။

ရီဇင်ကို သော်လည်းကောင်း ကက်တလစ်ကိုသော်လည်းကောင်း သည်အတိုင်းထားလျှင် အငွေ့သိပ်မထွက်ပါ။ ခြောက်လည်း မခြောက်ပါ။ သို့သော် သူတို့နှစ်ခုကို စပ်လိုက်လျှင် ဓါတ်ငွေ့များထွက်လာသည်။ ဆေးထဲတွင် စတိုင်ရင်းပါသည်။ စတိုင်ရင်းနှင့်ကြာရှည် ထိတွေ့ပါက ကင်ဆာဖြစ်နိုင်ချေရှိသည်။ ထို့ကြောင့် လာမနိတ်လုပ်ရာတွင် အလုပ်သမားများ ထိုဓါတ်ငွေ့များနှင့် ကြာရှည်ထိတွေ့နေရမည် ဖြစ်၍ ထိုဓါတ်ငွေ့ပမာဏကို လျှော့ချပေးရန်လိုသည်။

ထို့ပြင်တ၀ လာမနိတ်လုပ်ရာတွင် ပိုက်ကို အပြင်ပိုင်းတွင်သာ လုပ်ရသည်မဟုတ်။ အတွင်းဘက်ကပါ လုပ်ပေးရသည်။ ပိုက်အပြင် ဘက်တွင်တော့ လေဟာနယ်ဖြစ်လေရာ ဓါတ်ငွေ့များမှာ လေတိုက်သဖြင့် ပျောက်ပျက်သွားသည်။ သိပ်ပြဿနာမရှိ။ သို့သော်လည်း ချက်ချင်းပျောက်ပျက်သွားသည်မဟုတ်ရကား ထိုဓါတ်ငွေ့များကို မရှူမိစေရန် အသက်ရှူကိရိယာ နှာခေါင်းစွပ် (Respirator) ၀တ်ဆင်ထား ရသေးသည်။  

ပိုက်၏အတွင်းဘက်တွင် လာမနိတ်လုပ်လျှင်မူ လာမနိတ်လုပ်ရာမှ ထွက်လာသောဓါတ်ငွေ့များမှာ အခြားသို့ထွက်သွားဘို့ရာ မလွယ်။ ပိုက်အထဲတွင်ပင် လှည့်နေမည်ဖြစ်ရာ အလုပ်သမားများအတွက် အန္တရာယ်များလှသည်။ ထိုအခါ ထိုဓါတ်ငွေ့များကို လျှော့ချဘို့ရာ တစ်နည်းအားဖြင့်ပြောရလျှင် ပိုက်အတွင်းတွင် စိတ်ချလက်ချ လာမနိတ်လုပ်နိုင်စေရန် ကွန်ဖိုင်းစပေ့စ်အဆက်ဆာ လိုလာသည်။ 

ထိုမျှမကသေး။ စင်ကာပူဥပဒေအရ ၁ မီတာခွဲထက် နက်သောမြောင်းဆိုလျှင် ကွန်ဖိုင်းစပေ့စ်ဟု သတ်မှတ်သည်။ ၂.၇ မီတာ ရှိသည့် ကျွန်တော်တို့ပိုက်ကြီးများချရန် တူးရသောမြောင်းမှာ ဖို့မှာရောဘာရောဆို ၄ မီတာကျော်နက်လေရာ ထိုမြောင်းကြီးများမှာ အကျယ် ကြီးပင် ဖြစ်သော်ငြားလည်း ကွန်ဖိုင်းစပေ့စ်ဟု သတ်မှတ်သောဟူ၏။ သည်တော့ သည်မြောင်းအတွင်း အလုပ်ဝင်လုပ်ဘို့ရာ၊ ပိုက်အတွင်း ၀င်ပြီး လာမနိတ်လုပ်ဘို့ရာ ကွန်ဖိုင်းစပေ့စ်အဆက်ဆာ ရှိမှဖြစ်မည်။ သူ၏ခွင့်ပြုချက်ဖြင့်သာ အလုပ်လုပ်လို့ရမည်။ ယခု ယူနီယမ်အလွိုင်း တွင် ကွန်ဖိုင်းစပေ့စ်အဆက်ဆာ မရှိ။ သည်တော့ ပိုက်ကြီးများကို မြောင်းထဲချပြီး သည်အတိုင်းကြည့်နေရသည်။ ဘာမှ ဆက်လုပ်လို့မရ။

ဤတွင် မယ်လ်ဘင်းက သင်္ဘောကျင်း၌ နားအေးပါးအေး ပုံဆွဲလိုက်၊ ငိုက်လိုက် လုပ်နေသည့် ကျွန်တော့်ကို အတင်းရော၊ အဓမ္မပါခေါ်ပါလေတော့၏။ ကျွန်တော့်မှာ မရင်းတက္ကနစ်မှ ကုလားမကြီးညစ်ပတ်သဖြင့် ၃ နှစ်စာချုပ်နှင့်ငြိနေရာ ထိုအကြောင်း မယ်လ်ဘင်း ကို ပြောပြလေရာ လျော်သာလျော်လိုက်ပါကွာ၊ ငါအကုန်ပြန်ပေးပါ့မယ် ဆိုလေ၏။ ထိုကြောင့် ကျွန်တော်လည်း မရင်းတက္ကနစ်မှ နေ့မဆိုင်း၊ ညမဆိုင်း အလုပ်ထွက်စာတင်ကာ လိုအပ်သောသင်တန်းများတက်ပြီး ယူနီယမ်အလွိုင်းသို့ အသိုက်ပြောင်းခဲ့ခြင်း ဖြစ်သတည်း။

            သည်မျှဆိုလျှင် အဘယ်ကြောင့် ယူနီယမ်အလွိုင်းမှ ကွန်ဖိုင်းစပေ့စ်အဆက်ဆာ အသည်းအပြင်းလိုနေကြောင်း မိတ်ဆွေတို့ ရိပ်စားမိလောက်ပါပြီ။ သည်လိုနှင့် ကျွန်တော့်မှာ အင်ဂျင်နီယာဘ၀မှ အရှင်လတ်လတ် ဘ၀ပြောင်းကာ ကွန်ဖိုင်းစပေ့စ်အဆက်ဆာ ဆိုတာ ကြီး ဖြစ်လာရခြင်း ဖြစ်လေသည်။

 

ဆက်ပါဦးမည်။

 

အေးငြိမ်း

၁၇-၁၀-၂၀၁၂၊ ည ၁၁း၁၇ နာရီ

Blk 663D, Jurong West St 65

#15-233

Singapore 644663

Email: y_nyein@yahoo.com.sg, aye475@gmail.com

Tel: 97303027

http://shwenyein.blogspot.com