Sunday, July 14, 2019

မြန်မာတို့၏ အားနာခြင်း အလေ့


(၁) အားနာခြင်းကြောင့် အလုပ်များ နှောင့်နှေးကြန့်ကြာရပုံ

 တမြန်မနေ့က ကျွန်ုပ်စာအုပ် ထုတ်ဝေရေးကိစ္စနှင့်ပတ်သက်၍ မိတ်ဆွေတစ်ဦးနှင့် စကားပြောဖြစ်၏။ အကြောင်းမှာ အဘယ်ကြောင့် သည် စာအုပ်ထွက်လာဘို့အရေး သည်မျှလိပ်ခဲတည်းလည်း ဖြစ်နေရသနည်းဆိုတာ သိလို၍ ဖြစ်၏။ သူက သက်ဆိုင်သူများထံ စုံစမ်းကြည့်သော် ကိစ္စအနည်းငယ်ရှိ၍ ရှေ့ဆက်မရလို့ဟု ဆိုပါသည်။ ဘာအခက်အခဲတွေများတုံးကွယ်ဟု မေးလေသော် သူက ကျွန်ုပ်စာအုပ်ပါ အချို့အသုံးအနှုန်းများမှာ သူတို့သတ်မှတ်ထားသည့် ဘာသာပြန်ဝေါဟာရများနှင့် မကိုက်ညီသောကြောင့် ပုံနှိပ်လို့မရဖြစ်နေကြောင်း အကြောင်းပြန်သည်ဟု ပြောပါသည်။

ဒါများကွယ်၊ ကျမတို့ဆီမှာတော့ ဟောသလိုသုံးပါတယ်။ ဒီမှာရေးထားတာတွေကတော့ ဒီလိုဖြစ်နေပါတယ်။ အဲဒါလေးတွေ ပြင်ပေးပါဆို ပြီးတာပဲမဟုတ်လား ဆိုတော့ သူတို့က အားနာလို့ မပြောတာပါ တဲ့။ ဟိုက် ရှားဘားစ်။


(၂) အားနာတယ်ဆိုတာ ကောင်းသလား

 အားနာခြင်း ဆိုသည်မှာ -

ကိုယ်လုပ်ချင်ရက်နှင့် မလုပ်ဘဲ အောင့်အည်းနေရတာ၊ ပြောချင်ရက်သားနှင့် မပြောဘဲ အောင့်အည်းထားရတာ။
ကိုယ်မလုပ်ချင်ဘဲ လုပ်ပေးလိုက်ရတာ၊ မပြောချင်ဘဲ အောင့်သက်သက်နှင့် အတင်းဖြစ်ညှစ် ပြောလိုက်ရတာ။

- ဖြစ်ပါသည်။

အခြားလူမျိုးများအကြောင်း နှံ့နှံ့စပ်စပ်မသိသောကြောင့် အခြားလူမျိုးများတွင် အားနာခြင်းအလေ့ ရှိမရှိကို ကျွန်ုပ် သေသေချာချာ မသိပါ။ သို့သော် မြန်မာလူ့အသိုင်းအဝိုင်း၊ မြန်မာ့လူနေမှုစနစ်တွင်တော့ အားနာခြင်းအလေ့သည် ရှိ၏။

အားနာတာ ကောင်းသလား၊ မကောင်းဘူးလား ဆိုသည်ကို တရားသေ ဆုံးဖြတ်လို့မရ။ အခြေအနေ၊ အချိန်အခါကို လိုက်၍ ဆုံးဖြတ်ရပါမည်။ အားနာတိုင်းမကောင်းပါ။ အားနာခြင်းသည် တခါတရံကောင်း၍ တခါတရံမကောင်းပါ။
ကျွန်တော့်ကို ရှင်းပြခွင့်ပြုပါခင်ဗျား။

အထက်ဖြော်ပပါ ကျွန်တော့်စာအုပ်နမူနာကိုကြည့်ပါ။

ကျွန်တော် သည်စာအုပ်ကို အတော်အားထည့် ဘာသာပြန်ဆိုထားမှန်း သူတို့သိပါသည်။ သည့်အတွက် ကျွန်တော့်ကိုလည်း လေးစားပါသည်။ ထိုအခါ ကျွန်တော့်စာများကို ပြင်ပေးဘို့ပြောရမှာ အလွန် ဝန်လေးနေပါသည်။ ပြောရမှာ အားနာနေသည်။

ကျွန်တော့်အဖို့မူ ကျွန်တော်သည် ဘုရားမဟုတ်မူ၍ ငါချည်းမှန်ရမည်။ ငါလုပ်တာသာအမှန်ဟု မယူဆပါ။ သူတို့ဆီက စံချိန်စံညွှန်း အသုံးအနှုန်းများကိုလည်း မသိ၍ ကျွန်တော် အဆင်အပြေဆုံးဟု ထင်သည့်စကားလုံးများနှင့် ဘာသာပြန်ထားတာ ဖြစ်ပါသည်။ သို့အတွက် သူတို့သတ်မှတ်ထားသည့် ဝေါဟာရများနှင့် မကိုက်ညီဆိုလျှင် ပြင်ပေးဘို့ရာ ဘာမှ ဝန်လေးစရာအကြောင်း မရှိပါ။

တစ်ခုတော့ရှိပါသည်။ ဝေါဟာရများကို ဘာသာပြန်ရာတွင် ဝေါဟာရကို သုံးနှုန်းထားသည့် နယ်ပယ်အလိုက် အဓိပ္ပာယ်ကွာသွား နိုင်ပါသည်။ သူတို့ပြန်ဆိုထားသည့် ဝေါဟာရသည် မူရင်းစာအုပ်မှ ဆိုလိုချက်နှင့် အဓိပ္ပာယ်ကွဲလွဲနေပါမူ ကျွန်တော့်အနေနှင့် လက်ခံနိုင်မည် မဟုတ်ပါ။ သို့တိုင် ဘယ်စာလုံးများက ဘာဆိုတာ ကျွန်တော်ဘာမှမသိရသေးဘဲ မည်ကဲ့သို့ သဘောတူသည်၊ မတူ ဆိုသည်ကို ပြောနိုင်ပါမည်နည်း။

ယခုကဲ့သို့ ကျွန်တော့်ကို အားနာလို့မပြောပဲ နေရုံမျှနှင့် ကိစ္စပြီးသွားပါမည်လား။ မည်သည့်နည်းနှင့်မှ မပြီးနိုင်ဆိုသည်ကို မိတ်ဆွေ တုိ့ သိပါသည်။ သည့်အတွက် သည်နေရာတွင် အားနာခြင်းကို ကောင်းသည်ဟု မည်သည့်နည်းနှင့်မှ မဆိုနိုင်ပါ။

တကယ်ဆို ဦးအေးငြိမ်းရေ့၊ ဒီစကားလုံးတွေကတော့ဖြင့် ဒီလိုရှိပါတယ် ဟု ပွင့်ပွင့်လင်းလင်းပြောလိုက်လျှင် သည့်ထက်ပိုရှင်းသွား မည်ဖြစ်ပါသည်။ ကျွန်တော်လက်ခံနိုင်လျှင် လက်ခံနိုင်ပါသည်ဟု ပြောမည်။ လက်မခံနိုင်လျှင်လည်း အဘယ်ကြောင့်ဆိုသည်ကို ပြန်ရှင်းရုံ၊ ပြန်လည်ညှိနှိုင်းကြရုံသာ ဖြစ်ပါသည်။ လိုအပ်လျှင် ကျွန်တော် ရန်ကုန်သွားချင်သွားမည်။ သို့မှ ကိစ္စတစ်ခု ပြီးပြတ်မည် ဖြစ်၏။

ဤနေရာတွင် အားနာခြင်းနှင့် ပွင့်လင်းခြင်းသည် ဖြောင့်ဖြောင့်ကြီး ဆန့်ကျင်နေလေ၏။


(၃) အားနာခြင်း နှင့် အလိုက်သိခြင်း ဆက်စပ်နေပုံ

အချို့နေရာများတွင် အားနာ၍ မပြောလိုက်ခြင်းကြောင့် အချင်းချင်း အထင်အမြင်လွဲသွားတတ်တာတွေတောင် ရှိပါသည်။ တကယ်ဆို ဘာမှ အရေးကြီးသော ကိစ္စတောင်မှ မဟုတ်နိုင်ပါ။ သည်ကိစ္စ ပွင့်ပွင့်လင်းလင်း ဖွင့်ပြောလိုက်လျှင် ပြီးသွားနိုင်သည်။ တဖက်ကလည်း ဘာကြောင့်ဆိုတာ မမေး။ သူ့စိတ်ထဲ သူ့ဘာသာ ယုံထင်ကြောင်ထင် ရမ်းထင်နေလေ၏။ ထိုအခါ အချင်းချင်း မိတ်ပျက်ရသည်။ အခင်မင်ပျက်ရသည်။ ဤသည်မှာ အားနာခြင်း၏ ဆိုးကျိုးဖြစ်၏။

ကြည့်ပါအုံးဟယ်။ သူတို့ဟာနဲ့သူတို့တောင် မနည်းအနိုင်နိုင် နေနေရတာကို။ သူ့မို့လို့ အားမနာလျှာမကျိုး။ တစ်လကိုးသီတင်း တက်စားနေရက်တယ်။ ဟိုက အားနာလို့ ဘာမှမပြောဘဲနေတာ။ သိကိုမသိတတ်ဘူး။

အထက်ပါစကားများကိုလည်း မိတ်ဆွေတို့ ပတ်ဝန်းကျင်တွင် ကြားဖူးကြပါလိမ့်မည်။
တကယ်လည်းလက်တွေ့တွင် ရှိ၏။

ကိုယ့်မိသားစုအတွက်တောင် မနည်းရုန်းကန်နေရသည့် ရန်ကုန်မှအိမ်တစ်အိမ်သို့ နယ်မှ ဆွေမျိုးနီးစပ်တော်သူများက ဆေးကုရန် အကြောင်းပြကာ တစ်ဆွေလုံးတစ်မျိုးလုံး တစ်လကိုးသီတင်း လာနေသည့်ကိစ္စ။

ဤနေရာတွင် အားနာခြင်းမှာ နှစ်ဘက်စလုံး၌ ရှိပေလိမ့်မည်။

ပထမ ရန်ကုန်မှ အိမ်ရှင်များဘက်က ဖြစ်၏။
ကိုယ်နှင့်ဆွေမျိုးနီးစပ်တော်နေတာဆိုတော့ အထူးသဖြင့် လူကြီးမိဘများဖြစ်နေသည့်အတွက် ကျွန်တော်တို့တော့ဖြင့် မတတ်နိုင် တော့ဘူး။ မြန်မြန်ပြန်ကြပါတော့ ဟု မည်ကဲ့သို့ ပြောထွက်ပါမည်နည်း။ ပြောရမှာ အားနာလှသည်။

ဤအားနာခြင်းသည် ကောင်းပါသလော။ ကျွန်တော့်အလိုကိုပြောရပါမူ မကောင်းပါ။ ကိုယ်မတတ်နိုင်တာကြီးကို အတင်းဖြစ်ညှစ် ကျွေးထားစရာမလို။ ပွင့်ပွင့်လင်းလင်းပင် ဖွင့်ပြောရမည်ဟု ကျွန်တော်ထင်ပါသည်။ (ကျွန်တော်မှားချင်လည်း မှားပါလိမ့်မည်။)
အားနာလို့ ဖွင့်တော့မပြော။ သို့သော် ကြာလာသည့်အခါ ဟွန့်၊ သိကိုမသိတတ်ဘူး။ ဒီမှာဖြင့် ချေးငှားထားရတာတွေ။ အကြွေး လည်ပင်းခိုက်နေပြီ ဟု ငြိုငြင်လာပေလိမ့်မည်။

သဟာဆို လာနေသည့် ဧည့်သည်များဘက်ကရော။
တကယ်ဆို ရန်ကုန်မှာ ကုန်ဈေးနှုန်း အဘယ်မျှရှိသည်။ သူတို့ ဘာတွေဘယ်လို ကုန်ကျရသည်။ သူတို့ဝင်ငွေ အဘယ်မျှရှိသည်။ ငါတို့လာနေသည့်အတွက် သူတို့မှာ အဘယ်မျှ စရိတ်ပိုထောင်းသွားသည် စသည်တို့ကို တွက်ရပါမည်။ သူတို့က ကြည်ကြည်ဖြူဖြူ ကျွေးထားသည်ဆိုစေ။ ကိုယ်က အလိုက်သိရပါမည်။ အားနာရပါမည်။

သူတို့အိမ်မှာ တစ်လကိုးသီတင်းတည်းနေရမှာဆိုတော့ အလကားတက်စားနေရမှာ အားနာလို့ "ရော့ဟေ့၊ ငါတို့ ဆန်တစ်ခွဲ၊ ငါးပိက ၂ ပိဿာ၊ ဆီ ၁ ပိဿာ သယ်လာတယ်။" ဟု အလိုက်တသိ ကိုယ့်ရိက္ခာကိုယ် သယ်လာသည်ဆိုလျှင် မကောင်းပါ သလော။ အထူးပင် ကောင်းလှပေ၏။ ကျွေးမွေးထားရသူများအနေနှင့်လည်း ကြီးမြင့်လှသော ရန်ကုန်စရိတ်အတွက် ခုသာခံသာ ရှိပေလိမ့်မည်။

ဤသည့်အားနာခြင်းကိုမူ သေချာပေါက် ကောင်းသည်ဟု ဆိုရပါမည်။ ဤအားနာခြင်းမှာ အလိုက်သိခြင်းနှင့် တိုက်ရိုက်ဆက်စပ် နေပေ၏။

ကျွန်တော့်နှမအငယ်ဆုံးကလေးကတော့ ကိုယ်တွေများ သူများအိမ်နေတုံးကတော့ အလိုက်သိလိုက်ရတာ။ သူတို့များတော့ . . ဟု ညည်းပါသည်။ သူတို့အိမ်မှာနေတာဆိုတော့ အားနာတတ်ရသည်။ မကုန်သင့်တာမကုန်ရအောင် ရေကစ ချိုးခြံချွေတာ သုံးရ သည်။ မလိုအပ်ဘဲ မီးတွေ ဖွင့်မထားရ။ အလိုက်တသိနှင့် အိမ်သန့်ရှင်းရေး လုပ်ပေးတတ်ရသည်။ မိုးရွာလာလျှင် အဝတ်တွေ ရုပ်ပေးတာ။ ပြူတင်းပေါက်တွေ ပိတ်ပေးတာ ဆိုတာတွေမှာ ခိုင်းနေစရာကိုမလို။ အလိုလို အလိုက်တသိ လုပ်ပေးရတာတွေ ဖြစ်၏။ အဲသလောက်မှ မသိတတ်သူတွေအတွက်တော့ အိမ်ရှင်တွေမှာ စိတ်ညစ်ရသည်။ အကုသိုလ်များရသည်။


(၄) အားနာခြင်းနှင့် ပွင့်လင်းမှု

ဟိုတစ်နေ့က ကျွန်တော် Van Helsing ကား ကြည့်၏။ ဇာတ်ကားထဲတွင် မင်းသား တွမ်ခရုစ်ကို မင်းသမီးက တွေ့တွေ့ချင်း ပါးချလိုက်၏။ မင်းသားမှာ ဘုမသိဘမသိ ပါးချခံလိုက်ရ၍ အူကြောင်ကြောင် ဖြစ်သွားလေသည်။ နောက်မှ မင်းသမီးက နင်၊ ငါ့မြေပုံတွေကို ခိုးသွားတယ်မဟုတ်လား။ သူခိုး ဟု ဆိုမှ သူဘာကြောင့် ပါးအချခံရမှန်း သိရ၏။
(မှတ်ချက်။          ။ Van Helsing ကား version အတော်များများရှိ၏။ ကျွန်တော်ကြည့်သည့်ကားမှာ Tom Cruise ပါသည့်ကား ဖြစ်ပါသည်။)

ကျွန်တော်အနောက်တိုင်းမှလူများကို သဘောကျမိသည်မှာ သူတို့၏ ပွင့်ပွင့်လင်းလင်းရှိမှုကို ဖြစ်၏။ မကျေနပ်လျှင် ချက်ချင်း ထ နပန်းလုံးသည်။ နောက်ပြီးတော့ ပြီးသွားသည်။ စိတ်ထဲမှာ ဘာမှမထား။

ကျွန်တော်တို့ဆီမှာ ဤကဲ့သို့ပွင့်လင်းမှုကို တွေ့နိုင်ပါသလား။ မတွေ့နိုင်ပါ။ အဘယ်ကြောင့်နည်း။ အားနာမှုခံနေ၍ ဖြစ်ပါသည်။
ကျွန်တော်တို့ဆီကလူတွေမှာ မကြိုက်တာကို မကြိုက်ဘူးဟု ရှေ့တင်ပွင့်ပွင့်လင်းလင်းမပြောဘဲ နောက်ကွယ်ကျမှ အခြားသူ တစ်ယောက်ယောက်ကို တီးတိုးတီးတိုး သဖန်းပိုး လုပ်၏။ အတင်းပြောခံရသူကလည်း အငြိမ်မနေ။ အဲဒီကောင်မလေ၊ မနေ့က နင့်အတင်းလာတုတ်သွားတယ် ဟု သာသာထိုးထိုးလေး အညှောင့်ထောင်သည့်အခါတွင်မတော့ ပြဿနာ အကြီးအကျယ် တက်လေတော့၏။ အမှန်ဆို နင်ဒီလိုလုပ်တာ ဘာကောင်းသလဲ ဟု ရှေ့တွင် ပွင့်ပွင့်လင်းလင်းရှင်းလိုက်လျှင် ပြီးသည့်ကိစ္စ။ အားနာလို့ မပြောဘဲနေလိုက်သည့်အခါကျမှ အမုန်းပွားရလေတော့သတည်း။

ကျွန်တော်တို့လူ့အဖွဲ့အစည်းတွင် ပွင်းလင်းမြင်သာမှုဆိုသည့် စကားကို ယခု တွင်တွင်ကျယ်ကျယ် သုံးလာနေပြီ ဖြစ်ပါသည်။ အမှန်ဆို သည်စကားမှာ မြန်မာစကားဟုတ်ဟန်မတူပါ။ အင်္ဂလိပ်စကား transparency ကို ဘာသာပြန်ထားတာ ဖြစ်၏။ ပွင့်လင်း မြင်သာမှုဆိုသည့်စကားကို အင်္ဂလိပ်စကားမှ ယူသုံးရပြီဆိုကတည်းက မြန်မာတို့တွင် ယခင်ကတည်းက ပွင့်လင်းမြင်သာမှုဆိုတာ ရှိမနေ ဆိုတာကို သက်သေပြသကဲ့သို့ ဖြစ်နေပါသည်။

မြန်မာ့လူ့အဖွဲ့အစည်းတွင် ယခင်က ပွင့်လင်းမြင်သာမှုဆိုတာ မရှိခဲ့သကဲ့သို့ ယခုလည်း မရှိပါ။

ကျွန်ုပ်တို့သည် အားနာတယ် ဟုသာ တွင်တွင်အော်နေသော်လည်း တကယ်တော့ အားနာသူများ မဟုတ်ကြပါ။ တကယ်အားနာတတ်သူများသာ ဖြစ်လျှင် လူပေါင်း သန်းနှင့်ချီ သုံးနေသည့် ဖေ့စ်ဘုတ်တွင် - င်လှန်ပြသည့် ဗီဒီယိုကို တင်မည်မဟုတ်ပါ။  

အားမနာတတ်၍သာ လူအများသွားလာနေသည့် လမ်းလယ်ခေါင်တွင် ကားကို ပိတ်ရပ်ထားတာ ဖြစ်ပါသည်။
အားမနာတတ်၍သာ ခက်ခက်ခဲခဲရှာဖွေထားရသော ဖွတ်ကလိဒင်္ဂါးကလေးများကို ရက်ရက်စက်စက် ယူကြတာ ဖြစ်ပါသည်။
အားမနာတတ်၍သာ သန့်သန့်ရှင်းရှင်းရှိနေသည့်နေရာတွင် ကွမ်းတံတွေကို ပက်ခနဲ ထွေးကြတာ ဖြစ်ပါသည်။
အားမနာတတ်၍သာ ခွေးစာများကျွေးပြီး ခွေးလေခွေးလွင့်ဦးရေ ပိုများလာအောင် လုပ်နေကြတာ ဖြစ်ပါသည်။
အားမနာတတ်၍သာ အားမနာတတ်၍သာ အားမနာတတ်၍သာ . . . . .

အားမနာတမ်းပြောရလျှင် ကျွန်ုပ်တို့ လူ့ဘောင်အဖွဲ့အစည်းတွင် အားနာမှု မျိုးကန်းသွားသည်မှာ ဆယ်စုနှစ်အတော်များများပင် ကြာမြင့်ခဲ့ပြီ ဖြစ်ပါသည်။

နိဂုံးချုပ်ရလျှင် ကျွန်ုပ်လည်း မိတ်ဆွေတို့ကို အားမနာတတ်၍သာ ဤပို့စ်ကိုရေးပြီး မိတ်ဆွေများ၏ အချိန်များ၊ ဖုန်းဘေလ်များကို ဖြုန်းတီးခြင်း ဖြစ်ပါတော့သတည်း။


လူအချင်းချင်း အားနာခြင်း ကင်းရှင်းကြပါစေ။


ကျေးဇူးတင်ပါသည်။

အေးငြိမ်း
၁၄ ဇူလိုင်လ၊ ၂၀၁၉

Tuesday, July 9, 2019

ကျွန်ုပ်နှင့် နတ္ထိပစ္စယောအကြောင်း


ကျွန်ုပ်ငယ်စဉ်က ပဋ္ဌာန်းပစ္စယုဒ္ဒေသ နိဒ္ဒေသကို အကြိမ်ရေတော်တော်များများ ရွတ်ဖတ်ခဲ့ဖူးပါသည်။ ဘာတွေလဲ သိချင်သော ကြောင့် မြန်မာဘာသာပြန်ကိုလည်း ဖတ်ခဲ့၏။ သို့သော် အဓိပ္ပာယ်ကို သေသေချာချာ မသိခဲ့ပါ။ နန္ဒာသိန်းဇံက သူ့စာအုပ် (ဘဝ အဓိပ္ပာယ်နှင့် ဘဝသစ္စာ လား။ အတွေးအခေါ်တို့၏ လွင့်မျောခြင်းလား သေသေချာချာမမှတ်မိ) ထဲမှာ ရှင်းပြထား၍ အာသေဝန ပစ္စယောတစ်ခုကိုတော့ သေသေချာချာ နားလည်ခဲ့ပါသည်။

အထူးသဖြင့် နတ္ထိပစ္စယော ဆိုတာကို နားမလည်ခဲ့ပါ။ စာများကတော့ မရှိခြင်းအားဖြင့် ကျေးဇူးပြုခြင်းဟု ဘာသာပြန်ကြပါသည်။ သို့တိုင် ဘာကိုဆိုလိုမှန်း ကျွန်ုပ်နားမလည်ခဲ့ရိုးအမှန်ဖြစ်ပါသည်။

ယခု အသက်ကလေးရလာတော့ ဘဝအတွေ့အကြုံများပေါ်မီ၍ အချို့တရားများကို ကိုယ်တွေ့နားလည်ရ၏။

ယခု လူ့ဗရုသုက္ခတစ်ယောက်ကြောင့် လူပေါင်းများစွာ စိတ်ဆင်းရဲကြရ၊ မျက်ရည်ကျရ၊ ပိုက်ဆံကုန်ရ၊ အလုပ်ရှုပ်ကြရသည်ကို မိတ်ဆွေတို့ မျက်မြင်ကိုယ်တွေ့ဖြစ်သည်။ သည်ကိစ္စမဖြစ်လျှင် ဘာမှလုပ်စရာမလိုသော အလုပ်ပိုများစွာကို လုပ်ကြရသည်။ အသင်တို့လည်း ဟိုသတင်းစာရှင်းတာ ကြည့်လိုက်ရ။ ဒီပို့စ်အောက်မှာ ဝိုင်းသမလိုက်ရနှင့် အလွန် ဘေကုန်လှပေရော့မည်။ ရန်ကုန်၊ မန္တလေး၊ မုံရွာမြို့ကြီးများတွင် လူပေါင်းများစွာတို့ နေပူကျဲကျဲထဲ လမ်းလျှောက်ကြရသည်။

အမှန်ဆို သည်ဒွန္နယာကြီးတွင် အမှန်တကယ်လိုအပ်၍ လုပ်နေရသော အလုပ်ထက် အနှီကဲ့သို့ ကိုယ့်ကိုယ်ကိုယ်လည်း အကျိုး မပြု၊ မိသားစုကိုလည်း အကျိုးမပြု၊ တခြားသူကိုလည်းအကျိုးမပြု၊ နိုင်ငံကိုလည်း အကျိုးမပြု၊ လူ့လောကကြီးကိုလည်း အကျိုးမပြု၊ ခြုံ၍ပြောရလျှင် ဘယ်သူ့အတွက်၊ ဘာတစ်ခုမှ အကျိုးမရှိသော အလုပ်ဖြင့် အလုပ်ရှုပ်ကြရသည်က ပိုလို့တောင် များပါလိမ့်ဦးမည်။

အကယ်၍ အနှီဗရုတ်သုက္ခများသာ ဤလူ့ဘောင်လောကကြီးတွင်မရှိခဲ့ပါက ထိုအလုပ်ပိုများကို ဘာတစ်ခုမှ လုပ်စရာလိုတော့မှာ မဟုတ်။ လူအားလုံးသာ ကိုယ်လုပ်စရာရှိတာ ကိုယ့်ဘာသာကိုယ် ရိုးရိုးသားသား ကြိုးကြိုးစားစား လုပ်ကိုင်စားသောက်ကြပါမူ တရားရုံးဆိုတာ ရှိစရာလိုမည်မဟုတ်။ ရဲတို့၊ တရားရုံးတို့၊ ရှေ့နေတို့၊ တရားသူကြီးတို့၊ ထောင်တို့၊ ထောင်ပိုင်တို့၊ ထောင်မှူးတို့၊ ဝါဒါတို့ ဆိုတာလည်း ရှိတော့မည်မဟုတ်။ (အဲသလိုသာဆို အလုပ်လက်မဲ့တွေ အတော်များလာလိမ့်မယ်ထင်တယ်နော။)

ဤကဲ့သို့သော လူဆိုး၊ သူခိုးများ (သူခိုးဆိုတာ သူများပစ္စည်းကို တိတ်တိတ်တက်ခိုးတဲ့သူခိုးကိုပြောတာနော။ ဟိုလူကြီးတွေ မဆီမဆိုင် နာမနေနဲ့အုံး။) နည်းလေလေ။ အနှီ အလုပ်မဟုတ်သောအလုပ်များ နည်းလေလေ။ လူများ အေးအေးချမ်းချမ်း နေရလေ မဟုတ်ပါလော။

အနှီ ဗရုတ်သုက္ခများမရှိလျှင် လောကကြီး အတော်ချမ်းသာပေမည်။ ထိုဗရုတ်သုက္ခများကား မရှိခြင်းဖြင့် လောကကြီးကို ကျေးဇူးပြုလေသည်။ အနှီပင် နတ္ထိပစ္စယောဖြစ်တော့၏။

အမှန်တွင် နတ္ထိပစ္စယောကိုသာ လိမ္မာစွာ အသုံးချတတ်လျှင် နေရာတကာပင် အတော်ကောင်းကျိုးရှိလေသည်။

ကျွန်ုပ်တို့ ခန္ဓာကိုယ်တွင် ရောဂါတစ်ခုစွဲကပ်လာပြီဆိုလျှင် စိတ်ညစ်ရသည်၊ ပိုက်ဆံကုန်ရသည်၊ ကိုယ်သာမက မိသားစုဝင်များပါ အလုပ်ရှုပ်ကြရသည်။ ထို့ကြောင့် ဤရောဂါကို ပျောက်ကင်းအောင် ငွေထုပ်ပိုက်ကာ ကုသကြရ၏။ အကောင်းဆုံးမှာကား ရောဂါ မဖြစ်အောင် ကြိုတင်ကာကွယ်ခြင်းပင် ဖြစ်၏။ ဤသည်မှာလည်း နတ္ထိ ပစ္စယောပင် မဟုတ်ပါလော။ ရောဂါသည် ခန္ဓာကိုယ်တွင် မရှိခြင်းအားဖြင့် သတ္တဝါများကို ကျေးဇူးပြုသည်။ 

ကျွန်ုပ်က Safety သမားဖြစ်၍ Safety လောကတွင်လည်း နတ္ထိပစ္စယော မည်မျှအရေးကြီးကြောင်း နည်းနည်းလောက် ရှင်းပြ ပါရစေဦး။

Safety သမားမှန်လျှင် Hierarchy of Control ကိုသိသည်။ Hierarchy of Control တွင် ပထမဦးဆုံး၊ အကောင်းဆုံးနှင့် အထိရောက်ဆုံး ထိန်းချုပ်နည်းမှာ elimination ဖြစ်၏။ Elimination ကို မြန်မာလိုဘာသာပြန်ရလျှင် ဖျောက်ဖျက်ပစ်ခြင်း တစ်နည်းအားဖြင့် မရှိခြင်း ဖြစ်၏။ ဘာမရှိတာပါနည်း။ အန္တရာယ်မရှိတာဖြစ်၏။

ဘာအန္တရာယ်မှမရှိလျှင် ဘာဒဏ်ရာအနာတရမှ မဖြစ်နိုင်။ သည့်အတွက် ဘာအကာအကွယ်မှမလို။ ဘာပီပီအီးမှမလို။ တကယ့်ကို ဘာမှ လုပ်စရာမလိုတော့။ အင်မတန်ကောင်းလှပေ၏။ အန္တရာယ် (Hazard) သည် ကျွန်ုပ်တို့အား မရှိခြင်းဖြင့် ကျေးဇူးပြု၏။ ဘာဆူညံသံမှမရှိသော နေရာတွင် အသင်တို့သည် အဘယ်ကြောင့် နားအဆို့ (ear plug) ဝတ်စရာလိုပါမည်နည်း။ (ကျွန်ုပ်သင်တန်းမှ ပညာရှိများကတော့ ear plug ကို air blug ဟု စာလုံးပေါင်း၏။ မင်းတို့အဲသလို စာလုံးပေါင်းရင် ငါ စာမေးပွဲ ချပစ်မယ်ဟု ခြိမ်းခြောက်ထားရသည် ဟူ၏။ ထူးဆန်းပါပေ့ ဆတွတ်ရယ်။)

ကျောက်ဂွမ်း (Asbestos) သည် ကင်ဆာရောဂါကို ဖြစ်စေ၏။ ထို့ကြောင့် ၁၉၈၀ ခုနှစ်မှစတင်ကာ အမေရိကန်သည် ကျောက်ဂွမ်း ထုတ်လုပ်ခြင်း၊ ဖြန့်ဖြူးခြင်း၊ ရောင်းချခြင်း၊ သုံးစွဲခြင်း စသည်တို့ကို ဥပဒေထုတ်ကာ တားမြစ်လိုက်၏။ ကျောက်ဂွမ်းမရှိတော့ ကင်ဆာလည်း ဖြစ်စရာမရှိတော့။ သည်တော့ သည်ပစ္စည်းအတွက် ဘာမှ စိတ်အနှောက်အယှက် ဖြစ်စရာမရှိတော့။ ဟိုသင်တန်း တွေပေးရ၊ သည်ပစ္စည်းတွေဝယ်ရလည်း အလုပ်မရှုပ်ရတော့။ ကျောက်ဂွမ်းသည်လည်း မရှိခြင်းအားဖြင့် လူ့လောကကို အကျိုးပြု ပေသည်။

နတ္ထိပစ္စယော၏ ကျေးဇူးများပုံကိုသိ၍ ရှေးက သူတော်ကောင်းများမှာ တောထဲတွင် မည်သည့် ပိုင်ဆိုင်မှုမှမရှိဘဲ တရားဖြင့် မွေ့လျော်နေကြခြင်း ဖြစ်သတည်း။ သူတို့တွင် အရှက်လုံရုံ၊ အပူအအေးဒဏ်ခံနိုင်ရုံ အဝတ်သာရှိသည်။ နေစရာ ကျောင်းသင်္ခမ်း လည်းမရှိ။ သစ်ပင်၊ ဝါးပင်တို့ အောက်မှာသာ နေကြသည်။ သဘာဝသစ်ပင်များမှ သစ်သီး၊ သစ်ဥတို့ဖြင့် ရောင့်ရဲသည်။ လောဘတို့၊ ဒေါသတို့၊ မောဟတို့ဆိုတာ သူတို့ပစ္စည်းမဟုတ်။ ဘာမှပိုင်ဆိုင်မှုမရှိခြင်း၊ ဘာကိုမှ ပိုင်ဆိုင်လိုမှုမရှိခြင်းသည် ထိုသူတော်ကောင်းကြီးများကို များစွာကျေးဇူးပြုလေသည်။ (ကျွန်ုပ်လည်း သူတို့ကိုအားကျ၍ တောထွက်မည် ကြံပါသေးသည်။ သို့သော် ကျွန်ုပ်တို့ရွှေပြည်ကြီးတွင် ထွက်စရာတောမရှိတော့၍ ကိုယ့်ကိုယ်ကိုယ် အောင့်အည်းချုပ်ထိန်းထားရသော ဟူသတတ်။)

ကျွန်ုပ်တို့၌ မရှိခြင်းအားဖြင့် ကျေးဇူးပြုမည့် အရာသုံးခုသည် ရှိ၏။ ထိုအရာတို့ကား လောဘ၊ ဒေါသ၊ မောဟတည်းဟူသော ဟိတ်သုံးပါးဖြစ်သတည်း။ ပုထုဇဉ်လောကီလူသားများဖြစ်၍ ထိုသုံးပါးသည် ရှိကိုရှိနေပေမည်။ သို့သော် သည်အတိုင်းတော့ ထားလို့မရ။ နည်းနိုင်သမျှနည်းအောင် လုပ်ကြရမည်။ ထိုအရာများ နည်းပါးသွားလျှင် အထက်ပါ မလိုအပ်သည့် အလုပ်ရှုပ်သည့် ကိစ္စများသည်လည်း အတော်နည်းသွားပေမည်။

ယခု ဖြစ်နေကြရသည်မှာ ထို လောဘ၊ ဒေါသ၊ မောဟတို့ကို အထိန်းအကွပ်မရှိဘဲ သည်အတိုင်း လွှတ်ထား၍ဖြစ်၏။ ထိုအရာ တို့ကို ကောင်းမြတ်သောတရားများဖြစ်သည့် ဆင်ခြင်တုံတရား၊ ကိုယ်ချင်းစာတရားတို့ဖြင့် ထိန်းကွပ်ရာသည်။ တရားဆိုတာ လူကြားကောင်းရုံမျှ ဝတ်ကောင်းစားလှလေးဝတ်၊ တရားပွဲသို့ကြော့ကြော့လေးသွား၊ အချိန်တန်တော့ အများယောင်လို့ယောင်။ အမောင်တောင်မှန်းမြောက်မှန်းမသိဘဲ ယောယောင်ကာ သာဓု၊ သာဓုခေါ်ပြီး အိမ်ပြန်လာရုံမျှမဟုတ်။ လမ်းကိုပိတ်ကာ အသံချဲ့စက်ကြီး အလုံး (၃၀) လောက်နှင့် လူများနားမခံသာအောင် အသားကုန် အော်ဟစ်နေရုံမျှ မဟုတ်။

အသင်တို့သည် ကြီးကြီးကျယ်ကျယ် နိဗ္ဗာန်တွေ၊ နတ်မော်တွေ ပြောမနေကြပါနှင့်။ ဟိရီ၊ သြတပ္ပနှစ်လုံးလောက်ကို ကောင်းကောင်း၊ နိုင်နိုင်နင်းနင်း ကျင့်သုံးလျှင် ကိစ္စပြီးပါသည်။

(ဟင်္သာတမှ အိုင်သပြုသို့သွားသည့် ကားလမ်းတွင် အမျိုးသားပညာဝန် ဦးဖိုးကျား၏ ဇာတိဖြစ်သော နိဗ္ဗာန် အမည်ရှိသည့် ရွာကလေးသည် ရှိ၏။ နိဗ္ဗာန်မရောက်ခင် နတ်မော်ရှိသည်။ ထို့ကြောင့် ကျွန်ုပ်က နိဗ္ဗာန်တွေ၊ နတ်မော်တွေ ပြောမနေကြပါနှင့် ဟု ဆိုခြင်းဖြစ်၏။ ဤကား စကားချပ်)

အသင်တို့သည် မကောင်းမှု လုပ်ရမှာကို ကြောက်ကြပါကုန်လော့။ မကောင်းမှုလုပ်ရမှာကို ရှက်ကြပါကုန်လော့။

သည်လိုသာဆို လောကကြီး ယခုထက် ပိုမိုသာယာလှပလာသည်ကို တွေ့မြင်ကြရမည်ဖြစ်ကြောင်း ကျွန်ုပ်က ရဲရဲကြီး အာမခံလိုက်ပါသတည်း။

လူအချင်းချင်း မုဒိန်းကျင့်ခြင်း၊ ကင်းရှင်းကြပါစေ။

ကျေးဇူးတင်ပါသည်။

အေးငြိမ်း
၉ ဇူလိုင်လ၊ ၂၀၁၉

စာကြွင်း

သည်ကနေ့ စင်ကာပူသတင်းတွင် သူ့ဆီကျောင်းလာတက်သည့် ကျောင်းသူကလေးကို ဟိုကိုင်သည်ကိုင်လုပ်သည့် ကျူရှင်ဆရာ အား ထောင် ၂ နှစ် ၁ လ။ ကြိမ်ဒဏ် ၆ ချက် ပေးသည့်သတင်း ဖတ်ရ၏။ ကျွန်ုပ်သည် မုဒိန်းကောင်များကို သည်ကဲ့သို့ ကြိမ်ဒဏ်ပေးခြင်းအား အလွန်သဘောကျလေသည်။ ထိုသူများအား မှတ်လောက်သားအောင် ကြိမ်ဖြင့်ဆုံးမသင့်ပေသည်။

သူတို့ ကြိမ်ဒဏ်ပေးပုံကို ကျွန်ုပ် blog တွင်တင်ထားပါသည်။ ရှာဖွေကြည့်ကြပါကုန်။  ၂၀၁၀ ခုနှစ်လောက်က ပို့စ်များတွင် ရှာကြည့်ပါ။



Link:

https://www.todayonline.com/singapore/jail-caning-private-tutor-who-repeatedly-molested-teen-student-his-home

Monday, July 8, 2019

ဘန်းဂလားလူငယ်တစ်ယောက်အကြောင်း


အောက်ပါဆောင်းပါးမှာ CNA ၏ "Inspired by Singapore's education system, Bangladeshi migrant worker starts Polytechnic" ဆောင်းပါးကို တိုက်ရိုက်ပြန်ဆိုထားခြင်းဖြစ်ပါသည်။

Ref:
https://www.channelnewsasia.com/news/cnainsider/inspired-by-singapore-education-bangladeshi-migrant-polytechnic-11697758

မိသားစုက မတတ်နိုင်တော့ အထက်တန်းပြီးအောင်တောင် ကျောင်းမတက်နိုင်ရှာ။ သို့သော် စင်ကာပူ၌ အလုပ်လုပ်ပြီး မျက်စိနားပွင့်လာတော့ Joy Sudip Bhadro သည် သူ့မွေးရပ်ဌာနေ၌ အိပ်မက်များကို အကောင်အထည်ဖော်နိုင်ခဲ့ပြီ ဖြစ်၏။ စင်ကာပူတွင် ၁၈ နှစ် အလုပ်လုပ်ခဲ့ပြီး ယခုအခါတွင်မူ သူယခင်က မျှော်မှန်းထားသည်ထက်ပိုမို အောင်မြင်ခဲ့လေပြီ။ သူ့ကြောင့်ပင် သူ့မွေးရပ် Habiganj မှ ရာဂဏန်းမျှသောလူငယ်များသည် အင်ဂျင်နီယာဖြစ်ဘို့ အခွင့်အလမ်းများ ရရှိခဲ့ပြီ။


 ဆောက်လုပ်ရေးလုပ်ငန်းခွင်တွင် အလုပ်များကို တစ်နေ့လုံး ပင်ပန်းဆင်းရဲစွာ လုပ်ကိုင်ခဲ့ပြီးသည့်နောက်တွင်မတော့ ဂျွိုင်းအား ပိုလီတက်ကနစ်ကျောင်းပြင်ပ၌ ကျောင်းသားများ ပျားပန်းခပ်မျှ ဝင်ထွက်သွားလာနေကြသည်ကို ငေးမောကြည့်နေသည်ကို တွေ့နိုင်သည်။

ပိုလီကျောင်း၌ ကျောင်းတက်ခြင်းမှာ စင်ကာပူနိုင်ငံသားများအဖို့ရာမတော့ ဘာမှ မထူးဆန်းပါ။ သို့သော် ဂျွိုင်းအဖို့ရာမတော့ တကယ့်ကို ကမ္ဘာသစ်ဖြစ်လေသည်။ သူ့အဖို့ သည်လိုကျောင်းတက်ဖို့ အခွင့်အလမ်းမရှိတော့။ ပြင်ပမှ ငေးကြည့်နေရုံသာ တတ်နိုင်လေသည်။

သူက ကျောင်းသားများကို လေ့လာကြည့်၏။ ပိုက်ဆံမတတ်နိုင်တဲ့အတွက် ငါကျောင်းပြီးအောင် မတက်နိုင်ခဲ့ရတာပါလား ဟု လည်း အခါခါ တွေးနေမိလေသည်။



မိသားစုဝင် ၁၁ ယောက်ရှိသော သူ့မိသားစုကို ထောက်ပံ့ရန်အတွက် ၂၀၀၁ ခုနှစ်မှာ သူ စင်ကာပူကိုစလာတော့ အသက် ၂၄ နှစ်။ လခ စင်ကာပူဒေါ်လာ ၆၀၀ ပဲ ရသည်။ "အဲဒီတုံးက ငါဟာ အင်မတန်ဆင်းရဲခဲ့တယ်။ ဘာဆိုဘာမှ ငါ့မှာမရှိခဲ့ဘူး။" ဟု ယခု အသက် ၄၂ နှစ်ရှိနေပြီဖြစ်သော ဂျွိုင်း က ပြော၏။

သူသည် ဒီပလိုမာလက်မှတ်ရရန် ကျောင်းတက်နေသည့် မြန်မာတစ်ယောက်နှင့်တွေ့၏။ ၎င်းမှာ ယခု ရုံး၌ အလုပ်လုပ်နေရပြီ။ မူလတန်းကျောင်းထွက်လက်မှတ်သာရှိသော ဂျွိုင်းမှာမူ ကာယအလုပ်များကိုသာ လုပ်ရ၏။ ထို့ပြင် ထိုကဲ့သို့ ကာယအလုပ်များ ကိုလုပ်နေရသည်မှာ သူတစ်ယောက်တည်းသာမဟုတ်ကြောင်းလည်း ဂျွိုင်း သတိထားမိသည်။

သူ့ဇာတိမြို့ငယ်လေးဖြစ်သည့် ဟာဘစ်ဂမ်းတွင် များစွာသောလူငယ်တို့သည် မူလတန်းကျောင်းပြီးနောက် အလုပ်လက်မဲ့ဘဝ ဖြင့်သော်လည်းကောင်း၊ လစာနည်းသော အလုပ်များကိုသော်လည်းကောင်း လုပ်ကိုင်နေကြရသည်။ ၎င်းတို့သည် နည်းပညာ ဆိုင်ရာ အတတ်ပညာ၊ ဗဟုသုတမရှိကြသည့်အတွက် ကာယလုပ်သားများအဖြစ် အလုပ်ကြမ်းလုပ်ကာ အသက်မွေးကြရသည်။ ထို့ကြောင့် စင်ကာပူမှ ၃၉၁၇ ကီလိုမီတာ ကွာဝေးသည့် သူ့မြို့ငယ်လေးတွင် ပိုလီတက်ကနစ်ကျောင်းဖွင့်ရန် ဂွိုင်း အိမ်မက် မက် ခဲ့သည်။

ဤသည်မှာ လွန်ခဲ့သည့် (၇) နှစ်က ဖြစ်၏။ ယနေ့တွင်မူ ၎င်းတို့မြို့ကလေး၏ မြို့လယ်ခေါင်ရှိ ဖုန်ထူသော၊ အလုပ်များသော လမ်းများတစ်လျှောက် "North East Ideal Polytechnic Institute" ဟုဆိုင်းဘုတ်တင်ထားသော သုံးထပ်တိုက်တစ်ခုကို တွေ့မြင်နိုင်ပြီ ဖြစ်ပါသည်။



 ထိုကျောင်းမှာ ၂၀၀ ကျော်မျှသော ကျောင်းသားများအတွက် အိမ်လည်းဖြစ်၏။ ထိုမြို့ကလေးအတွက် တစ်ခုတည်းသော သက်မွေးဝမ်းကျောင်း အတတ်ပညာသင်ကျောင်းလည်း ဖြစ်၏။ ကျောင်းကို တည်ထောင်သူကား အခြားသူမဟုတ်။ ဂျွိုင်း ဖြစ်သတည်း။

ဤသည်မှာ ရွှေ့ပြောင်းလုပ်သားလေးတစ်ဦး၏ "ရူးသွပ်မှု" အိပ်မက် ဖြစ်၏။ သို့ဆိုလျှင် ၎င်း၏မျှော်မှန်းချက်များ မည်ကဲ့သို့ ပေါက်မြောက်အောင်မြင်ခဲ့သနည်း။ ၎င်းတို့ အိမ်ကိုပြန်ပြီးနောက် ဘာဆက်ဖြစ်သည်ဆိုသည်ကို CNA (Channel News Asia) က လေ့လာရိုက်ကူးထားပါသည်။

စင်ကာပူမှာ အားလုံးကောင်းတယ်။ အဲဒီမတိုင်မီ အထိပေါ့ . . . . .

သူ့အစ်ကို ကျောက်ကပ်ရောဂါခံစားရသည့်အခါတွင် ဂျွိုင်းသည် မိသားစု၏တာဝန်ကို ပုခုံးပြောင်း တာဝန်ယူလိုက်ရသည်။ သူ့မိသားစုတွင် ပညာရေးအတွက် သူတာဝန်ယူရမည့်ကလေးပေါင်း ၈ ယောက်မျှထိ ရှိ၏။ "လက်တွေ့ဘဝမှာ ငါသာ ဒီအခြေအနေထက် ပိုမြင့်မားအောင် မကြိုးစားခဲ့ရင် ငါ့လိုပဲ ဘဝပေါင်းများစွာ ပျက်စီးသွားစရာရှိတယ်လို့ ငါတွေးမိတယ်။ အဲဒီအတွက် ငါ့ဘဝကို သူတို့အတွက် စတေးလိုက်တယ်။" ဟု ဂျွိုင်းကပြောသည်။

အေးဂျင့်မှတဆင့် စင်ကာပူရှိ မော်တော်ယာဉ်အလုပ်ရုံတစ်ခုတွင် အလုပ်ရသည်။ ၁၁ နှစ်အတွင်း ဆောက်လုပ်ရေးလုပ်ငန်းမှသည် MRT ပြုပြင်ထိန်းသိမ်းရေးလုပ်ငန်းထိ လုပ်ငန်းမျိုးစုံလုပ်ခဲ့ရ၏။ ပင်ပန်းသော်လည်း ကောင်းပါသည်။ ၂၀၁၂ ခုနှစ် မေလထိဖြစ်၏။ တစ်နေ့ နီကိုဟိုင်းဝေးတစ်လျှောက် သူတစ်ဦးတည်းစက်ဘီးစီးလာစဉ် သူ့စက်ဘီးကို လူငယ်နှစ်ဦးက တွန်းလှဲကာ လက်သီးဖြင့် ထိုး၊ ခြေထောက်ဖြင့်ကန်ကာ မျက်နှာနှင့် ကိုယ်ပေါ်ကိုလည်း တက်နင်းခဲ့၏။

သူသတိမေ့သွားခဲ့၏။ သူ့ပိုက်ဆံအိတ်နှင့် ဖုန်းကို ဓားမြတိုက်ခံလိုက်ရသည်။ မျက်နှာလည်းကျိုးကြေသွားသဖြင့် ခွဲစိတ်ခန်း ဝင်ခဲ့ရ ၏။ "စင်ကာပူသတင်းတွေမှာတော့ ဟိုးလေးတကြော်ပေ့ါကွာ"  သူက ပြန်ပြောပြသည်။

သူသက်သာလာသည့်တိုင် နာကျင်နေဆဲဖြစ်၏။ သူ့စိတ်ထဲတွင်မူ နေကောင်းသည်နှင့် ချက်ချင်းအလုပ်ပြန်ဆင်းရန်ဖြစ်၏။ သို့မှသာ သူ့မိသားစုထံ ပိုက်ဆံဆက်ပို့နိုင်မှာဖြစ်သည်။ သူအမြန်ပြန်လည်နေကောင်းလာခြင်းက သူ့ကို စင်ကာပူတွင် ဆက်နေပြီး အလုပ်လုပ်ရန် ခွန်အားများကို ဖြစ်စေသည်။

တစ်နှစ်ခန့်က ဂွိုင်းသည် နိုင်ငံခြားသားအလုပ်သမားများအတွက် အခမဲ့တက်နိုင်သော ကျွမ်းကျင်မှုသင်တန်းများရှိကြောင်း သိလာရသောအခါ သူ့အတွက်အထူးအခွင့်အရေးဖြစ်သည်ဟုခံယူလျက် သင်တန်းသား ၃-၄၀ မျှရှိသော သင်တန်းကို အစဉ်အမြဲ သွားတက်လေတော့၏။ သင်တန်းတွင် ပူနွေးသော အစားအသောက်များလည်း ကျွေး၏။

သူသည် Ministry of Manpower နှင့် Building Construction Authority တို့မှ ပို့ချသော waterproofing works အပါအဝင် ဆောက်လုပ်ရေးနှင့် နှီးနွယ်နေသည့် သင်တန်းများကို တနင်္ဂနွေနေ့တိုင်း လပေါင်းအတော်ကြာအောင် သွားတက်သည်။



ဤအကြောင်းမသိခင်ကမူ သူသည် အပျော်အပါးများနှင့်သာ အချိန်ကုန်နေခဲ့လေသည်။ ဘင်္ဂလားဒေ့ရ်ှမှ သာမန်ပညာရေးသာ ရရှိထားသူတစ်ဦးအနေနှင့် သက်မွေးဝမ်းကျောင်းပညာသင်ကြားခွင့်ဆိုသည်မှာ မျက်စိကိုဖွင့်ပေးလိုက်သော အတွေ့အကြုံတစ်ရပ် ဖြစ်ပေသည်။ "လက်တွေ့ဗဟုသုတကမှ တကယ့်ပညာပဲဆိုတာ ငါသဘောပေါက်ပြီ။ ငါ အဲဒါကို အရမ်းသဘောကျတယ်။" ဟု သူကပြောလေသည်။

ထိုအချိန်တွင် မိမိကိုယ်ကို တန်ဘိုးမြှင့်တင်နေသော မြန်မာတစ်ဦးနှင့် ဆုံဆည်းခွင့်ရခဲ့ခြင်းဖြစ်၏။ တပြိုင်နက်တည်းမှာပင် ပိုလီ တက်ခနစ်ကျောင်းတစ်ခုတည်ထောင်ရန် လမ်းစကိုလည်း ပြက်ကနဲ မြင်လိုက်ရသည်။ သို့တိုင် သူ့လက်တို့မှာ တုပ်နှောင်ခံထား ရကြောင်း သူသိလိုက်သည်။

"ငါ စင်ကာပူမှာ အတော်များများလေ့လာခဲ့တယ်။ ဒါပေမယ့် အတော့ကို ကြိုးစားပမ်းစား လုပ်ခဲ့ရတယ်။" သူကဆက်ပြောသည်။ "ဒါနဲ့ ငါ့မိန်းမကို ခေါ်ဘို့ ဆုံးဖြတ်လိုက်တယ်။"

ရီပါဒတ်တာက မူလတန်းပြဆရာမဖြစ်၏။ ဂျွိုင်းထံမှ ဖုန်းဆက်လာသည့်အခါ သူ အတော်စိတ်လှုပ်ရှားနေသည်ကို ကြားရသည်။ "ငါတို့စကြရအောင်" ဂျွိုင်းကပြောသည့်အခါ နင် ရူးနေသလား။ မဖြစ်နိုင်တာ ဟု သူ့မိန်းမက အကြောင်းပြန်လေသည်။

ဂျွိုင်းက သူ့မိန်းမပြောစကားများကို ယခုတိုင်မှတ်မိနေသေးသည်။ နင်ဟာလေ၊ စက်ဘီးတောင်မစီးနိုင်ဘဲနဲ့များ လေယာဉ်ဝယ်ဘို့ စိတ်ကူးနေသေးတယ်။ ကျောင်းထောင်ဘို့ ဘယ်ကပိုက်ဆံရမလဲ။ အနို့၊ သူတို့ကလေးတွေကရော။ (ထိုအချိန်တွင် သူတို့သမီးမှာ ၂ နှစ်၊ ထို့ပြင် သည်နှစ်တွင်ပင် နောက်တစ်ယောက်ထပ်မွေးဘို့ ရှိသေးသည်။)

သူ့စိတ်ထဲတွင်မတော့ သူ့မိန်းမ မယုံနိုင်အောင်ဖြစ်နေသည် ဟု တွေးမိသည်။ "ဆင်းရဲသားတစ်ယောက်ရဲ့မိန်းမဟာ အလုပ်ကြီးတွေ ကို ဘယ့်နှာလုပ် လုပ်နိုင်ပါလိမ့်မတုံး။" သူစိတ်ပျက်လိုက်သည်မှာ ပြောစရာကိုမရှိ။

သို့သော် နောက်တစ်နေ့တွင် သူ့မိန်းမက သူကြိုးစားကြည့်ချင်ကြောင်း ဖုန်းဆက်လာသည်။ သူ့အဖေနှင့်မောင်များကို ကျောင်း တည်ထောင်ရန် ပိုက်ဆံအချို့ထည့်ဝင်ပါမည်အကြောင်း ပြောမည် ဟု ဆိုသည်။

"ရီပါဒတ်တာအလုပ်လုပ်လို့ ရသမျှပိုက်ဆံအားလုံးကို မိသားစုအသုံးစရိတ်အတွက်သုံး။ တစ်လ စင်းဒေါ်လာ ၁၂၀၀ လောက်ရတဲ့ ငါ့လခကို ကျောင်းထောင်ဘို့အတွက် စုမယ်။" ရသမျှဝင်ငွေ၏ ထက်ဝက်ကျော်ကို မိသားစုထံလွှဲသည်။ သူအိပ်မက်ထားသည့် ကျောင်း တည်ထောင်ရေးအတွက် ယုံကြည်စိတ်ချစွာ သူတို့ထံလွှဲအပ်ခဲ့သည်။

ဂျွိုင်း စင်ကာပူတွင် ဆက်အလုပ်လုပ်နေသကဲ့သို့ သူ့အမျိုးသမီးနှင့် ယောက်ဖများကလည်း တစ်အိမ်တက်ဆင်း ကျောင်းသားများ လိုက်လံ စုဆောင်းနေခဲ့ကြလေသည်။ "ပိုလီတက်ခနစ်ကျောင်းကို သူတို့ အရမ်းစိတ်ဝင်စားနေကြတယ်။" ဟု ယခုအခါ ကျောင်း၏ ဒါရိုက်တာဖြစ်နေသူ ဂျွိုင်း၏ ယောက္ဖ ရင်တူဒတ္တာကပြော၏။

သက်မွေးဝမ်းကျောင်းအတတ်ပညာသည် ၎င်းတို့၏ သားသမီးများအနာဂတ်ကို ပြောင်းလဲသွားစေမည်ဟု ယုံကြည်လာအောင် စည်းရုံးရန် များစွာအားစိုက်ထုတ်ရသည်။ နောက်ဆုံးမတော့ သူတို့သည် ၈ ယောက်မှ ၁၀ ယောက်ထိပါသည့် အစုလေးတစ်ခုကို ဖွဲ့စည်းနိုင်ခဲ့ကြသည်။ သူတို့သည် တဲငယ်လေးတစ်ခုအတွင်း ဆရာနှစ်ယောက်နှင့် အစပျိုးခဲ့ကြ၏။ ဤသည်ကား ပိုလီတက်ခနစ် တစ်ခုဖြစ်လာရန် နုံချာလှသည့် အစပျိုးမှုတစ်ခုပင် ဖြစ်ပါတော့သည်။

မြို့လေးအတွက် မျှော်မှန်းချက်

လက်ရှိနေရာမှာလည်း သေးငယ်သော၊ စွတ်စိုထိုင်းမှိုင်းသော၊ ကွင်းပြင်တစ်ခုအနေနှင့်သာ ရှိသေးသည်။ သို့သော် ဆက်ရမည့်ခရီး ကား ဝေးသေးသည်။ ကျောင်း၌ မီးပျက်သည်မှာကား အထူးအဆန်းမဟုတ်တော့။

အလင်းရောင်မှိန်ပျသော အခန်းများအတွင်း ထိုင်လျက်၊ နက်ပြာရောင်ယူနီဖောင်းများ ဝတ်ဆင်လျက်၊ အီလက်ထရောနစ်ဆာ့ကစ်တစ်ခု အလုပ်လုပ်ပုံကို ရှင်းပြနေသည့် ၎င်းတုိ့၏ ဆရာ ထံတွင် မျက်လုံးများကို စူးစိုက်ထားလျက် ရှိကြ၏။

လောလောဆယ်တော့ ကျောင်း၌ အင်ဂျင်နီယာဘာသာရပ် သုံးခုသာ ပို့ချနိုင်သေးသည်။ Civil Engineering, Electrical Engineering နှင့် Computer Engineering တို့ ဖြစ်၏။ "ဒီဘာသာရပ်သုံးခုဟာ အစိုးရဖက်မှာရော၊ ပုဂ္ဂလိကဘက်မှာပါ အင်မတန် လိုအပ်နေတဲ့ ဘာသာရပ်တွေ ဖြစ်ပါတယ်" ဟု ရင်တုက ရှင်းပြ၏။

၂၀၁၂ ခုနှစ်မှစကာ ၅၇ ယောက်သောကျောင်းသားတို့ နှစ်သုတ်ခွဲ၌ ကျောင်းဆင်းခဲ့ပြီးပြီ။ ၎င်းတို့အထဲမှ ၈၅% သည် သူတို့ လေ့လာသင်ယူခဲ့သော ဘာသာရပ်နှင့်ပတ်သက်သည့် အလုပ်အကိုင်များရရှိခဲ့၏။

ထိုမျှသာမက ကိုယ့်မြို့ကိုယ့်ရွာမှာ ပညာသင်ရသည်ဆိုတော့ ပို၍ အကုန်အကျသက်သာသည်။ ဤကျောင်းမရှိသေးခင် ယခင်အခါ ကာလများက သက်မွေးဝမ်းကျောင်းပညာသင်ရန် အခြားမြို့များဖြစ်သော Sylhet နှင့် Dhaka မြို့များသို့ သွားကြရ၏။ ထိုမြို့ကြီးများ ၌ ကျောင်းလခများမှာ ပိုမိုဈေးကြီးလေသည်။

ဒီပလိုမာလက်မှတ်တစ်ခုရဘို့ ဒါကာ၌ သင်ကြားရမည်ဆိုလျှင် ၈ ဆလောက် ပိုမိုကုန်ကျမည်ဟု မိုဟာမက်က ဆို၏။
North East Ideal Polytechnic Institute ၏ ကျောင်းလခမှာ semester တစ်ခုလျှင် စင်းဒေါ်လာ ၁၃၀ မျှသာ ကုန်ကျရုံမျှမက ဆင်းရဲနွမ်းပါးသည့် မိသားစုမှ ကျောင်းသားများကို ထောက်ပံ့ကြေးပေးသေးသည်။ ဤပိုလီတက်ခနစ်ကျောင်း ပေါ်လာသည့်အခါ အထက်တန်းပညာကို သင်ယူသည့် မိန်းခလေးဦးရေမှာ ပိုမိုတိုးတက်လာသည်ဟု ရီပါကပြောသည်။

သာမန်လူတစ်ယောက်

သည်ကျောင်းမှာ စုပေါင်းဆောင်ရွက်ခြင်း၏ ရလဒ်တစ်ခုဖြစ်သည်ဟု ဂျွိုင်းကပြောသည်။ ကျောင်းမြေနေရာကို သူ့ယောက္ခမ ပေးသည်။ ကျောင်းအုပ်ချုပ်ရေးကို အသက် ၂၇ နှစ်သာရှိသေးသည့် ရင်တုက တာဝန်ယူသည်။

ဂျွိုင်းကိုယ်နှိုက်ကမူ သူ့ကျောင်းက ကျောင်းသားဘယ်နှစ်ယောက် ကျောင်းဆင်းသွားပြီကိုပင်မသိ။ သူက ခါးနာရောဂါကုသရန် လွန်ခဲ့သည့် သုံးလခန့်ကမှ ပြန်လာတာဖြစ်သည်။

၎င်း၏ အိမ်အပြန်ခရီးကား ခါးသီးချိုမြိန်လှပေသည်။ အလုပ်မှထွက်လာရတာဖြစ်သဖြင့် စိတ်ပျက်မိသည့်တိုင် သူစင်ကာပူ၌ စိတ်ကူးယဉ်ခဲ့ရသော ပိုလီတက်ခနစ်ကိုမူ မျက်ဝါးထင်ထင် တွေ့မြင်နေရပြီ ဖြစ်၏။ သူက သူ့ကျောင်းမှဆင်းကာ ယခု အလုပ်လုပ် နေပြီဖြစ်သည့် ကျောင်းသားဟောင်းတစ်ဦးနှင့် စကားစနေပြောနေလေသည်။

"ငါ နိုင်ငံခြားမှာ ၁၈ နှစ်နေခဲ့တယ်။ ဒါပေမယ့် ငါလည်းပြန်ရောက်လာရော လူတွေဟာ ငါ့ကို လေးလေးစားစား မဆက်ဆံကြဘူး။ ငါတော့ အတော့်ကိုရှက်မိတယ်" ဟုဂျွိုင်းက ပြောသည်။

သူ့အထောက်အပံ့များကိုတော့ အသိအမှတ်ပြုကြပါသည်။
"သူပိုက်ဆံအများကြီးထောက်ပံ့ခဲ့တယ်။ ဘာတွေလုပ်ရမယ်ဆိုတာလည်း ညွှန်ပြခဲ့တယ်။ သူမရှိဘဲ ဒီကျောင်းကြီးဆိုတာ ဖြစ်မလာနိုင်ပါဘူး။" ဟု ရင်တုကပြော၏။

နောက်ကျောင်းတစ်ကျောင်းကို Moulvibazar ရှိ Srimangal တွင်ဖွင့်ရန် ကြိုးစားနေကြလေသည်။

ယခုတော့ ဂျွိုင်းမှာ သူရင်းနှီးမြှုပ်နှံခဲ့သည့်နေရာတွင် အောင်မြင်မှုများအကြား ပျော်ရွှင်ချမ်းမြေ့စွာ နေထိုင်နေလေပြီ။ သူပြုစုပျိုးထောင်ပေးခဲ့သော သူ့တူနှင့်တူမများမှာ ယခုအခါ ဆရာဝန်၊ ကျောင်းဆရာဆရာမ၊ ရဲအရာရှိများဖြစ်လျက် နေလေပြီ။

သူ့အရပ်တွင် ထင်ပေါ်ကျော်ကြားသူတစ်ယောက် ဖြစ်လာလင့်ကစား ဂျွိုင်းမှာ ရိုးရိုးသားသားပင် နှိမ်ချနေလေသည်။

"ငါဟာ သာမန်အရပ်သားတစ်ယောက်ပါကွာ။ ဒါပေမယ့် ငါအခု သဘောပေါက်သွားတာတစ်ခုရှိတယ်။ ငါဟာ ကြီးမြတ်တဲ့ ပုဂ္ဂိုလ် တစ်ယောက်တော့ ဖြစ်ချင်မှ ဖြစ်နိုင်မယ်။ ဒါပေမယ့် ဟောသလို အသေးအဖွဲလေးတွေကိုတော့ ငါလုပ်နိုင်ပါသေးတယ် ဆိုတာပဲ။"


Saturday, July 6, 2019

"မြန်မာပြည်သည် အလွန်အံ့သြစရာကောင်းသည့် တိုင်းပြည်တစ်ပြည်ဖြစ်သည်" ဆိုခြင်းအကြောင်း


(၁)

တခါတခါ ကျွန်ုပ် အတော်စိတ်ပျက်မိ၏။
လူတို့သည် အဘယ်ကြောင့် ဤမျှပျက်စီးသွားကြရသနည်းဟုလည်း အဖန်ဖန် တွေးနေမိ၏။
ဤသည်မှာ နိုင်ငံကို စိတ်ကြိုက်ဖျက်ဆီးသွားခဲ့သော စစ်ခေါင်းဆောင်များကြောင့်လော။
ဤသည်မှာ အကြောင်းတစ်ခုဖြစ်ပါလိမ့်မည်။ သို့သော် ၎င်းတို့ကိုချည်း အပြစ်ပုံချလို့လည်း မရပါ။
ကိုယ်ကောင်းလျှင် ခေါင်းဘယ်မရွေ့ ဟူသော မြန်မာစကားပုံရှိ၏။ အလားတူပင် လူတင်ပါလို့ နွားကျားကိုက်တာ ဟုလည်း ရှိသေး၏။ ဆိုလိုသည်မှာ ဤကိစ္စများ၌ ကာယကံရှင်ကိုယ်နှိုက်က မကောင်း၍ ဤပြစ်မှုများကို ကျူးလွန်တာ ဖြစ်လေသည်။

ပို၍စိတ်ပျက်စရာကောင်းသည်မှာ ဤမျှဆိုးရွားလှသော ပြစ်မှုများကို ကျူးလွန်နေပါလျက် ထိုငရဲကောင်များကို မှတ်လောက် သားလောက်အောင် အပြစ်ပေးအရေးယူသည့် ဥပဒေ မြန်မာပြည်တွင် မပေါ်ထွန်းသေးတာ ဖြစ်ပါသည်။ ပိုဆိုးသည်မှာကား ဥပဒေရှိသည့်တိုင် ကျူးလွန်ဖောက်ဖျက်သူကို မည်ကဲ့သို့ အပြစ်ပေးသည် ဟူသည်မှာ ဤသူသည် မည်သူဖြစ်သနည်း ဆိုသည့် အပေါ်မူတည်နေတာဖြစ်၏။ ဤသည်ကပင် ထို မကောင်းဆိုးရွားများကို ဒုစရိုက်မှုများ ဆက်လက်ကျူးလွန်နေရန် အခွင့်အလမ်း တစ်ခု ဖန်တီးပေးထားသလို ဖြစ်နေလေသည်။

သေဒဏ်ကို ၅ ခါလောက်ပြန်ချတာ ဤကမ္ဘာပေါ်တွင် မြန်မာပြည်တစ်ခုတည်းသာ ရှိ၏။ ကျွန်ုပ်တို့ မြန်မာပြည်ကြီးသည်ကား ကမ္ဘာ့အကြင်နာတရား အပြည့်ဝဆုံးနိုင်ငံကြီး ဖြစ်လေသည်။ လူလားမမြောက်သေးသည့် ကလေးငယ်များကို မုဒိန်းကျင့်ခြင်းအား သြော် - သူတို့ခမျာ၊ စိတ်မထိန်းနိုင်လို့ အလွယ်တကူရတဲ့ ကလေးတွေကို လုပ်ရပေတာပဲ ဟု ခွင့်လွှတ်ထားလေသည်။ အံ့သြဘွယ်ကောင်းလေစွ၊ စိတ်ပျက်ဘွယ်ကောင်းလေစွ။ ရင်နာစရာ ကောင်းလေစွတကား။


(၂)

သက်ငယ်မုဒိန်းမှုတွေကို သေဒဏ်ပေးဘို့အဆိုကို ကျွန်ုပ်က ၇၀၀% သဘောတူပါသည်။ ၎င်းတို့ကို တစ်ခါသာမဟုတ်၊ ခုနစ်ခါပြန် သတ်သင့်သည်ဟု ဆိုလိုခြင်းဖြစ်သတည်း။

ဤအမှုများ အဘယ်ကြောင့် ဤမျှများနေရဘိသနည်း။ အဘယ်ကြောင့် မကြာခဏဖြစ်နေရဘိသနည်း။
အဖြေမှာရှင်းပါသည်။
အမှုများကို နိုင်နိုင်နင်းနင်း မကိုင်တွယ်သောကြောင့်။ ကျူးလွန်သူများကို မှတ်လောက်သားလောက်အောင် အပြစ်ပေး အရေးယူတာတွေ မလုပ်သောကြောင့်ဖြစ်၏။ 






အံ့သြစရာကောင်းသည်မှာ လူတို့၏ ပျက်စီးယိုယွင်းနေသည့်စိတ်ဓာတ်များ ဖြစ်၏။
ကျွန်ုပ်သာ ဤကျောင်း၏ ကျောင်းအုပ်ဖြစ်လျှင် ထိုအမှုကို မပေါ်ပေါ်အောင် ကျွန်ုပ်ကိုယ်တိုင် ငွေအင်အား၊ လူအင်အား အပြည့်သုံးကာ ဖော်ထုတ်ပါမည်။ ကျူးလွန်သူကိုလည်း ကျွန်ုပ်ကိုယ်တိုင် တရားစွဲပါမည်။ ထောင်ချပါမည်။

ယခုတော့ ပြောင်းပြန်ဖြစ်၏။
ကိုယ့်ကျောင်းမှာ မုဒိန်းမှုဖြစ်သွားတာတောင် ငါတို့ကျောင်းကို ဂုဏ်သရေညှိုးနွမ်းအောင်လုပ်သူများကို တရားစွဲမည်ဟု ခြိမ်းခြောက်လိုက်သေး၏။ သူခိုးကလူဟစ်၊ မည်မျှ တရားမဲ့လိုက်ပါသနည်း။
မိမိတို့ကျောင်းတွင်ဖြစ်ခဲ့သည့် အမှုအတွက် မိမိတို့ဂုဏ်သရေကိုဆယ်ရန် မိမိတို့ကိုယ်တိုင် ကြိုးစားအားထုတ်ရမည့်အစား ဆရာမ ဆိုသူကစ၍ ဖုံးဖိရန်ကြိုးစားသည်။ ၎င်းတို့ကို လူအစစ်မှဟုတ်ပါလေစဟု ကျွန်ုပ်ကတော့ သံသယရှိ၏။

အစိုးရမင်းများမှာလည်း မည်မျှ အလုပ်ကြိုးစားလိုက်ကြသနည်းဟူမူ သည်မျှ ဟိုးလေးတကျော်ကျော် ဖွင့်ထားသည့် ကျောင်းကြီးကို လိုင်စင်ရှိမှန်းမသိ၊ မရှိမှန်းမသိ။ ကလေးကို မုဒိန်းကျင့်ခံရတော့မှ ဟဲ့၊ လုပ်ကြပါအုံးဟဲ့။ အဲဒီကျောင်းက တရားမဝင်ဖွင့်ထားတဲ့ ကျောင်း ဆိုပါလား ဟု တရေးနိုးဖော်ရသည်။ ၎င်းတို့အား ပေးထားရသည့် လခများကို ကျွန်ုပ် နှမြောလိုက်ပါဘိ။

ဖေ့စ်ဘုတ်အစိုးရဟု စွပ်စွဲပြန်လျှင်လည်း ၆၆(ဃ) ဆိုကာ တရားကစွဲဦးမည်။
ဖေ့စ်ဘုတ်သာမရှိပါက မြန်မာပြည်သားတို့၏ဘဝမှာ တွေးရဲစရာတောင်မရှိ။
ဖေ့စ်ဘုတ်က အော်လို့သာ ကျွန်ုပ်တို့ ထိုအကြောင်းများကို သိခွင့်ရသည်။ ဖေ့စ်ဘုတ်သာမရှိပါက ထိုအမှုများမှာ လူမသိသူမသိ သည်အတိုင်း တိုးတိုးတိတ်တိတ် ပြီးသွားနိုင်စရာရှိလေသည်။

သည်လိုအမှုမျိုးဆိုတာ နောက်ကြောင်းမအေးသည့် အမှုဖြစ်၏။
သည်ကလေးမလေး တစ်ဘဝလုံးစာကို ထိခိုက်နိုင်သည်ဆိုတာ သိထားကြရမည်။
အားနည်းသူကို ဝိုင်းနှိမ်ကြ၊ ကဲ့ရဲ့လှောင်ပြောင်ကြ၊ နှုတ်ခမ်းမဲ့ကြ၊ ချောက်တွန်းကြ၊ ကဲ့ရဲ့သင်္ဂြိုဟ် အတင်းဆိုတတ်ကြသည့် မြန်မာ့ လူဘောင်မှာ ထိုကလေးမကလေး ဘဝတစ်လျှောက်လုံး သိမ်ငယ်စွာ နေသွားရနိုင်သည်။
အခွင့်ရတိုင်း . . အဲဒီကောင်မလေ . . ငယ်ငယ်တုံးက . . . ဆိုသည့် မကြားဝံ့မနာသာတွေကို တိုးတိုးတစ်မျိုး ကျယ်ကျယ်တမျိုး ကြားရနိုင်သည်။

ကျွန်ုပ်တို့ပြည်သူများကတော့ တာဝန်ကျေပါသည်။
ရသမျှသတင်းတွေ တင်ကြသည်။ ကာတွန်းတွေ ရေးကြသည်။ ပို့စ်တွေရေးကြသည်။ ဆန္ဒပြပွဲတွေလုပ်ကြသည်။
ကျွန်ုပ်ကတော့ ကျွန်ုပ်တို့ပြည်သူများကို အားရပါသည်။
ကိုယ်နှင့်မဆိုင်သလို ဘာသိဘာသာနေရက်အားသည့် အစိုးရမင်းဆိုသူများကိုသာ ဖနောင့်နှင့် ပေါက်ချင်မိလေ၏။



ကိုင်း ကိုင်း ဒီလောက်နဲ့ ဘရိတ်အုပ်ထားမှ။
အခုတောင် ၆၆ စော်နံလာပြီ။
ရုံးတို့ဂါတ်တို့ဆိုတာ အလည်အပတ်တောင် သွားဘို့ကောင်းသည့်နေရာများမဟုတ်။

ကျွန်ုပ်တို့ မြန်မာပြည်သူပြည်သားများသည် ဤဒုက္ခများမှ ကင်းဝေးကြပါစေ ဟု လှိုက်လှိုက်လှဲလှဲ ဆုတောင်းပါသည်။

ကျေးဇူးတင်ပါသည်။

အေးငြိမ်း
၆ ဇူလိုင်၊ ၂၀၁၉

စာကြွင်း

ပထမ ထိုသူများကို Blood Eagle နည်းဖြင့် အပြစ်ပေးစေချင်သည် ဟု ရေးထားတာကို ပြန်ဖြုတ်လိုက်ပါသည်။
မိတ်ဆွေတို့ ဗဟုသုတရအောင် Viking တို့၏ Blood Eagle အကြောင်း မိတ်ဆက်ပေးလိုက်ပါသည်။

Vikings ဇာတ်ကားထဲ၌ Blood Eagle ဆိုတာပါသည်။
လူကို ရက်ရက်စက်စက် သတ်ပစ်ခြင်း ဖြစ်၏။
လူကို အရှင်လတ်လတ် ကားကျက်ကာ နောက်ဘက်မှနေ၍ နံရိုးများအားလုံးကို ခုတ်ဖြတ်သည်။ ထို့နောက် အဆုတ်စသည့် ကိုယ်တွင်းကလီစာများကို ထုတ်ကာ ထိုနံရိုးများအား လင်းယုန်အတောင်ပံများဖြန့်သကဲ့သို့ ဖြန့်ပြီး မချိမဆန့် ဝေဒနာ ခံစားရစေလျက် ဖြည်းဖြည်းချင်း သေစေတာ ဖြစ်ပါသည်။

Ragnar Lothbrok က ၎င်းအားသစ္စာဖောက်သူ Jarl Borg ကို ဤနည်းဖြင့် သတ်သည်။
ရဂ်နာကို ရက်ရက်စက်စက် သတ်ပစ်သူ အင်္ဂလိပ်ဘုရင် King Aelle မှာလည်း ရဂ်နာ၏သားများက Blood Eagle နည်းဖြင့် သတ်ခြင်းကို ခံရလေသည်။



Tuesday, July 2, 2019

ယဇ်ပူဇော်ခြင်းဓလေ့


(၁)

စစ်ကိုင်းမြို့မှ ၁၀ မိုင်ခန့်အကွာတွင်ရှိသော သာဒွန်းရွာ ဘိုးဘိုးကြီးနတ်ပွဲတွင် ဝက်သားနှင့်နတ်တင်သည်ကို အလွန်ထူးဆန်းလှပေ သည်ဟု သတင်းတွင် ဖတ်လိုက်ရ၏။




ကျွန်ုပ်တို့အဖို့တော့ အထူးအဆန်းမဟုတ်ပါလေ။ ကျွန်ုပ်တို့ရွာတွင် ငယ်စဉ်က အမဲသားငါး ရှားပါးလှ၏။ (အဲလေ၊ အခုလည်း မထူးပါ။) ဝက်သားဆိုတာ နတ်ကဘို့ပေါ်သည့်အခါကျမှ စားရတာဖြစ်၏။

နတ်ကိုးကွယ်သည့်ဓလေ့မှာ ဟိုးယခင်ကတည်းက (ဘုရားမပွင့်မီကတည်းက) ရှိခဲ့သည့် ကိုးကွယ်မှုတစ်ခုဖြစ်၏။ လူတို့သည် သဘာဝဘေးရန်များမှသော်လည်းကောင်း၊ သားရဲတိရစ္ဆာန်များ၏ ဘေးမှသော်လည်းကောင်း၊ မမြင်ရသော အခြားဘေးရန်များမှ သော်လည်းကောင်း အကာအကွယ်ပေးရန် တန်ခိုးရှင်တစ်ဦးဦးကို ရှာဖွေကြ၏။ ကိုးကွယ်ကြ၏။

ထိုသို့ကိုးကွယ်ရာတွင် ရေမြေတောတောင်များကို ကိုးကွယ်သည်လည်းရှိ၏။ သားရဲတိရစ္ဆာန်များကို ကိုးကွယ်သည်လည်း ရှိ၏။ ထို့ထက် မိမိစိတ်ကူးဖြင့် ဖန်တီးထားသော တန်ခိုးရှင်တစ်ယောက်ယောက်ကို အထူးသဖြင့် ကိုးကွယ်ကြလေ၏။ ထိုသို့ ကိုးကွယ်ရာကို ရှာကြရာမှ နတ် ဆိုတာ ဖြစ်လာလေသတည်း။

နေရာဒေသ၊ ယဉ်ကျေးမှု၊ ဓလေ့ထုံးစံကိုလိုက်၍ အနည်းအကျဉ်း အပြောင်းအလဲ ရှိသည်မှလွဲပြီး ယေဘူယျအားဖြင့် တကမ္ဘာလုံးမှ လူအားလုံးမှာ အတူတူပင် ဖြစ်ပါသည်။

မြန်မာမှာ ၃၇ မင်းနတ်ရှိသလို တရုတ်မှာလည်း တရုတ်နတ်ရှိသည်။ ကိုးရီးယားမှာလည်း မိုးနတ်မင်းကြီးရှိသည်။ ဂျပန်မှာ၊ အင်ဒိုနီးရှားမှာ၊ မလေးရှားမှာ၊ အိန္ဒြိယ၊ အနောက်တိုင်း အရှေ့တိုင်း တောင်တိုင်း မြောက်တိုင်း။ ဘာတိုင်းပဲဖြစ်ဖြစ် သူ့ရိုးရာ ဓလေ့အရ ကိုးကွယ်ကြသည့် နတ်များ ရှိကြသည်ချည်းဖြစ်၏။

နတ်ကိုဖန်တီးလိုက်ပြီး သည်အတိုင်းထားလို့မရ။ သူတို့လည်း ဗိုက်ဆာရှာပေမပေါ့။ သည်အခါ သည် နတ်တို့ကို ကျွေးကြ၊ မွေးကြရ သည်။ မြန်မာတွေက နတ်တင်သည်ဟု ခေါ်ကြ၏။ ပူဇော်သည်ဟု ဆိုကြ၏။ ပသသည်ဟု သမုတ်ကြ၏။ မဖြစ်ညစ်ကျယ် နတ်ကလေးတွေအတွက်တော့ ဗလိနတ်စာကျွေးသည်ဟု ခေါ်သည် ထင်ပါသည်။

သူတို့က သူများတွေကိုးကွယ်နေတဲ့ နတ်တွေဆိုတော့ အသီးအရွက်ကို မကြိုက်။ ငါးပိချက်တို့၊ ချဉ်ဟင်းတို့ဆိုတာ သူတို့နှင့် လားလားမှ မဆိုင်လေ။ ငါးပိဖုတ်တို့ ဟင်းရွက်ပြုတ်တို့ဆိုတာ နင်တို့လို ငမွဲ၊ ဆင်းရဲသားတွေစားတာ။ ငါတို့ကို လာမတင်လေနှင့်။ ငါတို့ကို ဟင်းချိုနဲ့နတ်တင်လျှင် နင်တို့တစ်သက်လုံး နာလန်မထူအောင် ပြုစားပစ်လိုက်မည်။ အောင်မငီး။

ဆိုတော့ ပိုက်ဆံမရှိတာရှိတာ နောက်ထား။ မရှိရှိတာလေး ရောင်းချပေါင်နှံပြီး နတ်ကိုတော့ ဝက်သား၊ ကြက်သား စသည်တို့ဖြင့် နတ်တင်ရ၏။ မဟုတ်လို့ ကိုယ်တော်ကြီးတို့၊ ကိုယ်တော်လတ်တို့၊ ကိုယ်တော်လေးတို့၊ ကိုယ်တော် ပိစိညှောက်တောက်ကလေးတို့၊ အမေလေယာဉ်တို့၊ မမနှဲတို့ အမျက်ဒေါသထွက်မှဖြင့် ဒွတ်ခ။ (သို့တိုင် အမဲသားဖြင့် နတ်တင်သည်ဟုတော့ မကြားမိဖူးပါ။ ကျွန်ုပ်မသိသေးတာလည်း ဖြစ်နိုင်ပါသည်။)

  
(၂)

ဆိုတော့ နတ်တင်ဘို့အတွက် တိရစ္ဆာန်များကို စတေးရ၏။ ထိုတိရစ္ဆာန်များအသားကို ချက်ပြုတ်ပြီး နတ်တင်ကြ၏။
ဒါက သည်ဘက်ခေတ်၊ အလွန်အင်မတန့်ကိုယဉ်ကျေး၊ သောက်ကျိုးနဲယဉ်ကျေးလာသည့်၊ so call လူယဉ်ကျေးဂျီးများက နတ်ကို ယဉ်ယဉ်ကျေးကျေး ပူဇော်ပသတာဖြစ်၏။

ဟိုးရှေးအခါက (ယခုခေတ်လူများအကြိုက် လိုက်ပြောရမည်ဆိုလျှင် ယဉ်ကျေးမှု သိပ်မထွန်းကားသေးသည့်ကာလ။) (ဒါပေမယ့် ကျုပ်အထင်ပြောရရင်တော့ အဲဒီ မယဉ်ကျေးသေးတဲ့ကာလတုံးက အဖေကသမီးကို မဒိန်းကျင့်တာ၊ အသက် ၂ နှစ်လောက်ပဲ ရှိသေးတဲ့ ကလေးကို နသားပါးယားလုပ်တာ မရှိလောက်သေးဘူးထင်ပါရဲ့။ အရင်ဘဝတုံးက အဖြစ်အပျက်တွေကို ကျွန်ုပ် မမှတ်မိတော့ပါ။) . . .

အဲလေ ဟိုးရှေးတုံးက နတ်တွေကတော့ ချက်ပြုတ်ထားတဲ့ အသားငါးတွေ သိပ်ကြိုက်ဟန်မတူ။ သွေးသံရဲရဲ အစိမ်းလိုက် ကိုက်စား ရတာကို ပိုသဘောကျသည်ထင်၏။ သည်တော့ ကိုယ်တော်ကြီးတို့အကြိုက်လိုက်ပြီး တိရစ္ဆာန်များကို သတ်ဖြတ်ကာ အစိမ်းလိုက်ပင် နတ်တင်ကြရ၏။ (သို့မဟုတ်ပါကလည်း လျှပ်စစ်မီးမပေါ်သေးတော့ ချက်ရပြုတ်ရတာ ကရိကထများမှာစိုး၍ လူများကို သနားငဲ့ညှာသောအားဖြင့် အစိမ်းလိုက်ပင် လွေးကြတာလည်း ဖြစ်နိုင်ပါသေးသည်။)

ဤသည်ကို ယခုခေတ်လူများက ယဇ်ပူဇော်သည်ဟု ခေါ်၏။

ယဇ်ပူဇော်ခြင်းဆိုသည်မှာ တိရစ္ဆာန်များကို အရှင်လတ်လတ်သတ်ကာ သူတို့ အသွေးအသားဖြင့် နတ်ကို ပူဇော်ပသခြင်း ဖြစ်သတည်း။

ပသ သမှ နွား ဘယ်နှစ်ကောင်၊ ဆိတ်ဘယ်နှစ်ကောင်၊ ဝက် ဘယ်နှစ်ကောင်၊ ကြက် ဘဲ စသည့်အကောင်ကလေးများကတော့ ပြောမနေပါနှင့်တော့။ လူတောင် ပါလိုက်သေးသည်။

ယခင်က မြို့တော်၊ နန်းတော်၊ တံတား စသည့် အဆောက်အဦ ကြီးကြီးမားမားဆောက်မည်ဆိုလျှင် အစောင့်ဟုဆိုကာ လူကို စတေးသည့် အလေ့ရှိခဲ့၏။ သည်အဆောက်အဦးကို စောင့်ကြပ်ရန်ဟု လူကိုသတ်ကာ ယဇ်ပူဇော်၏။

အနော်ရထာမင်းကြီးနှင့် ရှင်အရဟံတို့၏ကျေးဇူးကြောင့် ယဇ်ပူဇော်ခြင်းနှင့် ပန်းဦးလွှတ်ခြင်းစသည့် မဖွယ်မရာကိစ္စရပ်များ ပုဂံ ခေတ်မှစကာ ပ,ပျောက်သွားခဲ့၏။ ထိုသူတော်ကောင်းနှစ်ဦးကို ကျွန်ုပ်တို့ ကျေးဇူးတင်ကြရမည်။ ကျွန်ုပ်တို့၏ အိမ်နီးချင်းနိုင်ငံတွင် ကျွဲနွားဆိတ်များကို သိန်းနှင့်ချီသတ်ဖြတ်ကာ ယဇ်ပူဇော်သောအလေ့ ယနေ့တိုင်ရှိသေးသည်။ အလွန်ဆိုးရွားလှသော မြင်ကွင်းများ ဖြစ်၍ ကျွန်ုပ် ဓာတ်ပုံများမတင်တော့ပါ။ ကြည့်လိုသူတို့ အောက်ပါ link တွင်ကြည့်နိုင်ပါသည်။

link: https://www.youtube.com/watch?v=PsNKc8dOfvQ

တိရစ္ဆာန်များကိုသတ်ပြီး အစိမ်းလိုက် ယဇ်ပူဇော်တာနှင့် ချက်ပြုတ်ပြီး နတ်တင်တာ ဘာကွာပါသနည်း။ အတူတူပင် ဖြစ်၏။ အဲလေ အစိမ်းလိုက်နတ်တင်တော့ သိပ်ကြည့်မကောင်းလှပေဘူးပေါ့။ နောက်ပြီး ချက်ရပြုတ်ရသည့်ဒုက္ခမရှိတော့ ကျွဲ ၉ ကောင်၊ နွား ၉ ကောင်၊ ဆိတ် ၉ ကောင် စသည်ဖြင့် များများပူဇော်လို့ရသည်။ (အထက်ဖော်ပြပါ သာဒွန်းရွာနတ်ပွဲတွင်မတော့ ဝက် ဘယ် နှစ်ကောင်သတ်မှန်း မသိပါ။ သိပ်တော့ နည်းလှမည်မဟုတ်။)

ဆိုတော့ နတ်ပူဇော်တာ၊ နတ်တင်တာလည်း အကျက်ယဇ်ပူဇော်တာပင် မဟုတ်ပါလော။ ယဇ်ပူဇော်တယ်ဆိုတာက အစိမ်းလိုက် ကျွေးသည်။ နတ်ပူဇော်တာကျတော့ ချက်ပြီးကျွေးသည်။ ဒါပဲကွာပါသည်။ လူကြားကောင်းအောင်သာ နတ်ပူဇော်သည် ဟု ကင်ပွန်းတပ်သည်။ တကယ်တော့ ယဇ်ပူဇော်ခြင်းတစ်မျိုးပင် မဟုတ်ပါလော။

(၃)

ကျွန်ုပ်က စွန့်စားခန်း ဇာတ်လမ်းများကို ကြိုက်သည်။ Pirate of the Caribbean ကားများ၊ Harry Potter ကားများ၊ Superman, Spiderman, X Man, Avergers စသောကားများကို ကြိုက်သည်။ နောက်ပြီး Indiana Jones ကားများ၊ Sherlock Holmes ကားများ။

ယခု Vikings ဇာတ်လမ်းတွဲကြည့်နေတာ အားလုံးပြီးသွားပြီ။ စုစုပေါင်း ၅၉ တွဲရှိ၏။ နောက်ဆုံးဇာတ်သိမ်းပိုင်းကို ကိုယ့်ဘာသာ ကိုယ် သိမ်းကြရန် ဖွင့်ပေးထားခဲ့သည်။

Vikings ကားမှာ အလွန်ကြောက်စရာကောင်းလှ၏။ အေဒီ ၈၀၀ ပတ်ဝန်းကျင်လောက်က စကင်ဒီနေဗီးယန်းကျွန်းဆွယ် (ယခု နော်ဝေ နှင့် ဆွီဒင်) မှ လူမျိုးများအကြောင်း ရိုက်ကူးထားတာ ဖြစ်၏။ ထိုလူမျိုးများကား ဗိုက်ကင်းများ ဖြစ်၏။ ကြမ်း၏။ ရိုင်း၏။ သတ်ဘို့ဖြတ်ဘို့ လက်မနှေး။ ကာမအာရုံဝင်စားလာပြီဆိုလျှင်ဖြင့် ယောက်ျားမိန်းမ မရွေး။ အသားကုန်ခံစားပစ်လိုက်ကြသည်ချည်း ဖြစ်၏။

၎င်းတို့သည် ၎င်းတို့၏ နတ်ဘုရားကို ယဇ်ပူဇော်၏။ ဝက်ကိုးကောင်၊ ဆိတ်ကိုးကောင်၊ လူကိုးယောက်စသဖြင့် အကြီးအကျယ် သတ်ဖြတ်ကာ ယဇ်ပူဇော်တာဖြစ်၏။ ၎င်းတို့၏ ဘုန်းကြီးများမှာလည်း သရဲသဘက်များအလား အလွန်ကြောက်စရာ ကောင်းလေ သည်။

ယဇ်ပူဇော်ခံမည့်သူမှာ ၎င်းကိုယ်တိုင်က လိုလိုလားလား စတေးခံရန် အသင့်ရှိရ၏။ စိတ်မပါလျှင်၊ သို့မဟုတ် ဘာသာခြားဖြစ်လျှင် ယဇ်ပူဇော်လို့မရ။

မြေယာကောင်းအောင်၊ မိုးလေဝသကောင်းအောင်ဆိုကာ ယဇ်ပူဇော်သည်။ စစ်တိုက်တော့မည်ဆိုလျှင် စစ်အောင်နိုင်ရေးအတွက် ယဇ်ပူဇော်သည်။

ယဇ်ပူဇော်ရာမှ ထွက်လာသည့်သွေးများကို သောက်ကြသည်။ ကျားမ မရွေး၊ ထိုသွေးများဖြင့် ပက်ဖြန်းခံကြသည်။ မျက်နှာကို ထို သွေးများဖြင့် သုတ်လိမ်းသည်။

Vikings ကားတွင် ယဇ်ပူဇော်တာကို ပြတ်ပြတ်သားသား ရိုက်ပြထားလေရာ အသည်းတုံစဖွယ်ဖြစ်၏။ အမျိုးသမီးနှင့် ကလေးများ ကြည့်ရန် မသင့်တော်လေ။

ယဇ်ပူဇော်တာကို သေသေချာချာရိုက်ပြသည့် နောက်တစ်ကားမှာ အင်ဒီယာနာဂျုံး ဖြစ်၏။ ဇာတ်ကားနာမည်မှာ Indiana Jones and the Kingdom of the Crystal Skull ထင်ပါသည်။ ထိုကားကို ကျွန်ုပ်ငယ်ငယ်ကတည်းက ကြည့်ဖူးသည်။ သို့သော် ယခု ပြန်ကြည့်တော့ အကုန် အသစ်ဖြစ်နေသည်။

ထိုကားတွင် အိန္ဒိယ၌ လူအရှင်လတ်လတ်ကို နှလုံးထုတ်ကာ နတ်ကို ပူဇော်သည်။ ဒူရ်ဂါမယ်တော်လား၊ ကာလီမယ်တော်လား မမှတ်မိ။ ဘာနတ်လဲဆိုတာ မေ့နေပါပြီ။ ဤသည်မှာလည်း အသည်းယားစဖွယ် ဖြစ်၏။

နောက်ရုပ်ရှင်တစ်ကားတွင်လည်း မိန်းမပျိုကလေးများကို အရှင်လတ်လတ် နှလုံးထုတ်ကာ တောရိုင်းကောင်ကြီးကို (နတ်ဘုရား ဟု ယူဆလျက်) ပုံမှန် ပူဇော်ရသည်။ နောက် အနောက်တိုင်းမှ လူဖြူတစ်ယောက် (မင်းသား) ရောက်လာကာ ထိုတောရိုင်း ကောင်ကြီးကို ထောင်ဖမ်းပြီး သတ်ဖြတ်ပစ်လိုက်တော့မှ မိန်းမပျိုကလေးများမှာ ချမ်းသာရာရတော့သည်။ ကြည့်ခဲ့သည့် ရုပ်ရှင်များမှာ အတော်များရကား ထိုဇာတ်ကားနာမည်နှင့် ဇာတ်လမ်း၊ ဇာတ်ကောင်စသည်တို့ကို မေ့နေပါပြီ။

နိဂုံး

ကျွန်ုပ်အံ့သြမိသည်မှာ ဤကမ္ဘာပေါ်မှ ဖြစ်စဉ်များသည် ဇာတ်တိုက်မထားပါဘဲလျက် အရှေ့တိုင်း၊ အနောက်တိုင်း မည်သည့် တိုင်းပြည်မဆို အတူတူပင် ဖြစ်နေတတ်တာ ဖြစ်ပါသည်။

ထိုယဇ်ပူဇော်သည့်ကာလများက တစ်ကမ္ဘာလုံးမှ နိုင်ငံများတွင် ယဇ်ပူဇော်သောအလေ့ ထွန်းကားခဲ့၏။
နောက်ပြီး ဘုရင်စနစ်ထွန်းကားတော့လည်း တစ်ကမ္ဘာလုံးမှ နိုင်ငံများ အတူတူပင်ဖြစ်၏။
ထို့နောက် ပါလီမန်ဒီမိုကရေစီဆိုတော့လည်း တစ်ကမ္ဘာလုံး စီလိုက်ကြသည်ချည်း ဖြစ်ပါသည်။
ယခင်ကလူများမှာ သွားလာရေးခက်ခဲသဖြင့် အရှေ့အနောက်၊ တစ်နိုင်ငံနှင့် တစ်နိုင်ငံ ကူးလူးဆက်ဆံရေး ခက်ခဲလှသည်။ သို့တိုင် ထိုဓလေ့စရိုက်များ တူနေခြင်းမှာ အံ့သြစရာ မကောင်းပါသလော။

ယခုမူ နည်းပညာများတိုးတက်လာသဖြင့် အရှေ့အနောက် ကူးလူးဆက်ဆံကာ ယဉ်ကျေးမှုများ ဖလှယ်ကြ၏။ အဲလေ ယဉ်ကျေးမှုဖလှယ်သည်ဆိုရာ၌ အရှေ့က ယဉ်ကျေးမှုများ အနောက်ကိုရောက်သွားတာတော်တော်။ အနောက်တိုင်းမှ နှစ်လုံးပြူးများ မြန်မာပြည်က မမသဉ္ဇာတို့ဆီရောက်လာတာ ခပ်များများ ဖြစ်ပါသည်။

ဆိုတော့ အရှေ့တိုင်းကလူတွေ ဘောင်းဘီတကားကားနှင့်နေတာကျ မဆန်းဘဲ အနောက်တိုင်းသားများ ပုဆိုးဝတ်လျှင်မူ အထူးအဆန်းအဖြစ် ကြည့်ကြရလေ၏။ မြန်မာတွေ ယင်းဂလ်ရ်ှလို ဒွတ်ဒက်၊ ရွှတ်ရှက်လုပ်တာမဆန်းဘဲ ကိုရွှေအဖြူတို့ မြန်မာလို တစ်လုံးစနှစ်လုံးစပြောလျှင်မူကား ကျွန်ုပ်တို့မှာ လိပ်၌ အမွေးပေါက်လာသည့်အလား အထူးအဆန်းလုပ်ကာ ကြည့်ကြရလေသော ဟူသတတ်။ အလွန်ထူးဆန်း အံ့သြဘွယ်ရာ ကောင်းလှပေ၏။

ကျွန်ုပ်မနေဖူး၍ ယခုအခါ အနောက်တိုင်းမှာ နတ်ကို ကြက်ဝက်များဖြင့် ပူဇော်ပသသည့်အလေ့ ရှိသေးသလား၊ လုံးဝ ချုပ်ငြိမ်းသွားပြီလား သေသေချာချာ မသိပါ။

သူတို့ဆီမှာ ရှိသေးသည်ဖြစ်စေ၊ ချုပ်ငြိမ်းသွားပြီဖြစ်စေ၊ ကျွန်ုပ်ကတော့ ကျွန်ုပ်တို့မြန်မာပြည်မှာ -
ရွှံ့မီးတောင်ထဲ နို့တွေ သွန်ချတာ။ ရေအောက်မှာ နဂါးတွေ မီးထွန်းကြတာ၊ တောင်ပြုံးပွဲအကြောင်းပြပြီး မူးကြရူးကြတာ၊ တော်ကြာ ဟိုသီလရှင်က သူနဲ့ဖက်အိပ်ရင် ရောဂါပျောက်သတဲ့ ဆိုတာမျိုးတွေ၊ သာဒွန်းရွာမှာလို ဝက်တွေသတ်ပြီး ဘယ်နေမှန်းမသိသော နတ်တွေကို ပူဇော်ပသတာမျိုးတွေ မရှိစေချင်တော့ပါ။

သို့သော် ဤသည်မှာ ကျွန်ုပ်၏ဆန္ဒမျှသာဖြစ်ပြီး လူတွေသူတို့ယုံကြည်ချက်နှင့်သူတို့ ပူဇော်ပသနေတာကိုတော့ဖြင့် ဘာမှလုပ်လို့ မရပါ။ သူတို့စိတ်ချမ်းသာသလို လုပ်ကြပါစေဟုသာ ခွင့်လွှတ်ထားရတော့မည် ဖြစ်ပါသတည်း။

မြန်မာပြည်အတွင်း နတ်တင်ခြင်း၊ ကင်းရှင်းကြပါစေ။

ကျေးဇူးတင်ပါသည်။

အေးငြိမ်း
၁ ဇူလိုင်လ၊ ၂၀၁၉

ရည်ညွှန်း

The Voice Sunday, Vol. 7, No. 62, စာမျက်နှာ - ၆