Sunday, June 19, 2011

ဂဟေဆက်ခြင်းအတတ်ပညာ (၁)


၁။ ဂဟေဆက်ခြင်း ဟူသော အဓိပ္ပါယ်
            ဂဟေဆက်ခြင်း ဟူသည်မှာ သင့်တော်သော သတ္တုအမျိုးအစား၊ အပူချိန်၊ ဖိအား စသည်တို့ပေါ်မူတည်၍ သတ္တုနှစ်ခုကို တစ်ခုထည်းဖြစ်အောင် ပေါင်းစပ်ပေးသော နည်းစဉ်ကို ခေါ်ပါသည်။ များသောအားဖြင့် ဂဟေဆက်ခြင်း ဟူ သော ဝေါဟာရကို သတ္တု (သံဖြစ်စေ၊ သံမဟုတ်သော အခြားသတ္တုတစ်မျိုးမျိုးဖြစ်စေ) များတွင်သာ သုံးပါသည်။ သို့သော် ပလတ်စတစ်များတွင်လည်း ပလတ်စတစ်ဂဟေချောင်းကိုသုံးကာ ဂဟေဆက်ခြင်း ရှိပါသည်။



ဂဟေဆက်ခြင်းသည် ဈေးသက်သာပြီး မြန်ဆန်စိတ်ချရသဖြင့် ယခုအခါ စက်မှုလုပ်ငန်း၊ ကရိန်း၊ ဘူဒိုဇာ စသော စက်ယန္တယားကြီးများ ထုတ်လုပ်ခြင်းလုပ်ငန်း၊ မိုင်းတွင်း၊ စိုက်ပျိုးရေးလုပ်ငန်း၊ ဆောက်လုပ်ရေး လုပ်ငန်း၊ သင်္ဘောတည်ဆောက်ခြင်း လုပ်ငန်း၊ လျှပ်စစ်ပစ္စည်းများ ထုတ်လုပ် ခြင်းလုပ်ငန်း စသော နယ်ပယ်အသီးသီးတွင် တွင်ကျယ်စွာ အသုံးပြုလျှက်ရှိ၏။
            များသောအားဖြင့် ဂဟေဆက်ခြင်းဖြစ်စဉ်တွင် ဆက်မည့် သတ္တုနှစ်ခု ကို အရည်ပျော်စေကာ အဖြည့်ခံသတ္တုတစ်ခုဖြင့် တွဲစေလိုက်ခြင်း ဖြစ်သည်။ အဖြည့်ခံသတ္တုကိုမသုံးဘဲ ဆက်မည့်သတ္တုနှစ်ခုကို ဖိအားပေးကာ အပူကို ထွက်စေလျှက် တွဲစေသောနည်းကိုလည်း သုံးပါသေးသည်။ သံကို ဂဟေဆက် ခြင်းအား အင်္ဂလိပ်လို welding ဟု သုံးပါသည်။ သို့သော် သံထက် အရည် ပျော်မှတ်နိမ့်သော အခြား ကြေး၊ ခဲ စသော သတ္တုများ ကို ဂဟေဆက်ခြင်း အတွက်မူ brazing, soldering စသဖြင့် သုံးပါသည်။
            ကြေးနီ၊ ကြေးဝါ၊ ခဲ စသည်တို့ကို ဂဟေဆော်ရာတွင် ပင်ရင်းသတ္တုကို အရည်မပျော်စေဘဲ ၎င်းထက်ပိုပြီး အရည်ပျော်မှတ်နိမ့်သော အဖြည့်ခံ ဂဟေချောင်းကိုသာ အရည်ပျော်စေလျှက် ဆက်ပါသည်။ ဥပမာ - ခဲဂဟေ
            ဂဟေဆော်ရန်လိုအပ်သော အပူကို အပူထုတ်ပေးရာ နေရာအမျိုးမျိုးမှ ထုတ်ယူပါသည်။ ထိုအထဲတွင် ဓါတ်ငွေ့ မီးတောက်၊ လျှပ်ပန်း၊ လေဆာ၊ ပွတ်အား စသည်တို့ ပါဝင်သည်။ လက်တွေ့လုပ်ငန်းခွင်တွင်မူ ဂဟေကို အခြေအနေ အလိုက် ပတ်ဝန်းကျင်အမျိုးမျိုးတွင် ဆော်ရသည်။ ဥပမာ - သာမန် ပြင်ပလေထု အခြေအနေ၊ အလုံပိတ်အခန်း၊ ရေအောက် စသည်။
            ဂဟေဆော်ခြင်းသည်ကား အန္တရာယ်များသော အလုပ်ဖြစ်၏။ အပူလောင်နိုင်ခြင်း၊ လျှပ်စစ်ရှော့ ဖြစ်နိုင်ခြင်း၊ ဂဟေဆော်ရာမှ ထွက်သော အဆိပ်ဓါတ်ငွေ့များကို ရှုမိခြင်း၊ စူးရှသောအလင်းရောင်ကြောင့် မျက်စိကို ထိခိုက်နိုင်ခြင်း၊ ခရမ်းလွန်ရောင်ခြည် အန္တရာယ် စသည်တို့သည် ဂဟေဆော်သူတစ်ဦး ရင်ဆိုင်ရမည့် အန္တရာယ်များ ဖြစ်သည်။ သို့အတွက် ဂဟေသမားတစ်ဦးသည် မိမိကိုယ်မိမိ ထိုအန္တရာယ်များမှ အထူးဂရုစိုက်ကာကွယ်ရန် လိုသည်။
            ၁၉ ရာစုနှစ်ကုန်ပိုင်းများလောက်ထိ forged welding ကိုသာ အသုံးများ ကြသေးသည်။ Forged welding ဆိုသည်မှာ ပန်းဘဲဖိုများတွင် သတ္တုချောင်းမျာကို နီရဲလာအောင် အပူပေးပြီး အလွန်ပူနေချိန်တွင် သတ္တုချောင်းနှစ်ခုကို တူနှင့်ထူကာ ဆက်ခြင်းဖြစ်သည်။  ၁၉ ရာစုကုန်ပိုင်းနှစ်များတွင် Arc Welding (လျှပ်ပန်းဂဟေ) Oxyfuel Welding (အောက်ဆီလောင်စာဂဟေ) တို့ကို စတင်သုံးစွဲခဲ့ပြီး များမကြာမီ Electric Resistance Welding (လျှပ်စစ်ခုခံမှု ဂဟေ) ကိုပါ တီထွင်သုံးစွဲ လာခဲ့ကြသည်။ 


ပထမကမ္ဘာစစ်နှင့် ဒုတိယကမ္ဘာစစ်ကြီးက ဂဟေဆက်အတတ်ပညာကို တစ်ဟုန်ထိုး ဖွံ့ဖြိုးတိုးတက်လာစေရန် တွန်းအားဖြစ်ခဲ့သည်။ စစ်ကြီးအတွင်း အဆောက်အအုံ၊ လမ်းတံတားများကို လျှင်မြန်စွာ ဆောက်နိုင်ရေးအတွက် ဈေးသက်သာပြီး စိတ်ချရသော ဂဟေဆက်နည်းများ တီထွင် သုံးစွဲခဲ့ကြသည်။ စစ်ကြီးပြီးသောအခါတွင်လည်း ပြန်လည် ထူထောင်ရေးလုပ်ငန်းများအတွက် အဆောက်အဦများဆောက်လုပ်ရန် ဂဟေဆက်ခြင်းသည် အလွန်လိုအပ်လာပြီ ဖြစ်ရာ နောက်ထပ် ဂဟေဆက်နည်းသစ်များဖြစ်သော ယနေ့တွင်တွင်ကျယ်ကျယ် အသုံးပြုနေသည့် လူအားဖြင့်ဆက်ရသော Shielded Metal Arc Welding, စက်တစ်ဝက် လူတစ်ဝက် (Semi-Automatic) သို့မဟုတ် စက်ချည်းသီးသီး ( Automatic)  ဆော်ရသော gas metal arc welding, submerged arc welding, flux-cored arc welding and electroslag welding စသည့် နည်းများပါ ပေါ်ပေါက်လာခဲ့သည်။
            ဂဟေဆက်အတတ်ပညာသည် ထိုမျှနှင့်ရပ်တန့်မနေသေးဘဲ laser beam welding, electron beam welding, electromagnetic pulse welding နှင့် friction stir welding ဟုပါ ၂၀ ရာစုနှောင်းပိုင်းတွင် ပေါ်ထွက်လာခဲ့ကြသည်။ ယနေ့ ခေတ်တွင်မူ စက်ရုပ်များနှင့် ဂဟေဆော်သော Robot Welding ကိုပါ တွင်တွင်ကျယ်ကျယ် သုံးနေကြပါပြီ။ အင်ဂျင်နီယာ နှင့် သိပ္ပံပညာရှင်များသည် ယခုမျှနှင့် တင်းတိမ်ရောင့်ရဲမနေဘဲ ငွေကြေးများစွာ ရင်းနှီးလျှက် ပိုမိုကောင်းမွန်သော ဂဟေဆက် အရည်အသွေးရရန် နည်းလမ်းအသစ်များ၊ ကိရိယာအသစ်များရရန် မပြတ် သုတေသနလုပ်လျှက် ရှိကြပါသည်။

၂။ ဂဟေသမိုင်း

            သမိုင်းကိုပြန်ကြည့်လျှင် ဥရောပနှင့် အာရှအလယ်ပိုင်း၌ ကြေးခေတ် နှင့် သံခေတ်စတင်ကတည်းက  သတ္တုပစ္စည်းများကိုဆက်ရန် နည်းလမ်းမျိုးစုံကို ကြံဆခဲ့ကြသည်။ ဂဟေဆက်ခြင်းကို ဆောက်လုပ်ရေးတွင် သုံးခဲ့သည့် ထင်ရှားသော သာဓကတစ်ခုမှာ အေဒီ ၃၁၀ ခုနှစ်ခန့်က တည်ဆောက်ခဲ့သော အိန္ဒိယနိုင်ငံ၊ ဒေလီမြို့ရှိ အမြင့် ၇ မီတာ၊ အလေးချိန် ၆ တန်ခန့်ရှိ Iron Pillar ဖြစ်သည်။ 



အစောဆုံး ဂဟေဆက်ခြင်းကို ကြေးခေတ်တွင်တွေ့ရသည်။ သတ္တု နှစ်ခုကို ထပ်ကာ အပူပေးပြီး ထုဆက်ခြင်းဖြင့် စက်ဝိုင်းပုံသဏ္ဍာန် ရွှေဗူးကလေး များ ပြုလုပ်ခဲ့ကြသည်။ ထိုဗူးကလေးများကို လွန်ခဲ့သော နှစ်ပေါင်း ၂၀၀၀ ကျော် ကတည်းက ပြုလုပ်ခဲ့ကြသည်ဟု ယူဆကြပါသည်။ သံခေတ်တွင် အီဂျစ် အတတ်ပညာရှင်များနှင့် မြေထဲပင်လယ်မှ ပညာရှင်များသည် သံကိုဆက်သော အတတ်ကို လေ့လာ တတ်မြောက်ခဲ့ကြသည်ဟု ယူဆရပါသည်။ ဘီစီ ၁၀၀၀
ခန့်ကပြုလုပ်ထားသော သံထည်ကိရိယာများကို တူးဖော်တွေ့ရှိခဲ့ကြ၏။
အလယ်ခေတ်သို့ရောက်သောအခါ သတ္တုကိုအပူပေးပြီး ထပ်ကာ ထပ်ကာထုခြင်းဖြင့် ဆက်စေသောနည်းဖြစ်သည့် forged welding နည်းကို ပိုမို ဆန်းသစ်ကာ သုံးစွဲလာကြသည်။ ၁၈၀၀ ပြည့်နှစ်တွင် Sir Humphry Davy က ဘက်ထရီ ကို သုံး၍ ကာဘွန်ချောင်းနှစ်ခုကိုထိလျှင် မီးပွား (arc) ထွက်ကြောင်း တွေ့ရှိခဲ့သည်။ ၁၈၀၂ ခုနှစ်သို့ရောက်သောအခါ ရုရှားလူမျိုး သိပံ္ပပညာရှင် Vasily Petrov က လျှပ်စစ်မီးပန်း (electric arc) ကိုတွေ့ရှိပြီး ၎င်းကို ဂဟေဆက်လုပ်ငန်းတွင် အသုံးပြုနိုင် ကြောင်း တင်ပြခဲ့သည်။ ထို့ပြင် ဓါတ်ငွေ့ကို ဖြတ်တောက်ရန်နှင့် ဂဟေဆက်ရန် သုံးနိုင်ခဲ့သည်။  
            ၁၈၈၁ - ၈၂ ခုနှစ်တွင် ရုရှလူမျိုး တီထွင်သူတစ်ဦးဖြစ်သည့် Nikolai Benardos က ကာဘွန်ဂဟေချောင်းများ (carbon electrodes) ကို သုံးပြီး ဆော်ရသည့် Carbon Arc Welding ဟု လူသိများသော Electric Arc Welding ကို တီထွင်ခဲ့သည်။ ၎င်းက ယနေ့ခေတ်တွင်သုံးနေသည့် ဂဟေချောင်းလက်ကိုင် (electrode holder) ကို စတင် တီထွင် ပေးခဲ့ သည်။ ၎င်း၏ နောက်ပိုင်းတွင် ၁၈၉၀ ခုနှစ်၌ အမေရိကန် သိပံ္ပပညာရှင် C.L.Coffin က သတ္တုဂဟေချောင်း ကို တီထွင်ခဲ့ သည်။ အဖြည့်ခံသတ္တုချောင်းကို အရည်ပျော်စေကာ သတ္တုပြားနှစ်ခုကို ဆက်နိုင်သည့် ပထမဦးဆုံးသော မှတ်တမ်း ဖြစ်သည်။ တစ်ချိန်ထဲမှာပင် ရုရှားသိပ္ပံပညာရှင် Nikolai Slavyanov ကလည်း ဤအတွေးမျိုး တွေ့ရှိခဲ့သည်။ သို့သော် သူတွေ့သည်မှာ ပုံလောင်းခွက်ထဲတွင် သတ္တုကို ပုံသွန်းခြင်းအတတ် ဖြစ်၏။
၁၉၀၀ ခုနှစ်ပတ်ဝန်းကျင်တွင် ဗြိတိသျှသိပံ္ပပညာရှင် A.P. Strohmenger က ပိုမိုတည်ငြိမ်သော ဂဟေမီးကို ပေးစွမ်းနိုင်သည့် ရွှံမံဂဟေချောင်းကို တီထွင်ခဲ့ပြန်သည်။ အစပိုင်းတွင် ဂဟေချောင်းပေါ်၌ ဖုံးခဲ့သည်မှာ ချော် မဟုတ်သေး။ မြေစေး သို့မဟုတ် ထုံး ဖြစ်သည်။ ၁၉၀၇ ခုနှစ်နှင့် ၁၉၁၄ ခုနှစ်များအတွင်းတွင် ဆွီဒင် သိပ္ပံပညာရှင် Oscar Kiellberg က ပိုမိုကောင်းမွန်သော ချော်ကို တီထွင်နိုင်ခဲ့သည်။
            ၁၉၀၃ ခုနှစ်တွင် ဂျာမန် သိပံ္ပပညာရှင် Goldschmidt က thermit welding ကို တီထွင်ပြီး ရထားသံလမ်းများ ဂဟေဆက်ရာတွင် အသုံးချခဲ့သည်။ တစ်ချိန်ထဲမှာပင် oxyfuel welding ကိုလည်း တွင်ထွင် ကျယ်ကျယ် သုံးစွဲလာနိုင်ခဲ့ သည်။ ၁၉၀၀ ပြည့်နှစ်မတိုင်မီ ကာလများက အောက်ဆီဂျင်ကို ဟိုက်ဒြိုဂျင်၊ ကျောက်မီးသွေ ဓါတ်ငွေ့များဖြင့် ရောသုံးခဲ့ သည်။ ၁၈၃၆ ခုနှစ်တွင် အက်ဆီတလင်းဓါတ်ငွေ့ကို Edmund Davy ဆိုသူက ရှာဖွေတွေ့ရှိခဲ့ သော်လည်း ၁၉၀၀ ပြည့်နှစ် များတိုင် ဂဟေဆော်ခြင်း လုပ်ငန်းတွင် မသုံးနိုင်ခဲ့သေး။ သို့သော် ၁၉၀၀ ပြည့်လွန်ကာလများတွင် ဖိအားနိမ့် အက်ဆီတလင်း နှင့်သုံးနိုင်မည့် ဂဟေမီးချောင်း (torch) ကို တီထွင်နိုင်ခဲ့သည်။
၁၉၁၉ ခုနှစ်တွင် C.J.Holsag က ဂဟေဆော်ရာတွင် ပြန်လှန်လျှပ်စီး (Alternating Current) ကို သုံးစွဲရန် တီထွင်ခဲ့သော်လည်း ဆယ်စုနှစ်တစ်ခုကျော်ကြာသည်ထိ လူကြိုက်မများခဲ့ပေ။
            ပထမပိုင်းတွင် oxyfuel welding သည် ၎င်း၏ ပေါ့ပါးမှုနှင့် ဈေးချိုမှုတို့ကြောင့် လူကြိုက်များသော ဂဟေဆော်နည်း တစ်မျိုးဖြစ်ခဲ့သည်။ သို့သော် ၂၀ ရာစုတွင် ဂဟေဆော်နည်းများလည်း တိုးတက်လာသည်နှင့်အမျှ ထို oxyfuel welding နေရာတွင် arc welding က အစားထိုးနေရာယူလာခဲ့သည်။
            ပထမကမ္ဘာစစ်တွင် ဂဟေဆက်နည်းနည်းပညာများ တစ်ဟုန်ထိုး တိုးတက်လာခဲ့သည်။ သင်္ဘောများတည်ဆောက် ခြင်းနှင့် လေယာဉ်ပျံများတည်ဆောက်ခြင်းတွင်ပင် ဂဟေကို သုံးစွဲလာကြသည်။ ၁၉၂၀ ခုနှစ်များတွင် ဂဟေချောင်းကို ပုံသေထိုးကျွေးသော အလိုအလျောက် ဂဟေဆော်စက်ကိုပါ တီထွင်သုံးစွဲလာနိုင်ခဲ့သည်။
            သိပံ္ပပညာရှင်များသည် ဂဟေဆော်နေစဉ် ဂဟေသားကို လေထဲရှိ အောက်ဆီဂျင်နှင့် နိုက်ထရိုဂျင်ဓါတ်ငွေ့များနှင့် မထိနိုင်စေရန် ကာကွယ်ပေးမည့် အကောင်းဆုံးဓါတ်ငွေ့ကို တစိုက်မတ်မတ် ရှာဖွေနေခဲ့ကြသည်။ လေနှင့် ဂဟေသားတို့ ထိတွေ့ခြင်း၏ အဓိက ပြဿနာမှာ ဂဟေသား ကြွပ်ဆပ်ခြင်းနှင့် ဂဟေသားအတွင်း လေခိုခြင်း ဖြစ်သည်။ သုတေသန လုပ်ငန်းများက ဟိုက်ဒြိုဂျင်၊ အာဂွန်နှင့် ဟီလီယမ် ဓါတ်ငွေ့တို့သည် ဂဟေသားအကာ ဓါတ်ငွေ့ (welding atmosphere) အဖြစ်သုံးရန် ကောင်းမွန်ကြောင်း ဖော်ပြခဲ့ကြသည်။
            နောက်ပိုင်းနှစ်များတွင်မူ ဓါတ်တုံ့ပြန်တတ်သည့် သတ္တုများဖြစ်သော အလူမီနီယမ် နှင့် မဂ္ဂနီစီယမ်သတ္တုများကိုပါ ဂဟေဆော်နိုင်ခဲ့သည်။ ၁၉၃၀ ပြည့်နှစ်များတွင် သင်္ဘောဆောက်ခြင်းနှင့် ဆောက်လုပ်ရေးလုပ်ငန်းများတွင် လူကြိုက်များ သော stud welding ကို ထပ်မံတွေ့ရှိခဲ့ပြန်သည်။ ၁၉၃၂ တွင် ရုရှားသိပ္ပံပညာရှင် Konstantin Khrenov က ရေအောက် တွင် လျှပ်စစ်သုံး၍ ဂဟေဆော်ခြင်းကို စမ်းသပ်အောင်မြင်ခဲ့သည်။ ၁၉၄၁ ခုနှစ်တွင် GTAW (Gas Tungsten Arc Welding) ကို လည်းကောင်း၊ ၁၉၄၈ ခုနှစ်တွင် GMAW (Gas Metal Arc Welding) ကိုလည်းကောင်း တီထွင်ကာ သံမဟုတ်သော သတ္တု များကို လျှင်မြန်စွာ ဂဟေဆော်နိုင်ခဲ့သည်။
            ၁၉၅၀ ပြည့်နှစ်များတွင် SMAW (Shielded Metal Arc Welding) ကို ချော်အုပ်သော ဂဟေချောင်းများ ဖြင့် တိုးတက်တီထွင်နိုင်ခဲ့ပြီး စက်မှုလုပ်ငန်းများတွင် လျင်မြန်စွာ ကျယ်ကျယ်ပြန့်ပြန့် သုံးစွဲလာခဲ့သည်။ ၁၉၅၇ ခုနှစ်တွင်မူ ပိုမို ကောင်းမွန် မြန်ဆန်သော လေကာဓါတ်ငွေ့ကို ကိုယ်တိုင်ထုတ်ပေးနိုင်သည့် flux-cored arc welding နည်းစဉ်ကို အလို အလျောက် ဂဟေစက်များနှင့်တွဲကာ သုံးစွဲနိုင်ခဲ့သည်။ ထိုနှစ်မှာပင် plasma arc welding ကိုလည်း တီထွင် သုံးစွဲနိုင်ခဲ့သည်။ ၁၉၅၈ ခုနှစ်တွင် electroslag welding ၊ ၁၉၆၁ ခုနှစ်တွင် electrogas welding တို့ကို တီထွင်နိုင်ခဲ့ပြန်သည်။ 

၁၉၆၀ ခုနှစ်များ နောက်ပိုင်းတွင် ဂဟေနေရာကျဉ်းကျဉ်း နှင့် နက်နက် ဆော်နိုင်သည့် electron beam welding ၊ မြန်နှုံးမြင့်စွာ အလိုအလျောက်ဆော်နိုင်သော laser beam welding ၊ ၁၉၆၇ ခုနှစ်တွင် electromagnetic pulse welding ၊ ၁၉၉၁ ခုနှစ်တွင် friction stir welding စသည်တို့ကို တစ်ဆင့်ပြီးတစ်ဆင့် တီထွင်လာခဲ့ကြသည်။ သို့သော်လည်း ထို နောက်ဆုံးတွေ့ရှိသည့် ဂဟေဆော်နည်းများမှာ ကောင်းပင်ကောင်းသော်ငြားလည်း နည်းပညာအဆင့်မြင့် စက်များလိုပြီး ပိုမိုဈေးကြီးသောကြောင့် စက်မှုလုပ်ငန်းများတွင် တွင်တွင်ကျယ်ကျယ်မသုံးနိုင်ပဲ အသုံးချမှုဆိုင်ရာ အကန့်အသတ်များ ရှိနေသေးသည်။
၃။ ဂဟေဆက် နည်းစဉ်များ (Welding Processes)
            ဂဟေဆက်နည်းစဉ် အများအပြားရှိပါသည်။ အောက်ပါဇယား (၁-၁) တွင်ကြည့်ပါ။ ဤ ဇယားသည် AWS (American Welding Society) မှ ထုတ်ထားသော ဇယားဖြစ်၏။ ဇယားပါ အတိုကောက် အသုံးအနှုံးများ မှာ အပြည်ပြည်ဆိုင်ရာ အသုံးအနှုံးများဖြစ်သည်။ ဥပမာ - SMAW ဆိုလျှင် မည်သည့်နိုင်ငံမှာမဆို Shielded Metal Arc Welding ဖြစ်ကြောင်း နားလည်ကြမည်။ 


Welding process များ မည်မျှများသည်ဖြစ်စေ။ အဓိက ကွဲလွဲချက်မှာ အပူကိုရယူပုံရယူနည်းနှင့် ထိုအပူကိုကို သတ္တု အရည်ပျော်အောင် မည်ကဲ့သို့ သုံးသနည်း ဟူသော နည်းပင်ဖြစ်သည်။ ဂဟေဆော်ခြင်း၏ သဘောတရားကိုသာ သင် ပိုင်ပိုင်နိုင်နိုင် နားလည်ပြီဆိုလျှင် မည်သည့် ဂဟေဆော်နည်းတွင်မဆို အသုံးချ၍ ရပါပြီ။
            အများဆုံးသုံးသည့် ဂဟေဆော်နည်းစဉ်များမှာ AW (Arc Welding), OFW (Oxyfuel Gas Welding) နှင့် RW (Resistance Welding) တို့ ဖြစ်၏။
Arc Welding (မီးပန်း ဂဟေဆော်နည်း)
            လျှပ်စစ်၏ အဖိုစနှင့် အမစ နှစ်ခုကို ထိလိုက်လျှင် ရှော့ဖြစ်ကာ မီးထွက်သည်။ ထိုမီးသည် အလွန်ပူ၏။ သတ္တုများ ကိုပင် အရည်ပျော်စေနိုင်သည်။ ဤသဘောတရားကိုယူကာ Arc Welding ကို ဖန်တီးထားခြင်း ဖြစ်သည်။ Arc Welding က အပူကို တစ်နေရာထဲတွင် စုစည်းရရှိသည်။ ဓါတ်ငွေ့ဖြင့် အပူပေးခြင်းက မလိုအပ်သော နေရာများကိုပါ ပူစေသည်။ သည့် အတွက် အပူကြောင့် သတ္တုပုံပြောင်းခြင်း (heat distortion) ကို ဖြစ်စေသည်။ အပူကို တစ်နေရာထဲတွင် စုစည်းထားနိုင်သည့် အတွက် ထိုးဖောက်အား (penetration) ကောင်းသည်။ ဂဟေဆော်နှုံးမြန်သည်။ ထို့ကြောင့် လက်တွေ့တွင် စီးပွားရေး တွက်ခြေကိုက်သည့်အတွက် Arc Welding ကို ပို၍တွင်တွင်ကျယ်ကျယ် သုံးကြသည်။
            Arc Welding တွင် သုံးပိုင်းရှိ၏။ အပူထုတ်ပေးသော အပိုင်း၊ အဖြည့်ခံသတ္တု နှင့် အအုပ်ဓါတ်ငွေ့ တို့ဖြစ်သည်။ ဤတွင် အပူထုတ်ပေးသည့်အပိုင်းမှာ ဂဟေဆော်စက် (welding machine) ဖြစ်သည်။ ဂဟေဆော်စက်မှ ၀ါယာတစ်စ နှင့် ဂဟေဆော်မည့်သံပြား (parent metal) ကို တွဲထားသည်။ ကျန်တစ်စနှင့် လျှပ်ခေါင်း (electrode) ကို တွဲထား၏။ ထို ဂဟေချောင်းနှင့် သံပြားထိသောအခါ ရှော့ဖြစ်ကာ ဂဟေချောင်းအရည်ပျော်ပြီး သံပြားကို ဆက်စေသည်။
အသုံးများသော Arc Welding များမှာ -
SMAW – Shielded Metal Arc Welding (Stick Welding)
GTAW – Gas Tungsten Arc Welding
GMAW – Gas Metal Arc Welding
FCAW – Flux Core Arc Welding
PAW – Plasma Arc Welding
SAW – Submerged Arc Welding တို့ ဖြစ်၏။ ဤ ဂဟေဆော်နည်းများကို သက်ဆိုင်ရာအခန်းများတွင် အသေးစိတ် ရှင်းပြပါမည်။ 

Gas Welding (ဓါတ်ငွေ့ ဂဟေဆော်နည်း)
          ဤနည်းတွင် ဓါတ်ငွေ့ကို မီးရှို့ပြီး အပူကိုရယူသည်။ ဓါတ်ငွေ့များမှာ အောက်ဆီအက်ဆီတလင်း၊ အောက်ဆီဂျင်၊ မီသိုင်း အက်ဆီတလင်း ပရိုပဒင်း (methylacetylene propadiene) စသည်တို့ ဖြစ်သည်။ အသုံးများသော ဂဟေဆော်နည်း များမှာ -
AAW – Air Acetylene Welding
OAW – Oxy-acetylene Welding
OHW – Oxy-hydrogen Welding
PGW – Pressure Gas Welding - တို့ဖြစ်ပါသည်။ ဤ ဂဟေဆော်နည်းများကို သက်ဆိုင်ရာအခန်းများတွင်
အသေးစိတ် ရှင်းပြပါမည်။ 

Resistance Welding
            ဤဂဟေဆော်နည်းအကြောင်း တစ်ခန်းသီးသန့်ရေးထားပါသည်။
ထို့ပြင် Brazing (ကြေးဂဟေ) နှင့် Soldering (ခဲဂဟေ) တို့အကြောင်းလည်း အခန်းသပ်သပ်ဖွဲ့ကာ တင်ပြပါမည်။ 

၎။ ဂဟေဆိုင်ရာ ဝေါဟာရများ (Welding Terminology)

Air Carbon Arc Cutting (CAC-A) – ကာဗွန်လျှပ်ခေါင်းများသုံးကာ အပူဖြင့်သတ္တုကို အရည်ပျော်စေ၍ ဖြတ်သောနည်း ဖြစ်သည်။ ပျော်ကျသွားသော သတ္တုရည်များကို လေဖြင့်မှုတ်ထုတ်သည်။ 
Alternating Current (AC) – ပြန်လှန်လျှပ်စီး။ သာမန်အိမ်သုံးလျှစ်စစ်သည် AC ဖြစ်၏။ မြန်မာနိုင်ငံတွင် ၂၃၀ ဗို့ နှင့် 50 HZ ဖြစ်သည်။ 
Amperage –  လျှပ်စစ်စီးသွားမှုကို တိုင်းတာသော ယူနစ်။ အမ်ပီယာ ဟု ခေါ်သည်။ လျှပ်စီး (current) ၏ ယူနစ်ဖြစ်ပြီး အတိုကောက် amp ဟု သုံးသည်။ 
Arc – လျှပ်ခေါင်းထိပ်မှ ဂဟေဆော်မည့်သံပြားထိ အကွာအဝေး ကြားလပ်ဖြစ်သည်။ ထိုအကွာအဝေးသည် လျှပ်စီးမှုကို ခုခံမှု ကြောင့် အပူကိုဖြစ်ပေါ်စေသည်။
Arc Force – Dig သို့မဟုတ် Arc Control ဟုလည်း ခေါ်သေးသည်။ ဂဟေဆော်နေစဉ် ဗို့အားအနိမ့် (short arc length) အခြေအနေတွင် ပါဝါပင်ရင်းမှ လျှပ်စီးကို ပိုထုတ်ပေးခြင်းဖြစ်သည်။ ၎င်းက ဂဟေချောင်းကို သံပြားတွင် ကပ်မနေစေရန် ကူညီပေးသည်။  
Auto Link – အင်ဗာတာတွင် လူကချိတ်ပေးစရာမလိုဘဲ မူလဗို့အားငုတ် (primary voltage terminal) ကိုအလိုလို ချိတ်ပေး သော လျှပ်စီးပတ်လမ်းဖြစ်သည်။   
Automatic Welding – အလိုအလျောက် ဂဟေဆော်စက်။ အဆက်မှန်ကန်မှုကို စက်က အလိုလို ချိန်ညှိကာ ဆော်ပေး သွားသည်။ လူထိန်းပေးစရာမလို။  
Constant Current (CC) Welding Machine – ဤစက်များတွင် အများဆုံး ပတ်လမ်းတိုလျှပ်စီးပမာဏ (maximum short circuit current) အကန့်အသတ်ရှိသည်။ ဂဟေမီးအတိုအရှည်ကိုလိုက်၍ ဗို့အားကို အနည်းအများပြောင်းလဲ ပေးသည်။ သို့သော် လျှပ်စီး အပြောင်းအလဲမှာမူ အနည်းငယ်သာရှိ၏။
Constant Speed Wire Feder –  ဗို့အား ၂၄ သို့မဟုတ် ၁၁၅ ဖြင့် အလုပ်လုပ်သည်။
Constant Voltage (CV), Constant Potential (CP) Welding Machine – အထွက်လျှပ်စီး အမ်ပီယာ မည်မျှပင် ဖြစ်နေစေကာမူ ဤအမျိုးအစား စက်များသည် ဗို့အားကို တသမတ်တည်း ထုတ်လုပ်ပေးသည်။
Current – လျှပ်စီး။ ပစ္စည်းတစ်ခုအတွင်း ဖြတ်စီးသွားသော လျှပ်စီးဖြစ်ပြီး အမ်ပီယာ (ampere) ဖြင့် တိုင်းသည်။  
Defect –  ဆက်ကြောင်းတွင် အက်ရာပေါ်ခြင်း၊ ဆက်ကြောင်းအတွင်း လေခိုခြင်း၊ ချော်ရောခြင်း၊ ချိုင့်ခွက်များပေါ်ခြင်း၊ အပူလွန်ပြီး စားသွားခြင်း စသည့် ဂဟေဆက် တစ်ခု၏ အပြစ်အနာအဆာများကို ခေါ်သည်။
Direct Current (DC) – တစ်ဖက်သွားလျှပ်စစ်။ ဘက်ထရီအိုး၊ ဓါတ်ခဲတို့မှရသော လျှပ်စစ်မျိုးဖြစ်သည်။ အဖိုငုတ်နှင့် အမငုတ် မမှားစေရန် အထူးသတိပြုရသည်။
Direct Current Electrode Negative (DCEN) – Direct Current Straight Polarity (DCSP) ဟုလည်း ခေါ်သေးသည်။ လျှပ်ခေါင်း အီလက်ထရုတ်ကို အမငုတ်။ ဂဟေဆော်မည့်သံပြားကို အဖိုငုတ် ဖြင့်ဆက်သည်။
Direct Current Electrode Positive (DCEP) – Direct Current Reverse Polarity (DCRP) ဟုလည်း ခေါ်သေးသည်။ လျှပ်ခေါင်း အီလက်ထရုတ်ကို အဖိုငုတ်။ ဂဟေဆော်မည့်သံပြားကို အမငုတ် ဖြင့်ဆက်သည်။
Duty Cycle – ဂဟေဆော်စက်ထုတ်လုပ်သူက ဂျူတီဆိုင်ကယ်ကို တစ်ခါတည်း သတ်မှတ်ပေးလိုက်သည်။ ဂျူတီဆိုင်ကယ် ဆိုသည်မှာ ဂဟေဆော်စက်တစ်လုံးသည် အားအပြည့်နှင့် (full capacity)  ၁၀မိနစ် အတောအတွင်း ဘယ်လောက်ကြာကြာ မောင်းထားနိုင်သနည်း ဆိုသည်ပင်ဖြစ်သည်။ ဂဟေစက်တစ်လုံးသည် ၂၀% ဂျူတီဆိုင်ကယ် ရှိသည်ဆိုကြပါစို့။ ထိုစက်သည် ၁၀ မိနစ် အတောအတွင်း နှစ်မိနစ်ကြာသာ အားအပြည့်နှင့်မောင်းနိုင်သည် ဟု ဆိုလိုသည်။ တစ်နည်းအားဖြင့်ဆိုရလျှင် ထိုစက်ကို ၁၀ မိနစ် တောက်လျှောက်မောင်းမည်ဆိုလျှင် သုံးနိုင်သောအားအပြည့်၏ ၂၀ ရာခိုင်နှုံးကိုသာ သုံးပြီး မောင်းနိုင် သည်ဟု ဆိုလိုသည်။  

တောလွမ်းချင်း (၄)


ဆရာကြီးမင်းသုဝဏ် ၏ ရွာလွမ်းချင်း

            သည်တစ်ခါတော့ ကိုယ်လွမ်းတာ ခဏထားပြီး သူများလွမ်းတာကို ပြောပါမည်။ အခြားသူမဟုတ်။ ဆရာကြီး မင်းသုဝဏ် ဖြစ်၏။
            သတ္တ၀ါမှန်လျှင် လွမ်းကြသည်ချည်း။ အသင်တို့ မိမိခွေးကို သူတပါးသို့ ပေးဖူးပါသလော။ ကျွန်တော်တော့ ခွေးတို့၊ ကြောင်တို့မွေးတာ စိုးစဉ်းမျှ ၀ါသနာမပါသည်ဖြစ်၍ သည် ပုံပြင်မှန်မမှန်ကို မသိပါလေ။ ကြားဖူးသည်မှာကား ခွေးကို အခြားတစ်ရွာသို့ လိုက်ပို့လိုက်ပြီး ပြန်လာလျှင် မိမိအိမ်ပြန်မရောက်မီပင် ခွေးက ပြန်ရောက်နှင့်နေသည် ဟူ၏။
ထို့အတူပင် ခိုင်းနွားကြီးများမှာလည်း သခင်က အခြားသူတစ်ဦးသို့ ရောင်းလိုက်လျှင် သုံးနှစ်သုံးမိုး ချည်တိုင်ဟောင်း ကို ပြန်လွမ်းတတ်သည် ဟု ဆိုကြပါသည်။ နွားများက လွမ်းတတ်သည် ဆိုသည်ကို မြို့ကြီးသားများ နားလည်နိုင်မည် မထင်။ နွားနှင့် အနေနီးသူ တောသားများတော့ သိပါသည်။ နွားများသည် လူနှင့်အနေနီးသဖြင့် လူတို့အပြုအမူ အပြောအဆိုများကို နားလည် ခံစားတတ်သည်။ သို့သော် ယခုပြောလိုသည်မှာ နွားဋီကာ မဟုတ်မူ၍ နွားများလည်း လွမ်းတတ်သည်ဟုသာ မှတ်လိုက်ကြပါကုန်။
ကျွန်တော်ပြောချင်သည်မှာ သတ္တ၀ါမှန်လျှင် လွမ်းတတ်သည့်အကြောင်းသာ ဖြစ်ပါသည်။
ယခု ဆရာကြီးမင်းသုဝဏ် လွမ်းပုံကို ဆက်ပါမည်။

ဆရာကြီးကား ကဗျာစာဆိုဖြစ်၍ ကဗျာဖြင့်လွမ်းသည်။ ဆရာကြီး၏ အလွမ်းကဗျာကို ကျွန်တော် ဒေသကောလိပ် ဒုတိယနှစ် မြန်မာကဗျာလေ့လာချက် သင်ရတုံးက စတင် ခံစားခဲ့ရသည်။ သို့သော် ကဗျာမှာ အစအဆုံးမဟုတ်။ တိုစိတိုစိ ကလေးသာ ဖြစ်သည်။ ဤတွင် ဖော်ပြထားသည်မှာ -
- - - ရတုအညီ၊ မြေသို့သက်တဲ့ ယော်ရွက်ရီကို၊ ပလီပလာ တီတာတာ သည်ခါဓလေ့၊ နွေအကူး လေရူးဝှေ့တော့၊ ကွေ့ကွေ့ဝန်းဝိုက်၊ ရွှေကြောင်ဖား၊ မြီးဖျားလိုက်သို့၊ မြိုင်တိုက်စုံယံ၊ ရွက်ဟောင်းပျံသော် - - -
- - - တလှိုင်လှိုင်ပေါ၊ မြိုင်တကြော၊ တောစပယ်ဖြူ၊ ၀တ်မှုန်ကျင်းတဲ့၊ သင်းကြူကြူကို၊ လေချူလို့လွှင့်၊ ပန်းထုံတဲ့ လေချိုမှာ၊ ရွှေချိုးပျိုကူသံဆင့်ပေလိမ့် - - -  
သည်မျှသာ ဖြစ်သည်။ ကျွန်တော်ကား ဖာလူဒါကို တစ်ဇွန်းနှစ်ဇွန်းမျှ သောက်လိုက်ရသူကဲ့သို့ မဆတ်တငံ့ ခံစား လိုက်ရပါ၏။ သို့မို့ကြောင့် ထိုကဗျာတစ်ပုဒ်လုံးရရန် အားထုတ်ရှာဖွေခဲ့ပါသည်။ သို့သော် တော်တော်နှင့်မရနိုင်။
ကျွန်တော်က စာအုပ်ခရေဇီ သမားဖြစ်သဖြင့် ရန်ကုန်တွင်ကျွန်တော် အသွားဆုံးနေရာကို ပြပါဟု ဆိုလျှင် ပန်းဆိုးတန်း စာအုပ်အဟောင်းဆိုင်တန်းကို ပြရပါလိမ့်မည်။ သို့ ဆရာကြီး၏ စာအုပ်ကို ရှာနေခဲ့ရာ ၁၉၉၂ ခုနှစ် မတ်လ ၂၈ ရက်နေ့တွင် တစ်ခုသော ပန်းဆိုးတန်းစာအုပ်ဆိုင်တစ်ခုတွင် ဆိုက်ဆိုက်မြိုက်မြိုက် တွေ့လေတော့သတည်း။ ကျွန်ုပ်လည်း စင်ကာပူ တိုတို ပေါက်သူကဲ့သို့ ၀မ်းအသာကြီး သာသော ဟူသတတ်။
မင်းသုဝဏ် ကဗျာများ ဆိုသည့်စာသားကို ကထ္တူစက္ကူအဖုံးပေါ် တွင် လက်ရေးနှင့် ရေးထား၏။ စာအုပ်မှာ ရှေ့ဖုံး၊ နောက်ကျောဖုံး၊ စသည်တို့မရှိတော့ပြီ။ အတွင်းမှ စာရွက်များမှာလည်း ၀ါကျင့် တွန့်ကြေကာ အချို့စာရွက်များ စုတ်ပြဲနေပြီ ဖြစ်ပါသည်။ စာမျက်နှာများမှာလည်း ရှေ့ရောက်တာရောက်၊ နောက်ရောက်တာ ရောက်။
မာတိကာပြီးနောက် စာမျက်နှာ ၄၉ နှင့် စ၏။ စာမျက်နှာ ၆၄ ပြီးသော် စာမျက်နှာ ၁၇ သို့ ပြန်ရောက်ပြန်၏။ စာမျက်နှာ ၃၂ ပြီးမှ နိဒါန်းလာသည်။ စာမျက်နှာ ၁၆ ပြီးတော့ စာမျက်နှာ ၆၅ သို့ ပြန်ကျော့သည်။ ၀ါကျင့်နေပြီဖြစ်သော စာရွက်သားများမှာ ဆွေးမြေ့နေပြီဖြစ်သဖြင့် ပြန်ချုပ်ရန် မတတ်နိုင်။ သည်အတိုင်းထားလိုက်ရတော့သည်။ စာမျက်နှာ အစုံပါတာပဲ ကံကောင်းလှပြီ။ သည်စာအုပ်ကို ၅ ကျပ်နှင့် ၀ယ်ခဲ့၏။
အတွင်း မျက်နှာဖုံးတွင် စာဆိုတော် စာအုပ်စဉ် - ၁။ သပြေညိုနှင့် အခြား ကဗျာများ။ မင်းသုဝဏ် ဟု ဖော်ပြထားပြီး သုဓမ္မ၀တီ စာပုံနှိပ်တိုက်။ ၁၉၄၇ ဟု ပုံနှိပ်မှတ်တမ်းကို ဖော်ပြထားပါသည်။ ဆရာကြီး၏ ကဗျာစာအုပ်မှန်လျှင် ခါနွေဆန်းတော့ လွမ်းမိတယ် နှင့် ဖွင့်မှာကို အထွေအထူး ပြောစရာမလို။ သည်တော့မှ ကျွန်တော်လည်း အနှစ်နှစ်အလလက တောင့်တခဲ့ရသော ဆရာကြီး၏ လွမ်းချင်း ကဗျာရှည်ကြီးကို တစိမ့်စိမ့်နှင့် အရသာခံ ဖတ်ရပါတော့သတည်း။
ကျွန်ုပ်ကဲ့သို့ ခါနွေဆန်းတော့ လွမ်းမိတယ် ကို ခံစား၊ စားသုံးလိုသူတို့ အတွက် ပြန်လည် ဝေငှလိုက်ပါသည်။ (မူရင်းစာလုံးပေါင်းအတိုင်း)

- - - -- - - -  x x x - - - -- - - -

ခါနွေဆန်းတော့ လွမ်းမိတယ်

           ဆန်းစခါနွေ၊ သာတပေါင်းမို့ ညှာညောင်းကြွေ၊ ပြေပြေရောရု။ မြအသွေး ရွှေရေးလုလို့၊ ရတုအညီ၊ မြေသို့သက်တဲ့ ယော်ရွက်ရီကို၊ ပလီပလာ တီတာတာ သည်ခါဓလေ့၊ နွေအကူး လေရူးဝှေ့တော့၊ ကွေ့ကွေ့ဝန်းဝိုက်၊ ရွှေကြောင်ဖား၊ မြီးဖျားလိုက်သို့၊ မြိုင်တိုက်စုံယံ၊ ရွက်ဟောင်းပျံသော်၊ ရွှေခြံဂါမ - ကျွန့်ဌာနကို မှန်းဆလို့တွေး။ မိဘနှစ်ပါး - ဆွေအများကို လွမ်းအားနှင့် ဆွေးမိပေ့ါ။

၁ - ရွှေခြံဂါမ - ကွမ်းခြံကုန်းရွာ။ ဂါမ (ပါဠိ) = ရွာ  

မအေးနိုင် - မရွှင်နိုင်၊ သည်ရာသီ - လတပေါင်း - ကြက်ဆောင်းသို့ တိုင်သောခါ၊ တလှိုင်လှိုင်ပေါ၊ မြိုင်တကြော၊ တောစပယ်ဖြူ၊ ၀တ်မှုန်ကျင်းတဲ့၊ သင်းကြူကြူကို၊ လေချူလို့လွှင့်၊ ပန်းထုံတဲ့ လေချိုမှာ၊ ရွှေချိုးပျိုကူသံဆင့်ပေလိမ့်။ မြိုင်မြိုင့်စုံခြေ၊ ဆာဝေေ၀၊ ရွှေကသစ်ပန်း။ ကောဝိလာငယ် - တျာတျာရင့် လန်းကာပ၊ ပင်နန်းထက်ယံ၊ ဆက်ရက်သံ၊ ကြွက်ညံကြော်ကြွေး၊ မဖိုပျော်ပျော်၊ တူနှစ်ထော်၊ ထူးခေါ်ကာ မေးကြသနှင့်။

            ကွေးကွေးကျစ်ကျစ်၊ ဖူးပုရစ်လည်း၊ ပြေလှစ်စင်စင်၊ စုံတခွင်ဝယ်၊ မြရှင်ရွက်ဦး၊ လုပ်လဲ့လုပ်လီ၊ လေအချီ၊ ဟိုသည်ညွတ်မြူးစဉ်မှ၊ ကြည်နူးစဘွယ်၊ တောအဆွယ်၊ သူငယ်နွားကျောင်း၊ ညောင်ညိုမှိုင်းချိပ်၊ ပင်ပျိုရိပ်မှာ၊ အသာအိပ် လျောင်းကာပ၊ခြောင်းခြောင်းပူလျှံ၊ သူရကန်၊ တဆံမမှု၊ ၀ါးပလွေတို၊ ရောင်စိုစိုကို၊ လေချိုနှင့်ညုရာက၊ ရွာသူ့ဓလေ့၊ လျှိုအကွေ့၊ ပျိုမေ့သူဇာ၊ ထင်းခွေမျောက်တူး၊ ကြိမ်ညွန့်ဖူး၊ သူအခူးလာရာတွင်၊ သာသာအေးအေး၊ မသံပေး၊ ဆိုတေးသံငြာတော့ကို၊ ချာကနဲပင်၊ မောင်ဂေါပါလ - ငေါက်ငေါက်ထ၊ လျှိုဝသို့ ၀င်လို့ - “ရှင်မိဒွေးညို၊ တုတ်စိုစိုရယ်၊ ဟိုတနေ့ည၊ ဖ, ခေါင်းချမှာ - ရှင်မတို့တဲ၊ နွားရုံတခို - ဘူးစင်ပျိုမှာ - ရွှေစွန်ညို ၀ဲပါလျှက်ကနဲ့၊ မထွက်မပေါ်၊ မဒွေးငယ် အရွဲ့တိုက်လို့၊ မိုက်လိုက်ပုံ တော်ရော့လ။ ကျော်ကျော် ကြားကြား - မဒွေးသား ခါးခါးအန်အန်၊ ပင်လယ်ယံမှာ - ရေငန်နှင့်ဆေး၊ ငယ်ကချစ်တဲ့၊ ဆရစ်မေကို - ဟောဒီဖေ လွေးမှာပေါ့ ” ဟု အေးအေးဖြူးဖြူး၊ တောစရိုက်နှင့်၊ အလိုက်သင့် နှုးသည်ကို၊ စိတ်ကူးတွင်သာ၊ မြင်ရပါ၊ ဘယ်ခါကာလ - ကျွန့်ချက်မြှုပ်တဲ့ - တောအုပ်ညိုမှာ - ကိုယ်တိုင်မြင်ရပါမတုံး။

           လျလျနွမ်းနွမ်း၊ တ, လို့သာမှန်းရတော့၊ ထွက်လမ်းမမြင်၊ ဒဂုန်ခွင်၊ မရွှင်နိုင်အား၊ ခေါင်းလောင်းမချို - တက္ကသိုလ် ၀ယ်။ နေညိုချိန်များမှာတော့၊ အင်းလျားရတနာ - ကန်တော်သာမှာ၊ ပြာပြာလဲ့လဲ့၊ လှိုင်းဘောင် ဘင်ဖွဲ့တော့ကို၊ မိခင်ရဲ့ သားပျိုမှာ၊ အလိုလိုရင်ဖိုလေးကာပ၊ ဆွေးမိတော့တယ်။
            ဝေးနယ်ရပ်ကွာ၊ ကျွန်တို့ရွာမူ၊ ခုခါကာလ၊ တပေါင်းကျက၊ မြမြမိုမို၊ အုန်းညိုညိုမှာ၊ ကြည်ချိုသာမော၊ ရွှေဥသြလည်း၊ တတောလုံးစင်၊ ထပ်ပဲ့တင်နှင့်၊ လွင်လွင်အေးအေး၊ ရင့်ရူကြွေးလိမ့်။
            နယ်ကျေးဟံသာ၊ လွမ်းကာ ကာငယ်၊ ပြန်ပါမည်တင်း၊ သေတ္တာကိုပြင်၊ ဖာကိုငင်၊ စာစင်ကို ရှင်းပြန်တော့၊ ထောင့်တွင်းမှာကြည့်၊ ကျွန့်စိတ်ကြံ၊ အရင်ဦးပါလို့၊ တင်ကူးကာသိရော့ထင့်၊ ညှိုးလိလိ - နွမ်းခွေခွေ၊ စိမ့်မျက်ရည် ဝေေ၀ နှင့်။ ရွှေဘောင်မှန်သွင်း၊ ဓာတ်ပုံတွင်းက၊ မောင်မင်းကြီးသား - သူငယ်ချင်းရယ် - အတင်းကွယ် - မင်းဘယ်ကြောင့် တားသလဲ။ မင်းမှာတော့ ရပ်ကြီးသား၊ ဒဂုဏ်မှာ ဆွေအများနှင့်၊ ပျော်ပါးလို့ နေနိုင်ငဲ့။ မြိုင်ချေက ဒီငချာမှာ၊ မင့်မျက်နှာ - တရွာမှတ်ပါလို့၊ ခိုကပ်မှီဝဲ - ပျော်မည်လို့ ခဲသော်လဲ။ တကတဲလေ …… သူရိယာ - အနောက်စောင်းပါလို့၊ ခေါင်းလောင်းသံဝေမှဖြင့်၊ မနေနိုင် မထိုင်နိုင်၊ တားမနိုင် ဆီးမနိုင်၊ ခပ်ထွားထွား စတိုင်နှင့်။ ကားပိုင်ကြီး စီးတဲ့လို့၊ ခရီးသုတ် နှင်တော့တယ်။ နောင့်မှာတော့ အထီးကျန်၊ ကျောင်းဆင်းလို့ မင်းပြန်ယင်၊ ဟန်မရ - ထိန်းမရ၊ သက်မကြီး ပြင်းပြင်းချလို့၊ ခန်းဝမှာ မှိုင်တိုင်တိုင်၊ ခြေလက်ပစ် ထိုင်တဲ့ပြီး၊ မှိုင်တာနဲ့ ကိစ္စတုံးရော။

           အလိုလေး၊ အလိုလေး၊ မင်းဘယ်ကို ပြေးသလဲ။ ထောင့်ထဲမှာမြင်ရတဲ့၊ မင့်ရူပ ကိုယ်စားလှယ်၊ မင့်လိပ်ပြာ ပျိုရွယ်ရွယ်ကို၊ တကယ်ဆတ်ဆတ်၊ မြင်ရသည်မှတ်သော်လဲ၊ စိတ်ဓာတ်လှည့်စား၊ ဒုက္ခများ ရုပ်ကားမရှိ၊  စိတ်ထဲမှာ အသွင်ကူးပြီး၊ ရူးလိုက်ပါဘိတော့ လေး “။   ။ ယဥ္မေက်း။ တောသွေးမို့ နုံချာချာ။                ။ မြို့ကြီးပျော် - မော်လို့ဖူးရန်က၊ ဒူးတုန်လှပါ။    ။ သွင်ချိုချို အမူခြားယင်ဖြင့်၊ အားတက်လိမ့် - ညီသဟာရယ်၊ မာပါနဲ့နှလုံး။             ။ သင်းကြိုင်ကြိုင်၊ ပိတောက် ဖြာဖြာလှိုင်တော့။ ဂနိုင်စံ အပူအေးအောင်၊ ဖေးကူပါ့ဖုန်း။            

= = = = = = = = = = = = + + + + + + + + = = = = = = = = = = = =

အားလုံးကို ကျေးဇူးတင်ပါသည်။

အေးငြိမ်း
၁၉-၆-၂၀၁၁ နံက် ၁၀း၅၅ နာရီ
Blk 134A, Kang Ching Road
#03-91, S(619062)

Saturday, June 18, 2011

တောလွမ်းချင်း (၃)

(၆) သီချင်းများဖြင့် လွမ်းချင်း

            လွမ်းသည်ဆိုရာတွင် တခါတရံ မိမိနှစ်သက်သော သီချင်းသံကြားလိုက်ရပါကလည်း လွမ်းတတ်သေးသည်။ ယခင်က မိမိရနေကျ အနံ့တစ်ခုခုကို ရပါကလည်း လွမ်းတတ်သည်။ မိမိအာရုံနှင့် တိုက်ဆိုင်လာလျှင် လွမ်းမိသည်ချည်း ဖြစ်ပါသည်။
            မှန်ရာကိုဆိုရလျှင် သည်အသက်အရွယ်ရောက်လာသည်ထိ ကျွန်တော့်တွင် တရားဝင် သမီးရည်းစားဆို၍ ဟုတ်ဟုတ်ငြားငြား တစ်ယောက်မှ မရှိခဲ့ပါ။ သို့သော် ကျွန်တော်ကြိုက်ခဲ့သော မိန်းကလေးများမှာမူကား တစ်ဒါဇင် မကပါ။ ကျွန်တော်စာပေးဖူးသော မိန်းကလေးများပင် ဆယ်ယောက်မက ရှိပါလိမ့်မည်။ ကျွန်တော့်ကို ပြန်ကြိုက်ပြီး ရေလာမြောင်းပေး လုပ်ခဲ့သော မိန်းကလေးများမှာလည်း အတော်များပါ၏။ သို့သော် သူတို့နှင့် အဘယ်ကြောင့် သမီးရည်းစား မဖြစ်ခဲ့သည်ကို ကျွန်တော်မစဉ်းစားတတ်ရိုး အမှန်ဖြစ်ပါသည်။
            ကိုယ်နှင့်သက်ဆိုင်သော ကောင်မလေးသာ တစ်ယောက်မှ မရှိရမည်။ ချိုပြုံး၏ တမာလမ်းကို ပြန်ခဲ့ပါ သီချင်းကို ကြားရပါက ကျွန်တော် မနေနိုင်မထိုင်နိုင်အောင် လွမ်းမိပါသည်။ - - - တမာတောမှာ ပျော်တယ်ဆိုတဲ့ - - မောင်ရေ - - မောင်ရေ - - အညာမြေကိုမေ့လို့လား - - အညာသူလေးကို မေ့လို့လား - - ခွဲခွဲခြားခြား ပြောပါမောင်ရေ - - ဟု မချိုက ဆွဲဆွဲငင်ငင် သီဆိုလိုက်သောအခါ မည်သူမှန်း အတိအကျမသိရသည့် ကောင်မလေးတစ်ယောက်ယောက်ကို ကျွန်တော် အလွန်လွမ်းပါသည်။
           
           အညာသူကိုသာ လွမ်းချင်လွမ်းရမည်။ ကျွန်တော် စတုတ္ထနှစ်ရောက်သည်ထိ အညာမြေကို မရောက်ဖူးသေးပါ။ အညာတင်လားဆိုတော့ မဟုတ်။ တခြားဘယ်ကိုမှ မရောက်ဖူးပါ။ ရောက်ရအောင် သွားဖို့ကလည်း ပိုက်ဆံမတတ်နိုင်။  ဆယ်တန်းရောက်သည်ထိ ဟင်္သာတတောင် ရောက်ဖူးတယ်ဆိုရုံ တစ်ခေါက်နှစ်ခေါက်မျှ ရောက်ဖူးသည်။ ဒေသကောလိပ် ဒုတိယနှစ်ရောက်မှ စီမံကိန်းဝင် လူငယ်လုပ်အားပေး ပါ၍ ရန်ကုန်၊ သုံးခွ၊ ခရမ်းမြို့ များသို့ ရောက်ဖူးရသည်။
            တတိယနှစ်ရောက်တော့ အစ်ကိုကြီး တာဝန်ကျသည့် ၀ါးခယ်မမြို့သို့ ရောက်ဖူးရသည်။ ၀ါးခယ်မသွားရင်း ပုသိမ်၊ မြောင်းမြ စသည့်မြို့များသို့ ခရီးသွားဟန်လွှဲ ရောက်ဖူးရသည်။ အညာမြေနှင့် စတင်ရင်းနှီးရသည်မှာ စတုတ္ထနှစ်ပြီးမှ ဖြစ်သည်။ အာအိုင်တီကျောင်းသားမှန်လျှင် စာမေးပွဲအပြီး၌ လက်တွေ့သင်တန်းနှစ်လ သွားရသည်။ မိမိကြိုက်သည့် မြို့မှာ ဆင်းလို့ရ    သည်။ စတုတ္ထနှစ်ပြီးတော့ သူငယ်ချင်း ကိုစိန်ထွန်းလှနှင့်တိုင်ပင်ကာ မန္တလေးတွင် ဆင်းရန် စာရင်းပေးလိုက်သည်။ မန္တလေး RTC Base 4 တွင်ဖြစ်၏။ ၁၉၈၄ ခုနှစ် က။
            မန္တလေးတွင် ကိုစိန်ထွန်းလှတို့ အိမ်၌တည်းသည်။ သူတို့အိမ်က အိမ်တော်ရာဘုရားဝင်းအနီးတွင် ဖြစ်၏။ သည်တော့ လွမ်းစရာ တစ်ခု ရလာသည်။ ကြိုးချင်းထား ကြိုးချင်းငြိ ဆိုသလို အဲသည်က ခပ်ချောချောကောင်မလေး တစ်ယောက်နှင့် ဘာလိုလို ဖြစ်သည်။ ကျွန်တော် မန္တလေးမှ ပြန်လာတော့ ထုံးစံအတိုင်း တစ်ယောက်နဲ့ တစ်ယောက် စာတွေအပြန်အလှန်ရေး။ အလွမ်းသယ်ကြပေါ့။ သို့သော် စာ ၅ စောင်မပြည့်မီမှာပင် ပြတ်သွားပြန်တော့၏။ သို့သော်လည်း ချိုပြုံးက  - - ရွှေစည်းခုံ စေတီအပါးမှာ၊ မောင့်သက်ထား ချစ်သက်ဝေ - - - သဇင်တွေ ပွင့်ပြီမောင်ရေ - - မောင်ပြန်ချိန်ဖြင့် သင့်ပြီ ထင်တယ်လေ - - - ဟု ဆိုလိုက်သောအခါ ကျွန်တော့်မှာ ဟိုကောင်မလေးဆီပဲ လိုက်သွားရတော့မလိုလို၊ မနေတတ် မထိုင်တတ် ဖြစ်ရပါသည်။ သို့ပေမင့် ရွှေစည်းခုံဆိုတာ ဓါတ်ပုံထဲမှာဘဲ မြင်ဖူးတာဖြစ်သည်။ မရောက်စဖူးသေး။
            ဒါက အရွယ်ရောက်လာတော့ ကောင်မလေးများကို လွမ်းတာဖြစ်၏။

            စင်ကာပူရောက်လာတော့ တောကိုလွမ်းသည်မှာ  မေရှင်၏ ကြေးစေတမန် သီချင်းကို နားထောင်သည့်အခါ ဖြစ်စေ၊ တွံတေးသိန်းတန်၏ အသီးတရာအညှာတစ်ခု သီချင်းကို နားထောင်သည့်အခါ ဖြစ်စေ။ ရွာကို အလွန်လွမ်းလှသည်။ ကြေးစေ တမန်က စစ်သားအကြောင်းဖွဲ့ထားသော သီချင်းဖြစ်သည်၊ ဘာကြောင့်ရွာကိုလွမ်းဘိသနည်း ဟု မေးလာလျှင်မူ ကျွန်တော့်၌ ဖြေစရာ စကားမရှိပါ။ လွမ်းလို့လွမ်းတာသာ ဖြစ်ပါသည်။ - - - ဖော်ရွေ၊ ပျော်နေ၊ မေချစ်သူ တစ်ပါးပေမို့၊ ခွင့်လွှတ်ကာထား၊ မတားသင့်ပေ - - - ဆိုလိုက်လျှင် အလွန် လွမ်းလှသည်။ အသီးတစ်ရာ အညှာတစ်ခု ကြောင့်လွမ်းတာကတော့ သဘာဝ ကျပါ သည်။
            ထိုသီချင်းများတင်လားဆိုတော့ မဟုတ်ပါ။ သန်းထွန်းလေး သီချင်းကို သူ့သမီးပြန်ဆိုထားသည့် မွေးဌာနီ သီချင်းကို နားထောင်ရလျှင်လည်း ပြစ်ပြစ်နှစ်နှစ် လွမ်းရပါသည်။ ကျွန်တော်အညာသား မဟုတ်ပေမင့်  - - - လှည်းလမ်းကြောင်း တစ်လျှောက် ဖုံလုံးကြီးတွေ တလိပ်လိပ် တက်တာ - - - ကတော့ ကျွန်တော်တို့ဘက်နှင့် ဆင်တူပါသည်။ မြန်မာပြည် ကျေးလက်တောရွာမှန်လျှင် လှည်းရှိမည်။ လှည်းလမ်းကြောင်းရှိမည်။ ဖုံထမည်။ ဤသည်ကား အကြေ၊ အညာ အတူတူပင် ဖြစ်၏။ သီချင်းအရသာ နားထောင်လို့ကောင်းပေမင့် လှည်းမောင်းသွား၍ ဖုံများမွှန်လျှင် အင်မတန် နေရထိုင်ရခက်လှ၏။  - - - လက်ပံပွင့်တွေ လေတိုက်ကြွေလိုက်တဲ့အခါ - - - လည်း ကျွန်တော်တို့ရွာနှင့် အတူတူပင်ဖြစ်သည်။ တောဆိုတော့ တူမှာပေါ့လေ။
            ရီရီသန့်၏ ဇေယျာကမ်းအလှပန်းချီ၊ စကားဝါမြေ။ ရီရီသန့်နှင့် ၀င်းဦး တွဲဆိုထားသော တောကပစ်တိုင်းထောင်။ ၀င်းဦး၏ မြန်မာ့စိတ်ရင်း၊ မြန်မာ့ရှုခင်း။ တွံတေးသိန်းတန်၏ ပန်းနွယ်ကစိမ်း။ အချစ်တစ်ပွဲ နဲ့ စစ်ပွဲတစ်ရာ။ တောကရှင်နှောင်း စသည့်သီချင်းများကို တောကိုလွမ်းလို့ နားထောင်တာပဲဖြစ်ဖြစ်။ နားထောင်ရင်းနဲ့ပဲ တောကိုလွမ်းတာ ဖြစ်ဖြစ်၊ မကြာခဏ နားထောင်ဖြစ်သော သီချင်းများ ဖြစ်ပါသည်။ အလွမ်းပြေပေါ့။
            ကြားဖြတ်၍ပြောရလျှင် ကိုယ်နားထောင်ချင်သော သီချင်းများကို အင်တာနက်ကျေးဇူးကြောင့် အခွေတွေဘာတွေ လိုက်ရှာနေစရာမလိုဘဲ ကြိုက်သည့်သီချင်းကို ချက်ခြင်းနားထောင်လို့ရသည့်အတွက် ကျွန်တော်ကတော့ အင်တာနက် ကိုရော သီချင်းများတင်ပေးထားသည့် မောင်မင်းကြီးသားများကိုပါ ကျေးဇူးအလွန်တင်မိပါသည်။ မောင်မင်းကြီးသားများ ဘုန်းကြီးပါစေ၊ သက်ရှည်ပါစေ၊ အနာမျိုး ၉၆ ပါးကင်းပါစေ။

            ခုတော့ ခေတ်ကြီးက အရမ်းတိုးတက်သွားပြီ။ ကျွန်တော်တို့ငယ်ငယ်က ရွာမှာ ရေဒီယိုပင် သုံးလုံးမျှသာ ရှိသေး၏။ ကျွန်တော်တို့အိမ်၊ ဘိုးစိန်ခိုတို့အိမ် နှင့် ဦးကြီးထွန်းလှိုင်(ဖြူ) တို့အိမ်တွင်ဖြစ်သည်။ က.စ.လ မှ ထုတ်သည့် ဓါတ်ခဲ သုံးလုံး ထည့်ဖွင့်ရသော သစ်သားကိုယ်ထည်နှင့် နေရှင်နယ် ရေဒီယိုကြီးများ ဖြစ်၏။ တခြားဖျော်ဖြေရေးပစ္စည်းဆိုလို့ ဘာမှမရှိ။ ရွာတွင် ဒိုးပတ်ဝိုင်းတော့ရှိပါသည်။ သို့သော်လည်း ဒိုးပတ်ဆိုသည်က အလကားနေရင်း သူ့ချည်း တီးနေလို့ ရတာမဟုတ်။ အလှူရောက်မှ လက်စွမ်းပြခွင့်ရသည်။
            ရေဒီယိုအစီအစဉ်များမှာလည်း သူ့ခေတ်နှင့်သူတော့ မဆိုးလှဟု ဆိုရပါမည်။ အသံလွှင့်ချိန်မှာ နံက် ၇ နာရီမှ ၈ နာရီခွဲထိ တစ်ကြိမ်။ နံနက် ၁၀ နာရီမှ မွန်းလွဲ ၁ နာရီခွဲထိ တစ်ကြိမ်။ ညနေ ၄ နာရီမှ ည ၉ နာရီထိတစ်ကြိမ်။ တစ်နေ့ သုံးကြိမ် ဖြစ်၏။ မနက် ၈ နာရီ နှင့် ည ၈နာရီ တွင် သတင်းကြေငြာသည်။ နံနက် ၈ နာရီ သတင်းကြေငြာအပြီး ယနေ့ဖတ်စရာ မှတ်စရာ လာသည်။ သတင်းစာပါ ဆောင်းပါးများအကြောင်း ပြောပြခြင်း ဖြစ်၏။ နေ့လည်ပိုင်းတွင်လည်း သတင်းလွှင့်သေး သည်ထင်သည်။ မေ့နေပြီ။ နိုင်ငံတကာ သတင်းများကိုတော့ ည ၈ နာရီသတင်း နောက်ပိုင်းမှ နားထောင်ရသည်။ နံနက် ၈ နာရီခွဲနောက်ပိုင်းနှင့် ည ၉နာရီ နောက်ပိုင်းတွင် အင်္ဂလိပ်ပိုင်းအစီအစဉ်ရှိသေးသည်။ သို့သော် ကိုယ်နားမလည်သည်မို့ တစ်ခါမှ နားမထောင်ဖြစ်ပါ။ နားလည်၍ နားထောင်ဖြစ်သည့်တိုင် သိပ်အထွေးအထူး ပါမည်မထင်ပါ။ လူကြီးမင်းတို့ အားအား လျားလျား စက်ရုံ၊ ဈေး စသည်များကို လှည့်လည်စစ်ဆေးပြီး မလိုအပ်သည်များကို ညွှန်ကြားသော သတင်းများသာ ဖြစ်ဖို့ များပါသည်။
            ကျွန်တော်တို့က ငယ်သေးတော့ တနင်္ဂနွေနေ့ခင်းမွန်းတည့် ၁၂ နာရီ တိတိတွင်လာသော ကလေးများအတွက် ပုံပြင် ကဏ္ဍမှာ ကျွန်တော်တို့ အသည်းစွဲဖြစ်သည်။ ပုံပြင် အစ၊ ပုံပြင်အဆုံးကို ကြောင်ကလေး ဟူသော တီးလုံးဖြင့် အဖွင့်အပိတ် လုပ်သည်။ ပုံပြင်ပြောခန်းကို “မောင်ညီမလေးတို့ရေ၊ ဒီတစ်ပတ်ပြောမဲ့ပုံပြင်ကတော့ အများအကျိုးဆောင်တတ်တဲ့ မောင်ပုည ဆိုတဲ့ ကောင်လေးတစ်ယောက်အကြောင်း ဖြစ်ပါတယ်ကွယ်”  စသဖြင့် ဖြစ်၏။ ပုံပြင်ပြီးသွားလျှင် “မောင်ညီမလေးတို့ရေ။ ပုံပြင်လေးကတော့ ဒါပါဘဲကွယ်။ မောင်ညီမလေးတို့လည်း မောင်ပုညလေးလို အများအကျိုးကိုဆောင်ကျဉ်းတဲ့သူတွေ၊ လူလိမ္မာလေးတွေ ဖြစ်အောင် နေကြရမယ်ကွဲ့နော်”  စသဖြင့် ပိတ်ပါသည်။
ပုံပြင်ပြီးတော့ ဇာတ်လမ်းပမာ နားဆင်စရာ။ ဇာတ်လမ်းပမာကိုလည်း ကျွန်တော် သဘောကျသည်။ ထိုဇာတ်လမ်း များထဲမှ ယနေ့တိုင် ကျွန်တော်မှတ်မိသော ဇာတ်လမ်းမှာ “သော်သော်”  ဖြစ်ပါသည်။
ထို့ပြင် ကျွန်တော်ကြိုက်ပြီး နှစ်နှစ်သက်သက် နားထောင်သည့် အစီအစဉ်တစ်ခုမှာ စနေနေ့ညတိုင်း သတင်းအပြီး လာသော အသံလွှင့်ဇာတ်လမ်း ဖြစ်သည်။ အသံလွှင့်ဇာတ်လမ်းမှာ ဇာတ်လမ်းပမာနားဆင်စရာကဲ့သို့ နောက်ခံစကားပြောသူ မပါ။ သရုပ်ဆောင်သူများက စကားချည်းပြောပြီး အသံဖြင့် သရုပ်ဆောင်ရခြင်း ဖြစ်သည်။ အလွန်စိတ်ဝင်စားဖွယ် ကောင်း၏။ ပြောရလျှင် ရုပ်ရှင်ကို အရုပ်မပါဘဲ နားထောင်ရကဲ့သို့ ဖြစ်ပါမည်။ သို့သော် ပါးစပ်ဖြင့် သရုပ်ဖော်ရခြင်းဖြစ်သည့်အတွက် သူက ပိုပြီး ပညာသားပါမည် ထင်ပါသည်။
ဗုဒ္ဓဟူးနေ့ညနေပိုင်းများတွင် တို့ကျေးရွာ အခန်းလွှင့်၏။ ကျေးလက်လူနေမှု ဘ၀များကိုထင်ဟပ်ကာ ပညာပေး အစီ အစဉ်လေး လုပ်ထားခြင်း ဖြစ်ပါသည်။ ပင်တိုင်ဇာတ်ဆောင်များမှာ ကိုကြီးသာဆန်း၊ ဖိုးအေး၊ မယ်ကြော့ နှင့် မယ်ဖော့ တို့ဖြစ် သည်။ တစ်ခါတရံ ဘကြီးဖြိုးတို့ပါသေးသည်။
သောကြာနေ့ညနေ ၆ နာရီတွင် ဟဒယရွှင်ဆေး လာ၏။ သည်အခန်းကတော့ အားလုံးအကြိုက်ဖြစ်သည်။ လူရွှင်တော်များက ပြက်လုံးများထုတ်သည်။ တခါတလေ ဓါတ်ဆီ၊ ဓါတ်ဆန် တို့ လာသည်။ အလွန်ကောင်းသော ပြက်လုံးများ ကို နားထောင်ရပါသည်။ ကျွန်တော်မှတ်မိနေသော ပြက်လုံးများမှာ ရေနံချောင်းက ဖေကံကောင်း နှင့် ကျန်စစ်သား တို့ အကြောင်း ဖြစ်၏။
            နောက် ကျွန်တော်အလွန်ကြိုက်သော အစီအစဉ်တစ်ခုမှာ အခါကြီးရက်ကြီးများတွင် လွှင့်ပေးသော ရွှေမန်း တင်မောင် ၏ ဖွားတော်မူခန်း၊ တောထွက်ခန်း စသည့် ဗုဒ္ဓ၀င်ဇာတ်လမ်းများဖြစ်ပါသည်။ မခေါက်ဗျော နှင့် ရွှေမန်း၏ အပြောကို ကျွန်တော်သည် ကလေးပင်ဖြစ်သော်လည်း အလွန်ကြိုက်ပါသည်။ နောက် ကျွန်တော်ကြိုက်သော အစီအစဉ်တစ်ခု မှာ ကွက်စိပ် ဖြစ်ပါသည်။ ကွက်စိပ်ဆရာကား ပိုပြီး ပညာပါသည်။ တစ်ယောက်တည်းနှင့် ဇာတ်ကောင်စရိုက်အားလုံးကို ပုံပေါ်အောင် ဖော်သွားသည်ဖြစ်ရာ အလွန်နားထောင်ကောင်းပါသည်။ များသောအားဖြင့် ကွက်စိပ်ဇာတ်လမ်းများမှာ ၅၅၀ နိပါတ်တော်များ၊ ဇာတ်ကြီးဆယ်ဘွဲ့ နှင့် ဗုဒ္ဓ၀င် ဇာတ်လမ်းများ ဖြစ်ပါသည်။
            မေရှင်၏ ကျေးစေတမန်၊ မြင့်မြင့်ခင် ၏ နားပန်းဆံ၊ ကိုအံ့ကြီး၏ လူချွန်လူကောင်း စသည့်သီချင်းကောင်းများကို လွှင့်ပေးပါသည်။ တခါတရံ တစ်နေရာရာမှ - - - လူချွန်လူကောင်းများတို့၊ ပေါင်းစုအားအင်၊ ကျွန်တော့်မိတ်ဆွေတွေကို ကြည်ညိုစွာမြင်လိုက်ချင်၊ ဗမာ့သားကောင်းများလို အဆိုအတီးမှုနဲ့ပင်၊ ယုံကြည်ခင်မင် အားတင်း အလေးပြုလျှက်ပဲ အစဉ် - - -“ ဆိုသည့် အသံကို ကြားလိုက်ရလျှင် ရွာတွင် မိသားစုများနှင့် ပျော်ပျော်ပါးပါး နေထိုင်ခဲ့ပုံများကို ပြန်မြင်ယောင်ကာ လွမ်းပါသည်။ ထို့မျှသာမကသေး။ မကြာမကြာ နားဆင်ကြရသည်မှာ “- - -  ဆိုရှယ်လစ် စီးပွားရေး စနစ်ဆိုသည်မှာ စီမံကိန်းဖြင့် အကောင် အထည်ဖော်သော စီးပွားရေးစနစ်ဖြစ်သည်။ စီမံကိန်းများ အောင်မြင်ရေးသည် ပဓါနကျပါသည် - - -  စသည့် ပေါ်လစီ သီချင်းများ ဖြစ်ပါသည်။ ဆိုရှယ်လစ်ကိုတော့ မလွမ်းပြစေနှင့်တော့။ စိတ်ကုန်လှပါပြီ။
နွေရောက်ပြီဆိုလျှင် ကိုထွန်းရွှေ၏  “ - - - မီးဘေးရှောင်ဗျို့၊ မလောင်ခင်တားကြပါ၊ ရန်သူ ထိုမီးကို ခြွင်းချန်ထားရင် မှားကြလိမ့်မယ် - - - “ ဆိုသော မီးလှန့်သီချင်းကို နားဆင်ကြရမည်။ မိုးတွင်းဆိုလျှင် စန္ဒယားလှထွတ် ၏ တိမ်တမန် ကို နားဆင်ကြရမည်။ သို့အတွက် ကျွန်တော်ရန်ကုန်တွင် ကျောင်းတက်သောအခါ မိုးကလေးညို့ညို့တွင် တိမ်တမန်သီချင်းကို နားထောင်ရသည့်အခါ ရွာကို အလွန်လွမ်းလှသည်။ လယ်ထဲတွင် မြက်ရိတ်သည်ကိုလည်းကောင်း၊ အဖေကြီးနှင့် လယ်ကူ လုပ်ရသည်များကိုလည်းကောင်း၊ ကျွန်တော်တို့ မောင်နှမတတွေ လယ်ကွင်းထဲ ဆော့ကစားကြသည်များကိုလည်းကောင်း စိတ်အစဉ်တွင် တရေးရေးမြင်ယောင်မိသည်။  

            အလှူ၊ မင်္ဂလာဆောင်ရှိပြီ ဆိုလျှင် ဓါတ်စက်ငှားသည်။ ဓါတ်စက် ဆိုသည်မှာ သစ်သား သေတ္တာပုံး ခပ်သေးသေး တစ်ခု။ ကျွန်တော်တို့ဆီက လူတွေခေါ်သော စက်တုံးခေါ်သည့် အမ်ပလီဖိုင်ယာ (amplifier) တစ်ခု။ လော်စမီတာ ခေါ်    ဟွန်းဝ နှစ်ခု နှင့် သူတို့ကို တစ်ခုနှင့်တစ်ခု တွဲပေးထားသော ဓါတ်ကြိုးများ၊ နောက် ဓါတ်အားပေးသော ဘက်ထရီအိုး စသည်တို့ ဖြစ်ပါသည်။ လော်စမီတာ ဆိုသည်မှာ loud speaker ကို ကျွန်တော်တို့က မြန်မာမှုပြုထားခြင်း ဖြစ်ပါ၏။ အသံချဲ့စက် ဟု မခေါ်ဘဲ အဘယ်ကြောင့် လော်စမီတာ ခေါ်မှန်း ကျွန်တော် မသိပါ။
သစ်သားသေတ္တာပုံးကလေးထဲတွင် သံပတ်နှင့်လည်သော စက်ရှိ၏။ ထိုစက်ပေါ် ဓါတ်ပြားကိုတင်လိုက်လျှင် ဓါတ်ပြားက လိုက်လည်သည်။ လည်နေသော ထိုဓါတ်ပြားပေါ် အပ်နှင့်ထောက်လိုက်သောအခါ အသံထွက်လာသည်။ ထို အသံကို အမ်ပလီဖိုင်ယာက အသံချဲ့ကာ လော်ကြီးများဆီ ပို့ပေးသည်။ သည်တော့ အင်မတန် နားလည်းညီး၊ သာယာနာပျော် ဘွယ်လည်း ရှိလှသည့် သီချင်းသံ ထွက်လာသည်။ လော်ကြီးများကိုတော့ သစ်ပင်မြင့်မြင့်ပေါ်တင်ကာ အရှေ့ဘက်သို့ တစ်ဝ၊ အနောက်ဘက်သို့ တစ်ဝ လှည့်ထားသည်။ သည်ရွာမှ ဖွင့်လိုက်လျှင် ဟိုဘက်ရွာတွေထိ ကြားရသည်။
ထိုစဉ်က တစ်မြို့နယ်လုံးမှ အသံချဲ့စက်ပိုင်သူ လေးငါးဦးမျှသာရှိရာ အသံချဲ့စက်လိုက်ဖွင့်သူကား ကာလသား၊ ကာလသမီးတို့အလယ်တွင် အင်မတန် မျက်နှာပွင့်လှ၏။  
            အလှူဆိုလျှင် ဗျော ဖြင့် စဖွင့်ရသည်။ စဖွင့်သည့်အချိန်မှာ ညနေ လေးနာရီခွဲ ငါးနာရီ အချိန်။ အလှူမှ ဗျောသံ စဖွင့်လိုက်ပြီဆိုလျှင် အင်မတန် ၀မ်းနည်းစရာကောင်းလှ၏။ အလှူကို ဗျောဖြင့်စဖွင့်သည့်အတွက် ဖိတ်စာများတွင် သီတင်းကျွတ် လပြည့်ကျော် ၂ ရက် ဗျောဝင်၊ ၃ ရက်နေ့ ဆံချ စသဖြင့် ရေးသားလေ့ ရှိ၏။ ၂ ရက်နေ့တွင် အလှူစတင်မည် ဟု ဆိုလိုခြင်းဖြစ်ပါသည်။ အလွန်ရင်းနှီးသော ဆွေမျိုးသင်္ဂဟများက ဗျောဝင်မည့်နေ့လည်ကတည်းက ရောက်နှင့်နေကြသည်။
            ဓါတ်စက်ဖွင့်ခြင်း အမှုကို နံနက် လေးနာရီတွင် စတင်ရသည်။ ည ၉ နာရီခွဲခန့်မှ ပိတ်၏။ သို့အတွက် ဓါတ်စက်ဆရာ ခမျာလည်း သိပ်တော့ မစားသာလှပါ။ အဘယ်ကြောင့်နည်း။ ဟိုတုံးက ဓါတ်စက် ဆိုသည်မှာ သည်ခေတ် ကက်ဆက်များလို ပလပ်ထိုးထားပြီး၊ ခလုပ်ကလေးနှိပ်ကာ ဇိမ်နှင့်နှပ်နေလို့ ရတာမဟုတ်။ ဓါတ်ပြားကောင်းကောင်းလည်စေရန် သံပတ်ကို မပြတ်လှည့်ပေးရသည်။ သံပတ်လျော့သွားသည်နှင့် သီချင်းသံမှာ လေးသွားကာ အရက်မူးသမား သီချင်းဆိုသံကဲ့သို့ အာလေးလျှာလေးကြီး ဖြစ်လာသည်။ သည်အခါ ကာလသား၊ ကာလသမီးများသာမက လူကြီးသူမများကပါ ပူညံပူညံ လုပ်တတ်သည်။ သည့်အတွက် ဓါတ်စက်ဆရာခမျာ အမြဲ သတိဝိရိယ ရှိနေရသည်။ သံပတ်လျော့တော့မည်ဆိုသည်နှင့် ထပ်လှည့်။
            နေ့ခင်းနေ့လည်တော့ ကိစ္စမရှိ။ သူ့အနားတွင် ကာလသားများရော၊ ကလေးများပါ ၀ိုင်းနေသည်ဖြစ်ရာ သူတို့လည်း ၀ိုင်းလှည့်ပေးသဖြင့် သက်သာရာရ၏။ သို့သော် နံနက်စောစောနှင့် မိုးချုပ်သည့်အခါများတွင်တော့ အနားတွင် မည်သူမှ မရှိတော့။ သည်တော့ ငိုက်သွားသည့်အခါများတွင် လော်ကြီးထဲမှ အရက်မူးသမား သီချင်းဆိုသံများ ထွက်ပေါ်လာ တော့သည်။
            ဟိုတုံးက ဓါတ်ပြားမှာ ယခု စီဒီကဲ့သို့ ဖြစ်၏။ သို့သော် အရွယ်အားဖြင့် နှစ်ဆခန့်ကြီးသည်။ နှစ်ဖက် ဖွင့်လို့ရသည်။ ယခုစီဒီက လေဆာဖြင့်ဖတ်သည်။ ယခင်ဓါတ်ပြားက အပ်နှင့်ဖတ်သည်။ အပ်ကို အတွင်းဘက်ဆုံးမှ စချပေးရသည်။ အပ်က လမ်းကြောင်းအတိုင်း အပြင်ဘက်သို့ ထွက်သွား၏။ တခါတရံ အပ်က လမ်းကြောင်းတစ်ခုထဲတွင်ထပ်ကာထပ်ကာ လည်နေလျှင် သီချင်းမှာ ရှေ့မဆက်တော့ဘဲ သည်နေရာတွင် ထပ်ကာထပ်ကာ ဖြစ်နေ၏။ ၎င်းကို အပ်ကြောင်းထပ်သည်ဟု ခေါ်သည်။ ဤသည်မှ မြန်မာမှုနယ်ပယ်တွင် စကားပုံတစ်ခု တိုးလာတော့သည်။
            အကြောင်းအရာတစ်ခုကို ထပ်ချည်းတစ်လဲလဲ ပြောနေသူအား “ပြောတာကလည်း အပ်ကြောင်းကို ထပ်နေပြီ”  ဟု သုံးနှုံးသည်။ ထို့ပြင် သည်အကြောင်းချည်း မကြာခဏ ပြောနေသူအား “ပြောတာ့ကို ဓါတ်ပြားပေါက်တော့မယ် ” ဟု လည်းကောင်း၊ ပြောပြီးသားအကြောင်းကို ချေးဟောင်း စမြုံ့ပြန်နေသူအား “ဓါတ်ပြားဟောင်းကြီး လာဖွင့်ပြမနေနဲ့” ဟု လည်းကောင်း သုံး၏။
            ဓါတ်ပြားတစ်ချပ်က သိပ်မဆန့်။ သည်တော့ အတန်ငယ်ရှည်သည့် တွံတေးသိန်းတန့် သီချင်းများမှာ ဓါတ်ပြား တစ်ဖက်နှင့်မရ။ နှစ်ဖက်လှန်ဖွင့်ရသည်။ သည့်အတွက် ယခင် ဓါတ်ပြားခေတ်က အသံသွင်းထားခဲ့သော တွံတေးသိန်းတန့် သီချင်းများကို နားထောင်ကြည့်လျှင် သီချင်းတစ်ဝက်၌ ခေတ္တပြတ်သွားကာ တီးလုံးနှင့် ပြန်စထားတာ တွေ့ရပါလိမ့်မည်။ ဤပြတ်သွားသောနေရာမှာ ဓါတ်ပြားကို ဟိုဘက်သည်ဘက်လှန်သော နေရာပင် ဖြစ်၏။  
            သည်တုံးက ခေတ်စားခဲ့သော သီချင်းများမှာ တွံတေးသိန်းတန်၏ သီချင်းများဖြစ်သော ကိုယ်ရယ်မင်းရယ် ပိတောက်ရယ်၊ အချစ်တစ်ပွဲ စစ်ပွဲတစ်ရာ၊ ပန်းနွယ်ကစိမ်း၊ ထွေးညို၊ တောကရှင်နှောင်း၊ စသည့် သီချင်းများနှင့် အမျိုးသမီး အဆိုတော်များထဲက နိုင်နိုင်မော်၊ ချစ်စံပယ် နောက်ပြီး မာမာအေး၏ မောင်ပေါက်ကျိုင်းလို လူစား။ တင်တင်မြ ၏ တောင်တန်းပြာနှင့် ကျောပိုးအိတ်။ ဟင်္သာတထွန်းရင် ၏ အမေ့အသည်းက ပြောတဲ့စကား။  ဟင်္သာတ အောင်တင်ဝင်း၊ မောင်မောင်ညွန့် စသည်တို့ဖြစ်သည်။ စုံတွဲသီချင်းများလည်း ရှိသည်။ ကျွန်တော်ယခုထိ မှတ်မိနေသည့်သီချင်းမှာ စကားပြောပါသည့် သီချင်းဖြစ်သော လောကမှာ အမြတ်ဆုံးဟာ၊ ယောက်ျားလား၊ မိန်းမလား ဟူ၏။ ဂီတစာဆိုမှာ မောင်ကြေးမုံဖြစ်သည်။ သန်းထွန်းလေးတို့ မွေးဌာနီ၊ ညီလေးတို့ရွာ စသည့်သီချင်းများပေါ်တော့ ဓါတ်ပြားခေတ်တောင် ကုန်တော့မည် ထင်ပါသည်။ သည်တုံးက ကျွန်တော့်မှာ လေးတန်း၊ ငါးတန်းကျောင်းသားအရွယ်။
            မင်္ဂလာဆောင်ဆိုလျှင်တော့ တွံတေးသိန်းတန် နှင့် တင်တင်မြ တို့၏ “ - - - တူနှစ်ဖြာ - - ဂဟေဆက်လို့ - - - သွေမပျက်တဲ့ မေတ္တာ - - မနှေးခါခါ ချင့်တွေး - - - “  ဆိုသော မင်္ဂလာသီချင်းနှင့် ဖွင့်ပါသည်။ - - - သံသာလေ ကမ်းတိုင်၊ တူပြိုင်ကာ ကူးမယ် - - - ဟူသောသီချင်းသံ ကြားလိုက်ရလျှင် မင်္ဂလာဆောင်ချင်စိတ်များပင် ပေါက်လာမိပါ၏။ ထို့နောက် မင်္ဂလာသီချင်းများသာမက သီချင်းမျိုးစုံ ဖွင့်ပါတော့သည်။
            ကျွန်တော်တို့လူမျိုးကား ဂီတကို အလွန်ခုံမင်သော လူမျိုးဖြစ်လေသလော မပြောတတ်။ သေတာတောင် ဂီတ ကလေးနှင့်။ အလှူတွင် ဗျောနှင့်၊ မင်္ဂလာဆောင်တွင် သံသာလေ ကမ်းတိုင် နှင့် စ ကြောင်း ပြောခဲ့ပြီ။ အသုဘတွင်တော့ ငိုချင်း နှင့် စဖွင့်ရ၏။ ဓါတ်စက်ဆရာမှာ သည်ဗဟုသုတတော့ ရှိထားဘို့လိုသည်။ အသုဘမှာသွားပြီး သံသာလေကမ်းတိုင် လျှင် ခဲနှင့်ထုလို့ ပြေးပေါက်မှားနေမည်။ သည်တော့ ဓါတ်စက်လာငှားပြီ ဆိုကတည်းက သက်ဆိုင်ရာဓါတ်ပြားများကို ရွေးသယ်သွား ဘို့ အရေးကြီးသည်။
            ညနေဘက်တို့၊ နေ့လည်နေ့ခင်းတို့ ဖွင့်တာ ထားပါတော့။ မနက် အစောကြီး လေးနာရီလောက်ကြီးထတဲ့ပြီး - - - အောင်မယ်မင်း၊ လူကလေးရဲ့ ဖြစ်ရလေခြင်းနော် - - - ဟု ဖွင့်လိုက်သည့် အခါများတွင် ကျွန်တော် အလွန် စိတ်ကုန်မိပါသည်။ ဘုန်းကြီးပျံများတွင်မတော့ (ခုခေတ်ကလေးတွေ၊ ဘုန်းကြီးပျံ ဆိုတာ ဘာလဲ ဖြစ်နေဦးမယ်။ ဘုန်းကြီးပျံ ဆိုတာ ဘုန်းကြီး အသုဘ ကိုပြောတာ) ပိုက်ဆံတတ်နိုင်လျှင် ဓါတ်စက်မငှား။ အငြိမ့်သမများကို ငှားကာ ငိုချင်းချ၏။ ဘုန်းကြီး ရုပ်အလောင်း နားတွင်ကပ်ကာ ဖွဲ့ဖွဲ့နွဲ့နွဲ့ ငိုရသည်။ ဤကဲ့သို့ ငိုသည်ကို ဧယဉ်ကျူးသည် ဟု ခေါ်၏။
            ဧယဉ်ကျူးခြင်းကို ဘုန်းကြီးပျံတွင်သာမက ဘုန်းတော်ကြီး၏ မိဘများကွယ်လွန်သည့် မယ်တော်ပျံ၊ ဘတော်ပျံ စသည်တို့တွင်လည်း ထည့်တတ်ပါသည်။ ပိုက်ဆံတတ်နိုင်လျှင် တတ်နိုင်သလို ချဲ့ကြခြင်း ဖြစ်ပါသည်။
            မြန်မာဂီတတွင် အဲချင်း၊ အိုင်ချင်း၊ ကာချင်း၊ တျာခြင်း၊ နတ်ချင်း၊ ဒုံးချင်း၊ လှေချင်း စသော ချင်း ၂၄ ချင်း ရှိရာ ထို အထဲတွင် ငိုချင်းသည်လည်း တစ်ခု အပါအ၀င်ဖြစ်ပါသည်။ ဆယ်တန်းလောက်တုံးကတော့ သည် ၂၄ ချင်းကို အကုန်ရသည်။ ခုတော့ အကုန်မေ့ကုန်ပြီ။ နောက်မှ လူထုဒေါ်အမာ၏ မြန်မာ့ မဟာဂီတ ကို ပြန်ရှာကာ ထပ်လေ့လာပါဦးမည်။

            ကျွန်တော် ၇ တန်းလောက်ရောက်တော့ စတီရီယို ဆိုတာကို စတင်ကြားလာရသည်။ စိုင်းထီဆိုင် တို့ စိုးပိုင် တို့ စိန်လွင်တို့ သီချင်းများနှင့် စတင်ရင်းနှီးလာသည်။ သို့သော် သူများဆိုတာ၊ တခါတလေ ဓါတ်စက်မှ ဖွင့်တာလောက်တာ မချင့်မရဲ နားထောင်ရသည်။ သေသေချာချာ နားထောင်ဘို့ အခွင့်အရေး မရခဲ့။ လားရှိုးသိန်းအောင်၏ အမေတစ်ခု သားတစ်ခု ကို ကူးကာ အလွတ်ကျက်ခဲ့ရသည်။ စက်ခေါင်းအမှတ် ၁၁၉ ကို နားထောင်ကာ ဘာကိုမှန်းမသိ၊ လွမ်းခဲ့ရသည်။ စိုင်းထီးဆိုင့် သီချင်းကို မန္တလေးရောက်၊ ရှမ်းကလေးတစ်ယောက်၊ လမ်းနံဘေးလျှောက်၊ အရမ်းသေးပေါက် ဟု အော်ဟစ်ဆိုခဲ့သည်။ ဆယ်ကျော်သက်အရွယ် ဆိုတော့ အသည်းက တဒုတ်ဒုတ် နှင့် စတင်ခုန်တတ်လာပြီ။ ကိုယ်နှင့် အတန်းတူ ကောင်မလေး တွေကို ဘာဂလိုတိုတို ဖြစ်ချင်လာပြီ။ စိုးပိုင်၏ - - - ရင်ခွင်မှာ နွဲ့ကာ အားကိုးတဲ့ သူရယ်၊ နွေးနွေးထွေးထွေး ရင်ခုန်တယ် - - - ဆိုသည့် သီချင်းကို ခံစားချက်အပြည့်နှင့် ညည်းတတ်လာပြီ။
             သည်လိုနှင့် ၈ တန်းအောင်တော့ ကွင်းကောက်မှ လွမ်းစရာများကို ထားရစ်ခဲ့ကာ လေးမျက်နှာ ပြောင်းလာခဲ့သည်။ ဓါတ်စက်များလည်း တဖြည်းဖြည်းပျောက်ကာ ကက်ဆက်များ ပေါ်လာသည်။ သည်ထိ ကျွန်တော့်မှာ သီချင်းကို ကျကျနန နားမထောင်ဖူးသေး။ သည်တုံးက လဖက်ရည်ဆိုင် ယဉ်ကျေးမှုလည်း သိပ်ခေတ်မစားသေးတော့ သီချင်းနားထောင်ရန် အခွင့် အလမ်းက ရှာမှရှား ဖြစ်၏။ အလှူ၊ မင်္ဂလာဆောင်၊ ဆွမ်းလောင်းပွဲ စသည်တို့မှ ဖွင့်သော သီချင်းကိုသာ အသာနားစွင့်ရသည်။
            ၉ တန်းရောက်တော့ မင်းအောင် က သီချင်းကြီးမှ စာသားတချို့ယူ၊ အသံတချို့ယူ။ တသစ်ဆန်းကာ မင်းသားလေးလို လွမ်းပြမယ် လုပ်၏။ ကျူးကြော်ညံ နှင့် စ၏။ စပြီး ပထမ တစ်ခွေ၊ နှစ်ခွေမှာပင် အသားကုန် ပေါက်လေတော့သတည်း။ သူလည်း နှစ်အတန်ကြာ၏။ ခွေအတော်များများထွက်၏။ ရန်ကုန်တွင် မင်းသားလေး တေးသံသွင်းဆိုင်ထောင်၏။ ထို သီချင်းခွေများကို စီးရီးဟု ခေါ်၏။ သူ စီးရီးဘယ်နှခွေ ထွက်မှန်း ကျွန်တော်မသိပါ။ သို့သော် ထွက်သမျှစီးရီးတိုင်းလိုလို ကျွန်တော်ကြိုက်၏။ ထိုစဉ်က မင်းအောင့် သီချင်းမှန်သမျှ ကျွန်တော်မရသောသီချင်း အင်မတန်ရှားပါသည်။ ကျွန်တော် ဟင်္သာတ ဒေသကောလိပ်မှာ တက်စဉ် မင်းအောင်မှာ လျှမ်းလျှမ်းတောက် ကြော်ကြားနေချိန်ဖြစ်သည်။ ကျွန်တော်က မိုးကောင်းကျောင်းတိုက်မှာ တည်းသည်။ ကျွန်တော်နှင့် တစ်ကျောင်းထဲအတူနေသူ ဦးဝိန္ဒာစာရ ဆိုသူ ဦးပဉ္ဖင်းမှာ မှတ်စု စာအုပ်ကြီးတစ်ခုထဲတွင် မင်းအောင် ၏ သီချင်းမှန်သမျှ အကုန်ကူးရေးလေသတည်း။ ထို သီချင်းကူးသူများတွင် ကျွန်တော် လည်းတစ်ယောက် အပါအ၀င် ဖြစ်သည်။
            ကျွန်တော် ဒေသကောလိပ် ဒုတိယနှစ်ရောက်တော့ ကိုင်ဇာ နှင့် မေဆွိတို့မှာ အတော် နာမည်ရနေပြီ။ သူတို့ နှစ်ယောက်ပေါင်းဆိုထားသော အနမ်းပန်း မှာ ကျွန်တော်တို့ အသည်းစွဲဖြစ်၏။ - - - လက်သီးဆုပ်မလား၊ လက်ဝါးဖြန့်မလား၊ ကြိုက်တာကို ရွေးစမ်းကိုယ့်လူ၊ မင်းလဲယောက်ျား၊ ငါလဲယောက်ျား၊ စွမ်းမယ်ထင် လုပ်ကြည့်လိုက်လေ - - - ဟု အားရပါးရ ဆိုကာ မကျေနပ်ချက်များကို ရင်ဖွင့်ကြ၏။ - - - ကိုယ်အရမ်း လွမ်းနေပြီ ကလေးရေ - - - ဆိုကာ မရသေးသော ရည်းစားကို အတင်းလွမ်း၏။ နှစ်အနည်းငယ်အတွင်းမှာပင် စတီရီယို သီချင်းများသည် ဝေေ၀ဆာဆာ ဖြစ်လာ၏။ အဆိုတော်များလည်း အများအပြား ပေါ်ထွက်လာခဲ့သည်။ ကျွန်တော်ကတော့ ခိုင်ထူး၏ သီချင်းတစ်ပုဒ် ပန်းတစ်ဆုပ် ကိုလည်း အလွန် ကြိုက်ခဲ့သည်။ ဘယ်သူပါလိမ့် ဆိုတာ။ မေ့နေပြီ။ ဗျတ္တလို ပန်းဆက်သမား ကိုလည်း လွမ်းလွမ်းဆွတ်ဆွတ် ဆိုတတ်သည်။
            ကျွန်တော်က သီချင်းကြိုက်သူ ဆိုတော့ ကျွန်တော်ကြိုက်သည့် သီချင်းများကိုသာ ရေးပြရလျှင် စာမျက်နှာပေါင်း များစွာ ဖြစ်သွားလိမ့်မည်။ ကျွန်တော် တတိယနှစ်တွင် ပလေးဘွိုင်သန်းနိုင်နှင့် အယ်လ်ခွန်းရီ တို့တွဲဆိုထားသော လေယာဉ်ပျံ စီးရီးကို အလွန်အင်မတန် နှစ်သက်ခဲ့သည်။ နောက်ပြီး စိုင်းထီးဆိုင့် (လူကြမ်းမင်းသား စီးရီးထင်သည်) ခွေထဲမှ စောသိမ်းဝင်း ၏ ရေဆန်မှာချော ရေစုန်မှာမျောကို ကြိုက်ခဲ့သည်။ တီဗီလည်း ပေါ်နေပြီ ဖြစ်သဖြင့် အဆောင်များတွင် ထားပေးသော တီဗီ ကို ကြည့်ရသည်။ ညနေ ထမင်းစားအပြီး တီဗီမှ သီချင်းများလာသည်။ မေခလာ၊ နော်လီဇာ၊ ပုလဲ၊ စိမ်းမို့မို့။ မြသီတာ စသဖြင့် သီချင်းများလွှင့်သည်။ ကိုင်ဇာကို စူပါစတား တီးဝိုင်းနှင့် လွှင့်သည်။ မြသီတာ က အသံကလည်း ကောင်း ချောလည်း ချောတာမို့ အလွန်သဘောကျသည်။ မေ၀င်းမောင်က - - - - ကားကလေးတစ်စီးလောက်ဝယ်ရင် - - ဘရိတ်ပါပါစေ - - ကားကလေး မတိုက်အောင် မောင်းပေါ့ကွယ် - - အသည်းလေးက အရမ်းချစ်လာရင် ဘရိတ်ကို နင်းပါကွယ် - - - ဟု ဆို၏။ ဘာပဲဖြစ်ဖြစ် မြန်မာ့အသံမှ ဖျော်ဖြေရေး အစီအစဉ်များကို သဘောကျပါသည်။ သဘောမကျလို့လည်း တခြား ဘာမှ ကြည့်စရာ ရှိတာမဟုတ်။

            စတုတ္ထနှစ်မှာ ခင်မောင်ထူး နှင့် မေဆွိ တို့၏ စိတ်ရောင်စုံ စီးရီးထွက်လာသည်။ ဒါလည်း ကြိုက်၏။ နောက်တော့ သတင်းစာထဲမှာ စိတ်ရောင်စုံ သီချင်းများကို ခင်မောင်ထူး နှင့် ဘယ်ပွဲမှာ သီဆိုမည်ဟူသည့် ကြေငြာချက်ကို ကန့်ကွက်ပါ ကြောင်း၊ ကာယကံရှင်မသိဘဲ နောင်တွင် ဤကဲ့သို့ကြေငြာခဲ့လျှင် တရားဥပဒေအရ အရေးယူမည် ဖြစ်ကြောင်း မေဆွိ က ရှေ့နေမှ တစ်ဆင့် ကြေငြာသည့်သတင်းကို ဖတ်လိုက်ရပြီးသည့်နောက် ဤ သီချင်းခွေလည်း ပျောက်ချင်းမလှ ပျောက် သွားခဲ့ရသည်။ ၀မ်းနည်းစရာကောင်းပါ၏။
နောက် ကိုနေ၀င်း ၏ ယာဉ်အမှီ ရီရီပြုံးပြန်ပါ။ ခိုင်ထူး ၏ ဆို တို့ ထွက်သည်။ မေခလာ က ဂိုးသွင်းကောင်းတဲ့ ကိုကို ဟု ဆိုကာ အရှေ့အလယ်ပိုင်းဒေသ ကို လက်ကလေးနှစ်ဖက်နှင့် အုပ်ထားသည့် ပုံကို စီးရီးမျက်နှာဖုံးအဖြစ် ထုတ်တော့ ကျွန်တော်တို့ မျက်လုံးပြူးရ၏။ ကျွန်တော် ၄ တန်းစာမေးပွဲအပြီး မန္တလေးတွင် field ဆင်းတော့ ဂျေမောင်မောင် က ဘာတဲ့၊ Shell ဆိုလား။ သူ့ တီးဝိုင်းနာမည်တောင်မေ့နေပြီ။ သူ့တီးဝိုင်းနှင့် လမ်းဘေး စတိတ်ရှိုးစင်မှာ ရေခဲတုံးပေါ်က မင်းမျက်နှာလေး ကို ဆိုနေဆဲ ဖြစ်၏။ သည်တုံးက သည်သီချင်းက စီးရီးအဖြစ်ပင် မထွက်သေး။
ကိုင်ဇာ၏ ရာဇူးက မမရေ ၊ ရာဇူးက မမ (ရာဇူး = RASU – Ragoon Arts and Science University) သီချင်းကို ကျွန်တော်တို့ရွာတွင် လော်ကြီးနှင့် အသားကုန်ဖွင့်သည်။ သည်တော့ ကျွန်တော်တို့ရွာမှ ကာလသားများကလည်း သီချင်းကို နားထောင်ကာ ရာဇူ မမ ဟု ဆိုကြကုန်၏။ ကျွန်တော်တို့အိမ်ရှေ့တည့်တည့်အိမ်မှ အဒေါ်ဖြစ်သူ အပျိုကြီး ဒေါ်ဒေါ်ခင်ကြိုင် ကမူ ရွာဦးကမမရေ ဟု ညည်း၏။ ကျွန်တော်တို့မောင်နှမ တစ်သိုက်မှာ သူမသိအောင် တိတ်တိတ်ကလေး ရီရသည်။ နောက် သူ့ကွယ်ရာရောက်မှ သည်အကြောင်း ပြန်ပြောကာ အသားကုန် ဟားကြပါသည်။ ပျော်စရာကောင်းလှပါ၏။  
            နောက် မင်းအောင့်အသံလိုလို ဘာလိုလိုနှင့် အနိုင် ပေါ်လာသည်။ သူ့သီချင်းများကိုလည်း ကျွန်တော်ကြိုက်၏။ - - - လပြည့်ည မှာ ခဏတွေ့ကာချစ်ရပေမဲ့ - - လပြည့်ကျော်ကာသွားတော့ မျှော်ထားသမျှတွေ ဖြစ်မလာပါနော် - - - ဟု ဆိုကာ အ-သုံးလုံး လုပ်အားပေးတုံးက ကောင်မလေးနှင့် ရွာချောင်းနံဘေးမှာ လက်ချင်းတွဲ၍ လသာညများတွင် လျှောက်ခဲ့သည်ကို ပြန်လွမ်းရသည်။ ခုတော့ လွှမ်းမိုးသီချင်းလို ပါးစပ်ရာဇင်လေး ဖြစ်ခဲ့ရပြီ။
            လွှမ်းမိုး ဆိုတော့ သူ့သီချင်းများထဲက အလွန်ကြိုက်ပြီး မကြာခဏ ဆိုခဲ့သော မခင်နှင်းဆီ ကို သတိရသည်။ ကျွန်တော့်တွင်လည်း မခင်နှင်းဆီ ရှိခဲ့ပါသည်။ ကျွန်တော်နှင့် အထက်တန်းကျောင်းသားဘ၀ လူရည်ချွန်စာမေးပွဲများ ဖြေတော့ စတင် သိကျွမ်းခဲ့ရသည်။ နောက် ဒေသကောလိပ်တက်တော့ ဟင်္သာတကို အသွား၊ အပြန်တွင် အတူတူ ချိန်းကာ သွားခဲ့ကြသည်။ သူက လေးမျက်နှာတစ်ဖက်ကမ်း၊ အိုင်သပြု ဟိုဘက်နား ရွာကလေးက။ ကျွန်တော်က ရွာမှ လာကာ ဟင်္သာတအသွား သူတို့အိမ် ၀င်ခေါ်။ သူငယ်ချင်းများဖြစ်သူ မျိုးဇော်တို့၊ သန်းထူးတို့၊ ခင်မောင်ဆွေတို့က ၀ိုင်းလှော် ပေးကြ၏။
            သည်လိုနှင့် နှစ်တွေကုန်ကာ ဘာမှ မဟုတ်သေးပဲ ကျွန်တော်က ရန်ကုန်ရောက်၊ သူက ရေဆင်း စိုက်ပျိုးရေး တက္ကသိုလ် တက်သည်။ ရေဆင်း ဆိုတာ ရန်ကုန်က တစ်ဆင့် သွားရသည်မို့ တက္ကသိုလ် အသွားအပြန်တွင်လည်း ကျွန်တော် တို့ အတူတူ ဖြစ်ခဲ့သည်။ ကျောင်းတက်နေစဉ် စာများအပြန်အလှန်ရေး။ သတိရကြောင်း ဘာကြောင်းညာကြောင်း။ သို့ပေမင့် ကျောင်းပြီးသွားသည်ထိ ဘာမှ မဟုတ်သေးပါ။ သူငယ်ချင်းလည်းမက၊ သမီးရည်းစားလည်း မကျ။
            ကျောင်းပြီးသွားတော့လည်း အဆက်အသွယ်ရှိနေပါသေးသည်။ သို့သော် ကျွန်တော်က ဒုက္ခမျိုးစုံနှင့်။ မင်းကို ကိုယ် ဒုက္ခတောထဲ ဘယ်ဆွဲသွင်းရက်ပါ့မလဲကွယ် ဟူသော အကြောင်းပြချက်နှင့်။ နောက်တော့ သူ ကျွန်တော့်ကို မစောင့်နိုင်တော့ ဘဲ ယောက်ျားယူသွားသည်။ သူ အိမ်ထောင်ပြုမည် ဆိုတော့ ကျွန်တော့်ထံ လှမ်းအကြောင်းကြားပါသေးသည်။ တစ်နည်းအား ဖြင့် ကျွန်တော့်ကို နောက်ဆုံးဝမ်နင် လှမ်းပေးလိုက်တာဖြစ်သည်။ သို့သော် ကျွန်တော့်မှာ သူ့ကိုယူဘို့ အဆင်သင့်မဖြစ်သေး။  သည်တော့ နှုတ်ဆိတ်နေခြင်းဖြင့် သဘောတူလိုက်ရပါသည်။ ဤသည်ကပင် မခင်နှင်းဆီ သီချင်းကို ဆွေးဆွေးမြေ့မြေ့ သီဆိုရန် အကြောင်း ဖြစ်ပေတော့သတည်း။