ကျွန်ုပ်နှင့် ဆာဂျစ်ကယ် မာ့က်စ် (Surgical Mask)

မနေ့မနက်က သားကို ကျောင်းကားဂိတ်လိုက်ပို့ရင်း စကားစနေပြောဖြစ်၏။

န်ုပ် - သားရေ - ကြည့်ပါဦးကွာ။ လူဆယ်ယောက်မှာ တစ်ယောက်တောင် နှာခေါင်းအုပ် (surgical mask) ဝတ်တာ မတွေ့ရဘူး။ 
သား - ဖေကြီးရ - Mask ဝတ်တာနဲ့ မဝတ်တာ အတူတူပါဘဲ။ ဝတ်စရာမှ မလိုဘဲဟာ။
န်ုပ် - ဟေ - ဘာကြောင့်တုံးကွ။ 
သား - Surgical mask က ကိုယ့်ဆီကပိုး တခြားသူဆီမကူးအောင်ပဲ ဝတ်ရတာ။ အဲဒီ mask က တခြားသူဆီကပိုး ကိုယ့်ဆီ ကူးမလာအောင် မတတ်နိုင်ဘူး။

သူပြောလို့ ကျွန်တော် လိုက်ရှာကြည့်ရာ နေရာ (၃) နေရာတွင် အောက်ပါအတိုင်း တွေ့ပါသည်။

၁။ Wikipedia
၂။ The Strait Times
၃။ စင်ကာပူ ကျန်းမာရေးဝန်ကြီးဌာန

နှာရည်ယိုနေသူများ၊ နှာချေသူများ surgical mask ကို ဝတ်ကြပါ . . . ဟူ၏။

အေးငြိမ်း

၃၁ ဇန္နဝါရီလ၊ ၂၀၂၀

ဘက်ထရီသမိုင်း

လူမိုက်များတို့ တိုင်းပြည်

(၁)

သူများအမှားပေါ်မှ သင်ခန်းစာယူနိုင်ခြင်းသည် ပညာရှိဖြစ်၏။

ကိုယ့်အမှားအပေါ်မှ ကိုယ် သင်ခန်းစာယူနိုင်သူသည် သာမန်လူဖြစ်၏။

တစ်ခါအမှားလုပ်ပြီးတောင် သင်ခန်းစာမယူနိုင်။ သည်အမှားကို ထပ်ခါ ထပ်ခါ ကျူးလွန်နေသူကား လူမိုက်စင်စစ် ဧကန်ဖြစ်တော့၏။

(၂)

ရတနာပုံဈေးကြီးမီးလောင်တော့ ကိုနိုင်လင်းစိုးက “ဈေးတွေဘာကြောင့် နှစ်ခါပြန် မီးလောင်ရ ပါသလဲ” ဟုစပ်စုလာသည့်အခါ ဤသည်မှာ မိုက်မဲမှု၏ရလဒ်ဖြစ်၏ - ဟုဆိုကာ အထက်ပါ စာသားလေးကို ပေးပို့လိုက်ပါသည်။

မီးကာကွယ်ရေးအကြောင်း ကျွန်တော် ဆောင်းပါးများရေးကာ The Voice ဂျာနယ်၌ ထည့်ဖူးပါ သည်။

ကျွန်တော်တို့နိုင်ငံတွင် မီးလောင်၍ ဆုံးရှုံးရသည့် ပစ္စည်းဥစ္စာပမာဏမှာ တစ်နှစ်တစ်နှစ် မနည်းလှပါ။ သို့တိုင် မီးကာကွယ်ရေးကို မည်သူကမှ လေးလေးစားစားလုပ်တာ မတွေ့ရသေးပါ။ အဆောက်အဦတွေဆောက်ရင် ဘာတဲ့ မီးကာကွယ်ရေးစနစ်ပါရမယ် ဆိုလား။

အဟွတ် အဟွတ် . .

သောက်ကျိုးနဲ။ ပြောရင်း တံတွေးတောင် သီးတယ်။

မရိုးနိုင်တဲ့ ပုသိမ်က ပုံပြင်လေး ပြန်ကောက်ပါရစေ။

ကျွန်တော်တို့အုပ်စု ပုသိမ်ရောက်တော့ ဟော်တယ်တစ်ခုတွင် တည်း၏။

ဖိုးစပ်စု ကျွန်ုပ်မှာ ကိုယ့်ဘာသာအငြိမ်မနေဘဲ ဟော်တယ်ထဲ ဟိုဟိုသည်သည် လျှောက်ကြည့်၏။ စင်္ကြန်အဆုံးတွင် အလွန်မတ်စောက်လှသော လှေခါးတစ်ခုတွေ့မိ၍ စိတ်ထဲ မသင်္ကာသည်နှင့် သတိကြီးစွာထားကာ ဆင်းကြည့်၏။ လှေခါးဆုံးတော့ နံရံနှင့်ပိတ်နေ၏။ ဘယ်ကိုမှ ထွက်လို့မရ။

သို့နှင့် ကျွန်ုပ်လည်း ဟော်တယ်က မမကလေးကို မနေနိုင်မထိုင်နိုင် မေးကြည့်၏။

ဟိုလေ . . . ဟို အထပ်က လှေ လှေ လှေခါး က . . .

သူကလည်း အလွန်ပါးလှ၏။ ပါးလွန်းတော့ လုံချည်တောင် နှစ်ထပ်ခံဝတ် . . ဟုတ်ပေါင် . . ဓာတ်ဆီဓာတ်ဆံတို့နဲ့ မှားကုန်ပြီ။

ကျွန်ုပ်ဘာသိချင်သည်ကိုဒက်ကနဲတန်းသိ၏။

ဪ . . သဟာလား။

ဒါကဒီလိုဆိပါတယ်ဆင့်။

ဟော်တယ်ဆောက်တုံးက အရေးပေါ်ထွက်ပေါက်မပါတော့ ဆောက်ခွင့်မကျဘူးလေ။

အဲသဟာကြောင့် အဲဒီလှေခါးက အရေးပေါ်ထွက် ပေါက် ပေါက် . .

မြတ်စွာဘုရား။

အသင်တို့ သည်ကဲ့သို့သာ ဆက်လုပ်နေကြဦးမည်သာဆိုလျှင် ဤဈေးကြီးများသည် မီးကိုလေ . .

နှစ်ခါမက သုံးခါမက လေးခါမက ပြန်လောင်နေလိမ့်ဦးမည်ဆိုတာ ကျွန်ုပ် ရဲရဲကြီး အာမခံလိုက်ပါ သတည်း။

(၃)

ယခု မီးကာကွယ်ရေးဆောင်းပါး အပိုင်း (၁) မှာ Tech Digest သို့ပို့ထားသည့် ဆောင်းပါးဖြစ်ပါသည်။ ဘယ်လမှာ ပါမည်မသိ။ အပိုင်း (၂) ရေးပြီးလျှင် ထပ်တင်ပေးပါမည်။

ကျေးဇူးတင်ပါသည်။

အေးငြိမ်း

၂၄၊ ဇန္နဝါရီလ၊ ၂၀၂၀

Boom Lift Safety