ISO လက်မှတ်ယူတာ ကောင်းသလား

ဟိုတစ်နေ့က ကျွန်ုပ်နှင့် အလွန်ရင်းနှီးသော ကိုရွှေသန်းက အောက်ပါအတိုင်း message ပို့လာပါ၏။

 

သူ အိန္ဒိယသွားစဉ်က Hero နှင့် Honda စက်ရုံနှစ်ခုကို ရောက်ခဲ့၏။ ထိုစက်ရုံများမှာ အလွန် သန့်ပြန့်လျက် အင်မတန် စနစ်တကျရှိကြောင်း။ သို့တိုင် ၎င်းတို့သည် မည်သည့် ISO လက်မှတ်တစ်ခုကိုမှ ယူမထားကြောင်း။

 

တရုတ်ပြည်ရောက်တော့လည်း စက်ရုံများမှာ သားနားသန့်ပြန့်လျက် ပန်းခြံကြီးတစ်ခုထဲ ရောက်နေသလို ခံစားရကြောင်း။ သို့တိုင် ၎င်းတို့သည်လည်း မည်သည့် ISO လက်မှတ်တစ်ခုကိုမှ ယူမထားကြောင်း။

 

ISO လက်မှတ်ယူထားသူနှင့် ယူမထားသူ မည်သူက များပါသနည်း။

ISO လက်မှတ်ယူထားသူနှင့် ယူမထားသူတို့ ဘာတွေကွာပါသနည်း။

ISO လက်မှတ်မယူဘဲ ကိုယ့်မူနဲ့ကိုယ် အကောင်းဆုံးဖြစ်အောင်ရော လုပ်လို့မရဘူးလား။

 

အီလွန်မတ်၊ ဘီလ်ဂိတ်နှင့် စတိဂျော့တို့ရော ISO လက်မှတ် ယူထားသလား။ 

 

ဆိုတော့ ကျွန်ုပ်နားလည်သလို ရှင်းပြပါမည်။

 

ISO သည် စံနှုန်းများကို ရေးဆွဲပေးသည့် နိုင်ငံတကာအဖွဲ့အစည်းတစ်ခု ဖြစ်၏။ 

၎င်းတို့ အဘယ်ကြောင့် ဤစံနှုန်းများကို ရေးဆွဲရသနည်းဆိုသော် လူအများ အလုပ်လုပ်ရာ၌ လွယ်ကူမြန်ဆန်ပြီး စနစ်တကျလုပ်တတ်စေရန် စံများ ပြုစုပေးခြင်း ဖြစ်၏။

 

သို့သော် -

ISO လက်မှတ်များရပြီဆိုရုံမျှဖြင့် ကုမ္ပဏီတစ်ခုသည် ISO စံချိန်စံညွှန်းများကို အပြည့်အဝလိုက်နာပါသည်ဟု အာမ မခံနိုင်။ ISO က လမ်းညွှန်ချက်များကို ချပေးရုံမျှသာဖြစ်ပြီး တကယ်လိုက်နာလုပ်ကိုင်သည် မလုပ်ကိုင်သည်ဆိုခြင်းမှာ သက်ဆိုင်ရာ ကုမ္ပဏီများနှင့်သာ သက်ဆိုင်၏။ 

 

ISO သည် ၎င်းတို့ကိုယ်တိုင် လက်မှတ်ထုတ်ပေးခြင်းမဟုတ်။ Third Party က Audit လုပ်ပြီး ကုမ္ပဏီ၏ စီမံခန့်ခွဲရေး စနစ်သည် ISO စံချိန်စံညွှန်းများနှင့် ကိုက်ညီကြောင်း သက်သေပြလျက် Certification Body တစ်ခုခုက လက်မှတ်ထုတ်ပေးတာ ဖြစ်၏။ 

 

Ref:

https://www.linkedin.com/pulse/corporate-sustainability-value-iso-standards-net-pos-yqsef/

https://www.dnv.com/assurance/articles/iso-accreditation-vs-iso-certification/#:~:text=ISO%20certification%20is%20an%20attestation,a%20'ticket%20for%20trade'.

 

အကယ်၍သာ ကုမ္ပဏီများသည် ISO စံနှုန်းများကို လိုက်နာလုပ်ကိုင်မည်ဆိုပါက -

 

ကုန်ထုတ်လုပ်ရာတွင် ပိုမိုထိရောက်လာမည်။ အလေအလွင့်နည်းလာမည်။

ပတ်ဝန်းကျင်ထိခိုက်မှုကို လျှော့ချနိုင်မည်။ အမှိုက်များကို လျှော့ချနိုင်မည်။

လုပ်ငန်းခွင် ထိခိုက်ရှနာမှုများကို လျှော့ချနိုင်မည်။

စွမ်းအင်သုံးစွဲမှုကို ချွေတာနိုင်မည်။

အစားအသောက်များ ညစ်ညမ်းမှုကို ကာကွယ်နိုင်မည်။

သတင်းအချက်အလက် ပေါက်ကြားမှုကို ကာကွယ်ပေးနိုင်မည်။

 

Ref:

https://www.iso.org/standards.html

 

ISO လက်မှတ်ယူခြင်းသည် ကောင်း၏။ 

သို့သော် အချို့ကုမ္ပဏီများသည် ISO လက်မှတ်ကို အလွဲသုံးစား လုပ်ကြ၏။

ISO လက်မှတ်ကြီးသာ ယူထားသည်။ စာရွက်စာတမ်းကိစ္စလေးများတောင်မှ စနစ်တကျ မလုပ်နိုင်။

 

အတိတ်ကာလတစ်ခုဆီက ကျွန်ုပ် တက္ကသိုလ်ကြီး တစ်ခုဆီရောက်ခဲ့၏။ 

တက္ကသိုလ်ဝင်ပေါက်တွင် ISO 9001 Certified ဆိုသည်ကို ရွှေရောင်စာလုံးအကြီးကြီးဖြင့် ရေးထား၏။ 

သို့သော် အိမ်သာတက်ဖို့မပြောနှင့်၊ သေးတောင် ပေါက်စရာနေရာ ကောင်းကောင်းမရှိ။ 

 

ဟိုတက္ကသိုလ်ကြီးတစ်ခုကျတော့ ထို ISO 9001 Certified ဆိုင်းဘုတ်ကြီးမှာ ခြေထောက်တစ်ချောင်းကျိုးနေ၍ သစ်သား နှင့် ကူထောက်ပေးထားရသေး၏။

 

သို့ဆိုလျှင် သူတို့ အဘယ်နည်းနှင့် ထို ISO လက်မှတ်ကြီးကို ရယူပါသနည်း။

ISO လက်မှတ်ရဘို့ criteria တွေရှိ၏။ ထိုအချက်များနှင့်ကိုက်ညီကြောင်း သက်သေ စာရွက်စာတမ်းများ တင်ပြရ၏။

အေးဂျင့်များသည် ISO လက်မှတ်ရဘို့ ဘယ်လိုစာရွက်စာတမ်းတွေလိုတယ်ဆိုတာ သိ၏။ ထိုအတိုင်းပြင်ပေး၏။ ထိုအခါ ပြင်ပ လက်တွေ့ဘဝမှာ ဘယ်လိုပဲ ဖြစ်နေနေ လက်မှတ်ရတော့၏။

သည်အကြောင်း ယခင်ကလည်း ကျွန်ုပ် ရေးခဲ့ဖူးပါသည်။ 

 

သို့ဆိုလျှင် ကုမ္ပဏီများသည် အဘယ်ကြောင့် ISO လက်မှတ်များ ယူကြရဘိသနည်း။

၎င်းတို့သည် ISO လက်မှတ်ရထားသဖြင့် သူတို့၏ ကုန်ပစ္စည်း/ဝန်ဆောင်မှုအရည်အသွေး ကောင်းကြောင်း ပြလို၍ ဖြစ်ပါလိမ့်မည်။ ISO လက်မှတ်ပြကာ ဈေးကွက်ရှာလို၍ ဖြစ်ပါလိမ့်မည်။ အဘယ်ကြောင့်ဆိုသည်ကိုမူ ကာယကံရှင် ၎င်းတို့မှသာ တပ်အပ်သေချာ သိပါလိမ့်မည်။ ကျွန်ုပ် သေသေချာချာမသိပါ။

 

ဆိုတော့ ကိုရွှေသန်း၏ မေးခွန်းများကို ဖြေပါမည်။

 

၁။ ISO လက်မှတ်ယူထားသူနှင့် ယူမထားသူ မည်သူက များပါသနည်း။

ISO လက်မှတ်ယူထားသည့် ကုမ္ပဏီများ ကမ္ဘာ့နိုင်ငံများတွင် အတော်များပါသည်။ သို့သော် ယူမထားသူဦးရေက ပိုများပါသည်။ နိုင်ငံတကာဈေးကွက်ကို ထိုးဖောက်နေသည့် ကုမ္ပဏီများအနေနှင့် ISO လက်မှတ် ယူကောင်း ယူပါလိမ့်မည်။ သို့သော် သင်္ကန်း၊ ပရိက္ခရာဆိုင်အနေနှင့် ISO လက်မှတ်ယူဘို့ လိုပါမည်လား။ ရှင်းပါသည်။ မလိုပါ။ အဲလေ သူတို့တံဆိပ်ပေါ်မှာ ISO တံဆိပ်ကလေးပြချင်လျှင်တော့ ယူကြပါလိမ့်မည်။ သို့တိုင် ထိုတံဆိပ်ထည့်ထားခြင်း အားဖြင့် သင်္ကန်း၊ ပရိက္ခရာ ရောင်းအားပိုတက်လာမည်။ ၎င်းတို့၏ သင်္ကန်း၊ ပရိက္ခရာများ အရည်အသွေး ပိုကောင်းလာမည်ဟု ကျွန်ုပ်ကတော့ မထင်ပါ။ ဤသည်မှာ ကျွန်ုပ်က ရိုးရိုးသားသား ပြောခြင်း ဖြစ်ပါသည်။

 

၂။ ISO လက်မှတ်ယူထားသူနှင့် ယူမထားသူတို့ ဘာတွေကွာပါသနည်း။

ဘာမှမကွာပါဟု ယေဘူယျ ပြောလို့ရပါသည်။ 

အထက်တွင် ပြောခဲ့သလို ငါတို့က ISO Certified ကွ ဟု ကြွားရုံသက်သက်အတွက်သာ လက်မှတ်ယူမည်ဆိုလျှင်တော့ ထိုလက်မှတ်သည် ဘာတန်ဘိုးမှ မရှိပါ။ ISO လက်မှတ်မယူဘဲလည်း ISO ၏ စနစ်ကို လိုက်နာသုံးစွဲလို့ ရသည်သာ ဖြစ်၏။ 

 

ISO လက်မှတ်ယူပြီး ISO စနစ်များကို မကျင့်သုံးသူသည် ငါးပါးသီလယူပြီး လုပ်ချင်ရာ လျှောက်လုပ်နေသူနှင့်တူ၏။

ISO လက်မှတ်မယူဘဲ ISO စနစ်များကို ကျင့်သုံးနေသူသည် ဘာ ပါဏာတိပါတာ ဝေရာမဏိသိက္ခာပဒံ မှ ရွတ်မနေဘဲ ကိုယ့်သီလကိုယ် လုံအောင် စောင့်ထိန်းနေသူနှင့်တူ၏။ 

 

တကယ်လုပ်ချင်သူသည် မည်သည့်အခြေအနေရောက်နေပါစေ၊ မိမိသီလကို လုံအောင် ထိန်းမည်သာဖြစ်၏။ ဘုရားရှေ့သွားပြီး ပါဏာတိပါတ ဝေရာမဏိ လုပ်နေစရာ လိုကိုမလို။

 

ကျွန်ုပ်က ဘုရားရှိခိုးနေသူများကို စော်ကားတာမဟုတ်ပါ။ နမူနာပြတာသာ ဖြစ်ပါသည်။ စိတ်မဆိုးကြပါကုန်လင့်။

 

၃။ ISO လက်မှတ်မယူဘဲ ကိုယ့်မူနဲ့ကိုယ် အကောင်းဆုံးဖြစ်အောင်ရော လုပ်လို့မရဘူးလား။

ရသပေါ့ခင်ဗျာ။ ကျွန်ုပ် အထက်မှာ ပြောခဲ့ပါပြီ။ ကိုယ့်မူနှင့်ကိုယ့်စံနှင့် လုပ်လို့ရပါသည်။ 

သို့သော် ISO စံချိန်စံညွှန်းတွေဆိုတာ မဖြစ်ညစ်ကျယ် ဖြစ်ကတတ်ဆန်း လုပ်ထားတာတွေမဟုတ်။ နိုင်ငံပေါင်းများစွာက ပညာရှင်တွေ အချိန်ယူပြီး ညှိနှိုင်းရေးဆွဲ၊ အထပ်ထပ် စိစစ်ကာ ပြဋ္ဌာန်းပေးထားသည့် စံနှုန်းများ ဖြစ်၏။ သူတို့က ပိုက်ဆံရှာဘို့ လုပ်နေတာမဟုတ်ဘဲ ကမ္ဘာလောကကြီး ပိုကောင်းလာစေဘို့၊ လူတွေအလုပ်လုပ်ရတာ သက်တောင့်သက်သာ ဖြစ်စေဘို့၊ အဆင်ပြေပြေ လုပ်နိုင်ဘို့ ရည်ရွယ်ချက်နှင့် လုပ်ကြတာ ဖြစ်၏။ သို့အတွက် သူတို့စံနှုန်းကို လိုက်နာခြင်းဖြင့် ကိုယ့်အတွက် ကောင်းလာစရာပဲ ရှိသည်။ အကျိုးယုတ်သွားစရာ၊ ဆုတ်ယုတ်သွားစရာ အကြောင်းမရှိ။

 

၄။ အီလွန်မတ်၊ ဘီလ်ဂိတ်နှင့် စတိဂျော့တို့ရော ISO လက်မှတ် ယူထားသလား။ 

မယူဟု ထင်ပါသည်။ ကျွန်ုပ်မသိပါ။ ၎င်းတို့ လုပ်ပုံကိုင်နည်းများ၊ စီမံခန့်ခွဲမှုစနစ်များ နေရာကျနေသဖြင့်သာ အောင်မြင်နေခြင်း ဖြစ်ပါလိမ့်မည်။ သို့အတွက် ISO လက်မှတ်မယူဘဲလဲ သူတို့အတွက် အဆင်ပြေနေပါလိမ့်မည်။

 

ချုပ်ရလျှင် -

ISO လက်မှတ် ယူလို့ရပါသည်။ မယူဘဲ နေလို့လည်း ရပါသည်။

အရေးကြီးသည်မှာ ကိုယ့်သီလကိုယ် ခါးဝတ်ပုဆိုးလို မြဲအောင်ထိန်းထား ထား . . . အာ . . . မွှားကုန်ပြီ။

အရေးကြီးသည်မှာ လက်မှတ်ယူသည်ဖြစ်စေ၊ မယူသည်ဖြစ်စေ၊ ISO စံနှုန်းတွေကို လိုက်နာလုပ်ဆောင်ကာ မိမိတို့အဖွဲ့အစည်း၊ စနစ်များ ပိုမိုတိုးတက် ကောင်းမွန်လာအောင် လုပ်ကြဘို့သာ ဖြစ်ပါသည်။

 

ဟဲဟဲ အဲသလို အရေးအသားတွေကြောင့်လည်း လူ $$မြင်ကပ်တာ။ သိဘာ့စ်

 

ကိုရွှေသယမ်းရေ့ - အဲသလောက်ဆို ခညား အတော် ကျေလည်လောက်ပြီ ထင်ပါသဗျာ။

ဒါမှ မကျေလည်သေးရင် တောင်သာကို လာပါ့မယ်ဗျာ။ ထန်းပင်အောက်မှာ ရှင်းပြတာပေါ့။ မြေကြွက်ကင်လေးတော့ ရှာထားပေါ့နော။ အဟိ

 

ကျေးဇူးတင်ပါသည်။

 

အေးငြိမ်း

၃ မေလ၊ ၂၀၂၅

 

 

ISO နောက်ဆက်တွဲ

 

ISO ဆိုတော့ ရင်ထဲ ကျလိကျလိ ဖြစ်လာလို့ နည်းနည်းလောက် ကလိလိုက်ပါရစေဦး။

 

စာရွက်ပေါ်မှာတော့ ကောင်းပါသည်။ သို့သော် လက်တွေ့ဘဝ၌ မည်သူတို့ လိုက်နာ လုပ်ဆောင်ပါသနည်း။

ဥပမာ ဆိုကြပါစို့။

 

စင်ကာပူတွင် High risk work များအတွက် Permit To Work (PTW) လျှောက်ရ၏။

PTW လျှောက်ရာ၌ PTW မလျှောက်မီ supervisor လုပ်သူသည် PTW ၌ ဖော်ပြထားသည်တို့ကို လုပ်ငန်းခွင်၌ အားလုံး လုပ်ထားရ၏။ လုပ်ပြီးပြီဆိုမှ PTW မှ checklist ၌ tick လုပ်ရတာ ဖြစ်၏။ 

 

ထို့နောက် PTW ကို Safety Assessor ကို ပေးရ၏။ Safety Assessor သည် ထို PTW ကိုယူ၍ supervisor နှင့်အတူ ၎င်းအလုပ်လုပ်မည့်နေရာသို့ သွားကာ PTW ၌ ဖော်ပြထားသည်တို့ကို တကယ်လုပ်ထားမထား စစ်ဆေးရ၏။ အားလုံး လုပ်ထားပြီးပြီ။ သေချာပြီဆိုမှာ PTW ၌ လက်မှတ်ထိုးရ၏။ 

 

သို့သော် . . . သို့စ်သော် . . .

 

အဘယ် Supervisor သည် PTW ၌ ဘာတွေရေးထားသည်ဆိုတာ ဖတ်ပါသနည်း။ PTW အရ ဘာတွေ ပြင်လို့ ဘာတွေ လုပ်ထားရမည်ဆိုတာ သိပါသနည်း။ လုပ်ဖို့မပြောပါနှင့်။ ဘာတွေပါတယ်ဆိုတာတောင် သိပါလေစ။ Just anyhow tick လိုက်ကြသည်ချည်းသာ ဖြစ်၏။

 

ဒါဆို Safety Assessor ကရောတဲ့။ PTW လာပေးသည့် Supervisor မျက်နှာကို တစ်ချက်လောက်မော့ကြည့်ပြီး အော် - အင်း ဟု လက်မှတ်ထိုးပေးလိုက်တာသာ ဖြစ်၏။ Site ထဲ လိုက်စစ်ဘို့ ဝေးစွ။ သူလက်မှတ်ထိုးပေးလိုက်သည့် PTW သည် ဘယ့်အတွက်၊ ဘယ်နေရာမှာ ဘာလုပ်ဖို့ဆိုတာတွေတောင် သိပါလေရဲ့လားမသိ။

 

ဒါ ကျွန်ုပ်က လူတကာလိုက် အပုပ်ချနေတာမဟုတ်ပါ။ ကျွန်ုပ်၏ မျက်စိရှေ့၌ တကယ်ဖြစ်ပျက်နေသည်များကို အတင်းတုတ် (ဟုတ်ပေါင်) ဖောက်သည်ချတာသာ ဖြစ်ပါ၏။ အဲလေ ခညားတို့လည်း သိပြီးဖြစ်ပါလိမ့်မည်။

 

အနို့ နေပါအုံး။ မင်း အဲဒါတွေသိလျက်နဲ့ ဘာမှမလုပ်ဘဲ ဒီအတိုင်း ထိုင်ကြည့်နေသလား။

ဟုတ်၊ ဒီအတိုင်းတော့ ထိုင်ကြည့်မနေပါဘူးခညာ။ ညောင်းလာရင် မတ်တပ်ရပ် ကြည့်ပါသေးတယ်။

 

စင်ကာပူမှာ Safety အတွက် MOM က bizSafe ဟု လုပ်ပေးထား၏။ အဆင့် ၅ ဆင့်ရှိ၏။ ကျွန်ုပ် အသေးစိတ် ရှင်းမပြတော့ပါ။ ပုံ၌ ကြည့်ကြပါဘိ။ 

 

 

 BizSafe ဟူသည် လုပ်သားများ အန္တရာယ်ကင်းရေးနှင့် ကျန်းမာရေးအတွက် စီမံခန့်ခွဲရေးအဖွဲ့က တာဝန်ယူတတ် လာစေရန် MOM က လုပ်ပေးထားတာဖြစ်၏။ တကယ်လိုက်နာမည်ဆို တကယ်အကျိုးရှိပါလိမ့်မည်။ 

 

BizSafe ၌ အမြင့်ဆုံးမှာ BizSafe Star ဖြစ်၏။ BizSafe Star လက်မှတ်ယူမည့် ကုမ္ပဏီများသည် WSH Management System ရှိရ၏။ ISO45001 Audit လုပ်ရ၏။

 

ဟုတ်စ်၊ WSH Management System လည်း ရှိပါ၏။ ISO45001 Audit လည်း လုပ်ပါ၏။ သို့စ်သော် -

 

၂၀၁၇ က ကျွန်ုပ်နောက်ဆုံးလုပ်ခဲ့သည့် ပရောဂျက်၌ ဆပ်ကွန်းတစ်ခုသည်ရှိ၏။ BizSafe Star လက်မှတ်ရှိ၏။ သို့သော် ၎င်း၏ အလုပ်သမားမှာ safety shoe က အောက်ကခွာ ကော်မကပ်တော့ဘဲ ဘတ်လပ် ဘတ်လပ်နှင့် ဒရွတ်တိုက် ဆွဲနေလေ၏။ ကျွန်ုပ်က ကိုယ့်လူရယ်၊ safety shoe မကောင်းတာ သွားလဲလိုက်ပါလားကွာ ဆိုတော့ ငါတို့ PPE လဲရတာ မလွယ်ဘူးကွ။ ဘော့စ်က ဆဲ ဆဲလွှတ်တယ်။ နောက်ပြီး PPE လဲရင် လခကလည်း ဖြတ်သေးတယ် ဆို၏။

 

ထို ဘော့စ်ဆိုသူနှင့် ကျွန်ုပ် ရင်းနှီး၏။ ထို့ကြောင့် အနှီဘော့စ်လာသည့်အခါ ကျွန်ုပ်က ထိုအလုပ်သမားကိုခေါ်၊ ၎င်း၏ safety shoe ကိုပြလျက် ငါ့လူရယ်၊ ဒါဟာဖြစ်သင့်သလားဆိုတာ ကိုယ့်ဘာသာ ဆုံးဖြတ်ပါကွာ ဆိုတော့ သူက အလုပ်သမားကို Safety shoe မလဲရကောင်းလားဟု ဟောက်လေ၏။ နောက်ပြီး သူ့ဒလိုင်ဘာဆီဖုန်းဆက်ကာ safety shoe မှာပေး၏။ 

 

အမှန်က ဒါတွေကို ကျွန်ုပ် အသက် ၁၀၀ ပြည့်လို့ မြန်မာပြည် အပြီးပြန်လာသည့်အခါကျမှ ရေးမည် ကြံထားတာ ဖြစ်ပါ၏။ အနို့ ဇာတာသက်က ၁၂၀ ဆိုတော့ အသက် ၁၀၀ ပြည့်မှ မြန်မာပြည်ပြန်လာသည့်တိုင် နောက်ထပ် အနှစ် ၂၀ လောက် ညလေးနှင့် အသာနှပ်နေလို့ရသေးသည် မဟုတ်ပါလော။

 

သို့သော် အသက် ၁၀၀ မနေရ၊ အမှု ၁၀၀ တွေ့ရ ဆိုသည့်စကားအတိုင်း နောင် ဘာဖြစ်လာမည်ဆိုသည် မသိနိုင်သော ကြောင့်တကြောင်း၊ ရင်ထဲက ကျလိကျလိကို ဖွင့်အံမထုတ်လိုက်ရလျင် အိပ်စက်အနားယူခြင်းကို အနှောက်အယှက် ဖြစ်မည်စိုး၍တကြောင်း ရေးလိုက်ရခြင်း ဖြစ်ချေ၏။

 

ISO လက်မှတ်ကို အဘယ်သို့ယူသနည်း။

ယခင်ကလည်း ရေးခဲ့ဖူးပါပြီ။

အကျဉ်းရုံးရလျှင် Auditor များ၌ ISO လက်မှတ်အတွက် Audit checklist ကြီးသည်ရှိ၏။ ဒါ ရှိသလား၊ ဟိုဟာ လုပ်ပြီးပြီလား၊ ဟဝှာလုပ်ထားတဲ့ အထောက်အထားတွေ ရှိသလား စသဖြင့် ဖြစ်၏။ အသင်တို့သည် မိမိဘာသာ internal checklist ဖြင့် audit လုပ်နိုင်၏။ Checklist ကို လဂါးတော့မရပါ။ ISO အဖွဲ့ကြီး၌ $$ ပေး ဝယ်နိုင်၏။

 

3rd Party Audit ဆိုလျှင်တော့ သူတို့မှာ အဲဒီ tool ကြီးရှိပါသည်။ ကိုယ်ဝယ်စရာ မလိုပါ။ $$ ပေးလိုက်လျင် သူတို့ဘာသာ ကျုပ်ကျက်လိ သွားပါလိမ့်မည်။ ဟိုဟာရှိသလား။ ဟုတ်၊ ရှိပါသည်။ လက်မှတ်ထိုး။

ဒီဟာရှိသလား။ ဟုတ်၊ ရှိပါသည်။ လက်မှတ်ထိုး။ 

ဟိုဟာလုပ်ထားတဲ့ အထောက်အထား ရှိသလား။ အဟဲ အဲသဟာတော့ ဟို ဟို . . . ။ ဘာမှ ဟိုမနေနဲ့၊ ရော့ အဲဒီစာရွက်မှာ လက်မှတ်ထိုး။ ဟုတ်ဟုတ် ကျေးကျေးပါခည။

 

အဲသဟာနဲ့ လက်မှတ်ရရော။ တူနယ် တဲ့စ်နယ်

 

နေပါအုံး၊ သူများတွေ လျှောက်ပြောနေရအောင် မင်းကရော တကယ်လုပ်လို့လား။

 

ငင့် . . အဲလိုတော့ နောက်နဲ့လေဗျာ . . .

ကျော်လည်း လူထဲက လူပေကပဲ။ ဟဲဟဲ 

 

 

ကျေးဇူးတင်ပါသည်။

(ဘယ်သူ့မှ လျှောက်မပြောနဲ့နော။ ဖွဘုတ်မှာ ဖြန့်ချင်ဖြန့်၊ အဟိ)

 

အေးငြိမ်း

၅ မေလ၊ ၂၀၂၅