Shock Prevention Device (သို့) VRD အကြောင်း သိကောင်းစရာ

Arc Welding ဆိုသည်မှာ လျှပ်စစ် အဖိုစနှင့် အမစ နှစ်ခုတို့ကို ရှော့တိုက်ကာ အပူကိုထွက်စေလျက် သတ္တုကို အရည် ပျော်စေပြီး ဆက်တာဖြစ်၏။ Arc Welding ၌ ဂဟေဆော်သည့်အခါ ဂဟေသမားတို့သည် electrode holder (အီလက်ထရုတ် ညှပ်ထားသည့် လက်ကိုင်၊ ဂဟေချောင်းလက်ကိုင်) ကို ကိုင်ရ၏။ ထိုလက်ကိုင်မှာ ချော်အုပ်ထားသည့် ကြေးချောင်းကြီး ဖြစ်၏။ ဂဟေဆော်သည့်အခါ ဂဟေဆော်သူသည် လျှပ်စစ်စီးနေသည့် ထို ကြေးချောင်းကြီးကို ကိုင်ထားရတာ ဖြစ်၏။ လျှပ်စစ် အဖို၊ အမ ရှော့တိုက်ရာနေရာနှင့် ဂဟေဆော်သူမှာ လက်တကမ်းအကွာ၌သာ ရှိ၏။

 

ထို့ပြင်တဝ၊ ဂဟေဆော်ခြင်းဟူသည်မှာ တောက်လျှောက် တဆက်တည်းဆော်နေရခြင်း မဟုတ်မူ၍ ဂဟေဆော်လိုက်၊ ခဏ နားလိုက်၊ ဆက်ဆော်လိုက်၊ နားလိုက် လုပ်နေရတာ ဖြစ်၏။ ဂဟေဆော်နေစဉ် ခေတ္တနားချိန်၌ မည်သူမှ ဂဟေစက် ကြီးကို ပိတ်မထား။ သည်အတိုင်း ခဏ ချထားလိုက်တာသာ ဖြစ်၏။

 

ဤကဲ့သို့ ခဏနားချိန်၌ အကယ်၍သာ တဦးတယောက်သည် ဂဟေချောင်းလက်ကိုင်နှင့် Ground ချထားသည့် work piece (ဂဟေဆော်နေသည့် သံပြား) ကို မတော်တဆ တပြိုင်နက်တည်း ကိုင်လိုက်မိပြီ ဆိုပါစို့။ လျှပ်စီးသည် ထိုသူ၏ ခန္ဓာကိုယ်အတွင်း စီးဝင်သွားပြီး ဓာတ်လိုက်မည် ဖြစ်၏။ ထိုအချိန်၌ ဗို့အားသည် AC ဂဟေစက်ဖြစ်ပါက ဗို့အား ၈၀ ထိ ရှိနိုင်၏။ ဓာတ်လိုက်နိုင်၏။

 

ဤကဲ့သို့သော အခြေအနေ (ဂဟေဆော်သူသည် ဂဟေဆော်ခြင်းကို ခေတ္တရပ်နားထားချိန်) တစ်နည်းအားဖြင့် (ဂဟေ ဆော်မည့် သံပြား - work piece နှင့် ဂဟေချောင်း - electrode တို့ ထိတွေ့မနေချိန်) ကို လျှပ်စီးပတ်လမ်း အပွင့် (open circuit) ဟု ခေါ်၏။

 

လျှပ်စီးပတ်လမ်းအပွင့် အချိန်၌ ဓာတ်လိုက်မည့်အန္တရာယ်ကို ကာကွယ်ရန် shock preventer (သို့) Shock prevention device သို့မဟုတ် VRD (Voltage Reduction Device) က အကူအညီပေး၏။

 

စင်ကာပူ၌ VRD ကို ဂဟေစက်၌ တပ်ရန် WSH (Shipbuilding and Ship Reparing) Regulations; Reg. 54 (2) ၌ ပြဌာန်းထား၏။ VRD ကို AC ဂဟေစက်တိုင်း၌ တပ်ရမည်။ ကျွမ်းကျင်သူက ၆ လ တစ်ခါ စစ်ရမည်။

 

VRD သည် ဂဟေဆော်စက်တွင် သူ့ချည်းသီးသန့်လည်း ဖြစ်နေနိုင်၏။ သို့မဟုတ်ပါကလည်း ဂဟေစက်ထဲ၌ တွဲလျက် လည်း ရှိနေနိုင်၏။ ဂဟေဆော်မည့်သူသည် ဂဟေဆော်ရာ၌ VRD စက်ကို ဖွင့်ချင်လျင် ဖွင့်ထားနိုင်သလို၊ ပိတ်လိုက လည်း ပိတ်ထားနိုင်၏။

 

သို့ဆိုလျင် VRD က ဘာလုပ်ပေးသနည်း။

 

ဂဟေဆော်ခြင်းကို ရပ်နားထားချိန်၌ VRD က OCV (Open Circuit Voltage) ကို လျှော့ချပေး၏။ ဤနည်းဖြင့် ဂဟေ မဆော်သည့်အချိန်တွင် ဂဟေချောင်းလက်ကိုင်နှင့် ဂဟေသံပြားတို့ကို ထိမိ၍ ဓာတ်လိုက်ခြင်း အန္တရာယ်မှ လျှော့ချ ပေး၏။

 

ဂဟေပြန်ဆော်သည့်အချိန်တွင် VRD သည် အလိုအလျောက် ပြန်ပိတ်သွားပြီး ဂဟေဆော်ရန် လိုအပ်သည့် ဗို့အားကို အပြည့်ပြန်လည်ပေး၏။

VRD ကို DC lift နှင့် ခြစ်၍ဆွဲပြီး စ,ရသော scratch start TIG တို့အတွက်လည်း သုံး၏။ အဘယ်ကြောင့်ဆိုသော် ဂဟေဆော်သူက ခလုတ်ဖွင့်လိုက်သည်နှင့် တန်စတင်အီလက်ထရုတ်တွင် မီးဝင်လာသောကြောင့် ဖြစ်၏။ High- Frequency TIG စက်တို့အတွက်မူ VRD မလိုပါ။ အဘယ်ကြောင့်ဆိုသော် HF TIG စက်တွင် ဂဟေသမားက ခလုတ်ကို နှိပ်လိုက်မှသာ အီလက်ထရုတ်က စတင်အလုပ်လုပ်ပြီး ခလုတ်ကို လွှတ်လိုက်သည်နှင့် အလိုအလျောက် ပြန်ပိတ်သွား သောကြောင့် ဓာတ်လိုက်ရန် အခွင့်အလမ်း မရှိတော့သောကြောင့် ဖြစ်၏။

 

လျှပ်စီးပတ်လမ်းပွင့် ဗို့အား [Open Circuit Voltage (OCV)] ဟူသည် အဘယ်နည်း

 

OCV ဟူသည် ဂဟေစက်၏ အပေါင်းနှင့် အနှုတ် ငုတ်နှစ်ခုကြားရှိ ဗို့အား ဖြစ်၏။ တစ်နည်းအားဖြင့်လည်း (ဂဟေ ဆော်မည့် သံပြားကို မြေစိုက်ကြိုးနှင့် ဆက်ထားချိန် နှင့် ဂဟေစက်ဖွင့်ထားချိန်၌) ဂဟေချောင်းလက်ကိုင် နှင့် မြေစိုက်ကြိုးတို့အကြား ဗို့အားဖြစ်၏။

 

 OCV မြင့်လေ မီးပွားခတ်ရတာ လွယ်လေ ဖြစ်၏။ အထူးသဖြင့် မီးပွားခတ်ရန် ခက်ခဲသည့် E6010 နှင့် E7018 ကဲ့သို့သော ဂဟေချောင်းများအတွက် ဖြစ်၏။ သို့တိုင် OCV မြင့်လေ ဓာတ်လိုက်နိုင်သည့် အန္တရာယ်များလေ ဖြစ်ရကား ထုတ်လုပ်သူ တို့သည် ဓာတ်လိုက်မည့် အန္တရာယ်လည်း မများရလေအောင်၊ မီးပွားခတ်ရလည်း လွယ်အောင် OCV ကို အထူး ဂရုစိုက် ထားရလေ၏။

 

VRD ကို တီထွင်ထုတ်လုပ် တပ်ဆင်လိုက်ခြင်းဖြင့် ဤပြဿနာကို ရှင်းပြီး ဖြစ်လေ၏။ VRD မည်သို့အလုပ်လုပ်သနည်း ဟူမူ VRD သည် ခုခံမှုအားများ (high resistance) သည့်အခြေအနေတွင် OCV ကို လျှော့ချပေးပြီး ခုခံမှုအားနည်း (low resistance) အခြေအနေတွင် ဗို့အားကို ပြန်လည် မြင့်တက်လာစေ၏။

 

သို့ဆိုလျှင် ခုခံမှုအားများ (high resistance) ဟူသည် အဘယ်နည်း။ လူနှင့် လေတို့မှာ ကြေးချောင်းထက်စာလျင် ခုခံမှု အား ပိုမြင့်၏။ ကြေးချောင်းသည် လူ၊ လေတို့နှင့် နှိုင်းယှဉ်လိုက်လျှင် ခုခံမှုအား များစွာနည်းလှ၏။

 

 VRD ရှိသည်ဖြစ်စေ၊ မရှိသည်ဖြစ်စေ။ တစ်ဦးတစ်ယောက်သည် မည်သည့်အခါမှ ဂဟေချောင်းနှင့် ဂဟေဆော်မည့် သံပြားကို ကိုင်တွယ်စမ်းသပ်ခြင်းမျိုး မလုပ်ရ။ လျှပ်စစ်ကို ပေါ့လေးတဆ မလုပ်ရ။ သေတတ်သည်။

 

ကျေးဇူးတင်ပါသည်။

 

အေးငြိမ်း

၁၈ ဇွန်လ၊ ၂၀၂၆

အိမ်ထဲအထိ ဝင်လိမ်သော လူလိမ်အကြောင်း

ဤ ၂၁ ရာစုနှစ်ကို လူလိမ်ရာစုဟု ကင်ပွန်းတပ်ဘို့ ကောင်းလှ၏။ အဘယ်ကြောင့်ဆိုသော် ယခုအခါကာလတွင် ဤလောကကြီး၌ လူလိမ်များနှင့် ပြည့်နှက်လျက် ရှိသောကြောင့်တည်း။

 

မနေ့က (တနင်္ဂနွေနေ့) ကျွန်ုပ် စာသင်နေစဉ် သားက ဖုန်းခေါ်လာ၏။

 

‘ဖေရီး၊ တံခါးဝမှာ လူတစ်ယောက် ရောက်နေတယ်။ သားတို့အိမ်က ဓာတ်ငွေ့ပိုက်လိုင်း စစ်ချင်လို့တဲ့’

‘ငမ်၊ ဒါဖြင့် သူ့မှာ HDB ရဲ့ authorisation letter တောင်းလိုက်။ ပြီးတော့ သူ့ ID Batch ကိုပါ ဓာတ်ပုံရိုက် ပို့လိုက်၊​ တံခါး ဖွင့်မပေးနဲ့အုံး’

 

သူဓာတ်ပုံရိုက်ပို့လို့ ကြည့်လိုက်တော့ သူ့ဝန်ထမ်းကတ်နှင့် ကုမ္ပဏီတစ်ခုက အရောင်းကိုယ်စားလှယ်အဖြစ် ခန့်ထားသည့်စာကို တွေ့ရ၏။

 

‘ဟဲ့အကောင်၊​ မင်း ငါယင်းဂလစ်ရှ်လို ရှင်းရှင်းလင်းလင်း ပြောနေတာ နားမလည်ဘူးလား။ ငါတောင်းတာက HDB ရဲ့ authorisation letter ကွ။ မင်းကုမ္ပဏီကစာကို ငါကဘာလုပ်ရမှာတုံး။’

 

‘ဟုတ်စ်၊ ဒါကဒီလိုရှိပြီး ဟိုဟာက ဟိုလိုရှိပါတယ်ခညာ၊ ကျော်တို့က HDB တိုက်ခန်းတွေ မီးရေးထင်းရေး စိတ်ချရအောင် blah blah blah’

 

‘ကိုင်း၊ ကိုယ့်လူ၊ မင်း စစ်ချင်သပဆို စစ်။ ပြီးတော့ ဘာလုပ်ရမယ်ဆိုတာ အသေးစိတ် ငါ့ကိုပြောပြ။’

 

အတော်ကြာတော့ သားက ဖုန်းခေါ်ပြန်၏။ သူက ‘မင်းတို့မီးဖိုက အရမ်းအန္တရာယ်များတယ်။ ဓာတ်ငွေ့တွေ ယိုစိမ့်နေ တယ်’ ဆို၏။ ‘အလဲ့ကွယ်၊ မီးဖိုက ဓာတ်ငွေ့ယိုစိမ့်မှန်း မင်းက ဘယ်လိုသိသလဲ’ သူက မီးဖိုကိုဖွင့်ပြီး ဗီဒီယိုနှင့် ပြ၏။ ‘ဟောသမှာတွေ့လား၊ ဒီဘက်က မီးများနေပြီး ဒီဘက်က မီးနည်းနေတာ။ အဲဒါ ဓာတ်ငွေ့ယိုစိမ့်နေတဲ့ လက္ခဏာပဲ’

 

ကျွန်ုပ်လည်း ရီချင်ပက်ကျိရှိလှသည်နှင့် . . .

‘ဒီမယ်ကိုယ့်လူ၊ ငါ မင်းအမေမင်္ဂလာမဆောင်ခင်ကတည်းက အင်ဂျင်၂၀၀ ဘွဲ့ကို ရခဲ့တာကွ။ မင်း ဓာတ်ငွေ့မီးဖို အကြောင်း သိချင်သပဆို ငါအခု Woodlands Spectrum မှာရှိတယ်။ လာခဲ့၊ ငါသင်ပေးမယ်’

 

ကျွန်ုပ်ကို ပြောမရသည်နှင့် သူက သားကို ညာတာပါတေးနှင့် သွားပြောပြန်၏။ မင်းတို့မီးဖိုကို မပြင်ရင် အရမ်း စိုးရိမ်ရတယ်။ သူများတွေဆို ၃၀၀၀ ကျော်လောက် တောင်းမှာ။ ငါ မင်းတို့ကို ၁၂၀၀ နဲ့လုပ်ပေးမယ်။ blah blah blah . .

 

သူ့ကိုယ်သူ ကုဋေ ၁၆၀ သူဌေးသားထင်နေသူ ကျွန်ုပ်သားတော်မောင်က ပိုက်ဆံပေးချင်တာ လက်ယားနေ၏။

သူ့အမေက လက်မခံ။

ဟိုအကောင်က ကျွန်ုပ်ထံ ဖုန်းဆက်ပြန်၏။ အခု deposit ပေးပါ ဆိုပါလား။

 

‘ဟဲ့အကောင်၊ မင်းဟာ ဘာလုပ်မယ်မှန်းလည်းမသိ၊ ဘယ်လောက်ကုန်မှန်းလည်းမသိဘဲ ငါက deposit ပေးရအောင် မင်းက ငါ့မယားပါသားလား’

 

‘တကယ်လို့ ပိုက်ဆံချေမယ်ဆို ဘယ်လိုချေမလဲ’

‘တယ် ဒီခွေးမသားဟာ တယ်လဲ လက်ပေါက်ကပ်ပါကလား၊ ဟေ့ကောင် invoice ပေးတဲ့အခါ အဲဒီအထဲမှာ ပိုက်ဆံ ဘယ်လိုချေရမယ်ဆိုတဲ့ information အပြည့်အစုံပေးရတယ်ဆိုတာလောက်မှ မင်းနားမလည်ဘူးလား’

 

သို့နှင့် အမျိုးသမီးကို မီးဖိုပြင်ဘို့အတွက် deposit ၃၀၀ ပေးပါ။ Grab နဲ့ လွှဲပေးပါဟု တောင်းပြန်၏။

သားက ပေးချင်တာ လက်ယားနေပြီ။ မေရီး ပေးလိုက်။ ပေးလိုက်။

အမျိုးသမီးလုပ်သူက ဖုန်းဆက်ပြန်၏။ ကျွန်ုပ်လည်း သားကို ပိုက်ဆံ တစ်ပြားကမှ မပေးဘို့ တားရပြန်၏။

 

တော်ပါသေး၏။

ကျွန်ုပ်မဟေသီ၏ အကောင့်မှာ ဆွစ်ဇာလန်ဘဏ်ထက် စိတ်ချရသည်ဖြစ်ရကား ဟိုအကောင်မှာ ဘာမှ လုပ်လို့မရ။

(နင်မပြောနဲ့၊ နာတောင် ဘာမှလုပ်လို့မရလို့ လက်လျှော့ထားရတာ၊ အဟိ)

 

ကျွန်ုပ်လည်း စိတ်တိုလာသည်ဖြစ်၍ . . .

‘ဟေ့ကောင်၊ မင်းက ငါ့ကို အားအားလျားလျား၊ အယားလေးနဲ့ ဟန်းနီးမွန်းထွက်နေတာ မှတ်လို့လား။ ငါစာသင်နေတာ အနှောက်အယှက်ဖြစ်တယ်ကွ။ မင်းအခု ငါ့အိမ်က ထွက်ပါ။’

‘ဟိုလေ ဒါကဒီလိုရှိပြီး ဟိုဟာက ဟိုလိုရှိပါတယ်’

‘ဟေ့ကောင်၊ မင်းထွက်မလား မထွက်ဘူးလား၊ ငါ ရဲကိုခေါ်လိုက်ရမလား’

 

ထိုအခါကျမှ ပြူးပြူးပြာပြာနှင့် ထွက်သွား၏။ ဖိနပ်တောင် အိမ်ရှေ့မှာ မစီးရဲသည်နှင့် ဟို့ဘက်ရောက်မှ စီးလေသော ဟူ၏။

 

အိမ်ပြန်ရောက်မှ ကျွန်ုပ်က သားကို ဆုံးမရ၏။

 

‘ဒီမယ် သား၊ ဒီကမ္ဘာကြီးမှာ လူလိမ်တွေနဲ့ ပြည့်နေတယ်။ မင်း ဘယ်သူ့ကိုမှ မယုံလေနဲ့။ ဖေရီး အလိမ်ခံခဲ့ရတာတွေ သားကို အားလုံးပြောပြခဲ့ပြီးပြီ။ သားအလှည့်မှာ အလိမ်မခံရစေနဲ့။ အဲဒီကောင်ပြတဲ့ မီးဖို မီးမညီတာက gas diffuser က အပေါက်ကလေးတချို့ ပိတ်နေလို့ကွ၊ အဲဒီအပေါက်ကလေးတွေကို အပ်ကလေးနဲ့ သေသေချာချာ ဖွင့်ပေးလိုက်ရင် ပြီးတယ်။ ဖေရီး ကောင်းကောင်းလုပ်တတ်တယ်။ တစ်ပတ်ကို ၇ ရက်စလုံး အလုပ်လုပ်နေရလို့ ဘယ်လိုမှ မအားလို့ မလုပ်ဖြစ်တာ။ သားအမေ ဒီမီးဖိုတစ်ခုလုံးလဲတာမှ ၇၅၀ ပဲ ပေးရတယ်။ လဲပြီးတာ ၅ နှစ်တောင် မပြည့်သေးဘူး။ တကယ်လို့ သူပြောသလို ဓာတ်ငွေ့ယိုစိမ့်နေတယ်ဆိုရင် အနံ့ ရရမှာပေါ့ကွ။ အခု သား ဘာနံ့ရသလဲ။ blah blah blah . . .’

ဖူး ပြောရတာ မောထှာ။ ယခွမ်းဒဲ့မှ

 

မိတ်ဆွေများခင်ဗျား -

ဤဒွန္နယာကြီး၌ လူလိမ်များဖြင့် ပြည့်နှက်လျက် ရှိသည်ဖြစ်ရကား အသင်တို့သည် အလိမ်မခံရစေရန် ကြပ်ကြပ် သတိပြုကြပါဟု သတိပေးလိုက်ရပါကြောင်း . . .

 

လူအချင်းချင်း လိမ်လည်ခြင်း၊ ကင်းရှင်းကြပါစေ။

 

ကျေးဇူးတင်ပါသည်။

 

အေးငြိမ်း

၁၅ ဇွန်လ၊ ၂၀၂၆

ဂဟေ သီအိုရီနှင့် လက်တွေ့

“ကိုအေးငြိမ်း - ဟိုမှာ ကုလားဆိုင် အသစ်တစ်ခုဖွင့်ထားတယ်။ လာဗျာ လက်ဖက်ရည် သွားသောက်ရအောင်”

 

မနေ့က ကိုပီတာနှင့်တွေ့တော့ သူ လက်ဖက်ရည်သောက် ခေါ်သည်နှင့် လိုက်သွား၏။ ဆိုင်က ခုမှ အသစ်။ ဖွင့်တာ မကြာသေး။ ကျွန်ုပ်တို့ ကျောင်းဘေးနား ကပ်လျက်။

 

လက်ဖက်ရည်သောက်ရင်း ဂဟေဆော်တာနှင့် ပတ်သက်၍ သူ့ကို မေးရ၏။ သူက နှစ်အတန်ကြာ ဂဟေဆော်လာခဲ့သူ ဖြစ်၏။ ဝါသနာအရ လေ့လာလိုက်စားခဲ့သောကြောင့် ကျွန်ုပ်သည် ဂဟေနှင့်ပတ်သက်၍ စာတွေ့ဗဟုသုတ အနည်း အကျဉ်း ရှိပါ၏။ လက်တွေ့အရမူ သူများတွေ ဆော်နေတာသာ တွေ့ဖူးသည်။ ကိုယ်ကိုယ်တိုင် တစ်ခါမှ မဆော်ခဲ့စဖူး။

 

ပထမတစ်ခုက သူတို့ အမ်ပီယာကို ဘယ်လိုချိန်သလဲဆိုတာ သိချင်၏။ ဘယ်ဂဟေ၊ သံပြားအထူဘယ်လောက်ဆိုရင် အမ်ပီယာဘယ်လောက် ထားရသည်ကို စာအုပ်များထဲ၌ ဇယားများဖြင့် ဖော်ပြထားတာ ဖတ်ဖူးပါ၏။ သို့သော် တကယ့် လက်တွေ့မှာ သူတို့ အဲသလို စာအုပ်ကြီးထဲမှာ ပြထားတဲ့အတိုင်း အတိအကျ လိုက်နာပါသလား။

 

နောက်တစ်ခုက Shock Prevention Device ကို ကျွန်ုပ် သိပ်မရှင်းပါ။ Ever Safe ၏ Experiential Learning Station တွင် ဂဟေဆော်စက်နှစ်လုံး ယှဉ်ပြထား၏။ တစ်လုံးက without Shock Preventor, နောက်တစ်လုံးက with Shock Preventor. Without Shock Preventor ဂဟေစက်တွင် ဗို့အား ၉၀ လောက်ပြထားပြီး with Shock Preventor ဂဟေစက်တွင် ဗို့အားကို ၁၀ လောက်ပြထား၏။ ဤသည်မှာ မှန်ပါရဲ့လား။ 10V နှင့် သတ္တုကို အရည်ပျော်အောင် ဆော်နိုင်ပါမည်လား။ ဤတွင် ပြထားသည့် 10V ဆိုသည်မှာ မည်သည့်နေရာက 10V ပါနည်း။ ဂဟေချောင်းကို ကိုက်သည့် electrode holder မှ ဗို့အားလား။ ဤသည်ကို ကျွန်ုပ် မရှင်း။

 

နောက်တစ်ခု ကျွန်ုပ်သိချင်သည်မှာ ဂဟေဆော်သူများ ကြုံတွေ့ရသည့် ပြဿနာများ ဖြစ်၏။

 

ဤတွင် ကိုပီတာပြောပြတာကို ကျွန်ုပ်က ပြန်လည် ဖောက်သည်ချလိုက်ပါ၏။ ကျွန်ုပ်တို့မှာ တီးတိုင်း ခဏတဖြုတ် လာရတာဖြစ်၍ သိပ်အချိန်မရ။ သူပြောသလောက် ပြန်ရေးပြပါမည်။

 

အမ်ပီယာချိန်တာက လုပ်ငန်းအတွေ့အကြုံပေါ် အများကြီးမူတည်တယ် ကိုအေးငြိမ်းရဲ့။

သံပြားအလိုက်၊ အီလက်ထရုတ် အရွယ်အလိုက် သတ်မှတ်ထားတဲ့ အမ်ပီယာရှိတယ်။ ဒါပေမယ့် အဲဒါကို အသေယူလို့ မရဘူး။ မီးက အခြေအနေအများကြီးပေါ် မူတည်နေတယ်။

 

ဥပမာ ဆိုကြပါစို့။

ဝပ်ရှော့ထဲမှာ ကိုယ်တစ်ယောက်တည်း ဂဟေဆော်နေတယ်ဆိုပါတော့။ မီးကို အရမ်းတင်စရာမလိုဘူး။ ဗို့အားအပြည့် ရနေလို့ သတ်မှတ်ထားတဲ့ အမ်ပီယာထက် နည်းနည်းတောင် လျှော့လို့ရသေးတယ်။ ဥပမာ - သတ်မှတ်ထားတာက 75A ဆိုပါတော့။ 74A လောက် လျှော့ချလို့ရတယ်။

 

ဒါပေမယ့် ဝပ်ရှော့ထဲမှာ ဂဟေဆော်နေတာ ၄ - ၅ ယောက်လောက် ဖြစ်လာပြီဆိုရင်တော့ ဗို့အားကျလာတယ်။ အဲလေ၊ အများကြီးတော့ မကျဘူးပေါ့။ ဒါပေမယ့် တစ်ချိန်ထဲမှာ တပြိုင်နက်ဆော်လိုက်ရင် ကျသွားတယ်။ အဲဒီအတွက် မီးကို တင်ပေးရတယ်။ အဲဒီအတွက် ဂဟေဆော်တော့မယ်ဆို ကိုယ်နဲ့တချိန်တည်း ဂဟေဆော်တဲ့သူ ဘယ်နှစ်ယောက်ရှိသလဲ ဆိုတာ ကြည့်ရတယ်။ ရမ်းဆော်လိုက်ရင် ဂဟေသား ပျက်သွားတတ်တယ်။

 

ဒါက အခြေအနေတစ်ရပ်။

 

နောက်တစ်ခုက ဂဟေဆော်စက်။

ဂဟေဆော်စက်တွေကလည်း အမျိုးတူ၊ မော်ဒယ်တူတဲ့တိုင်အောင် တကယ် ဂဟေဆော်တဲ့ အခါကျတော့ မီးပေးရတာ ချင်း မတူဘူးဗျ။ တချို့စက်တွေက ပုံမှန်ရတယ်။ တချို့စက်တွေကျတော့ နည်းနည်း ပိုပေးရတာ၊ နည်းနည်း လျှော့ပေး ရတာတွေ ရှိတယ်။

 

ဆိုတော့ နေ့တိုင်း ဂဟေဆော်နေတဲ့သူဆို ကိုယ်သုံးနေကျ ဂဟေစက်ကို မှတ်ထားရတယ်။ တကယ်လို့ ကိုယ့်စက်ကို နောက်တစ်ယောက် ယူသွားလို့ စက်ပြောင်းဆော်ရပြီဆို သတိထားရတယ်။ အဲဒီအခါ တကယ်လို့ ဝပ်ရှော့မှာ ဂဟေစက် ၃ လုံးရှိတယ်ဆိုပါတော့။ ဘယ်စက်တော့ အမ်ပီယာ ဘယ်လောက် ထားရတယ်။ ဘယ်စက်ကတော့ ဘယ်လောက်မှ ရတယ်ဆိုတာ ကျွန်တော်ကတော့ စာအုပ်လေးထဲမှာ တေးပြီးမှတ်ထားတယ်။ အဲလိုလုပ်ထားမှ ဘယ်စက်ကို သုံးရင် အမ်ပီယာဘယ်လောက်ချိန်ရမယ်ဆိုတာ သိမှာ။ မဟုတ်လို့ တစ်ခါဆော်တိုင်း တစ်ခါစမ်းနေရရင် ဘယ် အလုပ်ဖြစ်တော့ မတုံးဗျာ။

 

ဒါက ဂဟေဆော်စက်။

 

နောက်တစ်ခုက ကိုယ်ဂဟေဆော်မယ့် သံပြား။

WPS (Welding Procedure Specification) ထဲမှာ သံပြားအထူ ဘယ်လောက်ဆိုရင် ဘယ်ဂဟေချောင်းကို သုံးရမယ်။ အမ်ပီယာဘယ်လောက် ထားရမယ်။ အကုန်ဖော်ပြထားတယ်။ ဒါကလည်း ယေဘူယျအားဖြင့်ပဲ။ သံပြားချင်း အတူတူ တောင်မှ ဟိုသံပြားနဲ့ ဒီသံပြား နည်းနည်းကွာသွားတတ်သေးတယ်။ (material composition လို့ ခေါ်မယ်ထင်တယ်။) ဟုတ်တယ်၊ သတ္တုမှာပါတဲ့ အရောတွေပေါ်မူတည်ပြီး ကွာတတ်တယ်။

 

တကယ်လို့ အလူမီနီယမ်ကို ဆော်မယ်ဆိုရင် အလူမီနီယမ်က သူ့ချည်းမဟုတ်ဘူး။ သူ့အပေါ်မှာ coating တလွှာ ရှိသေး တယ်။ အဲဒီ coating ကို အရည်ဖျော်ဘို့က အလူမီနီယမ်လိုတဲ့အပူထက် ပိုများတယ်။ ဆိုတော့ အဲဒါကို မသိဘဲ ဒီအတိုင်း သာဆော်လို့ကတော့ အထဲက အလူမီနီယမ်အသားတွေကို စားသွားတတ်တယ်။ ဆိုတော့ အလူမီနီယမ်ကို ဂဟေ မဆော်ခင် အဲဒီအပေါ်လွှာကို sand paper (ကော်ပတ်) နဲ့ စားပစ်ရတယ်။ ဒါမှ အလူမီနီယမ်သီးသီးကို ဂဟေဆော်လို့ ရမှာ။ မဟုတ်ဘူးဗျ။ Grinding တိုက်တာ မဟုတ်ဘူး။ Sand paper disc ရှိတယ်။ အဲဒါနဲ့ စားပစ်ရတာ။

 

ဂဟေဆော်တာ မီးများသွားရင် undercut ဖြစ်တတ်တယ်။ မီးနည်းရင်တော့ ဂဟေချောင်း ကောင်းကောင်းအရည် မပျော်ဘဲ အချောင်းလိုက်လိုမျိုး လိုက်လာတတ်တယ်။ မီးမှန်နေရင် ဂဟေဆော်တဲ့အခါ ဂဟေသားအရည်လေးက ကိုယ်ဆွဲတဲ့နောက် လှလှပပလေး လိုက်လာတယ်။ သတ္တုနှုတ်ခမ်းကို အဲဒီဂဟေသားလေးနဲ့ ဖုံးသွားတယ်။ ဟော - ဆော်ပြီးသွားရင် ဂဟေသားလေးကလည်း လှလို့။ ဆော်တဲ့သူကလည်း စိတ်ကျေနပ်လို့။

 

ဆိုတော့ ဂဟေဆော်တာမှာ ဂဟေသားကောင်းရဘို့ အရမ်းသတိထားရတယ်။

ကျွန်တော်ကတော့ ဂဟေမဆော်ခင် အစမ်းဆော်ကြည့်တယ်။

ဆိုကြပါစို့ဗျာ။ တိုင်ကီအကြီးကြီးကို ဆော်တော့မယ်ဆိုပါစို့။

တိုင်ကီကို တကယ်မဆော်ခင် အဲဒီတိုင်ကီရဲ့ သံပြားနဲ့ အလားသဏ္ဍာန်တူတဲ့ သံပြားကို အမှိုက်ပုံးထဲက ကောက်ပြီး ကိုယ်သုံးမယ့် ဂဟေစက်၊ တကယ်ဆော်မယ့် ဂဟေချောင်းတွေသုံးပြီး မီးအနည်းအများ အရင်ချိန် ဆော်ကြည့်ရတယ်။ ကိုယ့်စိတ်ကြိုက် ဂဟေသား ရပြီဆိုမှ တိုင်ကီကိုဆော်ရတယ်။ မဟုတ်လို့ ဒီအတိုင်း တိုင်ကီကြီးကို ကောက်ဆော်ထည့် လိုက်လို့ မီးနည်းတာ များတာတွေ ဖြစ်သွားရင် သေရော။

 

ဂဟေဆော်တဲ့အခါ သံပြားသန့်ဘို့ကလည်း အင်မတန် အရေးကြီးတယ်။ သံပြားမှာ တခြား ချေးညှော်တွေ သံချေး အစအနတွေ လုံးဝ ကပ်မနေရဘူး။ လုံးဝ သန့်စင်နေရတယ်။ မဟုတ်ရင်၊ ဂဟေသားကို သွားထိတတ်တယ်။

 

သူက ကျွန်ုပ်ဘို့ မဆာလာတီး မှာပေး၏။ သူ့မဆလာတီးမှာ သောက်ကယိုးနည်းချိုသဖြင့် ကျွန်ုပ် မသောက်နိုင်။ ဆီးချို ဖြစ်ပါပြီဆိုကတည်းက ကျွန်ုပ်က သကြား၊ အချိုများကို ရှောင်လာတာဖြစ်၍ ကုလားလဖက်ရည်နှင့် တွေ့သောအခါ မူးမေ့သွားမတတ် ဖြစ်မိလေသော ဟူ၏။ သို့နှင့် အားတော့နာပါရဲ့ . . . တစ်ဝက်လောက်သောက်ပြီး ပစ်လိုက်ရလေ၏။

 

အချိန်လည်း ကျော်နေပြီဖြစ်၍ နောက်တော့ ဆက်ကြသေးတာပေါ့ဗျာ ဆိုပြီး ကျွန်ုပ်တို့မှာ စကားတပြောပြောနှင့် ပြန်ခဲ့ကြလေသတည်းစ်။

 

VRD (Voltage Reduction Device) အကြောင်း ဆောင်းပါးသီးသန့် ရေးပါမည်။

 

ကျေးဇူးတင်ပါသည်။

 

အေးငြိမ်း

၁၄ ဇွန်လ၊ ၂၀၂၆

သေခြင်းအနုပညာ

မြေဝသုန်ရေ

ဂုဏ်ပြုအပ်တဲ့ ဧည့်သည်တစ်ယောက်ကို

ဆီးကြိုပေတော့ . . . .

 

ဗန်းမော်တင်အောင် သေဆုံးသည့်အခါ မြသန်းတင့်က ‘မုန်တိုင်းထဲကလူ’ ဆိုပြီး အက်ဆေးရေး၏။

ကျွန်ုပ်သည် ဆရာမြ၏ အက်ဆေးများကို နှစ်သက်စွာဖတ်ရှုလေ့ရှိရာ ဤအက်ဆေးသည်လည်း အလွန်ကောင်းသည့် အက်ဆေးတစ်ပုဒ် ဖြစ်၏။

 

သတ္တဝါမှန်က မွေးလာလျင် သေရမှာချည်း ဖြစ်၏။

သိပ္ပံပညာရှင်တို့က မသေဆေးကို ရှာဖွေကြ၏။ အိုမင်းရင့်ရော်ခြင်းကို တားဆီးနိုင်မည့် နည်းလမ်းများကို ရှာဖွေကြ၏။

သို့သော် ကျွန်ုပ်ကတော့ အနှီသိပ္ပံပညာရှင်များ၏ အယူအဆထက် ဗုဒ္ဓ၏ အယူအဆကို ပိုကြိုက်၏။

 

မြတ်ဗုဒ္ဓက မွေးလာလျင် သေကိုသေရမည်။ မည်သူမှ တားလို့မရ။ ဤသည်မှာ သဘာဝဖြစ်၏။ သဘာဝကို လွန်ဆန်ဘို့ သူ မကြိုးစား။

 

ဗုဒ္ဓ၏ အယူအဆမှာ မွေးလာလျင် သေရမည်။ မမွေးလျင် မသေရ။ သို့အတွက် မမွေးအောင် လုပ်ကြရမည်။ မမွေးအောင် ဘယ်လိုလုပ်မည်နည်း။

 

နောက်ထပ် တဖန် ဘဝအသစ်ဖြစ်လာမည့် အကြောင်းများကို ဖြစ်နိုင်သည့် နည်းလမ်းပေါင်းစုံသုံးကာ ဖြတ်တောက် ပစ်ရမည်။ အဘယ်ကြောင့် ဘဝသစ် ဖြစ်ကြရသနည်း။ အကြောင်းရှိလျင် အကျိုးရှိရမည်။ ထိုအကျိုးကို သတ်ပစ်နိုင်လျင် နောက်ထပ် ဘဝတဖန် မဖြစ်တော့။ ဘဝမဖြစ်တော့လျင် သေဘို့အကြောင်းလည်း မရှိတော့။

 

ကျွန်ုပ်ရေးသည့် ဤစာ၏ ရည်ရွယ်ချက်မှာ ဘဝသစ်တဖန် မဖြစ်အောင် ဘယ်လိုလုပ်ကြမည်နည်းဟု သင်ပေးဘို့ မဟုတ်။ ဘဝသစ်တဖန် မဖြစ်အောင် ဘယ်လိုလုပ်ကြမည် ဆိုသည့်အကြောင်းများကို မြတ်စွာဘုရားဟောထားသည့် တရားများ ထောင်သောင်းမက ရှိ၏။

 

ဤစာကို ကျွန်ုပ်ရေးရခြင်းမှာ ကျွန်ုပ်လည်း သေရမည်။ သင်တို့လည်း သေရမည်။ အားလုံး တစ်နေ့ကျ သေကြရမည့် သူချည်းဖြစ်၏။ သို့ဆိုလျင် ဘယ်လိုသေမည်နည်း။ ဒါ အရေးကြီး၏။

 

လူတစ်ယောက် ဘယ်လိုလူစားမျိုးဖြစ်သည်ဆိုခြင်းကို ထိုသူ အသက်ရှင်နေစဉ်ကထက် ထိုသူ သေဆုံးသွားသည့်အခါ ကျမှ ပိုမိုသိရှိကြရ၏။ ဘယ်လိုသိကြရသနည်း။ လူအများ၏ တုံ့ပြန်ပုံနှင့် အကဲဖြတ်လို့ရ၏။

 

ဗိုလ်ချုပ်တို့ လုပ်ကြံခံရစဉ်က လှည်းနေလှေအောင်း၊ မြင်းဇောင်းမကျန် တစ်တိုင်းပြည်လုံး ယူကျုံးမရ၊ အပူလုံးကြွခဲ့ ကြ၏။ ဗိုလ်ချုပ်သည် အသက် ၃၀ ကျော်ကလေး၊ လူရွယ်ဘဝ၊ ထက်တုံးမြက်တုံး၊ သန်တုန်းမြန်တုန်း၊ တိုင်းပြည် အတွက် အလုပ်လုပ်လို့ကောင်းတုန်း အချိန်၌ လုပ်ကြံခံခဲ့ရတာ ဖြစ်၏။ ဗိုလ်ချုပ် တိုင်းပြည်အတွက် လုပ်ခဲ့ရတာ ဆယ်နှစ်လောက်သာ ရှိပါသည်။ သို့နှင့်များတောင် တစ်နိုင်ငံလုံးက အဘယ်ကြောင့် ယူကျုံးမရ၊​ မျက်ရည်မဆည်နိုင် ဖြစ်ခဲ့ကြရပါသနည်း။

 

ဦးနေဝင်း သေဆုံးစဉ်အခါက မည်သူတစ်ဦးတစ်ယောက်များ ပူဆွေးဝမ်းနည်းနေတာ တွေ့ဖူးပါသနည်း။ ဝမ်းမနည်း သည့်အပြင် အေဘေး၊ ခုမှသေရသလားဟု ကျိန်ဆဲတောင် နေလိုက်ကြပေသေး၏။ မသာတောင် ပေါ်ပေါ်ထင်ထင် မချရဲ။ အမှန်ဆို ဦးနေဝင်းသည်လည်း တိုင်းပြည်အတွက် နှစ်ပေါင်းအတော်ကြာအောင် လုပ်သွားခဲ့တာ ဖြစ်၏။ သို့တိုင် ဦးနေဝင်းသည် ဘယ့်အတွက် ဗမာပြည်သူလူထု၏ မေတ္တာကို မရခဲ့ပါသနည်း။ (ကျွန်ုပ်ဆိုလျင် ယခုတိုင် နေဝင်းဆိုသည့် အသံကြားရလျင် ရောက်သည့်အရပ်ကနေ ဖနောင့်နှင့် ပြေး ပြေး ပေါက်လိုက်ချင်စိတ် ရှိတုံးဖြစ်၏။)

 

မြန်မာပြည်တွင် ၎င်းတို့ သေဆုံးသွားသည့်အတွက် ကြီးစွာသော ဆုံးရှုံးမှုကြီးဖြစ်ပြီး ဝမ်းနည်း တ,သ ပူဆွေးရသူများ ရှိသကဲ့သို့ ၎င်းတို့သေဆုံးခြင်းသည် တိုင်းပြည်အတွက် ကောင်းခြင်းမင်္ဂလာဖြစ်ပြီး လူအများ ဝမ်းပမ်းတသာ ဖြစ်ကြရ သူများလည်း မနည်းလှပါပေ။ ထိုသူများသည်ကား လောကအမှိုက်များသာတည်း။

 

သေတာ ဘာမှ မဆန်းပါ။

သို့သော် အဘယ်ကဲ့သို့ သေမည်နည်း။

လူအများ တမ်းတပူဆွေးရသည့်သူအဖြစ်၊ နှမြောတသ နေရမည့်သူအဖြစ် သေမည်လား။

မြေနိုး၊ သေတာကောင်းတယ် ဟု ဝိုင်းပြီး မေတ္တာ အပို့ခံ သေမည်လား။

 

အသင်သည် လူပီသသူဖြစ်အံ့။ လူအများအကျိုး၊ တိုင်းပြည် ကောင်းရာကောင်းကျိုးကို မိမိတတ်နိုင်သမျှ သယ်ပိုး ထမ်းရွက်ခဲ့သူ ဖြစ်အံ့။

သင်သေသွားပြီး နှစ်များစွာ ကြာသည့်တိုင် လူအများ၏ နှုတ်ဖျားတွင် တသသနှင့် စွဲကျန်နေခဲ့မှာ သေချာပါသည်။

သင် ဘယ်လိုလူမျိုးဖြစ်သည်ကို ကိုယ့်ဘာသာ ပြဌာန်းလို့မရ။ ပြည်သူများက ဝိုင်းဝန်း သတ်မှတ်ပေးတာ ဖြစ်၏။

 

ငါ ဘာဖြစ်ချင်တယ်ဆိုတာ ပါးစပ်နှင့် ပြောနေလို့ ရတာမျိုးမဟုတ်။

တကယ့် ရင်ထဲအသည်းထဲက စေတနာအရင်းခံနှင့် မိမိတတ်နိုင်သလောက် နှုတ်ဖြင့်ဖြစ်စေ၊​ လက်ဖြင့်ဖြစ်စေ အများပြည်သူ အကျိုးကို သယ်ပိုးထမ်းရွက်နိုင်ဘို့သာ လို၏။

 

ကုသိုလ်လိုချင်လို့ အလှူလုပ်တာမျိုး၊ နာမည်လိုချင်လို့ သူတပါးကိုကူတာမျိုးတော့ မလုပ်ပါနှင့်ဟု အလေးအနက် တိုက်တွန်းလိုပါ၏။ ပိုက်ဆံကုန်တာသာနှင့် မောတာသာ အဖတ်တင်ပါလိမ့်မည်။

သင်ဘာလုပ်နေတယ်ဆိုတာ၊ သင်ဘယ်လိုလူမျိုးဖြစ်တယ်ဆိုကို ညာဝါဖြီးဖြန်းလို့မရ။ ပြည်သူများကား သင့်ထက် ပါးသေးသည်။

 

သင်၏ စေတနာအရင်းခံနှင့် လုပ်ကိုင်ဆောင်ရွက်နေသမျှသည် အသေဖြောင့်ဘို့အတွက် ပြင်ဆင်နေခြင်းဖြစ်ကြောင်း သိပါလေ။ သင်သာ တကယ် ကောင်းတာတွေလုပ်နေတာ မှန်လျင် သေမှာကို နည်းနည်းမှ ကြောက်စရာမလို။ ကောင်းတာလုပ်ပြီး သေသူသည် ဘယ်အခါမှ ဇောက်ထိုးမျိုးမျှော် ကျစရာ အကြောင်းမရှိ။ ဘယ်ဘုံရောက်ပါစေ ဆုတောင်းနေစရာ မလို။ အသင်သည် လက်ရှိဘုံဘဝထက် ကောင်းသည့်ဘုံကို ရောက်မှာဖြစ်သဖြင့် အသင်၏ ဆွေမျိုး သင်္ဂဟများအနေနှင့်လည်း အထွေအထူး ပူပန်နေစရာ အကြောင်းကို မရှိ။

 

အဲသဟာသည် သေခြင်းအနုပညာပင် ဖြစ်ပါသတည်း။

 

အချုပ်ပြောရလျင် ကိုယ်ဘာလုပ်နေသည်ကို ကိုယ့်ဘာသာကိုယ် သိပါစေ။

 

အခု ဤစာကို ဖတ်နေသူ အသင်မိတ်ဆွေသည်လည်း ဘယ်ကဲ့သို့သော သေနည်းဖြင့် သေချင်ပါသနည်း။

ဤသည်မှာ အခြားသူအပေါ် မူမတည်။ အသင်ကိုယ်တိုင်၏ လုပ်ဆောင်ချက်အပေါ်မှာသာ မူတည်နေကြောင်း။

 

အသေဖြောင့်သူများ ဖြစ်ကြပါစေကုန်သတည်း။

 

ကျေးဇူးတင်ပါသည်။

 

အေးငြိမ်း

၄ ဇွန်လ၊ ၂၀၂၆

စိတ္တရလေခါ၊ ဘိန်းစားရေချမ်း၊ ဆဲတတ်သူများနှင့် တညနေ နှင့် American Sniper

၁။ သရက်နှင့်အိုး၊ ကြွက်နှင့်မိုး

 

ပုဂ္ဂလပညတ်ပါဠိတော်လာ လူ (၄) မျိုးကို ရှင်မဟာရဌသာရက သရက်နှင့်အိုး၊ ကြွက်နှင့်မိုး ဟု ပြဆို၏။

၁။ ပြောလည်းမပြော၊ လုပ်လည်းမလုပ်သူ (သို့) အဆင်းလည်းမရှိ၊ အချင်းလည်းမရှိသူ

၂။ ပြောတော့ပြောပါရဲ့၊ လက်တွေ့မလုပ်သူ (သို့) အဆင်းသာရှိပြီး အချင်းမရှိသူ

၃။ လုပ်တော့လုပ်ပြီး မပြောသူ (သို့) အချင်းရှိပြီး အဆင်းမရှိသူ

၄။ ပြောလည်းပြောပြီး လုပ်လည်းလုပ်သူ (သို့) အဆင်းလည်းရှိပြီး အချင်းလည်းရှိသူ

 

“စိတ္တရလေခါ”၊ “ဘိန်းစားရေချမ်း”၊ “ဆဲတတ်သူများနှင့် တညနေ” တို့တွင် လူနှစ်မျိုးနှစ်စား၊ “American Sniper” တွင် လူသုံးမျိုးသုံးစား အကြောင်း ဖော်ပြထား၏။ ဘီအီးဒီအောင်သိုက်ကတော့ ပန်းမြိုင်လယ်က ဥယျာဉ်မှူးတွင် လူ့၊ လူ၊ လူး၊ လူ့ထက်လူ ဟု လူ (၄) မျိုး ရှိသည်ဆို၏။ ကျော်ဟိန်းက ကွမ်းသွေးကို ဗျစ်ခနဲထွေးကာ ‘ဒါဖြင့် ခင်ဗျားကရော လူ့လား၊ လူလား၊ လူးလား လို့ သူ့ကိုပြန်မေးတော့ ငါကတော့ ‘လွတ်’၊ ဘယ်ထဲမှ မချိတ်မိဘဲ လွတ်နေတာ ဟု ဖြေလေ၏။

 

ဤဒွန္နယာကြီးရှိလူများကို အတန်းအစားခွဲလိုက်လျင် အကြမ်းဖျဉ်းအားဖြင့် လူကောင်းနှင့် လူဆိုးဟု နှစ်မျိုးရနိုင်ပါသည်။ သို့သော် ကောင်းသည်လည်းမဟုတ်၊ မကောင်းသည်လည်းမဟုတ်သော လူတန်းစားလည်း ရှိ၏။ ကောင်းလည်း မကောင်း၊ ဆိုးလည်းမဆိုးသည့်တိုင် ဘာတစ်ခုမှ သုံးလို့စားလို့မရသော လူတန်းစားသည်လည်း သီးသန့်ရှိသေး၏။ ထို့ကြောင့် လူတန်းစား (၄) မျိုးလောက်ရှိသည်ဟု ဆိုလျင် မှားမည်မထင်ပါ။

 

၂။ စိတ္တရလေခါ

 

ကျွန်ုပ် ပါရဂူဘာသာပြန် စိတ္တရလေခါကို စဖတ်သည်မှာ လပေါင်းအတော်ကြာသွားပြီ။ နောက် ဘာကိစ္စတွေ များမှန်း မသိ။ တဝက်လောက် ဖတ်ပြီး ဆက်မဖတ်ဖြစ်။ အခုမှ ဆက်ဖြစ်သည်။ အခု ပြန်ဖတ်တော့ ယခင်နေရာမှမဟုတ်ဘဲ အစကပင် ပြန်ဖတ်ပါသည်။ နှစ်ထပ်ရှိမှ မှတ်မိမှာကိုး။

 

စိတ္တရလေခါက ‘မကောင်းမှုဆိုတာဘာလဲ’ ဟု မေးခွန်းထုတ်ကာ မကောင်းမှုဟူသည် မည်သည့်အရာဖြစ်သနည်း ဆိုသည်ကို စူးစမ်းထား၏။

 

သို့တိုင် ဝတ္ထုရေးဆရာ ‘ဘဂဝတီ ကျရန်ဗရမာ’ ၏ နောက်ဆုံးကောက်ချက်ကိုမူ ကျွန်ုပ်မကြိုက်ပါ။ သဘောမတူပါ။

ဝတ္ထုရေးဆရာက ‘မကောင်းမှုဆိုတာ လူ့အမြင် တဦးနဲ့တဦး မတူခြင်းရဲ့ အခြားအမည်နာမ ဝေါဟာရ စကားလုံးမျှသာ ဖြစ်တယ်။​ လူတိုင်းဟာ ဘဝဇာတ်ခုံပေါ်မှာ ကိုယ်ကျရာအခန်းကဏ္ဍကနေ ကပြ အသုံးတော်ခံနေကြရတာသာ ဖြစ်ပြီး ကောင်းမှု၊ မကောင်းမှုဆိုတာ မရှိနိုင်။ အဲဒါ မင်းတို့လက်ခံချင်ခံ။ လက်မခံချင်နေ။ ငါကတော့ မင်းတို့ကို လက်ခံပါလို့ အတင်းမတိုက်တွန်းချင်ဘူး။’ ဟု ဖော်ပြထား၏။

 

ဝတ္ထု၌ ရသေ့ကြီးက တပည့်နှစ်ဦးကို လူနှစ်ဦးထံပို့ပြီး မကောင်းမှုကို ရှာဖွေခိုင်း၏။ တစ်ဦးမှာ ကာမဂုဏ်အာရုံတို့နှင့်သာ အချိန်ဖြုန်းနေသည့် ဗီဇဂုတ္တဖြစ်ပြီး နောက်ဆုံး၌ မိမိနှင့် မည်သို့မှမသက်ဆိုင်သူ တပည့် (သေတံက) အတွက် အားလုံးကို စွန့်လွှတ်ကာ အနစ်နာခံသွားခဲ့၏။ အခြားတဦးမှာ တရားအားထုတ်မှု၌သာ မွေ့လျော်နေသော ကုမာရဂီရိ ဖြစ်ပြီး မိန်းမချောတစ်ဦး (စိတ္တရလေခါ) နှင့်တွေ့ကာ ပျက်စီးသွား၏။ သို့သော် သူ့ကိုယ်သူပြန် အဖတ်ဆယ်ပါသည်။ သူ့တပည့်မှာ ဝိသာလဒေဝ ဖြစ်၏။

 

ထိုအခါ ထိုသူတို့ထံရောက်သွားသူ တပည့်နှစ်ဦး၏ အမြင်များလည်း မတူကြတော့။ သေတံကအတွက် ဗီဇဂုတ္တသည် အလွန်မြင့်မြတ်သူ ဖြစ်ပြီး ဝိသာလဒေဝကတော့ မကောင်းမှုများဖြင့် ပြည့်နှက်နေသည့် လူရူးလူမိုက်တစ်ဦးဟု ရှုမြင်၏။

ကုမာရဂီရိကို ဝိသာလဒေဝက လောကထက် သာလွန်မြင့်မြတ်သူဟု ထင်မြင်နေပြီး သေတံက ကမူ တကိုယ်ရည် ကောင်းစားဘို့ ကြိုးစားနေသည့် အတ္တသမားဟု စွပ်စွဲ၏။

 

အသင်တို့သည် စိတ္တရလေခါကို ဖတ်ပြီးသူများ ဖြစ်ပါက မည်သူကောင်းပြီး မည်သူမကောင်းဆိုသည်ကို မိမိဘာသာ ဆုံးဖြတ်နိုင်ပါသည်။ ဤကမ္ဘာလောကကြီး၌ ဗီဇဂုတ္တနှင့် ကုမာရဂီရိတို့ကဲ့သို့သောလူများ အများအပြားပင် ရှိပါသည်။

 

၃။ ဘိန်းစားရေချမ်း

 

ဆရာမကြီး ခင်နှင်းယု၏ ဘိန်းစားရေချမ်းမှာမူ မြန်မာပြည်အောက်ပိုင်း (ထားဝယ်) မှ တကယ့်အဖြစ်အပျက် ဖြစ်၏။ ကိုရေချမ်းမှာ မြန်မာသက္ကရာဇ် ၁၃၁၆ ခုနှစ် ဝါဆိုလပြည့်ကျော် ၅ ရက်နေ့တွင် သေဆုံးခဲ့ပါသည်။

 

လူအများက ဘိန်းစား၊ ဘာမှ သုံးလို့စားလို့မရတဲ့အကောင်ဟု ဝိုင်းပယ်ထားသည့် ဘိန်းစားရေချမ်းမှာ အများ ထင်သကဲ့သို့ ကလေကချေကောင် မဟုတ်ဘဲ တကယ့်သူတော်ကောင်း ဖြစ်နေပြီး မနက်တိုင်း ကြေးစည်သံ တဝေဝေ နှင့် ဘုရားကို ခုနစ်အိမ်ကြား၊ ရှစ်အိမ်ကြား အော်ဟစ်ရှိခိုးနေသော အရပ်က လူသူတော်ကောင်းကြီးဟု ထင်နေသူကြီးကမှ တကယ့် လူယုတ်မာအစစ်ကြီး ဖြစ်နေလေ၏။ ဤသည်မှာလည်း လူမသိ၊ သူမသိ။ လူသိမခံဝံ့သော အဖြစ်အပျက်တစ်ခု ဖြစ်လျက် ဤကဲ့သို့သော အဖြစ်အပျက်များသည်လည်း ဤဒွန္နယာကြီး၌ မည်မျှရှိလိမ့်ဦးမည်မသိ။

 

၄။ ဆဲတတ်သူများနှင့် တညနေ

 

ဆရာမ ဂျူး၏ ဆဲတတ်သူများနှင့် တညနေကိုမူ ကျွန်ုပ် အတော်လေး ကြိုက်နှစ်သက်၏။

ဆရာမ၏ ဝတ္ထုတိုလေးထဲ၌လည်း လူနှစ်မျိုးနှစ်စားကို တွေ့ရ၏။

တမျိုးမှာ ဘဝကို ဘာမှ အလေးမထား၊ ပျော်ပျော်ပါးပါးပင် အော်ဟစ်ဆဲဆိုနေသည့် ပေါ့ပေါ့နေ ပေါ့ပေါ့စားသမားများ ဖြစ်၏။ သို့သော် တကယ့် ဒုက္ခနှင့် ကြုံတွေ့လာသည့်အခါ ထိုသူများကမှ အင်တိုက်အားတိုက် ကြုံးကြသူများဖြစ်ပြီး -

နောက်တဦးမှာမူ ပညာတတ်၊ အရာရှိဖြစ်လျက် တကယ့် ဒုက္ခနှင့် ကြုံတွေ့လာသည့်အခါတွင်မူ ဤသည့်ပြဿနာမှာ ငါနဲ့မဆိုင်၊ သူများတွေ လုပ်လိမ့်မယ်ဟု ခံယူထားကြသူများ ဖြစ်၏။

 

ဆရာမ၏ လူနှစ်မျိုးနှစ်စားမှာ လက်ရှိမြန်မာနိုင်ငံအခြေအနေနှင့် အတော့်ကို ဟပ်မိလေ၏။ မြန်မာ့လွတ်လပ်ရေးအတွက် အသက်သွေးချေးစတေး၊ စည်းစိမ်ပြုတ်၊ ဘဝပျက်သည်အထိ ကြိုးစားရုန်းကန်နေသူများ ရှိသလို သူများတွေလုပ်တာ ဘာမှစိတ်မဝင်စား၊ နေသာသလိုနေကာ လွပ်လပ်ရေးရမှ လွတ်လပ်ရေး၏ အသီးအပွင့် အမြိုက်အရသာကို တမြိန့်မြိန့် ခံစားလျက် ငါတို့ ဘယ်လောက်တောင် ဘယ်လိုတွေလုပ်လိုက်ရတာ စသဖြင့် လက်သီးလက်မောင်း တန်းရန် အဆင်သင့်ပြင်နေသူများလည်း မနည်းလှပါချေ။ ၎င်းတို့သည်ကား လူလည်ကြီး သားသမီးများပါပေတည်း။

 

ဤလောကကြီး၌ လူလည်ကြီးတို့၏ သားသမီးများ များပြားလှချေ၏ တကား။

 

၅။ American Sniper

 

American Sniper ၌ သားဖြစ်သူ ကျောင်းမှာ အနိုင်ကျင့်ခံရသည့်အတွက် လူသုံးမျိုးအကြောင်း ဖအေလုပ်သူက သားနှစ်ဦးကို ဆုံးမ၏။

 

There are three types of people in this world.

Sheep, wolves and sheepdogs.

Some people believe that evil doesn’t exist in the world.

And if it ever darkened their doorstep, they wouldn’t know how to protect themselves.

Those are sheeps.

And then you got predators. They use violence to prey on the weak. They are the wolves.

And there are those who’ve been blessed with the gift of aggression and overpowering need to protect the flock. These men are the rare breed that live to confront the wolf. They are the sheepdog.

 

ဒီကမ္ဘာပေါ်မှာ လူသုံးမျိုးရှိသကွ။

သိုးလိုလူ၊ ဝံပုလွေလိုလူ၊ သိုးထိန်းခွေးလိုလူ ပဲ။

လောကမှာ မိစ္ဆာဆိုတာမရှိပါဘူးကွာလို့ ယုံနေပြီး အဲဒီမကောင်းဆိုးရွားက အိမ်တံခါးလာခေါက်တော့ ကိုယ့်ကိုယ်ကိုယ် ဘယ်လိုကာကွယ်ရမှန်း မသိတော့ဘူး။ အဲလိုကောင်တွေဟာ သိုးလိုကောင်တွေပဲ။

နောက်ပြီး သားကောင်လိုက်ရှာနေတဲ့ သားရဲတိရစ္ဆာန်တွေလည်း ရှိသကွ။ သူတို့ကတော့ ဝံပုလွေတွေပဲ။

နောက်ပြီး အကာအကွယ်လိုနေတဲ့သူကို ဝံပုလွေတွေနဲ့ မျက်နှာချင်းဆိုင် တိုက်ခိုက်မယ့် သူတွေလည်း ရှိတယ်။ သူတို့ကတော့ သိုးထိန်းခွေးတွေပဲ။

 

ငါတို့ဟာ သိုးတွေကို မွေးမြူနေတာမဟုတ်ဘူး။

အေး - ဝံပုလွေဖြစ်လာခဲ့ရင်လည်း ဟောဒီခါးပတ်နဲ့ ငါကိုယ်တိုင် ရိုက်မှာပဲ . . .

ဆိုကာ ဝတ်ထားသည့် ခါးပတ်ကြီးကို ဖြုတ်လျက် စားပွဲပေါ် ဗြန်းကနဲရိုက်တင်လိုက်ရာ ကျွန်ုပ်တောင် ကျောစိမ့်မိ သွားပါသေး၏။

 

၆။ ငါ ဘယ်လိုလူမျိုးလဲ

 

ဤသည်မှာ ကမ္ဘာပေါ်ရှိ လူများကို အစားစားခွဲပြထားပုံ ဖြစ်၏။ ကျွန်ုပ် ဖတ်ဖူးသလောက် မှတ်မိသလောက် ပြန်ရေး ပြခြင်းဖြစ်၏။

 

ဤစာဖတ်နေသူ အသင်သည်လည်း ငါရော . . .

 

- ပြောသလိုလုပ်ပြီး လုပ်သလိုပြောတဲ့သူလား

- ပါးစပ်က ဘုရားဘုရား၊ လက်က ကားယားကားယား လူလား

- အရေးအကြောင်းဆို တကယ်အားကိုးရမယ့်သူလား၊ လူလည်ကြီး သားသမီးလား

- သိုးလား၊ ဝံပုလွေလား၊ သိုးထိန်းခွေးလား . . .

 

စသည်ဖြင့် ခေါင်းစားကြပါစေကုန်သတည်း။

 

ကျေးဇူးတင်ပါသည်။

 

အေးငြိမ်း

၃၁ မေလ၊ ၂၀၂၆

 

 

စိတ္တရလေခါ

http://www.mediafire.com/file/cx55u978pxpstk3/

 

ဘိန်းစားရေချမ်း

https://www.facebook.com/356Myat.Thu.Aung/posts/%E1%80%98%E1%80%AD%E1%80%94%E1%80%BA%E1%80%B8%E1%80%85%E1%80%AC%E1%80%B8%E1%80%9B%E1%80%B1%E1%80%81%E1%80%BB%E1%80%99%E1%80%BA%E1%80%B8____________________%E1%80%81%E1%80%84%E1%80%BA%E1%80%94%E1%80%BE%E1%80%84%E1%80%BA%E1%80%B8%E1%80%9A%E1%80%AF%E1%80%81%E1%80%9B%E1%80%AE%E1%80%B8%E1%80%9E%E1%80%BD%E1%80%AC%E1%80%B8%E1%80%9B%E1%80%81%E1%80%BC%E1%80%84%E1%80%BA%E1%80%B8%E1%80%9E%E1%80%8A%E1%80%BA-%E1%80%85%E1%80%AD%E1%80%94%E1%80%BA%E1%80%94%E1%80%AC%E1%80%B8%E1%80%80%E1%80%95%E1%80%BA-%E1%80%95%E1%80%94%E1%80%BA%E1%80%9B%E1%80%81%E1%80%BC/459988826368564/

 

ပန်းမြိုင်လယ်မှ​ ဥယျာဉ်မှူး

https://www.youtube.com/watch?v=uyuH9quVeKY

 

ဆဲတတ်သူများနှင့် တစ်ညနေ

https://bamakyel.wordpress.com/wp-content/uploads/2009/11/juu-sae-tat-thu-myar-nae-1-evening.pdf

 

PTW (Permit To Work) (အလုပ်လုပ်ခွင့်ပြုမိန့်) လိုသလား

မှတ်ချက်။

ဤဆောင်းပါးမှာ စင်ကာပူနိုင်ငံ လုပ်ငန်းခွင်များအတွက်သာ ဖြစ်၏။ မြန်မာပြည်နှင့် မဆိုင်။

 

၁။

 

ဆောက်လုပ်ရေး လုပ်သားများအတွက် အန္တရာယ်ကင်းရေး သင်တန်းများ ပေးရာတွင် လက်တွေ့လုပ်ရာ၌ “၃ မီတာ ထက်ကျော်ရင် ပါမစ်လျှောက်ရမယ်၊ ပါမစ် အိုကေ” ဟု ကျွန်ုပ်တို့က အော်ခိုင်း၏။ အဲသဟာ ဟုတ်ပါသလား။

 

ဤသည်မှာ မှန်သယောင်ယောင်ရှိသော်လည်း အတိအကျ မမှန်ပါ။

၃ မီတာထက်ကျော်တိုင်း ပါမစ်လိုတာမဟုတ်။

အချို့အခြေအနေများ၌ ပါမစ် လိုချင်လိုမည်။

အချို့သော အခြေအနေများ၌ ပါမစ် လိုချင်မှ လိုမည်။

 

ဤသည်ကို CP for WAH (Code of Practice for Working Safetly at Height) ၌ ရှင်းရှင်းလင်းလင်း ပြဆိုထားပါ၏။

 

၂။

 

CP for WAH အခန်း ၄ သည် အလုပ်လုပ်ခွင့်ပြုမိန့် (Permit To Work) System အကြောင်း ဖြစ်၏။

Permit To Work System ၏ အဓိကရည်ရွယ်ချက်မှာ အမြင့်မှပြုတ်ကျမှုများကို ကာကွယ်တားဆီးရန် ဖြစ်၏။

PTW ၌ ကြီးကြပ်ရေးမှူးများ၏ တာဝန်ဝတ္တရားများ၊ စစ်ဆေးသူ၏ တာဝန်ဝတ္တရားများ၊ မန်နေဂျာ၏ တာဝန်ဝတ္တရားများ ကို ပြဆိုထားပြီး ဤသည်တို့ကို လုပ်ထားကြောင်း သေချာပါသည်ဟု ကျွန်ုပ်က တာဝန်ခံပါသည် ဆိုကာ လက်မှတ် ထိုးရ၏။ (တကယ်လုပ်တာ မလုပ်တာ ခညားတို့ အကြောင်းပေါ့စ်လဗျာ။)

 

ဆူပါဗိုက်ဆာလုပ်သူက ဒါတွေဒါတွေဒါတွေ လုပ်ထားပါတယ်ဟု အမှန်ခြစ်ကလေးများ ခြစ်ရ၏။ (တကယ်လုပ်တာ မလုပ်တာ ခညားတို့ အကြောင်းပေါ့လဗျာစ်။)

 

အမှန်တကယ်သာ အဲသဟာတွေ တကယ် (တကယ်လုပ်ထားပါတယ်။ ဘုရားစူး၊ မိုးကြိုးပွတ်) လုပ်ထားသည်ဆိုလျင် အမြင့်က ပြုတ်ကျမှုများကို တားဆီးနိုင်မည်ဖြစ်၏။

 

4.2 Requirements and Scope  

4.2.1 - ၃ မီတာထက်ကျော်လျင် ပါမစ်လျှောက်ရမည်။

4.2.2 - ပြုတ်မကျအောင် အစီအမံများလုပ်ထားပါက (တာဝန်ရှိသူက လိုပါသည်ဟု ပြောသည်မှအပ) ပါမစ်လိုချင်မှ လိုမည်။ နမူနာအားဖြင့် -

- အပေါက်မရှိသော၊ ပတ်ပတ်လည်တွင် ၁ မီတာမြင့်သည့် နံရံနိမ့် (parapet wall) ကာထားသော ခေါင်မိုးပြား

- တက်ရန် သင့်တော်သောလှေခါးရှိသည့်၊ ပတ်ပတ်လည်တွင် ပြုတ်မကျစေရန် အကာအရံတန်းများ တပ်ဆင်ပေးထား သည့် ထပ်ခိုး

- ကိုယ်သိုင်းကြိုးဝတ်ထားပြီး ချိတ်ရန်သတ်မှတ်ထားသည့်နေရာ၌ ကိုယ်သိုင်းကြိုးချိတ်ကို ချိတ်ထားသော MEWP နှင့် အလုပ်လုပ်ခြင်း

 

4.2.3 အမြင့်တွင်အလုပ်လုပ်ခြင်းအတွက် ခွင့်ပြုမိန့်မလိုဆိုသည်မှာ ဤအခန်း (၄) တစ်ခုအတွက်သာဖြစ်ပြီး အခြား အခန်းများအတွက်မူ အလုပ်သမားတစ်ယောက် ပြုတ်မကျနိုင်စေရန်အတွက် လိုအပ်သော အကာအကွယ် အတားအဆီးများ တပ်ဆင်ပေးထားရမည်။

 

https://www.tal.sg/wshc/-/media/TAL/Wshc/Resources/Publications/Codes-of-Practice/Files/WSH-Code-of-Practice-2013_ebook.pdf

 

၃။

 

ခြုံကြည့်လိုက်လျင် (ထမိန်နဲ့ခြုံကြည့်တာကို ပြောတာမဟုတ်ဘူးဗျ။ Summarize ကို ပြောတာ၊ ယခွမ်း) အမြင့်မှာလုပ်တာမှန်ပေသိ ပြုတ်မကျနိုင်ရန် အကာအကွယ်အတားအဆီးများ လုပ်ထားပါက PTW မလို။

 

Jurong Island တွင် ရေနံချက်စက်ကဲ့သို့သော ဓာတုစက်ရုံများစွာရှိ၏။ ထိုစက်ရုံများတွင် အမြင့်သို့တက်ကာ စစ်ဆေး ရသည့် ကြမ်းခင်း များစွာရှိ၏။ ထိုကြမ်းခင်းများသို့ တက်ရန် လှေကားများ သေသေချာချာ တပ်ဆင်ပေးထား၏။ ကြမ်းခင်းများပတ်လည်၌လည်း အကာအရံတန်းများ တပ်ပေးထား၏။ မည်သည့်နည်းနှင့်မှ ပြုတ်မကျနိုင်။

 

သို့အတွက် ထိုနေရာများသို့တက်ရန် မည်သည့် ကိုယ်သိုင်းကြိုးမှ ဝတ်ရန်မလိုသကဲ့သို့ မည်သည့် ခွင့်ပြုမိန့်မှ လျှောက်ရန် လည်း လိုမည် မဟုတ်ပါချေ။

 

ကျေးဇူးတင်ပါသည်။

 

အေးငြိမ်း

၂၇ မေလ ၂၀၂၆