ဝတ္ထုဖတ်သောကျွန်ုပ်နှင့် ကျွန်ုပ် ဝတ္ထုဖတ်ခြင်းအကြောင်း

လူ့အဖွဲ့အစည်းတစ်ခု၏ လူနေမှုပုံစံ၊ အလေ့အထ၊ သူတို့၏ဘဝများ၊ ယဉ်ကျေးမှု၊ ပြောပုံဆိုပုံ၊ နေပုံထိုင်ပုံ စသည်တို့ကို သိရန် အကောင်းဆုံးမှာ ဝတ္ထုဖတ်ခြင်း ဖြစ်၏။

ဝတ္ထုကောင်းတို့သည် ဝတ္ထုရေးသည့် အချိန်ကာလမှ လူနေမှုဘဝများကို ထင်ဟပ်ဖော်ပြနေ၏။ လူတို့၏ လူနေမှုစရိုက်၊ ၎င်းတို့၏ အတွေးအခေါ် အယူအဆ၊ ပညာရေးအခြေအနေ၊ ပတ်ဝန်းကျင်၊ ပြောဆိုသည့်ဘာသာစကားမှအစ၊ နည်းပညာ၊ အသုံးအနှုန်းတို့သည် အချိန်နှင့်အမျှ ပြောင်းလဲနေ၏။ ထို့ကြောင့် ယခင်ခေတ်ကလူတွေ မည်ကဲ့သို့ နေသည်ထိုင်သည် များကို သိလိုပါက ထိုခေတ်က ဝတ္ထုများကို ဖတ်ရ၏။

များမကြာသေးမီက ကျွန်ုပ် ခင်နှင်းယု၏ ဥဩတွန်တဲ့ လရာသီကို ဖတ်၏။ ဇာတ်အိမ်ကို စင်ကာပူနောက်ခံထားပြီး ဖွဲ့ထား၏။ ထိုဝတ္ထုကိုဖတ်ပြီး ကျွန်ုပ်တို့ စင်ကာပူမရောက်ခင်ကာလများဆီက စင်ကာပူသို့ လာရောက် အလုပ်လုပ်ကိုင် နေကြသည့် မြန်မာလုပ်သားများ၏ ဘဝကို သိရ၏။ သူတို့ ပတ်စ်ပို့မရှိဘဲ မည်ကဲ့သို့ စင်ကာပူနိုင်ငံအတွင်း ခိုးဝင်လာကြရ ပုံ၊ မည်သည့် workpass မှ မရှိဘဲ စင်ကာပူနိုင်ငံအတွင်း၌ အလုပ်လုပ်ကြရပုံ၊ မည်ကဲ့သို့ အခက်အခဲ၊ ဒုက္ခသုက္ခများကို ရင်ဆိုင် ဖြေရှင်းကြရပုံများကို သိရ၏။

(စကားစပ်၍ ပြောရလျှင် ကျွန်ုပ်က ဖတ်ခဲ့သော ဝတ္ထုများ၊ ကြည့်ခဲ့သောရုပ်ရှင်များ၊ ရေးခဲ့သော စာအုပ်နှင့် ဆောင်းပါးများ၊ ကြိုက်ခဲ့ဖူးသောကောင်မလေးများ (ဟုတ်ပေါင် မွှားကုန်ပြီ၊ ယခွမ်း) တို့ကို စာရင်းလုပ်ထားလေ့ရှိ၏။ သဟာတောင် တချို့ရုပ်ရှင်များကို နှစ်ခါပြန် ကြည့်မိသည်များလည်း ရှိသေး၏။)

ဝတ္ထုနှင့် ဆောင်းပါးသည် အလွန်ကွာ၏။ ဆောင်းပါးက ဒါကဒီလိုရှိတယ် လိုရင်းတိုရှင်း ပြောပြသွား၏။ အချက်အလက်များကိုသာ ပေး၏။ ဘာ ဖွဲ့တာနွဲ့တာ၊ စကားပြောတာမှ မပါ။ စာ၏ သဘာဝကိုက ဖွဲ့သည့်နွဲ့သည့် အမျိုးအစား မဟုတ်သဖြင့် ဖွဲ့လို့နွဲ့လို့လည်း မရ။ ဖွဲ့လိုက်နွဲ့လိုက်လျှင် ဆောင်းပါးမဟုတ်တော့။

ဝတ္ထုကျတော့ ဟော - လေနုအေးက တနွဲ့နွဲ့ နော့နေဆဲကို . . . လို့ လုပ်လို့ရသည်။ လကြီးက သာလိုက်တာမောင် . . . ဟု နွဲ့လို့ရ၏။ ဟင်းလင်းပွင့်၍နေသော ဝါးရုံပင်ထက် တစ်ခုဝယ် တစ်ကောင်သော ဥသြငှက်သည် မြောက်လေနှင့် နှင်းထုကို ပြက်ရယ်ပြုကာ နွေ၏နှုတ်ခွန်းဆက်တေးဂီတကို ဖွဲ့နွဲ့ သီကုံးလျက်ရှိလေပြီ။ . . . ဟု ဖွဲ့လို့ရ၏။

မြန်မာဝတ္ထုများ၌ အလွန်ကောင်းသည့် ဝတ္ထုများသည် ရှိ၏။

အောင်လင်း၏ အရိုင်းစပယ်
လင်းယုန်သစ်လွန်၏ ဓမ္မဝိလာသ
မောင်သိန်းဆိုင်၏ ရေနံ့သာခင်ခင်ကြီး တို့ကို ကျွန်ုပ်ကတော့ ဂန္ထဝင်ဝတ္ထုများစာရင်းသို့ ထည့်သွင်းလို၏။ ဤသည်မှာ ကျွန်ုပ်က နမူနာမျှသာ ပြခြင်းဖြစ်၍ အခြား ဂန္ထဝင်မြောက် ဝတ္ထုများ အများအပြား ရှိပါသေး၏။

ထိုဝတ္ထုများ၌ လူနေမှုစရိုက်များကို ကွက်ကွက်ကွင်းကွင်း ဖော်ပြထား၏။ ဝတ္ထုကောင်းဟူသည် လူတို့၏ စရိုက်သဘာဝ၊ သူတို့၏ စိတ်ထားနှင့်အမူအကျင့်တို့ကို မျက်စိထဲ ကွက်ကွက်ကွင်းကွင်း မြင်လာအောင် သရုပ်ဖော်ထားသည်ဖြစ်ရာ ဤကဲ့သို့ သရုပ်ဖော်နိုင်မှလည်း ဝတ္ထုကောင်း မည်၏။

ဝတ္ထု၌ လူဆိုးကို သရုပ်ဖော်ရာတွင် အနီးရှိ တစ်ခုခုနှင့် ကောက်ပေါက်လိုက်ချင်လောက်အောင် သရုပ်ပါရ၏။ နန်းဟာဗီးမှ အဝါ့ကို ‘ကို’ သည် အတင်းရော အဓမ္မပါ ဟဝှာလုပ်ဖို့ကြိုးစားရာ၌ လည်းကောင်း၊ ထို အဝါ ဆိုသော ဘာမှ အားကိုးစရာမရှိသည့် ခိုကိုးရာမဲ့ မိန်းကလေးကို ရဲ ဆိုသော မသတီစရာ သတ္တဝါတို့သည် သမင်မလေးကို အမဲဖျက်ရန် လိုက်သော ကျားငစဉ်းလဲကဲ့သို့ ဝိုင်းလိုက်ကြလေရာ ကျွန်ုပ်မှာ အသည်းတထိတ်ထိတ်၊ ရင်တဖိုဖိုနှင့် ဘုရား ဘုရား တ,နေမိသော ဟူ၏။

ကျွန်ုပ်သည် ငယ်စဉ်ကတည်းက ဝတ္ထုများကို တရှိုက်မက်မက် ဖတ်ခဲ့၏။
၉ တန်း၊ ၁၀ တန်း ကျောင်းသားဘဝက လေးမျက်နှာရှိ ကျွန်ုပ်တို့ အိမ်အနီးတွင် ငုဝါ အမည်ရသော စာအုပ်ဆိုင်လေး ရှိ၏။ သို့သော် ကျွန်ုပ်တို့၌ ဝတ္ထုငှားဖတ်နိုင်လောက်သည်ထိ ပိုက်ဆံပေါပေါများများ မရှိလေရကား မမရွှေရွှေတို့ ငှားထားသည့် ဝတ္ထုများကိုသာ တဆင့်ပြန်ယူ ဖတ်ရ၏။

ထိုစဉ်က ဖတ်ခဲ့သော ဝတ္ထုများတွင် ယုဝတီခင်စိန်လှိုင်၊ ကလျာ (ဝိဇ္ဇာသိပ္ပံ)၊ တက္ကသိုလ်ဘုန်းနိုင်တို့၏ ဝတ္ထုများပါ၏။ အခြားဝတ္ထု အများအပြားလည်း ရှိပါသေးသည်။ ကောင်းကောင်း မမှတ်မိတော့ပါ။

ကျော်မြသန်း၏ ကန္နားစီး မောင်မောင်လတ် နှင့် နုနုရည်(အင်းဝ) ၏ ပြုံး၍လည်း ကန်တော့ခံတော်မူပါ ရယ်၍လည်း ကန်တော့ခံတော်မူပါတို့တွင် မြန်မာပြည်၏ နတ်ကတော်လောက၊ နတ်ကိုးကွယ်မှု အလေ့အထတို့ကို ပယ်ပယ်နယ်နယ် သိရ၏။ ကျွန်ုပ် ‘ကန္နားစီးမောင်မောင်လတ်’ ကို ဖတ်ဖြစ်တာ ဆရာဦးမြသန်း ညွှန်း၍ ဖြစ်ပါ၏။ မောင်အေးငြိမ်း - အဲဒီဝတ္ထုဖတ်ကြည့်၊ ကောင်းတယ်ကွဟု ဆရာကဆို၏။ ခုနှစ်ကိုတော့ သေသေချာချာ မမှတ်မိတော့ပါ။ ၁၉၈၀ ခုနှစ် လောက်က ထင်ပါသည်။

ကြူမွှေး၏ ဟာသဝတ္ထု အတော်များများကို ဖတ်ခဲ့ရာ ‘မမှားတဲ့ဖိတ်စာ’ ကို ယခုထိ မှတ်မိနေပါသေး၏။ ထိုဝတ္ထုထဲ၌ လက်ဝဲမောင်း စနစ်မှ လက်ယာကပ်မောင်းစနစ် ပြောင်းခြင်းအား လှောင် ထားတာလည်းပါ၏။ နောက်ပြီး တင့်ဆန်း ၏ တောင်ဇလပ်ပန်းနီနီကို ဖတ်ပြီး လွမ်းရ၏။ 

နောက်ပြီး မြစကြာ၏ စုန်း၊ ကဝေဝတ္ထု တော်တော်များများလည်း ဖတ်ဖူးခဲ့ပါသည်။

ဦးနေဝင်းက စုန်း၊ ကဝေဝတ္ထုများကို အဆိပ်အတောက်စာပေဆိုပြီး ပိတ်လိုက်တော့ ကျွန်ုပ်တို့မှာ မဆတ်တငံ့ကြီး ဖြစ်သွားရလေ၏။ ကျွန်ုပ်မှာ ကျွန်းတပင်က လွန်းခင် နှင့် လေးအိမ်စုက မိချောတို့ကို ‘လွမ်းလို့ကျန်ရစ်မှာကို အားနာပါတယ်လေ’ လုပ်လိုက်ရတော့၏။ စုန်း၊ ကဝေဝတ္ထုများကို အဆိပ်အတောက်ဟုဆိုလျှင် Train to Bhutan နှင့် ဇွန်ဘီရုပ်ရှင်များကို အဘယ်သို့ ဆိုမည်နည်း။ စုန်း၊ ကဝေဝတ္ထုများသည် အပျော်ဖတ် စာပေများဖြစ်၏။ ဘာဗဟုသုတ ရစေဘို့မှ မဟုတ်။ စိတ်ပျော်ရွှင်မှုတစ်ခုအတွက်သာ ရေးတာ ဖြစ်၏။ သိုင်းဝတ္ထု၊ Marvel ရုပ်ရှင်, Thor, Iron Man, Superman, Spiderman, BlahBlahman စသည်အားလုံးမှာ ဖျော်ဖြေရေးအတွက် သက်သက်သာ ဖြစ်ဘိ၏။ ဟယ်ရီပေါ်တာကရော ဘာထူးပါသနည်း။ အနုစားနှင့် အကြမ်းစားသာ ကွာပါသည်။ ဦးနေဝင်းသည်ကား အတော်ဒူသည့် အေဘေးကြီး ဖြစ်သတည်း။

 

ကျွန်ုပ် စက်မှုတက္ကသိုလ်ကျောင်းသားဘဝတွင် ဖတ်ခဲ့သည်တို့မှာ ငြိမ်းကျော်၊ နွမ်ဂျာသိုင်း၊ မောင်စိန်ဝင်း (ပုတီးကုန်း)၊ မောင်သာရ၊ တက္ကသိုလ်ဘုန်းနိုင် စသည့်ဆရာတို့၏ ဝတ္ထုများ ဖြစ်၏။ စမ်းစမ်းနွဲ့ (သာယာဝတီ) ၏ ‘တစ်ကောင်တည်းပဲ ဒါပေမယ့် ခြင်္သေ့’ ကိုလည်း ထိုကာလများက ဖတ်ခဲ့တာ ထင်ပါသည်။

နောက်ပြီးတော့ လူတွေ၏စရိုက်မျိုးစုံကို ဝတ္ထုများထဲ၌ တွေ့နိုင်၏။

ဆရာမကြီး ခင်နှင်းယု၏ ဘိန်းစားရေချမ်း ဝတ္ထုမှ -
မိမိအိမ်၌ မွေးထားသည့် ကလေးမကလေးကို မုဒိန်းကျင့်သော မနက်တိုင်း သဗ္ဗေသတ္တာ ရွတ်နေသူ ဘုရားဒဂါကြီး နှင့် မိမိချစ်သူကလေး နာမည်ပျက်မည့်အရေးကြောင့် ကိုယ့်ကိုယ်ကိုယ် စတေးခံကာ တစ်သက်လုံး လူယုတ်မာကြီး ပြယုဂ်နှင့် နေသွားခဲ့သော ကိုရေချမ်း

ဆရာမကြီး၏ ဝတ္ထုတွင် ကိုရေချမ်းကွယ်လွန်သည့် ရက်၊ လ၊ နှစ်တို့ကို ဖော်ပြထားရာ ဤသည်မှာ ပုံပြင်မဟုတ်။ တကယ့်အဖြစ်အပျက်ဖြစ်ကြောင်း သိရ၏။ ဤဝတ္ထုပါ အများတကာ ကြည်ညိုလေးစားနေသည့် ကျောင်းဒဂါကြီး နှင့် အများတကာက ဝိုင်းဝန်းရှုံ့ချ ဝိုင်းပယ်ထားသည့် ကိုရေချမ်းတို့ မည်သူက မြင့်မြတ်ပါသနည်း။ ဤကဲ့သို့ အဖြစ်အပျက်များ လူ့လောက၌ မည်မျှများပါသနည်း။

မောင်သာရ၏ ငြုပ်မှန်လျင် စပ်ရမည်နှင့် တွဲထုတ်သော မစန္ဒာ ၏ မစပ်သောငရုတ်မှ အင်ဂျင်နီယာဘွဲ့ရတစ်ဦး၏ အဖြစ်အပျက်နှင့် အလားတူစွာ ကျွန်ုပ်ကိုယ်တိုင် တစ်ကြိမ်သောအခါက ထိုကဲ့သို့ ဖြစ်ပျက်ခဲ့ဖူးပါ၏။

မိုးမိုး (အင်းလျား) ၏ ‘မြန်မာပြည်တွင် နေကြသည်’ နှင့် နေဝင်းမြင့်၏ ‘မြို့ပြပိုးမွှားများ’ က မြန်မာပြည်ရှိ အောက်ခြေ လူတန်းစားများ၏ ဘဝကို လှစ်ဟပြနေ၏။

နိုင်ဝင်းဆွေ၏ ‘မသိန်းရှင်ဆီ ပို့ပေးပါ’ ကို ဖတ်ကြည့်ပါ။ တနင့်တပိုး ခံစားသွားရမည်။ မြန်မာပြည်တွင် ဤကဲ့သို့သော ဘဝများ သန်းနှင့်ချီရှိ၏။

ရန်ကုန်ဘဆွေ၏ နန်းဟာဗီးကို ကြားဖူးသည်မှာ ကြာပါပြီ။ သို့သော် မဖတ်ဖြစ်။ ယခုမှ ဖတ်ဖြစ်၏။

နန်းဟာဗီးသည် ဝတ္ထုကောင်း တစ်ပုဒ်ဖြစ်၏။

နန်းဟာဗီး၌ ပညာနိမ့်ကျ၍ လူလုံးမလှ ဖြစ်နေရရှာသော တိုင်းရင်းသားများအကြောင်းကို သရုပ်ဖော်ထားသည်မှာ ပြောင်မြောက်လှ၏။
ထို သနားစရာ သတ္တဝါများအပေါ် ၎င်းတို့၏ မသိနားမလည်မှုကို အခွင့်ကောင်းယူပြီး ယုတ်မာကြကုန်သော လူကြီးလူမကောင်းအပေါင်းတို့သည် ဤလောက၌ တကယ်ရှိကြကုန်၏။ မြန်မာပြည်အတွင်း၌ အများအပြားကို ရှိကြကုန်၏။ ထို လူကြီးလူမကောင်းတို့သည် ၎င်းတို့ရရှိထားသော အာဏာပါဝါကို အသုံးချလျက် သာမန် နင်းပြား ပြည်သူများကို ဖြဲခြောက်ကာ ထင်တိုင်းကြဲကြကုန်၏။ တကယ်တတ်သိနားလည်သူ၊ ၎င်းတို့ကို ပြန်တုတ်မည့်သူ မပေါ်မချင်း ၎င်းတို့သည် အာဏာပါဝါ ပြကြ၏။

ပို၍ဆိုးသည်မှာ ငါတို့ကို မတရားလုပ်နေသည်။ သူတို့ကို တွန်းလှန်ပြီး ငါတို့အခွင့်အရေးကို ရအောင်ယူမည်ဟု ဆိုသူမှာ အလွန့်အလွန် နည်းပါးလျက် အနှီ လူကြီးလူမကောင်းအပေါင်းကို မြှောက်ထိုးပင့်ကော်လုပ်ကာ ကိုယ်ကျိုးစီးပွား ရှာနေသူ များလျက် ရှိနေခြင်း ဖြစ်၏။

နန်းဟာဗီးသည် မတရားမှုကို တော်လှန်၏။
သူ့၌ ဘာကျောထောက်နောက်ခံမှ မရှိ။ သူ့၌ ဘာပစ္စည်းဥစ္စာမှ မရှိ။ သူ့၌ ဘာ ပါဝါ အာဏာမှ မရှိ။
သို့သော် သူ့မှာ မဟုတ်တာကို ငြိမ်ခံမနေတတ်သော စိတ်ဓာတ်ရှိ၏။
မတရားတာကို အသက်အသေခံပြီး တွန်းလှန်မည်ဟူသော ခံယူချက်သည် ရှိ၏။
ထိုလူယုတ်မာများကို ရှိသမျှအင်အားနှင့် ခုခံ၏။


အမှန်စစ်စစ် -
နန်းဟာဗီးသည် ယခုခေတ်ကာလကို သရုပ်ဖော်လျက်ရှိ၏။


နန်းဟာဗီးမှ မသိနားမလည် ခေတ်နောက်ကျလျက်ရှိသော လူမျိုးစုသည် -
ယခုခေတ်တွင် မြန်မာတစ်မျိုးသားလုံးကို ကိုယ်စားပြုလျက်ရှိ၏။
သို့မို့ကြောင့်သာ အသင်တို့ကို မိုင်၃၀၀၀ နဂါး၊ အစ်မတော် မြနန်းနွယ်၊ ဘာဘိုးတော်၊ ညာမယ်တော် စသည်တို့ဖြင့် ဂျင်းထည့်နိုင်ခြင်း ဖြစ်၏။

နန်းဟာဗီးမှ မိမိတို့ရထားသည့် ရာထူးဂုဏ်ထူးများကို တလွဲသုံးလျက် အာဏာပါဝါပြကြကုန်သော လူကြီးလူမကောင်း တို့သည် -
ယခုခေတ်တွင်လည်း မိမိတို့ရထားသည့် ရာထူးဂုဏ်ထူးများကို တလွဲသုံးလျက် အာဏာပါဝါပြကြကုန်သော လူကြီးလူမကောင်းတို့ကို ကိုယ်စားပြု၏။

နန်းဟာဗီးမှ ‘မတရားမှုကို မိမိရှိသမျှခွန်အားနှင့် တွန်းလှန်လျက်ရှိသော နန်းဟာဗီး’ သည် -
ယခုခေတ်၌ နိုင်ငံတော်အာဏာကို မတရားရယူထားသည့် MyanNoe တစ်သိုက်ကို အစွမ်းကုန် တော်လှန်လျက်ရှိသော တော်လှန်ရေး ဘက်တော်သားများကို ကိုယ်စားပြုလျက်ရှိ၏။

နန်းဟာဗီးမှ ‘ရာထူးရာခံများကို အသုံးချလျက် လူမျိုးစုအပေါ် မတရား ထင်တိုင်းကျဲလျက်ရှိသော လူကြီး လူမကောင်းများကို မြှောက်ထိုးပင့်ကော်လုပ်ကာ မိမိတို့စည်းစိမ် တည်မြဲရေးကို လုပ်နေကြသူများ’ သည် -
ယခုခေတ်တွင် ဟိုမြေနိုးများ၏ ဘောကို အပြုံလိုက်မ,နေကြကုန်သော $ဂမြင်းမသားများကို ကိုယ်စားပြု၏။

မိမိတို့ရထားသည့် ရာထူးဂုဏ်ထူးများကို တလွဲသုံးလျက် အာဏာပါဝါပြကြကုန်သော လူကြီးလူမကောင်း အပေါင်းတို့သည် အမြန်ဆုံး ကျဆုံးကြပါစေကုန်သတည်း။

နိုင်ငံတော်အာဏာကို မတရားရယူထားသည့် MyanNoe တစ်သိုက်ကို အစွမ်းကုန် တော်လှန်လျက်ရှိသော တော်လှန်ရေး ဘက်တော်သားများသည် အကျအဆုံးအနည်းဆုံးနှင့် အောင်ပွဲများဆက်တိုက်ရကာ ပြည်သူ့အာဏာကို ပြန်လည် တည်ဆောက်နိုင်ပါစေသတည်း။


ဟို မြေနိုးတသိုက်သည် ရုရှားမှအပြန် လေယာဉ်ပျက်ကျကာ အကုန်လုံး မာလက ဈာန်ကြွ ကြပါစေကုန်သတည်း။


ကျေးဇူးတင်ပါသည်။


အေးငြိမ်း
၁၀ မေလ၊ ၂၀၂၅