Tuesday, February 17, 2015

Rules and Regulations

မိတ်ဆွေတစ်ယောက်က မေးလာလို့ပါ။ Rules နဲ့ Regulations ဘာကွာပါသလဲ တဲ့။
Rules က စည်းကမ်းသတ်မှတ်ချက်တွေပါ။ ဥပမာ - ဤနေရာမှ လမ်းဖြတ်မကူးရ။ ကွမ်းတံတွေးမထွေးရ။ ဆေးလိပ်မသောက်ရ စသဖြင့်။ လိုက်နာလို့လည်းရတယ်။ မလိုက်နာလည်း သိပ်ပြဿနာမရှိဘူး ဆိုပါတော့။ မြန်မာလို စည်းမျဉ်းစည်းကမ်းလို့ ဘာသာပြန်နိုင်မယ် ထင်ပါတယ်။
Regulations ဆိုတာကျတော့ ဥပဒေနဲ့ ဆိုင်ပါတယ်။ နည်းဥပဒေလို့ ဘာသာပြန်ရမယ် ထင်ပါတယ်။ Regulations ဆိုတာလည်း စည်းမျဉ်းစည်းကမ်းတွေပါဘဲ။ ဒါပေမဲ့ အဲဒီ စည်းမျဉ်းစည်းကမ်းတွေကို သက်ဆိုင်ရာအစိုးရအရာရှိက လက်မှတ်ထိုးပြီး (စာနဲ့ရေးပြီး) ထုတ်ပြန်တယ်။ မလိုက်နာရင် ဥပဒေအရ အရေးယူမယ်။ ဘယ်လိုအရေးယူမယ်ဆိုတာကိုလည်း အဲဒီ ဥပဒေထဲမှာ တစ်ပါတည်း ထည့်ပြဌာန်းထားတယ်။
တစ်ခါတစ်ခါကျတော့ Rules နဲ့ Regulations ကို တွဲသုံးပါတယ်။ တစ်ခါတလေ Regulations ဆိုတာ Rules တွေကို စုစည်းထားတာပါလို့ ပြောနိုင်ပါတယ်။ ဒါပေမဲ့ အတိအကျတော့ မမှန်ဘူးပေါ့။
လူတို့ဌာန ဘုံဘ၀မှာ လူတွေ (ကိုယ့်အသိနဲ့ကိုယ်) လိုက်နာရမဲ့ စည်းမျဉ်းစည်းကမ်းတွေရှိပါတယ်။ အဲဒါတွေဟာ rules တွေပါ။ ဥပဒေကြောင်းအရ အရေးယူလို့မရပေမဲ့ အဲဒါတွေကိုလိုက်နာဘို့လည်းပဲ အရေးကြီးပါတယ်။ နေရာတကာ Regulations တွေနဲ့ချည်း သွားနေလို့မဖြစ်ပါဘူး။
ဒါလောက်ဆို Rules နဲ့ Regulations ဘာကွာသလဲဆိုတာ အတော်ရှင်းသွားလောက်ပြီ ထင်ပါတယ်။
ကျွန်တော်တော့ ပျက်သွားတဲ့စာရွက်စာတမ်းတွေ ပြန်ရဘို့ ကြိုးစားတုံးပါဘဲ။
အရေးကြီးတဲ့ စာရွက်စာတမ်းတွေ ခုထိ ပြန်မရသေးပါဘူး။
(လက်လျှော့ဘို့ အတော်လေး နီးနေပြီပေါ့ဗျာ။)
သြော်နေဦး - မေ့တော့မလို့။ ဟိုတလောက safety စာအုပ်ထွက်တော့ မိတ်ဆွေတစ်ယောက်က form တွေကို အင်္ဂလိပ်လို လိုချင်ပါတယ်တဲ့။ ကိုယ့်ဒုက္ခနဲ့ကိုယ်မို့ ဘယ်သူမှန်း မှတ်မထားမိဘူး။ အင်္ဂလိပ်ဘာသာနဲ့ ပုံစံတွေလိုချင်ရင် aye475@gmail.com ကို လှမ်းတောင်းလိုက်ပါခင်ဗျား။

ကျေးဇူးတင်ပါတယ်။

No comments: