လင်ဆိုးမယားများနှင့် သားဆိုးမအေတို့အကြောင်း

မြန်မာစကားပုံတွင် “လင်ဆိုးမယား တဖားဖား၊​ သားဆိုးမအေ တတေတေ” ဟု ရှိ၏။

လင်ဆိုးသားဆိုးကို ရထားသည့် မယားများ၊ မအေများ ဒုက္ခများရပုံကို ပြဆိုထားသည့် စကားပုံ ဖြစ်၏။

(လင်ဆိုးနှင့် သားဆိုးများကိုသာ စကားပုံထဲ ထည့်ထားပြီး မယားဆိုးနှင့် အမေဆိုးများကို စာဖွဲ့ မထားခြင်းအတွက်မူ သည် စကားပုံကို သိပ်တရားလှသည်ဟုတော့ ကျွန်ုပ် မမြင်မိပါ။ ဤဒွန္နယာကြီး၌ မယားဆိုးနှင့် အဖေဆိုး၊ အမေဆိုးများလည်း ရေတွက်မကုန်နိုင်အောင် ရှိသတည်း။ ဤသည်မှာ ကျွန်ုပ်အမြင်မျှသာဖြစ်ပြီး ကျွန်ုပ်မှန်ရမည်ဟု မဆိုလို။​ မိတ်ဆွေတို့ သဘောကွဲလွဲလိုက လွတ်လပ်စွာ သဘောကွဲလွဲနိုင်ပါသည်။ ဤကား စကားချပ်)

ဤဒွန္နယာကြီးတွင် ဆန်လည်းကုန်ပြီး မြေလည်းလေးသောသူများ အနမတဂ္ဂရှိကြောင်း ယခင်အခါများက ကျွန်ုပ်ရေးခဲ့ဖူးပါပြီ။ ၎င်းတို့သည် ကိုယ့်ကိုယ်ကိုယ်လည်း အကျိုးမပြု၊ မိသားစုကိုလည်း အကျိုးမပြု၊ ရပ်ရွာအတွက်လည်း အကျိုးမပြု၊ ဘယ်သူ့ အတွက်မှ အကျိုးမပြု၊​ ပီဘိ လူမည်ကာမတ္တများသာ ဖြစ်ချေသည်။

ကျွန်ုပ်ကား အလွန်ကံထူးလှသူ ဖြစ်၏။ ဆွေမျိုးအရင်းအချာများထဲ၌ လင်ဆိုးမယားများကိုသော်လည်းကောင်း၊ သားဆိုးမအေ များကိုသော်လည်းကောင်း ကျွန်ုပ်လက်ဝယ်ပိုင်ပိုင် ရရှိထားသောကြောင့် ဖြစ်သတည်း။ တော်ရုံအကုသိုလ်မျှနှင့် ဤလောက် ကံထူးဘို့ဆိုတာ မဖြစ်နိုင်။

အနှီလင်ဆိုး၊ သားဆိုးများကြောင့်ပင် ကျွန်ုပ်မှာ ဝေသန္တရာကို မမီတောင် ဝေသန်တစ်ဆယ်လောက်တော့ ဖြစ်ခွင့်ရလေသည်။

လင်ဆိုးမယားကား တဖားဖားမျှလောက်သာ ရှိသည်။ သားဆိုးမအေသည်လည်း တတေတေမျှလောက်သာ ရှိမည်။ လင်ရော သားရောဆိုးပါမူကား၊ ပြောစရာကို ရှိတော့မည် မဟုတ်ချေ။ တစ်ရာမှာ တစ်ယောက်ဆိုသလို အလွန်ကံထူးလှသူ ကျွန်ုပ်ကား လင်ရောသားပါဆိုးသည့် မိန်းမများနှင့်ပါ ဆွေမျိုးတော်စပ်ခွင့် ရလေ၏။ စဉ်းစားသာ ကြည့်ပါရော့ခင်ဗျာ။

ကာယကံရှင်များ၏ ဂုဏ်သိက္ခာကို ထောက်ထား၍ နာမည်များကိုမူ ကျွန်ုပ် ဖွင့်မပြောတော့ပါ။ နီးစပ်သူများကတော့ ဘယ်သူ့ကို ဆိုလိုမှန်း ရိပ်မိပါလိမ့်မည်။

ဟိုတစ်လောက ကျွန်ုပ် ‘ကိုယ်ချင်းစာတရား’ ဟူသည့် ပို့စ်ကိုရေးပြီး ဖွဘုတ်မှာတင်တော့ မလေးရှားက ကျွန်ုပ်၏ ဖွဘုတ် ပိတ်သတ်တစ်ယောက်က ကျွန်ုပ်ထံဖုန်းဆက်ပြီး သူ့အကြောင်း ဖြစ်ကြောင်းရယ်ကုန်စင် နတ်သံနှောကာ ပြောပြပါလေတော့၏။

 ‘ကိုယ်ချင်းစာတရား’ တွင် ကျွန်ုပ်ရေးသည်မှာ မိန်းမနှင့်ကလေးရှိလျက်နှင့် ဖောက်ပြန်သူ ကျွန်ုပ်မိတ်ဆွေတစ်ယောက် အကြောင်း ဖြစ်၏။ ဤပို့စ်ကိုဖတ်ပြီး သူက ဖောက်ပြန်သူ သူ့မိန်းမအကြောင်း ပြောပြခြင်း ဖြစ်၏။

သူကတော့ မလေးရှားမှာ အလုပ်လုပ်ပြီး မစားရက်၊ မသောက်ရက် ပိုက်ဆံစုကာ ရသမျှ အကုန်ပြန်ပို့သည်။ အိမ်ဝယ်မည်၊ စီးပွားရေးလုပ်ငန်းလေးတစ်ခု ထူထောင်မည်ဟူသည့် အိပ်မက်များနှင့်ပေါ့။ သို့သော် သူပြန်သွားတော့ သူ့မိန်းမလက်ထဲမှာ ဘာခြူးတစ်ပြားမှ​ မရှိ။ ပျော်ပျော်ပါးပါးကြီး စားသောက် သုံးဖြုန်းပစ်လို့ ကုန်ပြီ။ နောက်ပြီး သူ့ (လင်ငယ်ပဲဆိုပါစို့) ကောင်လေး ကို ပံ့ပိုးသည်။ သူပြန်သွားတော့ လက်ချည်းဗလာ။ သို့နှင့် မလေးရှားကို စိတ်ပျက်လက်ပျက် ပြန်ထွက်လာရသည်။

မောင်မင်းကြီးသား သူ့ပုံပြင်ပြောပြတာ တစ်နာရီနီးပါးလောက် ကြာပါသည်။ ကျွန်ုပ်လည်း သူမှ စိတ်သက်သာရာရပါစေတော့ဟု သည်းညည်းခံကာ နားထောင်ပေးရလေသော ဟူသတတ်။

ဤသည်မှာ မယားဆိုးများထဲမှ ပုံပြင်တစ်ပုဒ်ဖြစ်၏။

နောက်မယားဆိုးများလည်း ရှိသေး၏။

လင်ယောက်ျားမသိအောင် အိမ်ခြံရာများ တိုးတိုးတိတ်တိတ်ပေါင်ကာ ချဲထိုးပစ်သည့် ပုံပြင်များမှာ မကြားချင်မှ​အဆုံး ဖြစ်၏။  ဘယ်မလဲ၊ သက်သေပြပါဟုဆိုလျှင် ကျွန်ုပ် နားရွက်ဆွဲပြီး အခုချက်ချင်းပြနိုင်ပါ၏။

ကျွန်တော့်တူအရင်းခေါက်ခေါက်၏ မယားဆိုးအကြောင်းမူ အကျယ်မချဲ့လိုတော့ပါ။ ကမ္ဘာ့အဆိုးဆုံးမယား (၁၀) ယောက် စာရင်းကို စဉ်လိုက်ပါက တတိယနေရာတော့ ချိတ်လောက်ပါသည်။ အဲလေ၊ သူ့ထက်စွာသူများနှင့် တွေ့လျှင်တော့ တတိယ နေရာမရတောင် top 10 ထဲတော့ သေချာပေါက်ဝင်သည်ဟု ကျွန်ုပ် ရဲရဲကြီး အာမခံပါသည်။ (မည်ကဲ့သို့ဆိုးကြောင်း အင်တာဗျူးလိုသူများ ပြည်ရိပ်မွန်အိမ်ယာတွင် စုံစမ်းပါရန်၊ သူ့နာမည်မေးလျှင် တစ်ရပ်ကွက်လုံးသိသည်။)

ကျွန်ုပ်၏ မိတ်ဆွေထဲမှပင် နောက်တစ်ဦးမှာလည်း အတော်ဆိုးလေသည်။ မိမိ၌ အလွန်ချောမောလှပသော မိန်းမနှင့် သားသမီး နှစ်ယောက်ရှိပါလျက် အရုပ်ခပ်ဆိုးဆိုးမိန်းမနောက် ကောက်ကောက်ပါအောင် လိုက်သွားလေ၏။ ကျွန်ုပ်သူ့ကို အဘယ်ကဲ့သို့ နားလည်ရမှန်း မသိအောင်ပင် ဖြစ်မိ၏။ ကလေးနှစ်ယောက်မှာ အတော်ငယ်သေးရာ အမျိုးသမီးဖြစ်သူမှာ အတော် ကသီ လေသည်။ ကျွန်ုပ် messenger မှနေ၍ သူ့အမျိုးသားဖြစ်သူဆီ စာပို့ပါသည်။ ဘာမှ​ အကြောင်းမပြန်ပါ။ သူအကြောင်းမပြန်တော့ (ကျွန်ုပ်မှာ ဘေးလူဖြစ်လေရာ) ဟိုသားအမိကို သနားရုံကလွဲပြီး ဘာလုပ်လို့ရပါမည်နည်း။

နောက်တစ်ဦးမှာ ဖအေဆိုး ဖြစ်၏။ (ကျွန်ုပ်အပေါ်တော့ အလွန်ကောင်းပါသည်။)

သူက အရက်အလွန်သောက်၏။ အရက်ကိုလည်း အလွန်ကြိုက်သည်ထင်ပါသည်။ သောက်ပြီးတော့ အေးအေးမနေ။ လူတကာလှည့် ပြဿနာရှာသည်။ အခံရဆုံးမှာကား အတူနေသူ သားသမီးများဖြစ်၏။ နောက်တော့ ဘယ်လိုမှ သည်းမခံနိုင်သည့်အဆုံး ရဲများကို အကူအညီတောင်းကာ အချုပ်ထဲ ထည့်ခိုင်းထားရသည် ဆို၏။

ဤသည်မှာ ပုံပြင်မဟုတ်။ ယခုတော့ ဆုံးပါးသွားရှာပါပြီ။ အရက်က လူကိုနိုင်သွားခြင်းဖြစ်၏။

ကျွန်ုပ်မိတ်ဆွေအရင်းခေါက်ခေါက်တစ်ဦး၏ ဖအေမှာလည်း အတော်ဆိုးလေသည်။

ကလေးမွေးပြီးတော့ အမေလုပ်သူမှာ မီးတွင်း၌ပင် ဆုံးပါး၏။

ထိုအခါ ဒီကောင့်ကြောင့် ငါ့မိန်းမသေရတယ်ဆိုကာ သားအရင်းခေါက်ခေါက်ကို သူများပေးပစ်ရန် ကြံလေ၏။

သူ့အစ်မကြီးများက အတင်းတောင်းယူမွေးစားထားရသည် ဟူ၏။ (သူ့အကြောင်း စာဖွဲ့ဘို့ ကျွန်ုပ် သူ့ကို အင်တာဗျူးဖူးပါသည်။ သို့သော် မရေးဖြစ်သေးပါ။ တစ်ချိန်ချိန်တွင်တော့ ရေးဖြစ်မည်ထင်ပါ၏။)

များမကြာမီက စင်ကာပူတွင် သားအရင်းခေါက်ခေါက်ကို သတ်ပစ်သည့် လင်မယားအကြောင်း သတင်း၌ ဖတ်ရ၏။ ကလေးမှာ ၄ နှစ်သားမျှသာ ရှိသေးသည်။ အိမ်နီးချင်းများက မသင်္ကာ၍ ရဲကိုသတင်းပေးမှ​ သိရတာဖြစ်သည်။

မဆိုးပါသလော။ ဆိုး၏။

သဟာကတော့ ဖအေတွင်မဟုတ်၊ မအေပါဆိုးတာဖြစ်၏။

ပြီးခဲ့သည့် ဆယ်နှစ်လောက်က တရုတ်ပြည်တွင် သားတစ်ဦးက အမေအိုကို ဝက်စာကျင်းထဲ၌ ပစ်ထားသဖြင့် မိဘများကို သားသမီးများက စောင့်ရှောက်ကြရမည်ဟု ဥပဒေထုတ်ရသည်ဆိုလား၊ သိပ်မမှတ်မိတော့။ သတင်းဖတ်လိုက်ရပါသေးသည်။

ဤသည်ကိုမူ သားဆိုးမအေ၊ ဝက်ချီးပေ ဟု ဆိုရချိမ့်မည်။

ဘာရယ်မဟုတ်။ လင်ရောသားပါဆိုးသူတစ်ဦး၏ ဒွတ်ခကို မြင်တွေ့နေရသောကြောင့် မနေနိုင်၍ ရေးလိုက်ရခြင်း ဖြစ်ချေ၏။

ဩော် - ဒါနဲ့ မိတ်ဆွေများ -

IP Man 4 သွားကြည့်ကြပါရန် တိုက်တွန်းပါသည်။ ကျွန်ုပ်ကြိုက်သောမင်းသား Donnie Yen ၏ကား ဖြစ်၏။

လင်/သားဆိုးနှင့်၊ တွေ့ရခြင်း၊ ကင်းရှင်းကြပါစေ။

ကျေးဇူးတင်ပါသည်။

အေးငြိမ်း

၁၂ ဇန္နဝါရီလ၊ ၂၀၂၀။ ၀၀:၂၈ နာရီ