အရုဏ်ကျင်းတယ်ဆိုတာ
ဘာလဲလို့မေးမနေအား
အပြေးအလွှားပဲ ချက်ပြုတ်
တက်သုတ်ရိုက် ပြင်ဆင်ပြီး
မီးတွေဘာတွေ ငြိမ်းသတ်
(ဟိုက်)
ဓာတ်လှေကား ပျက်နေပါလား
စိတ်စက်များ ညစ်ပါရဲ့
တစ်ရာခြောက်ဆယ် နှစ်ထစ်သော လှေကား
မနားတမ်း ပြေးဆင်း
ဟင်း . . . . ကနဲ သက်ပြင်းအချ
ကားကလည်း စထွက် . . . .
နေမတက်ခင် အလုပ်စ
များပြားလှသောအလုပ်
တစ်ရက်လုပ်လည်း မပြီး
နှစ်ရက်လုပ်လည်း မပြီး
ငြီးလို့ကလည်း မဖြစ်
(အနို့ . . ဒါ အလုပ်ပဲလေ)
ဒီလိုနဲ့ပဲ
ခြောက်နာရီခွဲတော့
မိန်းဂိတ်မှာ တန်းစီ
လော်ရီပေါ် တိုးဝှေ့တက်
ခပ်သွက်သွက် မောင်းနှင်
အိမ်ရောက်ချင်ကြပြီလေ
အိမ်ရောက်ပြန်တော့
အသော့ကလေး ရေမိုးချိုး
ထမင်းအိုး ဟင်းအိုး ပြင်ဆင်
သူဝင်လို့ငါထွက်
မီးဖိုထဲမှာ ရှုပ်ရှက်ခပ်
ညနေစာ တစ်နပ်စား
အားလုံးပြီးမှ
ခေါင်းချလို့မှေးစက်
အိပ်မက်တောင် မမက်အားပါ
ဒါ . . . . ကျွန်တော်တို့ရဲ့ သံသရာ
အဲဒါ . . . သံသရာ။
အေးငြိမ်း (လေးမျက်နှာ)
၁၄ အောက်တိုဘာ ၁၉၉၈
နေ့လယ် ၂း၂၀ နာရီ
Tellus Marine Engineering
Keppel Shipyard
Singapore
No comments:
Post a Comment