မြန်မာစာလုံးပေါင်း သတ်ပုံကျမ်း

တမြန်မနေ့က ဖေ့စ်ဘုတ် မိတ်ဆွေတစ်ဦးက စာအုပ်များ တောင်းလာ၏။

“Construction safety နဲ့ ပတ်သတ်ပြီး စာအုပ်တွေရရင် လိုချင်ပါတယ်” . . ဟူ၏။

ကျွန်ုပ်မှာ “လုပ်တတ်တယ်” ကို “လုပ်တက်တယ်” ဟု ရေးခြင်း။ “ပတ်သက်ပြီး” ကို “ပတ်သတ်ပြီး” ဟု ရေးခြင်းများကို အလွန် အော့နှလုံးနာသူ ဖြစ်ရကား သူတောင်းထားသည့် စာအုပ်အကြောင်း မပြောမီ “ပတ်သတ်ပြီး မဟုတ်ဘူး ကိုယ့်လူရဲ့။ ပတ်သက်ပြီး ဖြစ်ရမယ်။” ဟု ပြောလိုက်၏။

ထို့နောက် ၎င်းကို မြန်မာစာလုံးပေါင်း သတ်ပုံကျမ်းစာအုပ် ပေးမည်ဟု Google တွင် “မြန်မာစာလုံးပေါင်း သတ်ပုံကျမ်း စာအုပ်” ဟု ရိုက်ထည့်လိုက်ရာ မမျှော်လင့်ဘဲ ပညာရေးဝန်ကြီးဌာန၊​ မြန်မာနိုင်ငံတိုင်းရင်းသား ဘာသာစကားဦးစီးဌာန၊ မြန်မာစာအဖွဲ့၏ မြန်မာစာလုံးပေါင်းသတ်ပုံကျမ်း နှင့် ခွဲထား အင်တာနက် စာမျက်နှာသို့ ရောက်သွားလေ၏။

Link:

http://dmnl.moe.edu.mm/Spelling/OrthographyBook/Orthography

ဤ website ရှိမှန်း ကျွန်ုပ် မသိခဲ့။ ယခင်က ကျွန်ုပ်စာရေးသည့်အခါ မသေချာသည့် စာလုံးများပါလာတိုင်း မြန်မာ စာလုံးပေါင်း သတ်ပုံကျမ်းစာအုပ်ကို လှန်နေရလေရာ အတော် အချိန်ဖင့်လေသည်။ ဤ website တွင်မူ ကိုယ်သိချင်သည့် စကားလုံးကို စက္ကန့်အနည်းငယ်အတွင်း သိနိုင်လေရာ ကျွန်ုပ်မှာ ယခင်က သတ်ပုံကျမ်းလှန်ရင်း ကုန်ခဲ့သော အချိန်များကို များစွာမှ နှမျောမိလေသော ဟူသတတ်။

ကျွန်ုပ်စာရေးသည့်အခါ စာလုံးပေါင်းကို အထူးသတိထားရေးပါသည်။ ကျွန်ုပ်ဆီသို့ ပေါက်ကရ စာလုံးပေါင်းများနှင့် ရေးလာသူများကိုလည်း လိုရင်းမပြောမီ​ စာလုံးပေါင်းကို အရင်ပြင်ခိုင်းတတ်၏။ သို့မို့ကြောင့်လည်း စာလုံးပေါင်း သတ်ပုံ အရာတွင် အတော်ဟုတ်လှပြီဟု ကိုယ့်ကိုယ် သွေးနားထင်ရောက်နေမိလေ၏။

အထက်ဖော်ပြပါ စာလုံးပေါင်း သတ်ပုံကျမ်း website တွင် လေ့ကျင့်ခန်း ဟု ပါ၏။ ကျွန်ုပ်လည်း ဟားဟား၊ ဒါလေးများ ဟု ပထမဆုံး “ခက်ခဲ” အဆင့်ကို ရွေးလိုက်၏။ ထို့နောက် မေးခွန်းများကို ဖြေလေရာ ကျွန်ုပ်၏ နားထင်ရောက်နေသော သွေးများသည် လည်ပင်းကိုကျော်ကာ ချက်ထိအောင် ကျသွားလေတော့၏။

ထိုအခါကျမှ တစ်ဆင့် ပြန်လျှော့ရ၏။ အလွယ်ဆုံးအဆင့်မှာတောင် အချို့စာလုံးများကို မှားသေးကြောင်း တွေ့ရ၏။ မိတ်ဆွေတို့လည်း ကြိုးစားဖြေကြည့်ကြစမ်းပါ။ ကိုယ့်ကိုယ်ကိုယ် ကျိန်ဆဲမိလျှင်တော့ ကျွန်ုပ်ကို အဆိုးမဆိုပါလင့်။

ကျေးဇူးတင်ပါသည်။

အေးငြိမ်း

၂၆ ဒီဇင်ဘာ၊ ၂၀၁၉