Tuesday, February 19, 2019

ကျွန်ုပ်နှင့် ISO 45001 အကြောင်း


ယခု ကျွန်တော် ISO 45001 စာအုပ်ကို အားလုံးဘာသာပြန်ပြီးသွားပါပြီ။

အမှန်က သည်စာအုပ်ကို ဇန္နဝါရီလဆန်းပိုင်းကတည်းက စရေးတာဖြစ်၏။ သို့သော် ကြားထဲမှာ ဟိုက သည်ကတောင်းထားသည့် စာလေးများလည်း ရေးရသေးတော့ (၁၀ ရက်လောက်) အဆက်ပြတ်သွားသည်။ နောက် ကိုယ်ရေးထားတာတွေ နေရာကျမကျ မြန်မာနိုင်ငံစံနှုန်းအဖွဲ့ကို သွားပြတော့ သူတို့က မူရင်းစာအုပ်ကိုသပ်သပ်၊ ရှင်းလင်းချက်ကို သပ်သပ်ရေးဘို့ အကြံပေးပါသည်။ ထို့ကြောင့် ကျွန်တော်လည်း ရေးလက်စ ISO 45001 ရှင်းလင်းချက်ကို ဘေးချထားပြီး မူရင်းစာအုပ်ကိုပဲ အတိအကျ ဘာသာပြန် လိုက်ပါသည်။

အဘယ်ကြောင့်ဆိုသော် သူတို့က MM ISO 45001 ကို ဧပြီလထဲမှာ ထုတ်ဝေဖြန့်ချိမည် ဆို၏။ ထို့ကြောင့် ကျွန်တော့်မြန်မာ ဗားရှင်းကိုပါ ထိုစာအုပ်နှင့် တွဲရောင်းချင်သည်။ ထို့ကြောင့် ကျွန်တော်လည်း ISO 45001 မူရင်းစာအုပ်ကို နောက်ကလူလိုက်လာ သလို တက်သုတ်ရိုက် ဘာသာပြန်ပါသည်။

မူလက ဖေဖော်ဝါရီလ ၁၅ ရက်နေ့အပြီးဟု မှန်းပြီး အသားကုန်ဆော်တာ ကြားထဲမှာ ညဘက် စာရေးရင်း၊ မနေနိုင်မထိုင်နိုင် လက်ဆော့ရင်း Youtube က ရုပ်ရှင်ကောင်း ကောင်းလေးများတွေ့မိပြီး ကြည့်မိသွားတာနှင့် ကြုံကြိုက်ပြန်လေတော့ သည်ကနေ့ 19/2/2019, မနက် ၅ နာရီလောက်မှ ပြီး၏။

အယ်မယ်လေး၊ လွယ်လွယ်လေးမထင်လိုက်ပါလေနဲ့ ကိုယ့်လူတို့။

အင်တာနေရှင်နယ် စတင်းဒတ် ဆိုတော့ မူရင်းဆိုလိုချက်ကနေ သွေဖီမသွားအောင် အတော့်ကို အားစိုက်ကာ ပြန်ဆိုရလေသည်။
သည်စာအုပ်ဘာသာပြန်ဘို့ မြန်မာစာအဖွဲ့ကထုတ်ဝေသည့် အင်္ဂလိပ်-မြန်မာအဘိဓာန် စာအုပ်ကြီး ဘေးချကာ ရည်ညွှန်းရလေ သည်။ အချို့စကားလုံးများ၏ အဓိပ္ပာယ်ကို သိသည့်တိုင် သည့်ထက်ပိုလှမည့် စကားလုံးလေးများရှိမလားလို့ အဘိဓာန်လှန်ရသေး၏။  

သို့သော် အဘိဓာန်ကိုချည်းပဲလည်း အားကိုးလို့မရ။ အဘိဓာန်က ရိုးရိုးအင်္ဂလိပ်စကားကိုပဲ ဘာသာပြန်ပေးတာ ဖြစ်၏။ ဘာသာရပ် ဆိုင်ရာ ဝေါဟာရတွေကျတော့ အဘိဓာန်ပါ စကားရပ်များအတိုင်း ဘာသာပြန်လို့ မရတာတွေ ရှိပါသည်။ ဥပမာ - barrier ဆိုပါစို့။ အဘိဓာန်ကိုလှန်လိုက်လျှင် အတားအဆီးဆိုတာ တွေ့ရမည်။ သို့သော် အကယ်၍သာ အတားအဆီးဟု ဘာသာပြန်ထည့်လိုက်ပါ က မူရင်းဆိုလိုချက်မှ လွဲချော်သွားမည့်ပြင် မလိုလားအပ်သည့် ပြဿနာများပင် ပေါ်လာနိုင်ပေလေသေးသည်။ အဘယ်ကြောင့် ဤကဲ့သို့ ဘာသာပြန်ရသည် ဆိုသည့်အကြောင်း ကျွန်တော် အမှာစာတွင် ထည့်ရေးထားပါသည်။

နောက်ပြီး ကျွန်ုပ်ကို ဒုက္ခပေးသည့် စကားလုံးများရှိ၏။ update ဆိုပါစို့။ update ဆိုတာဘာလဲဆိုတာကို သင်လည်း နားလည် သည်။ ကျွန်ုပ်လည်း နားလည်သည်။ သို့သော် update ကို မည်သည့် မြန်မာစကားလုံးနှင့် ဖလှယ်ပါမည်နည်း။ ထို့ပြင် up-to-date ကိုရော။ အင်္ဂလိပ်လို မဖြစ်စလောက် အက္ခရာကလေးအနည်းငယ်မျှကို စာဖတ်သူများ သဘောပေါက်စေရန် ကျွန်ုပ်မှာ မြန်မာ အက္ခရာ အတော်များများ မဖြစ်မနေသုံးလိုက်ရလေသည်။

သည် စတင်းဒတ်ကြီးဘာသာပြန်တာ ကျွန်ုပ်အတွက် ဘာငွေရေးကြေးရေး အကျိုးအမြတ်မှ မရှိပါ။ ဒါဆို ဘာကြောင့် ပြန်ဆိုရ သနည်း ဟူမူ ပြန်ချင်လို့ ပြန်တာသာဖြစ်ပါသည်။ ကိုင်း - မှတ်ကရေ့ာ။

မြန်မာပြည်သား လူအများတို့သည် သေနည်းပေါင်းစုံနှင့် နေ့စဉ် သေနေကြလေ၏။ မရှိတာထက် မသိတာခက် ဆိုသလို ဖြစ်လိုက်သမျှကိစ္စအားလုံး မသိ၍ သေတာချည်း ဖြစ်၏။ မနေ့ကမှ ရွှေပြည်သာမှာ ဘွိုင်လာပေါက်လို့ဆိုလား။ အစုလိုက် အပြုံလိုက်သေသည်။ အစုလိုက် အပြုံလိုက် ဆေးရုံရောက်ကြသည်။

ကြွေးထူတော့ မပူ၊ သန်းထူတော့ မယားဆိုသလို သည်လိုကိစ္စမျိုးတွေ မြင်ရ၊ ကြားရဖန်များတော့ ဘာမှ ဆန်းပြားသည် မထင်ကြတော့။ သြော် - ဟုတ်လား ဟုနှင့် ပြီးသွားလေသည်။

ဤသည့်ကိစ္စများမှာ system failure ဖြစ်၏။

ကျွန်ုပ်တို့တိုင်းပြည်၌ ကျင့်သုံးနေသည့်စနစ်မှာ ကျုပ်ကျက်လိစနစ်ဖြစ်ကြောင်း ကျွန်တော် အကြိမ်ရေတော်တော်များများ ပြောခဲ့ပြီး ပါပြီ။ မည်သည့်ဌာနမဆို သည်စနစ်နှင့်သာ နှစ်ပါးသွားကြ၏။ ယနေ့ထိလည်း သည်စနစ်ကို ဌာနတိုင်း၊ ကုမ္ပဏီတိုင်း၊ အရာရှိကြီး တိုင်း ရေလဲနှင့်သုံးဆဲဖြစ်၏။ မြန်မာပြည်၌ ဘာစတင်းဒတ်မှမလို။ ကျုပ်ကျက်လိစနစ်ရှိလျှင် ကိစ္စအားလုံး ပြီးသည်။ အဲလေ အပေါ်မှာပြောခဲ့သလို လူလေးဘာလေးတော့ အနည်းအပါး စတေးရပေမပေါ့။

OHSAS 18001 တုံးကလည်း ကျွန်ုပ်မှာ မနေနိုင်မထိုင်နိုင် တစ်အုပ်လုံး အစအဆုံး ဘာသာပြန်ခဲ့ဖူးသေး၏။ သို့သော် ကျွန်တော့ ဘလောက်ပေါ်တွင်ပင် ပြီးသွားသည်။ စာအုပ်ထွက်လာရေး မည်သူမှစိတ်မဝင်စားကြ။ ဘယ်သူမပြုမိမိမှုဖြစ်သည့်အတွက် ကျွန်ုပ်မှာ ကိုယ့်ကိုယ်ကိုယ် ကျိန်ဆဲရုံမှတပါး ဘာမှ မတတ်နိုင်။

ယခု ISO 45001 ဆိုတာကြီး ပေါ်လာတော့လည်း ကျွန်ုပ်မှာ အမှတ်မရှိ။ ပညာစွမ်းလေး ပြချင်လာမိပြန်လေ၏။ ကျွန်ုပ်တို့ မြန်မာပြည်သူပြည်သားတွေ ဆေ့ဖတီးစတင်းဒတ် ဆိုတာကြီးကို အင်းဂလစ်ရ်ှလို ဖတ်လို့ နားမလည်နိုင်။ သည်တော့ ငါမကယ် သေဖွယ်ရာရှိသည်ဟု သဘောပိုက်ကာ မြန်မာလို ဖတ်စေချင်မိပြန်လေ၏။

အထက်တွင်ဖော်ပြခဲ့သော လူသေမှုများကို တားဆီးဘို့ရာ သိပ်ခဲယဉ်းလှသည့် အလုပ်မဟုတ်ပါ။ လူတွေ လုပ်ချင်စိတ်ရှိဘို့သာ လိုပါသည်။ သို့သော် လုပ်ချင်စိတ်ရှိသည့်တိုင် ဘယ်လိုလုပ်ရမှန်းမသိပြန်လည်း ဒုက္ခ။ အဲသည်အတွက် လုပ်ချင်စိတ်ရှိသူတွေ လုပ်နိုင်ကြပါစေဟူသည့် စေတနာနှင့် သည်စာအုပ်ကို ဖတ်ချင်သူရှိသည်ဖြစ်စေ မရှိသည်ဖြစ်စေ ဘာသာပြန်ခြင်း ဖြစ်၏။

ကံအားလျော်စွာ မြန်မာနိုင်ငံစံနှုန်းအဖွဲ့က ယူမည်ဆိုတော့ OHSAS 18001 တုံးကလို သုံးမယ့်သူမရှိလို့ ပစ်လိုက်ရသည့်ဘဝ ရောက်မှာ မပူရတော့။ အနည်းဆုံးတော့ စာအုပ်ဖြစ်လာမည်။ စိတ်ဝင်စားသူတွေ သူတို့ဆီမှာ ဝယ်နိုင်မည်။ သူတို့ကတော့ စာအုပ်မှာ ဘာသာပြန်သည့်သူနာမည် ထည့်ပေးမည်ဆို၏။ ကျေးဇူးတင်ပါ၏ မောင်မင်းကြီးသားများ။

သို့သော် သည်စာအုပ်ကို ဖတ်ကြည့်ပါ။ အသင်တို့နားလည်ဘို့ ခက်ပါလိမ့်မည်။ သို့မို့ကြောင့် မူလရည်ရွယ်ရင်းဖြစ်သော ရှင်းလင်းချက်စာအုပ်ကို ဆက်ရေးနေပါသည်။ သည်စာအုပ်မှာတော့ နမူနာတွေ၊ ဥပမာတွေ၊ ဥပမေးယျတွေနှင့် ရှင်းပြမှာ ဖြစ်သည့်အတွက် နားလည်နိုင်ကြလိမ့်မည်ဟု ယူဆပါသည်။ (ဒါမှနားမလည်သေးရင် ကျုပ်ကို ခေါ်လိုက်ပေါ့ဗျာ။ လာသင်ပေး မယ်။)

တစ်နည်းအားဖြင့်လည်း သည်စာအုပ်မှာ မြန်မာပြည်အတွက် ကျွန်ုပ်ပေးချင်သော လက်ဆောင်တစ်ခု ဖြစ်ပါသည်။

သည်စာအုပ်က ဒုတိယစာအုပ်ဖြစ်ပြီး ပထမစာအုပ်မှာ မြန်မာပြက္ခဒိန်စာအုပ်ဖြစ်ပါသည်။ မြန်မာများအကြား တဖြည်းဖြည်း ပျောက်ကွယ်လိုက်လာနေပြီ ဖြစ်သော မြန်မာပြက္ခဒိန်အကြောင်းကို စာဖြင့်ရေးသားမှတ်တမ်းတင်ထားလိုက်ခြင်းဖြင့် နောင်လာ နောက်သားတို့အတွက် ဖတ်ရှု ရည်ညွှန်းလိုက ရည်ညွှန်းနိုင်ရန် ဖြစ်လေသည်။

ယခု ကျွန်တော် ISO 45001 စာအုပ်ကို ပေးလိုက်ပြန်ပါပြီ။ သို့သော် စံနှုန်းသည် စံနှုန်းသာဖြစ်ပြီး သည်စံနှုန်းကြီး ရပြီဆိုကာမျှဖြင့် ဘာအန္တရာယ်မှ မရှိတော့ပြီဟု ဘယ်ကဲ့သို့ အာမခံနိုင်ပါမည်နည်း။ စံနှုန်းသည် စံနှုန်းသာဖြစ်ပြီး တကယ် အန္တရာယ်ကင်းဘို့၊ ရောဂါ တွေမရဘို့ဆိုတာ သည်စံနှုန်းကို ဘယ်အတိုင်းအတာအထိ အကောင်အထည်ဖော်သလဲ၊ လိုက်နာသလဲ ဆိုသည့်အပေါ် မူတည်ပါ သည်။ မူလစံနှုန်းစာအုပ်တွင်လည်း ဤကဲ့သို့ပင် ရှင်းရှင်းလင်းလင်းဖော်ပြထားပါသည်။

"ဤစံနှုန်းက အန္တရာယ်များကင်းပါမည်ဟု သင်တို့ကို အာမ မခံပါ" ဟု နိဒါန်းတွင် ဖော်ပြထား၏။

"ရန်သူဝိုင်းထား၊ ထိုယောက်ျားကား၊ ပြေးသွားဘို့ရာ၊ လမ်းပေါက်သာလျက်၊ ပြေးမထွက်၊ လမ်းတွက်မဟုတ်ချေ" - ဟု မဟာဝိသုဒ္ဓါရုံ ဆရာတော် စပ်ဆိုခဲ့ဖူးလေပြီ။

အသင်တို့လက်ထဲကို ကျွန်ုပ်က ISO 45001 စာအုပ်ကို ဘာသာပြန်ကာ ထည့်ပေးလိုက်ပါပြီ။ အသက်များမသေအောင်၊ ထိခိုက်ရှနာမှုများမဖြစ်အောင် တားဆီးဘို့၊ ကာကွယ်ဘို့ဆိုသည်မှာ အသင်တို့အပေါ်တွင်သာ မူတည်ပါသည်။  

ISO 45001 ရှင်းလင်းချက်စာအုပ်ရေးပြီးလျှင် ISO 9001, ISO 14001 စာအုပ်များကို ဆက်လက်ပြန်ဆိုပါမည်။

ထို့အပြင်လည်း ကျွန်တော့်မှာ အလွန်ပြင်းပြသော ဆန္ဒတစ်ခုရှိပါသေးသည်။
ဤသည်ကား "ဂဟေဆက်နည်းအတတ်ပညာ" စာအုပ်ကြီးများကို ဘာသာပြန်ဆိုရေး ဖြစ်ပါသည်။ အနည်းဆုံး ၃ တွဲလောက် ရေးပါမည်။ ဤစာအုပ်ကို ကျောင်းများတွင် လက်ကိုင်ထား သုံးနိုင်သည်ထိ ရေးပါမည်။ စထားတာတောင် အခန်း ၅ ခန်းလောက် ပြီးနေပါပြီ။

ဂဟေစာအုပ်ရေးမည်ဟု ရည်ရွယ်၍ စုဆောင်းထားတာ ကျွန်တော့်မှာ စာအုပ်တော်တော်များများ ရှိ၏။ အင်တာနက်က download လုပ်ယူသည်။ စာကြည့်တိုက်က ငှားကာ မိတ္တူဆွဲထားသည်။ Amazon က မှာသည်။

ဂဟေစာအုပ်မှာ ကျွန်ုပ်၏ မြန်မာပြည်အတွက် တတိယလက်ဆောင် ဖြစ်ပါသည်။

ကျေးဇူးတင်ပါသည်။

အေးငြိမ်း
၁၉ ဖေဖော်ဝါရီလ၊ ၂၀၁၉

No comments: