စလုံး၌ ကြိုတင်မဲပေးခြင်း

မိတ်ဆွေအပေါင်းတို့ -

 

မနက်ဖြန်မှစတင်ကာ အသင်တို့သည် အသင်တို့ အလိုရှိအပ်သော အစိုးရတစ်ရပ်ကို ရွေးချယ်ခွင့် ရပေတော့မည်။

မဲပေးခြင်းဟူသည် နိုင်ငံသားတိုင်း၏ တာဝန်ဖြစ်၏။

သည်နိုင်ငံထဲမှာနေပြီး ကိုယ့်အစိုးရကို ကိုယ်ရွေးချယ်ရန် ပျက်ကွက်သူသည် နိုင်ငံသားတာဝန် ပျက်ကွက်သူသာ ဖြစ်၏။

အသင်တို့သည် နိုင်ငံသားပြီသစွာ တာဝန်ကျေကြပါကုန်လော့။

ဗလွတ်ရွှတ်တလူများ ပြောစကားကို နားမယောင်လေနှင့်။

မဲမပေးရန် လှုံ့ဆော်နေသူများမှာ စမ်းမ်သင်းရောင်းနေသူများသာ ဖြစ်၏။

 

မဲပေးခွင့်ရရန် ပထမဆုံးလုပ်ရမည့်အလုပ်မှာ မဲစာရင်းတွင် ကိုယ့်နာမည်ပါမပါ ဦးစွာစစ်ဆေးရန်ဖြစ်၏။

မဲစာရင်းတွင် မိမိနာမည်ပါမလာပါက အောက်တိုဘာ ၂ ရက်နေ့ နောက်ဆုံးထားပြီး သံရုံး email: ge2020info@gmail.com ကို ပို့ပြီးအကြောင်းကြားပါ။ 

မဲစာရင်းတွင်နာမည်မပါသူများကို သံရုံးက မြန်မာနိုင်ငံသို့ ပြန်လည် အကြောင်းကြားပါလိမ့်မည်။

 

မဲစာရင်းတွင် မိမိနာမည်တွေ့ပါက စာမျက်နှာနံပါတ်နှင့် အမှတ်စဉ်ကို မှတ်ထားပါ။

မဲပေးသည့်နေ့တွင် မိမိအမှတ်စဉ်ကို ပြောလိုက်ပါက ချက်ချင်းရှာနိုင်သဖြင့် အချိန်ကုန်သက်သာမည်ဖြစ်၏။

 

မဲပေးမည့်နေ့တွင် မိမိရက်ချိန်းယူထားသည့်နေ့ အချိန်မတိုင်မီ ရောက်အောင်သွားပါ။

နိုင်ငံရေးတံဆိပ်/အမှတ်အသားပါသည့် အဝတ်အစားများ ဝတ်မသွားပါနှင့်။

မဲရုံတွင် ဘောပင်ပေးထားပါလိမ့်မည်။ သို့သော် လိုရမယ်ရဆောင်သွားစေချင်ပါသည်။ မင် အပြာ (သို့) အနက်

စင်ကာပူတွင် အမြဲမိုးရွာတတ်၍ ထီးဆောင်သွားပါ။ အဆာပြေမုန့်၊ ရေ တို့လိုချင်လိုပါမည်။

အရေးကြီးသည်မှာ အောက်ပါ စာရွက်စာတမ်းသုံးခု ဖြစ်ပါသည်။ ယနေ့ညကတည်းက ပြင်ထားပါ။

 

၁။ Booking လုပ်စဉ်က ပို့ပေးထားသည့် computer bar code ပါသည့် စာရွက်

၂။ ပတ်စ်ပို့

၃။ Work Permit, S Pass, EP, PR ကဒ်မူရင်း

 

လူတစ်ဦးလျှင် အနည်းဆုံး မဲ (၃) မဲပေးရပါမည်။

၁။ ပြည်သူ့လွှတ်တော်

၂။ အမျိုးသားလွှတ်တော်

၃။ ပြည်နယ်/တိုင်းဒေသကြီးလွှတ်တော်

၄။ အကယ်၍ လူမျိုးစုများဆိုလျှင် မိမိလူမျိုးစုအတွက် လူမျိုးရေးရာဝန်ကြီးအတွက် တစ်မဲ ထပ်ပေးရပါမည်။

 

မဲစာရွက်ရပြီဆိုလျှင် စစ်ဆေးကြည့်ပါ။ 

မဲစာရွက်သည် ပေါက်ပြဲ/ပျက်စီးမနေရ။

မဲရုံမှူးလက်မှတ်ပါရမည်။

ရွေးကောက်ပွဲ တံဆိပ်တုံးနှိပ်ထားရမည်။

မဲစာရွက်သည် ပေါက်ပြဲပျက်စီးနေ၊ မဲရုံမှူးလက်မှတ်၊ တံဆိပ်တုံးတို့မပါပါက မဲရုံမှူးထံတွင် အသစ်တောင်းပါ။

ထို့နောက် လျှို့ဝှက်ဆန္ဒမဲပေးခန်းထဲသို့သွားပါ။

မဲပေးသည့်အခါ ပုံတွင်ပြထားသကဲ့သို့ မိမိရွေးချယ်လိုသည့် ကိုယ်စားလှယ်လောင်းဘေး အကွက်ထဲတွင် အမှန်ခြစ် ခြစ်ရပါမည်။

ထို့နောက် မဲစာရွက်ကိုခေါက်ရွက် မဲပုံးအတွင်းထည့်ပါ။

ပြီးလျှင် လက်သန်းကို မင်တို့ပါ။

ပြည်နယ်နှင့်တိုင်းအလိုက် ကောင်တာများခွဲထားပါသည်။ ပုံတွင်ကြည့်ပါ။ 

မိမိ ပြည်နယ်/တိုင်းရှိရာ ကောင်တာသို့သွားပါ။

လာသည့်အခါ မျက်နှာအကာ Face Mask တပ်လာပါ။

Covid ကာလဖြစ်၍ လူစုလူဝေးမလုပ်ရန် တင်းတင်းကြပ်ကြပ်တားမြစ်ထားပါသည်။

စုရုံးစုရုံးမလုပ်ပါနှင့်။

စိန့်မာတင်လမ်း တစ်ဖက်တစ်ချက်တွင် ၁ မီတာစီခြား၍ တန်းစီရပါမည်။

ထို့နောက် မဲပေးပြီးသည်နှင့် ချက်ချင်းပြန်ပါ။ သူငယ်ချင်းစောင့်တာဘာညာ မလုပ်ပါနှင့်။

 

မိမိမဲပေးမည့်ရက်နှင့် အချိန် ကို သေသေချာချာမှတ်သားထားပါ။ မမေ့ပါစေနှင့်။

 

ကျေးဇူးတင်ပါသည်။

 

အေးငြိမ်း

၃၀ စက်တင်ဘာလ၊ ၂၀၂၀