ကျွန်ုပ်တို့ တစ်ဦးနှင့်တစ်ဦး ဆက်ဆံကြရာတွင် နားလည်သည်းခံခွင့်လွှတ်ခြင်း အင်မတန် အရေးကြီးလှ၏။
လူပေကပဲ။ မည်သူအမှားမလုပ်ဖူးသူ ရှိပါသနည်း။
ဟိုဆရာတော်ကြီးပြောတာ သွားသတိရမိပါသည်။
ဟေ့ - ဝိနည်းလွတ်ချင်လွယ်ပါ့ကွာ။ သင်္ကန်းခေါင်းမြီးခြုံပြီး အိပ်နေရုံရှိတာပဲ ဟူ၏။
ဘာမှမလုပ်သူ ဘာမှ မှားမည်မဟုတ်။
လုပ်ပြီဆိုလျှင်တော့ အနည်းနှင့်အများ မှားမည်။
များများလုပ်လျှင် များများမှားမည်။
ညူဂျီသည် အခက်အခဲပေါင်းများစွာကို ရင်ဆိုင်ကျော်လွှားရင်း အလုပ်လုပ်နေရတာ ဖြစ်၏။
ညူဂျီမှလူများသည်လည်း သင်တို့ကျုပ်တို့လို ပြည်သူထဲက ပြည်သူတွေသာဖြစ်ကြောင်း မမေ့ပါလင့်။
ညူဂျီလို့သာ လုပ်ရသည်။ သူတို့မှာ ဘာကမှမရှိ။ လက်ချည်းဗလာြဖစ်၏။
ခညားတို့ ကျုပ်တို့ ပြည်သူတွေ၏ ဝိုင်းဝန်းပံ့ပိုးမှုဖြင့်သာ ရပ်တည်နေရတာဖြစ်၏။
သဟာကို ခညားတို့ ကျုပ်တို့အသိ။
သူတို့မှာ အခက်အခဲနှင့် စိန်ခေါ်မှုပေါင်းများစွာ ရှိ၏။
ဘဏ္ဍာရေး၊ ရုံးအဆောက်အအုံနှင့် အသုံးအဆောင်ပစ္စည်းများ၊ ဆက်သွယ်ရေး၊ သွားလာရေး၊ လူအရင်းအမြစ်၊ နည်းပညာ . . . . .
နောက်ပြီး သွားချင်သလိုသွား၊ လာချင်သလိုလာ၊ လွတ်လွတ်လပ်လပ် လှုပ်ရှားလို့ရတာလည်း မဟုတ်။
သဟာကို ကျွန်ုပ်တို့ နားလည်ပေးရမည်။
နောက်တစ်ခုက ညူဂျီအားဖြင့်သာ ကမ္ဘာ့နိုင်ငံများနှင့် ကျွန်ုပ်တို့ ဆက်သွယ်နိုင်ခြင်း ဖြစ်၏။
မြန်မာနိုင်ငံဟု ကမ္ဘာက အသိအမှတ်ပြုချင်လျှင် အစိုးရတစ်ရပ်ကို အသိအမှတ်မပြုဘဲ လူပုဂ္ဂိုလ်တစ်ဦးတစ်ယောက် တည်းကို အသိအမှတ်ပြု၍ မရ။ သည်လောက်ဆိုလျှင် ညူဂျီ၏ အရေးပါပုံကို ခန့်မှန်းနိုင်ပါပြီ။
ကျွန်ုပ်တို့ တစ်နိုင်ငံလုံးက ဟို ခွားသဒေါင်းဇေးတွေကို ချက်ချင်းလက်ငင်း မသာဖော်ပစ်ချင်တာ မှန်၏။
ညူဂျီ၏ လုပ်ပုံကိုင်နည်းများကို ကျွတ်တို့ စိတ်တိုင်းမကျနိုင်သည်များလည်း ရှိတာမှန်၏။
သို့သော် သူတို့လည်း အတတ်နိုင်ဆုံး ကြိုးစားနေကြသည်ကို ယုံမှားသံသယ ရှိစရာမလို။
အခက်အခဲပေါင်းများစွာထဲမှ သည်မျှကြိုးစားပေးနေကြသည်ကိုပင် ကျွန်ုပ်တို့ ကျေးဇူးတင်ရပေဦးမည်။
အမျိုးယုတ်တို့သည် ကျွန်ုပ်တို့ကို စိတ်ဝမ်းကွဲအောင် နည်းမျိုးစုံဖြင့် သွေးထိုးပေးလျက်ရှိ၏။
သွေးခွဲစကားများ နားမယောင်ကြပါနှင့်။
စိတ်ဝမ်းကွဲစေမည့် စကားများ မပြောကြပါစို့နဲ့ ကွယ်ရို့။
ကျွန်ုပ်တို့၏ရန်သူမှာ တစ်ဦးတည်းသာ ဖြစ်၏။
ထိုရန်သူကို ဦးတည် တိုက်ခိုက်ကြပါစို့။
အို . . . အမောင်တို့ အမိတို့
တော်လှန်ရေးလုပ်နေသူအချင်းချင်း သည်းခံခွင့်လွှတ်ပေးကြပါဘိ။
ခွေးဝမ်းသာအောင် လေလည်မပြကြပါနှင့်။
နွားကွဲလျှင် ကျားဆွဲလိမ့်မည်။
ကျွန်ုပ် လေးနက်စွာ မေတ္တာရပ်ခံပါ၏။
ကျေးဇူးတင်ပါသည်။
အေးငြိမ်း
၃၀ ဒီဇင်ဘာလ၊ ၂၀၂၁
No comments:
Post a Comment