Risks and Opportunities of Spring Revolution

Risk and Opportunity အကြောင်း ယခင်က ကျွန်ုပ် ရေးခဲ့ဖူးပါ၏။

ယခု ဒေါင်းဇားများ နိုင်ငံတော်အာဏာကို ဓားပြတိုက် ရယူသွားရာတွင်လည်း Risk and Opportinity အများအပြား ရှိကြောင်း တွေ့ရှိရ၏။

 

ဖေဖော်ဝါရီ ၁ ရက်နောက်ပိုင်းရှိ ကျွန်ုပ်တို့အတွက် risk မှာ အလွန်ကြီးမား များပြားလှပါသည်။

သို့သော်လည်း ဝမ်းသာစရာ opportunity များလည်း အများအပြား ပေါ်ထွက်ခဲ့ပြီဖြစ်၏။

 

(၁) Risks

 

ပထမ Risk များအကြောင်း ရေးပြပါမည်။

 

ပထမဦးဆုံး ကျေးဇူးတင်စွာ ဖော်ပြရမည်မှာ CDM ဝန်ထမ်းများပင် ဖြစ်၏။

ကျွန်ုပ်သည်လည်း နှစ်အတန်ကြာ ဝန်ထမ်းလုပ်ခဲ့ဖူးသည်ဖြစ်ရာ ဝန်ထမ်းများအကြောင်း ကောင်းစွာသိပါ၏။

 

စစ်ခွေးများ ရူးမိုက်စွာ အာဏာသိမ်းလိုက်သည့်အခါ နိုင်ငံ့ဝန်ထမ်းများသည် အလုပ်မဆင်းပဲ ဆန္ဒပြကြကုန်၏။

အစိုးရယန္တရားကြီးတစ်ခုလုံး ရပ်တန့်သွားလျှင် သည်စစ်ခွေးများ နိုင်ငံကို မည်သို့မည်ပုံ အုပ်ချုပ်ပါမည်နည်း။

CDM ၏ အဟုန်သည် စစ်ခွေးများအပေါ် ပြင်းစွာရိုက်ခတ်၏။

 

သို့သော် CDM သမားများအဖို့လည်း risk မှာ လွန်စွာကြီး၏။

အတော်များများသော အစိုးရဝန်ထမ်းများမှာ ဝန်ထမ်းအိမ်ယာများတွင် နေကြသည်ဖြစ်ရာ အကယ်၍ ဝန်ထမ်း မဟုတ်တော့ ဆိုလျှင် ဘယ်သွားနေပါမည်နည်း။ နောက်ပြီး တစ်ယောက်တည်းမဟုတ်။ မိသားစုလိုက်ဖြစ်၏။ တစ်ရက်တည်းမဟုတ်။ ဘယ်လောက်ကြာမှန်းမသိသော ကာလ အပိုင်းအခြားတစ်ခုထိ ဖြစ်၏။ 

 

နောက်ပြီးတော့ ဝန်ထမ်းဆိုတာ ဝန်ထမ်းလခပေါ် မှီတည်နေကြရတာ ဖြစ်၏။

ဝန်ထမ်းမလုပ်တော့ ဆိုလျှင် . . . . 

 

ပိုက်ဆံဆိုတာ ဝင်တာမဝင်တာ အပထားလို့ အထွက်ကတော့ နေ့တိုင်းရှိနေတာ ဖြစ်၏။

တစ်ဝမ်းတစ်ခါးဆိုတာ ပြောတော့သာလွယ်သည်။ လက်တွေ့မှာ အလွန်ခက်သည့် ကိစ္စဖြစ်၏။

ဤသည်မှာ ၎င်းတို့အတွက် ကြီးစွာသော စိန်ခေါ်မှု (very very high risk) ဖြစ်၏။

သည့်အတွက်ပင် ကျွန်ုပ်သည် CDM လုပ်သည့် ဝန်ထမ်းများအပေါ် အလွန်လေးစားကြည်ညိုမိလေ၏။ 

 

သေတ္တာကလေးတွေရွက်၊ ကြက်ကလေးတွေပိုက်ပြီး မီးရထားဝန်ထမ်းတွေ ဝန်ထမ်းအိမ်ယာက ဆင်းလာတော့ သူတို့ကို ကြည့်ပြီး ကျွန်ုပ်မှာ ဝမ်းနည်းဝမ်းသာ ဖြစ်ကာ မျက်ရည်များပင် စို့မိ၏။ သူတို့ ဘယ်သွားနေကြ၊ ဘာတွေနှင့် စားကြမည်နည်း။ 

သူတို့၏ စိတ်ဓာတ်ကို ကျွန်ုပ်မချီးကျူးပဲ မနေနိုင်ပါ။

အရေးတော်ပုံကြီး အောင်ပြီး အေးအေးဆေးဆေးဖြစ်သည့်အခါ သူတို့ဆီ ကျွန်ုပ်သွားပါဦးမည်။ 

 

မီးရထားဝန်ထမ်းများသာ မဟုတ်ပါ။ ကျန်ဝန်ထမ်းအားလုံးလည်း သည်အတိုင်းပင် ဖြစ်၏။

 

နောက်တစ်ခု ကျေးဇူးတင်စွာ ဖော်ပြရမည်မှာ ဂျန်ဇီများ ဖြစ်၏။

 

သေနတ်များ တဖြောင်းဖြောင်း တဒိုင်းဒိုင်း ပစ်နေပါလျက် သူတို့သည် မကြောက်မရွံ့ နောက်မတွန့်ပဲ စစ်ခွေးများကို အစွမ်းကုန် ဆန့်ကျင်ကြကုန်၏။ ကျွန်ုပ်တို့ ဂျင်လီးများ ကွယ်ရာထောင့်ရာမှနေ၍ ဟိုလိုလုပ်ပါလား၊ ဒီလိုလုပ်ပါလား၊ ဟိုလိုတော့ မဖြစ်နိုင်ဘူး၊ ဒီလူတော့ လာလိမ့်မယ် ဟု မယောင်သည့်နေရာများကို ဆီလူးနေချိန်၌ ဆယ်ကျော်သက်များ မှာ မမောနိုင်မပန်းနိုင် နေ့စဉ် လမ်းထွက်လျက်ရှိ၏။ တစ်နေ့တစ်မျိုး မရိုးနိုင်သည့် ပုံစံဖြင့် စစ်အာဏာရူးများကို ဆန့်ကျင်နေကြ၏။

 

၎င်းတို့၏ risk မှာ တကယ့် risk ဖြစ်၏။ 

အချိန်မရွေး ခေါင်းကို ကျည်ဆံမှန်သွားနိုင်၏။

အချိန်မရွေး အသက်နှင့်ကိုယ် အိုးစားကွဲသွားနိုင်၏။

အချိန်မရွေး ဖမ်းဆီးနှိပ်စက်တာ ခံသွားရနိုင်၏။

သို့သော် သူတို့မျက်နှာတွင် (ကလေးမကလေးများကအစ) ကြောက်ရွံ့တုန်လှုပ်စိတ်ကို နည်းနည်းကလေးမှ​ မတွေ့ရ။

ကျွန်ုပ်တို့ မျိုးဆက်များအတွက် ကျွန်ုပ် အကြီးအကျယ် အားရမိ၏။

 

နောက်ဆုံး ကျေးဇူးတင်ရမည်မှာ ပြည်သူများဖြစ်၏။

ပြည်သူများသည်လည်း မိမိတို့ ဆန္ဒပြအုပ်စုကို အချိန်မရွေး ဖြိုခွဲခံရနိုင်တာ၊ အကြမ်းဖက်လာမှာ၊ အချိန်မရွေး အသက်ပါ သွားနိုင်တာ မသိမဟုတ်။ သိကြပါ၏။ ဤသည်မှာလည်း အသက်နှင့်ရင်းရသော risk ဖြစ်၏။

သို့သော် သူတို့သည်လည်း တစ်ရက်ကလေးမှ မငြီးငြူကြဘဲ တောရောမြို့ပါမကျန် စစ်ခွေးများကို အစွမ်းကုန် တိုက်ထုတ်ကြကုန်၏။

ပြည်သူတို့၏ သပိတ်စစ်ကြောင်းများကို ကြည့်လျက် ကျွန်တော် အလွန်နှစ်ထောင်းအားရ ဖြစ်လှ၏။

ကျွန်ုပ်တို့ပြည်သူများကိုလည်း အလွန်ချစ်လှ၏။

ကျွန်ုပ်တို့ပြည်သူများသည် တစ်ဦးကိုတစ်ဦး ဖေးမကြ၏။ ကူညီကြ၏။ စောင့်ရှောက်ကြ၏။

ငွေအား၊ လူအား၊ စိတ်ဓာတ်ခွန်အားများဖြင့် အားဖြည့် ကူညီကြ၏။

 

ကျွန်ုပ်တို့ မြန်မာပြည်တွင်းမှ ပြည်သူများသည် စစ်အာဏာရူးများကို ဆန့်ကျင်သည့် ပို့စ်များကို ဆက်တိုက်တင်ကြ၏။

ဤသို့တင်ခြင်းဖြင့် အချိန်မရွေး လာအဖမ်းခံရနိုင်သည်ကို သိ၏။ 

သို့ပါလျက် အရဲကိုးကာ တင်ကြ၏။ 

 

ဆိုရလျှင် ကျွန်ုပ်တို့ ပြည်သူများ ရင်းထားရသည့် Risk များမှာ အလွန်များပြား ကြီးကျယ်လှ၏။

သို့သော် အနှီ ဒေါင်းဇားများ ကျဆုံးရေးကား ကျွန်ုပ်တို့အတွက် အသက်ထက် ပိုအရေးကြီးသဖြင့် အသက်ကို ပမာမထား ဆန့်ကျင် တော်လှန်နေကြခြင်းဖြစ်သတည်း။

 

(၂) Opportunities

 

စစ်အာဏာရူးများ အာဏာကို ဓားပြတိုက်သွားရာမှ ကောင်းကွက်များလည်း ရှိပါသေး၏။

 

ပထမဆုံးကောင်းကွက်မှာကား နှစ်နှင့်ချီကာ လိပ်ခဲတည်းလည်း ဖြစ်နေသည့် အနုတ်စုတ် ဂုတ်စုတ်၊ ဗလချီးနမ်း၊ ပေါက်တတ်ကရ စာအုပ်အစိမ်းကြီးကို မြေမြှုပ် သင်္ဂြိုဟ်လိုက်နိုင်ခြင်း ဖြစ်၏။ ကောင်းလေစွ၊ ကောင်းလေစွ၊ သာဓု၊ သာဓု၊ သာဓု

 

ဒုတိယကောင်းကွက်မှာ နှစ်ပေါင်းများစွာကတည်းက အိပ်မက်မက်လာခဲ့ကြသည့် ဖက်ဒရယ်ပြည်ထောင်စုကို ဖန်တီး တည်ဆောက်နိုင်မည့် အခွင့်အရေးဖြစ်၏။ ဖက်ဒရယ်ပြည်ထောင်စုကိုသာ အကောင်အထည် ဖော်နိုင်မည်ဆိုလျှင် ပြည်တွင်းစစ် ဆိုတာကြီးကိုလည်း နိဋ္ဌိတံနိုင်လိမ့်မည်ဟု (သည်လိုပင် ရိုးသားစွာ) ထင်မိပါသည်။ သည်အခါ စစ်ဘေးကြောင့် ဒုက္ခရောက်ကြရကုန်သော တိုင်းရင်းသားများသည်လည်း အေးချမ်းငြိမ်သက်စွာ နေထိုင် လုပ်ကိုင် စားသောက်နေနိုင်ကြပါလိမ့်မည်။

 

တတိယကောင်းကွက်မှာကား လူနှင့် ဘီလူးကို ကောင်းစွာခွဲလိုက်နိုင်ခြင်း ဖြစ်၏။

 

အာဏာသိမ်းလိုက်သည့်အခါ စစ်တပ်နှင့်ရဲဆိုတာ ဘာ ဆိုတာကို ကျွန်ုပ်တို့ ပြည်သူများ ကောင်းစွာ သိနားလည်ခွင့် ရလိုက်၏။

စစ်တပ်နှင့် ရဲထဲတွင် လူကောင်းသူကောင်း ဘယ်နှစ်ယောက်ရှိပါသနည်း။

ယခု ကျွန်ုပ်တို့ မျက်ဝါးထင်ထင် တွေ့မြင်ခွင့်ရကြပြီ။

၎င်းတို့မှာ လူကောင်းယောင် ဆောင်ထားသည့် ဘီလူးသဘက်များ ဖြစ်ကြကုန်၏။

အခွင့်မရသေး၍ လူသတ်ချင်စိတ်၊ ခိုးချင်ဝှက်ချင်စိတ်၊ ဓားပြတိုက်ချင်စိတ်၊ နိုင်လိုမင်းထက် ပြုလိုစိတ်များကို အတင်း ဖိနှိပ်ထားရသေးသော်ငြား ယခုအခါ သူတို့မှာ တကယ့် ကလေကချေများ ဖြစ်ကြောင်း ကျွန်ုပ်တို့ သိလိုက်ရပြီ။ 

 

နောက်တစ်ခုမှာ သကာသုတ်ထားသည့် မျက်နှာဖုံးများ ကွာကျကုန်သူများ ဖြစ်၏။

အံ့ဩဘွယ်ကောင်းလောက်အောင်ပင် ထို သကာသုတ်များထဲ၌ ကျွန်ုပ်၏ ရင်းနှီးသော မိတ်ဆွေများလည်း ပါနေသည်ကို တွေ့လိုက်ရ၏။

၎င်းတို့အတွက် ကျွန်ုပ် ဝမ်းမနည်းမိပါ။ ရွံပင်ရွံမိပါသေးသည်။

သူတို့ခံယူချက်အမှန်ကို သိခွင့်ရလိုက်သည့်အတွက် ကျေးဇူးတင်ပါ၏။

နောင် ကျွန်ုပ် အသက်ရှင်နေသရွေ့ကာလပတ်လုံး ထိုသူတို့နှင့် ဆက်ဆံတော့မည် မဟုတ်ပါ။

လမ်းတွေ့လျင်သော်မှ မသိယောင် ဆောင်သွားပါမည်။ နှုတ်ဆက်လာလျင်လည်း စကားပြန်ပြောမည်မဟုတ်ပါ။

 

နောက်တစ်ခုမှာ ကျွန်ုပ်တို့တိုင်းပြည်တွင် သင်္ကန်းပတ်ထားသည့်တိုင်၊ အသက်သာကြီးသွားသည့်တိုင် အချိန်မစီးသည့် ဘုန်းမကြီးများရှိသေးကြောင်း ဝမ်းမနည်းစွာ သိရခြင်းဖြစ်၏။

ကျွန်ုပ်၏ဘဝတွင် ဘုန်းကြီးများ၏ ကျေးဇူးများ ငယ်စဉ်ကတည်းက များစွာရှိခဲ့ပါသည်။

ကျွန်ုပ်သည် ဘုန်းကြီးများကို စိတ်နှင့်တောင် မပြစ်မှားမိပါ။ သူတို့ဓလေ့စရိုက်ကို အတွင်းကျကျ သိသည့်တိုင် ဘုန်းကြီးဟာ ဘုန်းကြီးပဲ၊ သူမကောင်းတာလုပ် သူ့ဘာသာသူ ခံလိမ့်မယ်ဟုသာ ခံယူထားသူဖြစ်ပါ၏။

သို့သော် သူခိုးဓားပြထက်ဆိုးသည့် -

လူသတ်ကောင်၊ လူယုတ်မာ၊ လူ့အောက်တန်းစား၊ လူ့ကလေကချေ၊ လူ့ဗလချီးနမ်း၊ လူ့အန္ဓ၊ လူ့ခွေးလှေးဂျပိုး၊ လူလိမ်၊ လူ့ဗလွတ်ရွှတ်တက သွေးစွန်းနေသည့်လက်များဖြင့် ဆက်ကပ်သည့်ဘွဲ့ကို -

အရှက်တရားကင်းမဲ့စွာ၊ အသိဉာဏ်နုံ့နဲ့စွာ၊ ဝတ်ထားသည့် သင်္ကန်းမျက်နှာကိုမှ မထောက်၊ လက်ခံရယူလိုက်ခြင်းကား သာမီစိပ္ပတိပန္နော ဘဂဝတော သာဝကသံဃော ဟူသည့် ဂုဏ်ကို ခြေထောက်နှင့် ကန်ကျောက်လိုက်သကဲ့သို့ ဖြစ်ချေ၏။ 

 

ဤသည်မှာ စစ်ခွေးရူးများက ဖော်ထုတ်ပေးလိုက်သဖြင့် သိရသော လူ့အန္ဓများပင် မဟုတ်ပါလော။

သာမန် အညတြ၊ အနုတ်စုတ် ဂုတ်စုတ်ဟု ထင်ရသူသည်လည်း ကျွန်ုပ်တို့ပြည်သူတို့အတွက် သူရဲကောင်း ဖြစ်ကြောင်း ကျွန်ုပ်တို့ သိခွင့်ရခဲ့ကြ၏။

အဝတ်အစား အကောင်းစားကြီးများနှင့် ဦးဘယ်သူ ဟု ဂုဏ်ကြီးတပ်ထားသူသည်လည်း အင်မတန် စိတ်ဓာတ် အောက်တန်းကျသူဖြစ်ကြောင်းလည်း သိခွင့်ရခဲ့ပြီ။

 

ဤသည်တို့မှာ ကျွန်ုပ်တို့အတွက် နွေဦးတော်လှန်ရေးမှ ရလာသည့် opportunity များပင် မဟုတ်ပါလော။

 

(၃) နိဂုံး

 

အမှန်ဆိုလျှင် နွေဦးတော်လှန်ရေး၌ risk နှင့် opportunity များ အများအပြား ရှိပါသေးသည်။ 

သို့သော် မိတ်ဆွေများကို အားနာသောအားဖြင့် သည်မျှနှင့်ရပ်ပါတော့မည်။

 

မိတ်ဆွေတို့ အားမငယ်ပါနှင့်။

 

သည်ကမ္ဘာမြေပေါ်တွင် ခွေးရူးများအတွက် ပြေးပုန်းစရာ (ပြည်တွင်းပြည်ပ) နေရာ လုံးဝမရှိတော့ပါ။ 

၎င်းတို့သည် လူတကာ ချဉ်ဖတ်ဖြစ်ခဲ့ပြီ။ ၎င်းတို့သည် လူတကာက အော့နှလုံးနာစရာ လူတန်းစားတစ်ရပ် ဖြစ်သွားခဲ့ပြီ။

ကျွန်ုပ်တို့ပြည်သူများ၏ ဒုက္ခကို ကမ္ဘာကြီးက စာနာထောက်ထားကြောင်း ယုံမှားသံသယရှိစရာ မလိုပါ။

 

စစ်အာဏာရူးများ ကျဆုံးရမည်။

အရေးတော်ပုံ အောင်ရမည်။

 

(မင်းအောင်လှိုင်သည် ခွေးသေဝက်သေ မရှုမလှ သေချင်းဆိုးနှင့် သေရမည်၊​ အလောင်းမြှုပ်စရာပင် သင်္ချိုင်း မရှိစေရ။)

 

အေးငြိမ်း

၄ ဧပြီလ၊ ၂၀၂၁

 

မှတ်ချက်။             ။ နွေဦးတော်လှန်ရေးမှ ကောင်းကျိုး ဆိုးပြစ်များဟု ခေါင်းစဉ်တပ်ဦးမည်ကြံသေးသော်လည်း မကြိုက်၍ ပြန်ဖြုတ်လိုက်ပါသည်။