မြန်မာ့အပြောင်းအလဲနှင့် စင်ကာပူရောက်မြန်မာပညာရှင်များ၏ အခန်းကဏ္ဍ စကားဝိုင်း

(၁)

ယခုအချိန်သည် မြန်မာနိုင်ငံကို ဖွံ့ဖြိုးတိုးတက်အောင် ပြည်တွင်းပြည်ပမှ တတ်စွမ်းသူအားလုံးက မိမိနည်း မိမိဟန်ဖြင့် ၀ိုင်းဝန်းကြိုးပမ်းနေကြချိန်ဖြစ်၏။ ဤသို့ကြိုးပမ်းကြရာ၌ ပုဂ္ဂလိကအလိုက်သော်လည်းကောင်း၊ ဖွဲ့စည်း ထားသော အဖွဲ့များကသော်လည်းကောင်း မိမိစဉ်းစားမိသည့်အတိုင်း ကိုယ့်နည်းကိုယ့်ဟန်နှင့် ဆောင်ရွက်နေကြပါ သည်။ ကိုယ့်နည်းကိုယ့်ဟန်နှင့် အဆင်ပြေသလို လုပ်ကိုင်ဆောင်ရွက်နေကြခြင်းဖြစ်သဖြင့်လည်း မိမိတို့ အစွမ်းကုန် အားထည့်လုပ်သည့်တိုင် ထိရောက်မှုနည်းပါလိမ့်မည်။ 

မြန်မာနိုင်ငံ ဖွံ့ဖြိုးတိုးတက်ရေးကို ပြဿနာဖြေရှင်းရေး (Problem Solving) အတွက်သုံးသော Fish Bone Analysis နှင့်စဉ်းစားလျှင် 4M+1E ဟုရပါသည်။ ၎င်းတို့မှာ စက် (Machine)၊ နည်းလမ်း (Method)၊ ပစ္စည်း (Material)၊ သဘာဝပတ်ဝန်းကျင် (Environmental)၊ လူသား (Man) စသည်တို့ဖြစ်၏။ နိုင်ငံဖွံ့ဖြိုးတိုးတက်ရေးကို ဆောင်ရွက်ရာ၌ မည်မျှပင် စက်များ၊ နည်းလမ်းများ၊ ပစ္စည်းများ၊ သဘာဝပတ်ဝန်းကျင်များရှိနေစေကာမူ အရည်အချင်းပြည့်မီသော လူသားတို့၏ မောင်းနှင်အားမပါပါက မည်သည့်နည်းနှင့်မှ မဖြစ်နိုင်ပါ။

            မြန်မာနိုင်ငံအနေနှင့် စက်၊ နည်းလမ်း၊ ပစ္စည်း၊ သဘာဝပတ်ဝန်းကျင်တို့ ရယူရန် ခဲယဉ်းစရာအကြောင်းမရှိပါ။ မည်သည့်နည်းနှင့်မဆို အနှေးနှင့်အမြန် ရနိုင်ပါသည်။ သို့သော် လူသားအရင်းအမြစ်ကိုမူ ငွေဖြင့်ဝယ်ယူ၍ မရနိုင် သကဲ့သို့ အချိန်တိုအတွင်း ဖန်တီးယူ၍လည်း မရနိုင်ပါ။ အရည်အချင်းပြည့်ဝသော လူသားရင်းမြစ်ကြီးတစ်ခု ရနိုင်ရန် ငွေအရင်းအနှီး မြောက်များစွာစိုက်ထုတ်၍ ရေရှည်ထူထောင်ယူမှ ရပါမည်။

            သို့သော် မြန်မာနိုင်ငံအနေနှင့် အထက်ပါအလွန်အရေးကြီးလှသော စွမ်းရည်ပြည့် လူသားအရင်းအမြစ်ကြီးကို အဆင်သင့်ရရန် အခွင့်အလမ်းရှိနေပါသည်။ အရေးကြီးသည်မှာ ထိုလူသားရင်းမြစ်ကို မြန်မာပြည် ဖွံ့ဖြိုးတိုးတက်ရေး၌ မည်သို့မည်ပုံ အသုံးချမည်နည်း ဟူသည့် နည်းလမ်းဖြစ်၏။ ဤနည်းလမ်းရှာဖွေရေးမှာ အလွန်သိမ်မွေ့ပြီး လွယ်ကူလှ မည်တော့ မဟုတ်ပါ။ သို့သော်လည်း မဖြစ်နိုင်စရာမရှိပါ။ မည်ကဲ့သို့ဖြစ်အောင်လုပ်မည်နည်းဟူသည့် လမ်းစရှာရန်သာ လိုပါသည်။

(၂) ဖြစ်ပေါ်လာပုံနှင့် ရည်ရွယ်ချက်

            စင်ကာပူနိုင်ငံတွင် ရောက်ရှိလုပ်ကိုင်လျှက်ရှိသော မြန်မာတတ်သိပညာရှင်များ၊ လုပ်ငန်းကျွမ်းကျင်သူများ သည် မိမိတို့၏ အသိပညာ၊ အတတ်ပညာများဖြင့် မြန်မာပြည်တည်ဆောက်ရေးတွင် ကိုယ်စွမ်း၊ ဉာဏ်စွမ်းရှိသရွေ့ ပါဝင် ဆောင်ရွက်ကြရန် ( ၁၃ - ၁၁ - ၁၂) နေ့က National Library ရှိ Hanis Café တွင် စတင်ဆွေးနွေးခဲ့ကြ ပါသည်။ စင်ကာပူရောက် မြန်မာတတ်/သိပညာရှင်များအားလုံးကို အဖွဲ့လိုက် ဖြစ်စေ၊ အဖွဲ့မရှိလျှင် တစ်ဦးချင်း ပါဝင်လျှက်ဖြစ်စေ စုစည်းကာ ဆောင်ရွက်ပါက ပိုမို ထိရောက်အကျိုးများမည် ဖြစ်သည့်အတွက် မြန်မာတတ်/သိ ပညာရှင်များအားလုံး ပါဝင်နိုင်မည့် “မြန်မာ့အပြောင်းအလဲအတွက် စင်ကာပူရောက်မြန်မာပညာရှင်များ၏ အခန်း ကဏ္ဍ” (Myanmar Transitional Platform - MTP) ကို ဖွဲ့စည်းပါမည်။ MTP ၌ စင်ကာပူရှိ မြန်မာ တတ်/သိ ပညာရှင် များအား များနိုင်သမျှ များများ ပူးပေါင်းပါဝင်လာစေရန် စည်းရုံးသွားမည် ဖြစ်ပါသည်။

            ထို့နောက် မြန်မာပြည်အစိုးရပိုင်းမှရော၊ အစိုးရအဖွဲ့အတွင်းမှ မဟုတ်သူများကိုပါ ဖိတ်ကြားကာ မြန်မာနိုင်ငံ ဖွံ့ဖြိုး တိုးတက်ရေးအတွက် မည်ကဲ့သို့လုပ်ကိုင် ဆောင်ရွက်သင့်သည်ကို စင်ကာပူရောက် မြန်မာ အသိပညာရှင်၊ အတတ်ပညာရှင်များ (MTP) နှင့် မျက်နှာချင်းဆိုင် ဆွေးနွေးအဖြေရှာကြရန် ဆုံးဖြတ်ခဲ့ကြ၏။

ဤ “တတ်သိပညာပေါင်းကူးပွဲ” ၏ ရည်ရွယ်ချက်မှာ အောက်ပါတို့ဖြစ်၏။

(၁) ယနေ့မြန်မာနိုင်ငံ၏ ပြုပြင်ပြောင်းလဲရေး လုပ်ငန်းများတွင် စင်ကာပူရောက် မြန်မာများမှ မိမိတို့ လက်တွေ့ လုပ်ကိုင်ရရှိထားသော ပြည်ပအတွေ့အကြုံ၊ နည်းပညာများကို လက်ဆင့်ကမ်း ဖလှယ်၍ ပါဝင်ခြင်းအားဖြင့် နိုင်ငံ ပြန်လည်တည်ဆောက်ရေးအတွက် တတ်နိုင်သည့်နေရာမှ ချိတ်ဆက်ပူးပေါင်းနိုင်မည့် အခြေအနေ၊ အခွင့်အလမ်း များကို ၀ိုင်းဝန်းရှာဖွေကြရန်

(၂) နိုင်ငံတော်အစိုးရ၊ ပြည်ထောင်စုလွှတ်တော်နှင့် ပြည်သူလူထုတို့အကြား အပြန်အလှန် ရင်းရင်းနှီးနှီး ထိတွေ့ ဆက်ဆံခြင်းအားဖြင့် တစ်ဦးနှင့်တစ်ဦး လိုအပ်ချက်၊ အားသာချက်၊ အားနည်းချက်များကို ပိုမိုခံစား နားလည်နိုင်ပြီး တိုင်းပြည်ရေးရာများကို အတူတကွ ဖြေရှင်းကြသည့် နိုင်ငံရေးဓလေ့ ရှင်သန်စေရန်

            ထို့နောက် ဤစကားဝိုင်းဖြစ်မြောက်ရေးအတွက် ရံပုံငွေရှာဖွေရေး ကိစ္စ၊ မြန်မာပြည်မှ အစိုးရအဖွဲ့ အရာရှိများ၊ ပြင်ပပုဂ္ဂိုလ်များအား ဖိတ်ကြားရေး၊ ပွဲခွင့်ပြုမိန့်ရယူရေး၊ လုံခြုံရေး၊ ဧည့်သည်တော်များ နေထိုင်သွားလာရေး၊ စကားဝိုင်းကျင်းပမည့်နေရာ နှင့် အခြားအသေးစိတ်အစီအစဉ်များအတွက် ၂၀၁၂ ခုနှစ် နိုဝင်ဘာလ ၁၃၊ ၁၈၊ ၂၅ ရက်နေ့များတွင် စည်းဝေးပွဲများကျင်းပခဲ့၏။

မူလက ဤစကားဝိုင်းကို ၂၀၁၂ ခုနှစ် ဒီဇင်ဘာလ ၁၆ ရက်နေ့တွင် ကျင်းပရန် ရည်မှန်းထားသော်လည်း အကြောင်းအမျိုးမျိုးကြောင့် မကျင်းပနိုင်ခဲ့ပါ။ သို့သော်လည်း ဇွဲမလျှော့ဘဲ ဆက်လက်ကြိုးပမ်းမှုကြောင့် ယခုကဲ့သို့ ထမြောက်အောင်မြင်ခဲ့ခြင်း ဖြစ်ပါသည်။

ဤပွဲဖြစ်မြောက်ရေးအတွက် မြန်မာပြည်ဘက်မှ ကြွရောက်ချီးမြှင့်သည့် ၀န်ကြီး နှင့် လူကြီးမင်းများအား လည်းကောင်း၊ မအားလပ်သည့်ကြားမှ ၀ိုင်းဝန်းဆောင်ရွက်ပေးသူအားလုံးကိုလည်းကောင်း၊ ကြွရောက်လာသူ ဧည့်ပရိသတ်အားလုံးကိုလည်းကောင်း ကျေးဇူးအထူးတင်ပါကြောင်း ပြောကြားလိုပါသည်။

ကျေးဇူးတင်ပါသည်။

မြန်မာ့အပြောင်းအလဲနှင့် စင်ကာပူရောက်မြန်မာပညာရှင်များ၏ အခန်းကဏ္ဍ စကားဝိုင်း ဖြစ်မြောက်ရေးအဖွဲ့