Monday, January 28, 2019

BE, PE နှင့် AGTI အကြောင်း


(၁) နိဒါန်း

ဤစာကို ဖွလို၍ ရေးခြင်းမဟုတ်။ ကျွန်ုပ်အမြင်ကို တင်ပြခြင်း သီးသီးမျှသာ ဖြစ်ကြောင်း ဦးစွာပထမ ပြောလိုပါသည်။ မိတ်ဆွေတို့ကိုလည်း သဘောတူရမည်ဟု မဆိုလို။ ကိုယ့်ရှုထောင့်နှင့်ကိုယ် ဖြစ်၍ သဘောထားကွဲလွဲလိုပါကလည်း လွတ်လပ်စွာ သဘောထားကွဲလွဲနိုင်ပါသည်။ ဘာပြဿနာမှ မရှိပါ။

မဟုတ်တာ၊ လွဲနေတာများကို ဝေဖန်ထောက်ပြခြင်းမျှသာ ဖြစ်ပြီး မည်သူ့ကိုမှ နစ်နာစေလိုသည့် ဆန္ဒမရှိပါဟု ရိုးသားစွာ ဆိုချင်ပါသည်။ (ကိုတင်လတ်ရေ - လာရှင်းပြမနေနဲ့တော့နော။ MEC အကြောင်း တစ်ခုခုပြောလိုက် ခင်ဗျားက လိုက်ရှင်းလိုက် ဆိုတော့ အားနာပါတယ်။)

(၂) AGTI ဆိုတာ အင်ဂျင်နီယာလား

မိတ်ဆွေတစ်ယောက်က အင်ဂျင်နီယာကောင်စီ ဥပဒေအရ AGTI တွေကို အင်ဂျင်နီယာလို့ မသတ်မှတ်ဘူး ဆိုတဲ့အပေါ် ဘယ်လို မြင်ပါသလဲ ဟု လှမ်းမေးလာပါ၏။ ကျွန်တော် သူ့ကိုပြန်ဖြေထားတာ copy and paste လုပ်ပြပါမည်။

"ဒီအကြောင်း အင်ဂျင်နီယာ group ထဲမှာလည်း ပြောကြတာ ပွထနေတယ်။ အမှန်က AGTI ကို အင်ဂျင်နီယာလို့ မသတ်မှတ်တာ မဟုတ်ဘူးလို့ ထင်ပါတယ်။ MEC ဥက္ကဌ ဒေါက်တာချာလီသန်းလဲ ပြောဖူးပါတယ်။ MEC လုပ်ပုံတွေကိုက ခပ်ရှုပ်ရှုပ်မို့ လူတွေ နားလည်မှုလွဲတာလို့ပဲ မြင်ပါတယ်။ ဥပမာ - PE, RE, RSE တွေလိုဟာမျိုးပေါ့။"

ကျွန်တော် ဤကဲ့သို့ပြောလိုက်ခြင်းအားဖြင့် MEC ကို စော်ကားရာမရောက်ဟု ထင်ပါသည်။ MEC ဥပဒေကြမ်းထွက်လာကတည်း က မည်သည့်အရာများကိုဖြင့် မကြိုက်၊ မနှစ်သက်ကြောင်း ကျွန်တော် The Voice မှာ ဆောင်းပါးတစ်ခါ၊ အင်တာဗျူးတစ်ခါ ရေးဖူး ပါသည်။

ပွင့်ပွင့်လင်းလင်းပြောရလျှင် MEC လုပ်ပုံတွေကို ကျွန်တော်လည်း မကြိုက်ပါ။ နောက်ပြီး MEC ဥပဒေကို အသုံးချပြီး မရောင်သည့်နေရာကို ဆီသွားလူနေသူများကိုလည်း မနှစ်သက်ပါ။ ဘာ့ကြောင့်မကြိုက်ကြောင်း၊ မနှစ်သက်ရကြောင်းကို ကျွန်တော်ရှင်းပြပါမည်။ ကျွန်တော့်အယူအဆကို ကြိုက်ရမည်ဟု မဆိုလို။ မကြိုက်လိုက မကြိုက်ဘဲနေနိုင်ပါသည်။

MEC က PE, RE, RSE လက်မှတ်တွေထုတ်ပေးနေတာ မြန်မာအင်ဂျင်နီယာတွေကို နိုင်ငံတကာ အင်ဂျင်နီယာများနှင့် ရင်ဘောင် တန်းနိုင်အောင် ကြိုးစားမှုတစ်ရပ်ဟု မြင်ပါသည်။ ဤသည့်အတွက် မူလရည်ရွယ်ချက်ကို ကြိုဆိုပါသည်။ သဘောလည်း တူပါသည်။ ကောင်းမြတ်သည့် ရည်ရွယ်ချက်တစ်ခုဖြစ်ကြောင်း ကျွန်တော်နှင့် ကိုနေမျိုးမောင်တို့ ပြောဖြစ်ကြပါသည်။

သို့သော်လည်းပေါ့လေ။ ခုဟာက ပြောတော့ဖြင့် မဇ္ဈိမပဋိပါဒါ၊ လုပ်တော့ ရှူးရှဲ ဆိုတာလို ဖြစ်နေပါသည်။ (ဤစကားကို နားမလည်ဆိုလျှင် နောက်ကျမှ သပ်သပ်ထပ်ရှင်းပါမည်။ ယခုတော့ ဘေးရောက်သွားမည်စိုး၍ အသာထားလိုက်ပါဦး။)

(၃) PE ဆိုတာဘာလဲ၊ PE လက်မှတ်ယူစရာလိုသလား

ပထမ PE ဆိုတာ ဘယ်သူ့တွေကို ခေါ်သလဲ။ ဘာကြောင့် PE ပေးရသလဲ။ ဘာကြောင့် PE လက်မှတ်ယူဘို့လိုသလဲ ဟု မေးကြည့်ပါ။

PE ဆိုတာ Professional Engineer ကိုခေါ်ပါသည်။ Professional ကို ဘာသာပြန်ရန် သင့်တော်သည့်စကားလုံးကို ကျွန်တော် မသိပါ။ မိတ်ဆွေများအား အကြံပြုရန် မေတ္တာရပ်ခံပါသည်။

Professional တစ်ယောက်သည် သူ့နယ်ပယ်တွင် စာတွေ့ရော၊ လက်တွေ့ပါ ကျွမ်းကျင်ပိုင်နိုင်သူ ဖြစ်ရပါမည်။ ဤနေရာတွင် စာတွေ့ဆိုသည်ကို Academic နှင့် မရောထွေးစေချင်ပါ။ ကျောင်းမှာသင်ပေးလိုက်တာတွေသည် အခြေခံ သီအိုရီများသာ ဖြစ်ပြီး လက်တွေ့ပြန်အသုံးချနိုင်ရန် လေ့လာဘို့ များစွာလိုပါသေးသည်။ ဤသို့ပြောလိုက်ခြင်းဖြင့် ကျောင်းသင်ပညာရေး မလိုဟု မဆိုလို။ လိုသဖြင့်သာ တက္ကသိုလ်၊ ကောလိပ်တွေ ရှိနေရခြင်းဖြစ်ပါ၏။ ကျောင်းသင်ပညာရေးအခြေခံမရှိဘဲ သည် အင်ဂျင်နီယာပညာရပ် တွေကို ဘယ်ကဲ့သို့ လေ့လာဆည်းပူးပါမည်နည်း။ (အဲလေ၊ ဒေါက်တု တင်ထွန်းကတော့ ခြွင်းချက်ဖြစ်၏။။ ဆယ်တန်းမအောင် ဘဲနှင့် ပရော်ဖက်ဆာလုပ်ကာ တက္ကသိုလ်ကျောင်းသားတွေကို ဆရာလုပ်နိုင်ခြင်းမှာ နည်းတဲ့ စကေးမဟုတ်ပါ။ ကလေးတွေ ပြောသလို 9+ ကျော်ပါသည်။)

မည်သည့်ကျောင်းက မည်သည့်ဘွဲ့ကြီးရနေပါစေ။ ကျောင်းကလည်းဆင်း၊ တစ်ခါတည်း လက်တင်သုံးလို့ရသည့် အင်ဂျင်နီယာ များကို သည်ကမ္ဘာပေါ်ရှိ မည်သည့်တက္ကသိုလ်ကမှ မွေးထုတ်မပေးနိုင်ပါ။ တကယ်အလုပ်လုပ်ရန် လက်တွေ့နယ်ပယ်ကို လေ့လာကြရပါသေးသည်။ လက်တွေ့လုပ်မကြည့်ဘဲ မဖြစ်နိုင်ဆိုသည်ကို လွန်ခဲ့သည့် နှစ်ပေါင်း ၂၅၀၀ အကျော်ကတည်းက ညီတော်အာနန္ဒာက သက်သေပြသွားပါသည်။ (သိချင်ရင် ဗုဒ္ဓဝင်ရှာဖတ်ပေါ့ဗျာ။ အဲလေ ထူးပါဘူး။ တစ်ခါတည်းပဲ ပြောလိုက်ပါတော့မယ်။)

မြတ်စွာဘုရားက PSO ခန့်မည်ဆိုတော့ ညီတော်အာနန္ဒာလည်း လျှောက်လွှာတင်၏။ (ဒီခေတ်ဆို မရဘူးနော့။ ဆွေမျိုးတွေကို PSO မခန့်ရလို့ အမိန့်ထုတ်ထားဆို မဟုတ်လား။) ဆိုတော့ သူပင် PSO ဖြစ်၏။ အောင်မယ်၊ သူကလည်း အလာကြီးခင်ဗျ။ PSO လုပ်မယ်ဆိုတာတောင် ဘာတဲ့၊ ပန်ဆုလေးသွယ်။ ပယ်ဆုလေးပါး ဆိုလား တောင်း၏။ (အကျယ်သိလိုသူများ refer to ဗုဒ္ဓဝင်)

ထို့အတွက် မြတ်စွာဘုရားဟောသမျှ (သူ့မျက်မှောက်မှာဖြစ်စေ၊ မျက်ကွယ်မှာဖြစ်စေ။ ယခုဖြစ်စေ၊ ယခင်ကဖြစ်စေ) သူမနာဖူးတာ တစ်ပုဒ်မှ မရှိ။ မြတ်စွာဘုရား တရားတော်များနှင့် ပတ်သက်လျှင် သူသာအသိဆုံးဖြစ်လေသည်။ (ဤသည်ကိုအားကျ၍ ဟိုဝန်ကြီးက ငါသာအတတ်ဆုံးလို့ ပြောသွားတာဖြစ်မည်။) ထို့ကြောင့်ပင် "ဓမ္မဘဏ္ဍာဂါရိက" ဟူသော ဘွဲ့ကို ရရှိခြင်းဖြစ်၏။

မြတ်စွာဘုရား၏ တရားအားလုံးကို သိနေသည့်တိုင် မြတ်စွာဘုရား ပရိနိဗ္ဗာန်ပြုချိန်ထိ သူ အရဟတ္တမဂ်ဖိုလ်ကိုမရသေး။ သောတာပန်မျှသာ ရှိသေး၏။ နောက် အားထုတ်ကျင့်ကြံလိုက်တော့မှ ရဟန္တာဖြစ်သွားတာ ဖြစ်သည်။ သို့သော် သီအိုရီ သိပြီးသား ဆိုတော့ ပရက်တီကယ်လုပ်လိုက်သည့်အခါ ခဏလေးနှင့် ရဟန္တာဖြစ်၏။

ဤဇာတ်လမ်းက ကျွန်ုပ်တို့အတွက် သင်ခန်းစာယူစရာများ ထားရစ်ခဲ့၏။
၁။ သီအိုရီချည်းပဲမလုံလောက်။ လက်တွေ့ကျင့်ကြံအားထုတ်ဖို့လိုသည်။
၂။ သီအိုရီ အပြည့်အဝရှိထားလျှင် လက်တွေ့လုပ်သည့်အခါ ခဏကလေးနှင့် အောင်မြင် ပေါက်မြောက်သည်။

ထို့အတွက် BE ဘွဲ့ရထားရုံမျှဖြင့် PE မဖြစ်နိုင်ဟူသည့် ကျွန်ုပ်၏အဆိုကို သင်တို့သဘောပေါက်လောက်ပါပြီ။ (ငြင်းလို့မရအောင် မြတ်စွာဘုရားနဲ့ ကိုင်ပေါက်ထားတာ။ မှတ်ပလား။)

သို့သော် အရာရာစံလွဲနေသည့် ကျွန်ုပ်တို့ရွှေပြည်ကြီးအဖို့တော့ တမျိုးတဘာသာ ဖြစ်ချေသည်။ ဘာအင်ဂျင်နှစ်ရာအလုပ်မှ မလုပ်ခဲ့ဖူးပါဘဲလျက်လည်း ဘီအီးဘွဲ့ကို အကြောင်းပြကာ ပီအီးဖြစ်နိုင်သည်။ (ကျွန်ုပ်ကို အဆိုးမဆိုပါလင့်။ ဖေ့စ်ဘုတ်မှာ ပွထနေပြီ။) ထိုသူများကိုလည်း ကျွန်ုပ်နားမလည်နိုင်ပါ။ အင်ဂျင်နီယာအလုပ်လည်း မလုပ်ပါဘဲလျက် အဘယ်ကြောင့် ပီအီးဖြစ်ချင်ရဘိသနည်း။

သူများအကြောင်း အသာထားပြီး ကျွန်ုပ်အကြောင်းကို ရိုးရိုးသားသား ပြောပြပါမည်။

ကျွန်တော် ဘီအီးဘွဲ့ကိုင်ထားလျက်လည်း ယခုအသက် ၆၀ နားနီးသည်ထိ ဘာအင်ဂျင်နီယာအလုပ်ကိုမှ ဟုတ်တိပတ်တိ မလုပ်ခဲ့ဖူးသေးပါ။

ကျွန်တော် piping လုပ်ငန်း၌ ဆယ်နှစ်ကျော်မျှ ကျင်လည်ခဲ့ပါသည်။ သို့တိုင် သူများလုပ်ထားသည့်၊ သူများဆွဲထားသည့် ဒီဇိုင်းများကိုသာ တပ်ဆင်ပေးခဲ့ခြင်း ဖြစ်၏။ ဤသို့ဆိုခြင်းအားဖြင့်လည်း ပိုက်လုပ်ငန်းအကြောင်း မသိဟု မဆိုနိုင်ပြန်ပါ။ ကျွန်ုပ်၏ လေ့လာမှုဖြင့် piping design အကြောင်း နားလည်ပါသည်။ တွက်လည်း တွက်တတ်ပါသည်။ တွက်ပြပါဆိုလျှင်လည်း တွက်ပြပါမည်။ Stress analysis ကိုလည်း လေ့လာဖူးပါသည်။ စာအုပ်ရေးသားထုတ်ဝေဘို့ပင် ကြံစည်ထားတာ ဖြစ်၏။

သို့သော် ကျွန်ုပ်ကိုယ်တိုင် တွက်ချက်ထားသည့် ဒီဇိုင်းကို မည်သည့်နေရာတွင်မှ စမ်းသပ်အသုံးမပြုရသေးပါ။ သည်ကမ္ဘာပေါ်တွင် ကျွန်ုပ်တွက်ချက်ပေးထားသည့် piping design ဖြင့် တပ်ဆင်လည်ပတ်နေသည့်ပိုက်လိုင်းဆို၍ တစ်ခုမှ မရှိသေးပါ။ ဆိုလိုသည်မှာ ကျွန်ုပ်သိထားသည်များ၊ ကျွန်ုပ်တွက်တတ်သည်များ မှန်မမှန်ကို တစ်ခါဖူးမှ သက်သေမပြရသေးပါ။

အခြားဒီဇိုင်းများလည်း အလားတူဖြစ်ပါသည်။ ကျွန်တော် fire protection system design များ ဖတ်ရှုဖူးပါသည်။ စာအုပ် တော်တော်များများ စုဆောင်းထားတာလည်း ရှိပါသည်။ တစ်ခါမှတော့ မတွက်ဖူးသေး။

ထို့အတူ ဖောင်ဝပ်ဒီဇိုင်းစာအုပ်များကိုလည်း ဝယ်ယူစုဆောင်းထားတာ ရှိပါသည်။ ဟိုလှန်သည်လှန်မျှလောက်သာ ဖြစ်ပြီး တစ်ခါမှ အစအဆုံး မဖတ်အားသေး။

ဤသည်ကိုရည်၍ ကျွန်ုပ် အင်ဂျင်နီယာအလုပ်ကို ဟုတ်တိပတ်တိ မလုပ်ဖူးသေးဟု ဆိုခြင်း ဖြစ်၏။ ကျွန်ုပ်သိထားသည်များမှာ စာတွေ့များချည်း ဖြစ်သည်။ လက်တွေ့မပါသေး။ လုပ်ငန်းထဲမှာ တကယ် တွက်ချက်၊ လုပ်ကိုင်၊ မှားယွင်း၊ ငြင်းခုံ၊ ပြဿနာပေါင်း များစွာတက်။ ကိုယ်တွက်ထားသည့် ဒီဇိုင်းကို တကယ်တပ်ဆင် အသုံးပြုပြီးပြီဆိုမှ တကယ့်အင်ဂျင်နီယာစစ်စစ် ဖြစ်ပါလိမ့်မည်။

နောက်တစ်ချက် -

ဘာကြောင့် ပီအီးလိုသလဲ။
အချို့သော အဆောက်အဦများမှာ ကျွမ်းကျင်သော အင်ဂျင်နီယာ၏ တွက်ချက်မှုလိုသည်။ ကျွန်တော်နားလည်သည့် ဖောင်ဝပ် အကြောင်းသာ နမူနာပြပါမည်။

ဖောင်ဝပ်လဲပြိုမှုများ မြန်မာနိုင်ငံအပါအဝင် နိုင်ငံတော်တော်များများတွင် ကြားသိကြရပါလိမ့်မည်။ အဘယ်ကြောင့် လဲပြိုရသနည်း။ မခိုင်ခံ့၍ဖြစ်၏။ သို့ဆိုလျှင် ခိုင်ခံ့အောင် အောက်မှာ သံတိုင်ကြီးတွေ ထောင်ထားရမလား။ နိုးပါ။

လူကြီးမင်းတို့သိတော်မူကြသည့်အတိုင်း ဒီဇိုင်းလုပ်တယ်ဆိုတာ minimum cost and maximum profit အတွက် လုပ်တာ ဖြစ်ပါသည်။ ခိုင်အောင်ဆိုပြီး မလိုအပ်တာတွေ အရမ်းလျှောက်သုံးရတာ မဟုတ်။ ဒါဆို ပစ္စည်းပိုကုန်မည်။ ပိုက်ဆံပိုကုန်မည်။ ဒီဇိုင်းတွက်တယ်ဆိုတာ လိုအပ်သည့်ခိုင်ခံ့မှုရအောင် ပစ္စည်းကို အနည်းဆုံးသုံးဘို့ တွက်တာဖြစ်သည်။ ပစ္စည်းလည်း ကုန်တန် သလောက်သာ ကုန်ရမည်။ ခိုင်လည်း ခိုင်ရမည်။

သဟာဆို ဘယ်ပစ္စည်းတွေကို ဘယ်ပုံဆင်လျှင် အနည်းဆုံးနဲ့ အခိုင်ဆုံးဖြစ်မလဲ။
သဟာကို ဒီဇိုင်းခေါ်ပါသည်။
ဤပုံစံရအောင် ဒီဇိုင်းတွက်ချက်မှုများ လုပ်တာ ဖြစ်ပါသည်။
အဲသလို အတွက်အချက်တွေလုပ်ဘို့ ပီအီးတွေလိုတာ ဖြစ်ပါသည်။

သည်လောက် လေရှည်လိုက်ပြီးပြီဆိုလျှင် ပီအီးဆိုတာဘာလဲ နှင့် ဘာကြောင့် ပီအီးလိုသလဲဆိုတာ ရှင်းလောက်ပါပြီ။

(၄) CPD Hr

PE, RE တွေအတွက် CPD hr လိုတယ်ဆိုတော့ CPD သပေါ့။ ဘာမှ မပြောလိုပါ။ ကျွန်တော်လည်း CPD သင်တန်းများစွာ တက်ခဲ့ ဖူးပါသည်။ သို့သော် သို့သော်လည်းပေါ့လေ . . .

ကျွန်တော် သင်တန်းမကျ၊ ဟောပြောပွဲမကတွေ အင်ဂျင်နီယာအသင်းအတွက် လုပ်ပေးခဲ့ဖူးပါ၏။ တစ်ခုသော CPD ပွဲတစ်ခု၌ ကိုနေမျိုးမောင်၏ ပယောဂဖြင့် တစ်နေ့လုံး နေဖြစ်၏။ စာရေးစရာ ကုန်ကြမ်းရှာနေသူဖြစ်သည့် ကျွန်ုပ်မျက်လုံးများက အငြိမ်မနေ။ စင်ပေါ်ကသူကိုရော အောက်က နားထောင်နေသည့် ပိတ်သတ်များကိုပါ တစေ့တစောင်း လေ့လာမိ၏။

စင်ပေါ်၌ပြောနေသူများမှာ ကျွန်တော့်အပေါင်းအသင်း ရောင်းရင်းမိတ်ဆွေများပင် ဖြစ်ပါ၏။ သို့သော် အတော့်ကို ဟန်မကျပါ။ သူတို့ပုံစံက ဒါလုပ်ဆိုလို့ လာလုပ်နေရသည့်ဟန် ပေါက်နေပါသည်။ (ကျွန်ုပ်ကို စိတ်မဆိုးပါလင့်။ မဟုတ်တာသိမှ ဟုတ်တဲ့လမ်း ရောက်လာမှာ ဖြစ်ပါသည်။)

သဟာဆို အောက်ကလူများကရောတဲ့။
အင့်ဟင် . . ဟိုလူကြီးက အိပ်မက်ထဲမှာ မချောလေးတွေနှင့် ငပလီရောက်နေသလား မပြောတတ်။ အတော်များများကတော့ ဖုန်းကလေးများ ကိုယ်စီပွတ်လျက် အင်း၊ ဒီလိုမျိုး ဝတ်တာစားတာတွေဟာ မြန်မာ့ယဉ်ကျေးမှုနဲ့ မဆီလျော်ပါဘူးကွာ ဟု ငြီးချင်ဟန်ဆောင်လျက် မမသဉ္ဇာ ပွဲတက်ပုံများကို တိုးတိုးတိတ်တိတ် save လုပ်လျက်ရှိ၏။ အချို့ကတော့လည်း ပြောတော့သာ ဆွမ်းလောင်းပွဲတဲ့။ အတော့်ကို မထော်မငမ်းတွေပါလားကွာ ဆိုကာ ကားပေါ်မှ ကုန်းပြ၊ ကော့ပြ၊ ဖြဲပြနေသည်များကို အကြိမ် ၃၀ မြောက် ကြည့်ရှုလျက်ရှိ၏။

အပေါ်ကပြောနေတာကို စိတ်ဝင်တစား နားထောင်ကာ ငါတို့အတွက် အရေးကြီးသဟဲ့။ အရယူသွားမှဆိုသူ တစ်ယောက်ကမှ မရှိ။ အဲလေ ပြောနေပုံကလည်း တစက်ကလေးမှ စိတ်ဝင်စားစရာမှ မကောင်း။ အဲလေ စိတ်ဝင်စားလောက်သည့် အကြောင်းအရာ ကလည်း မဟုတ်။ သဟာတွေကို ကျောင်းမှာတုံးက အသည်းအသန် စာကျက်ဖြေလာပြီးမှ ဘာကိစ္စ စိတ်ဝင်စားရတော့မှာတုံး။

အဲသဟာ ဘာလုပ်တာပါနည်း။ ဘယ်သူ့အတွက် အကျိုးရှိပါသနည်း။
ကျွန်တော့်အမြင်မှာတော့ ဘယ်သူ့အတွက်၊ ဘာအတွက်မှ အကျိုးမရှိပါ။ အချိန်ကုန်၊ လူပန်း၊ အလုပ်ပျက်၊ စရိတ်တက်တာသာ ရှိပါသည်။

မိတ်ဆွေတို့ကို ကျွန်ုပ်တက်ခဲ့သည့် စင်ကာပူမှ CPD သင်တန်းများ လာရောက်လေ့လာ စေချင်ပါသည်။ (Member မဟုတ်သည့် အပြင်လူများအတွက်ဆို ဈေးကတော့ ကြီးပါသည်။) သူတို့ဘယ်လိုလုပ်နေတယ်ဆိုတာ သိစေချင်ပါသည်။

CPD ဆိုတာ မိမိတို့၏ အသိပညာ၊ အတတ်ပညာကို အရောင်တင်ပေးသည့် သင်တန်း၊ ဝပ်ရှော့၊ ဟောပြောပွဲများသာဖြစ်၍ ရောင်းကုန်တစ်ခုမဟုတ်ကြောင်း ပြောလိုပါသည်။

(၅) BE Vs AGTI

နောက်ပြီး BE နှင့် AGTI တို့အကြား မင်းဘာကောင်လဲ၊ ငါဘာကောင်လဲ ကိစ္စ။
ကျွန်တော်ကတော့ လက်မှတ်တို့ ဘွဲ့တုိ့ဆိုတာ အခြေအနေတစ်ရပ်ဟုသာ ရှုမြင်ပါသည်။ သူကိုင်ထားသည့် ဘွဲ့လက်မှတ်ကြောင့် သည်လောက်တတ်သည်ဟု ကျွန်တော်ကတော့ မထင်ပါ။ တကယ် သူဘယ်လောက်တတ်တယ်ဆိုတာ ကိုင်ထားသည့် ဘွဲ့လက်မှတ်ထက် လေ့လာမှု ဘယ်လောက်အားကောင်းသလဲ။ သူဘယ်လောက် လေ့လာနေသလဲ ဆိုသည့်အပေါ် များစွာ မူတည်နေပါသည်။

ဓားဟူသည် အမြဲအသုံးချနေမှ ထက်နေသည်။ ဓားမည်ကာမတ္တနှင့် ထရံတွင် သည်အတိုင်းထိုးထားပါက သံချေးတက်နေမည်သာ ဖြစ်ပြီး ဘာမှသုံးလို့ရမှာ မဟုတ်ပါ။

စင်ကာပူမှာလည်း B.Sc (Physics) ဘွဲ့နှင့် ကျွန်တော်တို့လောက် လခရနေသူများ ရှိပါသည်။ ထိုသူများသည် အမြဲ ကြိုးစား လေ့လာနေသူများဖြစ်၏။ ငါလည်း B.Sc (Physics) ဘွဲ့ရလို့ သူ့လောက်ရလိမ့်မည် မတွက်ပါနှင့်။ သူဘယ်လိုကြိုးစားခဲ့သလဲ အရင်လေ့လာပါ။ နောက်ပြီး AGTI သမားများလည်း ကျွန်တော့်ထက် လခပိုရသူများ ရှိပါသည်။ ကျွန်တော့်အနေနှင့် သူတို့ကို မနာလို မရှုစိမ့်စရာ ဘာအကြောင်းမှ မရှိပါ။ သူ့လိုလိုချင်ရင် သူ့လိုကြိုးစားရမည်။ သူ့ထက်ပိုလိုချင်လျှင် သူ့ထက် ပိုတော်အောင်  ကြိုးစားရမည်သာ ဖြစ်၏။ သူရနေသည့်လခကို ကိုယ့်အိတ်ကပ်ထဲမှ ပေးနေရတာလည်း မဟုတ်ပါဘဲလျက် အလိုလိုနေရင်း မနာလို မရှုစိမ့်နေသူများမှာ အလွန် အံ့သြစရာကောင်းသူများသာ ဖြစ်ပါသည်။

B.E ဆိုတိုင်းလည်း ငါ ဘီအီးကွဟု လက်မထောင်စရာ အကြောင်းမရှိပါ။ ငါ ဘယ်လောက်တတ်သလဲဆိုတာ ကိုယ့်ကိုယ်ကိုယ် ပြန်မေးကြည့်ဘို့လိုပါသည်။ မင်းက AGTI အဆင့်ပဲရှိတာဟု အထင်မသေးပါနှင့်။ AGTI ပေမယ့် ကိုယ့်လောက်မတတ်ဟု ဘယ်လို လုပ် ပြောလို့ရပါမည်နည်း။ ဘီအီးမှာလည်း မမူးတဲ့ (ဟုတ်ပေါင်၊ အရက်နဲ့မှားကုန်ပြီ) တော်တဲ့ဘီအီးတွေရှိသလို so call ဘီအီးတွေ ရှိပါသည်။ AGTI မှာလည်း တော်တဲ့ AGTI တွေရှိသလို သုံးလုိ့စားလို့မရသူတွေ ဒုနဲ့ဒေး ရှိပါလိမ့်မည်။ ခုနင်ကပြောသလို သူဘယ်လောက် လေ့လာနေသလဲ။ ဘာတွေလုပ်ခဲ့သလဲ ဆိုသည့်အပေါ် များစွာမူတည်ပါသည်။

သို့ဆိုလျှင် မင်းဘာကောင်လဲ၊ ငါဘာကောင်လည်းကိစ္စ ပြောစရာကို မလိုတော့ပါ။ ရှင်းလောက်ပါပြီ။

AGTI ကို အင်ဂျင်နီယာဟု မသတ်မှတ်တာ မဟုတ်။ ဟို့ မူရင်းဥပဒေထဲမှာ ပါပါသည်ဟု ဆရာဒေါက်တာချာလီသန်းလည်း ပြောခဲ့ပါသည်။ သို့အတွက် AGTI ကို အင်ဂျင်နီယာဟု သတ်မှတ်၊ မသတ်မှတ်လည်း ပြောစရာလိုတော့မည် မဟုတ်ပါ။ PE, RE, RSE လိုအပ်ချက်များမှာလည်း ဥပဒေအရသာဖြစ်ပြီး နေရာတကာ လိုက်တိုင်းနေစရာ အကြောင်းမရှိပါကြောင်း။

သည်မှာပြောခဲ့သမျှအားလုံး ကျွန်ုပ်၏ အမြင်၊ ယူဆချက်များသာဖြစ်သဖြင့် မိတ်ဆွေများအဖို့ နှစ်သက်၊ လက်ခံရမည်ဟု မဆိုလို။ လက်ခံခြင်း၊ လက်မခံခြင်းမှာ ကိုယ့်ကိစ္စနှင့်ကိုယ်သာဖြစ်ပါသည်။ ကျွန်တော့်အနေနှင့် ဘာမှပြောစရာမရှိပါ။

ကျေးဇူးတင်ပါသည်။

အေးငြိမ်း
၂၈ ဇန္နဝါရီလ၊ ၂၀၁၉

Sunday, January 27, 2019

ISO 45001 အကြောင်း


ISO 45001 ကို ကျွန်တော် ရှင်းလင်းချက်တွေနဲ့တကွ ဘာသာပြန်နေတာ တစ်ဝက်လောက်ပြီးနေပါပြီ။
ပြီးသလောက်ကို မြန်မာနိုင်ငံစံနှုန်းအဖွဲ့ကို သွားပြပါတယ်။

ရည်ရွယ်ချက်ကတော့ ကိုယ်ဘာသာပြန်ထားတာတွေကို တတ်သိနားလည်သူ တစ်ယောက်ယောက်ကို ဖတ်ခိုင်းပြီး ချွတ်ချော် မှားယွင်းနေတာတွေ၊ မသင့်တော်တာတွေ၊ ဘာသာပြန်အယူအဆလွဲနေတာတွေရှိရင် ထောက်ပြဝေဘန်၊ အကြံပြုနိုင်အောင်ပါ။

သူတို့က အခု ဘာသာပြန်နေတာကို နှစ်ပိုင်းလုပ်ရင် ပိုကောင်းမယ် လို့ အကြံပြုပါတယ်။
တစ်ပိုင်းက စံနှုန်းသီးသီးကိုပဲ ဘာသာပြန်ဘို့နဲ့
နောက်တစ်ခုက လက်တွေ့အသုံးချမယ့်အပိုင်းကို ရှင်းလင်းချက်တွေ နမူနာပုံစံတွေနဲ့ အပြည့်အစုံရေးဘို့ပါ။
 ဆိုတော့ စာအုပ်နှစ်အုပ်ဖြစ်သွားမှာပေါ့။

ကိုယ်လည်း နဂိုကတည်းက နှစ်အုပ် ရေးဘို့ပါဘဲ။
ဒါပေမယ့် သူတို့ပြောသလိုမဟုတ်ဘူး။ မူရင်းစံနှုန်း ISO 45001 ကို ရှင်းလင်းချက်နဲ့တကွ ဘာသာပြန်မယ်။
နောက်တစ်ခုက implementation ပိုင်းဖြစ်တဲ့ BS 45002 ကို ရှင်းလင်းချက်နဲ့တကွ ဘာသာပြန်ဘို့ပါ။

ဒါပေမယ့် အခုတော့ သူတို့ပြောသလို ISO 45001 ကို မူရင်းအတိုင်း အတိအကျ ဘာသာပြန်လိုက်မယ်။ အဲဒါဆို MM ISO 45001 Myanmar version ထွက်လာမှာပေါ့။

ဒါပေမယ့် ISO 45001 စာအုပ်ကို မူရင်းအတိုင်းဖတ်ပြီး နားလည်နိုင်စရာမရှိဘူး။ ရှင်းလင်းချက်တစ်အုပ်တော့ ရေးဘို့လိုမယ်လို့ တွက်ပါတယ်။ ဒါပေမယ့် ISO 45001 ရှင်းလင်းချက်ကို စာတစ်အုပ် သပ်သပ်မထုတ်တော့ဘူး။ implementation ပိုင်းဖြစ်တဲ့ BS 45002 မှာ ပထမပိုင်း ISO 45001 ရှင်းလင်းချက်။ ဒုတိယပိုင်း BS 45002 ဆိုပြီးတော့ပဲ လုပ်လိုက်တော့မယ်။

အချိန်တော့ နည်းနည်းပိုကြာသွားမှာပေါ့။
ISO 45001 ကတော့ ဧပြီမကုန်ခင် ထွက်နိုင်မှာပါ။ (အဲဒီစာအုပ်ကိုတော့ မြန်မာနိုင်ငံစံနှုန်းအဖွဲ့ကို မူပိုင်အဖြစ် ပေးလိုက်ပါမယ်။ မြန်မာနိုင်ငံအတွက် ကျွန်ုပ်လက်ဆောင်ပေါ့။)

BS 45002 တော့ ဇွန်လမတိုင်မီ ထွက်လာနိုင်လိမ့်မယ်လို့ ယူဆပါကြောင်း။

အားပေးသူအပေါင်းကို ကျေးဇူးတင်ပါကြောင်း

အေးငြိမ်း
၂၆ ဇန္နဝါရီလ၊ ၂၀၁၉

ရင်ဖွင့်လိုက်သော ညတစ်ည


ယနေ့ည TTMY အဖွဲ့၏ စီစဉ်ပေးမှုဖြင့် NLD လွှတ်တော်ကိုယ်စားလှယ်ကြီးများနှင့် ကျွန်ုပ်တို့ တွေ့ဆုံပွဲ လုပ်ဖြစ်ပါ၏။
နည်းနည်းမှ မဗရုတ်သုက္ခလိုက်ရလျှင် စားမဝင်အိပ်မပျော်သောကြောင့် ကျွန်ုပ်လည်း နည်းနည်းလောက် ဗရုတ်သုက္ခဖြစ်ရပါ၏။

ပွဲက ၆ နာရီကနေ ၉ နာရီ။
တစ်ယောက်က ရှေ့မီ၊ အလယ်မီ၊ နောက်မီ။
နောက်တစ်ယောက်က လူငယ်။

ဆိုတော့ မေးခွန်းတစ်ခုမေးလိုက် ရှေ့မီနောက်မီဆရာကြီးက ဟို့ ဒုတိယကမ္ဘာစစ်ဖြစ်ရာကနေရှင်းလိုက်နှင့် မေးခွန်း သုံးလေးခုလောက်လည်းပြီးရော ၉ နာရီတီးလေ၏။ ကျွန်ုပ်မှာလည်း အစွမ်းမပြလိုက်ရမှာစိုး၍ ရင်တမမနှင့် ငါ့အလှည့်မှ ရောက်ပါတော့မလားဟု ရင်တဒိတ်ဒိတ်ဖြစ်နေလေသော ဟူသတတ်။

နောက်တော့ ကိုရင်စောကို အနားကပ်ကာ မိုက်ကို အတင်းလုရလေ၏။

သို့နှင့်တောင် ကျွန်ုပ်ပြောတော့ ၉ နာရီတီးနေပြီမို့ ပြောချင်တာကလည်းများလေတော့ သူများနားထောင်ချင်သည်မှန်းမသိ၊ နားမထောင်ချင်သည်မှန်းမသိ အတင်းရောကာရော နောက်ကလူလိုက်လာသည့်အတိုင်း ဒရောသောပါးပြောလေ၏။

တက်သုတ်ရိုက်ပြောရသည့်တိုင် ဟိုး ရှေးသရောအခါတုံးက MTP Panel အကြောင်းလည်းပါ၊ ကွီးဖြိုးတို့လာတုံးက အနားကပ် ပြောလိုက်တာတောင် ဘာသံမှ မကြားရတာအစ၊ ၂၀၁၄ တုံးက ရေနံချောင်းအမတ်ကို နိုင်ငံခြားသားများ အလုပ်ခန့်ထားခြင်း ဥပဒေ တင်ခိုင်းတာလည်း ဘာသံမှ မကြာရတာ အလယ်၊ နောက်ဆုံး တစ်တန်းကို တစ်သန်းခွဲလောက်ရိုက်ထုတ်နေသည့် ကျောင်းသုံးစာအုပ်များတွင် စာမျက်နှာတိုင်းလိုလို သောက်သောက်လဲ အမှားတွေပါနေတာကို နိုင်ငံတော် အတိုင်ပင်ခံပုဂ္ဂိုလ်၏ အကြံပေးစာမျက်နှာသို့ပို့၊ ပညာရေးဝန်ကြီးဌာန၏ website feedback သို့ပို့၊ ဂျာနယ်များသို့ပို့။ ဘယ်လိုပင်လုပ်သည့်တိုင် ဘာမှ ဖြစ်မလာ၍ ဘယ်လိုလုပ်ရမည်မသိတာ အဆုံး။ ထိုကျောင်းသုံးစာအုပ်မှာ အမှားတွေ သောက်သောက်လဲပါနေတာ ဘယ်သူ့မှာ တာဝန်ရှိပါသလဲ၊ ဘယ့်အတွက် အဲသလိုတွေ ဖြစ်နေရပါသလဲ ဟု ထားဝယ်လွှတ်တော်ကိုယ်စားလှယ်မှတဆင့် မေးခွန်းတင်ခိုင်း တာလည်း မေးခွင့်မရသည်ထင်ကြောင်း။ ဘာသံမှ မကြားရတော့ကြောင်း။

ထို့နောက် ကမ္ဘာ့အထူးဆန်းဆုံးနိုင်ငံအဖြစ် မှတ်တမ်းတင်ရမည့် မြန်မာရွှေနိုင်ငံတော်ကြီးတွင် ဝန်ထမ်းများ သန်းပေါင်းများစွာ ရှိသည့်တိုင် အလုပ်ခန့်ထားခြင်းဥပဒေ (Employment Act) မရှိသည့်အကြောင်း။

နိုင်ငံခြားကုမ္ပဏီများက မြန်မာနိုင်ငံအတွင်းလာကာ လုပ်ချင်သလိုလုပ်နေတာ လက်ပိုက်ကြည့်နေကြသည့် အကြောင်း၊ နိုင်ငံခြား ကုမ္ပဏီများကို ဘာဥပဒေနှင့် ထိန်းချုပ်ထားပါသလဲ။ စင်ကာပူမှာ Foreign Manpower Employment Act (နိုင်ငံခြားသားများ အလုပ်ခန့်ထားခြင်း ဥပဒေ) ရှိကြောင်း။ ကျွန်ုပ်က လွှတ်တော်ကိုယ်စားလှယ်မှတစ်ဆင့် တင်ပြခိုင်းသော်လည်း ဘယ်လိုမှ အရေးယူဆောင်ရွက်မှုမရှိ။

ယနေ့တိုင် ကိုယ့်အိမ်ဝိုင်းထဲ သူများလာ ချေးပါနေကြတာကို ကြည်ဖြူစွာပင် လက်သင့်ခံနေကြသည်ကို နားမလည်ကြောင်း။ အစရှိသဖြင့် အားလုံးကို ဝါးလုံးချေးသုတ်ကာ ရမ်းလေ၏။

ကျွန်တော်ပြောတာကို တစ်ယောက်ကထကာ နိုင်ငံခြားသားများခန့်ထားမှုကို ဥပဒေဖြင့်မလုပ်ထားသောကြောင့် နိုင်ငံတော်အနေနှင့် မည်မျှ ဆုံးရှုံးနစ်နာနေရကြောင်း ဖြည့်စွက်ပြောပြ၏။ (နာမည်မေ့နေ၍ ထည့်မပြောနိုင်ခြင်းကို ခွင့်လွှတ်ပါ။)

ကိုယ်စားလှယ်တော်ကြီးများလည်း စာနှင့်ရေးကာ မှတ်သွားပါ၏။ ကျွန်ုပ်လည်း ပြောခဲ့သည်များရော ဥပဒေ၊ အထောက်အကူပြု စာတမ်းများကို အီးမေးပို့ပေးမည်ဖြစ်ကြောင်း ပြောလိုက်ပါသည်။

ကိုတင်မင်းက စင်ကာပူကို လွှတ်တော်ကိုယ်စားလှယ်များလာလိုက်ကြ၊ အကျန်တွေ (ဟုတ်ပေါင်) အကြံတွေပေးလိုက်ကြ။ နောက်တော့ မေ့မေ့ပျောက်ပျောက်ဖြစ်သွားကြနှင့် ဘာတစ်ခုမှ အကောင်အထည်ပေါ်မလာ။ ထို့ကြောင့် နိုင်ငံခြားမှ တတ်သိ ပညာရှင်များနှင့် မြန်မာပြည်မှ လွှတ်တော်ကိုယ်စားလှယ်များအကြား ဆက်သွယ်ဆောင်ရွက်ပေးဘို့ ပလက်ဖောင်းတစ်ခု လုပ်ပေးထားဘို့။ သဟာမှ ဒီကပြောတာတွေကို မြန်မာပြည်မှာ ဘယ်လိုဆက် အကောင်အထည်ဖော်မည်ဆိုသည်ကို မပြတ် ဆက်လက်ဆောင်ရွက်နေနိုင်မှာဖြစ်ကြောင်း။

ဦးတင်မောင်ဝင်းက အိမ်အကူတွေကို ပိတ်ထားတယ်လည်းဆိုသေး၊ လတိုင်းလည်း လာနေသေး။ ဖြစ်နေသဖြင့် ပိတ်လို့မရတဲ့ အတူတူ တရားဝင်အလုပ်လာလုပ်ဖို့ခွင့်ပြုရအောင် လွှတ်တော်မှာ တင်ပြဘို့၊ မေးဘို့အကြောင်း။

ကိုအောင်ကျော်သိုက်က ဆောက်လုပ်ရေးဝန်ကြီးဌာနနှင့် တကယ်လုပ်ကိုင်နေသူတွေ (ကန်ထရိုက်တာများ) အကြား တကယ် တတ်သိနားလည်သူများပါသည့် အဖွဲ့ ဖွဲ့ကာ ဆောင်ရွက်ဘို့ ကြိုးစားကြစေလိုကြောင်း။ ပဲခူး၌ ၎င်းတို့ pilot အဖြစ် Bago Region Construction Control Authority ဖွဲ့ကာလုပ်ပေးခဲ့သည်မှာ အကြောင်းကြောင်းကြောင့် မအောင်မြင်ခဲ့ကြောင်း စသည်ဖြင့် အများကြီးပြော။

ဆရာဝန်မကြီးတစ်ယောက်ကလည်း ကွမ်းယာဆိုင်တွေကစ အန်တီဘိုင့်အိုတစ်ဆေးတွေကို ဝယ်လို့ရနေကြောင်း။ ဆေးတွေကို စပ်ကာရောင်းချင်သလို ရောင်းနေကြကြောင်း။ ဤသည်ကို ထိန်းကွပ်ပေးစေလိုကြောင်း။

အထူးအားဖြင့် ၂၀၂၀ အတွက် ဘယ်လိုပြင်ထားသလဲ။ ဘယ်လိုတွေလုပ်ရင်တော့ ကောင်းမယ် စသဖြင့် . . စသဖြင့် . . . စသဖြင့် . .

အင်း . . . .
စိတ်ကတော့ ခပ်ပျက်ပျက်ဘဲဗျို . .

တစ်ယောက်လာလိုက် ပုံပြင်လေးတွေ ပြောလိုက်
နောက်တစ်ယောက်လာလိုက် နောက်ပုံပြင်တစ်ခု ပြောလိုက်

အမှန်က ISO 45001 ရေးနေလို့ မသွားတော့ဘူးလို့ဘဲ။
ဒါပေမယ့် သူတို့ဘာတွေပြောသလဲ နားထောင်ချင် . . ပြောချင်တာလေးတွေလဲရှိလို့သွား . . .

.  . . . . .

ကိုယ်က ၉ နာရီထိုးနေပြီဆိုတော့ အချိန်တွေကျော်ရင် အပိုကြေးပေးရတော့မှာဘဲဆိုပြီး အတင်း တက်သုတ်ရိုက်၊ နောက်က လူလိုက်လာသလို ပြောချင်တာ ပြောပြီးသွားမှ . . .

ကိုရင်လေး မောင်ဖထီးက ထတဲ့ပြီး မေးခွန်းတွေ မေးလို့ရပါသေးတယ် . . ဆယ်နာရီထိ တိုးထားတယ်. . .

ဟိုက်ရှားဘားစ် . . သေဇမ်း

အဲသဟာပြောသပေါ့ . . ကျုပ်မို့လို့မလုပ်လိုက်နဲ့ . . အရာရာနဲ့ အကြောင်းကြောင်းချည်း ဆိုတာ . .

Friday, January 18, 2019

Risk-based Thinking


(၁) ဘာသာပြန်ခြင်း
---------------------

(ဘာသာပြန် ဘာသာရပ် ကို အဝေးသင်တက္ကသိုလ်၊ မြန်မာစာအထူးပြု၌ ပထမနှစ်ကပင် စတင်သင်ကြားရ၏။ ပထမနှစ်တွင် မ ၁၁၀၃၊ ဒုတိယနှစ်တွင် မ ၂၁၀၆၊ တတိယနှစ်တွင် မ ၃၁၁၀ စသဖြင့် ဖြစ်၏။ ကျွန်ုပ်ကား ယခု တတိယနှစ်ထိ သင်ကြားခဲ့ပြီဖြစ်ရာ ကျွန်ုပ်လေ့လာခဲ့သော ဘာသာပြန် ဘာသာရပ်မှ စာများဖြင့် စာဖတ်သူများကို ဆရာကြီးလုပ်ပါတော့မည်။ ကျွန်ုပ်၏ ဆရာကြီး လုပ်ခြင်းကို မခံလိုသူများ အဝေးသင်တက္ကသိုလ်၊ မြန်မာစာအထူးပြုကို တက်ရောက် လေ့လာသင်ယူကြပါဟု တိုက်တွန်းလိုက်ရ ပါသတည်း။ ဤကား စကားချပ်)

ဘာသာပြန်ခြင်းအကြောင်း ယခင်ကလည်း ကျွန်တော် တော်တော်များများ ရေးခဲ့ဖူးပါပြီ။

ဘာသာပြန်ခြင်းပြဿနာသည် ယခုမှမဟုတ်။ ရှေးယခင်ကပင် ရှိခဲ့၏။ ဘာသာပြန်ခြင်းမှာလည်း ပုဂံခေတ်ကပင် ရှိခဲ့ကြောင်း ဘာသာလေးမျိုးရေးထိုးထားသည့် မြစေတီကျောက်စာက သက်သေပြနေ၏။ မြစေတီကျောက်စာတွင် ပါဠိဘာသာမှလွဲ၍ ကျန် ဘာသာသုံးမျိုးမှာ ရေးသားပုံရော အဓိပ္ပာယ်မှာ အတူတူပင်ဖြစ်သည်ဆို၏။ ပါဠိကတော့ ဂါထာပုံစံနှင့်ရေးထိုးထားပြီး မြန်မာလို ကျောက်စာကို ဘာသာပြန်ထားခြင်းမဟုတ်။

ပြောရလျှင် မြစေတီကျောက်စာကို တွေ့သူမှာ မြန်မာမဟုတ်။ အင်္ဂလိပ်ကျောက်စာဝန်ဖြစ်၏။ ကျောက်စာကိုဘာသာပြန်တာလည်း မြန်မာက စတာမဟုတ်။ အင်္ဂလိပ်ပညာရှင်ကပင် မွန်ဘာသာမှ အင်္ဂလိပ်ဘာသာသို့ စတင်ပြန်ဆိုခဲ့တာ ဖြစ်၏။ (အဟဲ - အဝေးသင် တက်ရတဲ့ ကျေးဇူးတွေပေါ့ခင်ဗျာ။ စာမေးပွဲပြီးသွားပြီဆိုတော့ ခုနှစ်တွေ လူနာမည်တွေလည်း အကုန် စာအုပ်ထဲ ပြန်ဝင် သွားကြပြီပေါ့။)

ရှေးဘုရင်မင်းများအဆက်ဆက်ကပင် ဘာသာပြန်အထောက်အထားများ ရှိခဲ့၏။ အများဆုံးဘာသာပြန်သည့်ဘာသာမှာ ပါဠိ ဘာသာပင်ဖြစ်၏။ ပြောရလျှင် ပါဠိလိုရေးထိုးထားသမျှကျမ်းစာများအနက် ဘာသာမပြန်ရသေးသည့် ကျမ်းစာဟုပင် မရှိတော့ဟု ဆို၏။

ထို့ပြင် ဟိန္ဒူစတာနီ၊ သက္ကဋစသည့်ဘာသာများကိုလည်း ဘာသာပြန်၏။ ဘကြီးတော်ဘုရားလက်ထက်တွင် ဗေဒင်ကျမ်းများကို မြန်မာဘာသာသို့ ပြန်ဆိုခဲ့၏။

ဘာသာပြန်သည်ဆိုရာတွင် ဘာသာပြန်သူသည် နိုင်ငံခြားဘာသာကိုရော မိခင်ဘာသာကိုပါ ကောင်းစွာ နားလည်တတ်ကျွမ်းသူ ဖြစ်ရမည်။ ဥပမာ - အင်္ဂလိပ်ဘာသာမှ မြန်မာဘာသာသို့ ပြန်ဆိုမည်ဆိုပါက အင်္ဂလိပ်လိုရော မြန်မာလိုပါ ကောင်းစွာ တတ်သိ နားလည်သူဖြစ်ရမည်။ အင်္ဂလိပ်စာလုံးများကို သင့်တော်သည့် မြန်မာစကားလုံးများနှင့် ဖလှယ်ခြင်း မပြုနိုင်ပါက စာကောင်းတစ်ပုဒ် ဖြစ်လာမည် မဟုတ်ပါ။ ယခုခေတ်ကြီးတွင် စိတ်ပျက်စရာကောင်းလှသော ဘာသာပြန်များကို မကြာခဏ မြင်တွေ့နေရခြင်းမှာ မြန်မာစာကို လေးလုံးကွဲအောင် မတတ်ကြ၍ ဖြစ်ပါသည်။ (စာတတ်တာနှင့် စာတက်တာတောင်) ကွဲကွဲပြားပြား မသိတဲ့သူတွေက ဘာသာပြန်နေသည်ဆိုမှတော့ ပြောစရာကို မရှိတော့ပါ။

(အဲလေ သူတို့တင်မဟုတ်ပါ။ ယခု ၂၁ ရာစုတွင် သင်တန်းတက်တာကို သင်တန်းတတ်တယ်။ လုပ်တတ်တာကို လုပ်တက်တယ် ဟု ပြောသည်မှာ လူကြီးလူကြီး၊ ကလေးကလေး၊ ပညာတတ်သူရော၊ ပညာမတတ်သူများပါ အကုန်လုံးလိုလို ရေးသားနေကြ သည်ကိုဖြင့် ကျွန်ုပ်မှာ အတော့်ကို နားမလည်နိုင်အောင် ဖြစ်ရ၏။ ဤသို့ရေးသားပြောဆိုနေကြသူများကိုလည်း အတော် သောက်မြင်ကပ်မိ၏။ ကျွန်တော်သာလုပ်ခွင့်ရလျှင် ထို "လုပ်တက်သည်၊ သင်တန်းတတ်ချင်လို့" ဆိုသူများကို အကုန်တန်းစီကာ ဖင်လှန်ပြီး တုတ်ကြီးကြီးနှင့် ရိုက်မိမည် ဖြစ်၏။ ဤကား စကားချပ်။)

ပထမ အင်္ဂလိပ်လိုရေးထားတာကို သေသေချာချာ သဘောပေါက်နားလည်ရမည်။ ထို့နောက်မှ ထို မူရင်းအဓိပ္ပာယ်နှင့် မလွဲစေရန် မိမိမြန်မာဘာသာဖြင့် ပြန်ရေးရမည်။ ပြန်ရေးရမည် ဆိုတာ စကားတစ်လုံးချင်း ဘာသာပြန်ထည့်ရမည်ဟုမဆိုလို။ မူရင်း အဓိပ္ပာယ် ကို ခြုံမိငုံမိစေရန် မိမိဘာသာဖြင့် ပြန်ရေးရမည်ကို ဆိုလိုသည်။ လိုအပ်ပါက အဖြည့်စာသားများ ထည့်ရန်လိုပြီး အဓိပ္ပာယ်ကို ပိုမို ရှုပ်ထွေးစေမည်ဆိုပါက မလိုအပ်သည်များကို ချန်ထားခဲ့ရပါမည်။

ဝေါဟာရတစ်လုံးတည်းပေမင့် ပုံသေထားပြီး ပြန်လို့မရ။ နေရာကို၊ အကြောင်းအရာကို၊ ဘာသာရပ်ကိုလိုက်ပြီး ပြန်ဆိုရသည်။ နမူနာပြရလျှင် သေသည် ဟူသောစကားတစ်လုံးတည်းကို -
သေသည်။ ဆုံးသည်။ သေဆုံးသည်။ ကွယ်လွန်သည်။ မသာပေါ်သည်။ ဂန့်သည်။ မာလကသည်။ မာလက ဈာန်ကြွသည်။ မာလကီးယား သွားသည်။ ဇီဝိန်ချုပ်သည်။ အသက်ပျောက်သည်။ အနိစ္စရောက်သည်။ အနိစ္စသဘောနှင့် ကိစ္စချောသည်။ ဘဝတစ်ပါးသို့ ပြောင်းသွားသည်။
စစ်ပွဲ၌သေလျှင် ကျဆုံးသည်။
ဟော - ဘုရင်ကျတော့ နတ်ရွာစံတော်မူသည်။ နတ်ရွာလားသည်။ ကံကုန်တော်မူသည်။ နတ်ရွာစံ ကံတော်ကုန်သည်။ လူ့ဘုံငြီး၍ နတ်ထီးစံတော်မူသည်။
ဘုန်းကြီးဆိုလျှင် ပျံလွန်တော်မူသည်။ ခန္ဓာဝန်ချသည်။
ဘုရားဆိုလျှင် ပရိနိဗ္ဗာန်ပြုသည်။
ခရစ်ယာန်တွေဆိုလျှင် ခရစ်တော်၌ အိပ်ပျော်သည်။
အစ္စလာမ်များဆိုလျှင် အလ္လာအရှင်မြတ်အမိန့်တော်ခံယူသည်။
- စသည်ဖြင့် သူ့နေရာနှင့်သူ သုံးရသည်။ ဘုန်းကြီးသေတာကို သွားပြီး မာလကီးယားသည်ဟု ပြောလျှင် ကျောင်းပေါ်က ခေါင်းနှင့် ဆင်းရမည်။

နောက်ပြီး ဘာသာပြန်မည့်သူသည် ထိုနယ်ပယ်ထဲမှသူ ဖြစ်ရမည်။ သို့မှသာ ထိုနယ်ပယ်မှ စကားရပ်များကို သူနားလည်နိုင်မည်။ Safety စာတွေ ဘာသာပြန်မည့်သူသည် safety နယ်ပယ်မှသူသာ ဖြစ်ရမည်။ သို့မဟုတ်လျှင် ပေါက်တတ်ကရ ဘာသာပြန်များ ထွက်လာမည်မှာ မလွဲ။ Safety နယ်မှလူဆိုတာတောင် တော်ရုံလူမရ။ သေသေချာချာ တတ်ကျွမ်း နားလည်သူ ဖြစ်ရမည်။ နောက်ပြီး အရပ်သုံးစကားနှင့် နည်းပညာနယ်ပယ်သုံးစကား မတူ။ နည်းပညာနယ်မှစကားကို အရပ်သုံးစကားနှင့် ပြန်လိုက်ပါက မှန်မည်မဟုတ်ချေ။

(၂) Risk
----------

သည် risk အကြောင်းလည်း ကျွန်တော် များမကြာသေးမီက ပို့စ်တစ်ခု ရေးခဲ့ဖူးပါသေး၏။ သည်စကားလုံးသည် ကျွန်ုပ်ကို အတော် ဒုက္ခပေးသော စကားလုံးဖြစ်၏။ ထို့ပြင်တဝ စကားလုံးအသစ်ထွင်နိုင်စွမ်းမရှိသော ကိုယ့်ကိုယ်ကိုယ်လည်း အခါခါ ကျိန်ဆဲမိလေ၏။

ဤကဲ့သို့ ဝေါဟာရများကို ဘာသာပြန်ရန် ခက်ခဲတော့မှ ရှေးလူကြီးများကို အလွန်ချီးကျူးမိလေ၏။
ဆိုပါစို့။ Dry cell ကို ဓာတ်ခဲ ဟု ဝေါဟာရအသစ် ထွင်ခဲ့၏။ Lift ကိုကျတော့ ဓာတ်လှေခါး။ Flash light ကို ဓာတ်မီး။ လမ်းဘေး မီးတိုင်ကို ဓာတ်တိုင်၊ ရေပူများကို အေးမသွားအောင် ထိန်းထားသည့်ဘူးကို ဓာတ်ဘူး၊ ဓာတုဗေဒပ္စည်းများ တစ်ခုနှင့်တစ်ခု ပေါင်းစပ်ခြင်းကို ဓာတ်ပြုသည်၊ ခန္ဓာကိုယ်မှလိုသည့်ရေကို ရေဓာတ်၊ ရေဓာတ်ခန်းခြောက်သူတို့အား တိုက်ကျွေးရသည့်ရေကို ဓာတ်ဆားရေ၊ နေမကောင်းသူများကို ဆေးအဖြစ်ကျွေးသည့်အစာကို ဓာတ်စာ။ ပထဝီ၊ တေဇော၊ အာပေါ၊ ဝါယောတို့ကို ဓာတ်ကြီးလေးပါး။ လျှပ်စစ်ဖြင့်ရှော့ရိုက်ကာ ကင်ဆာကလပ်စည်းများကို သတ်တာကျတော့ ဟော - ဓာတ်ကင်သည် တဲ့။ သူတို့ထွင်သွားပုံလေးမှာ အလွန်လှပေသည်။ ကျွန်ုပ်သည်လည်း သူတို့ကဲ့သို့ စကားလုံးတစ်လုံးအသစ် ထွင်လိုက်ချင်စမ်းပါဘိ။

Risk ကို အရပ်သုံးစကားဖြင့် စွန့်စားသည်၊ အရဲကိုးသည်ဟု ဘာသာပြန်၏။ သို့သော် ဘာသာရပ်ဆိုင်ရာ ဝေါဟာရအရမူ ဤကဲ့သို့ ဘာသာပြန်၍မရပါ။ ယခု ကျွန်တော် ISO 9001 ကို ဘာသာပြန်နေသည်။ ဘာသာပြန်သည်ဆိုခြင်းထက် ထိုစံနှုန်းအကြောင်း ရေးနေသည်ဆိုက ပိုမှန်ပါမည်။ အဘယ်ကြောင့်ဆိုသော် ထိုစာအုပ်ပါစာများကို အတိအကျပြန်ဆိုခြင်း မဟုတ်ဘဲ လူအများ နားလည်အောင် ရှင်းလင်းရေးသားထားခြင်းကြောင့် ဖြစ်၏။ အခြား ISO 45001, ISO 14001 တို့လည်း အလားတူပင် ဖြစ်၏။

ပစ္စည်းအရည်အသွေးနှင့် ပတ်သက်၍ risk ဆိုသည်မှာ -
ကုန်ထုတ်လုပ်ရာတွင် ကုန်ကြမ်းသွင်းလာသူက အရည်အသွေးမမီသည့် ကုန်ကြမ်းများသွင်းလာနိုင်ခြင်းသည် risk ဖြစ်၏။ ဆိုလိုသည်မှာ ကုန်ပစ္စည်းအားလုံးကို အရည်အသွေးမမီတာချည်း သွင်းလာတာမဟုတ်။ အရည်အသွေးပြည့်သည့် ပစ္စည်းများ အကြားတွင် အရည်အသွေးညံ့သည့် ပစ္စည်းများကို ရောထည့်လာခြင်းကို ဆိုလိုသည်။ တစ်သောင်းတန် အစစ်များအကြား၌ အတုများ ရောထည့်ထားသည့် သဘောပင် ဖြစ်သည်။

ကုန်ထုတ်လုပ်သည့် လုပ်သားများသည် ၎င်းတို့လုပ်ကိုင်နေသည့် လုပ်ငန်းစဉ်ကို ကျွမ်းကျင်မနေနိုင်ခြင်းသည် risk ဖြစ်၏။
အလုပ်တစ်ခုကို ထပ်ခါတလဲလဲ လုပ်နေရသဖြင့် ငြီးငွေ့လာကာ အာရုံမစူးစိုက်နိုင်တော့ဘဲ အမှားအယွင်းများ လုပ်မိ လာနိုင်ခြင်းသည် risk ဖြစ်၏။
ဆန်ကုန်သည်ကြီးများအနေနှင့် ဆန်များတွင် ရေငွေ့များပါလာသဖြင့် ဆန်များမှိုတက်နိုင်ခြင်းသည် risk ဖြစ်၏။
ဆရာဝန်တစ်ယောက်အနေနှင့် လူနာကို ရောဂါနာမည် မှားတပ်နိုင်ခြင်းသည် risk ဖြစ်၏။
ဆေးစပ်သူအနေနှင့် ဆရာဝန့်လက်ရေးကို မှားဖတ်သဖြင့် ဆေးမှားပေးနိုင်ခြင်းသည် risk ဖြစ်၏။
ဆရာမတစ်ယောက်အနေနှင့် မိမိသင်ကြားနေသည့် စာကို အဓိပ္ပာယ်အကောက်အယူ လွဲနိုင်ခြင်းသည် risk ဖြစ်၏။

ယုတ်စွအဆုံး ထမင်းစားရာ၌ပင် risk ရှိသည်။
ငါးဟင်းဖြင့် ထမင်းစားစဉ် အရိုးနင်နိုင်ခြင်းသည် risk ဖြစ်၏။
ထမင်းကို ကသုတ်ကရက်စားမိ၍ လည်ချောင်းနင်နိုင်ခြင်းသည် risk ဖြစ်၏။

အထက်တွင်ဖော်ပြထားသည့် ဥပမာများကို ကြည့်လျှင် ဆိုးကျိုးတစ်ခုခု ဖြစ်နိုင်သော အရာသည် risk ဖြစ်ကြောင်း တွေ့နိုင်ပါ သည်။ ထို့ကြောင့် ကျွန်ုပ်က ကိုသန်းလွင်ဘာသာပြန်ပေးသည့် "ဆိုးကျိုးဖြစ်နိုင်ချေ" ဆိုသည်ကို သဘောကျနှစ်သက်ပြီး ယူသုံးပါသည်။ များမကြာမီက risk ကို ဘာသာပြန်ကြည့်ကြပါဟု ကျွန်ုပ်က FB တွင် တင်လိုက်သည့်အခါ မိတ်ဆွေများ ဝိုင်းဝန်း ကွန်မင့်များ ပေးကြသည့်အနက် ကိုသန်းလွင် ဘာသာပြန်သည့် "ဆိုးကျိုးဖြစ်နိုင်ချေ" မှာ အသင့်တော်ဆုံးဖြစ်သည်ဟု ယူဆပါ သည်။

(၃) FB မှ Risk-based thinking
----------------------------------

အကယ်၍သာ risk ကို ဆိုးကျိုးဖြစ်နိုင်ချေဟု ယူမည်ဆိုလျှင် risk-based thinking ကို "ဆိုးကျိုးဖြစ်နိုင်ချေ အခြေပြု ကြံဆခြင်း" ဟု ဘာသာပြန်နိုင်မည် ထင်ပါသည်။

ယခု risk-based thinking အတွက် အကြံဉာဏ်များတောင်းကြတော့ မိတ်ဆွေများပေးလာသည့် ကွန်မင့်များအားလုံးကို စုပေါင်းကာ ကျွန်တော်လေ့လာကြည့်ပါသည်။ ရလဒ်မှာ အောက်ပါအတိုင်းဖြစ်၏။

Risk - စွန့်စားရနိုင်မှု၊ အန္တရာယ်ဖြစ်နိုင်ချေ၊ အန္တရာယ်၊ စွန့်စားမှု၊ ပျက်စီးမှု၊ ပြဿနာအကျိုးဆက်၊ လုပ်ငန်းခွင်တွင်း ဘေးအန္တရာယ် ဖြစ်နိုင်မှု၊ အခက်အခဲကျော်လွှားမှု၊ ဆုံးရှုံးနိုင်မှု၊ ဖြစ်​တန်​ရာအန္တာရာယ်၊​ ဘေးအန္တရာယ်၊ ဆုံးရှုံးနိုင်မှုအလားအလာ၊ ဆိုးကျိုး၊ ဆုံးရှုံးနိုင်မှုအလားအလာ၊
based - အခြေပြု၊ အခြေခံ၊
thinking - စဉ်းစားခြင်း၊ ကြံဆမှု၊ သုံးသပ်မှု၊ တွေးခေါ်ခြင်း၊ အတွေး၊
စဉ်းစားတွက်​ချက်​ခြင်း၊ စဉ်းစားသုံးသပ်ခြင်း၊ တွေးဆခြင်း၊

ဘေးကင်းရေးဦးစားပေး သုံးသပ်ချက်
ဖြစ်ပေါ်လာမည့် ပြသနာများကို ကြိုတင်စဉ်းစားချင့်ချိန်နိုင်စွမ်း၊
နောင်ဖြစ်လာမည့် အခက်အခဲ(ပြဿနာ)များ ကို ခန့်မှန်းတွေးမြင်နိုင်စွမ်း၊
ဖြစ်လာနိုင်သည့် (ကြုံတွေ့လာနိုင်သည့်) အခက်အခဲ (ဒုက္ခ) များကို ကြိုသိမြင်နိုင်စွမ်း။
အန္တရာယ်​၏ အ​ခြေခံသ​ဘောတရား
အခက်အခဲစိန်ခေါ်မှု
အန္တရာယ်​(ဖြစ်​နိုင်​​ခြေ)နဲ့စွန့်​စားမူကို အေ​ခြခံတွေး​ခေါ်ခြင်း
ဆုံးရှုံးနိုင်မှုအလားအလာ အခြေပြု စဉ်းစားခြင်း           
ဆုံးရှုံးနိုင်မှုအလားအလာအား အခြေခံ၍ ကြံဆခြင်း
ဘေးအန္တရာယ်​ ဖြစ်​နိုင်​ခြေများကို (မူတည်​)အခြေပြုစဉ်းစားခြင်း
မလိုလားသော ဘေးအန္တရယ်ဖော်ထုတ်ထိန်းချုပ်နိုင်စေသောစဉ်းစားသုံးသပ်ခြင်း
မလိုလားသော ဘေးအန္တရယ်ခွဲခြားထိန်းချုပ်နိုင်စေသောစဉ်းစားသုံးသပ်ခြင်း
ဘေးအန္တရယ်နှင့်အခွင့်အရေးကိုစီမံကိုင်တွယ်နိုင်သောစဉ်းစားသုံးသပ်ခြင်း
ဘေးအန္တရယ်ကိုစီမံကိုင်တွယ်နိုင်သောစဉ်းစားသုံးသပ်ခြင်း
ဒီဇိုင်းနဲ့အရည်သွေးထိန်းအန္တရာယ်ဖြစ်နိုင်ခြေသုံးသပ်ခြင်း
ဘယာကင်းမှုအခြေပြုကြံဆချက်
ဖြစ်ပေါ်လာနိုင်မည့် ဆိုးကျိုးကို စဉ်းစား၍
အရဲစွန့်ကြံဆမှု
ဖြစ်လာနိုင်မည့်ဘေးကို အခြေခံ၍ ကြံဆနည်း
မလိုလားအပ်သော ဖြစ်စဉ်များ ဖြစ်ပေါ်နိုင်ခြင်းကို အခြေပြု၍ တွေးတော ကြံဆခြင်း
ဘေးမဖြစ်အောင် ကြံဆခြင်း
အန္တရာယ်အခြေစိုက်စဉ်းစားတွေးခေါ်
ဆုံးရှုံးနိုင်ချေတွက်ဆခြင်း
ဆိုရှုံးနိုင်ခြေ တွက်ဆခြင်း/ချိန်ဆခြင်း
အန္တရာယ်ရှိအဖြစ် ယူဆဖြေရှင်းနည်း။ အန္တရာယ်ရှိအဖြစ် ယူဆသုံးသပ်ခြင်း
ဆုံးရှုံးနိုင်မှုအခြေအနေပေါ်မူတည်၍ စဉ်းစားခြင်း
ဖြစ်နိုင်ခြေ အခြေခံအန္တရယ်ကို ဦးတည်ပြု (ထည့်သွင်းစဉ်းစား)
ဆိုးကျိုးဖြစိန်ုင်ချေ အခြေခံကို တွေးခေါ်ချက်
စွန့်စားမှုအခြေခံ အတွေးအခေါ်

Riak-based Thinking ကို ISO 9001 စာအုပ်၊ Annex A (Informative), A.4 ၌ ရှင်းပြထား၏။ ကျွန်တော် အတိအကျ ဘာသာပြန်ပြပါမည်။ မူရင်းစကားလုံးများအတိုင်း ဘာသာပြန်ထားခြင်းဖြစ်၍ စာထောင့်နေပါမည်။ သို့သော် အတိအကျ ဘာသာပြန်လျှင် ထိုအတိုင်းသာ ဖြစ်ပါလိမ့်မည်။ ဤဘာသာပြန်ကိုဖတ်ပြီး မိတ်ဆွေတို့ နားမလည်ဆိုပါက ကျွန်တော် ထပ်ရှင်းပြပါမည်။

(၄) ISO 9001 မှ Risk-based Thinking
--------------------------------------------

A.4 Risk-based thinking

Risk-based thinking အယူအဆကို ဤစံနှုန်း၏ ယခင်ထုတ်ဝေသည့်စံနှုန်းများ၌ အပြည့်အစုံ ဖော်ပြခဲ့ပြီးဖြစ်၏။ ဥပမာ - စီစဉ်ခြင်း၊ ပြန်လည်သုံးသပ်ခြင်းနှင့် တိုးတက်မှုတို့အတွက် လိုအပ်ချက်များတွင် ဖြစ်၏။ ယခု အပြည်ပြည်ဆိုင်ရာစံနှုန်းက အဖွဲ့အစည်း၏ဖွဲ့စည်းပုံကိုနားလည်ရန်၊ စီမံကိန်းရေးဆွဲရာ၌ အခြေခံအဖြစ် ဆိုးကျိုးဖြစ်နိုင်ချေ (risk) များကို ရှာဖွေရန်တို့ကို အဖွဲ့အစည်း၏ လိုအပ်ချက်အဖြစ် သတ်မှတ်ပေး၏။ ဤအချက်က စီမံချက်ရေးဆွဲခြင်းနှင့် အရည်အသွေးစီမံခန့်ခွဲမှုစနစ် လုပ်ငန်းများကို အကောင်အထည်ဖော်ရာတွင် risk-based thinking ကိုအသုံးပြုကြောင်း ကိုယ်စားပြုသည်။ ထို့ပြင် စာဖြင့် ရေးသားမှတ်တမ်းတင်ထားသည့် သတင်းအချက်အလက် အတိုင်းအတာကို ဖော်ထုတ်ရာတွင် ကူညီပေးသည်။

အရည်အသွေးစီမံခန့်ခွဲမှုစနစ်၏ အဓိကရည်ရွယ်ချက်တစ်ခုမှာ တားဆီးရေးကိရိယာတစ်ခုအဖြစ် ဆောင်ရွက်နိုင်ရန် ဖြစ်၏။ သို့မို့ကြောင့်ပင် ဤအပြည်ပြည်ဆိုင်ရာစံနှုန်း၌ တားဆီးရေးလုပ်ငန်းများဟူ၍ သီးသန့်စာပိုဒ် သို့မဟုတ် စာပိုဒ်ခွဲတစ်ခုမှ မရှိပါချေ။ ကာကွယ်တားဆီးရေးလုပ်ငန်း အယူအဆကို အရည်အသွေးစီမံခန့်ခွဲမှုစနစ် လိုအပ်ချက်များအား ပုံစံချရာ၌ risk-based thinking ကို အသုံးချခြင်းဖြင့် ဖော်ပြထားလေသည်။

အပြည်ပြည်ဆိုင်ရာစံနှုန်း၌ အသုံးချထားသော risk-based thinking ကြောင့် သတ်မှတ်ထားသည့် လိုအပ်ချက်များကို လျှော့ချ နိုင်သလို ၎င်းတို့၏ အစားထိုးမှုများကို စွမ်းဆောင်မှုအခြေခံလိုအပ်ချက် (performance-based requirements) များဖြင့် လျှော့ချ နိုင်၏။ လုပ်ငန်းကိုင်ငန်းများအတွက်လိုအပ်ချက်၊ ရေးသားမှတ်တမ်းတင်ထားသည့် သတင်းအချက်အလက်များနှင့် အဖွဲ့အစည်း ၏ တာဝန်ဝတ္တရားများတွင် 2015 version က ISO 9001:2008 ထက်ပိုပြီး လှုပ်သာရှားသာ ရှိစေသည်။

၆.၁ တွင် အဖွဲ့အစည်းသည် ဖော်ထုတ်ထားသည့် အန္တရာယ်များအားကိုင်တွယ်ရန် အစီအမံများ ရေးဆွဲရမည် ဟုပင် ဆိုထားသော် ငြားလည်း အန္တရာယ်များအား စီမံခန့်ခွဲခြင်း သို့မဟုတ် အန္တရာယ်များအား စီမံခန့်ခွဲခြင်း လုပ်ငန်းစဉ်အဖြစ် ရေးသားမှတ်တမ်းတင်မှု စသည့် ပုံမှန်နည်းစနစ်တို့ မလိုအပ်ချေ။ အဖွဲ့အစည်းသည် ဤစံနှုန်းအရလိုအပ်ချက်များထက်ပို၍ ကာမိစေမည့် အန္တရာယ်များအား စီမံခန့်ခွဲခြင်း နည်းနာနိသျတို့ကို ရေးဆွဲမည်၊ မရေးဆွဲစသည်ကို မိမိဘာသာ ဆုံးဖြတ်နိုင်သည်။ ဥပမာ - အခြားစံနှုန်း သို့မဟုတ် လမ်းညွှန်များအား အသုံးချခြင်း

၎င်းတို့၏ရည်ရွယ်ချက်များကို ရရှိရန် အဖွဲ့အစည်း၏ စွမ်းဆောင်ရည်အရပြောရပါမူ အရည်အသွေးစီမံခန့်ခွဲမှုစနစ်၏ လုပ်ငန်းစဉ် အားလုံးသည် တန်းတူအဆင့်ရှိ စွန့်စားခန်းများကို ကိုယ်စားမပြု။ (ဤဘာသာပြန်ချက်ကို ကျွန်ုပ်ကိုယ်တိုင် မကြိုက်နှစ်သက်ပါ။) (Not all the processes of a quality management system represent the same level of risk in terms of the organization's ability to meet its objectives.)
ထို့အတူပင် မရေရာမှုတို့၏ရလဒ်မှာလည်း အဖွဲ့အစည်းအားလုံးအတွက် အတူတူမဖြစ်နိုင်ချေ။

အပိုဒ် ၆.၁ ၏ လိုအပ်ချက်အရ အဖွဲ့အစည်းသည် အန္တရာယ်များကို ရှာဖွေဖော်ထုတ်ခဲ့ကြောင်း အထောက်အထားအဖြစ် ရေးသား မှတ်တမ်း တင်ထားသော သတင်းအချက်အလက်များကို ထိန်းသိမ်းထားမှုတို့ အပါ/မပါ ၎င်း၏ risk-based thinking ကို အသုံးချမှုနှင့် အန္တရာယ်ကို ဖော်ထုတ်ရန် လုပ်ဆောင်ချက်တို့အတွက် တာဝန်ရှိ၏။

++++++++++++

ယခု ကျွန်တော်ရေးနေသည့် ISO 9001 တွင်မူ ဤအတိုင်းထည့်သွင်းမှာ မဟုတ်ပါ။ လူအများနားလည်နိုင်ရန် ကျွန်တော်က ကိုယ့်စကားနှင့်ကိုယ် ပြန်ရေးမှာ ဖြစ်ပါသည်။ ယခု တိုက်ရိုက်ဘာသာပြန်ပြရခြင်းမှာ Risk-based thinking ကို မူရင်းစာအုပ်၌ မည်ကဲ့သို့ ဖော်ပြထားသည်ကို မိတ်ဆွေတို့ သိသာရုံမျှ ဖြစ်ပါသည်။

နိဂုံး
-----

ဘာသာပြန်ခြင်းသည် အတတ်ပညာတစ်ခုဖြစ်၏။ သက်မွေးဝမ်းကျောင်း အလုပ်တစ်ခုလည်း ဖြစ်၏။ ဘာသာပြန်အလုပ်ကို လုပ်မည့်သူသည် ဘာသာပြန်ခြင်း အတတ်ပညာကို တကယ့် ပရော်ဖက်ရှင်နယ် (ပရော်ဖက်ရှင်နယ်ကိုတော့ ကျွန်တော် ဘယ်လို ဘာသာပြန်ရမှန်းမသိပါ) တတ်ကျွမ်းနေရန်လို၏။ ဤကဲ့သို့တတ်ကျွမ်းရန်မှာလည်း တကယ်တတ်သိနားလည်သည့် ဘာသာပြန် ဆရာကြီးများက သေသေချာချာ သင်ကြားပေးရန်လို၏။ ဘာသာပြန်အလုပ်ကို ကျောင်းများဖွင့်ကာ သင်ကြားပေးရန် ရှေးယခင်ကတည်းက ဆရာဇော်ဂျီ၊ သခင်ဘသောင်း စသည့် ဘာသာပြန်ဆရာကြီးများက တိုက်တွန်းခဲ့ကြဖူး၏။ သို့နှင့်လည်း ယခုတိုင် ဘာသာပြန်ကျောင်းများဖွင့်ကာ သင်ကြားပေးနေသည်ဟု မကြားမိဖူးသေးပါ။

အဝေးသင်တက္ကသိုလ်၊ မြန်မာစာအထူးပြုဘာသာရပ်တွင်တော့ ဘာသာပြန်ခြင်းအကြောင်း တို့စိတို့စိ ထည့်သွင်းသင်ကြား ပေးပါ၏။ သို့သော် ဤမျှလောက် သင်ကြားပေးရုံမျှနှင့်တော့ မည်သည့်နည်းနှင့်မှ ဘာသာပြန်ကောင်းတစ်ယောက် ဖြစ်လာစရာ အကြောင်းမရှိပါဟု ကျွန်ုပ်က ဤနေရာမှနေ၍ ရဲရဲကြီး အာမခံလိုက်ပါ၏။ ပထမနှစ်၊ ဒုတိယနှစ်၊ တတိယနှစ်ဟူ၍ သုံးနှစ်တိတိ ထည့်ထားသည့်တိုင် ပီဘိ ဗဟုသုတ ရရုံမျှလောက်သာ ဖြစ်၏။ အဲလေ အလွန်အင်မတန့်ကို ဘာသာပြန်ဆရာတစ်ယောက် ဖြစ်ချင်နေသူအဖို့မူ ထိုစာများကို အခြေခံ၍ မိမိဘာသာ အပတ်တကုတ် ကြိုးစားအားထုတ်မည်ဆိုလျှင်တော့ ဖြစ်နိုင်ကောင်းပါ၏။

ဤမျှလောက် လျှာရှည်ပြီးပြီဆိုလျှင် အင်္ဂလိပ်စာဖတ်တတ်ရုံနှင့် ဘာသာပြန်ဆရာတစ်ယောက် မဖြစ်နိုင်ကြောင်း မိတ်ဆွေတို့ သဘောပေါက်လောက်ပါပြီ။

ကျွန်တော်ယခင်ပို့စ်များတွင်လည်း ပြောခဲ့ဖူးပါသည်။
ဆရာမကြီး မြနှင်းဆီသည် အမေရိကန်စင်တာမှထုတ်သည့် စာအုပ်များကို ဘာသာပြန်နေကျ ဖြစ်၏။ သို့သော် ဆရာသန့်မြင့်ဦး၏ ခြေရာပျောက်မြစ်ကို ဘာသာပြန်တာကျ အတော့်ကို ချာတူးလန်ပါသည်။ သူ့စာဖတ်ပြီး နားလည်ဘို့ ကိုယ်ဘာသာကိုယ် မနည်းဘာသာပြန်နေရသေးသည်။ ထို့ကြောင့် စာကောင်းတစ်ပုဒ်ဟု မခေါ်နိုင်ပါ။ စာကောင်းဟူသည် ဖတ်လိုက်တာနှင့် ရှင်းကနဲ၊ လင်းကနဲ၊ ဒက်ကနဲသိသွားမှ စာကောင်းမည်၏။

ဤစာအုပ်ကို ဆရာသန့်မြင့်ဦးလည်း သဘောကျဟန်မတူပါ။ ထို့ကြောင့် နောက်တစ်ယောက် ဆရာ ရွှေဘိုဘယ်သူဆိုလား နာမည် မမှတ်မိတော့ပါ။ ထပ် ဘာသာပြန်ပါသေးသည်။ သူဘာသာပြန်တာ အတော်ကောင်းလိမ့်မည်ဟု ယူဆရပါသည်။ မနှစ်က ထိုစာအုပ်အကြောင်း ရေးထားတာ ဖေ့စ်ဘုတ်တွင် ဖတ်လိုက်ရပါသည်။ ထိုစာအုပ်ကိုတော့ ကျွန်တော် မဖတ်ဖူးသေးပါ။ အခွင့်ရလျှင် ဖတ်ချင်ပါသည်။

ကျွန်တော်စာအုပ်များကို ဖတ်ရာတွင် ရည်ရွယ်ချက်နှစ်မျိုးနှင့် ဖတ်တာဖြစ်၏။
တစ်ခုမှာ အများသူငါလို စာဖတ်တာဖြစ်ပြီး -
နောက်တစ်ခုမှာ စာရေးဆရာများ၏ ရေးပုံသားပုံကို အတုခိုးလို၊ နမူနာယူလို၍ ဖတ်တာ ဖြစ်ပါသည်။
ဘာသာပြန်စာအုပ်များဖတ်ရာတွင်လည်း ဤနည်းအတိုင်း ဖြစ်၏။
သူတို့ဘယ်လိုဘာသာပြန်ထားတယ်ဆိုတာ အတုခိုးရပါသည်။
ကိုယ်ကြိုက်သည့်စကားလုံးလေးများတွေ့လျှင် စာအုပ်ထဲ၌ ရေးမှတ်ထား၏။ လိုသည့်အခါ ထုတ်သုံးနိုင်ပါသည်။

စာလည်း အတော်ကြီးကို ရှည်သွားပြီဖြစ်၍ ဤမျှနှင့် နိဂုံးချုပ်ပါမည်။
ကူညီကြသူ၊ အားပေးကြသူ၊ ဖတ်ရှုကြသူအပေါင်းကို ကျေးဇူးအထူး တင်ရှိကြောင်းပါ ခင်ဗျား။

အေးငြိမ်း
၁၈ ဇန္နဝါရီလ၊ ၂၀၁၉

Wednesday, January 16, 2019

ကျွန်ုပ်အလွန်စိတ်ပျက်မိသော အရာတစ်ခု


ကျွန်တော်ငယ်စဉ် ကျောင်းသားဘဝကတည်းက အလွန်ရွံမုန်းခဲ့သော အရာတစ်ခုသည် ရှိခဲ့၏။
ကျွန်တော့်လိုပင် နိုင်ငံသားအတော်များများသည်လည်း ကြည့်လို့မရခဲ့ပါ။
ကြည့်လို့မရကြကြောင်းကို လူရွှင်တော်များ ထုတ်ခဲ့သည့် ပြက်လုံးများနှင့် အရပ်ထဲတွင် ကပြောင်ကပျက် ပြောသည့်စကားများကို ထောက်၍ သိနိုင်ပါ၏။

အခြားမဟုတ်ပါ။
နိုင်ငံတော်အရာရှိဂျီးများက မယောင်ရာဆီလူးသည့် အလုပ်များကို လုပ်ပြနေခြင်း ဖြစ်၏။
တော်ကြာ ဘာလူဂျီးက ဘယ်နေရာသွား စစ်ဆေးကာ လိုအပ်သည်များကို မှာစားပြန်ပြီ။
တော်ကြာ ညာလူဂျီးက ဘယ်နေရာသွား ဖဲကြိုးဖြတ်ရပြန်ပြီ။
(ကျွန်တော့်စိတ်ထင် မြန်မာပြည်၌ စီးပွားအဖြစ်ဆုံးလုပ်ငန်းများတွင် ပူစီဖောင်းနှင့်ဖဲကြိုးဆိုင်များလည်း ပါမည်ထင်၏။)

ဘာအဆောက်အဦဆောက်တော့မယ် ဆိုတော့လည်း ဘာလူကြီးကလာကာ ရွှေတူနှင့်ထုလျက် ပန္နက်ချတော်မူရသေး၏။
ဘုရားတည်တော့လည်း သူတို့ပင် ရွှေအုတ်ချလေသည်။

အနှီလူကြီးများသည် ဖွင့်ပွဲလုပ်ရမှာ အတော် ဝါသနာပါသည်ထင့်။
ယုတ်စွအဆုံး ကိုယ့်ပိုက်ဆံနှင့်ကိုယ်၊ ရပ်ကွက်ထဲမှာ ကိုယ်ပိုင်လမ်းဖောက်ထားတာကိုပင် လာပြီးဖွင့်လိုက်ရသေးသည်။

ကျွန်တော့်စိတ်ထင် သူတို့ သားသမီး၊ မြေးမြစ်၊ တီကျွတ်တွေ မင်္ဂလာဆောင်တာတောင် ဖဲကြိုးဖြတ်ကာ ဖွင့်ပွဲလုပ်လေသလား မပြောတတ်။

ညဘက် ညစာစားပွဲပြီးလို့ ဧည့်သည့်တွေအားလုံးပြန်သွားတော့ သတို့သားနှင့် သတို့သမီးကို ကုတင်ပေါ်ထိုင်ခိုင်း။
နှစ်ဖက်မိဘများက ဟိုဘက်ဒီဘက် ဖဲကြိုးကိုင်။
ဘိသိက်ဆရာက ကတ်ကြေးနှင့်ဖြတ်ကာ "ပါကင်ဖွင့်တော်မူစေ"
(ပွင့်ပြီးသားပါရှန့် . . . ဟိုက် ရှားဘား)

တံတားဆောက်တာ၊ လမ်းဖောက်တာကို သူတို့စိတ်ထဲ၌ အတော်ဟုတ်လှပြီဟု ထင်နေပုံ ရလေသည်။ (တလောကတောင် ထရန်စဖော်မာနားမှာ ငှက်ပျောပွဲတွေ အုန်းပွဲတွေနှင့် ဖွင့်လိုက်တာ တွေ့လိုက်ရသေးသည်။ ဖွင့်စရာမရှိ ထရန်စဖော်မာ သွား ဖွင့်ရလေသည်။ Only in Myanmar.)

ကြက်မများ ဥ ဥ ပြီးသည့်အခါ ဆူညံပွက်လောရိုက်နေအောင် ကတော်၏။ "အောင်ပြီ၊ အောင်ပြီ၊ ဥတစ်လုံး ဥပြီးသွားပြီ။ (၇ ) ရက် သားသမီးတို့ ကြားသိစေကုန်သတည်း" ဟု အဓိပ္ပာယ်ထွက်လေမည်လား မပြောတတ်။

ယခုလည်း ဤနည်းအတိုင်း ဖြစ်၏။

ဟိတ်၊ ငါတို့အစွမ်းနဲ့ အင်မတန်မှ ကြီးကျယ်ခမ်းနားလှတဲ့ တံတားကြီးတစ်ခု ပြီးပဟေ့။ ငါတို့အစွမ်းကို မောင်မင်းတို့ သိကြပြီလား။

တံတားဖွင့်ပွဲမှာဝတ်ဘို့ ပြီးခဲ့တဲ့ (၃) လ လောက်ကတည်းက ကြိုးကြီးချိတ်လုံချည်ကို ကြိုမှာထားရတာ ဖြစ်၏။ ပုဝါ နော်၊ မမေ့စေနဲ့။ ဟဲ့၊ တံတားဖွင့်ပွဲမှာပန်ဘို့ သဇင် (၅) ခက် အသင့်ရှိနေပစေနော်။ မရရင်တော့လား။ ဟင်းဟင်းဟင်း။

အရပ်သားအစိုးရတက်လာတော့ သည်ဖွင့်ပွဲယဉ်ကျေးမှု ပျောက်သွားလိမ့်မည်ဟု ထင်ခဲ့မိ၏။ ဤသည်မှာ ကျွန်ုပ်၏ ရူးမိုက်မှုသာ ဖြစ်ကြောင်း ယခု မျက်မြင်ကိုယ်တွေ့ သိခဲ့ရပြီ။ ယခုလူများသည်လည်း လူများကို လမ်းဘေး နေပူကျဲကျဲထဲ တန်းစီရပ်ခိုင်းကာ လက်အုပ်ချီခိုင်းနေသည်ကို မြင်ရတော့ ကျွန်ုပ်မှာ အလွန်စိတ်ပျက်မိလေ၏။ ထိုသူများသည် ၎င်းတို့ရွံမုန်းခဲ့သော အလုပ်များကို ၎င်းတုိ့ကိုယ်တိုင် လုပ်နေကြလေပြီ။

ကျွန်ုပ်တို့သည် သက်ဦးဆံပိုင် ပဒေသရာဇ်စနစ်ကို အလွန်ရွံမုန်းကြ၏။ ဗျူရိုကရက်စနစ်ကို အော့နှလုံးနာကြ၏။ သို့သော် ဤသည်မှာ ပါးစပ်က ပြောနေခြင်းမျှသာဖြစ်၏။ အမှန်တကယ် ကျွန်ုပ်တို့နှလုံးသားထဲတွင် ပဒေသရာဇ်စနစ်၏ လုပ်ပုံလုပ်နည်း များကို ကျိတ်နှစ်သက်နေကြသည်သာ ဖြစ်၏။ ကောဇောနီအခင်းကြီးများခင်းလျက် အခမ်းကြီး အနားကြီးများဖြင့် ဟောသလို တံတားဖွင့်ပွဲ၊ လမ်းဖွင့်ပွဲကြီးတွေ လုပ်နေတာသည် ပဒေသရာဇ်စနစ်၏ အဆောင်အယောင်၊ အခင်းအကျင်းများပင် မဟုတ်ပါလော။

ဤဖွင့်ပွဲကြီးများသည် သာမန်ပြည်သူလူထုနှင့် လားလားမှ မပတ်သက်။ မည်သည့်အကျိုးကျေးဇူးမှလည်း မရှိ။ သည်လိုမှမဖွင့်လျှင် သည်တံတားကို သုံးလို့မရတော့ပြီလော။ သည်လိုမှ ဖဲကြိုးမဖြတ်လျှင် သည်လမ်းကို လျှောက်လို့မရတော့ပြီလော။
သည်ဖွင့်ပွဲများအတွက် ပိုက်ဆံတစ်ပြားမှ မကုန်တော့ပြီလော။

ကျွန်ုပ်အတွက်တော့ဖြင့် ဤအရာများမှာ အပိုဆာသားများသာ ဖြစ်ပါသည်။ သည်ပွဲများတွင် ကုန်ကျမည့် ငွေ၊ အချိန်၊ လူအင်အား များကို အခြား အကျိုးရှိမည့် နေရာများတွင် သုံးစေချင်ပါသည်။ (မင်းပြောတော့ ဟုတ်တယ်ကွ။ ဒါပေမယ့် ငါတို့မလဲ ဒါမျိုးကလွဲလို့ တခြား ဘာမှမလုပ်တတ်တာ ခက်တယ်။)

တံတားဘယ်နှစ်စင်းဆောက်ပြီးပြီ။ လမ်းဘယ်လောက်ဖောက်ပြီးပြီ ဆိုသည်ကို ယခုကဲ့သို့ အခမ်းအနားကြီးများဖွင့်ကာ သက်သေ ပြနေစရာမလို။ နှစ်ချုပ်စာရင်းထဲတွင် (အမှန်အကန်) စာရင်းပြလိုက်လျှင် ပြီး၏။

ဤသည်မှာ ကျွန်ုပ်အမြင်ကိုပြောခြင်းမျှသာ ဖြစ်၍ မိတ်ဆွေများအနေနှင့် လွတ်လပ်စွာ သဘောကွဲလွဲနိုင်ပါသည်။

နောက်ဆုံးပြောလိုသည်မှာ သည်တစ်ခါ တံတားဖွင့်မည်ဆိုလျှင် ကျွန်ုပ်ကို အကြောင်းကြားပါ။ PPE ဝတ်နည်း (လက်အိတ်ဝတ်နည်း) အခမဲ့ လာပြပေးပါမည် . . . လို့။

ကျေးဇူးတင်ပါသည်။

အေးငြိမ်း
၁၆ ဇန္နဝါရီ၊ ၂၀၁၉