Monday, November 15, 2021

လာ့း နှင့် ဘူ့း

ကျွန်ုပ်သည် ယခုအခါ ဒသမတန်း ပင်ရင်းမြန်မာစာ အတွက် သင်ကြားရေး powerpoint slide များ ပြင်နေရာ ယခု မြန်မာကဗျာ လက်ရွေးစင် မှ ဆရာကြီး ဇော်ဂျီ ၏ ‘လှိုင်းကလေးသင်’ ထိ ရောက်ပါပြီ။

 

စနစ်သစ် (စနစ်ကလည်း ကျုပ်တို့ငယ်ငယ်ကတည်းက သစ်လာလိုက်တာ ၂၁ ရာစု ရောက်တဲ့ထိ သစ်လို့ပဲ မပြီးနိုင်တော့ဘူး၊ ယခွမ်းဒဲ့မှ) ကျောင်းပြဋ္ဌာန်းစာအုပ်ပါ ‘လှိုင်းကလေးသင်’ ကဗျာကို ဖတ်လိုက်ရတော့ ကျွန်ုပ်၏ ဘယ်ဖက်မျက်ခုံးတစ်ဖက် သိသိသာသာ မြင့်တက်သွားပါ၏။ နောက်ပြီး သည်စကားလုံးကို ဘယ်လိုအသံထွက်ရမဒုံး ဟု ဦးနှောက်လည်း အတန် ခြောက်သွားလေ၏။

 

(“ပြဋ္ဌာန်း” ကို ရေးဘို့ ပြဿနာတက်နေနိုင်သူများ ရှိပါလိမ့်မည်။ ပြဋ္ဌာန်းမှာ ဋ နှင့် ဌ ကို ပါဠ်ဆင့်ထားခြင်းဖြစ်သဖြင့် ဋ နှင့် ဌ ကို ဆင့်ရေးခြင်းအားဖြင့် ဋ္ဌ ကို ရနိုင်ပါကြောင်း။ ဤကား စကားချပ်)

 

အကြောင်းကား ‘လှိုင်းကလေးသင်’ ကဗျာမှ ‘ဖူးမြော်ရန် ရောက်လာရင်းပေလာ့’ ကို ‘ဖူးမြော်ရန် ရောက်လာရင်းပေလာ့း’ ဟုလည်းကောင်း၊ ‘ကြံချင်ဘု သည်အရေး’ ကို ‘ကြံချင်ဘူ့း သည်အရေး’ ဟု လည်းကောင်း စာလုံးပေါင်းထားသောကြောင့် ဖြစ်သတည်း။ 




 သို့နှင့် ကျွန်ုပ်စိတ်ထဲ အတော် စနိုးစနောင့်ဖြစ်သွား၍ ကျွန်ုပ် အလယ်တန်းကျောင်းသားဘဝက သင်ကြားခဲ့ရသော ‘အလယ်တန်း မြန်မာကဗျာ လက်ရွေးစင်’ (၁၉၇၈) စာအုပ်ကို လှန်ကြည့်ရာ ‘ဖူးမြော်ရန် ရောက်လာရင်းပေလာ့’ ‘ကြံချင်ဘု သည်အရေး’ စသဖြင့်သာ တွေ့ပါ၏။







 

ထိုမျှသာမကသေး။ ရန်ကုန်တက္ကသိုလ်၊ မြန်မာစာပါမောက္ခ ဆရာကြီး ဒေါက်တာအောင်မြင့်ဦး ၏ ‘ခေတ်စမ်း ရဲ့ လှိုင်းကလေး’ ဆောင်းပါးတွင်လည်း ‘ဖူးမြော်ရန် ရောက်လာရင်းပေလာ့’ ‘ကြံချင်ဘူ့ သည်အရေး’ ဟုပင် စာလုံးပေါင်း ထားပါ၏။


 

https://www.facebook.com/100003467961345/posts/2787392038053034/  

 

ကျွန်ုပ်ငယ်စဉ်ကတည်းက မြန်မာစာကို သင်ကြားလာခဲ့ရာ ယခုကဲ့သို့ အောက်ကမြစ် နှင့် ဝစ္စနှစ်လုံးပေါက်ကို ပေါင်းရေးထားတာ တွေ့ဖူးတာ ယခုအကြိမ်သည် ပထမဆုံးသော အကြိမ် ဖြစ်ပါလိမ့်မည်။

 

သို့နှင့် ကျွန်ုပ်လည်း ထို စားလုံးပေါင်း ‘ဘူ့း’ ကို ကြိုးစား အသံထွက်ကြည့်မိ၏။

‘ဘူ့ = ဘု’

‘ဘူး = ဗူး’

ပေါင်းလိုက်တော့ ‘ဘူ့း = ဘုအူး’ ဟု အသံထွက်လေ၏။ 

ကျွန်ုပ်မှာ ‘ဘူ့း’ ကို အသံထွက် ရွတ်နေသည်ဖြစ်ရာ ကိုယ့်ကိုယ်ကိုယ် မနည်း ပြန် ဘလိတ်အုပ်ထားလိုက်ရ၏။ အဘယ်ကြောင့်ဆိုသော် ကျွန်ုပ်ပတ်ဝန်းကျင်၌ အခြားသူများလည်း ရှိနေသည်ဖြစ်ရာ ‘အင့်ဟင် - ဟိုလူကြီးနှယ်၊ မကြီးမငယ်နဲ့။ ဘယ့်နှာကြောင့် နွားလိုအော်နေရပါလိမ့်’ ဟု အထင်ရောက်ကုန်မည် စိုးသောကြောင့်တည်း။ 

 

မယုံလျှင် မိတ်ဆွေတို့ ‘ဘူ့း’ ကို အသံထွက်ရွတ်ကြည့်ပါ။ သေချာပေါက် နွားအော်သံ ထွက်လာပါလိမ့်မည်။

ထူးဆန်းပါပေ့။ 

ချစ်စရာကောင်းလှသည့် ကဗျာကို နွားအော်သံပေါက်အောင် တီထွင်နိုင်သည့် ပညာရှင်ကြီးများ အစွမ်းကို ကျွန်ုပ် မချီးကျူးဘဲ မနေနိုင်။

 

နောက်တစ်ခုမှာ ‘မူသစ်တဆင်ခြယ်၍’ ကို ‘မူသစ်တစ်ဆင်ခြယ်၍’ လုပ်ထားလိုက်သေး၏။ ပြောရလျှင် ဤသည့် ‘တစ်’ ကို ကျွန်ုပ် ၆ မြင်ကပ်သည်မှာ ကြာပါပြီ။ အခုခေတ် ၂၁ ရာစု လူများဆိုလျှင် ‘တကယ်’ ကို ‘တစ်ကယ်’ ဟုရေး၏။ ‘တကတဲ’ ဟုရေးရမည်ကို ‘တစ်ကတည်း’ ဟု ရေး၏။ ကျွန်ုပ် အလွန်မုန်းလှ၏။ သို့သော် ကျွန်ုပ် ဘာတတ်နိုင်ပါ မည်နည်း။

 

၂၁ ရာစု ကျောင်းသုံးမြန်မာစာ (၂၁ ရာစုကျွမ်းကျင်မှုများ ဟူသည့် စကားလုံးလေးကို တွေ့လိုက်ရပြီးသည့်နောက်မှ ကျွန်ုပ်လည်း ၂၁ ရာစု၊ ၂၁ ရာစုနှင့် မကြာမကြာ သုံးမိလာကြောင်း ကိုယ့်ကိုယ်ကိုယ် ပြန်သတိပြုမိ၊ သည်းခံပါ မိတ်ဆွေများ) စာအုပ်၌လည်း ကျွန်ုပ် သဘောမကျမိသည့် အချက်ကလေးများ တွေ့မိ။ သို့သော် နောက်ကျမှ ရေးပြပါမည်။ 

 

ကျေးဇူးတင်ပါသည်။

 

ခွေးအောင်လှိုင်နှင့် နောက်လိုက်နောက်ပါ ခွေးသဒေါင်းဇားအုပ်စု၊ ၎င်းတို့ကို ထောက်ခံနေသူများအားလုံးတို့သည် ကျွန်ုပ်တို့ ပြည်သူအပေါင်း၏ ကျိန်စာသင့်လျှက် မနှေးအမြန် မသာပေါ်ကြပါစေကုန်သတည်း။ 

 

အေးငြိမ်း

၁၅ နိုဝင်ဘာလ၊ ၂၀၂၁

ဒါ ကျုပ်တို့တိုင်းပြည် - ဟောဒီ ဗမာပြည် (၂)

မြန်မာပြည်ကို ကိုဗစ်ရောက်မလာတာဟာ မြန်မာပြည်နဲ့ ဝူဟန် မိုင် ၂၀၀၀ ဝေးတဲ့အတွက်ဖြစ်တယ်လို့ ထင်နေတဲ့ အူကြောင်ကြောင် ကျန်းမာရေးအရာရှိဂျီးတွေနေတဲ့တိုင်းပြည်

ဗမာပြည်

 

စာမေးပွဲမေးခွန်းတွေမှားတာဟာ ကွန်ပြူတာစာစီတဲ့သူတွေက ကီးဘုတ်ကိုကြည့်မရိုက်တာကြောင့်လို့ ထင်နေတဲ့ ပေါချာချာလူတွေက ညွန်ကြားရေးမှူးဖြစ်နေတဲ့ စောက်တလွဲတိုင်းပြည်

ဗမာပြည်

 

မယ်ခွေရဲ့ လက်ဆောင်ကဗျာကို ခေတ်နဲ့မကိုက်ညီတော့လို့ မသင်သင့်ဘူးလို့ဆိုတဲ့ လူ့ဗလချီးနမ်းတွေ ညွှန်ကြားရေးမှူးချုပ် တက်ဖြစ်နေတဲ့တိုင်းပြည်

ဗမာပြည်

 

သူ့သမီး စကောလားရှစ်မရတာနဲ့ ကျောင်းသင်ပြဋ္ဌာန်းစာအုပ်တွေကို အင်္ဂလိပ်လိုသင်ရမယ်လို့ လုပ်ခဲ့တဲ့ စောက်ရူးတွေက နိုင်ငံကိုအုပ်ချုပ်နေတဲ့တိုင်းပြည်

ဗမာပြည်

 

ဒီဇယ်ဆီထွက်တယ်ဆိုပြီး ကြက်ဆူပင်တွေ တစ်နိုင်ငံလုံးစိုက်ခိုင်းခဲ့တဲ့ လူ့ပေါက်ပန်းစေးတွေ အုပ်ချုပ်နေတဲ့တိုင်းပြည်

ဗမာပြည်

 

ရွှံ့မီးတောင်ဆိုတာလောက်မှ ဗဟုသုတမရှိဘဲ နဂါးပွက်အိုင်ဆိုပြီး နွားနို့တွေ လောင်းချနေတဲ့ စောက်ပေါက သမ္မတ တက်ဖြစ်ချင်နေတဲ့တိုင်းပြည်

ဗမာပြည်

 

ကွန်ပြူတာကဖောင့်လေးပြောင်းလိုက်ရုံနဲ့ ယီးဂါးဘားမင့်ကြီးဖြစ်တော့မယ်လို့ ဂျင်းအတက်လိုက် အထည့်ခံရတဲ့တိုင်းပြည်

ဗမာပြည်

 

သင်္ကန်းလေးကောက်ကက်ပတ်လိုက်တာနဲ့ စီဗယ်အင်ဂျင်နှစ်ယာအတတ်ကို အော်တိုမက်တစ် တတ်သွားတဲ့သူတွေ နေတဲ့တိုင်းပြည်

ဗမာပြည်

 

တိုးမြစ်အောက် (ရေထဲ) မှာ နဂါးမင်းကြီးတွေ ဆီမီးထွန်း ပူဇော်နေပါတယ်ဆိုလို့ ကမ်းလုံးညွတ်မျှ လာကြည့်ကြတဲ့ သူတွေ နေတဲ့တိုင်းပြည်

ဗမာပြည်

 

ဘယ်ဘုန်းကြီးကတော့ ရေမန်းကောင်းတယ်ဆိုပြီး တစ်နိုင်ငံလုံးကလူတွေ ကားကြီးကားငယ်တွေနဲ့ လာကြလို့ ဘုန်းကြီးက ရေတွင်းကို မန်းပေးထားရတဲ့တိုင်းပြည်

ဗမာပြည်

 

တစ်သက်လုံးက စာမတတ်ခဲ့တဲ့သူတွေကို တစ်လလောက်မဖြစ်ညစ်ကျယ် စာလေးသင်ပေးရုံနဲ့ တစ်နိုင်ငံလုံး စောက်ကျိုးနဲစာတွေ တတ်ကုန်လိုက်ကြပါတဲ့တိုင်းပြည်

ဗမာပြည်

 

တစ်ဧကလောက်ကျယ်တဲ့လယ်ကွက်ကနေ စပါးတင်း ၃၅၀ လောက်ထွက်ပါတယ်လို့ စံပြရိတ်ပြခဲ့တဲ့ စောက်ရူးတွေနေတဲ့တိုင်းပြည်

ဗမာပြည်

 

လူကြီးလာမယ်ဆိုလို့ အပင်တွေစိမ်းနေအောင် ညတွင်းချင်း ရေဆေးအစိမ်းတွေနဲ့ ဖြန်းပြီး ညာရတဲ့တိုင်းပြည်

ဗမာပြည်

 

လူကြီးတွေလာမယ်ဆိုတော့မှ ဟိုအိမ်ဒီအိမ်တွေက ကွန်ပြူတာတွေငှား၊ မီဒီညာခန်းလုပ်၊ ကွန်ပြူတာကိုင်တတ်တဲ့ ကောင်မလေးတွေကို အဖြူအစိမ်းဝတ်ပေးပြီး တချောက်ချောက်နှိပ်ခိုင်းခဲ့ စောက်တလွဲတိုင်းပြည်

ဗမာပြည်

 

ကိုယ့်ဟာကိုယ်ကုမ္ပဏီထောင်၊ ကိုယ့်ဟာကိုယ် ကမ္ဘာ့အထူးချွန်ဆုံး၊ အအောင်မြင်ဆုံး၊ အဆင့်မဟားတရားအမြင့်ဆုံး ဘွဲ့တွေပေးနေတဲ့သူတွေကို ဆရာတင်နေရတဲ့တိုင်းပြည်

ဗမာပြည်

 

ခေတ်အဆက်ဆက်၊ ရာဇဝင်အဆက်ဆက် တော်တည့်ထက်မြက်တဲ့သူမှန်သမျှ သတ်ပြီးရင်းသတ်၊ လုပ်ကြံပြီးရင်းလုပ်ကြံ၊ တခြားလူမျိုးကိုတော့ အဖေခေါ်၊​ အချင်းချင်းကိုတော့ ဆော်ပလော်တီးနေကြတဲ့ မြေနိုးတွေနေကြတဲ့တိုင်းပြည်

ဗမာပြည်

 

ဤ အနှီတိုင်းပြည်၊ ထိုတိုင်းပြည်၊ စောက်တလွဲတိုင်းပြည်

ကျွန်ုပ် မီတာ ၃၀ လောက်မြင့်သည့် စကက်ဖိုးပေါ်တက်၍ လောက်စပီကာ အလုံး (၂၀) လောက်တပ်ကာ ငါနှင့်ကိုင်တုတ်လိုက်ချင်ပါသည့် တိုင်းပြည်

အဲဒါ . . . အဲဒါ . . . အဲဒါ . . . ဗမာပြည်

 

အေးငြိမ်း

၁၃ နိုဝင်ဘာလ၊ ၂၀၂၁

Wednesday, November 10, 2021

ဒါ ကျုပ်တို့တိုင်းပြည် - ဟောဒီ ဗမာပြည်

ထားစရာမရှိအောင် ကျိကျိတက် ချမ်းသာနေသူများ (နှင့်) စားစရာမရှိလို့ ဖွတ်တက်အောင် မွဲနေသူများနေသည့် တိုင်းပြည်

ဗမာပြည်

 

တိုင်းပြည်ကောင်းကျိုးအတွက် အသားကုန်လှူနေသော ဖွတ်တက်အောင် မွဲနေသူများ (နှင့်) တိုင်းပြည်ဒုက္ခရောက်နေ တာတောင် ကိုယ့်ဘို့အတွက် ရသမျှနှိုက်နေသေးသူများနေသည့်တိုင်းပြည်

ဗမာပြည်

 

ရှိသမျှအားလုံးစွန့်လွှတ် ကိုယ်ကျိုးစီးပွားတစက်မှကမပါ ပြည်သူ့အတွက်သာ လုပ်နေသူများ (နှင့်) ပြည်သူ့အကျိုးစီးပွားအတွက် လုံးဝမငဲ့ကွက် ကိုယ်ကျိုးအတွက် မလုပ်ရဲတာမရှိသူများနေသည့်တိုင်းပြည်

ဗမာပြည်

 

တိုင်းပြည်အတွက် အစွမ်းကုန် စွန့်လွှတ်အနစ်နာခံသူ (နှင့်) ပြည်သူ့ဘဏ္ဍာကို အစွမ်းကုန်ခိုးသူများနေသည့်တိုင်းပြည်

ဗမာပြည်

 

ကိုယ်ကျင့်တရားအရာ၌ ဘာမှပြောစရာမရှိအောင် ဖြူစင်သူများ (နှင့်) ယုတ်စရာမှန်သမျှ သူများယုတ်စရာပင် ချန်မထားဘဲ အသားကုန်ယုတ်သူများနေသည့်တိုင်းပြည်

ဗမာပြည်

 

မဟုတ်တာလုပ်နေမှန်းသိလျက်နှင့် မိမိကိုယ်ကျိုးအတွက် (ကိုယ့်သိက္ခာကိုမှမထောက်) ထိုအယုတ်တမာများ၏ ဘောကို လျက်နေသူများ (နှင့်) လခကလွဲ၍ တခြား ဘာဝင်ငွေမှမရှိသည့်တိုင် အယုတ်တမာများကို အစွမ်းကုန်တိုက်ထုတ်ရန် စွန့်လွှတ်အနစ်နာခံနေသူများနေသည့်တိုင်းပြည်

ဗမာပြည်

 

မိမိရပ်တည်ရေးအတွက် ဘာအပြစ်မှမရှိသူများ၏ခေါင်းကို သေနတ်နှင့်ချိန်ပစ်နေသူများ (နှင့်) မိဘအိမ်မှာ ဘော်ကြော့ နေလာခဲ့ပြီးမှ တိုင်းပြည်အတွက် အနစ်နာအဆင်းရဲခံနေသည့် သူရဲကောင်းကလေးများနေသည့်တိုင်းပြည်

ဗမာပြည်

 

ကိုယ့်ချွေးနှဲစာကလေးထဲမှ ထမင်းစားရရုံလောက်သာ ချန် ပြည်သူ့လွတ်လပ်ရေးအတွက် မတန်တဆလှူနေသူများ (နှင့်) ပလာတာရ ပလာတာ၊ ဆန်ရဆန်၊ ဖိနပ်ရဖိနပ်၊ ရသမျှအကုန် ခိုးဝှက်ဓားပြတိုက်နေသူများနေသည့်တိုင်းပြည်

ဗမာပြည်

 

ဘာတစ်ခုမှ ကိုယ်ကျိုးမပါ၊ ဘာရလိုမှုတစ်ခုမှမရှိဘဲ တိုင်းပြည်အတွက် လုပ်နေသူများကို တိုင်းပြည်အတွက် တစ်ခုမှမလုပ်၊ ရသမျှအကုန်ခိုးနေသည့် သူခိုးဓားပြ၊ လူရမ်းကား၊ လူသတ်ကောင်များက ပြန်တရားစွဲသည့်တိုင်းပြည်

ဗမာပြည်

 

သူခိုးဓားပြ၊ လူရမ်းကား၊ လူသတ်ကောင်များက လူကြီးလူကောင်းများဖြစ်လျက် ဘာအပြစ်မှမရှိသူများ ထောင်ထဲ၌ ဝင်နေရသည့်တိုင်းပြည်

ဗမာပြည်

 

လူများကို မတရားတာတွေမလုပ်ဖို့ ပြောနေသူများက မတရားတာလုပ်နေသူများကို အဖေခေါ်သူများနေသည့်တိုင်းပြည်

ဗမာပြည်

 

ဘာတစ်ခုမှ​ လာဘ်မစားသူများကို အသားကုန် လာဘ်စားထားသူများက လာဘ်စားပါသည်ဆိုပြီး အမှုဖွင့်သည့်တိုင်းပြည်

ဗမာပြည်

 

ဘာလက်နက်မှမရှိသူများကို လက်နက်ကိုင်ဆောင်ထားသူများက ဘယ်ကောင်သေရဲသလဲဟု မိုက်ကြေးခွဲသူများနေသည့်တိုင်းပြည်

ဗမာပြည်

 

ဥစ္စာသယန၊ မဟာသယနာဟု သူများကို တိုင်ပေးနေသူများက သိန်းပေါင်းများစွာချမ်းသာနေပြီး ပိုက်ဆံမရှိသူများကို အသားလွတ် စော်ကားနေသည့်သူများနေသည့်တိုင်းပြည်

ဗမာပြည်

 

တရားဟောပလ္လင်ပေါ်တက်နေပြီး လူအများ၏ ရှိခိုးဦးချခြင်းကို ခံနေသူများက လမ်းဘေး သူတောင်းစားလောက်မှ အဆင့်အတန်းမရှိသည့် စကားများကို ပြောသူများနေသည့်တိုင်းပြည်

ဗမာပြည်

 

အမျိုးဘာသာ သာသနာဟု အော်နေသူများက အမျိုးဘာသာ သာသနာကို ဖျက်ဆီးသူများနေသည့်တိုင်းပြည်

ဗမာပြည်

 

သိက္ခာဖြင့်ရပ်တည်ရမည့် အဖွဲ့ကြီးက သိက္ခာတစ်ပြားသားမှ မရှိသည့်တိုင်းပြည်

ဗမာပြည်

 

ကိုယ်ကိုယ်နှိုက်က ဘာတစ်ခုမှ ဖြစ်ဖြစ်မြောက်မြောက် မလုပ်နိုင်ပါဘဲလျက်၊ တကယ်လုပ်နေသူများကို သောက်တင်းထိုင် တုပ်သူများနေသည့်တိုင်းပြည်

ဗမာပြည်

 

ကိုယ့်ရာထူးတည်မြဲရေးတစ်ခုသာကြည့်လျက် အချင်းချင်းကို ချနင်းနေသူများနေသည့်တိုင်းပြည်

ဗမာပြည်

 

ကိုယ့်ကိုထမင်းကျွေးထားသည့်လက်ကို ပြန်ကိုက်နေသူများနေသည့်တိုင်းပြည် 

ဗမာပြည်

 

ဤ အနှီတိုင်းပြည်၊ ထိုတိုင်းပြည်၊ စောက်တလွဲတိုင်းပြည်

ကျွန်ုပ် စောက်ကျိုးနည်းချစ်ရပါသော တိုင်းပြည်

ဗမာပြည်

 

အေးငြိမ်း

၁၀ နိုဝင်ဘာလ၊ ၂၀၂၁

Sunday, November 7, 2021

ဒသမတန်း ပင်ရင်းမြန်မာစာ ထောက်ကူပြု ဆောင်းပါးများ

ဒသမတန်း ပင်ရင်းမြန်မာစာသင်ကြားရေးအတွက် ရန်ကုန်တက္ကသိုလ် မြန်မာစာ ပါမောက္ခ ဒေါက်တာအောင်မြင့်ဦး ရေးသားထားသည့် ဆောင်းပါးများ ဖြစ်ပါသည်။ အလွန်ပြည့်စုံကောင်းမွန်လှ၍ ဆရာဆရာမများအတွက် များစွာ အထောက်အကူရပါလိမ့်မည်။ (ဆရာကြီး၏ ဖေ့စ်ဘုတ်မှ ပို့စ်များကို ကျွန်တော် ပြန်လည်စုစည်းကာ pdf file လုပ်ပေးထားခြင်းဖြစ်ပါသည်။)

 

စနစ်သစ် အခြေခံပညာအထက်တန်း မြန်မာစာသင်ကြားရေး - ဒေါက်တာအောင်မြင့်ဦး

https://www.mediafire.com/file/0x14d47hqn4d644/

 

ဖတ်မှတ်လေ့လာ မြန်မာစာ - ဒေါက်တာအောင်မြင့်ဦး

https://www.mediafire.com/file/i9xm7fxjnq5fc4t/

 

ဒသမတန်း ပင်ရင်းမြန်မာစာ

အပိုင်း (၁) အပြောအဆိုဆိုင်ရာ သင်ခန်းစာ

Power Point Slide များ (ဗီဒီယိုများ မပါ)

https://www.mediafire.com/file/v5qxdb38socslew/အပိုင်း+၁++အပြောအဆိုဆိုင်ရာသင်ခန်းစာ+NoVideo.pptx/file  

 

ဒသမတန်း ပင်ရင်းမြန်မာစာသင်မည့် ဆရာ/ဆရာမများ လွတ်လပ်စွာ ယူငင်သုံးစွဲနိုင်ပါသည်။

 

အေးငြိမ်း

၇ နိုဝင်ဘာ၊ ၂၀၂၁

ဒသမတန်း ပင်ရင်းမြန်မာစာ

ဒသမတန်း ပင်ရင်းမြန်မာစာ


အပိုင်း (၁) အပြောသင်ခန်းစာ

အခန်း (၂) အပြောပုံစံ အမျိုးမျိုး (၁)

https://www.youtube.com/watch?v=XU0pB5Gzpvw


အပိုင်း (၁) အပြောသင်ခန်းစာ

အခန်း (၂) အပြောပုံစံ အမျိုးမျိုး (၂)

https://www.youtube.com/watch?v=r2qmylvbqCM


အပိုင်း (၂) အရေးအဖတ် သင်ခန်းစာ

အခန်း (၁) မြန်မာစကားပြေရွေးချယ်ချက် - ယောမင်းကြီးစိတ်ဓာတ်

https://www.youtube.com/watch?v=jWynQLM4fHY



Wednesday, November 3, 2021

မြေဆွဲအားဗဟို (CG - Centre of Gravity) အကြောင်း သိကောင်းစရာ

နိဒါန်း

 

မိတ်ဆွေတို့ ဆပ်ကပ်ထဲ၌ ကြိုးတန်းပေါ် စက်ဘီးစီးပြတာ၊ နဖူးပေါ် ဝါးလုံးကို ထောင်တင်ကာ ထိုဝါးလုံးထိပ်၌ ဘောလုံးတင်ပြတာ၊ ကြိုးတန်းပေါ် လမ်းလျှောက်ပြတာ၊ လူပဒေသာပင်လုပ်ပြတာ တွေ့ဖူးကြပါလိမ့်မည်။ 

 

ထိုဆပ်ကပ်ပညာရှင်များသည် သူတို့ကိုယ်နှိုက်ကပင် မသိသော်လည်း ၎င်းတို့သည် စက်ဘီးနှင့်တကွ လူ၏ အလေးချိန်ကို ကြိုးတန်းပေါ်၌သော် လည်းကောင်း၊ ဘောလုံးနှင့်တကွ ဝါးလုံး၏ အလေးချိန်ကို နဖူးပေါ်၌သော် လည်းကောင်း၊ လူတစ်ကိုယ်လုံး၏ အလေးချိန်ကို ခြေဖဝါးအလယ် တည့်တည့်၌သော် လည်းကောင်း ထိန်းထားနိုင် ကြသူများ၊ တစ်နည်းအားဖြင့် Centre of Gravity ကို ရအောင် ချိန်နိုင်ကြသူများ ဖြစ်၏။

 

အနှီ ကြိုးတန်းနှင့်စက်ဘီးတာယာ ထိနေသည့်အမှတ်သည်သော် လည်းကောင်း၊ လူခြေထောက်နှင့် ကြိုးတန်း ထိနေသည့်အမှတ်သည်သော် လည်းကောင်း၊ ဝါးလုံးထိနေသည့် နဖူးပေါ်မှအမှတ် သည်သော်လည်းကောင်း အားလုံး တို့သည် ထိုပစ္စည်းများ၏ Centre of Gravity တည့်တည့်ကို ဖြတ်သွားရာ အမှတ်များပင် ဖြစ်တော့၏။

 

မိတ်ဆွေတို့ ‘ရှားနှစ်တုတ် ပြဿနာ’ အကြောင်း မှတ်မိဦးမည် ထင်ပါသည်။

တစ်နေ့သ၌ ပြဿနာကို မီးထွန်းရှာလိုသော အသိဉာဏ်ပညာ အလွန်နုံနဲ့လှသည့် သိန်း၊ ဒေဝိန်း၊ ကာမိန်း၊ ပဂုတ် တည်း ဟူသော အမတ်လေးယောက်တို့သည် ကံကောင်းလို့သာ ဘုရင်ဖြစ်လာရပြီး မည်သည့် စဉ်းစားဆင်ခြင်ဉာဏ်မှ မရှိသော ဝိဒေဟရာဇ်မင်း ဆိုသူအား မဟော်သဓာပညာရှိကို ဒုက္ခပေးရန် မြှောက်ပင့်ပေးလေ၏။

 

သူတို့က ရှားပင်မှ အနှစ်အား အရင်းအဖျား လုံးပတ်တူညီသော သစ်သားချောင်းတစ်ခု မတိုမရှည် ပြုလုပ်စေကာ မဟော်သဓာပညာရှိထံ ပို့လျက် မည်သည်က အရင်း၊ မည်သည်က အဖျား ဖြစ်သည်ကို မေးလေ၏။

 

မဟော်သဓာပညာရှိမှာ centroid နှင့် centre of gravity ကို ကောင်းစွာ ခွဲခြားနားလည်လေရကား ပြဿနာကို အလွယ်ကလေးပင် ဖြေရှင်းပေးလိုက်လေ၏။ (အဘယ်သို့ဖြေရှင်းပေးလိုက်ကြောင်း မသိသေးသူများ ဇာတ်တော်ကြီး ဆယ်ဘွဲ့လာ မဟော်သဓာပညာရှိအကြောင်း ရှာဖတ်ကြလေကုန်။ ဤသည်ကို ဆရာစားချန်ခြင်းဟု ခေါ်သတတ်။)

 

ဇာတ်တော်ကိုပေါင်းသော် သိန်း ဆိုသည့်အမတ်ကြီးမှာ ခွေးအောင်လှိုင်၊ ဒေဝိန်းမှာ ဇော်မဲလုံး၊ ကာမိန်းမှာ အောင်မိုက်ဒွေး၊ ပဂုတ်မှာ သက်သက်ခံ (ပဂုတ်မှာ သူများမယား ကြာခိုမိသည့်အတွက် ယခုဘဝတွင် လိင်ပြောင်း သွားခြင်း ဖြစ်၏။ ဤကား စကားချပ်) အသီးသီး အသက အသက ဖြစ်လာကြလေ၏။