၁၃၈၇ ခုနှစ် နှစ်ဆန်းပိုင်း အတွေး

သည်ကနေ့သည် ၁၃၈၆ ခုနှစ်၏ နောက်ဆုံးရက် ဖြစ်၏။

မနက်ဖြန်သည် ၁၃၈၇ ခုနှစ်၏ ပထမဆုံးရက် ဖြစ်၏။

 

သားသမီးတစ်ဦးဦး မွေးဖွားလာသည့်အခါ ရှေးအခါက လူကြီးများသည် ဗေဒင်ဆရာများထံ၌ ဇာတာ၊ ရက်ချုပ် လုပ်ကြ၏။ ဘယ်နေ့၊ ဘယ်ရက်၊​ ဘယ်ခုနှစ်၊ ဘယ်နှစ်နာရီ၊ ဘယ်နှစ်ဘဝါး၌ မွေးသည်။ အမည်သညာ ခေါ်စရာကား ချစ်လွန်း။ (ဟုတ်ပေါင် ဝတ္ထုနာမည်နဲ့မှားကုန်ပြီ။)

 

ထိုဇာတာသည် မိမိ၏မွေးနေ့၊ မွေးရက်ကို အတိအကျဖော်ပြပေးသည့် မှတ်တမ်းဖြစ်၏။

(ဝီကီပီးဒီးယား၌ ဇာတာအကြောင်း သောက်တလွဲရေးထားသည်ကို ‘ဇာတာ’ ခေါင်းစဉ်ဖြင့် သီးသန့် ရေးပြပါမည်။)

 

အခြားသူများနှင့်မတူ တမူထူးခြားသည့် ကျွန်ုပ်မူကား ဤမည်သော မောင်အေးငြိမ်းကို ဘယ်နှစ်ခုနှစ်၊ ဘယ်လ၊ ဘယ်ရက်၌ မွေးစေ ဟု ကျောင်းကဆရာက သတ်မှတ်ပေးလိုက်၏။ (သတ်မှတ်ပေးလိုက်သည် ထင်ပါ၏။ အမှန်ဆို ကျွန်ုပ်၏ လက်ရှိမွေးနေ့သက္ကရာဇ်ကို ဘယ်သူက ရွေးပေးလိုက်မှန်းတောင် တိတိကျကျမသိ။ ထူးဆန်းပါပေ့ ဆတွတ်ရယ်) ထို့ကြောင့် ကျွန်ုပ်ကို ဟက်ပီးဘတ်ဒေး မလုပ်ကြပါနှင့်။ ကျွန်ုပ်သည် ဘယ်နေ့မွေးမှန်း ကိုယ်တိုင်တောင်မှ သိတာမဟုတ်။ အဟင့် ရွှတ်စ်ခ်

 

ကျွန်ုပ်၏ တရားဝင် မွေးခုနှစ်မှာ ၁၃၂၄ ခုနှစ်ဆို၏။ ဆိုတော့ ၁၃၈၇ - ၁၃၂၄ = ၆၃။ ဟဲ့ သောက်ခွေး။ သင်္ချိုင်းကုန်းနဲ့ အတော်တောင် နီးနေပါပကောလား။ နည်းနည်းပါးပါး လိမ်လိမ်မာမာလေး နေဦးမှ။ ဘုရားလေးဘာလေး ရှိခိုးအုံးမှ။ ကွကိုယ်တော့ ၃၆ လောက် ထင်နေတာ။ အသက်ကလည်း တစ်နှစ်ပြီးတစ်နှစ် မညှာမတာ ကြီးလိုက်လာတာ။ ယခွမ်းဒဲ့မှ။

 

ကျွန်ုပ်သည် ကမ္ဘာမြေပေါ်တွင် မွေးဖွားလာရခြင်းကို သိပ်တော့ နှစ်သက်လှသူ မဟုတ်။ 

အခု ကမ္ဘာ့လူသားဖြစ်နေရသဖြင့် ကျွန်ုပ်အသက် ၆၀ ကျော်ဖြစ်သွားပြီ။

အကယ်၍သာ ကျွန်ုပ်သည် အင်္ဂါဂြိုဟ်သားဖြစ်အံ့။ ကျွန်ုပ်အသက်မှာ အခုမှ ၃၃ နှစ်သာ ရှိဦးမည်။

အကယ်၍သာ ကျွန်ုပ်ကို စနေဂြိုဟ်ပေါ်မှာ မွေးခဲ့လျင် ကျွန်ုပ်အသက်မှာ အခုမှ ၂ နှစ်မျှသာ ရှိသေးသည်။ နောင်နှစ်အများကြီး နေရဦးမည်။ အခုများတော့ . . . ကတောက်စ်

 

ဟုတ်သည်ဖြစ်စေ မဟုတ်သည်ဖြစ်စေ။ ထရမ့်ပဲတက်လာလာ၊ သောက်တလွဲအမိန့်တွေပဲ အမျိုးမျိုးထုတ်ထုတ်။ 

ရေတွေပဲ လျှံလျှံ၊​ ငလျင်တွေလှုပ်လို့ ဘယ်သူတွေပဲ ဒွတ်ခရောက်ရောက်။

မြန်မာပြည် ငလျင်ဘေးအတွက် ဆိုပြီး အိန္ဒိယက လေယာဉ်အစင်းလိုက် ဟို အေရိုးတွေကို လက်ဆောင်ပဲ သွားပေးပေး။

တကယ့်ဒုက္ခသည်တွေဆီ မရောက်ဘဲ နေပူတော်မှာပဲ ကယ်ဆယ်ရေးတွေ လုပ်လုပ်။

 

အချိန်တည်းဟူသော ယန္တယားကြီးကား ဘာကိုမှ မမှုဘဲ အစဉ်တစိုက် မှန်မှန်ကြီး ချီတက်နေလေ၏။

အခုလည်း မပြောမဆို တစ်နှစ်ကုန်ပြန်လေပြီ။

 

ဆိုတော့ သည်တစ်နှစ်အတွင်း ကျွန်ုပ် ဘာတွေလုပ်ဖြစ်ခဲ့ပါသနည်း။

ထုံးစံအတိုင်း ရုပ်ရှင်ကြည့်တာနှင့် စာဖတ်တာ အများဆုံး လုပ်ဖြစ်ပါသည်။

 

သည်တစ်နှစ်အတွင်း ကျွန်ုပ်ဖတ်ခဲ့သည့် စာအုပ်များထဲမှ အကြိုက်ဆုံးစာအုပ်ကို ပြပါဆိုလျင် ‘မြန်မာအက်ဆေး ၁၀၀’ ကို ပြရပါလိမ့်မည်။

 

ရုပ်ရှင်အနေနှင့် “Lost” မဆိုး။

 

နောက်ပြီး ဘာစာအုပ်တွေ ရေးပါသနည်း။ 

အမှန်က ခြင်္သေ့မြို့တော်ကို အပြီးသတ်ရေးဘို့ ဖြစ်ပါသည်။ သို့သော် ထုတ်ဝေမည့်သူမရှိတာနှင့် ဆက်မရေးဖြစ်ဘဲ တိုးလို့တန်းလန်းကြီးနှင့် ရပ်ထားတာဖြစ်၏။ စင်ကာပူက သူတို့ system တွေကို အမြဲတမ်း upgrade လုပ်နေတာ ဖြစ်တော့ ဒီနှစ်ရေးထားတာတွေသည် နောက်နှစ်ကျ အကုန် date out ကုန်သည်။ အမှန်က ကျွန်ုပ် ဤစာအုပ်ကြီးကို ၂၀၁၈ က တစ်ခါ ပြင်ခဲ့သေးသည်။ အခု အဲသည် ၂၀၁၈ version ကို ပြန်ဖတ်ကြည့်လိုက်တော့ အကုန်လိုလို ပြန်ပြင်ရလေသည်။ အတော်များများမှာ အခု သုံးလို့မရတော့။ သည်တော့ . . .

 

တစ်နှစ်ဆိုသည်မှာ ရက်အတော်များသည်လို့သာ ထင်ရတာ။ 

တကယ့်တကယ်ပြန်တွက်ကြည့်လိုက်လျှင် ဟိုလိုလို ဒီလိုလို၊ ယောင်တောင်ပေါင်တောင်နှင့် တစ်နှစ်ပြည့်သွားတာ များသည်။ မယုံလျင် မိတ်ဆွေတို့ နဖူးပေါ်လက်တင်၍ဖြစ်စေ၊ လက်ပေါ်နဖူးတင်၍ဖြစ်စေ၊ တွေးကြည့်စမ်းပါ။ ငါ ဒီတစ်နှစ်လုံး ဘာတွေလုပ်ခဲ့သလဲ။

 

ကျွန်ုပ်က တစ်ပတ်ကို ၇ ရက်လုံး သင်တန်းသွားနေတာဖြစ်သဖြင့် မနေ့ကလည်း ဘလာ ဘလာ ဘလာ၊ ဒီနေ့လည်း ဘလာ ဘလာ ဘလာ၊ မနက်ဖြန်လည်း ဘလာ ဘလာ ဘလာ။ ညကျတော့ တစ်ပတ်ကို ၂ ရက် GCEO မြန်မာစာ သင်၏။ အချိန်အားလေး နည်းနည်းရလျှင် ဟိုမေဘေးတွေကို ငါနဲ့ကိုင်တုတ်ခြင်းဖြင့် အချိန်ကုန်။ ဘုရားတော့ ပျင်းတာနဲ့ တခါမှ မရှိခိုးဖြစ်။ (နတ်ပြည်က နတ်သမီးလေးတွေရေ၊ ဆောရီးပါ၊ ငါ နင်တို့ဆီရောက်ဘို့ သိပ် မသေချာဘူး၊ အဟင့်၊ ရွှတ်စ်) 

 

ဘာမှမပူကြပါနဲ့အမျိုးတို့ -

အခုလာမယ့် ၁၃၈၇ သည်လည်း ဒီအတိုင်း ဟေးလားဝါးလားနှင့် ကုန်သွားဘို့ များပါသည်။

ပြီးတော့ ၁၃၈၈, ၁၃၈၉ . . . . . 

 

နှစ်သစ်မှာ မိတ်ဆွေအားလုံး ဘေးရန်ကင်းကွာ ကျန်းမာလို့ ချမ်းသာကြပါစေ။

(ဟို MayBay တွေအကုန် မာလကီးယားကြပါစေ။)

 

ကျေးဇူးတင်ပါသည်။

 

အေးငြိမ်း

၁၆/၀၄/၂၀၂၅

 

၆၃.၃၆၅=၂၂၉၉၅ ရက်/၈၈ ရက် = ၂၆၁ နှစ် ဗုဒ္ဓဟူးဂြိုဟ်

အင်္ဂါဂြိုဟ် = ၃၃ နှစ် 

စနေ = ၂၂၉၉၅/၁၀၇၅၉ = ၂ နှစ်

QC နှင့် Traceability Record အရေးကြီးပုံ အကြောင်း

ငလျင်လှုပ်တော့ အဆောက်အဦများ ပြိုကြ၏။ ကန်ထရိုက်နှင့်ဆောက်သည့် အဆောက်အဦကြီးများကို မည်ကဲ့သို့ ဆောက်ခဲ့ကြပါသနည်း။ ကျွန်ုပ် အမှန်တကယ် မသိပါ။

 

ကျွန်ုပ်တို့ မြန်မာနိုင်ငံတွင် QC နှင့် Traceability Record စနစ်သည် မရှိ၊ မည်သူမှ မသုံးဟု ထင်၏။ 

အဆောက်အဦတစ်ခု ဆောက်သည်ဖြစ်စေ၊ ပစ္စည်းတစ်ခု ထုတ်သည်ဖြစ်စေ၊ QC နှင့် Traceability Record သည် အလွန်အရေးကြီး၏။ မည်ကဲ့သို့ အရေးကြီးကြောင်း ပြောပြပါမည်။ 

 

ဤအကြောင်း ယခင်ကလည်း ကျွန်ုပ် ပြောဖူးပါ၏။ သို့သော် ကျွန်ုပ်ကဲ့သို့ ငချွတ်၊ ဘာကောင်မှမဟုတ်သော ပမွှား တစ်ကောင် ပြောသည့်စကားကို မည်သည့် စဆရက (ဟုတ်ပေါင်) ဆရာ့ဆရာကြီးများသည် နားထောင်ပါသနည်း။ အကယ်၍ ကျွန်ုပ်က ၎င်းတို့ရှေ့တည့်တည့်သို့ သွားပြောသည်ဖြစ်အံ့။ အနှီဆရာကြီး၊ ထိုဆရာကြီး၊ ၎င်းဆရာကြီးများ သည် ကျွန်ုပ်ပြောသည်များကို နှုတ်ခမ်းလေး တစ်ချက်ရွဲ့လျက် မျက်လုံးလေးမှေးကာ အထင်မကြီးသည့် မျက်နှာပေးမျိုး နှင့် မကောင်းတတ်၍ နားထောင်နေရသည့်ပုံစံမျိုးကို မုချမသွေ တွေ့ရပါလိမ့်မည်။

 

ကျွန်ုပ်တို့သည် သတင်းစာများထဲ၌ အဆောက်အအုံတစ်ခု ဆောက်ပြီးသည့်အခါ မည်သည့်တာဝန်ရှိပုဂ္ဂိုလ်ကြီးက လာရောက်စစ်ဆေးကြောင်း သတင်းများကို မကြာခဏ ဖတ်ကြရ၏။ နောက်လိုက်တပည့်တစ်ဦးက ဖဲထီးကြီး ဆောင်းထားပေးတော်မူသည်ကို ခံယူတော်မူထသော အနှီပုဂ္ဂိုလ်ကြီးက လက်ညှိုးတထိုးထိုးနှင့် မလိုအပ်သည်များ မှာကြားနေသည်ကို နောက်ပါ တိုက်ပိုင်ဝတ် အရာရှိ အရာခံကလေးများသည် မြတ်စွာဘုရားက ဗျာဒိတ်ပေးတော် မူသည့်အလား ခဲတံလေးကို တံတွေးဆွတ်လျက် လိုက်လံ မှတ်သားနေကြသည်ကို သနားစဖွယ် မြင်တွေ့ကြရပါသည်။

 

ဘှာ . . . စစ်ဆေးတာ၊ ဘာကိုစစ်ဆေးတာတုံး။ 

အဆောက်အအုံ အားလုံးဆောက်ပြီးမှ ဟိုလက်ညှိုးထိုး၊ ဒီလက်ညှိုးလုပ်တာကို စစ်ဆေးသည် မခေါ်။ ဤသည်ကို ဆီလူးသည် ဟု ခေါ်၏။ မည်သည့်နေရာကို လူးသနည်း။ မယောင်သည့်နေရာကို လူးခြင်းဖြစ်၏။ အဆောက်အဦအားလုံး ဆောက်ပြီးမှ ဘာကိုစစ်ပါမတုံး။ ဆောက်ပြီးမှ လာစစ်လို့ ဘာလုပ်ရပါမတုံး။ မင်းဆောက်ထားတာ စတင်းဒတ်နဲ့မညီဘူး ကွာ ဆိုပြီး အားလုံးဖြိုချပြီး အသစ်ဆောက်ခိုင်းမလို့လား။ ဖွမ် . . . 

 

++++++++++++++++++++++++++++++++++++

 

QC စစ်တယ်ဆိုတာ ဟို့ အဆောက်အဦမဆောက်ခင် Drawing ဘဝကတည်းက စစ်ရတာ ဖြစ်၏။ သူတို့တွက်ချက်ထား တာတွေ မှန်ရဲ့လား။ Safe ဖြစ်ရဲ့လား။ နားလည်တတ်ကျွမ်းသူ Competent person က စစ်ရ၏။

 

Drawing အားလုံး approved ဖြစ်သွားပြီဆိုလျင် ထို drawing အတိုင်း ဆောက်ရ၏။ ထို drawing ထဲ၌ ဖော်ပြထား သည့် ပစ္စည်းများကို ထို drawing ၌ဖော်ပြထားသည့် အတိုင်းအတာများအတိုင်း ဆောက်ရ၏။ Project specification ဆိုတာရှိ၏။ သုံးသည့် ပစ္စည်းအားလုံး၌ material specification ရှိ၏။ 

 

ထိုကန်ထရိုက်တာများသည် ထို drawing အတိုင်း ဆောက်သလား။ ဖော်ပြထားသည့် ပစ္စည်းများကို သုံးသလား။ အတိုင်းအတာတွေ မှန်ရဲ့လား စစ်ရ၏။ ထိုစစ်ဆေးသူသည် QC ဖြစ်၏။ ထို QC အား ပေါက်တတ်ကရလူကို ခန့်၍မရ။ အရည်အသွေးပြည့်မီသော Competent person အင်ဂျင်နီယာကို ခန့်ရ၏။ QC သည် ထိုအကြောင်းအရာများ အားလုံးကို နားလည်ထားရ၏။

 

QC သည် ဆောက်လုပ်ရေးလုပ်ငန်းကြီးတစ်ခုလုံးကို မျက်စိဒေါက်ထောက် ကြည့်နေ၏။ 

 

လူနှင့်ပတ်သက်၍ -

§  သည်ဆောက်လုပ်ရေးလုပ်ငန်းမှာသုံးသည့် အလုပ်သမားတွေသည် သူတို့အလုပ်ကို တကယ် ကျွမ်းကျွမ်း ကျင်ကျင် လုပ်တတ်ရဲ့လား။ သင်တန်းလိုလျှင် သင်တန်းပေးထားရဲ့လား။ လက်မှတ်လိုလျှင် လက်မှတ် ရှိရဲ့လား။ လိုင်စင်လိုလျှင် လိုင်စင်ရှိရဲ့လား။

§  သူတို့ကို ကြီးကြပ်မည့် supervisor သည် drawing ကို ဖတ်တတ်ရဲ့လား။ အလုပ်သမားတွေကို စီမံ ခန့်ခွဲတတ်ရဲ့လား။ သူ့အလုပ်မှာ ဘာပစ္စည်းတွေလိုတယ်၊ ဘာကိုဘယ်လိုလုပ်ရမယ်ဆိုတာ သိရဲ့လား။ ဘာကို အရင်လုပ်ပြီး ဘာကိုတော့ နောက်မှလုပ်ရမယ်ဆိုတာ နားလည်ရဲ့လား။

 

Drawing များသည် နောက်ဆုံးထုတ် (latest version) ဟုတ်သလား။ Drawing များအားလုံး ပြည့်ပြည့်စုံစုံရှိရဲ့လား။ အားလုံးကို approved လုပ်ပြီးပြီလား။ Drawing master list ရှိသလား။

 

ပစ္စည်းများ site ထဲရောက်လာသည်နှင့် ထိုပစ္စည်းများသည် သတ်မှတ်ထားသည့် specification များနှင့် ကိုက်ညီသလား။ အရွယ်အစား၊ အရေအတွက် အားလုံးမှန်ကန်ရဲ့လား။ အပြစ်အနာအဆာပါသည့် ပစ္စည်းများကို ပြန်ပို့သည့် procedure ရှိသလား။

 

တည်ဆောက်သည့်အခါတွင်လည်း သတ်မှတ်ထားသည့် ပစ္စည်းများကို သုံးသလား။ Drawing နှင့် ကိုက်ညီရဲ့လား။ အတိုင်းအတာတွေ မှန်ရဲ့လား။ သတ်မှတ်ထားသည့် အချိန်အတွင်း ပြီးရဲ့လား။

 

စမ်းသပ်စရာ (ဥပမာ - ကွန်ကရိ၏ အရည်အသွေး) ရှိလျင်လည်း ဓာတ်ခွဲခန်းကို ပို့သလား။ စမ်းသပ်ချက်ရလဒ်တွေ ရလာပြီလား။ စမ်းသပ်ချက်တွေအားလုံး အောင်မြင်ရဲ့လား။ ထိုဓာတ်ခွဲခန်းမှတ်တမ်းများကို သေသေချာချာ သိမ်းထားရ၏။

 

တစ်ခုမကျန် အားလုံးစစ်ရ၏။

 

စစ်သည်ဆိုရာတွင်လည်း ခါးကလေးထောက်၊ မျက်မှန်အနက်ကလေးတပ်လျက် Good, OK. OK, Good ဆို ပြီးသွားတာ မျိုး မဟုတ်။ Traceability Record ဆိုတာ ရှိ၏။ ပစ္စည်း၏နာမည်၊ Model No., Serial No., Heat No., Type, Size စသည် အားလုံးကို မှတ်တမ်းတင်၊ ရေးသွင်းရ၏။ လုပ်သမျှ အလုပ်အားလုံးကို မှတ်တမ်းတင်ရ၏။ ဂဟေဆော်လျှင် ဂဟေဆော်သူ၏ အမည်၊ မှတ်ပုံတင်နံပါတ်၊ Welder No., WSP No., Joint No. အားလုံးကို မှတ်တမ်းတင်ရ၏။

 

ကုန်ကုန်ပြောရလျှင် ပစ္စည်း ပစ္စည်းမို့လို့၊ လူ လူမို့လို့၊ အလုပ် အလုပ်မို့လို့ အားလုံး မှတ်တမ်းရှိရ၏။

သို့မှသာ ဂဟေဆက်တစ်ခု ချို့ယွင်းသွားသည် ဆိုပါစို့။ သည်ဂဟေဆက်ကို မည်သူဆော်ခဲ့သနည်း။ မည်သည့် WPS နှင့် ဆော်ခဲ့သနည်း။ NDT Test လုပ်သည့်မှတ်တမ်းရှိသလား စသည်တို့ နောက်ကြောင်းပြန် လိုက်နိုင်မည်။ ချို့ယွင်းချက် ရှာနိုင်မည်။

 

ထို့ကြောင့် QC ဌာနသည် ကြီး၏။ တစ်ယောက်တည်း လုပ်လို့မရ။ Super structure, infra structure, material controller, procurement, facility, machinery, electrical, painting, welding စသဖြင့် လုပ်ငန်းကြီးလျင် ကြီးသလို QC ပေါင်းများစွာ ရှိနိုင်၏။ လူတစ်ဦးတည်းက ထိုအရာအားလုံးကို နားလည်တတ်ကျွမ်းဘို့ဆိုတာ ဘယ်နည်းနှင့်မှ မဖြစ်နိုင်။

 

ကျွန်ုပ်တို့ဆီတွင် QC များကို မွေးထုတ်ပြီးပါပြီလား။ သေသေချာချာ QC လုပ်တတ်သည့်သူများ ရှိပါပြီလား။ 

 

ယခုငလျင်တွင် ပြိုပျက်သွားသည့် အဆောက်အဦများကို ဆောက်ခဲ့ကြသူများသည် ကျွန်ုပ်အထက်တွင် ပြောခဲ့သည်များ ကို လုပ်ခဲ့ကြပါသလား။ လုပ်ခဲ့ကြသည့် မှတ်တမ်းမှတ်ရာများ ရှိကြပါသလား။ 

 

လူဟူသည် အမှားနှင့်မကင်းနိုင်။

သို့သော် မှားခဲ့သော အမှားမှ သင်ခန်းစာယူနိုင်မှ လူလိမ္မာဖြစ်မည်။

သည်အမှားကိုပင် ထပ်ခါတလဲလဲ ကျူးလွန်နေသူကား လူမိုက်စင်စစ် ဧကန်ဖြစ်တော့၏။

 

အသင်တို့သည် လူမိုက်များ မဖြစ်ကြပါကုန်လင့်။

အချိန်မီ သင်ခန်းစာ ယူကြပါကုန်လော့။ 

လေ့လာကြပါကုန်လော့၊ သင်ယူကြပါကုန်လော့၊ သူများလုပ်သည်တို့ကို အတုခိုးကြပါကုန်လော့။

 

ကျေးဇူးတင်ပါသည်။

 

အေးငြိမ်း

10/04/2025; 23:07 hr

Design for Safety