မြန်မာနိုင်ငံ ဖွံ့ဖြိုးတိုးတက်ရေးတွင် မိမိကျရာ အခန်းကဏ္ဍမှ ပါဝင်ကြပါရန် MTP သို့ ဖိတ်ခေါ်ခြင်း

(၁)

အခြားသူများတော့ မပြောတတ်ပါ။ ကျွန်တော့်အနေနှင့်မူ သည်ပွဲ (မြန်မာ့ပြုပြင်ပြောင်းလဲရေးဖြစ်စဉ်နှင့် စင်ကာပူ ရောက် မြန်မာ တတ်/သိပညာရှင်များ၊ ကျွမ်းကျင်သူများ၏ အခန်းကဏ္ဍစကားဝိုင်း - Panel Discussion) ကို အောင်အောင် မြင်မြင် ကျင်းပနိုင်ခဲ့ခြင်းအတွက် အလွန်ဝမ်းသာအားရ ဖြစ်မိပါ၏။ ကျွန်တော်တို့ အဖွဲ့သားအားလုံးလည်း ကျွန်တော်ကဲ့သို့ပင် ၀မ်းမြောက်ခြင်း အရသာကို ခံစားရမည်မှာ သေချာလှပါ၏။ စီစဉ်ပေးသော ကိုဘိုဘိုဝင်း၊ ကိုဝင်းမြင့်၊ မအေးမာမာ တို့ အပါအ၀င် အဖွဲ့သားအားလုံးကိုလည်း အထူးကျေးဇူးတင်ပါသည်။ (ငါ့နာမည်မပါရကောင်းလားဟု စိတ်မကောက်ကြပါလင့်။ နောက်မှ အမည်စာရင်း သပ်သပ်ထပ်ထည့်ပါမည်။)

သိကြားမင်း ကျွဲယောင်ဖန်ဆင်းပြတာတောင် ချိုနည်းနည်းကားသေးသည် ဟု အကဲ့ရဲ့မလွတ်လေရကား ကျွန်ုပ်တို့ အားလည်း တီးတိုးတီးတိုး သဖန်းပိုးလုပ်သူများ ရှိမည်မှာ မြေကြီးလက်ခတ်မလွဲပါ။ သို့သော် ‘ခွေးဟောင်၍၊ တောင်မရွေ့’ ဟူသော မြန်မာစကားပုံသည် ကျွန်ုပ်တို့လိုလူများအဖို့ ရည်စူးထားခဲ့ခြင်းဖြစ်သဖြင့် ကျွန်ုပ်တို့သည်လည်း အဘယ်ကဲ့ရဲ့သင်္ဂြိုဟ် အတင်းဆိုမှုကို မှုရပါမည်နည်း။ ဝေးစွခြောက်ပါး။

            ကရာတေးမကောင်းကြောင်းပြောလိုလျှင် ကရာတေးပညာ တတ်ထားမှ ဖြစ်မည်။ ဒါမှ ကရာတေး၏ အားနည်းချက်၊ ချို့ယွင်းချက်များကို သေသေချာချာသိသဖြင့် ထိုအချက်များကို ထောက်ပြကာ မကောင်းပြောနိုင်မည်။ သို့သော် ကရာတေး ဆိုတာ ဖြူသလား၊ မဲသလား၊ ကိုယ်လည်း တစ်ကွက်မှ မကစားဖူးဘဲ ‘အလကားပါကွာ၊ မင်းတို့ ကရာတေး။ ငါတို့ နန်းတွင်း သိုင်းလောက် ဟန်မကျပါဘူး’ ဟု ရမ်းတုတ်လာသူများကိုတော့ ဘာမှပြန်ပြောမနေပါနှင့်။ အသာလေးသာ ပြုံးကြည့် နေလိုက်ပါ။ ထိုနည်းတူစွာပင် ယခု ကျွန်တော်တို့လုပ်သော ပွဲအကြောင်း ဂဃနဏမစုံစမ်း၊ မလေ့လာဘဲလျှက် အတင်းပြော လာသူများကို ကျွန်ုပ်တို့အနေနှင့် ဘာမှ ဖြေရှင်းချက်ပေးနေစရာမလိုပါ။

            သို့သော်လည်းလေ ဤသို့ပြောသူများမှာ စုန်းပြူး တစ်ယောက်စ၊ နှစ်ယောက်စမျှသာ ဖြစ်ပါသည်။ ကျန်သည့် ပရိသတ်အများစုကြီးမှာ ထောက်ခံအားပေးကြောင်း ကျွန်တော်တို့ Face Book ပေါ်မှ comment များကို ကြည့်ခြင်းဖြင့် သိနိုင်ပါ၏။

(၂)

            အမေရိကန်ပြည်ထောင်စု၏ ၃၅ဆက်မြောက် သမ္မတဖြစ်သော ဂျွန်အက်ဖ် ကနေဒီက ၎င်း၏ သမ္မတအဖြစ် ကျမ်းသစ္စာကျိန်ဆိုပွဲတွင် သမိုင်းတွင်ရစ်သော မိန့်ခွန်းကို ပြောခဲ့၏။     

“Ask not what your country can do for you – ask what you can do for your country” ဟူ၍ ဖြစ်၏။

ကျွန်ုပ်တို့၏ မော်ဒရေတာ ကိုကျော်ဇောခိုင်ကလည်း နောက်ဆုံး PD အပိတ်တွင် ကျွန်တော်တို့က ကျွန်တော်တို့ တိုင်းပြည်အတွက် ဘာလုပ်ပေးနိုင်မလဲဆိုတာ အဖြေရှာကြည့်တာပါ ဟုလည်း ပြောခဲ့ပါသည်။ ဤသည်မှာ ကျွန်တော်တို့ ယခုပွဲလုပ်ရခြင်း၏ ရည်ရွယ်ချက်ဖြစ်သတည်း။

ခုနင်ကပြောခဲ့သည့် ကဲ့ရဲ့သင်္ဂြိုဟ်အတင်းဆိုလိုသူများအားလည်း အသင့်တိုင်းပြည်အတွက် သင်တတ်နိုင်သည့်ဘက် မှ လုပ်ပေးဘို့ ဖိတ်ခေါ်ပါသည်ဟု ပြောလိုပါသည်။

ကျွန်တော့်ဖေ့စ်ဘွတ်တွင် စင်ကာပူရောက် တတ်၊ သိ ပညာရှင်များ၏ အခန်းကဏ္ဍ ဟု တင်လိုက်တော့ ညီမငယ် တစ်ဦးက ဟင်၊ ဒီလိုဆို တတ်သိပညာရှင်မဟုတ်တဲ့လူတွေ မပါရတော့ဘူးလား ဟု မေးလှာပါ၏။ မအေးအေးမာက ညီမလေးရယ်၊ စိတ်ဝင်စားတဲ့သူ ဘယ်သူမဆို ပါဝင်ဆင်နွှဲလို့ရပါသကွယ် ဟု အကြောင်းပြန်လိုက်ပါသည်။

ကျွန်တော်တို့ငယ်ငယ်က သင်ခဲ့ရသည့် ကဗျာကလေးကို မိတ်ဆွေတို့ မှတ်မိပါလိမ့်မည်။ (ကျွန်တော်တော့ ကောင်းကောင်းမမှတ်မိတော့ပါ။)

စံပယ်ဖူးလည်း၊ သူ့ဂုဏ်ထူးနှင့် ငုံဖူးနှင့်။

ဖိုးလမင်းလည်း၊ သူ့အဆင်းနှင့် အလင်းနှင့်။

            ဖယောင်းတိုင်လည်း၊ သူ့အရွယ်နှင့် အစွယ်နှင့် - - ဟု ဖြစ်၏။

ဆိုလိုသည်မှာ ၀န်ကြီး၊ အရာရှိကြီး၊ အင်ဂျင်နီယာကြီးများသာမဟုတ်။ လမ်းဘေး၌ တံမြက်စည်းလှည်းနေသူသည် လည်း သူ့အတိုင်းအတာနှင့်သူ၊ သူ့နေရာနှင့်သူ အသုံးကျကြောင်း ပြောလိုရင်းဖြစ်ပါသည်။ တိုင်းပြည်တစ်ခုကို ထူထောင်သည့် နေရာ၌ စစ်သားချည်းလည်း ထူထောင်လို့မရ။ အင်ဂျင်နီယာချည်းလည်း ထူထောင်လို့မရ။ လယ်သမားချည်းလည်း ထူထောင် လို့မရ။ နိုင်ငံတစ်ခု၌ သမ္မတသည် မရှိမဖြစ်လိုအပ်သကဲ့သို့ အမှိုက်လှည်းသူများလည်း မရှိမဖြစ်လိုပါသည်။ အနှီ အမှိုက်လှည်း သူများသာမရှိပါက လမ်းဘေးမှ အမှိုက်များကို အသင်တို့ လှည်းပါမည်လား။ သူ့အတိုင်းအတာနှင့်သူ၊ သူ့နေရာနှင့်သူ အသုံးတည့်သူချည်း ဖြစ်ပါ၏။

ကျွန်တော်ဆိုလိုချင်သည်မှာ Myanmar Transitional Platform ဟူသည် ဆရာဝန်နှင့် အင်ဂျင်နီယာများချည်း၊ အရာရှိကြီးများအတွက်မျှသာမဟုတ်။ မြန်မာနိုင်ငံကောင်းကျိုး သယ်ပိုးလိုသူ၊ ကိုယ်ကျရာ တစ်ထောင့်တစ်နေရာမှ ပါဝင်လိုသူအားလုံး ပါဝင်လို့ရပါသည်။ ပလက်ဖောင်းဟူသည် အားလုံးအတွက် မဟုတ်ပါလား။ သည်ကိစ္စမျိုးဆိုတာ တစ်ဦးကောင်း၊ တစ်ယောက်ကောင်းနှင့် လုပ်လို့ရတာမျိုးမဟုတ်။ အားလုံး စိတ်တူကိုယ်တူ၊ တက်ညီလက်ညီလုပ်ကြမှ ခရီးရောက်တာမျိုးဖြစ်၏။

(၃)

            ယခုပြီးသွားသည့်ပွဲမှာ ပထမဦးဆုံး ခြေလှမ်းမျှသာ ဖြစ်ပါသည်။ နောင် လုပ်စရာ၊ အများအပြားကျန်ပါသေး၏။ ထိုလုပ်ငန်းများအတွက် အသိပညာ၊ အတတ်ပညာအား၊ ကာယအား၊ ဉာဏအား၊ ငွေအား၊ အများအပြား လိုပါသည်။ မိတ်ဆွေတို့ထံမှ အကြံဉာဏ်များ၊ အားပေးမှုများ လိုပါသည်။ Resourses (မိမိတို့ လုပ်ကိုင်နေသည့် လုပ်ငန်းအလိုက် လေ့လာသင့်သည့် ဥပဒေ၊ နည်းဥပဒေ၊ လုပ်ထုံးလုပ်နည်း၊ ရည်ညွှန်းစာအုပ်စာတမ်း၊ လက်ကမ်းစာစောင် စသည့် စာအုပ် စာတမ်းများ စသည်) များလည်း လိုပါသည်။

            တစ်ဦးတည်းနှင့် ဘာသာမျိုးစုံ၊ အလုပ်မျိုးစုံ ကျွမ်းကျင်ဘို့ဆိုတာ မည်သည့်နည်းနှင့်မှ မဖြစ်နိုင်။ သည့်အတွက် နယ်ပယ်အရပ်ရပ်မှ ပညာရှင်ရော၊ ကျွမ်းကျင်သူများပါ၊ အားလုံး မိမိတို့တတ်နိုင်သည့်ဘက်မှ ပူးပေါင်းပါဝင် ဆောင်ရွက်ကြဘို့ အထူး လိုအပ်ပါသည်။

            သို့အတွက်လည်း MTP သို့ ပူးပေါင်းပါဝင် ဆောင်ရွက်လိုပါလျှင် အောက်ပါပုဂ္ဂိုလ်များနှင့် email သို့ ဆက်သွယ်နိုင်ပါကြောင်း အသိပေးအပ်ပါသည်။

mtp.singapore2013@gmail.com

စဉ်	အမည်	Email address
၁	ကိုထွန်းနောင်မြင့်	tunnaungmyint@gmail.com
၂	ဒေါက်တာ သိန်းသန်းဝင်း	heinthanwin23@gmail.com

ကျေးဇူးတင်ပါသည်။

အေးငြိမ်း

MTP

3 – 5 – 2013; 10:35 pm