CITI လက်မှတ် (သို့) SEC (K) Certificate အကြောင်း

စင်ကာပူမှာ CITI သင်တန်း တက်ချင်လို့ပါ ဟု မေးလာကြသည့်အတွက် သိနိုင်ရန် စုဆောင်း ဖော်ပြလိုက်ကြောင်း။

 

ယခု BCAA (BCA Academy) ဖြစ်လာမည့် CITC (Construction Industry Training Centre) ကို ၁၉၈၄ တွင် Upper Serangoon ၌ စတင်ဖွင့်လှစ်ခဲ့၏။ ထို့နောက်ပိုမိုများပြားလာသော သင်တန်းများအတွက် သင်တန်းကျောင်းကို Braddell Road ၌ ၁၉၉၄ ခုနှစ်တွင် တိုးချဲ့ဖွင့်လှစ်ကာ ကျောင်းနာမည်ကိုလည်း CITI – Construction Industry Training Institute ဟု ပြောင်းခဲ့၏။

သင်တန်းကျောင်း၏ ရည်ရွယ်ချက်မှာ ဆောက်လုပ်ရေးလုပ်ငန်း၌ အလုပ်လုပ်မည့် အလုပ်သမားများကို ကျွမ်းကျင် လုပ်သားများ ဖြစ်လာစေရေးအတွက် လေ့ကျင့်သင်ကြားပေးရန်ဖြစ်၏။ 

 

စင်ကာပူ ဆောက်လုပ်ရေးလုပ်ငန်းတွင် အလုပ်လုပ်မည့်သူများသည် ထိုသင်တန်းကျောင်းမှ ထုတ်ပေးသည့် လက်မှတ် ရှိရန်လို၏။ ထိုလက်မှတ်ကို SEC (K) လက်မှတ်ဟုခေါ်၏။ အရှည်မှာ Skill Evaluation Certificate (Knowledge) ဖြစ်၏။ ဤလက်မှတ်မှာ ယခု အများကခေါ်နေကြသည့် CITI လက်မှတ်ဖြစ်သတည်း။ အဘယ်ကြောင့် CITI လက်မှတ် ခေါ်သနည်းဆိုသော် ထိုလက်မှတ်ရရန် ယခင်က CITI တွင် သွားတက်ရသောကြောင့် ဖြစ်၏။ ယခု CITI ကို BCAA ဟု အမည်ပြောင်းလိုက်သည့်တိုင် CITI ဟု ဆက်ခေါ်နေကြခြင်း ဖြစ်၏။ စင်ကာပူတွင် မဖြစ်မနေတက်ရသည့် Construction Safety သင်တန်းကို ယခုအခါ နာမည်ပြောင်းသွားသည့်တိုင် CSOC ဟု ဆက်ခေါ်နေဘိသကဲ့သို့တည်း။ (နီရို့ရှင်းပြရတာ မောထှာ၊ ဝှူးစ်)

 

အလုပ်သမားများကို ကျွမ်းကျင်မှုပေါ်မူတည်၍ Low levy worker နှင့် High levy worker ဟု နှစ်မျိုးခွဲနိုင်၏။ လဲဗီး (ဟေ့လူတွေ၊ ပေါက်တတ်ကရ ပြောင်းပြန်တွေလဲ လျှောက်တွေးမနေနဲ့အုံး၊ ယခွမ်းဒဲ့မှ) ဆိုသည်မှာ နိုင်ငံခြားသား အလုပ်သမားကို ခန့်ထားသည့်အတွက် အလုပ်ရှင်က အစိုးရကို ပေးရသော အခွန် ဖြစ်၏။ ပေးရသော လဲဗီးပမာဏမှာ အလုပ်သမား၏ ကျွမ်းကျင်မှုနှင့် ခန့်ထားသည့် နိုင်ငံခြားသား အရေအတွက်ပေါ် မူတည်၏။ လဲဗီးတွက်နည်းမှာ အတော် ရှုပ်သဖြင့် ဤနေရာတွင် ချန်ခဲ့ပါမည်။ ယခုက လဲဗီးအကြောင်း ပြောမှာမဟုတ်။ SEC (K) လက်မှတ်အကြောင်း ပြောမှာ ဖြစ်သည့်အတွက် ဘေးရောက်ကုန်လိမ့်မည်။ သိလိုသေးသူများအတွက် screen shot ရိုက်ပြထားပါသည်။

 

ဤတွင်ဖော်ပြမည့် SEC (K) မှာ ဆောက်လုပ်ရေးလုပ်ငန်းတစ်ခုအတွက်သာ ဖြစ်၏။ သင်္ဘောကျင်း၊ ကုန်ထုတ်လုပ်ငန်း၊ ရေနံဓာတုစက်ရုံ၊ ဝန်ဆောင်မှုလုပ်ငန်းများအတွက် မဟုတ်။ အပြည့်အစုံသိလိုသူများ MOM Website တွင် ဖတ်ကြည့်ကြ ပါကုန်။ 

 

ဆောက်လုပ်ရေးလုပ်ငန်း၌ လုပ်မည့် လုပ်သားများအား အခြေခံကျွမ်းကျင် (Basic-skilled – R2) နှင့် အဆင့်မြင့် ကျွမ်းကျင် (Higher-skilled – R1) ဟု နှစ်မျိုးခွဲနိုင်၏။ 

R2 အမျိုးအစား အလုပ်သမားများသည် စင်ကာပူတွင် (၁၄) နှစ် ထိ အလုပ်လုပ်နိုင်၏။ လဲဗီးကြေးလည်း မြင့်၏။

R1 အမျိုးအစား အလုပ်သမားများသည် စင်ကာပူတွင် (၂၆) နှစ် ထိ အလုပ်လုပ်နိုင်၏။ လဲဗီးကြေးလည်း နည်း၏။

 

ဆောက်လုပ်ရေးကုမ္ပဏီတစ်ခုသည် Local (Local ဆိုသည်မှာ စင်ကာပူနိုင်ငံသားနှင့် PR များကို ဆိုလိုသည်။) အလုပ် သမားတစ်ဦးရှိပါက နိုင်ငံခြားသားအလုပ်သမား (၇) ယောက်ခန့်ထားနိုင်၏။ R2 အလုပ်သမား ၁၀ ယောက်လျှင် တစ်ယောက်သည် R1 အလုပ်သမားဖြစ်ရမည်။ ပိုသည့် R2 အလုပ်သမားအားလုံးကို ဖြုတ်ပစ်မည်။

R1 အလုပ်သမားဖြစ်လိုပါက လုပ်သက် (၄) နှစ်ထက်နည်းသူ (သို့) လုံးဝ လုပ်သက်မရှိသေးသူ လူသစ်များသည် အနည်းဆုံးလခ ၁၆၀၀ ရ ရမည်။ SEC (K) trade test at higher skills standard ကို အောင်မြင်ရမည်။ 

(သို့မဟုတ်) လုပ်သက် (၄) နှစ်ထက်များသူဖြစ်ပါက မတူညီသော trade မှ SEC(K) လက်မှတ် အနည်းဆုံး နှစ်ခု ရှိရမည်။

 

ဆိုတော့ ချုပ်ရလျှင် စင်ကာပူက ဆောက်လုပ်ရေးလုပ်ငန်းတွင် အလုပ်လုပ်မည့်သူများအနေနှင့် SEC (K) လက်မှတ် ရှိထားရန် လို၏။

ထို SEC (K) လက်မှတ်ရရန် စာမေးပွဲနှစ်ခု အောင်ရမည်။

တစ်ခုမှာ စာတွေ့ဖြစ်၏။ မှားမှန်ရောထွေး အမှန်ရွေး (၁) နာရီ ဖြေရမည်။

နောက်တစ်ခုမှာ ၄ နာရီမှ ၅ နာရီကြာသည့်တိုင် ဖြေရမည့် လက်တွေ့စာမေးပွဲ ဖြစ်၏။ 

နှစ်ခုစလုံးအောင်မှ လက်မှတ်ရမည်။

ဘယ်သင်တန်းမှာ ဘာတွေသင်သလဲ ဆိုတာ သိလိုသူများ သင်ရိုးညွှန်းတမ်းနှင့် နမူနာမေးခွန်းများကို BCA, Manpower Development Department ၌ စင်းဒေါ်လာ $21 ပေးလျက် ဝယ်နိုင်၏။

 

ထို SEC (K) သင်တန်းကို အသိအမှတ်ပြု သင်တန်းကျောင်းများတွင် တက်နိုင်၏။

မြန်မာနိုင်ငံတွင် အသိအမှတ်ပြု သင်တန်းကျောင်းနှစ်ခုရှိရာ ‘ထက်ဦး’ နှင့် ‘ကမ္ဘာ’ တို့ ဖြစ်၏။ ၎င်းတို့ထံတွင် တက်နိုင်သည့် သင်တန်းများကို screen shot ဖြင့် ပြထားပါသည်။

စင်ကာပူက သင်တန်းကျောင်းမှာ ကျွန်ုပ်တို့အိမ်နှင့် မိနစ် ၂၀ လောက် လမ်းလျှောက်ရသည့် အကွာအဝေးတွင် ရှိ၏။ Fonda Global Engineering Pte Ltd ဟု ခေါ်၏။ ရုံးချုပ်လိပ်စာမှာ 45 Sungei Kadut Loop Singapore 729495 ဖြစ်၏။ ဖုန်းနံပါတ် - 6515 5775 ဖြစ်ပြီး Email: statementrequest@fondaglobal.com ဖြစ်၏။ 

(ကျွန်ုပ်က တခါတခါ Fonda တွင် Safety သင်တန်းများ သွားသင်တတ်၏။ ဤကား စကားချပ်)

 

Fonda တွင် ရနိုင်သော သင်တန်းများ၊ သင်တန်းကာလနှင့် ဈေးနှုန်းများကို ဖော်ပြထားပါ၏။ သင်တန်းကို တစ်လ၊ နှစ်လ လောက်ကြိုပြီး မှတ်ပုံတင် (register) ရ၏။ 

အကယ်၍ သင်တန်း မှတ်ပုံတင်လိုပါက ကိုယ်တက်လိုသော သင်တန်းတစ်ခုချင်းအလိုက် Fonda website တွင် မှတ်ပုံတင်နိုင်ပါ၏။ ဥပမာ - သစ်သားဖောင်ဝပ်ဆိုပါစို့။ သင်တန်းချိန် - ၁၄ နာရီ။ သင်တန်းကြေး ၁၂၈၀။

 

https://www.fondacoretrade.com.sg/enhanced-timber-formwork-seck/

ထို့ထက်ပိုပြီး အသေးစိတ် သိလိုသေးသူများ ဟောသည် website တွေမှာ ဝင်ဖတ်ကြည့်လို့ ရကြောင်း။

 

https://www.mom.gov.sg/passes-and-permits/work-permit-for-foreign-worker/sector-specific-rules/construction-sector-requirements

 

https://www1.bca.gov.sg/buildsg/manpower/bca-approved-training-and-testing-centres/coretrade_faqs/registration-of-multi-skilling-personnel#:~:text=SEC(K)%2C%20which%20stands,in%20a%20particular%20construction%20trade.

 

https://www1.bca.gov.sg/buildsg/manpower/bca-approved-training-and-testing-centres/coretrade_faqs/upgrading-pathways

 

https://www1.bca.gov.sg/buildsg/manpower/overseas-trade-testing-and-upgrading-for-foreign-workers

 

https://www.fondacoretrade.com.sg/reinforced-concrete-works-2/

 

 

ကျေးဇူးတင်ပါသည်။

 

အေးငြိမ်း

၂၀ ဧပြီလ၊ ၂၀၂၃

ကျွန်ုပ်နှင့် သင်္ကြန်အကြောင်း (၂)

ကျွန်ုပ်နှင့် သင်္ကြန်အကြောင်းကို (၆) ရက်နေ့က စရေးသည်ဟု ယခင်ပို့စ်၌ ဖော်ပြထား၏။ အမှန်မှာ ကိုဂိုင်ကြီးက “ဟေ့လူ၊ ကျုပ်တို့သင်္ကြန်က ဘာကြောင့် ခရစ်တော်ရဲ့ ဧပြီလ ၁၄ ရက်နေ့မှာ ကျနေရတာတုံး” ဆိုသည့်မေးခွန်းကို ဖြေဆိုရန် သင်္ကြန်ဟူသည် အဘယ်ဖြစ်သည်ကို ရေးဘို့ ရည်ရွယ်ရင်း ဖြစ်၏။

 

သို့သော် ရေးနေတုံးတန်းလန်း (၇) ရက်နေ့တွင် ဖေ့စ်ဘုတ်၌ “သင်္ကြန်ဂျင်း” ဟူသည့် ပို့စ်ကို ဖတ်မိလေရာ ပစ္စည်းမဲ့ဒေါသ တို့ ပေါက်ကွဲလျက် ရေးလိုရင်း ရည်ရွယ်ချက်မှ ဘေးချော်သွားခြင်း ဖြစ်ပါ၏။ ဤအတွက် မိတ်ဆွေများကို တောင်းပန် ပါ၏။ 

 

ယခု သင်္ကြန်အကြောင်း ပြန်ဆက်ပါမည်။

 

ကိုဂိုင်ကြီးပြောသလို ကျွန်ုပ်တို့သည် မြန်မာပြက္ခဒိန်သုံး၍ သင်္ကြန်ဘယ်နေ့ကျမယ် ဆိုသည်ကို တွက်ရန် မလွယ်ကူ။ မှတ်ရန်လည်း မလွယ်ကူ။ မြန်မာပြက္ခဒိန်ရက်များတွင် တခါတလေ တန်ခူး လဆန်းရက်များ၌ သင်္ကြန်ကျ၍ တခါတလေ တန်ခူး လဆုတ်ရက်များ၌ ကျ၏။ သင်္ကြန်ကျမည့်ရက်ကို မြန်မာပြက္ခဒိန်ရက်များ၌ ပုံသေသတ်မှတ်ထားလို့မရ။ သို့သော် ကမ္ဘာသုံးပြက္ခဒိန်၌မူ နှစ်စဉ် ဧပြီလ (၁၄) ရက်၌ သင်္ကြန်ကျမည်ကို ဒက်ထိ ပြောနိုင်၏။

အဘယ်ကြောင့်နည်း။

 

သည်ကိစ္စမှာ လွယ်လွယ်လေး ပြောလို့မရသလို ပညာနည်းသူများအနေနှင့် အတော်နားရှုပ်မည့် ပြဿနာဖြစ်၏။ နောက်ပြီး နက္ခတ္တဗေဒအခြေခံလေး ဘာလေးကလည်း ရှိအုံးမှ။

 

မိတ်ဆွေတို့ နားလည်ဘို့ သိပ်မလွယ်လှပါ။ ကျွန်တော်တတ်နိုင်သမျှ ကြိုးစားရှင်းပြပါမည်။

 

(၁) အဘယ်ကို သင်္ကြန်ခေါ်သနည်း

 

နေစကြာဝဠာအတွင်း၌ ကမ္ဘာအပါအဝင် အင်္ဂါဂြိုဟ်၊​ ဗုဒ္ဓဟူးဂြိုဟ်၊ ကြာသပတေးဂြိုဟ်၊ သောကြာဂြိုဟ်၊ စနေဂြိုဟ် စသည့် ဂြိုဟ်ကြီးတို့သည် နေကို ပတ်လျက်ရှိ၏။ ၎င်းဂြိုဟ်တို့သည် နေကိုပတ်နေရုံမျှသာ မဟုတ်သေး။ မိမိတို့ ဝင်ရိုးပေါ်တွင်လည်း လည်နေလျက် ရှိသေး၏။ 

 

ယခု အခြားဂြိုဟ်များကို မေ့ထားလျက် ကမ္ဘာဂြိုဟ်တစ်ခုကိုပဲ စဉ်းစားကြပါစို့။

ကမ္ဘာဂြိုဟ်ကြီး မိမိဝင်ရိုးပေါ် တစ်ပတ်ပြည့်အောင်လည်မိခြင်းသည် တစ်ရက်ဖြစ်၏။

အနှီ ကမ္ဘာဂြိုဟ်ကြီးသည်ပင် နာရီလက်တံ ပြောင်းပြန်အတိုင်း နေကိုပတ်လျက်ရှိရာ နေမင်းကြီးကို တစ်ပတ်ပြည့်အောင် ပတ်မိသည့်အချိန်ကာလကို တစ်နှစ်ဟု ခေါ်၏။ 

တစ်နှစ်တာ အချိန်ကာလမှာ ခေတ်သိပ္ပံနည်းနှင့် သူရိယသိဒ္ဓန္တနည်း နည်းနည်းကွာ၏။

(သူရိယသိဒ္ဓန္တနည်းဟူသည်မှာ မြန်မာပြက္ခဒိန်တွက်ရာတွင် သုံးသည့်နည်း ဖြစ်၏။) 

ခေတ်သိပ္ပံနည်းဖြင့် တစ်နှစ်တာကာလမှာ ၃၆၅.၂၄၂၁၉၈၈ ရက် ဖြစ်ပြီး သူရိယသိဒ္ဓန္တနည်းအရ ၃၆၅.၂၅၈၇၅၆၄၈၁ ရက် ဖြစ်၏။ 

ထို့ကြောင့် ခေတ်သိပ္ပံနည်းနှင့် သူရိယသိဒ္ဓန္တနည်းကွာခြားချက်မှာ ၀.၀၁၆၅၅၇၆၈၁ ရက် (သို့မဟုတ်) ၀.၃၉၇၃၈၄၃၄၄ နာရီ (သို့မဟုတ်) ၂၃ မိနစ် ၅၁ စက္ကန့် ဖြစ်၏။

၃၆၅.၂၄၂၁၉၈၈ ရက် = ၃၆၅ ရက် ၅ နာရီ ၄၈ မိနစ် ၄၆ စက္ကန့် (NASA တွင် ၃၆၅ ရက် ၅ နာရီ ၅၉ မိနစ် ၁၆ စက္ကန့် ဟု တွေ့ရ)

အဘယ်ကြောင့် ဤမျှအသေးစိတ်လိုက်ပြီး မိနစ်၊ စက္ကန့်အထိ ဖော်ပြရသနည်းဟူမူ သင်္ကြန်ကျချိန်၊ တက်ချိန်များ တွက်ရန် ဖြစ်၏။

 

နောက်ကဂဏန်းတွေ မေ့ထားလိုက်လျှင် တစ်နှစ်ကို ၃၆၅ ရက် ရှိ၏။ 

သို့ဆိုလျှင် မြန်မာပြက္ခဒိန်၌ မည်သည့်ရက်ကို သင်္ကြန်ကျရက်ဟု သတ်မှတ်ပါသနည်း။

ဤနေရာ၌ ကောင်းကင်မှ ရာသီ၊ နက္ခတ်များအကြောင်း မပြောလို့ကို မဖြစ်၊ ပြောကို ပြောရပါမည်။

 

အသင်တို့ ဦးခေါင်းပေါ်မှ ကောင်းကင်စက်လုံးကြီးအတွင်း၌ ထောင်ပေါင်းများစွာသော ကြယ်တာရာတို့ဖြင့် ပြည့်နှက် လျက်ရှိ၏။ ထိုကြယ်တာရာတို့အား ကောင်းကင်စက်ဝိုင်း တစ်ပတ်လည် (၃၆၀ ဒီဂရီ) ကို ၁၂ စုစီခွဲလျက် တစ်စုလျှင် တစ်ရာသီ ဟု သတ်မှတ်လိုက်၏။ ထို့ကြောင့် ကျွန်ုပ်တို့ မြေကမ္ဘာလုံးကြီးကို မိဿ၊ ပြိဿ၊ မေထုန် စသည့် ၁၂ ရာသီက ပတ်ရံထားလေ၏။ 

 

ကမ္ဘာလုံးကြီးသည် နေမင်းကိုလှည့်ပတ်နေသည် မှန်သော်လည်း မျက်မြင်အားဖြင့် နေလုံးကြီးသည် ကမ္ဘာမြေကြီးကို လှည့်ပတ်သွားလာနေသည် ထင်ရရာ ထိုနေလုံးကြီး မိန်ရာသီမှ မိဿရာသီသို့ ကူးပြောင်းဝင်ရောက်ချိန်သည် သင်္ကြန် ကျချိန်ဖြစ်သတည်း။ ဤအချိန်သည် ကမ္ဘာလုံးကြီးက နေမင်းကြီးကို တစ်ပတ်တိတိ ပတ်မိသော အချိန်လည်း ဖြစ်၏။

 

သို့တိုင် သင်္ကြန်ကာလ၌ သင်္ကြန်အကျ၊ သင်္ကြန်အကြတ်၊ သင်္ကြန်အတက်ဟု သုံးမျိုးရှိပြန်၏။

အဘယ်ကြောင့်နည်း။

 

ရှင်းရင်းနှင့် ရှုပ်တော့မည်။

 

ကမ္ဘာလုံးကြီးက နေမင်းကြီးကို ပတ်နေရာတွင် စက်ဝိုင်းအတိအကျပတ်တာမဟုတ်။ အီလစ်ပုံ (ကြက်ဥပုံ) ပတ်နေတာ ဖြစ်၏။ နေမင်းကြီးသည်လည်း ပတ်နေသည့် အလယ်ဗဟို တည့်တည့်တွင် ရှိတာမဟုတ်။ သို့မို့ကြောင့် မျက်မြင် နေသွား နှုန်းမှာ နှေးလိုက်မြန်လိုက်ဖြစ်နေ၏။ ထို့ကြောင့်တွက်ရတာ မလွယ်။ သို့မို့ကြောင့် တွက်ရလွယ်စေရန် နေသွားနှုန်းကို ပျမ်းမျှယူလိုက်၏။ ထိုအခါ ဖုဋတနင်္ဂနွေနှင့် မဓျတနင်္ဂနွေဟု နှစ်မျိုးဖြစ်လာ၏။ ဖုဋတနင်္ဂနွေဆိုသည်မှာ မျက်စိဖြင့် မြင်နေရသော နေမင်းကြီး၏ သွားနှုန်းဖြစ်ပြီး မဓျတနင်္ဂနွေဆိုသည်မှာ ထိုနေသွားနှုန်းတို့ကို ပျမ်းမျှယူထားခြင်း ဖြစ်သတည်း။ 

 

ထိုအခါ မိန်ရာသီမှ မိဿရာသီသို့ ကူးပြောင်းဝင်ရောက်ရာတွင်လည်း ဖုဋတနင်္ဂနွေနှင့် မဓျတနင်္ဂနွေတို့အတွက် အချိန်နှစ်ခု ဖြစ်ပြန်၏။ 

မိန်ရာသီမှ မိဿရာသီသို့ ဖုဋတနင်္ဂနွေ ကူးပြောင်းဝင်ရောက်ချိန်ကို သင်္ကြန်ကျချိန်ဟု ခေါ်၏။ 

မိန်ရာသီမှ မိဿရာသီသို့ မဓျတနင်္ဂနွေ ကူးပြောင်းဝင်ရောက်ချိန်ကို သင်္ကြန်တက်ချိန်ဟု ခေါ်၏။

ဖုဋတနင်္ဂနွေနှင့် မဓျတနင်္ဂနွေတို့အကြား ကွာခြားချက်မှာ ၂ ရက် ၄ နာရီ ၄ မိနစ် ၄၁ စက္ကန့် ဖြစ်၏။

ဤသည့်အချိန်ကို သင်္ကြန်ကြတ်ချိန်ဟု ခေါ်၏။

 

သင်္ကြန်တက်ပြီး နောက်တစ်ရက်ကို နှစ်ဆန်းတစ်ရက်ဟု ခေါ်၏။ ဤနှစ်ဆန်းတစ်ရက်သည် မြန်မာပြက္ခဒိန် နှစ်တစ်နှစ်၏ အစဖြစ်၏။ 

 

 

(၂) ပြက္ခဒိန် နှစ်မျိုး

 

 

အကြမ်းဖျဉ်းအားဖြင့် ပြက္ခဒိန် နှစ်မျိုးရှိ၏။

၁။ နေသွားပြက္ခဒိန် (Solar calendar) နှင့်

၂။ နေလသွားပြက္ခဒိန် (Luni solar calendar) တို့ဖြစ်၏။

 

ဇန္နဝါရီအစ၊ ဒီဇင်ဘာအဆုံး ကမ္ဘာသုံးပြက္ခဒိန်မှာ တစ်နှစ်လျှင် ၃၆၅ ရက်ရှိသော နေသွားနှုန်းတစ်ခုတည်းကို အခြေခံ တွက်သည့် နေသွားပြက္ခဒိန် ဖြစ်၏။ ၎င်းတွင် ဇန္နဝါရီ ၃၁၊ ဖေဖော်ဝါရီ ၂၈ စသည်တို့မှာ မည်သည့်အပေါ်မှ အခြေခံ ထားတာ မဟုတ်ဘဲ သူ့ဘာသာသူ ၃၁၊ ၂၈၊ ၃၀ စသဖြင့် သတ်မှတ်ထားတာ ဖြစ်၏။ နေသွားနှုန်းမှာ နှစ်အနည်းငယ် အတွင်း ပြောင်းလဲမသွားဘဲ ကိန်းသေဖြစ်နေသဖြင့် ထို ပြက္ခဒိန်ပါ ရက်များမှာ နှစ်စဉ် အတူတူပင် ဖြစ်၏။

 

သို့သော် မြန်မာပြက္ခဒိန်မှာ နေနှင့်လ နှစ်စင်းတို့ လည်ပတ်နှုန်းပေါ် အခြေခံထားသည့် နေလသွား ပြက္ခဒိန်ဖြစ်၏။ ထို ပြက္ခဒိန်တွင် တစ်နှစ်ကို နေသွားနှုန်း ၃၆၅ ရက်ဖြင့် သတ်မှတ်ပြီး တစ်လကို လသွားနှုန်း ၂၉ ရက်ခွဲဖြင့် သတ်မှတ်၏။ နေသွားနှုန်းနှင့် လသွားနှုန်းမှာ မတူလေရကား ထိုမတူညီသည့် ရက်များကို ပြန်လည် ချိန်ကိုက်ပေးရ၏။

 

လသည် ကမ္ဘာကိုတစ်ပတ်အပြည့်လှည့်လည်ရန် (သို့မဟုတ်) တစ်လပြည့်ရန် ၂၉.၅ ရက်လို၏။ သို့သော် တစ်လကို ၂၉.၅ ရက်လုပ်ရန် လက်တွေ့မဆန်လေရကား နှစ်လပေါင်းကာ ၂၉ ရက်တလှည့်၊ ရက် ၃၀ တလှည့် လုပ်၏။ ထို့ကြောင့် မြန်မာ လများမှာ တန်ခူးရက်မစုံ - ၂၉၊ ကဆုန် ရက်စုံ ၃၀ စသဖြင့် ဖြစ်လာရလေ၏။

 

လတစ်လတွင် လသည် ကွယ်ပျောက်သွားရာမှတဖန် ပြန်ပေါ်လာကာ လုံးဝ ပြည့်ဝိုင်းသွားသည်ထိ ၁၅ ရက် (လဆန်းရက်များ) နှင့် လသည် ပြည့်ဝိုင်းနေရာမှာ ပြန်ဆုတ်ပြီး တဖြည်းဖြည်း သေးငယ်ရာမှ ပျောက်ကွယ်သွားသည်ထိ ၁၄ (သို့) ၁၅ ရက် (လဆုတ်ရက်များ) ဟု နှစ်ပိုင်းရှိ၏။ သည်အထိ ပြဿနာမရှိသေး။

 

ထို လသွားရက်များဖြင့် လုပ်ထားသည့် ပြက္ခဒိန်၏ (၁၂) လမှာ စုစုပေါင်း ၃၅၄ ရက်သာ ရှိ၏။ သို့သော် တစ်နှစ်တွင် ၃၆၅ ရက်ရှိလေရာ ၁၁ ရက် ကွာနေလေ၏။ ထိုကွာနေသည့်ရက်များကို ပြန်ချိန်ညှိရန် လထပ်ခြင်း ရက်ငင်ခြင်း စသည်တို့ ပြုရလေတော့၏။ 

 

ထို့ကြောင့် မြန်မာပြက္ခဒိန်၏ အချို့သောနှစ်များတွင် တစ်လအပိုပါလာကာ တစ်နှစ်လျှင် (၁၃) လ ဖြစ်လေတော့၏။ အချို့နှစ်များတွင် အပိုတစ်ရက် ပါလာသေး၏။ (အသေးစိတ်သိလိုသူများ ကျွန်ုပ်၏ မြန်မာပြက္ခဒိန်စာအုပ်ကို ဝယ်ဖတ် ကြည့်ပါ။ ဤကား စာအုပ်ကြော်ငြာ ဖြစ်၏။)

 

တစ်နှစ်တင်းတင်းပြည့်ချိန် ကမ္ဘာလုံးကြီး သည်အမှတ်ကို ပြန်ရောက်လာသည့် ၃၆၅ ရက်မှာ သည်အမှတ် တစ်နေရာ တည်း ဖြစ်နေသည့်အတွက် ၃၆၅ ရက်ကို မူတည်တွက်ထားသည့် ကမ္ဘာသုံးပြက္ခဒိန်မှ ရက်များနှင့် ကိုက်ညီနေခြင်း ဖြစ်၏။ နေလုံးကြီး မိန်ရာသီမှ မိဿရာသီသို့ ကူးပြောင်းချိန်မှာ နှစ်စဉ် ဧပြီလ (၁၄) ရက်ဖြစ်သည့်အတွက် သင်္ကြန် ကျရက်မှာ ဧပြီ (၁၄) ဖြစ်နေရခြင်း ဖြစ်သတည်း။

 

သို့သော် မြန်မာပြက္ခဒိန်မှ ရက်များမှာမူ ဆိုခဲ့ပြီးသည့်အတိုင်း လသွားနှုန်းကို မူတည်တွက်ထားတာ ဖြစ်သောကြောင့် ထိုတစ်နှစ်ကာလနှင့် ကွက်တိမဖြစ်ဘဲ ရက်များ ရှေ့တိုးနောက်ဆုတ် ဖြစ်နေရခြင်း ဖြစ်သတည်း။

 

ဤသည်ပင်လျှင် သင်္ကြန်ကာလကို မြန်မာပြက္ခဒိန်ပေါ်၌ ပုံသေမှတ်လို့ မရနိုင်သည့် အချက်လည်း ဖြစ်သတည်း။

 

 

(၃) လထပ်ရက်ငင်

 

 

ဂွကျသည်မှာ ရှေးရိုးစွဲသမားများ ဖြစ်၏။

မြန်မာပြက္ခဒိန်၏ လထပ်ရက်ငင် ပြဿနာကို ရှေးယခင်နှစ်များစွာကတည်းက နက္ခတ္တဗေဒပညာရှင်တို့အကြား အငြင်း ပွားခဲ့ကြ၏။ အကြီးအကျယ်တိုက်ပွဲများ ဖြစ်ခဲ့ကြ၏။ သို့တိုင် ယခုထိ ပြေလည်အောင် မဖြေရှင်းနိုင်သေးပါ။

အဘယ်ကြောင့်ဟူမူ သံခမောက်ဆောင်းထားသူများကြောင့် ဖြစ်သတည်း။

 

ပြက္ခဒိန်တွက်တယ်ဆိုတာ နေသွားနှုန်းနှင့် လသွားနှုန်းပေါ် မူတည်တွက်တာ ဖြစ်၏။

နေနှင့်လသည် သည်ကနေ့တစ်မျိုး၊​ မနက်ဖြန်တဖုံ သွားနေတာမဟုတ်။ နေနှင့်လသွားနှုန်းသည် နှစ်ပေါင်းထောင်ချီလျှင် အနည်းငယ် ပြောင်းသွားသည့်တိုင် (မည်ကဲ့သို့ပြောင်းသည်ကို သိလိုသူများ ကျွန်ုပ်၏ မြန်မာပြက္ခဒိန်စာအုပ်ကို ဝယ်ဖတ် ကြည့်ပါ။) မသိသာလှပါ။

 

သို့အတွက် မြန်မာပြက္ခဒိန်တွက်တာ ဘာမှ မခဲယဉ်းပါ။ အခု ကွန်ပြူတာခေတ်ကြီးထဲတွင် ပိုလို့တောင်လွယ်သေးသည်။ ပရိုဂရမ်သမားများ ကောင်းကောင်းလုပ်တတ်၏။ ကိုရန်နိုင်အေးတို့ ကောင်းကောင်းလုပ်တတ်၏။

 

ယခုတော့ မြန်မာပြက္ခဒိန်ကို ကြိုတွက်လို့မရ။ တစ်နှစ်စာ တစ်ခါသာ တွက်လို့ရသည် ဆို၏။ Bullshit

ရီစရာကောင်းလိုက်တာခင်ဗျာ။

 

၎င်းတို့က အဘယ်ကြောင့် မြန်မာပြက္ခဒိန်ကို ကြိုတွက်လို့မရဟု ပြောပါသနည်း။

မလိုလားအပ်သော တင်းကြပ်လှသည့် စည်းမျဉ်းစည်းကမ်းကြီးများကြောင့် ဖြစ်၏။

ထို စည်းမျဉ်းစည်းကမ်းကြီးများကိုသာ လွှင့်ပစ်လိုက်ပါ။

ပြက္ခဒိန်ဟူသည် သင်္ချာအတွက်အချက်မျှဖြစ်၍ အဘယ်ကြောင့် မဖြစ်နိုင်ရမည်နည်း။

 

ဤသည်မှာ ဗုဒ္ဓဘာသာနှင့် ဆက်နွယ်နေသဖြင့် ကျွန်ုပ် အကျယ်အကျယ် မပြောလိုပါ။ 

ယခင်ပို့စ်၌ ဖော်ပြခဲ့သလို ဗုဒ္ဓဂွစာဖြစ်သည့် ကျွန်ုပ်အတွက်မူ ဤအရာများသည် ဘာမှ အဓိပ္ပာယ်ရှိသော အရာများ မဟုတ်ပါ။

လွယ်နေတာကို ခက်အောင်လုပ်ထားခြင်းမျှသာ ဖြစ်၏။

 

ကိုယ်တတ်နိုင်သည့် ကိစ္စမဟုတ်၍ ထားလိုက်ပါတော့။

ကျွန်ုပ်သာ စိတ်ရှိလက်ရှိပြောလိုက်ရလျှင် ဟို မြောက်ဥက္ကလာက ဘုန်းကြီးကျောင်းနှင့် ဆေးရှူနေသည့် ဘုန်းကြီးတွေပါ ပါကုန်လိမ့်မည်။

 

သင်္ကြန်အကြောင်း ပြီးပါပြီ။ 

ပို သိချင်သေးသူများ ကျွန်ုပ်၏ “မြန်မာပြက္ခဒိန်” စာအုပ်ကို ဝယ်ဖတ်ကြပါ။ 

 

 

ကျေးဇူးတင်ပါသည်။

 

 

အေးငြိမ်း

၁၁ ဧပြီလ၊ ၂၀၂၃

ကျွန်ုပ်နှင့် သင်္ကြန်အကြောင်း (၁)

(၁)

 

၂၀၀၅ ခုနှစ်၊ ဧပြီလ၏ တစ်ခုသော တနင်္ဂနွေနေ့တွင် ဆလိမ်ဖြစ်နေရှာသည့် ကိုဂိုင်ကြီးသည် ကျွန်ုပ်ထံ အလည် ရောက်လာလျက် “နေစမ်းပါအုံးဗျာ၊ ကျုပ်တို့သင်္ကြန်ရက်က ဘာဖြစ်လို့ ခရစ်တော်ရဲ့ ဧပြီလ ၁၄ ရက်နေ့မှာမှ ကျရတယ် ဖြစ်နေတယ်ဆိုတာ ရှင်းစမ်းပါအုံး” ဟု ဆိုလေ၏။

 

ကျွန်ုပ်လည်း တတ်သည့်ပညာ မနေသာသည်နှင့် ကိုဂိုင်ကြီးကို သင်္ကြန်ဟူသည် အဘယ်ဖြစ်သည်ကို ရှင်းပြရလေသော ဟူသတတ်။

 

(၁။ လွန်ခဲ့သော ၁၇ နှစ်ခန့်ကလည်း ဤလိုမျိုး ပို့စ်တစ်ခု ရေးခဲ့ပါသေး၏။ သို့သော် ၂၀၀၅ ခုနှစ်က ဖေ့စ်ဘုတ်မှာ မမွေးသေးသည် ဖြစ်၍ အသင်တို့ ဖတ်မိမည်မဟုတ်သည့်အတွက် ယခု ငယ်ရုပ်ဆင် တစ်သွင်ဆန်းလိုက်ရခြင်း ဖြစ်ကြောင်း။ 

၂။ နောက်တစ်ကြောင်းမှာ သင်္ကြန်ကာလဖြစ်၍ သင်္ကြန်နှင့် ပတ်သက်သည်များကို ဟိုလူရေး၊ ဒီလူရှယ်ဖြင့် ခပ်စိပ်စိပ် တွေ့လာရသဖြင့် မှန်ကန်သော သတင်းအချက်အလက်များ ရစေရန် ရည်သန်၍ ရေးလိုက်ရခြင်း ဖြစ်ကြောင်း။

၃။ ၂၀၂၂ ဧပြီလကလည်း နာမည်ကြီး ဘုန်းကြီးတပါး ပေါက်တတ်ကရများ ရေးထားသည်ကိုတွေ့ရ၍ သင်္ကြန်အကြောင်း တစ်ခါ ရေးခဲ့ဖူးသေးကြောင်း။) 

 

(၂)

 

“သင်္ကြန်” ဟူသည် သင်္ကန္တ မှ ဆင်းသက်လာ၏။ “ကူးပြောင်းခြင်း” ဟု အဓိပ္ပာယ်ရ၏။

အဘယ်ကူးပြောင်းခြင်း ဖြစ်သနည်း။ တစ်နှစ်မှ တစ်နှစ်သို့ ကူးပြောင်းခြင်း ဖြစ်၏။

တစ်လမှတစ်လသို့ ကူးပြောင်းခြင်း၊ တစ်ရက်မှ တစ်ရက်သို့ကူးပြောင်းခြင်းများသည်လည်း သင်္ကြန်ပင် ဖြစ်၏။

နှစ်ကူးသင်္ကြန်၊ လကူးသင်္ကြန်၊ ရက်ကူးသင်္ကြန် စသဖြင့် ဖြစ်၏။ သို့သော် နှစ်ကူးသင်္ကြန်ကိုသာ ပွဲလမ်းအနေနှင့် ကျင်းပ ကြပြီး လကူးသင်္ကြန်၊ ရက်ကူးသင်္ကြန်တို့ကို မလုပ်ကြ။ အိန္ဒိယပြည်၏ အချို့သောပြည်နယ်များတွင်မူ တစ်ရာသီမှ တစ်ရာသီသို့ ကူးပြောင်းသည့်အခါ လကူးသင်္ကြန်ပြုလုပ်ကြ၏။

 

နှစ်ကူးချိန်တွင် ဗုဒ္ဓဘာသာဝင်တို့သာ သင်္ကြန်လုပ်သည်မဟုတ်။ အခြားဘာသာဝင်တို့လည်း နှစ်ကူးပွဲ လုပ်ကြသည်သာ ဖြစ်၏။ တရုတ်နှစ်ကူးဆိုလျှင် စင်ကာပူမှာ (၂) ရက်ပိတ်၏။ ဇန္နဝါရီလ (၁) ရက်နေ့တွင် နှစ်ကူးပိတ်၏။ ဒီဇင်ဘာ ၃၁ ည သန်းခေါင်၊ ဇန္နဝါရီ (၁) ရက်နေ့အကူးတွင် ဟက်ပြီး နယူးရီးယားကြ၏။ 

 

ပြဿနာက သင်္ကြန်မဟုတ်။ 

သင်္ကြန်နှင့်အတူ ကပ်ပါလာသည့် သိကြားမင်းကျွဲစီးဆင်းသည်၊ နတ်သမီးတို့က ဗြဟ္မာမင်း၏ ဦးခေါင်းကိုကိုင်သည် စသည်တို့ ဖြစ်၏။ ဟိုဆရာကြီးတစ်ယောက်ကလည်း “သင်္ကြန်ဂျင်း” ဆိုကာ ရေးထားသေး၏။ သိပ်အဆင်မပြေလှပါ။

 

https://m.facebook.com/story.php?story_fbid=pfbid037AnsaJHgz2to4EuQAhkc9VL7yyzNfSNxxCq4duCRpMvCGL7huECUeU2Qt4oaedBvl&id=100002234690173&mibextid=Nif5oz

 

လူကြီးတွေကလည်း ကြားဖူးနားဝနှင့် သင်္ကြန်အကြောင်း မဟုတ်ကမဟတ်ကတွေ ပြော၏။ ကလေးတွေကမှတ်၏။ သူတို့ မိဘနေရာ ရောက်လာတော့ သူတို့သားသမီးများကို မဟုတ်ကမဟတ်က ပုံပြင်တွေ လက်ဆင့်ကမ်းပြန်၏။ သို့နှင့် မဟုတ်ကမဟတ်က သင်္ကြန်ဇာတ်လမ်းများသည် လူအများကြား ပျံ့နှံ့နေလေတော့သတည်း။

 

အသင်တို့အား အတော်ဒုံးဝေးသူများဟု ကျွန်ုပ်က ပြောလျှင် စိတ်ဆိုးကြလိမ့်ဦးမည်။

သင်္ကြန်က သင်္ကြန်၊ သိကြားမင်းက သိကြားမင်း။ ဘာမှမဆိုင်ပါ။

သင်္ကြန်စာထဲတွင်ဖတ်ကြည့်ကြပါ။ သင်္ကြန်မင်းဟုသာ ဖော်ပြထား၏။ သင်္ကြန်မင်းကို လူပြိန်းနားလည်အောင် ပြောရ လျှင် နေမင်းပင် ဖြစ်၏။ ယခု ဆရာဦးအောင်သန်းတို့၏ သင်္ကြန်စာတွင် သင်္ကြန်မင်းဟုတောင်မရေး။ ‘ဘာဏုရာဇာ မည်သော တနင်္ဂနွေဂြိုဟ်မင်းသည်’ ဟုသာ ဖော်ပြထား၏။ တနင်္ဂနွေဂြိုဟ်မင်း ဆိုသည်မှာ တနင်္ဂနွေဂြိုဟ် (နေ) ပင်ဖြစ်၏။

 

သင်္ကြန်မင်းက ကျွဲစီးဆင်းသည်၊ ဘီလူးစီးဆင်းသည်၊ လက်ယာဘက်က ခရုသင်းကိုင်သည်၊ လက်ဝဲဘက်က ရေချမ်းအိုး ကိုင်သည် စသည်တို့မှာ အဟောအတွက် ဖော်ပြထားသော နိမိတ်ပုံများသာဖြစ်၏။ တကယ့် သင်္ကြန်မင်းကြီးက လယ်ထွန်ရာတွင်သုံးသည့် တကယ့်ကျွဲကို စီးဆင်းလာတာ မဟုတ်။

နေလုံးကြီးက အဘယ်သို့လျှင် ကျွဲကိုစီးပါမည်နည်း။ 

နည်းနည်းပါးပါးလည်း ဦးဏှောက်ကလေးဘာလေး သုံးကြပါဘိ။

 

နှစ်ကူးအခါသမယတွင် ကမ္ဘာပေါ်မှ လူမျိုးပေါင်းစုံတို့သည် သူတို့ဓလေ့ထုံးစံအရ ပျော်ကြပါးကြ၏။ ဤသည်မှာ ဘာအပြစ် ရှိပါသနည်း။ သို့သော် သင်္ကြန်ကို အခွင့်ကောင်းယူကာ ကမြင်းကြောထကြတာ သူတို့ကိစ္စသာဖြစ်ပြီး သင်္ကြန် ၏ အပြစ်မဟုတ်ပါ။ သင်္ကြန်၌ တစ်ဦးနှင့်တစ်ဦး ယဉ်ကျေးစွာ ရေပက်ကစားတာ ဘာဖြစ်ပါသနည်း။ ဤသည်မှာ အဘယ် ဗြဟ္မဏကမှလာပြီး တိုက်တွန်းတာမဟုတ်။ ဟိုး ပုဂံခေတ်ကတည်းက ပျော်ခဲ့ကြတာ ဖြစ်၏။ ရေပက်ကစားသည်ဆိုခြင်း မှာ မီးသတ်ပိုက်နှင့်ထိုး၍ ကမြင်းကြောထတာ မဟုတ်ဘဲ နှစ်ဟောင်းမှ အညစ်အကြေးတွေ ကုန်ပျောက်ပါစေဟူသည့် နိမိတ်ပုံဖြင့် တစ်ဦးနှင့်တစ်ဦး သပြေခက်ဖြင့် ရေပက်တာဖြစ်၏။ မည်သည့် ဗြဟ္မဏကမှလာပြီး ဂျင်းထည့်တာမဟုတ်။

 

မြန်မာတို့သည် သပြေပန်းကို အောင်ပန်းအဖြစ် မှတ်ယူကြ၏။ သို့အတွက် နှစ်ကူးအခါသမယတွင် ဘေးဘယာတို့ ဝေးကွာပါစေ၊ အောင်မြင်ခြင်းတို့ဖြင့် ပြည့်စုံပါစေ၊ (၇) ရက်သားသမီးအပေါင်း ငြိမ်းချမ်းပါစေဟူသော ရည်ရွယ်ချက်၊ စိတ်စေတနာဖြင့် အတာအိုးထိုးကြခြင်းဖြစ်၏။ အတာအိုးတွင် သပြေခက်၊ အုန်းခက်၊ ဇီးခက်စသဖြင့် ထိုးကြ၏။ မြေရေအိုးစိမ်းစိုစိုလေးတွင် သပြေခက်၊ အုန်းခက်တို့ဖြင့် လှပနေသည်မှာ ကျက်သရေမရှိပါသလော။ မလှပါသလော။ အဲသဟာ ဘာမှားပါသနည်း။

 

(၃)

 

ကျွန်ုပ်ကတော့ မာမာအေး၏ မင်္ဂလာ (၁၂) ပါးသီချင်းကို အတော်ကြိုက်ပါသည်။ စာသားကလေးတွေကိုရော သံစဉ်ကိုပါ နှစ်သက်၏။ မကြာမကြာလည်း နားထောင်ဖြစ်ပါ၏။

 

ရဝိန္ဒုဒသန နေလပြတဲ့ မင်္ဂလာအတည်

ကဏ္ဏဝိဇ္ဈဏ နားကို သ,ခြင်း ပြုပါသည်

 

ဤမင်္ဂလာ (၁၂) ပါးဟူသည် ဘယ်ကလာတာနည်း။ အသင်တို့သည် အာဝါဟ၊​ ဝိဝါဟမင်္ဂလာကို ပြုကြကုန်၏။ အနှီ အာဝါဟ၊ ဝိဝါဟ ကရော သင်တို့ မြန်မာဗုဒ္ဓဘာသာယဉ်ကျေးမှု ဟုတ်ပါသလော။

 

အသင်တို့သည် နာမည်ပေး ကင်ပွန်းတပ်မင်္ဂလာဟု ပြုကြကုန်၏။ အဲသဟာရော၊ ဘယ်ကလာတာဟု သင်တို့ ထင်ပါသနည်း။

 

အနီးစပ်ဆုံးပြောရလျှင် အခု အသင်တို့ သင်္ကြန်ကျတာ၊ တက်တာ၊ နှစ်ဆန်းတစ်ရက်သည် ဘယ်နည်းကို မှီ၍ တွက်သည်ကို အသင်တို့ သိပါသလော။

 

ယုတ်စွအဆုံး၊ အသင်တို့ ဘုန်းကြီးများ ဝါဝင်၊ ဝါထွက်၊ ဝါကပ် လုပ်နေသည့် ပြက္ခဒိန်သည် အသင်တို့ မြန်မာများ တီထွင်ခဲ့သည့် ပြက္ခဒိန်ဟု ထင်ပါသလော။ 

 

အသင်တို့သည် ဗြဟ္မဏဝါဒ အယူအဆများကိုလည်း ယူသုံးသေး၏။ ဗြဟ္မဏဝါဒကိုလည်း စော်ကားမော်ကား လုပ်သေး၏။ အရိပ်နေနေ၊ အခက်ချိုးချိုး ဆိုသည်မှာ သင်တို့ကို ခေါ်တာ ဖြစ်မည်။

အာဂလူများပါပေ။

 

ဤသို့ဆိုလိုက်သဖြင့် ကျွန်ုပ်ကို ဗြဟ္မဏတစ်ဦးဟု မထင်ပါနှင့်။ ကျွန်ုပ်သည် ဗြဟ္မဏဝါဒီတစ်ဦးမဟုတ်ပါ။ ကျွန်ုပ်သည် ဗုဒ္ဓ၏ အဆုံးအမများအတိုင်း လိုက်နာကျင့်သုံးနေထိုင်သည့်တိုင် ကျွန်ုပ်ကို ဗုဒ္ဓဘာသာဝင်တစ်ဦးဟုလည်း မဆိုနိုင်ပါ။ အဘယ်ကြောင့်ဆိုသော် ကျွန်ုပ်သည် အခြား ဗုဒ္ဓဘာသာဝင်တို့ ပြုလုပ်နေသည့်အရာများကို တစ်ခုမှ မလုပ်သောကြောင့် ဖြစ်၏။ သို့ကြောင့် ကျွန်ုပ်ကို “ဗုဒ္ဓဂွစာ” ဟု ခေါ်မည်ဆိုက ခေါ်နိုင်မည်ဖြစ်ကြောင်း။

 

ကျွန်ုပ်ဤသို့ ရေးလိုက်သဖြင့် ဆဲလိုသူများ များစွာပေါ်လာပါလိမ့်မည်။

ဤကိစ္စနှင့်ပတ်သက်၍ အသင်တို့ မကျေနပ်ပါက ကျွန်ုပ်ကို 

- တိုးတိုးတမျိုး၊ ကျယ်ကျယ်တဖုံ၊ 

- ဒဲ့တမျိုး၊ သွယ်ဝိုက်၍ တဖုံ။ 

- ရှေ့တွင်ပေါ်တင်တမျိုး၊ မကြားတကြားလုပ်၍ တဖုံ၊ ကွယ်ရာ၌တစ်နည်း။

 

နည်းပေါင်းစုံသုံးကာ ဆဲကြပါလေကုန်လော့။

 

မိဖုရားစောလုံ

-----------------

 

ဆန်းထူးဝါနီအရွက်ရော်ကာမြန်းချိန်မို့

တန်ခူးရာသီမဖြင့်

မန်းနဖူးအညာဆီ အထက်မနော်

လွမ်းလောက်ပါရဲ့

သွန်းမြူးဖြာစီ ၊ ကရမက် အကျော်အဖြော်တွေ

ဖျန်းပါလို့ အခက်အလက် တော်ရာလျော်ရာ

ပန်းတွေနှင့် ခူးသမို့ ချွေးကပ်တယ်

စက်တော်ရာ စခန်းမှာဖြင့် ဖူးလို့ရေသပ္ပာယ်။

 

ပြန်လှန်ဆပြန်တော့ သင်္ကြန်ကျချိန်ပေါ့

ယမန်သမယဆီက

ပုဂံသမ္မတ ရှင်ဘုရင် သားမွာဘပါတဲ့

ဆောင်းမှနွေအလည် ဘုန်းရောင်တော်ပြနေကျ 

မောင်းမရွေညီ မဟေသီ

သုံးထောင်ကျော်မျှရယ်နှင့်

သည်လနွေရာသီမဖြင့်

ဆွေကလျာ မဒီတွေကို

ချစ်စိတ်စမ်းလိုတဲ့ အားရယ်နှင့်

ဧရာဝတီ မြစ်ဆိပ်ကမ်းတစ်ခိုသို့

သွားပါလို့ ရွှေနန်းအစဉ်အလာ 

ရေဖျန်းမင်္ဂလာ ကစားစဉ်က

 

ချစ်အားတော် ဗလောင်ဆန်လို့မို့

တစ်စောင်စံ စောလုံပက်စဉ်က

သွက်သွက်လည် ကြမ္မာငင်ဖို့

ရက်စက်တယ် ခမျာထင်လို့မို့

အစာတွင် အဆိပ်သေမဲ့ဆေးရယ်နှင့်

မဟာဘုရင်ကို တိတ်တိတ်သေဟဲ့လို့ 

ကျွေးလေတော့ ပြစ်ရေးတော်

ရာဇဝတ်ကယ်နင့် ကွပ်ညှပ်ပုံ

တအာဏာကြောင့် ခမျာမှာ 

ခန္ဓာတောင်ဆုံးရှာသတဲ့

တိတ်ထုံးရာဇဝင်ကိုဖြင့်

ဆရာရှင်ပြန်လှန်လို့ ဟောရတော့

တောကြီးအလယ်မှာနော်ကွယ်

မနောသတိ ဘောမချိအောင်ပေါ့

မောမိသကွယ်။

 

သေလမ်းဝင်မှောင့်ရှာတဲ့ တစ်မိရယ်ကြောင့်

မွေနန်းရှင် မောင့်မှာဖြင့် မချိပြီမို့ စောင့်ပါခလှည့် 

စောင့်ပါခလှည့်ရယ်လို့

တရလေရှာသကွယ်

သမ္မတ နေလာနွယ်မှာဖြင့် ဖိုဗျာပါအများ

ဘဝသေပါဟယ်လို့ ဆိုကာငိုကာမနား။

 

ညချမ်းခါတွင်

ပလျှမ်းကာ အသာဝင်တဲ့

လစန်းရတနာ အသွင်သို့

ဘမရာတစ်ပင် မဟေသက်လျာတစ်ပါးကိုလ 

ငါဘုရင် ရေပက်တာဖြင့်မှားပေါ့ဟဲ့လို့ 

တရားသံဝေ ဖြေမဖျောက်နိုင်တဲ့ 

ရွှေပေါက္ကံ မြန်မာမင်းလိုပေါ့

ခါသင်္ကြန် နွေကပဲရယ်လို့

ရေပွဲမှာ အပျော်တွေ စည်မှဖြင့်

ကတော်ဒေဝီ အရှက်ကွဲအောင်ပေါ့

မျက်နှာမဲ ၊မျက်နှာဖြူ ၊

ပက်သူတွေကလဲ ပေါပေသမို့

မန်းစက်ရတနာ ပလ္လင်မလေ

ဘန်းစင်္ကြာရှင်တွေ စောစေဖို့

ကမ္မဌာန်းပြဆရာမှာ

ဝမ်းမသာ့တသာနှင့် ဟောလိုက်ပါရဲ့

ဒေါပုံအလှည့် သံသရာရေပြင်မှာ

ကြွားသူတို့ကဖြင့် သဘောမဆုံသနဲ့

မခံပါချင်လျှင်လည်း မကစားကြလေနှင့်

ချောဂုဏ်နဲ့နွဲ့ရှာတဲ့

စောလုံရဲ့ပုဂံရာဇဝင်တရား။

 

(လေးချိုးကြီး - သခင်ကိုယ်တော်မှိုင်း )

(ဤကဗျာကို အင်တာနက်မှ ယူထားတာဖြစ်၍ ချွတ်ချော်မှားယွင်းမှုများရှိပါက ပြင်ဆင်ဖတ်ရှုကြပါရန်)

 

အေးငြိမ်း

၉ ဧပြီ၊ ၂၀၂၃

 

(ဤပို့စ်ကို စတင်ရေးတာ ၆ ရက်နေ့ကတည်းက ဖြစ်၏။ နေ့ရောညပါ အလုပ်များ အလွန်ရှုပ်လျက်ရှိသောကြောင့် ယခုမှ အပြီးသတ်နိုင်တော့သည် ဟူလို။)