ကဆုန်လပြည့်နှင့် ဝိသာခါနက္ခတ်တို့အကြောင်း (၂)

တချို့နက္ခတ်ကိန်းဂဏန်းတွေက ကိုယ့်ဆီမှာမရှိတော့ တွက်ရတာသိပ်အဆင်မပြေ။

ဒေါင်းလို့ရထားသည့် ဂြိုဟ်သွားပြက္ခဒိန်တွေက သာယနစနစ်အတွက်ဆိုတော့ အရှေ့တိုင်းကသုံးသည့် နိရာယနစနစ် ပြန်ပြောင်းဘို့ အာယနအံသာများ လို၏။ 

 

ကျွန်ုပ်ထံ၌ရှိသည့် အာယနအံသာဇယားများက ၂၀ ရာစုအတွက်သာဖြစ်ပြီး ၂၁ ရာစုအတွက်မရှိ။ အင်တာနက်ကရှာ ဒေါင်းတော့ အိန္ဒိယ website များမှ KP အာယနအံသာဇယားများရ၏။ သို့သော် ကျွန်ုပ်တို့ မြန်မာအာယနအံသာများနှင့် မတူသည့်အတွက် ကျွန်ုပ်အနေနှင့် ဘဝင်မကျ။ မသုံးချင်။

 

သို့အတွက် ထူးပါဘူးကွာဟု အချိန်ကုန်ခံကာ ကွကိုယ်တွက်ရလေတော့၏။ ကျွန်ုပ်တွက်ထားသည်များကို မိတ်ဆွေများ အား ပြန်လည် ဝေမျှလိုက်ပါ၏။ အလိုရှိသူများ ယူငင်သုံးနိုင်ပါ၏။

 

ဤတွင် ကျွန်ုပ် သုတေသနပြုထားသည်များကို မိတ်ဆွေများအား ပြန်လည် ဝေငှလိုက်ပါ၏။

 

ပထမ - ကျွန်ုပ်က ဗုဒ္ဓဘာသာတိုင်းပြည်များမှ ဗုဒ္ဓနေ့ကျင်းပသည့် နေ့ရက်များကို စူးစမ်းကြည့်၏။

ဤတွင် စင်္ကာပူ၊ မလေးရှား၊ ဗီယက်နမ်နှင့် ထိုင်းနိုင်ငံများ၏ ဗုဒ္ဓနေ့များမှာ အတော်များများတူပြီး မြန်မာပြည်နှင့် သီရိလင်္ကာနိုင်ငံများမှ ဗုဒ္ဓနေ့များမှာ အတော်များများ ကွဲလွဲနေသည်ကို တွေ့ရ၏။ အထူးသဖြင့် သီရိလင်္ကာမှ ဗုဒ္ဓနေ့များမှာ အတော့်ကို ကိုးယိုးကားယားနိုင်လေ၏။ ၂၀၁၅ ခုနှစ်နောက်ပိုင်းတွင် အခြားနိုင်ငံများနှင့် မနီးယိုးစွဲတူလာ သော်လည်း ၂၀၁၅ ခုနှစ်မတိုင်မီနှစ်များက ထိုရက်များကို အဘယ်ကြောင့် ဗုဒ္ဓနေ့ဟု ရွေးထားခဲ့မှန်း ကျွန်ုပ် နားမလည် နိုင်အောင် ဖြစ်မိရ၏။

 

ကျွန်ုပ်က ကဆုန်လပြည့်နေ့အကြောင်း မနေနိုင်မထိုင်နိုင် ပြောပြသည်ကို ကဲ့ရဲ့သင်္ဂြိုဟ် အတင်းဆိုကြကုန်သော အသင် မိတ်ဆွေအပေါင်းတို့အား ဘာတွေမှားနေသလဲဆိုတာ ယခု ကျွန်ုပ်က လက်တွေ့ သက်သေပြပါအံ့။

 

သို့သော်လည်း ဤသည်မှာ နက္ခတ်များ၊ ဂြိုဟ်များနှင့်ပတ်သက်နေ၍ သင်တို့ နားလည်ချင်မှ နားလည်ပါလိမ့်မည်။ သို့သော်ဤသည်မှာ ကျွန်ုပ် ဘာမှတတ်နိုင်သော အရာမဟုတ်။ ဂြိုဟ်နက္ခတ်တို့မပါဘဲ ပြောလို့မရသည့်ကိစ္စဖြစ်၍ ပြောကို ပြောရပါမည်။

 

ကဆုန်လပြည့်နေ့တွင် အမှန်တကယ်လပြည့်တာ ဟုတ်ပါရဲ့လားဟု စူးစမ်းကြည့်သော် မြန်မာပြက္ခဒိန်ပေါ်မှ ကဆုန် လပြည့်ရက်နှင့် ကောင်းကင်ပေါ်မှ လဝန်းကြီး အမှန်တကယ်ပြည့်ဝသည့်ရက်တို့ တိုက်ဆိုင်သည့်ရက်မှာ နည်းပါးလှချေ၏ တကား။

၁၉၉၆ ခုနှစ်က ကဆုန်လပြည့်နေ့သည် မေလ ၁ ရက်နေ့ဖြစ်သော်လည်း အမှန်တကယ်လပြည့်တာ မေလ ၃ ရက်နေ့ ညနေ ၆ နာရီကျမှ ဖြစ်ပါ၏။

၂၀၀၄ ခုနှစ် ကဆုန်လပြည့်နေ့သည် မေလ ၃ ရက်နေ့ဖြစ်သော်လည်း အမှန်တကယ်လပြည့်တာ မေလ ၅ ရက်နေ့ မနက် ၃ နာရီကျမှ ဖြစ်ပါ၏။

 

၂၀၀၆ ခုနှစ် ကဆုန်လပြည့်နေ့သည် မေလ ၁၁ ရက်နေ့ဖြစ်သော်လည်း အမှန်တကယ်လပြည့်တာ မေလ ၁၃ ရက်နေ့ ညနေ ၁ နာရီခွဲကျမှ ဖြစ်ပါ၏။

 

၂၀၀၇ ခုနှစ် ကဆုန်လပြည့်နေ့သည် ဧပြီလ ၃၀ ရက်နေ့ဖြစ်သော်လည်း အမှန်တကယ်လပြည့်တာ မေလ ၂ ရက်နေ့ ညနေ ၄ နာရီခွဲကျမှ ဖြစ်ပါ၏။

 

၂၀၂၃ ခုနှစ် ကဆုန်လပြည့်နေ့သည် မေလ ၃ ရက်နေ့ဖြစ်သော်လည်း အမှန်တကယ်လပြည့်တာ မေလ ၆ ရက်နေ့ သန်းခေါင်ချိန်ကျမှ ဖြစ်ပါ၏။ 

 

အတော့်ကို ဆိုးပါသည်။

 

သဟာဆိုလျှင် ခညားတို့ပြောသည့် မြတ်စွာဘုရားပွင့်တာ လမင်းသည် ဝိသာခါနက္ခတ်နှင့် စန်းယှဉ်သည့်ရက် ဆိုသည်ကို ဆန်းစစ်ကြည့်ကြပါဦးစို့။

 

ဤတွင် ကျွန်ုပ်က ဇယားလုပ်ပြထား၏။ 

အနီရောင်လေးထောင့်ကွက် မဟုတ်သည့် နှစ်များသာ ဝိသာခါနက္ခတ်နှင့် စန်းယှဉ်သောနှစ်များဖြစ်၏။

 

ဤမျှဆိုလျှင် အသင်တို့သည် -

လပြည့်ရက်ထင်ပြီး လမပြည့်သောရက်များတွင် ဥပုသ်စောင့်နေကြရသည်ကိုသော် လည်းကောင်း -

ဗုဒ္ဓရက်ထင်ပြီး ဗုဒ္ဓရက်မဟုတ်သည့်နေ့များ၌ ဘာသာရေးဆိုင်ရာ အခမ်းအနားများကျင်းပ နေကြသည်ကိုသော် လည်းကောင်း -

အနည်းအပါးမျှ ရိပ်မိကြပြီဟု ယူဆပါကြောင်း။

 

ဝမ်းနည်းပါသည်။

 

ကြောင်ရေချိုးသည့်အလုပ်ကို ရပ်တန်းက ရပ်လိုက်ပါပြီ။

 

ကျေးဇူးတင်ပါသည်။

 

အေးငြိမ်း

၃၁ မေလ၊ ၂၀၂၄

ကဆုန်လပြည့်နှင့် ဝိသာခါနက္ခတ်တို့အကြောင်း

နောက်တစ်ခု နည်းနည်းလောက် ပြောပါရစေဦး။

 

ကင်းဝန်မင်းကြီး၏ “တန်ခူး မိဿ၊ စိတြ၊ လနှင့်ယှဉ်ပြိုင်ထွန်း” အစချီ ၁၂ ရာသီ လင်္ကာမှ -

‘တန်ခူးလသည် မိဿရာသီ ဖြစ်၏’ ဆိုသည်မှာလည်း အခါခပ်သိမ်းမမှန်ပါ။ အကြမ်းဖျဉ်းမျှသာ မှန်၏။

မှတ်ရလွယ်အောင်သာ လင်္ကာစီကုံးခဲ့ခြင်းဖြစ်၏။ 

 

ထို့အတူပင် ခိုင်ထူး ၏ ‘ခတ္တာ’ တွင် ‘သိဟ်ရာသီ ဝါခေါင်မိုးနဲ့ လှမ်းလာခဲ့တော့ ခတ္တာရေ’ ဆိုရာ၌လည်း သိဟ်ရာသီနှင့် ဝါခေါင် မတူပါ။ 

 

နောက်တစ်ယောက်တော့ အဆိုတော်နာမည်မသိ။ ‘လက်ပံပွင့်ကောက်’ သီချင်းထဲက ‘နွေမိန်တပေါင်း . . နေရှိန်လောင်း . . ရွက်ဟောင်းကြွေကျ . . မြေခခဲ့ပြီကွယ် . . ဒန်တန် ဒန်တန့်တန် တန့်တန်’ ဆိုသည့်အထဲက နွေမိန်တပေါင်း ဆိုသည်မှာလည်း ထို့အတူပင် ဖြစ်၏။ မိန်ရာသီနှင့် တပေါင်းလ တူချင်သည့်အခါ တူသည်။ တူချင်မှလည်း တူမည်။

 

ရှေးပညာရှိကြီးများကလည်း မြန်မာနှစ်တစ်နှစ်၏ အစဦးကို တန်းခူးလဆန်း (၁) ရက်နေ့မှ စ စေချင်ခဲ့ကြ၏။

တန်ခူးလနှင့် မိဿရာသီ တထပ်တည်း ဖြစ်စေချင်ခဲ့ကြ၏။

သို့သော် မလွယ်ပါ။ (အိန္ဒိယက အချို့သောပြည်နယ်များကမူ တစ်လ တစ်ရာသီ အတိအကျ ယူကြ၊ လနာမည်ကိုလည်း တခြားနာမည်မပေးတော့ဘဲ မိဿလ၊ ပြိဿလ စသဖြင့် ရာသီနာမည်များကိုသာ ပေးလိုက်ကြ၏။ ဤသို့ဖြင့် လနှင့် ရာသီ တစ်ထပ်တည်း ဖြစ်သွားတော့၏။)

ဂြိုဟ်နက္ခတ်တွေအကြောင်း နားမလည်ဘဲ ဤကိစ္စကို ရှင်းပြရန် မလွယ်ပါ။

 

မြန်မာနှစ်တစ်နှစ်တွင် တန်ခူးအစ၊ တပေါင်းအဆုံး ၁၂ လ ရှိသည်ဟု သင်တို့ ထင်ပါလိမ့်မည်။ မမှန်ပါ။ မှားပါသည်။ အဘယ်ကြောင့်ဆိုသော် တစ်နှစ်ဆိုသည်မှာ ကမ္ဘာလုံးကြီးက နေကို တစ်ပတ်တင်းတင်း ပတ်မိသည့်အချိန် ၃၆၅ ရက် ဖြစ်ပြီး မြန်မာပြက္ခဒိန်မှ တစ်နှစ်မှာ ကောင်းကင်ပေါ်မှ လစန္ဒာက ကမ္ဘာလုံးကြီးကို ၁၂ ပတ်တင်းတင်း ပတ်မိချိန် ဖြစ်သောကြောင့်တည်း။ ဤရက်နှစ်မျိုးတို့သည် တစ်နှစ်လျှင် ၁၁ ရက်လောက် ကွာ၏။ မြန်မာပြက္ခဒိန်သည် နေနှင့်လ နှစ်မျိုးကို မူတည်တွက်သဖြင့် နေလသွားပြက္ခဒိန် (Lunisolar Calendar) ဖြစ်ကြောင်း ယခင် ပို့စ်များ၌ ရှင်းပြခဲ့ပြီ။

 

သင်္ကြန်ကျချိန်သည် မိဿရာသီအစဖြစ်၏။ ဤရက်မှစ၍ ရေတွက်လိုက်လျှင် ရက် ၃၀ ပြည့်သောနေ့၌ မိဿရာသီ ဆုံး၏ဟု အကြမ်းဖျဉ်း မှတ်နိုင်၏။ 

 

မြန်မာသက္ကရာဇ် ၁၃၇၅ ခုနှစ် (ခရစ်နှစ် ၂၀၁၄) တွင် တန်ခူးလပြည့်နေ့၌ သင်္ကြန်ကျ၏။ ထို့ကြောင့် မိဿရာသီသည်  ထိုနေ့မှ စ၏။ ထို့ကြောင့် ၁၃၇၅/၁၃၇၆ ခုနှစ်တွင် မိဿရာသီ၌ တန်ခူးလက ၁၄ ရက်၊ ကဆုန်လက ၁၆ ရက် ပါ၏။

 

မည်မျှဆိုးသနည်းဟူမူ အချို့နှစ်များတွင် တန်ခူးလ၌ သင်္ကြန်မကျဘဲ ကဆုန်လ၌ သင်္ကြန်ကျ၏။ ဥပမာ -

၁၃၇၁ ခုနှစ် (ခရစ်နှစ် ၂၀၁၀) တွင် ကဆုန်လဆန်း ၂ ရက်နေ့၌ သင်္ကြန်ကျ၏။ ထို့ကြောင့် မိဿရာသီသည် တန်ခူးလထဲ၌ လုံးလုံးမရှိတော့ဘဲ ကဆုန်လ၌ ၂၈ ရက်၊ နယုန်လ၌ ၂ ရက်ပါလေ၏။

 

၁၃၆၀ ခုနှစ် (ခရစ်နှစ် ၁၉၉၉) တွင် တန်ခူးလဆုတ် ၁၄ ရက်နေ့၌ သင်္ကြန်ကျ၏။ ထို့ကြောင့် မိဿရာသီသည် တန်ခူးလထဲ၌ လုံးလုံးမရှိတော့ဘဲ ကဆုန်လသည် မိဿရာသီ ဖြစ်သွားလေ၏။ ဤနှစ်တွင် မိဿရာသီသည် မိန်ရာသီဖြစ်လျက် အထက်ဖော်ပြပါ နွေမိန်တပေါင်း ဟူသော သီချင်းမှာ တက်တက်စင် လွဲလေတော့သတည်း။

 

မင်းဟာက ဘာလဲကွ။ ကဆုန်အကြောင်းကနေ တန်ခူးကို ဘယ့်နှာကြောင့် ရောက်သွားရသတုံး။ ယခွမ်း

ဟုတ်၊ ဆန္ဒမစောကြပါနှင့်ခင်ဗျား။ ကဆုန်ဆိုတာ တန်ခူးပြီးမှ လာရတာပါ။ အဲသဟာကြောင့် တန်ခူးနေရာလွဲနေရင် ကဆုန်ဆိုတာလည်း ဒက်ဖနိတ်လီး နေရာလွဲတော့မယ်ဆိုတာ ပြောချင်လို့ပါ။

 

ကဆုန်လပြည့် စန်းယှဉ်နက္ခတ် - ဝိသာခါနက္ခတ်

--------------------------------------------------------

 

တန်ခူး မိဿ၊ စိတြ၊ လနှင့်ယှဉ်ပြိုင်ထွန်း။

ကဆုန် ပြိဿ၊ ကောင်းကင်ဝ၊ ထွန်းပ ဝိသာခါ။

 

- ဆိုသည့်လင်္ကာအရ ကဆုန်လ၏ စန်းယှဉ်နက္ခတ်သည် ဝိသာခါနက္ခတ်ဖြစ်သည် ဆိုကြပါစို့။ 

စန်းယှဉ်နက္ခတ်ဆိုတာကို နည်းနည်းလောက်ရှင်းပြပါမည်။

 

ကောင်းကင်တွင် ကြယ်နက္ခတ်များသည် နေစကြာဝဠာကြီးမှ အလင်းနှစ် သန်းပေါင်းများစွာတွင် ရှိကြသဖြင့် ကမ္ဘာမှ ကြည့်လိုက်လျှင် ဘယ်ကိုမှ မရွေ့ပဲ တည်မြဲနေသကဲ့သို့ မြင်ကြရ၏။ ထို့ကြောင့် နေစကြဝဠာထဲမှ ဂြိုဟ်များ၏ တည်နေရာကို တွက်သည့်အခါ ထို ကြယ်နက္ခတ်များကို မူတည်ထား တွက်ကြ၏။

 

စန်း ဆိုသည်မှာ (ချစ်သူ့မျက်နှာနှင့်တင်စားသည့်) ကောင်းကင်ပေါ်မှ လပြည့်ဝန်းကြီး ဖြစ်၏။

စန်းယှဉ်နက္ခတ်ဆိုသည်မှာ ထိုလမင်းကြီး ရောက်ရှိရာနေရာမှ နက္ခတ်ကို ခေါ်၏။

ကဆုန်လ၏ စန်းယှဉ်နက္ခတ်ဆိုသည်မှာ ကဆုန်လပြည့်နေ့တွင် လမင်းကြီး ရောက်ရှိနေသော နက္ခတ်ကို ဆိုလိုခြင်း ဖြစ်သတည်း။

 

သို့ဆိုလျှင် တန်ခူးလသည် မိန်ရာသီထဲရောက်လိုက်၊​ မိဿရာသီထဲရောက်လိုက် ခုန်ပေါက်ပြေးလွှားနေသည် ဖြစ်ရာ (လင်တာဝန်ကျရာနောက်သို့ မယားသည် အထုပ်ကလေးဆွဲလျက် တကောက်ကောက်လိုက်နေရသည့်ပမာ) တန်ခူးနောက်ကို လိုက်နေရသော ကဆုန်လသည်လည်း ဘယ်မှာ နေရာအတည်တကျ ရှိပါတော့မည်နည်း။

 

သို့ဆိုလျှင် အသင်တို့ ဗုဒ္ဓနေ့ဟု ကျင်းပနေသော ကဆုန်လပြည့်နေ့ ဆိုသဟာကြီးမှာလည်း သူ့နေရာသူ မှန်မှန်ကန်ကန် ရှိနေသည့် ကဆုန်လပြည့်နေ့ရော ဟုတ်ပါလေရဲ့လား။

 

တူနယ်တယ့်နယ် လဗျောင် . . . 

 

ဆက်ပါဦးမည်။

 

အေးငြိမ်း

၂၉ မေလ၊ ၂၀၂၄

ကျွန်ုပ်သည် ယဥကို သန်းရှာသူတစ်ယောက် ဖြစ်သည် ဆိုခြင်းအကြောင်း

ရှေးလူကြီးများကား အလွန် အမြော်အမြင်ရှိကြပါပေကုန်၏။

၎င်းတို့သည် ကျွန်ုပ် မမွေးမီကတည်းက ကျွန်ုပ်အတွက် စကားပုံတစ်ခု တီထွင်လျက် ထားခဲ့ကြ၏။

၎င်းကားအခြားမဟုတ်။ “အလုပ်မရှိ၊ ယဥသန်းရှာ” ဟူသော စကားပုံပါပေတည်း။

 

ယခင်ကလည်း Vesak Day နှင့် ပတ်သက်၍ ကျွန်ုပ်လိုက်လံရှာဖွေခဲ့ဖူးပါ၏။ ဗုဒ္ဓဘာသာကို ယုံကြည်ကိုးကွယ်ကြသည့် တိုင်းပြည်များသည် Vesak Day ကို အညီအညွတ် တစ်နေ့တည်း၌ ကျင်းပကြသလားဆိုတာကို သိလို၍ ဖြစ်၏။ သို့သော် ဆက်မလုပ်ဖြစ်ဘဲ မေ့မေ့ပျောက်ပျောက် ထားလိုက်မိ၏။

 

ယခု ကဆုန်လပြည့်နေ့အကြောင်း မီးမွှေးမိတော့ ထိုအကြောင်း ပြန်ကောက်မိ၏။

 

ကျွန်ုပ်သည် အချိန်ကုန်ခံ၍ မည်သည့်တိုင်းပြည်များက မည်သည့်နေ့တွင် Vesak Day ကို ကျင်းပသည့်အကြောင်း အနှစ် (၃၀) စာမျှ လေ့လာကြည့်မိ၏။ ဗုဒ္ဓဘာသာတိုင်းပြည်များသည် Vesak Day ကို တစ်နေ့တည်း၌ တညီတညွတ်တည်း မကျင်းပကြဘဲ မိမိတို့ယုံကြည်သည့်အတိုင်း တစ်ကျောင်းတစ်ဂါထာ၊ တစ်ရွာတစ်ပုဒ်ဆန်း ကျင်းပကြသည်ကို မထူးဆန်းစွာပင် တွေ့ရလေ၏။

 

မထူးဆန်းလှစွာပင် မြန်မာပြည်မှ ကဆုန်လပြည့် ဗုဒ္ဓနေ့သည် အခြားနိုင်ငံများမှ Vesak Day များနှင့် ၃ နှစ် သို့မဟုတ် ၄ နှစ် သို့မဟုတ် ၅ နှစ် ကြာသည့်အခါတိုင်းတွင် တစ်ကြိမ်၊ တစ်လမျှ ကွာခြားနေသည်ကို တွေ့ရလေ၏။ 

 

ကျွန်ုပ်သည် ဆက်လက်၍ မြန်မာပြက္ခဒိန်များ၌ ကဆုန်လပြည့်ဟု သတ်မှတ်ထားသောနေ့များသည် အမှန်တကယ် လပြည့်သောနေ့များ ဟုတ်မဟုတ်ကိုလည်း စူးစမ်းမိပြန်လေ၏။

 

ဤတွင် မြန်မာပြည်မှ ကဆုန်လပြည့်နေ့များသည် တကယ်လပြည့်သည့်နေ့များ မဟုတ်ကြောင်းလည်း တွေ့ရပြန်၏။ 

(ဟိ ရိုက်ပေါက်ကတော့ အတော့်ကို နီးနေပြီ။ ဖျား ဖျား)

 

၁၉၉၅ ခုနှစ်မှ ၂၀၂၄ ခုနှစ်များအတွင်း ကဆုန်လပြည့်နေ့သည် ကောင်းကင်ပေါ်မှ လဝန်းကြီးတကယ်ပြည့်သည့်အချိန်နှင့် ကိုက်ညီတာ ၂ ကြိမ်မျှသာ ရှိလေ၏။ Oh my gosh!!!

 

ထို့ပြင် အနှီကဆုန်လပြည့်နေ့၌ လမင်းကြီးသည် ဝိသာခါနက္ခတ်နှင့် တကယ်စန်းယှဉ်သလားကိုလည်း မနေနိုင် မထိုင်နိုင် အနာလိုက်ဇ် လုပ်မိပြန်လေ၏။ စန်းယှဉ်နက္ခတ်ကို ရှာဘို့ရာ ဂြိုဟ်သွားပြက္ခဒိန်လို၏။

 

ကျွန်ုပ်ထံ၌ နှစ် (၅၀) အမေရိကန်ဂြိုဟ်သွား ပြက္ခဒိန်ရှိပါ၏။ သို့သော် ၁၉၀၀ ခုနှစ်ထိသာ ဖြစ်၏။

(၁၀) နှစ်စာ တစ်အုပ် ထုတ်ထားသည့် သံဒိဋ္ဌဂြိုဟ်သွားပြက္ခဒိန် ၅ အုပ်လည်း ရှိ၏။ သို့သော် ၁၉၉၀ ခုနှစ်ထိသာ ဖြစ်၏။ ၂၀၀၀ ခုနှစ်နောက်ပိုင်းနှစ်များအတွက် မရှိ။ ယခွမ်း။

 

သို့အတွက် ၂၀၀၀ ပြည့်နှစ်နောက်ပိုင်းနှစ်များအတွက် အဖီးမီးရီးစ်များ လိုက်ရှာရာ မမျှော်လင့်ပဲ ရတနာသိုက်ကြီးကို တူးဆွမိလျက်သား ဖြစ်လေ၏။ ကျွန်ုပ်လည်း ရွှေအိုးကို ဝင်ခလုတ်တိုက်မိသူကဲ့သို့ ဝမ်းသာအားရ ဒေါင်းလေရာ မနက် ၃ နာရီတီးမှ အိပ်ရလေသော ဟူ၏။ အကျိုးဆက်ကား နောက်တစ်နေ့တွင် သင်တန်းထဲ၌ ရူးကြောင်မူးကြောင် ဖြစ်နေလေသတည်း။

 

ကျွန်ုပ်ရှာဖွေတွေ့ရှိမိသော ရတနာသိုက်ကို မိတ်ဆွေတို့အား ဝေမျှလိုက်ပါသည်။ နှစ်ပေါင်းထောင်နှင့်ချီ ရှိပါသည်။ စိတ်ကြိုက် ဒေါင်းကြပါလေ။ သိပြီးသူတို့လည်း သိပြီးကောင်း သိပြီးကြပါလိမ့်မည်။ ကျွန်ုပ်မူ အခုမှ သိရတာဖြစ်၏။ သို့အတွက် ကျွန်ုပ် တကူးတက သံဒိဋ္ဌပြက္ခဒိန်များ လိုက်ဝယ်နေစရာ မလိုတော့ပြီ။ သို့သော် ၎င်းတို့မှာ သာယနစနစ်အတွက် ဖြစ်သဖြင့် နိရာယနစနစ်ကို ပြန်ပြောင်းဘို့တော့ လိုပါလိမ့်မည်။ 

 

ဟောဒီမှာ ရွှေအိုး link:

https://www.astro.com/swisseph/swepha_e.htm

 

တန်ခူးလသည် မိဿရာသီ မဟုတ်ကြောင်းနှင့် အသင်တို့ ဗုဒ္ဓနေ့ဆိုပြီး ကျင်းပနေသည့် ကဆုန်လပြည့်နေ့အကြောင်း နောက်မှ အပြည့်အစုံ ရေးပြပါမည်။ သို့သော် ကျွန်ုပ်ရေးသည်များကို နားလည်ရန် အသင်တို့မှာ နက္ခတ္တဗေဒဗဟုသုတ အနည်းငယ်တော့ ရှိဘို့ လိုပါလိမ့်မည်။

 

ကျွန်ုပ်သည် လောလောဆယ် ဘာသာပြန်တစ်ခု လုပ်နေ၏။ ပိုက်ဆံ မြိုးမြိုးမြက်မြက် ရ၏။

နေ့ခင်းမှာ စာသင်နေရ၍ ဘာသာပြန်အလုပ်ကို ညဘက်မှ လုပ်ရ၏။

 

ပိုက်ဆံရသည့် ဘာသာပြန်အလုပ်ကို ပစ်ထားပြီး -

ဘာတစ်ပြားမှ မရသည့် (လူများအတွက်လည်း အကျိုးရှိမည်မထင်ပါ) ကဆုန်လပြည့်နေ့အကြောင်းနှင့် အချိန်ကုန်နေသည်မှာ . . .

ယဥကို သန်းရှာနေခြင်း မဟုတ်ပါလော။

 

သည့်အတွက်

“အလုပ်မရှိ၊ ယဥသန်းရှာ” ဟူသော စကားပုံသည် ကျွန်ုပ်အတွက်ကလွဲ၍ အခြားသူများအတွက် မဖြစ်နိုင်ချေပြီတည်း။

 

ကျေးဇူးတင်ပါသည်။

 

အေးငြိမ်း

၂၆ မေလ၊ ၂၀၂၄

ဆရာကြီးတစ်ဦး အတွေးချော်ခြင်း အကြောင်း

ရှေးပဝေသဏီကတည်းက လူများ လက်ခံယုံကြည်လာခဲ့သည့် အကြောင်းအရာတစ်ခုကို ကျွန်ုပ်က ထောက်ပြဝေဖန် လိုက်သည့်အခါ ကြိုက်သူများထက် မကြိုက်သူများက အပုံကြီး ပိုများပါလိမ့်မည်။ အရိုးစွဲနေသည့် အကြောင်းတစ်ခုကို မည်ကဲ့သို့လျှင် နေ့ချင်းညချင်း ပြောင်းနိုင်ပါမည်နည်း။

 

လူ့ဂွစာ ဖြစ်သော ကျွန်ုပ်ကမူ မဟုတ်တာကြီးကို အတင်းမျက်စိမှိတ်ပြီး လက်မခံနိုင်။ 

တစ်ကမ္ဘာလုံးမှာ ကျွန်ုပ်တစ်ယောက်တည်း ရှိနေပါစေ။ ကျွန်ုပ်ယုံကြည်ရာကိုသာ ဆုပ်ကိုင်ထားပါမည်။

 

အရင်တုံးကလူတွေက ကမ္ဘာကြီးသည် စကြာဝဠာ၏ အလယ်ဗဟိုဖြစ်၍ အခြား ဂြိုဟ်၊ နက္ခတ်တာရာတို့သည် ကမ္ဘာကြီးကို ဝိုင်းပတ် လှည့်လည်နေကြသည်ဟု ယုံခဲ့ကြ၏။ အသည်းအသန်ယုံခဲ့ကြ၏။ စောက်ကျိုးနဲ ယုံခဲ့ကြ၏။

 

ဤသည်ကို ဂျော်ဒါနို ဘရူနိုက “မဟုတ်ပါ။ ကမ္ဘာကြီးကသာ နေကိုလှည့်နေတာ ဖြစ်ပါသည်” ဟု ဆိုသည့်အခါ သူ့ကို တိုင်မှာ ကြိုးနဲ့တုတ်ပြီး အရှင်လတ်လတ် မီးတင်ရှို့ခဲ့ကြပါသည်။

 

ကြယ်တွေကို မျက်စိဖြင့်ကြည့်နိုင်သော တယ်လီစကုပ်ကို တီထွင်ခဲ့သူ ဂယ်လီလီယိုကိုလည်း နောက်ထပ် ဘာစကား တစ်ခွန်းမှ မဟနိုင်အောင် သေသည်ထိ အချုပ်ချထားခဲ့ကြ၏။

 

ယခု ဆရာကြီးတစ်ဦး အတွေးချော်ပုံကို နည်းနည်းလောက် ပြောပြပါရစေ။

 

ကျွန်ုပ် အသက် ၂၆ - ၂၈ နှစ် အရွယ် နက္ခတ်ဗေဒင်ကို အရူးအမူးလေ့လာလိုက်စားခဲ့စဉ်အခါက ဗြို့ဟဇ်ဇာတကမှစ၍ ဆရာကြီး ဒေါက်တာဗိုလ်လေး၏ စာအုပ်များကို တစ်အုပ်မကျန် ဝယ်ယူလေ့လာခဲ့၏။ ဆရာကြီး၏ စာအုပ်မှရသော ဗဟုသုတများဖြင့် အဟောများလည်း ထုတ်ခဲ့ပါ၏။

 

ဆရာကြီး၏ စာအုပ်များထဲတွင် “ဗုဒ္ဓဇာတာတော် လက်တွေ့သုတေသနကျမ်း” လည်း တစ်အုပ် အပါအဝင်ဖြစ်၏။ ဆရာကြီးတွက်ပြထားသည်များ၊ ဆရာကြီး၏ အယူအဆများစွာကို ကျွန်ုပ် လေ့လာမှတ်သား ဆည်းပူးခဲ့ရပါ၏။

 

ဤစာအုပ်၌ ဆရာကြီးက မြတ်စွာဘုရား မွေးဖွားစဉ်အခါက ရှိမည့် ပြက္ခဒိန်ကို အင်္ဂလိပ်လများနှင့် ဖော်ပြထားကာ ဂြိုဟ်နေများနှင့် ဇာတာဖွဲ့ပြထားပါ၏။ ထိုစာအုပ်မှာ ရန်ကုန်တွင် ကျန်နေခဲ့သဖြင့် ယခု ကျွန်ုပ်လက်ထဲတွင် မရှိပါ။

 

စာအရေးအသားတွင်သော် လည်းကောင်း၊ နက္ခတ္တဗေဒတွင်သော်လည်းကောင်း၊ ယဉ်ကျေးမှုအရာ၌ အနောက်တိုင်းသား တို့သည် အရှေ့တိုင်းသားတို့ထက် များစွာ နောက်ကျခဲ့၏။ ပြက္ခဒိန်အရာတွင်လည်း အရှေ့တိုင်းသားတို့ထက် များစွာ နောက်ကျခဲ့သည်သာ ဖြစ်၏။ အိန္ဒိယနှင့် တရုတ်ပြည်တို့တွင် ပြက္ခဒိန်တစ်ခု အခိုင်အမာပေါ်ထွက်နေပြီးသည့်တိုင် အနောက်တိုင်း၌ ပြက္ခဒိန်ဆိုတာ စမ်းတဝါးဝါး သုံးနေတုံးဖြစ်၏။ အသေးစိတ်သိလိုသူများ ကျွန်ုပ်၏ မြန်မာပြက္ခဒိန် စာအုပ်ကို ဝယ်ယူ ဖတ်ရှုကြပါရန် တိုက်တွန်းပါ၏။

 

အတိအကျဆိုရပါမူ ယခု ကမ္ဘာသုံး အင်္ဂလိပ်ပြက္ခဒိန်ကို နောက်ဆုံးလက်ခံသုံးစွဲလာတာ နှစ် ၁၀၀ တောင် မပြည့်သေးပါ။ နိုင်ငံအတော်များများမှာ ၂၀ ရာစု အစောပိုင်းနှင့် အလယ်ပိုင်းလောက်ကျမှ လက်ခံကျင့်သုံးကြတာဖြစ်၏။ 

 

သို့အတွက် လွန်ခဲ့သည့် နှစ်ပေါင်း ၂၅၀၀ ကျော်၊ မြတ်စွာဘုရား ဖွားတော်မူစဉ်က အင်္ဂလိပ်ပြက္ခဒိန်ဆိုတာ ရှိဘို့မပြောနှင့်။ သန္ဓေတောင် မတည်သေး။ ကြားတောင်မှ မကြားစဖူးသေး။

 

ဤသည်ကို ဆရာကြီးက ဗုဒ္ဓမွေးသည့်အချိန် ရှိမည့် အင်္ဂလိပ်ပြက္ခဒိန်ကို ဆွဲပြထားတော့ ဘာနှင့်တူသနည်းဟူမူ ပန်းချီဆရာတို့ နတ်ပြည်နှင့် နတ်များပုံသဏ္ဍာန်ကို ပန်းချီရေးပြထားသကဲ့သို့ ဖြစ်၏။

 

သီယိုရက်တစ်ကယ်လီးအရ မှန်ချင်မှန်ပါမည်။

သို့သော် ဘယ်နည်းနှင့်မှ လက်တွေ့ မကျပါကြောင်း။

 

ဗုဒ္ဓနေ့ဆိုပြီး အသင်တို့ ကျင်းပနေသည့် ကဆုန်လပြည့်နေ့သည် မှန်ချင်သည့်အခါမှန်ပြီး မမှန်သည့်အခါ တက်တက်စင်အောင် လွဲနေပုံကို ထပ်မံပြဆိုပါအံ့။

 

အေးငြိမ်း

၂၃ မေလ၊ ၂၀၂၄

ကဆုန်လပြည့် ဗုဒ္ဓနေ့

မှတ်ချက်။         ။

 

၁။ ဤပို့စ်သည် ရာဇဝတ်အိုးကို ဒုတ်နှင့်ထိုးသော ပို့စ်ဖြစ်၏။

၂။ ဤပို့စ်ကိုဖတ်ပြီး ချစ်သူများတော့ တိုးလာစရာမရှိ။ မုန်းသူများသာ ပွားများလာစရာရှိ၏။

၃။ ဘာသာရေးအစွန်းရောက်များဖြစ်လျင် ကျွန်ုပ်ကို သတ်ချင်စိတ်တောင် ပေါက်လာနိုင်စရာရှိ၏။

၄။ ဤကဲ့သို့သော အတွေးမျိုးရှိသူမှာ ဤဒွန္နယာကြီး၌ ကျွန်ုပ်တစ်ဦးတည်းသာ ရှိပါလိမ့်မည်။

၅။ ဤပို့စ်နှင့်ပတ်သက်၍ အငြင်းပွားလိုသူများ Jurong Point ကိုလာခဲ့ပါ။ တစ်ခွက်လျှင် S$4.50 ပေးရသော ကော်ဖီတိုက်၍ ငြင်းပါမည်။

 

ဗျာဒိတ်၊ ဖွားမြင်၊ ဗောဓိပင်၊ စံဝင်နန်းနိဗ္ဗာန် 

 

မြတ်ဗုဒ္ဓသည် ကဆုန်လပြည့်နေ့တွင် ဒီပင်္ကရာမြတ်စွာဘုရားထံ၌ နိယတဗျာဒိတ်ခံယူသည်ဆို၏။

ကဆုန်လပြည့်နေ့၌ပင် ဖွားမြင်တော်မူပြီး -

ကဆုန်လပြည့်နေ့၌ပင် ဗောဓိပင်နှင့် ရွှေပလ္လင်ကို အောင်မြင်တော်မူကာ -

ကဆုန်လပြည့်နေ့၌ပင် ပရိနိဗ္ဗာန် စံဝင်တော်မူ၏။

 

မြတ်စွာဘုရားသည် ကဆုန်လပြည့်နေ့၌ ဗျာဒိတ်ခံတော်မူ၊ ဖွားမြင်တော်မူ၊ ဗောဓိပင်ကိုအောင်တော်မူ၊ ပရိနိဗ္ဗာန် စံတော်မူတာ ပြဿနာမရှိပါ။

 

ပြဿနာကား ကျွန်ုပ်ဖြစ်၏။

 

မြတ်စွာဘုရားပွင့်တော်မူတာ ဘီစီ ၄၀၀ ကျော်က။ 

မြန်မာပြက္ခဒိန်ကို သူရိယသိဒ္ဓန္တကျမ်းပေါ် အခြေပြုတွက်ထားတာဖြစ်၏။

မူရင်း သူရိယသိဒ္ဓန္တကျမ်းကိုသော်မှ ၄ ရာစု၊ ၅ ရာစုတွင် ပြုစုခဲ့ကြသည် ဆို၏။ 

ဆိုတော့ မြတ်စွာဘုရားပွင့်သည့်အချိန်နှင့် သူရိယသိဒ္ဓန္တကျမ်း ပေါ်သည့်အချိန်မှာ နှစ် ၈၀၀ ခန့် ကွာမနေပါသလော။

မြန်မာပြက္ခဒိန်သည်လည်း မည်သည့်နည်းနှင့်မှ ၄ - ၅ ရာစုထက် ပိုစောစရာ အကြောင်းမရှိ။ ပြက္ခဒိန်မရှိဘဲနှင့် ကဆုန်ဆိုတာလည်း ရှိစရာအကြောင်းမရှိ။

 

မြတ်စွာဘုရား ဖွားမြင်တော်မူတာ မဟာသက္ကရာဇ် ၆၈ ဟုဆို၏။ ထိုသက္ကရာဇ် ဘယ်ကလာသနည်း။ ထိုခေတ်တွင် ပြက္ခဒိန် ရှိနေနှင့်ပြီလော။ မဟာသက္ကရာဇ်ဟူသည် အာကာရဌမင်း၊ ကုသမင်းနှင့် ဘိုးတော်အဉ္ဇနမင်းတို့ဖြို၍ ကြွင်းသော နှစ်များဖြစ်သည်ဆို၏။ အာကာရဌမင်းက နှစ်ပေါင်း မဟာသုဒ္ဓဝယကိန်းနှင့် ၁၁၄၉၇၈၅၊ ကုသမင်းက နာတိမဇ္ဇလဒ္ဓံဝိယကိန်းနှင့် နှစ်ပေါင်း ၁၄၉၃၈၅၆၀၊ ဘိုးတော်အဉ္ဇနမင်းက မာဃစန္ဒေကိန်းနှင့် နှစ်ပေါင်း ၈၆၄၅ ကို ဖြိုခဲ့သည်ဆိုရာ ၎င်းတို့သည်လည်း ယုတ္တိကင်းမဲ့လှ၏။ သူတို့လိုသာဆိုရလျှင် လူတွေ အဝတ်မကပ်မီကတည်းက ပြက္ခဒိန်ဆိုတာ ရှိနှင့်နေပြီး ဖြစ်ရပေလိမ့်မည်။

 

ဆိုတော့ မြတ်စွာဘုရား မဟာသက္ကရာဇ် ၁၀၃ ခုနှစ်၊ ကဆုန်လပြည့်နေ့တွင် ဘုရားဖြစ်သည်ဆိုတာ ဘယ်သူ ပြောတာပါနည်း။ ဒါတစ်ချက်။ 

 

ဒါ့ထက်ပိုဆိုးတာ ရှိသေးသည်။

 

ဤကမ္ဘာကို ဘုရားငါးဆူပွင့်မည့် ဘဒ္ဒကမ္ဘာဟု ဆိုကုန်ကြ၏။ ထိုဘုရားငါးဆူတွင် ကကုသန်၊ ကောဏာဂုံ၊ ကဿပ၊ ဂေါတမတို့ ပွင့်တော်မူကုန်ကြပြီး အရိမေတ္တယျ ဘုရားတစ်ဆူသာ ကျန်သည်ဆို၏။

 

သို့ဆိုလျှင် ဒီပင်္ကရာမြတ်စွာဘုရားသည် ဤကမ္ဘာ၌ပွင့်သည့် ဘုရားမဟုတ်တာ သေချာပြီ။

ဒီပင်္ကရာမြတ်စွာဘုရားပွင့်တော်မူစဉ်အခါက မစ်လ်ခီဝေး ဂယ်လက်ဇီကြီးတောင် မွေးချင်မှ မွေးဦးမည်။

ဂေါတမမြတ်စွာဘုရားသည် ကဆုန်လပြည့်နေ့၌ ဒီပင်္ကရာမြတ်စွာဘုရားထံတွင် ဗျာဒိတ်ခံယူသည်ဆိုတော့ ဆိုတော့ - -

အဲ့လယ် . . . 

စကြာဝဠာမစမီကတည်းက မြန်မာပြက္ခဒိန်ပေါ်နေမှ ဖြစ်မည်။ (စဒါဘာ စဒါဘာ)

 

“မင်းက ဘယ်လောက်တတ်လို့ ဆရာတော်ကြီးတွေရဲ့ ကျမ်းကြီးကျမ်းခိုင်တွေကို ဝေဘင်ရဒါဒုံးကွ” 

 

တားက ဝေဘင်တာ မဟုတ်ပါခင်ညာ

ခညားတို့ ဝေဘင်တတ်အောင် တွေးပြတာပါ။

ကျော်ကတော့ ဘယ်သူကြီးတွေ ဘယ်လိုရေးခဲ့တယ် ဆိုတာထက် လက်တွေ့နဲ့ကိုက်ညီမညီ ဆိုတာကို ပို သဘောကျကြောင်းပါ။

 

ဆဲလိုသူများ စိတ်ကြိုက် ဆဲနိုင်ပြီဖြစ်ကြောင်း

 

အေးငြိမ်း

၂၂ မေလ ၂၀၂၄

အသင်တို့သည် စာကို ကြိုးစားပြီး ဖတ်သင့်ကြသည် ဆိုခြင်း အကြောင်း

ကျွန်ုပ်သည် သင်တန်းများ၌ အခုမှ မြန်မာပြည်က ရောက်လာသည့် သင်တန်းသား အသစ်ကျပ်ချွတ်များကို သင်ခန်းစာနှင့် ပတ်သက်သည်များ၊ သင်ခန်းစာနှင့် မပတ်သက်သည့် အထွေထွေ ဗဟုသုတများကို မေးလေ့ရှိ၏။

သင်ခန်းစာနှင့် ပတ်သက်သည်များ၌ အောက်ပါမေးခွန်းတို့ပါ၏။

 ၇၅ ကီလိုလေးတဲ့ လူတစ်ယောက်ဟာ အပေါ်ကပြုတ်ကျပြီး တစ်ခုခုနဲ့ ရိုက်မိပြီ ဆိုကြပါစို့ကွာ။ သူ့အပေါ် သက်ရောက်တဲ့အားဟာ ဘယ်လောက်ရှိမလဲ။

 လက်ရမ်းတန်းရဲ့ အပေါ်တန်းက အနည်းဆုံး ၁ မီတာမြင့်ရမယ်။ ၁ မီတာ ဘယ်လောက်မြင့်သလဲ။

 အလုပ်သမားတွေကို သယ်လာတဲ့ လော်ရီဟာ တစ်နာရီကို ကီလို ၆၀ ထက်ပိုမမောင်းရဘူး။ ဆိုတော့ အဲဒီ အမြန်နှုန်းဟာ တစ်နာရီဘယ်နှစ်မိုင် (mile per hour) နှုန်းရှိသလဲ။

 လေထဲမှာ အောက်ဆီဂျင်ဟာ ၂၁% ပါတယ်။ ဒါဆို ကျန်တာ ဘာဓာတ်ငွေ့တွေလဲ။

 PPE တွေကို နေရောင်တိုက်ရိုက်ကျတဲ့နေရာမှာ မထားရဘူး။ ပျက်စီးတတ်တယ်။ အဲဒါ UV ကြောင့်။ UV ဆိုတာ ဘာလဲ။

- စသည်တို့ ဖြစ်၏။

အထွေထွေဗဟုသုတအနေနှင့် -

 ဒုတိယကမ္ဘာစစ် ဘယ်နှစ်က ဖြစ်ခဲ့တာလဲ။

 နပိုလီယံဆိုတာ ဘယ်သူလဲ။

 မြဝတီမင်းကြီး ဦးစ ကို သိသလား။

 ယောအတွင်းဝန် ဦးဘိုးလှိုင်ဆိုတာ ဘယ်သူလဲ။

 (ကျွန်တော်က အတန်းကျောင်းမနေခဲ့ဖူးဘူး။ ဘုန်းကြီးကျောင်းပဲ နေခဲ့ဖူးတာ။) ဟုတ်လား။ ဒါဆို “ယံမင်္ဂလံ ဒွါဒသဟိ၊ စိန္တယိံသု၊ သဒေဝကာ” ဆိုတာ ဘာလဲ။

သူတို့အတန်းပညာ မေးကြည့်တော့ ၂ တန်း၊ ၃ တန်းမှသည် ဘွဲ့ရအထိ မျိုးစုံပါ၏။ သို့သော် များသောအားဖြင့် ၉ တန်း၊ ၁၀ တန်း အဆင့်များ ဖြစ်၏။ ၉ တန်း၊ ၁၀ တန်း ဆိုတော့လည်း ဘုရားစူးရပါစေ့ ၉ တန်း၊ ၁၀ တန်းများ ဖြစ်၏။ ဘာ မေးမေး မသိ။ ဘာဗဟုသုတမှ မရှိ။ ဘာစာအုပ်တွေ ဖတ်ဖူးလဲ ဆိုတော့ စာဖတ်ဖူးသူသည် ၁၀ ယောက်မှာ ၁ ယောက် တောင်မရှိ။

‘မင်းတို့ ဝတ္ထုတွေ မဖတ်ဖူးဘူးလား’ ဆိုတော့ ဟိုတစ်ယောက်က ‘ဖတ်ဖူးပါတယ်’ ဟု ဖြေ၏။ တယ်ဟုတ်ပါလားကွ။ စာရေးဆရာနာမည်လေး ပြောပြနိုင်မလား ဆိုတော့ ‘ဦးပုည’ ပါ တဲ့။ ဟိုက်ရော့စ်ခ်လ်

တယ်ဟုတ်ပါလားကွ။ ကိုယ်ကတော့ ဦးပုညရဲ့ ဝတ္ထု ၃ ပုဒ်ဖတ်ဖူးတယ်။ ဆဒ္ဒန်ဆင်မင်းဝတ္ထု၊ သူအိုမကြီး ဝတ္ထု၊ ကာက ဝလ္လိယဝတ္ထု စသဖြင့်ပေါ့။ မင်း ဘယ်ဝတ္ထုတွေ ဖတ်ဖူးတာလဲ . . . .မေးလိုက်တော့

.

.

.

.

ခေါင်းကြီးငိုက်စိုက်ချကာ ပြန်ဖော်မလာတော့။ ကျွန်ုပ်ပဲ လက်လျှော့လိုက်ရပါ၏။

ကျွန်ုပ်အထင်မှာ အနှီသကောင့်သားကလေးသည် ဆယ်တန်း၌ ရေသည်ပြဇာတ်ကိုသင်စဉ်က ဦးပုည နာမည်ကို မှတ်မိနေပါလိမ့်မည်။ ထို့ကြောင့် ကျွန်ုပ်က စာရေးဆရာနာမည်မေးသည်တွင် ကြားဖူးနားဝနှင့် ရမ်းတုတ်လိုက်တာ ဖြစ်ပါလိမ့်မည်။

ဟိုတစ်ယောက်ကတော့ လင်းသိုက်ညွန့်စာတွေ ဖတ်တယ် ဆို၏။ သေဗျဇီ

ကျွန်ုပ် ခေတ်ဟောင်း ခေတ်သစ် စာရေးဆရာနာမည်၊ ဝတ္ထုနာမည်များ ရွတ်ပြ၏။ 

ဘုရားစူးရပါစေ့၊ ထိုနာမည်များကို ကြားဖူးတာ တစ်ယောက်ကမှ မရှိ။ 

ထားပါ၊ မဟာဆွေ၊ ဗန်းမော်တင်အောင်၊ ဒဂုန်ခင်ခင်လေး၊ ယုဝတီခင်စိန်လှိုင် . . . တို့ကို မကြားဖူးတာထားပါ။

အခုတော့ မစန္ဒာကို မသိ၊ မိုးမိုး (အင်းလျား) ကို မကြားဖူး။ စမ်းစမ်းနွဲ့ (သာယာဝတီ) ကို သာယာဝတီက မုန့်နာမည်ဟု ထင်နေပါလိမ့်မည်။

သူငယ်ချင်းလို့ပဲ ဆက်၍ခေါ်မည်ခိုင်၊ လေတိုက်လို့ သစ်ပင်လှုပ်တာ - သစ်ပင်လှုပ်လို့ လေတိုက်တာ၊ ပုဏ္ဏားဘကွန်း၊ ညီမလေးက အချစ်ကို ကိုးကွယ်သတဲ့လား၊ မသုဓမ္မစာရီ၊ ဓမ္မဝိလာသ . . . . ဘာဆို ဘာတစ်ခုမှ မကြားစဖူး။

ဝဏ္ဏပဘာ၊ ကလျာဖူးစသစ်၊ ပျိုမြစ်မြစ်လျင်၊ ကျစ်လစ်တင့်စံပယ်၊ လှမျိုးကြွယ်သား . . . . 

ဆင်းလှဆင်းထွတ်၊ ဆင်းလွတ်လှမော၊ တူလျောတူဖက်၊ တူစက်ပြိုင်အံ့၊ . . . . . .

တောစံပယ်ဖြူ၊ ဝတ်မှုံကျင်းတဲ့ သင်းကြူကြူကို၊ လေချူလို့လွှင့်၊ ပန်းထုံတဲ့ လေချိုမှာ၊ ရွှေချိုးပျို ကူသံဆင့်ပေလိမ့် . . .

မောင်မောင်ရယ် ဘယ်ခါညှိုးပါဘု၊ မြတ်နိုးလျင် ပန်ချင်ပန်လေ့၊ မပန်ချင် တွင်တွင် ငြင်းသော်လည်း၊ တသင်းသင်း နေမယ်နော် . . . 

. . . စသည့်ကဗျာများကို ကျွန်ုပ်ရွတ်ပြတော့ သူတို့မှာ မျက်လုံးအကြောင်သားနှင့် ငေးကြည့်နေပါသည်။

၇ တန်းထိ နေခဲ့ဖူးသည်ဆိုသည့် တစ်ယောက်ကတော့ စာဖတ်ရအောင် ကျွန်တော်တို့ရွာမှာ စာကြည့်တိုက်မှ မရှိတာ ဟု ကွန်ပလိန်းတက်ပါသည်။ ကျွန်ုပ် အတော်လေး ဒေါကန်သွားပါ၏။

ဒီမယ်ကိုယ့်လူ၊ ကိုယ်က ဝါးတောကွင်းဆိုတဲ့ ရွာကလေးက လာခဲ့တဲ့လူ။ ကိုယ်တို့ရွာရဲ့ ဟိုဘက်မှာ ဘာရွာမှ မရှိတော့ဘူး။ ရခိုင်ရိုးမတောင်ခြေမှာ ကပ်နေတာ။ ဒါပေမယ့် ကိုယ် အသက် ၁၄ နှစ်သားမှာ သခင်သန်းထွန်း၏ နောက်ဆုံးနေ့များ ပထမတွဲနဲ့ ဒုတိယတွဲကို ဖတ်နေပြီ။ တစ်အုပ်ကို လက်နှစ်လုံးလောက်ထူတယ်။ ကိုယ် အသက် ၁၆ နှစ် ဆယ်တန်းတက်တော့ ရှင်မဟာရဋ္ဌသာရ အနှစ် ၅၀၀ ပြည့်စာအုပ်ထဲက ကဗျာတွေကို အလွတ်ကျက်နေပြီ။ ဖတ်ချင်တဲ့သူအဖို့ စာအုပ်မရှားပါဘူးကွ။

၎င်းကို ကျွန်ုပ်ဖုန်း ဖွင့်လျက် ကျွန်ုပ် save လုပ်ထားသည့် စာအုပ်ပေါင်းများစွာကို ပြလိုက်၏။ 

ငါတို့ငယ်ငယ်က ဘာစာအုပ်မှ ရှိတာမဟုတ်ဘူး။ ကိုရင်တို့ခေတ်မှာ ဟောဒီလက်ညှိုးလေး သုံးလေးချက်လောက် တောက်လိုက်ရုံနဲ့ စာအုပ်ပေါင်း သောင်းနဲ့ချီပြီး အလကားရတယ်။ 

ကိုရင်တို့ စာအုပ်တွေ ဘယ်လိုရှာရမယ်၊ ဘယ်လို download လုပ်ရမယ် မသိရင်ပြော။ ကိုယ် အခုပြပေးမယ်။ ဒါမှ မရှာချင်ဘူး ပျင်းတယ်ဆို ဟောဒီမှာ ကိုယ့်ဖုန်းနံပတ်၊ လှမ်းတောင်းလိုက်၊ ကိုယ်ပို့ပေးမယ်။

သို့သော် -

မည်သူမှ တုတ်တုတ်မလှုပ်ပါ။

ဤသည်မှာ ကျွန်ုပ် တစ်တန်းတည်းကို ပြောခြင်းမဟုတ်။ အတန်းတိုင်းလိုလို ပြောပြတာဖြစ်၏။ သို့တိုင် စာအုပ်ဖတ်ချင်လှချည်ရဲ့ဟု ကျွန်ုပ်ထံ ဆက်သွယ်လာတာ တစ်ယောက်မှ မရှိပါ။ ကိုရင်တို့ သိချင်တာတွေ ဟောဒီအထဲမှာ အကုန်ရှိတယ် ဟု ကျွန်ုပ်၏ blog link ပေး၏။ သို့သော်လည်း ကျွန်ုပ်၏ blog ကို အလည်လာသူများမှာ ယခင်က ဦးရေထက် တိုးတက်လာသည် မရှိ။

အသင်တို့သည် စာဖတ်ပါက အသိအမြင် များစွာရပေမည်။ စာမဖတ်ဘဲ ဘာတွေသိပါမည်နည်း။

သို့သော် စာဖတ်ခြင်းသည် လူတစ်ဦးချင်းစီနှင့်ဆိုင်၏။ ကျွန်ုပ်အနေနှင့် ၎င်းတို့ကို စာဖတ်ခြင်း၏ကောင်းကျိုးများ ပြောပြ၍ စာဖတ်ဖို့ တိုက်တွန်းရုံမျှ တတ်နိုင်ပါသည်။ သည့်ထက်ပိုပြီး ဘာလုပ်နိုင်ပါမည်နည်း။ တကယ်ဖတ်ဘို့ဆိုတာ သူတို့ကိုယ်တိုင်၏ ကြိုးစားအားထုတ်မှုပေါ် မူတည်၏။ 

ကျွန်ုပ်မူကား ကျွန်ုပ်ဖတ်ခဲ့သည့် စာအုပ်များကို ဘယ်နေ့တုံးက ဘယ်သူရေးသည့် ဘာစာအုပ်ဟု မှတ်စုစာအုပ်ထဲ၌ ဘောပင်နှင့်ရေးကာ မှတ်သားထားသော ဟူ၏။

အသင်တို့သည် စာဖတ်သူများ ဖြစ်ကြပါစေကုန်သတည်း။

အေးငြိမ်း

၁၉ မေလ၊ ၂၀၂၄

ငွေကြေးဖောင်းပွမှုနှုန်း လေ့လာချက်

ရာဇပလ္လင် ခွေးတက်ပြီးနောက် မြန်မာငွေ မည်မျှတန်ဘိုးကျသွားသနည်းဟု ကျွန်ုပ် လေ့လာကြည့်ရာ အောက်ပါအတိုင်း တွေ့ရလေ၏။ မည်မျှ ထပ်ကျဦးမည်မသိ။

ဤအခြေအနေဆိုးကြီးကို ကယ်တင်ဘို့ တစ်ခုတည်းသော နည်းလမ်းမှာ ခွေးရူးများကို မြန်မာ့မြေပေါ်မှ အပြီးအတိုင် ရှင်းလင်းသုတ်သင်ပစ်ရန် ဖြစ်၏။

Exchange Rates (SGD to Kyats)
09/05/2024	2845
26/04/2024	2820
03/04/2024	2762
14/04/2024	2760
10/03/2024	2645
17/02/2024	2585
04/02/2024	2575
22/11/2023	2480
11/11/2023	2363
27/10/2023	2330
19/10/2023	2380
18/10/2023	2370
05/08/2023	2395
13/07/2023	2258
21/06/2023	2180
07/06/2023	2140
04/06/2023	2135
19/04/2023	2115
31/03/2023	2120
26/02/2023	2100
16/02/2023	2140
31/05/2022	1470
01/05/2022	1435
07/04/2022	1410
14/03/2022	1420
10/02/2022	1420
30/01/2022	1420
17/01/2022	1390
14/01/2022	1380
05/11/2021	1330
03/09/2021	1250
17/08/2021	1200
28/04/2021	1105
28/03/2021	1020
28/02/2021	1022
02/01/2021	985
03/12/2020	970

အေးငြိမ်း

၁၂ မေလ၊ ၂၀၂၄