(၁၄)
နာမည် - ကိုညီညီလွင်
အသက် - ၂၃
ပညာအရည်အချင်း - သိပ္ပံဘွဲ့(ဓါတုဗေဒ)
လက်ရှိအလုပ်အကိုင် -
လစာ - ၄၅၀
ကိုညီညီလွင်သည်လည်း အခြားသူများကဲ့သို့ပင် ကျောထောက်နောက်ခံ မရှိဘဲ မိမိဘ၀လမ်းကြောင်းကို မိမိဘာ သာ ခုတ်ထွင်ရှင်းလင်း ခရီးထွက်ခဲ့ရသူ ဖြစ်ပါသည်။ သို့အတွက် အခက်အခဲများစွာ ကြုံတွေ့ခဲ့ရပြီး ငွေကုန်ကြေးကျလည်း များခဲ့ရသည်။ သို့သော် သူက ရည်မှန်းချက်ရှိသော လူငယ်တစ်ဦး ဖြစ်သည်။ သင်ကြားပြသ မြေတောင် မြှောက်ပေးမည့် သူ ရှိလျှင် ခဏလေးနှင့် အထက်တန်း ရောက်သွားနိုင်သည်။ သို့သော် လက်တွေ့တွင်မူ ရုန်းကန်ရဆဲ ဖြစ်သည်။
မြန်မာပြည်မှ အေးဂျင့်က နှစ်နှစ် ကန်ထရိုက် ဟုပြောလိုက်သော်လည်း လက်ရှိ ပရောဂျက် ပြီးပြီ ဖြစ်သဖြင့် တစ်နှစ်နှင့် ပြန်လွှတ်ဖို့ များသည် ဟု ပြောသည်။ သို့အတွက် အလုပ်သစ်ရှာဆဲ ဖြစ်သည်။
ဒီမလာခင် ရန်ကုန်မှာတုံးက သင်တန်းတွေပဲ လှိမ့်တက်နေခဲ့တာပဲ။ လျှပ်စစ်သင်တန်း၊ အဲယားကွန်း သင်တန်း စသဖြင့်ပေါ့။ လက်တွေ့အနေနဲ့ ကတော့ သင်တန်းမှာ လုပ်ခဲ့တာလောက်ပဲ။ အပြင်မှာ လိုက်လုပ်သေးတယ်။ ဒါပေမဲ့ ကျကျ နန လုပ်ရတာ မဟုတ်ပါဘူး။ အကူလောက်ပါဘဲ။ အဲဒီလို တစ်နှစ်လောက် လုပ်ခဲ့တယ်။ နောက်တော့ နိုင်ငံခြား ထွက်ဘို့ ဇောက်ချ လုပ်ခဲ့တာပဲ။ စင်ကာပူလာဘို့ ကြိုးစားတာ တစ်နှစ်ခွဲလောက် ကြာတယ်။
စပြီး အဆက်အသွယ် ရတာက ကျွန်တော့်အစ်ကိုရဲ့ အသိတစ်ယောက်။ သူက စင်ကာပူက သင်္ဘောကျင်းကြီး တစ်ခုမှာ လုပ်တယ်။ သူတို့ သင်္ဘောကျင်းက လူတွေ ခေါ်တော့ သူ တစ်သုတ်ပြီး တစ်သုတ် ခေါ်တယ်။ ပထမ အသုတ် တွေ အကုန်အဆင်ပြေတယ်။ ဒါပေမဲ့ ဖြစ်ချင်တော့ ကျွန်တော့်ကို ခေါ်တဲ့ အသုတ်ကျမှ အဆင်မပြေဘူး ဖြစ်ကရော။ ကျွန်တော်တို့ အတွက် တင်လိုက်တဲ့ work permit တွေ ကျမလာဘူး။
သူ့ကို စရံ ငွေ ၅ သိန်းပေးထားတယ်။ သူ့ကို မေးတော့ ခဏစောင့်ပါဦး၊ ကျတော့မယ် နဲ့ စောင့်လိုက်ရတာ ၅ လလောက် ကြာသွားတယ်။ ကျွန်တော် စိတ်မရှည်တော့ဘူး။ ဒါနဲ့ ကျွန်တော်လည်း ဆက်မလုပ်ချင်တော့ဘူး ဆိုပြီး ပေးထားတဲ့ ပိုက်ဆံ ပြန်တောင်းပြီး နောက်အေးဂျင့် တစ်ခုပြောင်း လျှောက်တယ်။ လှိုင်သာယာက န၀ဒေးလမ်းမှာ ရှိတဲ့ အေးဂျင့်တစ်ခု။ သူက Low Levy သင်တန်းပါ ပေးတယ်။ သင်တန်းပြီးရင် နိုင်ငံခြားကို အသုတ်လိုက် လွှတ်တယ်။
အဲဒီမှာ ကျွန်တော်သွား အပ်ပြန်ရော။ ကျွန်တော့်အသိရဲ့ အစ်ကိုတစ်ယောက်ဆို သင်တန်းလည်းပြီးရော တစ်ပါတ်အကြာမှာ ထွက်သွားတယ်။ ဆိုတော့ အားကျစရာပေါ့။ ဒါပေမဲ့ အဲဒီမှာ အလုပ်အပ်ဖို့အတွက်က စရံပေးရမှာကိုး။ အဲဒါနဲ့ ခုနက ပြောတဲ့ သင်္ဘောကျင်း မှာ လုပ်ဖို့ အပ်ထားတဲ့ ပိုက်ဆံ ငါးသိန်းကို အသည်းအသန် သွားတောင်းရတယ်။ တော်တော်နဲ့ ပြန်မရဘူး။ မရတော့ တော်တော်နဲ့ အလုပ်မအပ်နိုင်ဘူး။ ၆ လ ပိုင်းကျမှ ပြန်ရတယ်။
ကြားဖြတ်ပြောရရင် ကျွန်တော် နိုင်ငံခြားသွားဘို့ လုပ်တာ အိမ်ကို အသိပေးရုံပဲ ပေးထားတာ။ ကျန်တာ အကုန် လုံး ကျွန်တော် ကိုယ့်ဟာကိုယ် လိုက်လုပ်ရတာ။
ဘာမှ အလုပ်မဖြစ်နိုင်သေးတော့ ကျွန်တော်လည်း ကောင်းနိုးရာရာ သင်တန်းတွေ လျှောက်တက်တယ်။ အဲဒီမှာ တင် လှည်းတန်းနားက Tech မှာ လျှပ်စစ်သင်တန်း သွားတက်တယ်။ Basic Electrical Installation and Wiring Course တဲ့။ သင်တန်းတက်နေရင်းပဲ အဲဒီ Tech က စင်ကာပူသွားဘို့ ခေါ်တယ်။ ဒါပေမဲ့ ကျွန်တော်က ဟိုမှာပေးထားတဲ့ ပိုက်ဆံ ပြန်မရသေးတာရယ်။ လှိုင်သာယာက အေးဂျင့်မှာ အပ်ထားတာရယ် ကြောင့် အဲဒီအလုပ်ကို လက်လွှတ်လိုက် ရတယ်။ ဒီကြားထဲတော့ မော်လမြိုင် ပြန်လိုက် ရန်ကုန်လာလိုက်နဲ့ စရိတ်လည်း ထောင်းတာပေါ့။
နောက်ပြီး ကျွန်တော်က ရန်ကုန်မှာ ဘာအဆွေအမျိုးမှ ရှိတာ မဟုတ်ဘူး။ နေတာက အဆောင်၊ စားတာက ဆိုင် ဆိုတော့ ကုန်တာပေါ့။ တစ်နေ့ကို အနည်းဆုံး ၂၀၀၀၊ ၃၀၀၀ လောက်တော့ အနည်းလေး ကုန်တယ်။
လှိုင်သာယာ အေးဂျင့်က အတော့်ကို သေချာသလောက် ဖြစ်နေတာ။ ဘာဖြစ်လို့လည်း ဆိုတော့ သူတို့အပြော အရ ခေါ်ချင်တာက ၅၀၀ လောက် ရှိတယ်။ ဒါပေမဲ့ သူတို့ဆီမှာ တက်နေတဲ့ သင်တန်းသားက ၄၀၀ လောက်ပဲ ရှိတာ ဆိုတော့ မပါဘူးဆိုတာ မရှိရဘူး။ စာမေးပွဲအောင်တာနဲ့ ချက်ခြင်း တန်းသွားရမယ်။ အခြေအနေက အဲဒီလိုကို ဖြစ်နေတာ။
ကျွန်တော် ၆ လပိုင်းမှာ ဟိုဘက်က ပိုက်ဆံ ပြန်ရလို့ ၇ လပိုင်းမှာ သင်တန်း တက်တယ်။ ၈ လပိုင်းမှာ အောင်စာရင်း ထွက်တယ်။
ကံများ ဆိုးလိုက်ပုံ ပြောပါတယ်။ ကျွန်တော်တို့ အရင် အသုတ်တွေတုံးက ဟုတ်လို့။ ဒီအပတ် စာမေးပွဲ အောင်။ နောက်အပတ် ထွက်။ အဲဒီလို အသုတ်လိုက် လွှတ်နေတာ ကျွန်တော် စာမေးပွဲ အောင်တဲ့ အချိန်မှာ စင်ကာပူက စီးပွားရေး ကျလို့ ဆိုပြီး လူပို့တာတွေ ချက်ခြင်း ရပ်လိုက်ရတယ်။ သင်တန်းဆင်းထားတဲ့ သူတွေက ၄၀၀ ကျော်လောက်။ တစ်ပတ် ခေါ်တာမှ ၄ ယောက်၊ ၅ ယောက်။ ကျွန်တော် ဘယ်အထိ စောင့်လဲ ဆိုတော့ ၂၀၀၉ ခုနှစ် ဇန်န၀ါရီ လထိ။ အဲဒီမှာ ကျွန်တော်လည်း အောင်လက်မှတ်ကြီး ကိုင်ပြီး ဘာလုပ်ရမှန်း မသိ။ ယောင်လည်လည်နဲ့။
ရန်ကုန်မြို့လယ် ၂၈ လမ်းကနေ ၅၇ လမ်းထိ ကျွန်တော် မရောက်ဖူးတဲ့ အေးဂျင့်မရှိဘူး။ အကုန်လျှောက်သွား၊ မေး စမ်းကြည့်ပေါ့။ အလကားနေ အလကားပဲ ဆိုပြီး ကျွန်တော် အဲယားကွန်းသင်တန်း သွားတက်ပြန်ရော။ သင်တန်း တက်ပြီးတော့ အဲဒီကနေ အလုပ်ခေါ်တယ်။ သင်တန်းဆရာ အရင်တုံးက လုပ်ခဲ့ဖူးတဲ့ ကုမ္ပဏီကနေ ခေါ်တာ။ အဲဒီမှာ ကျွန်တော် ၀င်ဖြေတာ စာတွေ့အောင်တယ်။ အောင်တော့ အင်တာဗျူးဝင်ဘို့ အတွက် အေးဂျင့်ဖီးကို အရင်မေးရတယ်။ အေးဂျင့်ဖီးက လေယာဉ်လက်မှတ် အပါအ၀င် စင်ကာပူဒေါ်လာ ၃၈၀၀ တဲ့။
ကျွန်တော့်မှာ အဲဒီလောက် ပိုက်ဆံ မကျန်တော့ဘူး။ ဟို လှိုင်သာယာမှာ သင်တန်းသွားတက်တာရယ်၊ နေတာ စားတာတွေရယ် နဲ့ ပိုက်ဆံက တော်တော် ပွန်းသွားပြီ။ ဆိုတော့ ဆရာ့ကို ပြောပြရတယ်။ ဆရာ၊ ကျွန်တော် စင်ကာပူ သွားဘုိ့ အေးဂျင့်တွေ လိုက်ရှာရင်းနဲ့ ပိုက်ဆံတော်တော် ကုန်သွားပြီ။ အဲဒီတော့ ကျွန်တော့ကို လျှော့ယူပါ ပေါ့။ ဆရာ က မင်းဝင်ပြီး ပါအောင် အရင်ဖြေ လို့ပြောတယ်။ သူတို့ အလုပ်က လခကောင်းတယ်။ Basic Pay ၆၀၀ နဲ့ အိုဗာတိုင်လည်း ကောင်းတယ် ပေါ့။
အင်တာဗျူးတဲ့ နေ့ကျတော့ ကျွန်တော် သွားတယ်။ ဒါပေမဲ့ ဖြေဘို့ စိတ်မကူးဘူး။ ပါလဲ လိုက်မှာမှ မဟုတ်တာ။ ကျွန်တော် ၀င်ဖြေလိုက်လို့ ရွေးလိုက်ရင် တကယ်လိုက်မဲ့ သူတစ်ယောက်အတွက် နစ်နာတာပေါ့။ ဒါနဲ့ အဲဒီအောက်မှာ လဖက်ရည် သောက်ရင်း ကျွန်တော် ထိုင်စောင့်နေတယ်။ အားလုံး အင်တာဗျူး ပြီးလောက်ပြီ ဆိုမှ တက်သွားတယ်။ ဒါပေမဲ့ ဟိုမှာ အင်တာဗျူးက မပြီးသေးဘူး။ စာရေးမတွေက အင်တာဗျူး ၀င်ခိုင်းတယ်။ ဒါပေမဲ့ ကျွန်တော် မ၀င်တော့ဘူး။ အခြေအနေကြည့်ပြီး ပြန်ခဲ့တယ်။ ဆိုပါတော့ အဲဒီကို မလိုက်ဖြစ်ဘူး။
၂ လပိုင်းမှာ Sanko အတွက် ၅၇ လမ်းက အေးဂျင့်တစ်ခုမှာ အင်တာလာဗျူးတယ်။ အဲဒီမှာ အင်တာဗျူးတာ ဂျပန် နှစ်ယောက်။ သူတို့က colour blind စစ်တယ်။ သူတို့ဟာက နမူနာလဲ မပြဘူး။ ဘာမှန်းမသိပဲ ၀င်ရတာ။ နောက်ပြီး အတွေ့အကြုံက မရှိသေးတော့ သူတို့ ဘာမေးမှန်းလဲ နားသိပ်မလည်ဘူး။ နောက်တော့ သူတို့က လခ ဘယ်လောက် လိုချင်လဲ လို့ မေးတော့ ကျွန်တော်က တစ်နေ့ ၂၁ ကျပ်လို့ပြောလိုက်တယ်။ မင်း Low Levy အောင်တာ ဘယ်လောက် ကြာပြီလဲ မေးတော့ ကျွန်တော်က 3 months လို့ ပြောရမှာ မှားပြီး 3 Years လို့ပြောလိုက်မိတယ်။ မင်းဟာ ဟုတ်ရဲ့လား ကွာ လို့ ပြန်မေးမှ 3 months လို့ ပြန်ပြောရတယ်။
အင်တာဗျူးဖြေတာ အဆင်မပြေဘူး။ သူမေးတာက တစ်မျိုး၊ ကိုယ်ဖြေတာက တခြား။ အကုန် ကပေါက်တိ ကပေါက်ချာချည်းပဲ။ နောက် ပန်းဆိုးတန်းလမ်းပေါ်က Global Tower မှာ ရှိတဲ့ အေးဂျင့်တစ်ခုက ခေါ်ပြန်တယ်။ အင်တာ ဗျူးရှိတယ်။ အမြန်လာခဲ့တဲ့။ သွားသာသွားရတယ်။ ဘယ်ကုမ္ပဏီက လာဗျူးမှန်း သိတာ မဟုတ်ဘူး။ နောက်မှ Sanko က လာခေါ်မှန်း သိတယ်။ အင်တာဗျူးဝင်တော့ သူတို့က ကျွန်တော့်ကို ကြောင်ကြည့်နေတယ်။ ဟင် - မင်း ဟိုတစ်နေ့ကမှ ငါတို့နဲ့ အင်တာဗျူး ထားတာ မဟုတ်လားတဲ့။ ကျွန်တော့်ကို မှတ်မိနေတယ်။ ကျွန်တော်ကလည်း ညာလို့ ဘယ်ရမလဲ။ ဟုတ်တယ် ပေါ့။ ဒါပေမဲ့ အဆင်ပြေပါတယ်။ သူတို့ ဘာမှ မပြောဘူး။
အင်တာဗျူးဖြေပြီး ပြန်မယ် လုပ်တော့ သူတို့က မပြန်နဲ့ဦး။ နောက်တစ်ခု ရှိသေးတယ်။ လက်စနဲ့ တစ်ခါထည်း အင်တာဗျူး ၀င်သွား လို့ပြောတယ်။ ဘယ်ကုမ္ပဏီကလည်း ဆိုတော့ Mun Siong ကတဲ့။ လခ ၄၅၀ ဆိုတာနဲ့ ကျွန်တော် ကလည်း ၄၅၀ ဆိုရင်တော့ မဗျူးချင်ဘူး။ ပြန်မယ် ဆိုတော့ သူတို့ကလည်း လိုက်တာ မလိုက်တာ နင့်ဖာသာနင် ဆုံးဖြတ် ပေါ့။ ခုတော့ အတွေ့အကြုံရအောင် ဗျူးသွားပါလား ဆိုတာနဲ့ ကျွန်တော်လည်း အင်တာဗျူး ၀င်လိုက်တယ်။
ဝင်သွားတော့ အထဲမှာ flange တွေ ကြပ်နေတာ တွေ့ရတယ်။ ဒါတွေ ကိုယ်တစ်ခါမှ မမြင်ဖူးတာ။ ကြားတောင် ကြားဖူးတာ မဟုတ်ဘူး။ အဲဒီမှာ ဆရာက လိုက်ပြတယ်။ ဒီလို ဒီလို ကြပ်ရတယ် ပေါ့။ သူလုပ်သလို ကိုယ်လည်း လိုက်ကြပ် ပေ့ါလေ။
အဲဒီမှာ အင်ဂျင်နီယာ တစ်ယောက်ရယ်၊ မန်နေဂျာတစ်ယောက်ရယ် လာဗျူးတယ်။ သူတို့က ကျွန်တော့ လက်မှတ်တွေ ကြည့်ပြီး သြော်၊ မင်းက wiring သင်တန်း တက်ထားတာကိုး။ Yes။ မင်း low levy လက်မှတ်လဲ ရှိတာပဲ။ Yes ။ သူတို့ဘာမေးမေး ကျွန်တော်က yes ချည်းပဲ ဖြေတော့ သူတို့က ကျွန်တော် သူတို့ပြောတာ နားမလည်ပဲ yes တစ်လုံးပဲ တတ်တယ် လို့ ထင်သွားတယ်။ ဒီတော့ သူတို့က မင်းက ငါတို့ ဘာမေးမေး Yes ချည်းပဲ ဖြေနေတော့ ဟို ရောက်လို့ ငါတို့ခိုင်းတာ မင်းနားမလည်၊ မလုပ်တတ်ရင် ပြန်ပို့မှာနော် လို့ ပြောတော့ ကျွန်တော်က yes လို့ ထပ်ဖြေ လိုက် တော့ သူတို့ တော်တော် လေ သွားတယ်။ ကဲ ရပြီ၊ ရပြီ တဲ့ ဆိုပြီး ပြန်လွှတ်လိုက်တယ်။
ကျွန်တော်ကလည်း သေချာပါတယ်။ မပါလောက်ပါဘူး ဆိုပြီး ပြန်တော့မယ် လို့ ပြောတယ်။ သူတို့ကလည်း အတင်းပဲ။ နေပါဦးဟယ်၊ နင့်ဟာကလည်း။ Practical လေးတော့ လုပ်သွားပါဦး ဆိုတာနဲ့ လုပ်ရပြန်ရော။ ခုနက ဆရာ ပြထားတဲ့ အတိုင်းပေါ့။ ဘွိုင်လာစွပ်တွေ ဘာတွေဝတ်၊ ဂွတွေဘာတွေ ကိုင်ကက်ပြီး နပ်တွေ (Nuts) ဘာတွေ ကြပ်လိုက် ရသေးတယ်။ ရွေးမရွေး ဘယ်တော့ သိရမလဲ ဆိုတော့ တစ်ရက်၊ နှစ်ရက်နေ သိရမှာ တဲ့။
ပထမ ဖြေထားတဲ့ Sanko က result က ဂျပန်တွေ စင်ကာပူ ပြန်ရောက်မှ ထုတ်ပေးမှာ။ ဆိုတော့ တစ်ပတ် လောက်ကြာမယ် တဲ့။ အဲဒါနဲ့ Mun Siong result က အရင် ထွက်လာရော။ ပါတယ် တဲ့။ နင်တို့ လိုက်မှာလား ဆိုတော့ Sanko က မသေချာဘူးလေ။ တော်ကြာ မပါရင် နှစ်ခုလုံး လက်လွတ်သွားမှာ ဆိုတော့ လိုက်မယ် ပေါ့။ ပြောလိုက်တယ်။ ဖြစ်ချင်တော့ နောက်နေ့ကျတော့ Sanko ကလည်း အကြောင်းကြားလာတယ်။ ကျွန်တော် အရွေးခံရတယ် ပေါ့။ ဟား၊ အဲဒီမှာ ဂွတွေကျကုန်ပြီ။
ကျွန်တော် ပထမ အပ်ထားတဲ့ ကုမ္ပဏီမှာက စောင့်ရဦးမယ်။ ရွေးတော့ ရွေးပြီးပြီ။ ဒီဘက်အေးဂျင့်မှာ အရွေးခံ ထားရတော့ အဲဒီ ပထမ အေးဂျင့်ကို ကျွန်တော် သွားမေးတယ်။ ဘယ်တော့ သွားရမလဲ အတိအကျ ပြောပါ။ ကျွန်တော်က မော်လမြိုင်က ဆိုတော့ ရန်ကုန်မှာ အကြာကြီး ထိုင်မစောင့်နိုင်ဘူး။ နေစရိတ်၊ စားစရိတ် တအားထောင်းတယ် ဆိုတော့ သူတို့က အဲဒါတော့ ငါတို့လည်း မသိဘူး။ သင်္ကြန်ကျော်မှလည်း ဖြစ်နိုင်တာပဲ လုပ်ကရော။
ကျွန်တော်က စရိတ်တွေ အရမ်းကုန်လှပြီ။ စင်ကာပူသွားဘို့ လုပ်နေတဲ့ တစ်နှစ်ခွဲလောက် အတောအတွင်း ၆၅ သိန်းလောက် ကုန်နေပြီ။ တစ်လကို အနည်းဆုံး တစ်သိန်းခွဲလောက် ကုန်တာကိုး။ တကယ်လို့သာ ၆ လ ပိုင်းလောက်မှ ခေါ်မယ် ဆိုရင် နောက်ထပ် ခြောက်သိန်း၊ ခုနစ်သိန်းလောက် ထပ်ကုန်ဦးမယ်။
ဆိုတော့ ကျွန်တော် အဲဒီ အေးဂျင့်ကို အပြတ်ဖြတ်လိုက်တယ်။ မင်းတို့နဲ့ ဆက်မလုပ်တော့ဘူး ဆိုပြီး ပတ်စ်ပို့နဲ့ စာရွက်စာတမ်းတွေ ပြန်ယူလာပြီး ဒီအေးဂျင့်နဲ့ပဲ လိုက်ဘို့ ဆုံးဖြတ်လိုက်တယ်။ အေးဂျင့်ဖီးက စင်ကာပူဒေါ်လာ ၁၉၀၀ + လေယာဉ်တစ်ကြောင်းခ ပေးရတယ်။ တစ်ခါ လေဘာကဒ်လုပ်ဖို့ ဆိုပြီး အစိမ်း ၁၀၀ ထပ်ပေးရသေးတယ်။ အဲဒီမှာ စရံငွေ ၅ သိန်း ပေးလိုက်တယ်။
ဖြစ်ပုံက အဲဒီမှာ စရံငွေ ၅ သိန်းလဲ ပေးပြီးရော ဟိုဘက်မှာ အင်တာဗျူးထားတဲ့ အလုပ်သုံးခုက တစ်ပြိုင်နက် ခေါ်တော့တာပဲ။ ဟို တစ်ခုကဆို တစ်နေ့ကို ၂၄ ကျပ် ပေးတယ်။ ဒါပေမဲ့ ဒီမှာက လွန်နေပြီ။ ဘာမှ လုပ်လို့မရတော့ဘူး။ ဒါနဲ့ပဲ လိုက်ရတော့တာပေါ့။ ဒီမှာကတော့ လခ တစ်လကို ၄၅၀ ပေးတယ်။
စုစုပေါင်း ၅၇ ယောက် ခေါ်တာ။ သုံးသုတ် ခွဲလွှတ်တယ်။ ပါမစ်ကျတာ ၂၄ ရက်နေ့။ သွားရမှာက ၂၈ ရက်နေ့ဆိုတော့ အရမ်း ကပ်နေပြီ။ ကျွန်တော် အိမ်ကို ခဏ ပြန်ချင်သေးတယ်။ ဆိုတော့ ၂ ရက်နေ့သွားမဲ့ အသုတ်နဲ့မှ လိုက်တော့မယ် လို့ ပြောလိုက်တယ်။ အင်တာဗျူးပါပြီး နှစ်ပတ်ကြာတော့ စင်ကာပူကို ထွက်ခဲ့ရတော့တာပဲ။
ဒီကြားထဲ ကျွန်တော်တို့ကို Low Levy ဖြေဘို့ ဆိုပြီး welding သင်တန်း တက်ခိုင်းသေးတယ်။ သင်တန်းကြေး ငါးသောင်း ပေးရတယ်။ အရင် ကျွန်တော်တို့ တက်ထားတာက သင်္ဘောကျင်းအတွက် ဖြစ်လို့ အကြုံးမ၀င်ဘူး ဆိုပြီး ပြောသေးတယ်။ ဒါနဲ့ သင်တန်းသွားတက်။ အလကားပါ။ ဘာတတ်မှာလဲ။ သင်တန်းဆရာကလည်း ကျွန်တော်တို့ကို ၁ ပေပတ်လည် သံပြားပေးပြီး ဒီလို ဒီလို ဆော်ရတယ် လို့ပြ၊ အပေါ်တက် ဖဲရိုက်နေတာပဲ။ သင်တန်းက နှစ်ပတ်။ အဲဒီ အတွင်း ခုနပေးထားတဲ့ သံပြားကို အပြီး ဆော်ရတယ်ပေါ့။ တချို့ လည်တဲ့သူတွေကျ မတက်ကြဘူး။ ဖြေရမယ်၊ မဖြေရဘူး၊ သေသေချာချာ ပြောပေါ့။ ခုတော့ မလိမ့်တပတ် နဲ့။
အေးဂျင့်တွေကတော့ ရသမျှ အကုန်လုပ်တာပဲ။ ကျွန်တော်တို့တော့ ဘယ်သိမလဲ။ လေယာဉ်ကွင်းရောက်တော့ ကျွန်တော်တို့ တစ်ယောက်ချင်းစီကို ပီနံအိတ် တစ်ထုပ်စီ ပေးလိုက်တယ်။ သူတို့ ပစ္စည်းတွေ ကျွန်တော်တို့ကို သယ်ခိုင်း တာပေါ့။ အဲဒီလို လုပ်ချင်းအားဖြင့် အထုပ်သယ်ခ သူတို့မှာ ပိုက်ဆံရတယ်။ လူတစ်ယောက် ၁၀ ကီလိုပဲ ထားပါဦး။ လူ ၂၀ ဆို ကီလို ၂၀၀ ဖြစ်နေပြီ။ တစ်ကီလို သယ်ခသာ ၅ ကျပ် ရမယ် ဆိုရင် ဘာမှလုပ်စရာမလိုပဲ သူတို့အတွက် ၁၀၀၀ လောက် ရနေပြီ။ လုပ်ပုံတွေ ပြောပါတယ်။
ရောက်ရောက်ချင်း Bukit Batok က Dormitory မှာ ထားတယ်။ အခန်းက ပီဘိ ကျဉ်းကျဉ်းလေး။ အဲဒီ အခန်း ကျဉ်းလေးမှာ ၁၈ ယောက်ထားတယ်။ နောက်တော့ ဒီ ECC Project ရောက်လာတာပဲ။ ကျွန်တော်တို့က Monday to Friday ထိ ၈နာရီကနေ ၆ နာရီထိ ဆင်းရင် အိုတီ (Over Time) မပေးဘူး။ ဒါပေမဲ့ စနေတစ်နေ့လုံးနဲ့ တနင်္ဂနွေ နေ့တွေအတွက် အိုတီ အပြည့်ရတယ်ပေါ့။
ရောက်စတုံးက အိုတီ ကောင်းလို့ တစ်လကို ၇၀၀ လောက် ထုတ်ရတယ်။ မဆိုးဘူးပေါ့။ ခုတော့ အလုပ်တွေ ပါးသွားလို့ အိုတီလည်း နည်းသွားပြီ။ ဖြတ်တာက Income Tax အတွက် ဆိုပြီး ၄၀ ဖြတ်တယ်။ ထမင်းဘိုး ၇၇ ကျပ် ဖြတ်တယ်။ Income Tax အတွက်က ပြန်ရမယ်လို့ ပြောတာပဲ။ ဒါပေမဲ့ Low Levy ဖြေပြီးမှ နှစ်အပြည့်မလုပ်ပဲ ထွက်သွားရင် Low Levy ဖြေခဆိုပြီး ၃၅၀ ဖြတ်တယ်။ စာချုပ်ပြည့်တဲ့အချိန်မှ ပြန်ရင်တော့ မဖြတ်ဘူးလို့ ပြောတာပဲ။
Bukit Batok မှာ နေတုံးကတော့ ချက်စားလို့ ရတယ်။ ခု ကျွန်းပေါ်မှာတေ့ာ သူတိုကျွေးတာပဲ စားရတယ်။ ကောင်းလဲစား၊ မကောင်းလဲ စားပေါ့။ ဘာတတ်နိုင်မလဲ။ မနက်စာနဲ့ ညစာတေ့ာ မဆိုးပါဘူး။ စားနိုင်ပါတယ်။ ဒါပေမဲ့ နေ့လည်စာတော့ တော်တော် ဆိုးတယ်။ ဘယ်လိုစားလိုက်ရမှန်းကို မသိဘူး။ ထမင်းကလည်း မာ။ ဟင်းက မကောင်း။
လုပ်ရတာတော့ Pipe Fitter Helper ပေါ့။ ဒါပေမဲ့လည်း ကောင်းကောင်းလုပ်ရတာ မဟုတ်ပါဘူး။ Fitter လုပ်တဲ့သူက မလေး။ သူက general worker ကနေ လာတာ ဆိုတော့ ကောင်းကောင်း နားလည်တာ မဟုတ်ဘူး။ ဒီတော့ ကျွန်တော့ ကိုလည်း သင်မပေးနိုင်ဘူး။ တစ်ခါ တစ်ခါ သူပါ ရွာတွေလည်နေတယ်။ ကိုယ်ကလည်း အခြေအနေ ကြည့်နေရတာပေါ့။ အရမ်း မမေးရဲဘူး။
Fitter တစ်ယောက်ကို helper နှစ်ယောက် ပေးထားတယ်။ ပိုက်တွေ ကိုင်ပေးထား။ သူလိုချင်တာ ယူပေး၊ ဒါလောက်ပါပဲ။ ဘာပညာမှ မရဘူး။ သူနဲ့ နှစ်လလောက် လုပ်ရတယ်။ နောက်တော့ မြန်မာ pipe fitter တစ်ယောက် ရောက်လာလို့ သူ့နောက်လိုက်ရတယ်။ အောင်ကျော်မင်း တဲ့။ သူကတော့ မဆိုးဘူး။ လုပ်တတ်ကိုင်တတ် ရှိတယ်။ ဒါပေမဲ့ ဗျာ။ သူရတဲ့ လခနဲ့ သူလုပ်နေရတာနဲ့ လုံးဝ မတန်ပါဘူး။
သူရတာ ကျွန်တော်တို့ထက် ၁၀၀ ပဲ ပိုများတယ်။ ၅၅၀ ပေါ့။ ဟို လခ ၉၀၀ ရနေတဲ့ မလေးကောင်တွေ၊ ဖဦးထုပ် ကောင်တွေဆို ဘာမှ တတ်တာမဟုတ်ဘူး။ ဒီအတိုင်း အိယောင်ဝါး လျှောက်လုပ်နေတာ များတယ်။ အမှန်ဆို ကိုအောင် ကျော်မင်းအနေနဲ့ အနည်းဆုံး ၉၀၀ တော့ ရသင့်တာပေါ့။
မှတ်ချက်။ ။ မလေး ဆိုသည်မှာ မလေးရှားလူမျိုးကို ဆိုလိုပြီး ဖဦးထုပ် ဆိုသည်မှာ ဖိလစ်ပင်းလူမျိုးကို ဆိုလိုပါသည်။
သူနဲ့ တွဲလုပ်လိုက်ရတာ အတော်လေး ပညာရတယ်။ အနည်းဆုံး grinder ကောင်းကောင်း တိုက်တတ် သွား တယ်။ ဒါပေမဲ့ သူနဲ့ တစ်လပဲ တွဲလုပ်လိုက်ရတယ်။ ဖဦးထုပ် တစ်ယောက်ဆီ ရောက်သွားပြန်ရော။ အဲဒီ ဖဦးထုပ်ဆို တစ်ချိန်လုံး ဖုံးပဲ ပြောနေတာပဲ။ မနက် ၈ နာရီ အလုပ်စကတည်းက ပြောလိုက်တဲ့ ဖုံး ဟာ Tea Time ရောက်တဲ့ ထိ၊ နောက် အလုပ်ပြန်စပြီး တစ်ခါ ထပ်ပြော၊ အဲလိုနဲ့ ထမင်းစားချိန်သာ ရောက်သွားရော ဘာအလုပ်မှ ဟုတ်တိ ပတ်တိ မပြီး လိုက်ဘူး။ ဖုံးတစ်ခါ ပြောရင် တစ်နာရီခွဲ နှစ်နာရီ ကြာတယ်။
အလုပ်လုပ်ပြန်တော့လည်း တကယ့် ဖြစ်ကတတ်ဆန်း၊ နောက်ပြီး ပြန်လုပ်ရတော့ ကျွန်တော်ပဲ ပြန်လုပ်ရတာ။ ပိုက်တွေ ဆက်ပြီ ဆိုရင်လည်း alignment တွေဘာတွေ ကောင်းကောင်း ချိန်တာ မဟုတ်ဘူး။ သူလုပ်သမျှ အမြဲ ပြန်ဖြတ်၊ ပြန်ဆက် လုပ်ရတယ်။ Pipe Support ဆိုလည်း ဒီလိုပဲ။ I Beam ပေါ်မှာ centre မကျဘူး။ ကျွန်တော်က လွဲနေပြီ လို့ ပြောတော့ သူက ရတယ်၊ ရတယ် လုပ် တဲ့။ နောက်တော့ ပြန်ဖြတ် ရပြန်တာပဲ။
အဲဒီလိုတွေ ဖြစ်ပေါင်းများတော့ အလုပ်က မပြီးဘူး။ လုပ်သမျှ အမြဲ ပြန်ပြင်နေရတာကိုး။ အဲဒီတော့ ကျွန်တော် က ကောင်းကောင်း လုပ်ဖို့ပြောတယ်။ အဲဒီလိုပြောတော့ မကြိုက်သေးဘူး။ မင်းက fitter လား၊ ငါက fitter လားတဲ့။ အဲဒီတော့ ကျွန်တော်လည်း မပြောတော့ဘူး။ နေပေ့စေပေါ့။
အသက်က ၅၀ လောက် ရှိနေပြီ။ ကျွန်တော်တို့ အဖေအရွယ်။ သူပြောလို့ သူ့ဖုံးကဒ် ကုန်သွားရင် ကျွန်တော်တို့ ဖုံးကဒ် ယူပြောတယ်။ နောက် ပြန်ပေးပါ့မယ်ကွာ တဲ့။ နောက်ပြီး သေသေချာချာ ပြန်ပေးတာလဲ မဟုတ်ဘူး။ တစ်ခါတုံးက ဆို ကျွန်တော့ Sim Card ငှားသွားတယ်။ ပြန်တောင်းတော့ ငါ့ကောင်မလေး ပေးလိုက်လို့ နောက်နေ့ကျမှ ပြန်ယူ တဲ့။ ဘာလို့ပေးလိုက်ရတာလဲ ပြောတော့ ပြန်ပေးပါ့မယ် ကွာတဲ့။ ကျွန်တော့် ဖုံးနံပါတ်တွေ အားလုံးက အဲဒီကဒ်ထဲမှာ။ ဆိုတော့ ကျွန်တော် ဖုံးဆက်ချင်ရင် ဆက်လို့ မရဘူး။ အဲဒီမှာ သူနဲ့ ကျွန်တော် စကားများတာပေါ့။
ကျွန်တော်က အဲဒီအကြောင်းတွေ supervisor ကို ပြန်ပြောပြတော့ supervisor က ကျွန်တော့်ကို အလုပ် သီးသန့် ခွဲပေးတယ်။ အဲဒီတော့ ကျွန်တော်လည်း ကိုယ့်ဟာကိုယ် လုပ်တာပေါ့။ အဲဒီကောင်က ကျွန်တော်လည်း ခွဲလုပ်ရော သူလုပ်တာတွေ မလုပ်တော့ပဲ ကျွန်တော်လုပ်တာ လာလုပ်တယ်။ ကျွန်တော် ပြင်ထားတာတွေ လာပြီး ဖြုတ် ဟယ်၊ တတ်ဟယ် လုပ်တယ်။ နောက်ပြီး ကျွန်တော့်နာမည်နဲ့ ထုတ်ထားတဲ့ ပစ္စည်းတွေ ယူသုံးပြီး ပြန်မသိမ်းဘူး။ မေးလိုက်ရင်လည်း အတင်း သူမသိဘူးလို့ ဘူးခါလွှတ်တယ်။
အဲဒါနဲ့ ကျွန်တော်လည်း တော်တော် စိတ်ကုန်လာတာနဲ့ သူ့နောက်မလိုက်ချင်ဘူး၊ လူလဲပေးပါလို့ ဖိုမင်ကို ပြောတယ်။ ဖိုမင်က ဘာဖြစ်လို့လဲ မေးတော့ ဖုံးပြောတဲ့ဟာတွေ၊ အလုပ်ကို စိတ်မ၀င်စားဘဲ ဖြစ်ကတတ်ဆန်း လုပ်တာတွေ၊ Pipe support တွေ၊ ပိုက်တွေ ဆင်ထားတာတွေ မှားလို့ မကြာခဏ ပြန်ဖြတ် ထုတ်ရတာတွေ အကုန် ပြောပြလိုက်တယ်။ ဒါနဲ့ ဖိုမင်က ရုံးကို ပြောပြီး Material ကို ပြောင်းပေးလိုက်တယ်။ အဲဒီ ဖဦးထုပ်နဲ့ တွဲလုပ်လိုက်ရတာ နှစ်လ ကြာတယ်။ ဘာပညာမှ မရလိုက်ဘူး။ စိတ်ညစ်ရတာပဲ ရှိတယ်။
ခု လုပ်ရတာက Material Controller အကူပေါ့။ ပစ္စည်းထုတ်ပေးရတယ်။ ထုတ်ပေးတဲ့ ပစ္စည်း စာရင်းတွေ မှတ်ရတယ်။ ပိုက်တွေ fabricate လုပ်ဖို့အတွက် drawing ကြည့်ပြီး ပစ္စည်း ထုတ်ပေးရတယ်။ ပစ္စည်းထုတ်ပေးတဲ့ အခါ တော့ သေသေချာချာ စာရင်း လုပ်ထားရတာပေါ့။ နှစ်ခါပြန် မထုတ်ပေးမိအောင်။ အဲဒီလို နှစ်ခါပြန် ထုတ်ပေးမိရင် ကိုယ်ပဲ အထောင်းခံရမှာ။ တကယ်လို့ လိုအပ်လို့ နှစ်ခါပြန် ထုတ်ရမဲ့ အခါမျိုးတွေမှာ supervisor ကို အကြောင်းကြား ပေါ့။ သူ့ခွင့် ပြုချက်နဲ့ ပဲ ထုတ်လို့ရတယ်။ အဲဒီမှာ ပြဿနာက တချို့ supervisor တွေက သုံးရမဲ့ ပစ္စည်းတွေ ထုတ်ပြီးသွားပြီ။ ဒါပေမဲ့ သူတို့ဟာ သူတို့ ဘယ်မှာ ထားမှန်း၊ ဘယ်မှာ သုံးလိုက်မှန်း မသိဘူး။ နောက် လိုမှာ တစ်ခါ ပြန်လာ ထုတ်ပြန်ရော။ အဲဒါ မျိုးက နေ့တိုင်းတွေ့နေရတယ်။
ပရောဂျက် တစ်ခုလုံးက လူတွေက ပစ္စည်းထုတ်ရင် ဒီပဲ လာထုတ်ရတာ ဆိုတော့ အလုပ် အရမ်း ရှုပ်တယ်။ ဒီတော့ သူတို့က ဘာလိုချင်တယ် ဆိုတာ စာရင်းနဲ့လာမှ ထုတ်ပေးရတာ အဆင်ပြေတယ်။ ဒါပေမဲ့ များသောအားဖြင့် ဘာစာရင်း၊ အင်းမှ ရှိတာမဟုတ်ဘူး။ ဒီတစ်ယောက်က ဒီဟာလိုချင်တယ် ဆိုလို့ သွားရှာ။ ရလာတော့မှ ဒါ မဟုတ်သေး ဘူး။ ဟိုဟာ ပြောင်းလိုချင်ပြန်တယ် ဖြစ်ပြန်ရော။ ကျွန်တော်တို့က သူတစ်ယောက်ထဲနဲ့ လုပ်နေရတာ မဟုတ်ဘူး။ လူပေါင်း သောင်းခြောက်ထောင်။ သူတစ်ယောက်ထဲ အချိန်အများကြီး ပေးလိုက်ရရင် နောက်လူတွေ အများကြီး တန်းစီ နေရော။ အဆင်မပြေဘူး။
နောက်ပြီး ကျွန်တော်တို့ သူတို့ကို ပစ္စည်းထုတ်ပေးတာ ကိုယ့်သဘောနဲ့ကိုယ် ပစ္စည်းကို ကိုင်ရွေးရတာ မဟုတ်ဘူး။ Main Store မှာ သွားထုတ်ရတာ။ အဆင့်က နှစ်ဆင့် သုံးဆင့်။ သူတို့က နောက်ပြီး လာလိုက်ရင် ချက်ခြင်း လိုချင်တဲ့ သူတွေချည်းပဲ။ လုပ်ရတာ မပင်ပန်းပေမဲ့ ခေါင်းစားတယ်။
ခု ကျွန်တော်တို့ ပရောဂျက်က ပြီးခါနီးပြီ ဆိုတော့ သက်တမ်းထပ်တိုးပေး မပေး မသေချာဘူး။ ခုချိန်အထိတော့ ပညာရော၊ ပိုက်ဆံရော ပြောပလောက်အောင် ဘာမှ မရလိုက်ဘူး လို့ပဲ ဆိုရမယ်။ ဟို ကိုအောင်ကျော်မင်း နဲ့ တွဲလုပ်ရ တဲ့ တစ်လအတွင်းက လေ့လာလိုက်တာလေးပဲ ရှိတယ်။ တခြား ဘာမှ မတတ်လိုက်ဘူး။ ကိုယ်တွဲရတဲ့ လူကောင်းရင် ကိုယ် ပညာများများ ရမယ်။ တွဲတဲ့လူ မကောင်းရင်တော့ သေပေရော့ပဲ။ ပညာလည်း မရ၊ ပိုက်ဆံလည်း မစုမိ။ ခုတော့ နောက် အလုပ်တစ်ခု လိုက်ရှာနေတုံးပဲ။ ကျွန်တော်တို့ရောက်တာ တစ်နှစ်ပဲ ရှိသေးတော့ အရင်းကျေရုံသာသာပဲ ရှိသေးတယ်။ ဒီတော့ အပြီးပြန်ဘို့ မဖြစ်သေးဘူး။ ပိုက်ဆံ ထပ်ရှာရဦးမယ်။ နောက်ကုမ္ပဏီရောက်မှ အခြေအနေကြည့်ပြီး ကျောင်းတက် ဘို့ ကိစ္စ ဆက်လုပ်ရမယ်။ ဒါပါပဲဗျာ၊ ကျွန်တော့်ဘ၀အကြောင်း။ သိပ်တော့ အထူးခြားကြီး မဟုတ်ပါဘူး။ တခြားသူတွေ လို ပါပဲ။
No comments:
Post a Comment