သုခကုမ္မာ မင်းသားလေး

သုခ ကုမ္မာ မင်းသားလေးTHE HAPPY PRINCE (A Fairy Tale by Oscar Wilde)

ကလေးတို့ရေ၊ ဟိုးတစ်ခါတုံးက မြို့တော်ရဲ့ အပေါ်ကို စီးမိုးနေတဲ့ မိုးမျှော် အဆောက်အဦ တစ်ခုရဲ့ အပေါ်မှာ သုခ ကုမ္မာ မင်းသားလေး ဆိုတဲ့ မတ်တပ်ရုပ်တု တစ်ခု ရှိသတဲ့ကွယ်။ မင်းသားရုပ်တုကို သိပ်ကောင်းတဲ့ ရွှေပြားတွေနဲ့ ကိုယ်လုံး ပြည့် ချထားပြီး သူ့မျက်လုံးနှစ်လုံးကိုတော့ တောက်ပတဲ့ နီလာကျောက်တွေ နဲ့ ပြုလုပ်ထားတယ်။ သူ့ဓါးရိုးမှာတော့ ကြီးမားတဲ့ အနီရောင် ပတ္တမြားကြီး တစ်လုံးကိုလည်း မြှုပ်ထားတယ် ကွဲ့။
သူဟာ အင်မတန့်ကို လှပတင့်တယ် တယ်ကွဲ့။ သူဟာ အသုံးဝင်ရုံတင် မကသေးဘူး။ ဥတုကြက် လိုလည်း အရမ်း လှတယ် - လို့ အနုပညာလက်ရာမြောက်တာကို ချီးကျူးခံလိုတဲ့ မြို့တော်ဝန်တစ်ယောက်က ပြောတယ်။ သူတကယ် မလုပ်ပေး နိုင်တောင် လူတွေက သူ့ကို ကြောက်ရွံ့  ခြင်းမှ ကာကွယ်ပေးတယ်လို့ ထင်ကြတယ်။
သုခ ကုမ္မာ မင်းသားလေး ဟာ ဘယ်အရာကိုမှ တမ်းတပြီး ငိုယိုတယ်ရယ်လို့ အိပ်မက်တောင် မမက်ခဲ့ဖူးဘူး။ နင် ဘာဖြစ်လို့များ မင်းသားပျော်လေးလို မနေနိုင်ရတာလဲ - လို့ လမင်းကြီးကို တမ်းတပြီး ငိုယိုနေတဲ့ ကလေးငယ်လေး ကို စိတ်ဆတ်တဲ့ သူ့အမေက ဆူလိုက်တယ်။
ဒီကမ္ဘာပေါ်မှာ ပျော်ရွှင်နေတဲ့ သူ တစ်ယောက်ယောက်များ ရှိရင် ငါသိပ် ၀မ်းသာမိမှာပဲ - လို့ အံ့သြစရာကောင်းတဲ့ မင်းသား ရုပ်တုလေးကို ငေးကြည့်ရင်း စိတ်ဓါတ်ကျနေတဲ့သူ တစ်ယောက်က တီးတိုးပြောလိုက်တယ်။
သူဟာ နတ်သားလေး တစ်ပါးလိုပဲ - လို့ အနီရောင် အပေါ်အင်္ကျီလက်ပြတ် နဲ့ သန့်ရှင်းရေး အ၀တ်ဝတ်ထားတဲ့ လုပ်အားပေး ကလေးငယ် တစ်သိုက် ဘုရားရှိခိုးကျောင်းထဲက ထွက်လာကြရင်း ပြောလိုက်တယ်။
နေစမ်းပါဦး၊ နတ်သားကိုများ နင်တို့ တစ်ခါဖူးမှ မတွေ့ဖူးပဲနဲ့ ဘယ်လိုလုပ်များ သိရသလဲ - လို့ သူတို့ သင်္ချာ ဆရာက ပြောလိုက်တယ်။
ဒါပေမဲ့ ကျွန်တော်တို့ အိပ်မက်ထဲမှာ တွေ့ဖူးတာပေါ့ - လို့ ကလေးတွေက ပြန်ပြောလိုက်တယ်။ သင်္ချာဆရာကတော့ သူတို့အိပ်မက်ကို မယုံတဲ့အတွက် ကလေးတွေကို မျက်မှောင်ကြီး ကြုတ်ပြီး ပြူးတူးပြဲတဲ ကြည့်လိုက်တယ်။

တစ်ညမှာတော့ ပျံလွှားငှက်ကလေး တစ်ကောင် မြို့ပေါ်ကို ဖြတ်ပြီး ပျံသန်းလာတယ်။ သူ့အပေါင်းအဖော်တွေ ကတော့ လွန်ခဲ့တဲ့ ခြောက်ပတ်လောက်ကပဲ အီဂျစ်မြို့ကြီးဆီကို ပျံသွားကုန်ကြပြီ။ သူကတော့ အရမ်းလှတဲ့ ကျူပင်မ ကလေးကို ချစ်နေမိပြီ ဖြစ်တဲ့အတွက် သူတို့နဲ့ လိုက်မသွားပဲ နောက်ချန်နေခဲ့တယ်။
သူဟာ မြစ်ကြောင်းအတိုင်း အ၀ါရောင် ပိုးဖလံကြီးနောက် လိုက်သွားရင်း ကျူပင်မကလေးကို နွေဦးရာသီ အစောပိုင်းမှာ တွေ့ခဲ့တယ်။ သူဟာ သူမရဲ့ သေးသွယ် ပျော့ပြောင်းလှတဲ့ ခါးကလေးရဲ့ ဆွဲဆောင်မှုကို မလွန်ဆန်နိုင်တော့ပဲ ပျံသန်းရာက ရပ်လိုက်ပြီး သူမနဲ့ စကားပြောတယ်။
ကိုယ့်ကို ချစ်ခွင့် ပေးပါ - လို့ ပျံလွှ့ားလေးက ဟန်မဆောင်နိုင်တော့ပဲ တဲ့တိုးပြောချလိုက်တဲ့ အခါမှာ ကျူပင်မကလေး ဟာ ခေါင်းကို အသာအယာ ညိတ်ပြလိုက်တယ်။ ပျံလွှားလေးဟာ ရေမျက်နှာပြင်ကို အတောင်ပံလေးတွေနဲ့ ခတ်ပြီး ငွေမှုန် ကလေးတွေကို ဖြစ်စေလိုက် ကျူပင်ကလေး နံဘေးနားမှာ ပျံဝဲနေလိုက်နဲ့ နွေရာသီတစ်ခုလုံး ကို ကုန်ဆုံးစေခဲ့တယ်။
ဒါဟာ ရူးသွပ်တဲ့ သံယောဇဉ်ပဲ - လို့ တခြားပျံလွှားတွေက ကျီကျီကျာကျာ အတင်းပြောကြတယ်။ နောက်ပြီး ဒီကောင်မမှာ ဘာပိုက်ဆံများ ရှိလို့လဲ၊ အဆွေအမျိုးတွေကလည်း တပြုံတစ်ခေါင်းကြီးနဲ့ - တဲ့။ ဟုတ်လည်း ဟုတ်တယ်လေ။ မြစ်ပြင် တစ်ခုလုံး ကျူပင်တွေနဲ့ ပြည့်နှက်နေတာကိုး။ နောက် ဆောင်းဦးပေါက်လာတာနဲ့ သူတို့လည်း အဝေးကို ပျံထွက် သွားကြတော့တာပဲ။
သူတို့လည်း ပျံထွက်သွားရော ပျံလွှားလေးဟာ တစ်ကောင်ထဲ အထီးကျန်တဲ့ ဝေဒနာကို ခံစားရတော့တယ်။ သူအင်မတန် ချစ်ခင် မြတ်နိုးလှပါတယ် ဆိုတဲ့ မကျူပင်ကလေးကို ငြီးငွေ့စ ပြုလာတယ်။ သူက စကားလဲ မပြောဘူး။ နောက်ပြီး မူယာမာယာလဲ များတယ် ထင်တယ်။ ၀ါယော ဆိုတဲ့ကောင်နဲ့လဲ ကလူ၏သို့ မြှု၏သို့ လုပ်နေသေး တယ်။ လေများ တိုက်လာပြီ ဆိုရင် သူ့မှာ ရိုရိုသေသေ ဒူးထောက်ခစားရတာနဲ့ ။ ဟုတ်ပါပြီ၊ ဒီကောင်မဟာ အိမ်ကိုပဲ ခင်တွယ်နေတာပါ။ ပျံလွှားလေးက တစ်ကိုယ်ထည်း ဆက်ပြောလိုက်တယ်။ ငါက ခရီးထွက်ရတာကို နှစ်သက်တယ်။ သူဟာ ငါ့မယား ဖြစ်တဲ့ အတွက် သူလည်းပဲ ခရီးထွက်ရတာကို နှစ်သက်ရမှာပေါ့။
မင်း ငါနဲ့ အတူ လိုက်မလား - လို့ ပျံလွှားလေးက ကျူပင်မလေးကို မေးလိုက်တဲ့ အခါ ကျူပင်မလေးက ခေါင်းယမ်း လိုက်တယ်။ သူက အိမ်နဲ့ မခွဲနိုင်ဘူး။
နင်ငါ့ကို နည်းနည်းလေးမှ မခင်တွယ်ဘူး။ ငါ ပိရမစ်တွေ ဆီပဲ ပြန်သွားတော့မယ်။ သွားပြီဟေ့ - လို့ ပျံလွှားလေးက အော်ပြောပြီး ပျံထွက်သွားတယ်။
တစ်နေ့လုံး ပျံသန်းလာခဲ့ပြီး ညမှာတော့ သူ မြို့တော်ကို ရောက်လာခဲ့တယ်။
ဘယ်များ သွားနေလိုက်ရပါ့။ မြို့ကို ပြင်ထားလိမ့်မယ် ထင်တယ်။
အဲဒီနောက်မှာတော့ သူဟာ မိုးမျှော် အဆောက်အဦကြီးပေါ်က သုခ ကုမ္မာ မင်းသားလေးရဲ့ ရုပ်တုကို သွားတွေ့လိုက် တယ်။ ဟုတ်ပြီ၊ ငါ အဲဒီမှာ နေမယ် လို့ သူအော်လိုက်တယ်။ အဲဒါ အင်မတန် ကောင်းတဲ့ နေရာ ဖြစ်မှာပဲ။ လေကောင်း လေသန့် ကို လည်း တ၀ကြီး ရှူနိုင်တယ်။ အဲဒါကြောင့် သူဟာ မင်းသားလေးရဲ့ ခြေထောက်တွေကြားကို ပျံဆင်းနား လိုက်တယ်။
ဟား၊ ငါ့မှာ ရွှေအိပ်ယာ ရပါပကော - လို့ သူက ဘေးဘီကို ကြည့်ပြီး တိုးတိုး ပြောလိုက်တယ်။ ဒါပေမဲ့ တောင်ပံတွေ ကြား ခေါင်းဝှက်ပြီး အိပ်မယ် ကြံကာရှိသေး၊ ရေစက်ကြီးတစ်စက် သူ့အပေါ် ဘောက်ကနဲ ကျလာတယ်။ ဘုရားရေ၊ ဘာများ ပါလိမ့် လို့ သူလန့်အော်လိုက်တယ်။ ကောင်းကင်မှာလည်း ကြည်လို့။ ဘာတိမ်မှ မရှိဘူး။ မိုးရွာတယ် ဆိုရအောင်ကလည်း ကြယ်တွေက ရှင်းလို့ လင်းလို့ပါကလား။ မြောက်ဥရောပမှာကတော့ ရာသီဥတု သိပ်ကောင်းလှတာ မဟုတ်ဘူး။ ကျူပင်တွေ ကတော့ မိုးကို ကြိုက်တာပေါ့။ ဒါကလည်း ဒီကောင်မ တစ်ကိုယ်ကောင်း ဆန်တာပါလေ။
သူ့အတွေးတောင် မဆုံးလိုက်ဘူး။ နောက် ရေစက်ကြီးတစ်ခု ဆက်ကျလာပြန်တယ်။
နေစမ်းပါဦး။ ဒီမိုးကလေး လောက်မှ အကာအကွယ် မပေးနိုင်ရင် ဒီသောက်ရုပ်တု ဘာများ အသုံးကျမှာလဲ။ မီးခိုး ခေါင်းတိုင် ကောင်းကောင်းတစ်ခု သွားရှာမှပဲ ဆိုပြီး အဝေးကို ပျံထွက်သွားဘို့ ပြင်လိုက်တယ်။
သူတောင်ပံတွေ မဖြန့်လိုက်နိုင်ခင်မှာပဲ နောက်ထပ် ရေပေါက်ကြီး တစ်ခု ထပ်ကျလာလို့ သူ အပေါ်ကို မော့ကြည့် လိုက်တယ်။ အို၊ သူ ဘာများ တွေ့လိုက်ရပါလိမ့်။
အိုကွယ်၊ မင်းသားလေး မျက်လုံးထဲမှာ မျက်ရည်တွေနဲ့ ပြည့်လို့ပါလား။ မျက်ရည်တွေဟာ သူ့ရွှေပါးပြင်ပေါ်ကို စီးကျ လာနေတယ်။ မင်းသားလေးရဲ့ သိပ်လှတဲ့ မျက်နှာလေးကို လရောင်နဲ့ တွေ့လိုက်ရတော့ ပျံလွှားလေးဟာ သိပ် သနားသွား တယ်။
ခင်ဗျားက ဘယ်သူများလဲ - လို့ ပျံလွှားလေးက မေးလိုက်တယ်။
ငါ သုခ ကုမ္မာ မင်းသားလေးပဲ။
ဒါဖြင့် မင်း ဘာကြောင့်များ ငိုကြွေးနေရတာလဲ၊ မင်းကြောင့် ငါ့တစ်ကိုယ်လုံး စိုကုန်ပြီ - လို့ ပျံလွှားလေးက ပြောလိုက်တယ်။
ငါ လူသားအသည်းနှလုံးနဲ့ အသက်ရှင်နေစဉ် အခါက မျက်ရည် ဆိုတာ ဘာလဲလို့ ငါမသိခဲ့ဘူး။ ငါနေတဲ့ ဆန်းဆောက်ဆီ နန်းတော်ထဲကို ဘယ်ဝမ်းနည်းကြေကွဲမှုကိုမှ အ၀င်မခံခဲ့ဘူး။ နေ့ပိုင်းမှာ ငါဟာ ပန်းခြံထဲမှာ အပေါင်းအဖော် တွေနဲ့ ဆော့ကစားနေခဲ့ပြီး ညနေချမ်းကျရင် ခန်းမဆောင်ကြီးထဲမှာ ပျော်ပျော်ပါးပါး ကခုန် နေခဲ့တာပေါ့။ ပန်းခြံကြီးကို နံရံမြင့်ကြီးတွေနဲ့ ကာရံထားတယ်။ ဒါပေမဲ့ အဲဒီနံရံကြီးတွေရဲ့ ဟိုမှာဘက်မှာ ဘာတွေရှိသလဲ လို့ ငါ တစ်ခါမှ ဂရုတစိုက် မေးမကြည့်မိခဲ့ဘူး။ ငါ့ ပတ်ဝန်းကျင်မှာတော့ အရာအားလုံးဟာ လှပ တင့်တယ် နေခဲ့တယ်။ ငါ့ရံရွေတော်တွေက ငါ့ကို မင်းသားပျော်လေး လို့ ခေါ်ကြတယ်။ ငါကလည်း အင်မတန် ကျေနပ်နှစ်သက် ပျော်ရွှင်နေခဲ့တယ်။
ဒီလိုပဲနေပြီး ဒီလိုနဲ့ ငါသေသွားခဲ့တယ်။ ငါသေသွားတဲ့အခါ သူတို့က ငါ့ရုပ်တုကို ဟောဒီ အမြင့်ကြီးမှာ လာထားခဲ့ ကြတယ်။ ဒီတော့ ငါဟာ ငါ့မြို့ရဲ့ အရုပ်ဆိုး၊ အကျည်းတန်တာတွေ၊ ၀မ်းနည်း ကြေကွဲစရာ ကောင်းတာတွေကို တွေ့ရပြီ။ ငါ့ နှလုံးသားတွေကို ခဲနဲ့ လုပ်ထားသည့်တိုင် ငိုဘို့မှ တစ်ပါး ငါ့မှာ ဘာမှ ရွေးချယ်ပိုင်ခွင့် မရှိတော့ဘူး။
အို့အို၊ သူဟာ ရွှေအတုံးလိုက်ကြီးမှ မဟုတ်ပဲကို။ ပျံလွှားလေးဟာ သူ့ဟာသူ တီးတိုးပြောလိုက်တယ်။ သူ့မှတ်ချက် ကို အော်ကျယ်ဟစ်ကျယ် မလုပ်ဘို့လောက်တော့ သူ ယဉ်ကျေးပါသေးတယ် လေ။
ဟို အဝေးကြီးက လမ်းကြိုလမ်းကြားလေးတွေထဲမှာ ဆင်းရဲတဲ့ အိမ်လေးတွေ ရှိတယ်။ မင်းသားလေးက သာယာ ဖွယ် အသံလေးနဲ့ သာယာညင်းပြောင်းစွာ ပြောလိုက်တယ်။ ပွင့်နေတဲ့ ပြတင်းပေါက်တစ်ခုကနေ မိန်းမတစ်ယောက် စားပွဲ မှာ ထိုင်နေတာ ငါ မြင်ရတယ်။ သူ့မျက်နှာက ညှိုးယော် နွမ်းလျ နေတယ်။ သူ့လက်တွေကလည်း နီရဲ ကြမ်းယှနေတယ်။ သူက အပ်ချုပ်သည် ဆိုတော့ သူ့လက်တွေတစ်ခုလုံး အပ်ပေါက်ရာတွေနဲ့ ပြည့်နေတယ်။
သူဟာ ဘုရင်မကြီးရဲ့ အချစ်ဆုံး ရံရွေတော် မင်္ဂလာပွဲမှာ ၀တ်ဘို့ ပိုးထည်ပေါ်မှာ ဇာပန်းတွေ ထိုးနေတယ်။ အခန်း ထောင့်က ကုတင်ပေါ်မှာတော့ နေမကောင်း ဖြစ်နေတဲ့ သူ့သားငယ်လေးဟာ လှဲနေတယ်။ သူဟာ အဖျားတက်နေပြီး လိမ္မော်သီး စားချင်တယ် လို့ ပူဆာနေတယ်။ ဒါပေမဲ့ မြစ်ရေကလွဲပြီး သူ့ကိုပေးဘို့ သူ့အမေမှာ ဘာမှ မရှိဘူး။ အဲဒီအတွက် ကလေးငယ်ဟာ ငိုနေတယ်။
ပျံလွှားကလေး၊ အို ပျံလွှားကလေးရယ်။ ငါ့ဓါးရိုးက ပတ္တမြားကို ထုတ်ပြီး အဲဒီ အမေအိုကို ပေးဘို့ မင်း မတတ်နိုင် ဘူးလားကွာ။ ငါ့ခြေထောက်တွေဟာ ဟောဒီအုတ်ခုံပေါ်မှာ တွဲထားတဲ့အတွက် ငါကတော့ ဘယ်လိုမှ လှုပ်လို့ မရဘူး။
အို၊ ခု ငါက အီဂျစ်ကို သွားဘို့ စောင့်နေတာ။ ပျံလွှားလေးက ပြန်ပြောလိုက်တယ်။ ငါ့အဖော်တွေဟာ နိုင်းမြစ်ကြီးကို စုန်ရေ ဆန်ရေ ပျံသန်းနေကြပြီး သိပ်ကြီးမား လှပတဲ့ ကြာပန်းကြီးတွေ အကြောင်း ပြောနေကြတယ်။ သိပ်မကြာခင် သူတို့ဟာ ဘုရင်ကြီးရဲ့ သချိုင်းတော်ကို လာပြီး အိပ်ကြတော့မယ်။ အဲဒီမှာ ဘုရင်ကြီးဟာ ဆေးရောင်စုံ ခြယ်မှုန်းထားတဲ့ အခေါင်းထဲမှာ ရှိနေတယ်။ သူ့ကို အ၀ါရောင် ၀တ်ရုံနဲ့ ပတ်ထားပြီး မပုပ်အောင်လည်း ဆေးစီရင် ထားတယ်။ လည်ပင်းမှာတော့ ကျောက်စိမ်း လည်ဆွဲ ဆင်မြန်းထားပြီး လက်တွေကတော့ သစ်ရွက်ခြောက်တွေလိုပဲ။
အို၊ ငှက်ကလေးရယ်၊ ဒီတစ်ညလောက်တော့ ငါ့ရဲ့ သတင်းပေးဖော် အဖြစ် မင်း ငါနဲ့ နေပေးပါလားကွာ။ ကလေး လေးဟာ သိပ်ရေဆာနေပြီး သူ့အမေကလည်း အရမ်း ၀မ်းနည်းနေတယ်။ မင်းသားလေးက ပြန်ပြောလိုက်တယ်။
ငါတော့ ကောင်လေးတွေကို ကြိုက်တယ်လို့ မထင်ပါဘူးကွာ။ ပြီးခဲ့တဲ့ နွေရာသီတုံးက ငါ မြစ်ပေါ်မှာ ပျံဝဲနေတုံး ဆန်စက်ပိုင်ရှင်ရဲ့ သားဆိုးလေး နှစ်ယောက်က င့ါကို အမြဲတမ်း ခဲတွေနဲ့ ပေါက်ခဲ့တယ် ကွ။ ဒါပေမဲ့ကွာ ငါ့ကို ဘယ်မှန်လိမ့် မတုံး။ ငါက သူတို့ထက် ပိုမြန်အောင် ပျံနိုင်တာပဲ။ အဲဒီအတွက် ငါဟာ အပျံကောင်းတဲ့သူအဖြစ် ငါတို့မိသားစုထဲမှာ နာမည် ရခဲ့တယ်။ ဒါပေမဲ့ အဲဒီကောင်လေးတွေကိုတော့ ငါ မကျေဘူးဟေ့။
မင်းသားလေးဟာ သိပ်စိတ်ထိခိုက်သွားတယ်။ အဲဒါကို မြင်ရတော့ ပျံလွှားလေး စိတ်မကောင်းဘူး ပေါ့။ ဒါနဲ့ပဲ -
ဒီမှာ သိပ်အေးတယ်။ ဒါပေမဲ့ ငါ မင်းနဲ့ တစ်ညအတူနေပြီး မင်းရဲ့ တမန်တော် အဖြစ် လုပ်ပေးပါမယ်ကွာ လို့ ပြောလိုက်တယ်။ ကျေးဇူးတင်လိုက်တာ ပျံလွှားလေးရာ လို့ မင်းသားလေးက ပြောလိုက်တယ်။
ငှက်ကလေးဟာ မင်းသားလေးရဲ့ ဓါးရိုးက ပတ္တမြားကို ထုတ်ယူ၊ ပတ္တမြားကို ချီပြီး မြို့ပြရဲ့ အိမ်ခေါင်မိုးတွေ ပေါ်က နေ ဖြတ်ပျံခဲ့တယ်။
ငှက်ကလေးဟာ စကျင်ကျောက်ဖြူ နတ်သမီး ရုပ်တုလေးတွေ ရှိတဲ့ ဘုရား ရှိခိုးကျောင်း ပေါ်က ဖြတ်ပျံခဲ့တယ်။ နန်းတော်ကို ဖြတ်ခဲ့တဲ့အခါမှာတော့ သီချင်းသံတွေနဲ့ ကခုန်နေတဲ့ အသံတွေ ကြားခဲ့ရတယ်။ မိန်းမချောကလေး တစ်ယောက် ဟာ သူ့ကောင်လေးနဲ့ လသာဆောင်ဘက် ထွက်လာတယ်။
ကြည့်စမ်းကွယ်၊ လှလိုက်တဲ့ ကြယ်ကလေးတွေ။ အချစ်ရဲ့ စွမ်းအင် ကရော အံ့သြဘို့ မကောင်းဘူးလားဟင် လို့ ကောင်လေးက ပြောလိုက်တယ်။
အင်း၊ ကျွန်မရဲ့ အင်္ကျီဟာ မင်္ဂလာအခန်းအနားအမီ ရစကောင်းပါရဲ့ လို့ ကောင်မလေးက ပြန်ပြောလိုက်တယ်။ ကျွန်မ အင်္ကျီမှာ ဇာပန်းထိုးဘို့ ရောင်စုံပန်းတွေ မှာထားတာ။ ဒါပေမဲ့ အပ်ချုပ်သည် အဖွားကြီးက အရမ်းပျင်းတာပဲ။
ငှက်ကလေးဟာ မြစ်ပြင်ကို ဖြတ်ပျံခဲ့တော့ သင်္ဘောတွေရဲ့ ရွက်တိုင်တွေပေါ်မှာ မီးအိမ်တွေ ချိတ်ထားတာ တွေ့ခဲ့ ရတယ်။ ဆင်းရဲသားရပ်ကွက်တစ်ခုကို ဖြတ်ပျံခဲ့တဲ့အခါ ဂျူးအဖိုးကြီးတွေဟာ ကြေးချိန်ခွင်ကြီးတွေမှာ ငွေစတွေကို ချိန်တွယ် ရင်း တစ်ယောက်နဲ့ တစ်ယောက် ဈေးဆစ်နေကြတာ တွေ့ရတယ်။
နောက်ဆုံးမတော့ သူဟာ တဲပုတ်ကလေးဆီ ရောက်ခဲ့ပြီး အိမ်ထဲကို ချောင်းကြည့်လိုက်တယ်။ အမေအိုဟာ သိပ် ပင်ပန်းလို့ အိပ်မောကျနေပြီး ကောင်လေးကတော့ အဖျားတက်လို့ အိပ်ယာပေါ်မှာ လူးလှိမ့်နေတယ်။ ပျံလွှားကလေးဟာ နားလိုက်ပြီး ပတ္တမြားကို စားပွဲပေါ်က အမယ်အိုရဲ့ လက်အိတ်ဘေးနားမှာ ချထားလိုက်တယ်။ အဲဒီနောက် သူဟာ အိပ်ယာနား ကို အသာအယာ ပျံခဲ့ပြီး ကောင်လေးရဲ့ နဖူးကို သူ့အတောင်ပံလေးတွေနဲ့ ယပ်ခတ်ပေးလိုက်တယ်။
အေးသွားတာပဲ လို့ ကောင်လေးက ပြောလိုက်တယ်။ ငါ ပိုပြီးနေထိုင် ကောင်းလာပြီ လို့ မှတ်ချက်ချလိုက်ရင်း နှစ်နှစ် ခြိုက်ခြိုက် အိပ်မောကျ သွားတော့တယ်။
ပျံလွှားကလေးဟာ မင်းသားလေးဆီ ပြန်လာခဲ့ပြီး သူလုပ်ခဲ့သမျှ ပြန်ပြောပြလိုက်တယ်။ သိပ် စိတ်ဝင်စားစရာ ကောင်းတာပဲ လို့ မင်းသားလေးက ပြောလိုက်တယ်။ ရာသီ အရမ်းအေးနေတာတောင်မှ ငါ နွေးနွေးထွေးထွေး ခံစားရတယ်။ ဘာလို့လဲ ဆိုတော့ မင်းကုသိုလ်တွေ လုပ်ခဲ့လို့ပဲ။ ပျံလွှားလေးကတော့ စပြီးတွေးနေတယ်။ နောက်တော့ အိပ်ပျော်သွားရော။ တွေးတာဟာ သူ့အတွက်တော့ အကောင်းဆုံး အိပ်ဆေးတစ်ခွက်ပဲ။

မိုးလင်းတာနဲ့ သူဟာ မြစ်ဆိပ်ကို ပျံသွားပြီး ရေချိုးလိုက်တယ်။ ဒါဟာ မှတ်ချက်ပြုရမဲ့ အောင်မြင်မှု တစ်ခုပဲ လို့ ငှက် လေ့လာရေးပညာဌာန ပါမောက္ခကြီးက တံတားကို ဖြတ်သွားရင်း ပြောလိုက်တယ်။ “ဆောင်းရာသီထဲက ပျံလွှားငှက် တစ်ကောင်” အဲဒီနောက်တော့ သူဟာ စာတမ်းရှည်ကြီး တစ်စောင်ရေးပြီး ဒေသတွင်း သတင်းစာ တစ်စောင်ဆီ ပို့ခဲ့တယ်။ လူတိုင်း လူတိုင်း သူရေးတာကို ရည်ညွှန်းကြရတယ်။ အဲဒီစာထဲမှာ သူတို့လုံးဝမသိတဲ့ စကားလုံး အမြောက်အများနဲ့ ပြည့်နှက် နေတယ်။
ဒီညတော့ ငါ အီဂျစ်ကို သွားတော့မယ် လို့ ပျံလွှားလေးက ပြောလိုက်တယ်။ သူဟာ မျှော်လင့်ချက်တွေနဲ့ စိတ်အား ထက်သန် နေတယ်။ သူဟာ ပြည်သူပိုင် အဆောက်အဦကြီးတွေဆီ သွားတယ်။ ဘုရားရှိခိုးကျောင်းရဲ့ ခေါင်းမိုးစောက်တွေပေါ် မှာ အကြာကြီးနားနေတယ်။
သူသွားတဲ့ နေရာတိုင်းမှာ စာကလေးတွေက သူ့ကို သိပ် လေးစားဘို့ ကောင်းတဲ့ ငှက်ကလေးပဲ လို့ ကျီကျီကျာကျာ ပြောသံကြားရတိုင်း သူ သိပ်ကျေနပ် ပျော်ရွှင်ခဲ့တယ်။
လ ထွက်လာတာနဲ့ သူ မင်းသားလေးဆီ ပြန်ခဲ့တယ်။ ငါ အီဂျစ်ခရီး စတော့မယ်။ မင်း ဘာများ သ၀ဏ်လွှာ ပါးလိုက် ဦးမလဲ လို့ ငှက်ကလေးက မေးလိုက်တယ်။
ပျံလွှားကလေးရယ်။ မင်း ငါနဲ့အတူ နောက်ထပ် တစ်ညလောက် ထပ် မနေနိုင်တော့ဘူးလားကွာ လို့ မင်းသားလေး က ပြောလိုက်တယ်။
သူတို့ ငါ့ကို အီဂျစ်မှာ စောင့်နေကြပြီ။ နက်ဖြန်ဆို ဒုတိယ ရေတံခွန်ဆီ ပျံသန်းကြလိမ့်မယ်။ မြစ်ကမ်းနံဘေးမှာ အပင်မြင့်ကြီးတွေနဲ့ ထိုင်စရာ ကျောက်ခုံတွေအပြင် မယ်နွန်နတ်ဘုရားရဲ့ ဂရင်းနိုက် ကျောက်သလွန်တော်လည်း ရှိတယ်။ တစ်ညလုံး ငါတို့ ကြယ်တွေကို ကြည့်ကြမယ်။ မိုးသောက်ကြယ် လက်လာတဲ့အခါမှာ သူဟာ အရုဏ်ဦးတေးကို ဆိုလိုက်ပြီး ပြန်တိတ်သွားလိမ့်မယ်။
နေ့လည်နေ့ခင်းတွေ မှာတော့ အ၀ါရောင် ခြင်္သေ့ကြီးတွေ ရေသောက်ရအောင် မြစ်ကမ်းစပ်ကို ဆင်းလာကြတယ်။ သူတို့မှာ မျက်လုံးစိမ်းတွေ ရှိပြီး သူတို့ ဟိန်းဟောက်သံတွေဟာ ရေတံခွန်သံတွေထက်တောင် ကျယ်သေးတယ်။

ပျံလွှားကလေး၊ အို- ပျံလွှားကလေး။ ငါလေ မြို့ရဲ့ ဟို အဝေးက အိမ်တစ်အိမ်ရဲ့ ကျဉ်းမြောင်း တဲ့ ထပ်ခိုးကလေးမှာ လူငယ်လေးတစ်ယောက်ကို တွေ့တယ်။ သူဟာ စားပွဲကလေးကို မှီနေပြီး စာရွက်တွေကို ခြုံထားတယ်။ သူ့နံဘေးနားက ဖန်ခွက်ထဲမှာတော့ ခြောက်သွေ့ညှိုးယော်နေပြီ ဖြစ်တဲ့ ခရမ်းရောင် ပန်းခြောက်တွေ ထိုးထားတယ်။ သူ့ဆံပင်တွေဟာ ညိုမှိုင်း ကြမ်းတမ်း နေတယ်။ သူ့နှုတ်ခမ်းတွေကတော့ ချယ်ရီသီးတွေလို နီရဲနေတယ်။ သူ့မှာ ပြူးကျယ်ပြီး လှပတဲ့ မျက်လုံးတွေလည်း ပိုင်ဆိုင်ထားတယ်။ သူ အခု ပြဇာတ်တစ်ပုဒ်ကို ရေးနေတယ်။ ဒါပေမဲ့ သူဟာ သိပ်အေးနေလို့ ပြဇာတ်ကို ဆက်ရေးခြင်းငှာ မစွမ်းသာတော့ဘူး။ မီးဖိုထဲမှာ မီးမရှိတော့သလို ဆာလောင်လွန်းလို့ ဖျော့တော့နေပြီ လို့ မင်းသားကလေးက ပြောလိုက်တယ်။
ကောင်းပြီလေ၊ ငါ မင်းနဲ့ တစ်ည ထပ်နေပေးလိုက်မယ် - နှလုံးသားလှတဲ့ ပျံလွှားကလေးက ပြောလိုက်တယ်။ ငါ သူ့အတွက် နောက်ထပ် ပတ္တမြားတစ်လုံး ယူသွားပေးရမလား။
အို့အို၊ ငါ့မှာ နောက်ထပ် ပတ္တမြား မရှိတော့ဘူးကွ- မင်းသားလေးက ပြောလိုက်တယ်။ ငါ့မှာ ခု ငါ့မျက်လုံးတွေပဲ ကျန်တော့တယ်။ အဲဒါတွေဟာ ဟို လွန်ခဲ့တဲ့ အနှစ်တစ်ထောင်လောက်က အိန္ဒိယက ယူလာခဲ့တဲ့ ရှားပါးပြီး အဖိုးတန်တဲ့ နီလာတွေကွ။ မျက်လုံးတစ်လုံးကို မင်း ထုတ်ယူပြီး ပြဇာတ်ဆရာလေး ကို သွားပေးလိုက်။ သူ အဲဒါကို ကျောက်ကုန်သည် တွေဆီမှာ သွားရောင်းပြီး ထင်း နဲ့ အစားအသောက်တွေ ၀ယ်လိမ့်မယ်။ ဒါဆို သူ့ပြဇာတ်ကို အဆုံးသတ်လို့ ရပြီ။
ချစ်တဲ့ မင်းသားလေး။ ဒါကိုတော့ ငါ မလုပ်ပြစေနဲ့ ကွယ် - ပျံလွှားလေးက ပြောပြောဆိုဆို ငိုချလိုက်တယ်။
ပျံလွှားလေးရယ်၊ ငါပြောတဲ့အတိုင်းသာ လုပ်စမ်းပါကွယ် - မင်းသားလေးက ထပ်ပြောလိုက်ပြန်တယ်။

ပျံလွှားလေးလဲ ဘာမှ ပြန်မပြောနေတော့ပဲ မင်းသားလေးရဲ့ မျက်လုံးတစ်ဖက်ကို ဖောက်ထုတ်ပြီး ဟိုးမှာ ရှိတဲ့ ပြဇာတ်ဆရာလေးရဲ့ အခန်းဆီ ပျံသွားတယ်။ ခေါင်းမိုးက ပေါက်နေတဲ့ အတွက် သူ လွယ်လွယ်ကူကူပဲ အထဲကို ၀င်သွား နိုင်တယ်။ လူငယ်လေးဟာ သူ့လက်မောင်းပေါ် ခေါင်းတင်ပြီး အိပ်နေတဲ့ အတွက် ငှက်ကလေး အတောင်ပံ တစ်ဖျပ်ဖျပ် ခတ်ပြီး ၀င်လာတာကို သတိမပြုမိလိုက်ဘူး။ သူခေါင်းမော့ ကြည့်လိုက်တဲ့ အခါမတော့ ခရမ်းပန်းခြောက်တွေ ပေါ်မှာ အရမ်း လှတဲ့ နီလာကျောက်ကြီး တစ်လုံး တင်ထားတာကို တွေ့လိုက်ရတော့တယ်။
ငါတော့ ကံထလာပြီဟေ့။ ဒါဟာ တန်ခိုးရှင် တစ်ယောက်ယောက်က ပေးလိုက်တာပဲ ဖြစ်ရမယ်။ ခုဆို ငါ့ပြဇာတ်ကို အဆုံးသတ်နိုင်တော့မယ် - လူငယ်လေးဟာ သိပ်ပြီး ရွှင်လန်း တက်ကြွနေတယ်။
နောက်နေ့မှာတော့ ပျံလွှားလေးဟာ သင်္ဘောဆိပ်ကမ်းကို လာခဲ့တယ်။ သူဟာ ဧရာမ သင်္ဘောကြီး တစ်စင်းရဲ့ ရွက်တိုင်ပေါ်မှာ နားလိုက်ပြီး သင်္ဘောသားတွေ ကုန်သေတ္တာကြီးတွေကို မနီလာအုန်းဆံကြိုးကြီးတွေနဲ့ ဆွဲတင်နေတာကို ကြည့်နေတယ်။ “တောက် - လေးလိုက်တာကွာ” သေတ္တာတစ်လုံး ဆွဲတင်ပြီးတိုင်း သူတို့ ငြီးလိုက်သံကို အတိုင်းသား ကြားနေ ရတယ်။ “ငါ အီဂျစ်ကို သွားတော့ မလို့ဟေ့” ပျံလွှားလေးက အော်ပြောလိုက်တယ်။ ဒါပေမဲ့ သူ့ကို ဘယ်သူမှ ဂရုစိုက် မနေဘူး။
လ လည်း ထွက်လာရော သူ မင်းသားလေးဆီ ပျံခဲ့ပြန်တယ်။

ငါ မင်းကို နှုတ်ဆက်ဖို့ လာခဲ့တာပဲ၊ သွားမယ် - ပျံလွှားလေးက အော်ပြောလိုက်တယ်။ ပျံလွှားလေးရေ၊ မင်း ငါနဲ့ နောက်ထပ် တစ်ညလောက်များ ထပ်ပြီး မနေပေးနိုင်တော့ ဘူးလားကွယ် - မင်းသားလေးက ပြောလိုက်တယ်။
ခုဆို ဆောင်းဝင်လာပြီ။ ဒီမှာ မကြာမီ အသည်းခိုက်အောင် အေးတဲ့ နှင်းတွေ ကျလာတော့မယ် - ပျံလွှားလေးက ပြန်ပြောလိုက်တယ်။ ခုလောက်ဆို အီဂျစ်မှာ နေရောင်ဟာ စွန်ပလွန်ပင်တွေ ပေါ်မှာ နွေးနွေးထွေးထွေး ဖြစ်နေပြီ။ သူတို့ကို ရွှံညွံတွေထဲမှာ လျောင်းနေတဲ့ မိချောင်းကြီးတွေက ပျင်းပျင်းရိရိ ကြည့်နေကြတယ်။ ငါ့အပေါင်းအဖော်တွေဟာ ဘာဘက် ဘုရားကျောင်းထဲမှာ အသိုက်တွေ ဆောက်နေကြပြီ။ ပန်းရောင်နဲ့ အဖြူရောင် ချိုးလေးတွေက တကူကူး ကူရင်း သူတို့ကို ကြည့်နေကြတယ်။
မင်းသားလေး၊ ခု ငါ မင်းကို ခွဲသွားရလိမ့်မယ်။ ဒါပေမဲ့ ငါ မင်းကို ဘယ်တော့မှ မေ့မှာ မဟုတ်ဘူး။ နောက် နွေဦး ပေါက်မှာ မင်းလူတွေကို ပေးလိုက်တဲ့ ကျောက်နှစ်လုံးအစား ငါ မင်းဘို့ လှပတဲ့ ကျောက်နှစ်လုံး အစား ယူလာပေးမယ်။ ပတ္တမြားရဲ့ အရောင်ဟာ နှင်းဆီရဲရဲ ရဲ့ အရောင်ထက် ပိုရဲနေပြီး နီလာကလည်း ပင်လယ်ပြာကြီးပြာသလို ပြာလဲ့ နေရစေ့မယ်။

အောက်က ရင်ပြင်မှာ မီးခြစ်ရောင်းတဲ့ ကောင်မလေး တစ်ယောက် ရပ်နေတယ်။ သူ့မီးခြစ်တွေ ရေမြောင်းထဲ ပြုတ် ကျပြီး အကုန်ရေစိုး ပျက်စီးကုန်ပြီ - မင်းသားလေးက ပြောလိုက်တယ်။ သူပိုက်ဆံ တစ်ပြားမှ မပါဘဲ အိမ်ပြန်သွားရင် သူ့အဖေ ရိုက်လိမ့်မယ်။ ဒါ ဆို သူငိုရတော့မှာပဲ။ ကောင်မလေးမှာ ခြေအိတ်တို့ ဖိနပ်တို့လည်း မရှိဘူး။ သူ့ခေါင်းသေးသေးကလေး ကလေည်း ပြောင်နေပြီ။ မင်း ကျန်တဲ့ င့ါမျက်လုံး တစ်ဖက်ကို ဖောက်ထုတ်ပြီး သူ့ကို သွားပေးလိုက်ပါကွာ။ ဒါဆို သူ့အဖေ ရိုက်မှာ မဟုတ်တော့ဘူး။
မင်းသားလေး၊ ဒီည ငါ မင်းနဲ့ အတူနေမယ်။ ဒါပေမဲ့ မင်းမျက်လုံးကိုတော့ ငါ မဖောက်ထုတ်ပေးနိုင်ဘူး။ ဒါဆို မင်း ကန်းသွားမှာ ပေါ့ လို့ ပျံလွှားလေးက ပြန်ပြောလိုက်တယ်။
ပျံလွှားလေးရယ်၊ ငါပြောတဲ့အတိုင်းသာ လုပ်စမ်းပါကွယ် - မင်းသားလေးက ပြောလိုက်တယ်။

ပျံလွှားလေးလည်း မင်းသားလေးရဲ့ မျက်လုံးကို ထုတ်ယူလိုက်ပြီး မီးခြစ်ရောင်းတဲ့ ကောင်မလေးဆီကို တရှိန်ထိုး ပျံဆင်းသွားလိုက်တယ်။ နောက်တော့ ကောင်မလေးရဲ့ လက်ထဲ နီလာကျောက်ကြီး ကို ပစ်ချပေးလိုက်တယ်။
အယ်၊ လှလိုက်တဲ့ ဖန်တုံးလေးတော့ လို့ အော်ပြီး ကောင်မလေးဟာ ရွှင်မြူးစွာ ရယ်မောပြီး အိမ်ကို အပြေးပြန် သွားတယ်။

ပျံလွှားလေးဟာ မင်းသားလေးဆီ ပြန်လာခဲ့ပြီး ကဲ၊ ဘယ့်နဲ့ရှိစ။ ခုတော့ မင်းခုတော့ ဘာမှ မမြင်ရတော့ဘူး မဟုတ်လား။ ငါ မင်းနဲ့ပဲ တစ်သက်လုံးနေတော့မယ် လို့ ပြောလိုက်တယ်။
မဟုတ်ဘူး ကောင်လေး၊ မင်း အီဂျစ်ကို သွားရမယ် လို့ မင်းသားလေးက ပြန်ပြောလိုက်တယ်။
မင်းသားလေး၊ ငါ မင်းနဲ့ တစ်သက်လုံး အတူနေတော့မယ်လို့ ဆုံးဖြတ်ချက် ချပြီးပြီ လို့ ပြောပြောဆိုဆို ပျံလွှားလေး ဟာ မင်းသားလေးရဲ့ ခြေရင်းမှာ အိပ်ပျော်သွားတော့တယ်။

နောက်နေ့ကစပြီး ပျံလွှားလေးဟာ မင်းသားလေးရဲ့ ပုခုံးပေါ်မှာ နားနေပြီး သူမြင်တွေ့ရတဲ့ မြင်ကွင်း အသစ်အဆန်း တွေကို မင်းသားလေးကို ပြောပြနေတော့တယ်။ သူက နိုင်းမြစ်ကမ်းဘေးမှာ စီတန်းရပ်နေပြီး နှုတ်သီးတွေနဲ့ ငါးဖမ်းနေတဲ့ ဗျိုင်းအောက်တွေ အကြောင်း၊ ကမ္ဘာကြီးလောက် သက်တမ်းရှိနေပြီ ဖြစ်တဲ့ အရာရာကို သိနေတဲ့ သဲကန္တာရထဲက စဖင့် ရုပ်တု ကြီးတွေ အကြောင်း၊ အ၀ါရောင် ဖန်ပုတီးကြီးတွေကို လက်ကောက်လုပ် ၀တ်ထားပြီး ကုလားအုပ်တွေ ဘေးကနေ ဖြည်းဖြည်း ချင်းလျှောက်သွားနေတဲ့ ကုန်သည်တွေ အကြောင်း၊
မဟော်ဂနီသားလို မည်းကြုတ်နေပြီး မှော်ဖန်လုံးကြီးကို ကိုးကွယ်နေတဲ့ စန္ဒာတောင်ကုန်းတို့ရဲ့ အရှင်သခင်ကြီး အကြောင်း၊ စွံပလွံပင်တွေပေါ်မှာ နေပြီး ပုယောဟိတ် အယောက် ၂၀ တို့ရဲ့ ပျားရည်ကိတ်တွေနဲ့ လုပ်ကျွေးသမှု ပြုခြင်းကို ခံယူနေတဲ့ မြွေစိမ်းသခင် အကြောင်း၊ တောရိုင်းလိပ်ပြာကြီးတွေနဲ့ အမြဲ တိုက်ခိုက်နေပြီး ရေကန်ကြီးထဲကို ရွက်လှေကြီးတွေ နဲ့ ဖြတ်သွားတဲ့ ပစ်ဂမီ လူမျိုးတွေ အကြောင်း - စသဖြင့် ပေါ့။
အို၊ သိပ်ချစ်စရာကောင်းတဲ့ ပျံလွှားကလေး။ မင်းက င့ါကို မြန်မာ့ရုပ်မြင်သံကြားက လွှင့်ထုတ်နေတဲ့ သတင်းတွေလို ကောင်းတာတွေ တော်တာတွေချည်းပဲ ပြောနေတော့တာကိုး။ ပိုကောင်းတာကတော့ ပြည်သူပြည်သား လူအများတွေ ဒုက္ခ၊ သုက္ခ ရောက်နေတာတွေကို ငါ ပို သိချင်တယ်ကွာ။ မင်း ငါ့မြို့ကြီးပေါ် ပျံသွားပြီး တွေ့သမျှ မြင်သမျှတွေ ငါ့ကို ပြန်ပြောပြပါ လား ကောင်လေးရာ။

ဒါနဲ့ပဲ ပျံလွှားလေးဟာ မြို့ကြီးပေါ်ကို ပျံဝဲကြည့်လိုက်တယ်။ သူတောင်းစားတွေ တံခါးဝမှာ ထိုင်တောင်းနေချိန်မှာ လူချမ်းသာတွေ ကတော့ အိမ်ကြီး ရခိုင်တွေထဲမှာ သောက်စား ပျော်ပါးနေကြတယ်။
သူ မှောင်မဲနေတဲ့ လမ်းကြိုလမ်းကြားလေးတွေထဲ ပျံသန်းလာတော့ အစာငတ်မွတ်နေတဲ့ ကလေးတွေဟာ ဖြူဖတ် ဖြူယော် မျက်နှာတွေနဲ့ အားမရှိတော့သလို ငေးကြည့်နေတာကို အနက်ရောင်လမ်းတွေ ပေါ်မှာ တွေ့ရတယ်။ ဂုံးကျော်တံတား တစ်စင်းရဲ့ အောက်မှာတော့ ကလေးငယ်နှစ်ယောက်ဟာ တစ်ယောက်ကို တစ်ယောက် ဖက်ထားပြီး တတ်နိုင်သမျှ နွေးအောင် ကြိုးစားနေကြတယ်။ ဆာလိုက်တာကွာ လို့လည်း ငြီးညူနေကြတယ်။ ဟေ့ကောင်တွေ မင်းတို့ ဒီအောက်မှာ မအိပ်ရဘူး လို့ တံတားစောင့်က အော်လိုက်တဲ့ အခါမှာတော့ သူတို့ဟာ မိုးရွာကြီးထဲကို ထွက်သွားကြရတော့တယ်။
ပျံလွှားလေးဟာ မင်းသားလေးဆီ ပြန်လာပြီး သူတွေ့ခဲ့ရ သမျှတွေကို ပြန်ပြီး ဖောက်သည်ချတယ်။
ငါ့တစ်ကိုယ်လုံးကို ရွှေပိန်းချထားတာ။ ဒီရွှေတွေကို တစ်ပြားချင်း တစ်ပြားချင်း ခွာယူပြီး အဲဒီ ဆင်းရဲသားတွေကို သွားပေးလိုက်ပါ။ ဒီရွှေပြားတွေဟာ သူတို့ ကို ချမ်းသာ ပျော်ရွှင်စေလိမ့်မယ် - မင်းသားလေးက ပြောလိုက်တယ်။

ပျံလွှားလေးဟာ မင်းသားလေး ကိုယ်ပေါ်က ရွှေပြားတွေကို တစ်ပြားစီ တစ်ပြားစီ ခွာချလိုက်တာ မင်းသားလေး ကိုယ်ဟာ ရွှေမရှိတော့ပဲ ပြာမှိုင်းမှိုင်း မွဲခြောက်ခြောက် ဖြစ်သွားတော့တယ်။ အဲဒီ ရွှေပြားတွေကို ငှက်ကလေးဟာ တစ်ပြားစီ တစ်ပြားစီ ဆင်းရဲ သားတွေဆီ သယ်သွားတယ်။ ခုဆို ကလေးတွေရဲ့ မျက်နှာမှာ နှင်းဆီရောင်သန်းလာပြီး လမ်းတွေပေါ်မှာ ပျော်ပျော်ရွှင်ရွှင် ပြေးလွှား ဆော့ကစား နေကြပြီ။ ငါတို့ ခု ထမင်း၀၀ စားရပြီ လို့ သူတို့ အော်ဟစ် သီဆိုနေကြတယ်။

နှင်းတွေကျလာပြီ။ နောက်တော့ နှင်းတွေဟာ ခဲကုန်တယ်။ လမ်းတွေဟာ ငွေနဲ့ ခင်းထားသလိုပဲ။ အရမ်းတောက်ပ ပြောင်လက်နေတယ်။ အိမ်ခေါင်မိုး တံစက်မြိတ်တွေမှာတော့ ရေခဲချောင်းလေးတွေဟာ တွဲလောင်းကျနေတယ်။ လူတိုင်း အိမ်ပြင်ထွက်တဲ့အခါ သားမွေးထည်ကြီးတွေ ၀တ်ထားကြတယ်။ လူငယ်တွေကတော့ အနီရောင် ဦးထုပ်တွေဆောင်းပြီး ရေခဲပြင်ပေါ် စကိတ် စီးနေကြတယ်။
သနားစရာ ပျံလွှားလေးဟာ အေးသထက် အေးလာတယ်။ ဒါပေမဲ့ သူ မင်းသားလေးကို စွန့်ခွာ မသွားခဲ့ဘူး။ သူ မင်းသားလေးကို သိပ် ချစ်နေမိပြီ။ ပေါင်မုံ့ဖုတ်သမား လှည့်မကြည့်တဲ့ အခါ ပေါင်မုံ့ဖို တံခါး အပြင်ဘက်က ပေါင်မုံ့အစအန တချို့ကို သူကောက်လာခဲ့တယ်။ နောက်ပြီး တောင်ပံ တစ်ဖျပ်ဖျပ်ခတ်ရင်း သူ့ကိုယ်ကို နွေးအောင် အတတ်နိုင်ဆုံး ကြိုးစား နေရတယ်။ ဒါပေမဲ့ နောက်ဆုံးမှာ သူသေရတော့မယ် ဆိုတာ သိလိုက်တယ်။

သူဟာ ရှိသမျှ အားကို ထုတ်သုံးပြီး နောက်ဆုံးတစ်ကြိမ် မင်းသားလေး ပုခုံးပေါ် အားယူ ပျံတက်လိုက်တယ်။
ချစ်တဲ့ မင်းသားလေးရေ၊ ငါသွားတော့မယ်ကွယ် - သူ လေသံ ဖျော့ဖျော့လေးနဲ့ ပြောလိုက်တယ်။ မင်းရဲ့ လက်ကလေးကို နမ်းခွင့် ပြုမှာလားဟင်။
ပျံလွှားလေးရေ၊ နောက်ဆုံးတော့ မင်း အီဂျစ်ကိုသွားတော့မယ် ဆိုလို့ ငါ ၀မ်းသာလိုက်တာကွယ်။ မင်း ဒီမှာနေတာ သိပ်ကို ကြာသွားပြီ။ ငါ မင်းကို ချစ်တဲ့အတွက် မင်း ငါ့နှုတ်ခမ်းတွေကို နမ်းပါကွယ် - မင်းသားလေးက ပြောလိုက်တယ်။
မင်းသားလေး၊ ငါသွားမှာ အီဂျစ်ကို မဟုတ်ပါဘူးကွယ်။ မရဏစံအိမ်ကိုပါ။ သေခြင်း ဆိုတာ အိပ်ခြင်းရဲ့ နောင်တော် ပဲ၊ မဟုတ်ဘူးလားဟင် - ပျံလွှားလေးဟာ အဲဒီလို ပြောပြီးနောက်တော့ သုခကုမ္မာ မင်းသားလေးရဲ့ နှုတ်ခမ်းကလေးကို ဖွဖွလေး နမ်းပြီး မင်းသားလေးရဲ့ ခြေထောက်ပေါ်ကို ဖုတ်ကနဲ ပြုတ်ကျ သေဆုံးသွားတော့တယ်။
အဲဒီခဏလေးမှာပဲ ရုပ်တုအတွင်းဘက်က တစ်ခုခု ကွဲသံလိုလို ထူးဆန်းတဲ့ အက်သံတစ်ခု ကြားလိုက်ရတယ်။ တကယ်ကတော့ မင်းသားလေးရဲ့ အသည်းနှလုံး နှစ်ခြမ်းကွဲသွားတာပါပဲ။ သေချာတာကတော့ နှင်းတွေ ခဲနေအောင် ကျနေတာပဲ။

နောက်နေ့မနက်စောစောမှာ မြို့တော်ဝန်ဟာ ရင်ပြင်တော်ဘက်ကို သူ့ ကောင်စီဝင်တွေနဲ့ အတူ လမ်းလျှောက် ထွက်လာတယ်။ မျှော်စင်ဘက်လဲ ရောက်ရော သူ မင်းသားရုပ်တု ကို မျှော်ကြည့်လိုက်တယ်။
အလို၊ ဘုရားရေ။ သုခကုမ္မာမင်းသား ရုပ်တုဟာ ဘာလို့များ ဒီလို ဆိုးဆိုးရွားရွား ဖြစ်သွားရတာပါလိမ့် လို့ လန့်အော် လိုက်တယ်။
တကယ့်ကို ဆိုးဆိုးရွားရွား ဖြစ်နေပါပေါ့လား လို့ မြို့တော်ဝန်ပြောတိုင်း အမြဲတမ်း လက်ညှိုးထောင် ခေါင်းညိတ် လုပ်တတ်တဲ့ တခြား ကောင်စီဝင်တွေကပါ သံယောင်လိုက် အော်လိုက်ကြတယ်။ နောက်ပြီး စူးစမ်းရအောင် အပေါ်ကို တက် သွားကြတယ်။
ဓါးရိုးက ပတ္တမြားကြီးလည်း မရှိတော့ဘူး။ မျက်လုံးတွေလည်း အဖောက်ခံ ထားရတယ်။ ရွှေပြားတွေလည်း မရှိတော့ ဘူး။ အင်း၊ သူတောင်းစား သာသာပဲ ကျန်တော့တယ် လို့ မြို့တော်ဝန်က ပြောလိုက်တယ်။
သူတောင်းစား သာသာပဲ ကျန်တော့တယ် - ကောင်စီဝင်တွေကလည်း သံယောင်လိုက်လိုက် ကြတယ်။
ကြည့်ကြစမ်းပါဦး ကွယ်ရို့၊ သူ့ခြေရင်းမှာလည်း ငှက်သေတစ်ကောင်။ ဒီလိုနေရာမှာ ငှက်တွေသေခွင့်မရှိဘူး လို့ အမိန့်ထုတ်ရမယ် လို့ မြို့တော်ဝန်က ပြောလိုက်တဲ့အခါ သူ့စာရေးက မှတ်စုစာအုပ်မှာ လိုက်မှတ် လိုက်တယ်။

အဲဒီနောက် သူတို့ဟာ သုခကုမ္မာ မင်းသားရုပ်တုကို ဆွဲချလိုက်ကြတယ်။
သူဟာ ကျက်သရေလည်း မရှိတော့ဘူး။ အသုံးလည်း မတည့်တော့ဘူး - လို့ အနုပညာ တက္ကသိုလ် ပါမောက္ခကြီး က မှတ်ချက်ချလိုက်တယ်။
နောက်တော့ သူတို့ဟာ ရုပ်တုကို မီးဖိုထဲမှာ အရည်ကြိုပစ်လိုက်ကြတယ်။ မြို့တော်ဝန်က ဒီ သတ္တုတွေကို ဘာလုပ်ရင် ကောင်းမလဲ လို့ စည်းဝေးပွဲ ခေါ်လိုက်တယ်။
အကောင်းဆုံးကတော့ နောက်ထပ် ရုပ်တု တစ်ခု ထပ်လုပ်ဖို့ပဲ။ အဲဒီရုပ်တုကတော့ ကျုပ်ကိုယ်တိုင်ရဲ့ ရုပ်တု ဖြစ်လိမ့် မယ် - လို့ မြို့တော်ဝန်က ပြောလိုက်တယ်။
ကျုပ်ရုပ်တု - ကျုပ်ရုပ်တု - လို့ ကောင်စီဝင်တွေဟာ တစ်ယောက်တစ်ပေါက် အချင်းချင်း ပြောကြ ဆိုကြ ငြင်းကြ ခုံကြ ဖြစ်သွားတယ်။
သူတို့ဟာ ကျွန်တော်ထွက်လာတဲ့ထိ ငြင်းကြ ခုန်ကြလို့ မပြီးသေးဘူး။
ဆန်းပြားပါပေ့ကွယ်။ ဒီ ခဲနဲ့လုပ်ထားတဲ့ နှလုံးသား အကွဲဟာ သံရည်ကြိုစက်ထဲမှာ ဘယ်လိုမှ အရည်ကြိုလို့ မရဘူး၊ ဒါကိုတော့ လွှင့်ပစ်ရလိမ့်မယ် - လို့ သံရည်ကြိုစက် အလုပ်သမားခေါင်းဆောင် က ပြောလိုက်တယ်။
အဲဒီလိုနဲ့ သူတို့ဟာ မင်းသားလေးရဲ့ ကွဲကြေနေတဲ့ နှလုံးသားကို ပျံလွှားငှက် အသေကလေးပစ်ထားတဲ့ အမှိုက်ပုံထဲ ကို ပစ်ထည့်လိုက်ကြတယ်။

ဟောဒီမြို့ထဲက တန်ဘိုးအရှိဆုံး အရာနှစ်ခု ငါ့ဆီ ယူခဲ့ကြစမ်းဟေ့ လို့ ဘုရားသခင်က သူ့နတ်သား တစ်ယောက်ကို ခိုင်းလိုက်တယ်။
နတ်သားဟာ မင်းသားလေးရဲ့ နှလုံးသားအကွဲ နဲ့ ငှက်သေကလေးကို ယူသွားတယ်။
မင်းတော်တယ်ဟေ့၊ ရွေးတတ်သားပဲ။ ငါ့ရဲ့ ကောင်းကင်ဘုံ ဥယျာဉ်တော်မှာ ဒီငှက်ကလေးဟာ အမြဲ တေးသီနေရမယ်။ ငါ့ရဲ့ ရွှေနိုင်ငံတော်မှာတော့ ဟောဒီ မင်းသားလေးဟာ ငါ့ကို အမြဲ ခစားနေရလိမ့်မယ် - လို့ ဘုရားသခင်က ကောင်းချီးပေးလိုက်တယ်။

ကလေးတို့ရေ၊ ပုံပြင်လေးကတော့ ဒါပါပဲကွယ်။ ကလေးတို့လည်း မင်းသားလေးနဲ့ ငှက်ကလေးလို ကြင်နာတတ်တဲ့ နှလုံးသားနဲ့ ကောင်းမြတ်တဲ့ စိတ်ထား ထားကြရမယ်ကွဲ့နော်။

ဘာသာပြန်သူ

ဦးအေးငြိမ်း
၂၇-၁၀-၀၉ ည ၁၁ နာရီ ၂၅ မိနစ်