ချင်ဒီးယန်း

(၁) ချင်ဒီးယန်း

 

စင်ကာပူတွင် လူမျိုးပေါင်းစုံ ဘာသာပေါင်းစုံတို့ လာရောက်နေထိုင်လုပ်ကိုင်ကြ၏။ 

စင်ကာပူသည် နိုင်ငံသေးသလောက် လူမျိုး၊ ဘာသာ၊​ ယဉ်ကျေးမှု၊ ဓလေ့ထုံးစံ ပေါင်းစုံလှ၏။ 

 

စင်ကာပူကို မလေးရှားမှ ခွဲထွက်ခါစက လူမျိုးရေး၊ ဘာသာရေးအဓိကရုဏ်းများ အကြီးအကျယ်ဖြစ်ခဲ့၏။

လူမျိုးရေး၊​ ဘာသာရေး အဓိကရုဏ်းများသည် မည်သူ့အတွက် အကျိုးရှိပါသနည်း။ မည်သည့် ကောင်းကျိုးများ ရပါသနည်း။ လူများစိတ်ဆင်းရဲ ပူပန်ရ၏။ ထိခိုက်ဒဏ်ရာရ၏။ ပိုဆိုးသည့်အခြေအနေ၌ လူသေမှုများပင် ဖြစ်၏။ ပစ္စည်းများ ပျက်စီးဆုံးရှုံးရ၏။ တစ်ဦးနှင့်တစ်ဦး အမုန်းပွားရ၏။ 

ထို့ကြောင့် စင်ကာပူတွင် လူမျိုးရေး၊​ ဘာသာရေး အဓိကရုဏ်းများ မဖြစ်ရလေအောင် စင်ကာပူအစိုးရသည် တင်းတင်းကြပ်ကြပ် ကိုင်တွယ်၏။

 

မနှစ်က ကောလိပ်တစ်ခုမှ ကျွန်ုပ်နှင့်ရွယ်တူ ဆရာတစ်ဦးသည် အတန်းထဲတွင် လူမျိုးရေး၊ ဘာသာရေးဆိုင်ရာ စော်ကား မော်ကားလုပ်၏။ ထိုဆရာကို ရုံးတင်တရားစွဲပြီး ပြင်းပြင်းထန်ထန် အရေးယူ၏။

မိန်းကလေးတစ်ဦးသည် အင်ဒိုနီးရှားဘာသာရေး အစွန်းရောက်တစ်ဦး၏ ဟောပြောမှုများကို နားထောင်ခြင်း စသည်တို့ လုပ်သဖြင့် အရေးယူခံရ၏။

 

သူတို့က အခြားလူမျိုး၊ ဘာသာများကို လေးစားတတ်စေရန်၊ မိမိနှင့် လူမျိုးမတူ၊ ဘာသာမတူသူများနှင့် ချစ်ချစ်ခင်ခင် နေထိုင်တတ်စေရန်တို့ကို ကလေးငယ်ဘဝကတည်းက racial harmony ဟု သင်ပေးလိုက်၏။ Racial Harmony Day မှာ ဇူလိုင်လ ၂၁ ရက်နေ့ ဖြစ်၏။ ထိုနေ့တွင် ကျောင်းသား/သူကလေးများသည် မိမိတို့ရိုးရာဝတ်စုံများကို ဝတ်ဆင် သွားကြရ၏။

 

ဆိုတော့ အနေနီးတော့ နီးစပ်ရာ ချစ်ခင်သွားကြသည်မှာ ဘာမှ အဆန်းတကြယ်မဟုတ်။

 

စင်ကာပူတွင် အိန္ဒိယအမျိုးသားနှင့် တရုတ်အမျိုးသမီးတို့ လက်ထပ်ကာ တစ်အိုးတစ်အိမ် ထူထောင်ကြ၏။ (စစ်တမ်းများ အရ တရုတ်အမျိုးသားနှင့် အိန္ဒိယအမျိုးသမီးတို့ လက်ထပ်တာ ရာခိုင်နှုန်းအားဖြင့် အတော်နည်းသည်ဆို၏။)

မလေးရှားတွင်မူ  အိန္ဒိယအမျိုးသားနှင့် တရုတ်အမျိုးသမီးတို့ ထိမ်းမြားခြင်းမှာ လက်ထပ်ခြင်းစုစုပေါင်း၏ ၂၀% ထိပင် ရှိသည်ဆို၏။

 

ဆိုတော့ အိန္ဒိယ+တရုတ်ဆိုတော့ မွေးလာတော့ ဘာလေးတွေ ဖြစ်လာမည်နည်း။

အစိုးရကတော့ အဖေမျိုးကိုလိုက်ပြီး လူမျိုးကို အိန္ဒိယ ဟု သတ်မှတ်ပေးပါသည်။

ထို့ပြင် သူတို့ကို China+Indian = Chindian ချင်ဒီးယန်းဟုလည်း ခေါ်ကြပါသေး၏။

 

သူတို့မျက်နှာပေါက်များမှာ ယောက်ျားလေးများက အိန္ဒိယဘက်နွယ်ပြီး မိန်းကလေးများမှာမူ ကျွန်ုပ်တွေ့ရသလောက် တရုတ်ဘက်နွယ်၏။ အဲလေ မြန်မာမျက်နှာပေါက်မျိုးဖြစ်ပါသည်။ (ငှယ် - ငါတို့မျက်နှာပေါက်မျိုး။ ဒါဆို အိန္ဒိယနဲ့ တရုတ် အကြားရောက်နေတဲ့ နာတို့ မြန်မာတွေကရော ချင်ဒီယားတွေများ ဖစ်နေသလား မပြောဒတ်။ စဒါဘာ စဒါဘာ။ အသားလွတ် လာလဲ ဆဲမနေကြနဲ့အူး။)

 

ကြည့်ချင်ကြရင် ဟောဒီ link မှာ သွားကြည့်။ ချင်ဒီးယန်းကောင်မလေးတစ်ယောက် ရေးထားတာ။

 

https://thesmartlocal.com/read/chindian/

 

သူရေးထားတာထဲက တချို့ကို ဖောက်သည်ချပါအံ့။ (အတိအကျ ဘာသာပြန်ထားတာမဟုတ်။ သဘောတရားကို ပြောခြင်းမျှသာ ဖြစ်၏။)

-        ငါ ကော်ဖီဆိုင်သွားတော့ နင်ဘာလူမျိုးလဲ လို့ မေးတယ်။ ငှယ် - စင်ကပူရီယမ်မှ စင်ကပူရီယမ်။ လုံးဝ ရေမရောဘူး လို့ဖြေတော့ ဟုတ်ပုလေ၊ နင်ဘယ်တိုင်းပြည်မှာ မွေးတာလဲ၊ ဘာလူမျိုးလဲ လို့ အမေးခံရတယ်။

-        အမေနဲ့ ဈေးသွားတော့ အမေက တရုတ်ပုံစံ၊ သူ့နောက်မှာ ခြင်းဆွဲလိုက်တဲ့ငါက အသားညိုညို၊ မျက်နှာပေါက် က တရုတ်မျက်နှာပေါက်မဟုတ်တော့ ငါ့ကို အမေ့ရဲ့ အိမ်အကူလို့ ထင်ကြတယ်။

-        ငါလား၊ ဟင့်အင်း - ငါကတော့ တရုတ်တွေရဲ့ အယူသီးမှုတွေရော၊ တချို့အိန္ဒိယကောင်မလေးတွေကိုပါ မကြိုက်ပါဘူး။ ငါကတော့ အဟိ၊ အနောက်တိုင်းစာတွေဖတ်၊ အနောက်တိုင်းရုပ်ရှင်တွေကြည့်နေတော့ အနောက်တိုင်းစတိုင်ကို ပိုကြိုက်မိတယ် ထင်ပါရဲ့။

-        နင်က တရုတ်ကောင်လေးကို ကြိုက်သလား။ အိန္ဒိယကောင်လေးကို ကြိုက်သလား။ ဟင့်အင်း - ငါ့အဖို့တော့ တရုတ်တို့ အိန္ဒိယတို့ဆိုတာ အပိုတွေပါ။ သူဘာအသားအရောင်ဖြစ်ဖြစ် ငါကြိုက်ဖို့သာ အရေးကြီးတာပါဘဲ။

-        ဘာစားမလဲ။ ဝက်သားစားလို့ရလား။ အမဲသားစားလို့ရလား။ ကြိုက်ရင်စား၊ မကြိုက်ရင်မစားနဲ့။ ဒါဘဲ။

-        တခြား ငါ့လို ချင်ဒီးယန်းကောင်မလေးတွေနဲ့ တွဲသွားတော့ ငါတို့ဟာ ညီအစ်မတွေလားလို့တောင် မေးကြရဲ့။

 

စင်ကာပူရောက် မြန်မာများတွင်လည်း အခြားလူမျိုးများနှင့်ယူသူတို့ (ဥပမာ - မလေးအမျိုးသမီး၊ ဖိလစ်ပိုင်အမျိုးသမီး၊ အိန္ဒိယအမျိုးသား၊ တရုတ်အမျိုးသား စသည်) ရှိ၏။ အချို့သူတို့ နှာခေါင်းရှုံ့ကောင်း ရှုံ့ကြမည်ဖြစ်သော်လည်း ကျွန်ုပ် အဖို့မူ ဘာမှ ထူးထွေတည့် အံ့ရာသော် မဟုတ်ပါ။ ကျွန်ုပ်အဖို့မူ လူယောက်ျားတစ်ယောက်နှင့် လူမိန်းမတစ်ဦးတို့ ချစ်ခင် ပေါင်းသင်း နေထိုင်ကြတာသာ ဖြစ်ပါသည်။

 

အမှန်တကယ်ဆို မြန်မာနိုင်ငံထဲတွင်လည်း တရုတ်အမျိုးသားနှင့် မြန်မာအမျိုးသမီး စသည်ဖြင့် အိမ်ထောင်ဖက်ကြတာ ရှိပါသည်။ ကျွန်တော့်မိတ်ဆွေများထဲတွင် ငါးမူသားတရုတ်၊ တစ်မတ်သားတရုတ်တို့ ရှိ၏။ 

ကျွန်တော် မြန်မာတွေကို မကြိုက်သည့်အချက်ထဲတွင် လူမျိုးရေးခွဲခြားတာ ပါ၏။ (ကျွန်ုပ်က လူမျိုးရေးခွဲခြားတာကို မကြိုက်ဟု ဆိုတာကို မကြိုက်သူများအဖို့ ကွန်မင့်ထဲ၌ ငါနှင့်ကိုင်တုတ်သွားနိုင်ပါသည်။)

 

အကယ်၍ အသင်သည် FRC တစ်ယောက်ဖြစ်အံ့။ သင့်ဘာသာသင် မိုးပျံအောင် တော်နေပါစေ။ သင့်အား ဆေးတက္ကသိုလ် တက်ခွင့် ပြုမည်မဟုတ်။ အဲသဟာ ဘာကြောင့်ပါနည်း။ အဲသည်ဥပဒေကို ထုတ်ခဲ့သူအား ကျွန်ုပ်က ဖင်ပိတ်ကန်ချင်သည်ဟု ဤနေရာကနေ ပြောလိုက်ပါ၏။ (ဤကဲ့သို့သော ပေါက်တတ်ကရတွေ လုပ်မှုကြောင့်ပင်လျှင် မြန်မာပြည်သည် ကမ္ဘာပေါ်၌ ဘိတ်ချီးဖြစ်နေရတာဟု ကျွန်ုပ်ဆိုလျှင် လွန်သည်ဟု အသင်တို့ ပြောမည်လား။)

 

(၂) အမျိုးပျောက်မှာ စိုးကြောက်လှပါသည်။

 

ကျွန်ုပ်အလွန်မျက်မုန်းကျိုးလှသည့် အဆို တော်တော်များများ ရှိသည့်အနက် “အမျိုးပျောက်မှာ စိုးကြောက်လှပါသည်။” ဆိုတာလည်း တစ်ခုပါ၏။

 

အမှန်ဆို ဤသည်မှာ သွေးရိုးသားရိုး ထွက်လာသည့် အဆို မဟုတ်။ 

ယောက်ျားရင့်မကြီးများက မိန်းမလို မိန်းမရ လုပ်သည့် ညစ်တီးပတ်တတ် အလုပ်တစ်ခုသာ ဖြစ်ဘိ၏။

 

ဒေါ်အောင်ဆန်းစုကြည်သည် မိုက်ကယ်အဲရစ်ကို ယူခဲ့၏။

ဤသည်ကို ရည်စူး၍ စစ်ယူနီဖောင်းဝတ်ထားသည့် လူကြီးများက စောင်းမြောင်းဆဲဆိုခြင်း တစ်ခုမျှသာ ဖြစ်၏။

 

၁၉၈၈ အရေးအခင်းကြီးပြီးသည့်နောက် ဒေါ်စိန်အေးကျောင်းထွက်များ ညစ်တီးစုတ်ပဲ့လုပ်ခဲ့သည့် လုပ်ရပ်များမှာ အတော်များလှ၏။ ထိုအထဲတွင် ဤ “အမျိုးပျောက်မှာ စိုးကြောက်လှပါသည်။” လည်း တစ်ခုအပါအဝင်ဖြစ်၏။

 

 

ကျွန်ုပ် ယခု အသက် (၆၀) ကျော်ပါပြီ။

ကျွန်ုပ် တစ်သက်တာကာလပတ်လုံး ထို စစ်ဗိုလ်ရှုပ်ကြီးများ လူကြီးလူကောင်းတို့ကဲ့သို့ ပြုမူ၊ ပြောဆို၊ လုပ်ကိုင်သည်များ ကို တရံတဆစ်မှ မတွေ့ကြုံခဲ့ရစဖူး။

အသင်တို့သည် လူကြီးလူမကောင်းတို့၏ အပြုအမူ၊ အပြောအဆို၊ အတွေးအကြံများကို သိလိုသည်ဖြစ်အံ့။ အနှီ စစ်ဗိုလ်ရှုပ်ကြီးများ မည်ကဲ့သို့ ပြုမူ၊ ပြောဆို၊ ကျင့်ကြံနေထိုင်သည်ကို လေ့လာကြည့်ပါ။ ၎င်းတို့၏ အတွေးအခေါ်၊ အပြောအဆို၊ အပြုအမူမှန်သမျှမှာ လူကြီးလူမကောင်းတို့၏ အပြုအမူ၊ အပြောအဆို၊ အတွေးအကြံများသာ ဖြစ်ဘိ၏။

အဘယ်ကြောင့်ဆိုသော် ၎င်းတို့သည် လူကြီးလူကောင်းဟူသည် အဘယ်နည်းဆိုသည်ကို စိုးစဉ်းမျှ မသိကြသောကြောင့် ဖြစ်၏။

 

(၃)

 

နောက်တစ်ခုမှာ လယ်တီပဏ္ဏိတ ဦးမောင်ကြီး (ထင်ပါသည်) ရေးသည့်ဆောင်းပါးဖြစ်၏။ ထိုဆောင်းပါးတွင်လည်း အလားတူပင် မြန်မာမိန်းကလေးများ လူမျိုးခြားတို့ကို မယူဘို့အရေး တိုက်တွန်းရေးသားထား၏။

 

ပို၍ အံ့ဩစရာကောင်းသည်မှာ ထိုဆောင်းပါးကို တက္ကသိုလ် ပြဋ္ဌာန်းစာအုပ်တွင် ထည့်သွင်းပြဋ္ဌာန်းထားခြင်း ဖြစ်၏။ 

အသင်တို့ကား အတော် စိတ်ပျက်စရာကောင်းသူများပါပေ။

 

အသင်တို့သည် ဘုန်းကြီးရေးခဲ့သည့်စာများကို လေ့လာကျက်မှတ်ရမည့်အစား ဘုန်းကြီးခေါင်းကို ရွှေချခြင်းတည်း ဟူသည့် ဘုံမဝင် ဆုံမဝင်အလုပ်များကိုသာ လုပ်တတ်ကြ၏။ ဤသို့လုပ်ပြခြင်းအားဖြင့် အသင်တို့သည် “ကျွန်ုပ်တို့ကား လူ့အဆံချောင်၊ လူ့ဘူးတောင်းများသာ ဖြစ်ပါသည်” ဟု ကိုယ့်ကိုယ့်ကိုယ် ကြော်ငြာနေကြ၏။

 

အသင်တို့သည် အသွင်သဏ္ဍာန်နှင့် အနှစ်သာရကို ခွဲခြားနားမလည်ကြသူများဖြစ်ကြောင်း ကိုယ့်ကိုယ်ကိုယ်ဖော် မသူတော် လုပ်ကြ၏။ 

 

ယခု (၂၁) ရာစုကို ထက်ဝက်ကျိုးတော့မည်။ အသင်တို့၏ $$ကျင့်များကို မဖျောက်ကြသေး။ 

မိမိတို့၏ လုပ်ရပ်များကို ယခုတိုင် နောင်တမရကြသေး။

သည်ပုံနှင့်ဆို မိုးကြီးချုပ် ချုပ် . . . (အဲလေ - အခုကတော့ မိုးတင်ချုပ်တာမဟုတ်ဘူး။ သန်းခေါင်ကျော်လို့ လင်းကြက်တောင် တွန်နေပါပေါ့။)

 

အေးငြိမ်း

၁ ဇွန်လ၊ ၂၀၂၃