ချီးကျူးစရာမဟုတ်သော အလုပ်တစ်ခု အကြောင်း

See something, say something ဆိုသောစကားအရ မနေနိုင်၍ ပြောလိုက်ရဦးမည်။

 

များမကြာသေးမီက tik tok တွင် လူ (၁၅) သိန်း၊ ဖေ့စ်ဘုတ်တွင် လူ ၂ သိန်းခွဲ ကြည့်ထားသည်ဆိုသော ဗီဒီယိုလေး တစ်ခုကို ဖေ့စ်ဘုတ်၌ တွေ့လိုက်ရ၏။

 

အခြားမဟုတ်။ ကျောင်းဆရာမတစ်ဦးက ကျောင်းဝတ်စုံအပြည့်နှင့် အိမ်သာထဲ လက်နှိုက်ကာ သန့်ရှင်းရေးလုပ်နေပုံ ဖြစ်၏။

 

 

https://www.facebook.com/pann.cherry.92775/videos/351467194120480 

ကျောင်းဆရာမတစ်ဦးကို မဆိုထားပါနှင့်။ သာမန်လူတစ်ဦး ဤကဲ့သို့ လုပ်နေသည်ကိုပင်လျှင် လက်ခံနိုင်စရာအကြောင်း မရှိ။ မည်သူသည် သည်မျှညစ်ပတ်လှသော အိမ်သာခွက်အတွင်း လက်ဗလာနှင့် နှိုက်ပါမည်နည်း။ အိမ်သာခွက်ကို လက်ဖြင့်နှိုက်ဆေးရမည်ဟု သူထင်နေကတည်းက တစ်ခုခုလွဲနေပြီ ဖြစ်၏။ ထိုဗီဒီယိုအောက်တွင် ဤကဲ့သို့လုပ်ပုံမှာ မဟုတ်ကြောင်း။ တစ်ခုခုဖြင့် နှိုက်ရမည် (သို့) လက်အိတ်စွပ်ကာနှိုက်ရမည်ဖြစ်ကြောင်း ကွန်မင့်များစွာ ရေးထားသည်ကို တွေ့ရ၏။ ဤသည်ကို ကြည့်ခြင်းအားဖြင့် ပုံမှန်လူဖြစ်ပါက ဤကဲ့သို့သန့်ရှင်းရေး မလုပ်သင့်ကြောင်း သိမည်ဆိုတာ သေချာလှ၏။

 

ထိုဗီဒီယိုအောက်ရှိကွန်မင့်များအရ ထိုဆရာမသည် ဧရာဝတီတိုင်းရှိ၊ အခြေခံပညာ x x x ကျောင်းက ကျောင်းအုပ်တစ်ဦး ဖြစ်ကြောင်း သိရ၏။ သို့ဆိုလျှင် ဤကဲ့သို့မလုပ်သင့်ကြောင်း ၎င်း၌ အသိဉာဏ်မရှိတော့ပြီလော။ အဘယ်ကြောင့် လုပ်သည်ကို ကာယကံရှင်ကိုယ်နှိုက်မှ​ သိပါလိမ့်မည်။

 

၎င်းသည် သာမန်လူတစ်ဦးဆိုပါက ကျွန်ုပ်အနေနှင့် ဘာမှ ပြောစရာမရှိ။ သူသည် ကလေးငယ်များကို သင်ပြပေးနေသည့် ဆရာမတစ်ဦးဖြစ်၏။ သူသည် ဤကဲ့သို့ မဟုတ်က၊​ မဟတ်ကများကို ကလေးငယ်များအား သင်ပြပေးပါက ငါးပါး မမှောက်ပါသလော။ အကြီးအကျယ်မှောက်၏။ ဤသည်မှာ ထိတ်လန့်စရာကောင်းသည့် အခြေအနေတစ်ခုဖြစ်၏။

 

ကလေးဟူသည် ဆရာဆရာမ သင်ပေးလိုက်သည်ကို စွဲစွဲမြဲမြဲ မှတ်ယူထားတတ်၏။ 

ဤကဲ့သို့သော မဟုတ်ကမဟတ်ကကြီးကိုသာ ကလေးအနေနှင့် မှတ်ယူသွားပါက ၎င်းအတွက် အန္တရာယ်ဖြစ်၏။

မြန်မာပြည်တဝှမ်း ဤကဲ့သို့သော ဆရာ/ဆရာမများ မည်မျှရှိနေပါသနည်း။

ဝမ်းနည်းစရာ ကောင်းလှပေစွ။

 

အနှီဆရာမသည် အိမ်သာကို ကိုယ်တိုင်သန့်ရှင်းရေးလုပ်ပေးတာ မှန်၏။

သို့သော် ချီးကျူးစရာလုပ်ရပ်ကား မဟုတ်ပါချေ။ 

၎င်းကိုယ်တိုင် အဲသလိုလုပ်စရာ လိုပါသလော။ 

အနှီဆရာမသည် ထိုအိမ်သာကို နေ့တိုင်းသန့်ရှင်းရေး လုပ်နိုင်ပါမည်လော။ မည်မျှကြာအောင် လုပ်နိုင်ပါမည်နည်း။

 

အိမ်သာသန့်ရှင်းရေးလုပ်ရမှာ ကျောင်းလုပ်သား၏ တာဝန်ဖြစ်၏။

ကျောင်းလုပ်သားမရှိ ဆိုငြားအံ့။ ကလေးများကို စည်းရုံးကာ သူတို့ပါထားသောအီးကို သူတို့ဘာသာ သန့်ရှင်းတတ်စေရန် လေ့ကျင့်သင်ကြားပေးရမည်။ ကလေးများ သူတို့ဘာသာမလုပ်လျှင် ကိုယ်ကရှေ့ဆောင်ကာ သူတို့ကို ကိုယ်တိုင်လုပ် တတ်စေရန် နည်းပေးလမ်းပြ လုပ်နိုင်၏။ 

 

ကလေးများသည် ကိုယ်ပါထားသည့်အီးကို ကိုယ်တိုင်ဆေးရမည်ဟူသည့် အသိကို ရသွားလျှင် သူတို့တစ်သက်တာ ကောင်းသွားစရာရှိ၏။ ထို့ထက် ကိုယ့်တာဝန်ကိုယ်ယူတတ်အောင်သာ သင်ပေးနိုင်လျှင် အိမ်သာဆေးတာမျှသာမက မိမိပစ်သည့်အမှိုက်ကိုလည်း မိမိကိုယ်တိုင် သန့်ရှင်းတတ်သွားလိမ့်မည်။ 

 

များမကြာလှသောနှစ်များဆီက စည်ပင်လုပ်သားများသည် အလွန်ညစ်ပတ်လှသော မြောင်းအတွင်းဆင်းလျက် မြောင်းဆယ်နေကြသည်ကို ဖေ့စ်ဘုတ်ကောင်းမှုဖြင့် တွေ့ရ၏။ ရေမြောင်းကို အမှိုက်ပစ်စရာနေရာဟု မှတ်ယူကြကုန် သော ကျွန်ုပ်တို့ မြန်မာပြည်ကြီးတွင် မြောင်းအတွင်း၌ ဗရုတ်သုက္ခပေါင်းစုံပါလာမည်ကို အသင်တို့ တွေးကြည့်နိုင်ပါ၏။ အလုပ်သမားများသည် ထိုမြောင်းအတွင်း ဆင်းဆယ်ရန် လိုအပ်ပါသလော။

 

ကျွန်ုပ်လည်း မနေနိုင်မထိုင်နိုင် ကျွန်ုပ်နှင့်ရင်းနှီးသော တာဝန်ရှိလူကြီးတစ်ဦးထံ ထိုကိစ္စပြောပြမိ၏။ မြောင်းအတွင်းသို့ လူမဆင်းဘဲ ဘယ်ပုံဘယ်နည်းလုပ်လျှင် ရသည် ဆိုသည့်အကြောင်း။ မြန်မာပြည်မှ လူကြီးများသည် ကျွန်ုပ်ပြောသည် များကို ခွေးဟောင်တာလောက်မှ တန်ဘိုးမထားမှန်း သိလျက်နှင့် ပြောမိတာ ကျွန်ုပ် အမှားဖြစ်ချေ၏။

 

မကောင်းတတ်၍ ၎င်းအကြောင်းပြန်ထားသည့် email များကိုမူ မပြတော့ပါ။

 

Lead by example ဟူသည့် အင်္ဂလိပ်စကားအရ လူအများကို ရှေ့ဆောင်ရှေ့ရွက်ပြုမည့်သူများသည် လူအများ နမူနာ ယူနိုင်မည့် အပြုအမူ၊ အပြောအဆို၊ အတွေးအခေါ်ဖြစ်စေရန် တတ်နိုင်သမျှ စောင့်ထိန်းရမည် ဖြစ်၏။ 

 

ဤသည်ကို လုပ်ယူလို့၊ ကျင့်ယူလို့ ရပါသည်။ လုပ်ဖို့ကျင့်ဖို့ပဲ လို၏။

 

ကျွန်ုပ်မိတ်ဆွေများသည် ချင့်ချိန်နှိုင်းဆနိုင်သူ လူကြီးလူကောင်းများ ဖြစ်ကြပါစေကုန်သတည်း။

 

ကျေးဇူးတင်ပါသည်။

 

အေးငြိမ်း

၂၅ ဒီဇင်ဘာ၊ ၂၀၂၃

ဝမ်းနည်းရသော နေ့တစ်နေ့

ချစ်ခင်လေးစားရပါသော ဆရာကြီး ဒေါက်တာကျော်သန်း ဘဝတစ်ပါးသို့ ပြောင်းရွှေ့သွားကြောင်း ကြားသိရသည့်အတွက် များစွာ စိတ်မကောင်း ဖြစ်မိပါသည်။ ဆရာကြီး ကောင်းရာသုဂတိ ရောက်ပါစေခင်ဗျာ 

ကျွန်ုပ် မရေးချင်သည့် အကြောင်းတစ်ခု

သည်အကြောင်းတွေ ကျွန်ုပ် မရေးချင်ပါ။

မည်သူမှလည်း ရေးမည်မဟုတ်ပါ။

အဘယ်ကြောင့်ဆိုသော် ၎င်းတို့ ထမင်းအိုးနှင့် တိုက်ရိုက်ပတ်သက်နေ၍ ဖြစ်၏။

 

ယခု စလုံးအစိုးရက ဒစ်ဂျစ်တယ်လူနေမှုစနစ်ကို ပြောင်းနေလေရာ အကုန် ဒစ်ဂျစ်တယ်အောင် ကြိုးစားနေ၏။

မှတ်ပုံတင်ကတ်ကိုလည်း ဒစ်ဂျစ်တယ်၏။

<Long Term Pass သမားများကို ကတ်ထုတ်မပေးတော့။ SingPass မှ Digital IC သာ ပေးတော့၏။ သို့အတွက် ကတ်ကျပျောက်မှာ ပူစရာမလိုတော့။ ကတ်ကိုနေရာတကာ ယူသွားစရာလည်း မလိုတော့။ ဖုန်းလေးဖွင့်ပြလိုက်ရုံ ဖြစ်၏။>

စာရွက်စာတမ်းတွေ တင်ပြရတော့လည်း ဒစ်ဂျစ်တယ်နှင့်တင်ပြရ၏။

ပိုက်ဆံပေးတော့လည်း ဒစ်ဂျစ်တယ်နှင့် ပေးရ၏။

ကားရထားစီးတော့လည်း ဒစ်ဂျစ်တယ်။

ဒချိတော့လည်း ဒစ်ဂျစ်တယ် (ဟုတ်ပေါင် အရှိန်လွန်ကုန်ပြီ။)

 

ဆိုတော့ အလုပ်သမားတွေ စာမေးပွဲဖြေတော့လည်း ဒစ်ဂျစ်တယ်လေ၏။

တွေးကြည့်ပါခညာ။

မနေ့ကမှ ထွန်တုံးဖြုတ်ပြီး ရောက်လာတဲ့ကောင်တွေကို အခု ဒစ်ဂျစ်တယ်ခိုင်းတော့ ကျွန်ုပ်တို့မှာ ဒွတ်ခနှင့် လှလှနှင့် တိုးလေတော့၏။

 

ပထမ - အင်တာနက် ဒေါင်းသည့်ပြဿနာ။

တစ်ယောက်နှစ်ယောက်တည်းဆို ဘာပြဿနာမှ မရှိ။

ဒါပေသိ တစ်တန်းကို ၁၅ ယောက်ပဲထား။ ၃ တန်းလောက်ပြုံဆွဲလိုက်တော့ ဝိုင်ဖိုင်မှာ ကျွန်ုပ်တို့ရွာမှ စပါး ၂၀ တင်ထား သည့် နွားလှည်းကြီးကဲ့သို့ အိညောင့်အိညောင့် ဖြစ်သွားလျက် နောက်ဆုံးတော့ ဒေါင်းသွားလေ၏။

 

နဂိုကမှ သောက်တလွဲဘာသာပြန် မေးခွန်းတွေနှင့် တိုင်ပတ်နေကြကုန်သော ငမိုက်သားလေးများမှာ မျက်လုံးပြူး၊ မျက်ဆန်ပြူးနှင့် ကျော့်ဟာ ထွက်သွားပြီ။ ရှေ့ဆက်မသွားတော့ဘူး စသဖြင့် ဝိုင်းအုံလာကြလေ၏။ 

တစ်ယောက်နှစ်ယောက်တည်းဆို အကြောင်းမဟုတ်။ ကျွန်ုပ် လုပ်ပေးလို့ရ၏။

အခုဟာက တစ်တန်းလုံးဆိုတော့ ဟဲ့၊ လာကြပါအုံးဟဲ့။ ငါတစ်ယောက်တည်း ဒီမှာ ဒွတ်ခနဲ့လှလှနဲ့ တွေ့နေပြီဟု admin ကို လှမ်းခေါ်ရ၏။

 

ကျွန်ုပ်က လုပ်လို့မရပါဘူး ဆိုသဟာကို ဘာဖစ်လို့ ညာဖစ်လို့နှင့် အပြစ်တင်နေသည့် ထိုငနဲများမှာ ငင့် - နာတို့လည်း လုပ်လို့မရပု၊ လိုက်ဒက်လား ဆိုကာ ဖင်ကုတ်လိုက် ခေါင်းကုတ်လိုက် ဖြစ်နေလေ၏။

ကျွန်ုပ်လည်း ငါ့ဝဋ်တော့လည်ပြီဆိုကာ ငါးသလောက်ပြုံးကလေး ပြုံးနေလေသော ဟူသတတ်။

 

အချို့မှာကား မေးခွန်းတစ်ခုကနေ နောက်တစ်ခုကိုအပြောင်း တီးတောင် တီးတောင်နှင့် ဝိုင်းကြီးပတ်ပတ် ဒူဝေဝေ လည်နေသည့် အဝိုင်းကလေးကို ကသိုဏ်းရှုနေကြရကုန်၏။

 

အဲသဟာထားပါအုံး။

 

နောက်တစ်ခုဆိုးသည်မှာ $$$တလွဲဘာသာပြန်များဖြစ်၏။ 

အလုပ်သမားတွေမပြောနှင့်။ ကျွန်ုပ်ဖတ်တာတောင် နားမလည်။ 

နောက်ပြီး မြန်မာစာမဟုတ်၊ မွန်စာမဟုတ်၊ ကျောက်စာမဟုတ်တာတွေလည်း ပါသေး၏။

ပိုဆိုးသည်မှာ အလုပ်သမားတွေ အတန်းမှာ ထည့်သင်မထားတာတွေကိုပါ ထည့်မေးထားခြင်း ဖြစ်လျက် -

အဆိုးဆုံးကား နိုင်တီးဂွမ်တီးက ဥပဒေတွေပါ ထည့်မေးထားခြင်းဖြစ်သတည်း။ 

အဆိုးတကာ့အဆိုးဆုံးကား တချို့မေးခွန်းများ၏ အဖြေများမှာ ဘယ်အဖြေမှန်မှန်းမသိ။ ယခွမ်းဒဲ့မှ 

 

နောက်တစ်ခုမှာ ယခင် စာရွက်ပေါ်မှမေးခွန်းများကို နားမလည်ပါက အင်္ဂလိပ်မေးခွန်း တောင်းကြည့်လို့ရ၏။

မေးခွန်းက တစ်စုံတည်းမဟုတ်။ အစုံ (၄၀) ထုတ်ထားတာဖြစ်၏။

ဥပမာ - မြန်မာမေးခွန်း Set No. 15 ဆိုလျင် အင်္ဂလိပ်မေးခွန်း Set No. 15 နှင့်တိုက်ကြည့်နိုင်၏။

ယခု online မေးခွန်းမှာ အလုပ်သမား၏ FIN No. နှင့် ဝင်ရတာဖြစ်သဖြင့် ကြည့်ချင်တိုင်း ကြည့်လို့မရ။ 

ကြည့်လို့ရတယ်ပဲ ထားပါဦး။ Online နှင့် ဝင်ထားသည့်မေးခွန်းမှာ Set No. မပါ။ သည့်အတွက် မည်သည့် Set No. ကို မည်ကဲ့သို့ ရွေးမည်နည်း။ ကျွန်ုပ်ထင်တာကတော့ Fin No. နှင့် ဝင်လိုက်လျှင် မေးခွန်း set no. ကို ကျပမ်းချပေးလိုက်တာ ထင်ပါသည်။ 

 

ဆိုတော့ အကယ်၍ အလုပ်သမားများ စာမေးပွဲကျသည်ဆိုပါစို့။

(ကျလည်း ကျပါသည်။ ကျလိုက်သမှ ၁၂ ယောက်ဖြေတာ ၆ ယောက်ကျ၏။ သို့သော် ယခုက စမ်းသပ်ကာလမို့ တက်ဘလက်နှင့်မအောင်လျင် စာရွက်နှင့် ပြန်ဖြေခိုင်းလို့ တော်ပါသေး၏။ စာရွက်နှင့်ပြန်ဖြေခိုင်းတာက ဒီဇင်ဘာလ ၃၁ ရက်နေ့ထိပဲ ဖြစ်ပြီး နောက်ပိုင်း လုပ်ခွင့်မပြုတော့။)

ပေါက်တတ်ကရမေးခွန်းကြီးများကို မဖြေတတ်လို့ စာမေးပွဲကျလျင် အလုပ်သမားအတွက် တရားပါမည်လား။

 

ကုမ္ပဏီတွေက ပထမတကြိမ်ပဲ သင်တန်းကြေးပေးတာဖြစ်၏။ ကျပြီးပြန်ဖြေရလျှင် အလုပ်သမားက သင်တန်းကြေးကို ကိုယ့်ဘာသာကိုယ် ပေးရမည်။ သင်တန်းကြေးက စင်းဒေါ်လှ ၁၂၀။ ဗမာငွေနှင့် ၃ သိန်း။

 

ဆိုတော့ -

 

ပြော မပြောချင်တော့ပါ . . . 

စက်ပျက်ချက် . . . 

 

အေးငြိမ်း

၂၂ ဒီဇင်ဘာလ၊ ၂၀၂၃

ကျွန်ုပ် အလိမ်ခံရခြင်းမှ လက်မတင်ကလေး လွတ်လာခဲ့သည် ဆိုခြင်းအကြောင်း

မနေ့မနက် ၁၁ နာရီက CNA သတင်းတွင် သတင်းထူးတစ်ခု တွေ့လိုက်မိ၏။

“စလုံး ဒုဝန်ကြီးချုပ်ကို စလုံးဘဏ်က တီဗီ live show တစ်ခု၌ ပြောဆိုခြင်းအတွက် တရားစွဲခြင်း”

ဆိုတော့ ကျွန်ုပ်လည်း ပြူးပြဲဖတ်မိ။

 

အဲ့လယ် -

သူ့ဟာက စိတ်ဝင်စားစရာ အကောင်းသားခင်ဗျ။

ဒုဝန်ကြီးချုပ် (မစ္စတာဝေါင်း) က အင်တာဗျူး၌ ပြောသည်များကို ခညားတို့နားလည်အောင် ကျုပ်က အတိုချုပ် ရေးပြပါမည်။

 

ဝေါင်း - ဟကောင်ရ - သူဌေးဖြစ်ဘို့များ ဘာမှ အလုပ်လုပ်နေစရာမလိုဘူးလကွ။ ယခွမ်း

ဘယ်လိုလုပ်ရမယ်ဆိုတာ မင်းနားလည်သွားပြီဆိုတာနဲ့ ပိုက်ဆံတွေ ဝေါကနဲ ဝေါကနဲ မင်းအိပ်ကပ်ထဲ ဝင်လာလိမ့်မယ်။

 

မာတင် (အင်တာဗျူးသူ) - သူဌေးတွေကတော့ ပြောတာပဲ။ ဒါပေမယ့် လူတွေကတော့ သူတို့မိသားစုတွေအတွက် အသည်းအသန် လုပ်နေကြရတယ်။​ လုပ်လို့ရတဲ့ပိုက်ဆံနဲ့တောင် မလောက်ကြပါဘူးဗျာ။

 

ဝေါင်း - ဘာတယ်။ မင်းက ငါအလုပ်မလုပ်ဘူးထင်နေတာလား။ တစ်ယောက်ယောက်က ငါဟာ အင်မတန် ကံကောင်းတဲ့လူလို့ပြောလာတဲ့အခါ ငါကတော့ ဘူး ထွားဟားဟားဟား လို့ ဟက်ဟက်ပက်ပက် ရယ်လိုက်တာပဲကွ။

ဒီမယ်သယ်ရင်း - မဒူစမ်းပါနဲ့ကွာ။ ၂၁ ရာစုအင်တာနက်ခေတ်ကြီးမှာ အင်တာနက်သုံးပြီး သန်းကြွယ်သူဌေးဖြစ်ဘို့ အခွင့် အလမ်းတွေ လူတိုင်းအတွက် ပွင့်နေသကွ။ ညှင်းညှင်းညှင်း

 

မာတင် - တယ်လဲစာတဲ့ဆိုပါလားကိုယ့်လူရယ်

 

ဝေါင်း - ဘာလဲမင်းကမယုံဘူးလား။ ကိုင်း ပြောနေကြာရော့၊ ငါ့ကို မင်းဖုန်းပေး။ ငါ လက်တွေ့လုပ်ပြမယ်။

 

(မစ္စတာဝေါင်းက မာတင်၏ဖုန်းကို ယူ၊ Account ဖွင့်၊ ပိုက်ဆံ ၂၅၀ ထည့်ခိုင်းပြီး ဆက်စကားပြော။ သူတို့ စကားပြော နေစဉ်အတွင်း မိနစ် ၂၀ လောက်အကြာ account ကို ဖွင့်ကြည့်လိုက်တော့ ခုနက ထည့်ထားသည့် ပိုက်ဆံ ၂၅၀ ကနေ ၂၉၇ ဖြစ်နေတာ တွေ့။ ငွေဝင်ငွေထွက် အသေးစိတ်ကိုကြည့်တော့ ငွေအဝင်အထွက် ၃ ခုပြထားပြီး ပထမအကြိမ်တွင် $6.78, ဒုတိယအကြိမ်တွင် $15.29, တတိယအကြိမ်တွင် $25.36 ဝင်ထားတာတွေ့။ စုစုပေါင်း မိနစ် ၂၀ အတွင်း ပိုက်ဆံ $47.43 အမြတ်ထွက်။ ဟိုက်ရှာလဘတ်စ်ခ်ပ်တ်)

 

ငွေအဝင်အထွက်များကို screen shot ရိုက်ကာ ပြလိုက်သေး၏။ 

 

ဝေါင်း - ဟား ဟား ဟားစ်။ မင်းတွေ့ပြီမဟုတ်လား။ အခုမင်းမှာ ၂၅၀ ရှိတယ်။ ၄ ပတ်လောက်အတွင်းမှာ မင့်ပိုက်ဆံဟာ တစ်သိန်း၊ ဒါမှမဟုတ် တစ်သိန်းခွဲလောက်တောင် ဖြစ်လာနိုင်တယ်။ ဘူးထွားဟားဟား။ 

မင်းလုပ်ရမှာက $#@% မှာ register လုပ်လိုက်ရုံပဲလကွ။ နောက်ပြီး မင်းပိုက်ဆံတွေကို ကြိုက်တဲ့အချိန်၊ ကြိုက်တဲ့ဘဏ် မှာ သွားထုတ်ပေတော့။

 

ထိုနံရောအခါ စင်ကာပူဘဏ်လည်း မျက်လုံးပြဲလျက် အောင်မငီး၊ ငါးပါးတွေတော့ မှောက်ပါပြီ ဆိုကာ သူတို့ အင်တာဗျဲ မပြီးခင်ပင် ဖုန်းဆက်လျက် ချက်ချင်းရပ်ခိုင်းလိုက်လေ၏။ သို့သော် အင်တာဗျူးထားတာတွေကို ဖမ်းယူထားလိုက်နိုင် သဖြင့် CNA က ပြောသမျှ အကုန်ချရေးလိုက်လေတော့သတည်း။

 

အိပ်နေရင်းပိုက်ဆံရမည်ဆိုတော့ ကျွန်ုပ်လည်း သူပြောသည့် link ကို ဝင်လျက် register လုပ်ရန် ကြိုးပမ်းလေသော ဟူသတတ်။

 

သို့သော် မလုပ်ရဲ။ ရင်တုန်ပန်းတုန် (ပန်းတုန်တယ်ဆိုတာဘာလဲ လာမမေးပါနှင့်။ ကျွန်ုပ်လည်းမသိ) ဖြစ်နေသောကြောင့် အိမ်ပြန်ရောက်သော် သားကိုတိုင်ပင်ရ၏။ သားက တကယ်လို့ အဲသလိုလုပ်ရင် အဖမ်းခံရနိုင်သလား ဟု မေး။ ကျွန်ုပ် လည်း ဟကောင်ရ၊ ဒါ ဒုဝန်ကြီးချုပ်ကိုယ်တိုင် ပြောတာလကွ ဆိုတော့ သားနှင့် အချီအချပြောကြရင်း register လုပ်ဖို့ ဆုံးဖြတ်။

 

Register လုပ်တာ ဘာမှမကြာ။ တစ်မိနစ်တောင်မကြာ။ စက္ကန့် ၃၀ လောက်ပဲ ကြာပါမည်။ Register လုပ်ပြီးတော့ account ထဲကို ပိုက်ဆံထည့်ရမည်။ အနည်းဆုံး ၂၅၀။

 

အဲသဟာကို ကျွန်ုပ်က ကြောက်တာဖြစ်၏။

ပိုက်ဆံထည့်ဘို့ ကျွန်ုပ်၏ ကတ်နံပါတ်တွေ၊ အကုန်ပေးရ၏။ 

မတော်ကိုယ့် account ထဲက ပိုက်ဆံတွေ ဘတ်သွားလျင် မခက်ပါလား။ 

ကတ်နံပါတ်တွေရိုက်ထည့်ပြီးမှ -

သား - ခဏနေအုံးကွ။ အဲဒီကောင်တွေ ဘယ်လောက်စိတ်ချရတယ်ဆိုတာ နည်းနည်းလောက် survey လုပ်ကြည့်ရအောင် ဆိုကာ သားအဖနှစ်ယောက် အင်တာနက်တခွင် ပြဲပြဲစင်အောင် မွှေနှောက်ရှာကြ၏။

 

အတော်လေးကြာတော့ သားက “Better don’t” ဟုဆို၏။

ကျွန်ုပ်တို့ အလုပ်ရှုပ်နေစဉ်အတွင်း ဖုန်းနှစ်ခါလာ၏။

ပထမတော့ ကျွန်ုပ် ကောင်းကောင်းမွန်မွန်ပြန်ဖြေပါ၏။

လမ်းနာမည် ဖြည့်ပါ။ Postal code ဖြည့်ပါ ဆိုတော့ အဲသဟာတွေ ငါသိပါတယ်ကွာ။ မင်းအကူအညီမလိုပဲ ငါ ဖြည့်တတ်ပါတယ် ဟု ပြောကာ ဖုန်းချလိုက်၏။

ခဏနေတော့ ပြန်ဆက်ပြန်၏။ မင်း deposit ထည့်လိုက်။ ပိုက်ဆံထည့်ပြီး blah blah blah . . .

ငါ သိပါတယ်ကွာ။ အခု ငါတို့ လုပ်နေတယ်။

မင်းမသိရင် ငါပြောပြမယ်။ blah blah blah . . . 

 

ကျွန်ုပ်လည်း စိတ်တိုလာကာ အဲဒါတွေ ငါလုပ်တတ်တယ်။ ငါ့ဘာသာလုပ်မယ်။ မင်းထပ်ဖုန်းမဆက်နဲ့တော့ ဆိုကာ ဖုန်းချလိုက်၏။ ထိုဖုန်းနံပါတ်နှစ်ခုစလုံးကို block လုပ်လိုက်၏။

 

သားက ကျွန်ုပ်ကို credit card သုံးကာ ဖြည့်ဘို့ ပြော၏။ credit card နှင့် debit card ဘာကွာသည်။ ဤမှဆက်ကာ bit coin အကြောင်း၊ cripto currency စသည်တို့ကို ရှင်းပြ၏။

 

စင်ကာပူနံပါတ်နှင့် ဖုန်းဝင်လာပြန်၏။ 

သည်တစ်ခါတော့ ကျွန်တော် ခပ်ရိုင်းရိုင်းပင် ပြန်ပြောလိုက်၏။

ဟေ့ကောင် - မင်းကိုမဆက်ပါနဲ့လို့ ငါပြောထားတာ ဘာဖြစ်လို့ မကြာခဏဆက်နေရသလဲ။ ငါဟာ ပညာတတ်တစ်ယောက်ဖြစ်တယ်။ ဒါတွေဟာ ငါ့အတွက် ဘာမှ မဖြစ်လောက်တဲ့ ပီဘိအသေးအဖွဲလေးတွေ ဖြစ်တယ်။ မင်းအကူအညီ ဘာမှကိုမလိုဘူး။ နောက်ထပ်မဆက်နဲ့တော့။

 

ထိုဖုန်းနံပါတ်ကိုလည်း block လုပ်လိုက်၏။

 

ပထမတစ်ခါ ဖုန်းဆက်ကတည်းက ကျွန်ုပ်က သံသယရှိနေပြီ။

နောက်ထပ် ဖုန်းတွေ ထပ်ခါထပ်ခါဆက်ပြီး ပိုက်ဆံထည့်ဘို့ အသည်းအသန်တွေ ပြောနေပြီဆိုတော့ ဒီလူတွေသည် မည်သည့်နည်းနှင့်မှ လူကောင်းတွေ မဖြစ်နိုင်တာ သေချာသည်၏ဟိုဘက်ကို သုံးဘူတာလောက် လွန်နေသေး၏။

 

ထိုမျှသာမကသေး ကျွန်ုပ်အိပ်ကောင်းနေစဉ်တွင်လည်း ဖုန်းဆက်လာ၏။ ဖုန်းနံပါတ်မှာ +852 5803 0411 ဖြစ်ပြီး ဟောင်ကောင်၊ စိန ဟု ပြထား၏။ နောက်ဆုံး ကျွန်ုပ်မှာ ဖုန်းကို လုံးဝ ပါဝါပိတ်လိုက်ရလေတော့သတည်း။

 

ညာတာပါတေး link ကြီးကိုတော့ မိတ်ဆွေတို့ကို မရှယ်ပါရစေနှင့်။

 

ဤသည်ကား ကျွန်ုပ် “ကံကောင်းလို့မသေ၊ သံချောင်းတို့ဖအေ” ဖြစ်ခဲ့ရသည် ဆိုခြင်းအကြောင်း တည်း။

 

 

လူအချင်းချင်း လိမ်ညာခြင်း၊ ကင်းရှင်းကြပါစေ။

 

 

အေးငြိမ်း

၁၇ ဒီဇင်ဘာ၊ ၂၀၂၃

 

မှတ်ချက်။         ။ ထို CNA သတင်းမှာ အတုကြီးဖြစ်၍ သတင်း link မှာလည်း CNA link မဟုတ်ပါ။ လူလိမ်များက CNA သတင်း page အတုလုပ် လွှင့်တာ ဖြစ်၏။

https://wqtn4stb5jv6mepsiktgbd0a.celebrityinvesting.com/landers/sg/bank-of-singapore-is-suing-lawrence-wong-for-his-statements-on-live-tv/index.php?lp_key=170271c30b9deacb4162612a0f1171a2434d793000&fbclid=IwAR1t_LI5vhiIHdJ6mUWdlE9TXCy4cB_XYc8XTjYkQaIAoGTqWH7FWJhiXrg 

ISO 45001 ရှင်းလင်းချက်စာအုပ်

ကျွန်တော်၏ ၁၅ အုပ်မြောက်ဖြစ်သည့် ISO 45001 ရှင်းလင်းချက်စာအုပ် ထွက်ပါပြီ။

မြန်မာပြည်မှ မှာထားသူများထံ အမြန်ဆုံး ပို့ပေးပါလိမ့်မည်။

ဈေးမှာ တစ်အုပ်လျှင် ၁၂၀၀၀ ဖြစ်ပါသည်။

စင်ကာပူသို့လည်း များမကြာမီ ရောက်လာပါလိမ့်မည်။ ရောက်လာလျင် မှာထားသူများထံ ပို့ပေးပါမည်။

(ပို့ခမသိသေးသဖြင့် ဈေးတော့ ခဏနေပါအုံးခင်ဗျား။)

 

ထုတ်ဝေခဲ့ပြီးသော ကျွန်ုပ်၏ စာအုပ်များမှာ အောက်ပါအတိုင်း ဖြစ်ပါသည်။

 

၁။ အနာဂတ်တစ်ခု ဖန်တီးတည်ဆောက်ခြင်း (516 pages) ၂၀၀၈ ခုနှစ်  

၂။ ဘဝခါးခါး (260 pages) ၂၀၀၉ ခုနှစ်

၃။ ပိုက်ပြင်ပိုက်ဆက်လက်စွဲ (410 pages) ဇွန်လ၊ ၂၀၁၁ ခုနှစ်

၄။ တာယာအန္တရာယ်ကင်းဝေးရေး (250 pages) ဩဂုတ်လ၊ ၂၀၁၁ ခုနှစ်

၅။ မြန်မာပြက္ခဒိန် (307 pages) ဒီဇင်ဘာလ၊ ၂၀၁၄ ခုနှစ်

၆။ လုပ်ငန်းခွင်အန္တရာယ်ကင်းရှင်းရေး (ဆောက်လုပ်ရေး) (313 pages) ​အောက်တိုဘာလ၊ ၂၀၁၄ ခုနှစ်

၈။ စင်ကာပူ ဥယျာဉ်နိုင်ငံ၊ ပထမအကြိမ် (172 pages) - အောက်တိုဘာလ၊ ၂၀၁၅ ခုနှစ်

၇။ ဆောက်လုပ်ရေးလုပ်ငန်းများအတွက် လုပ်ငန်းခွင်အန္တရာယ်ကင်းရှင်းရေး မှတ်စု - မတ်လ၊ ၂၀၁၆

၉။ အသေးစားနှင့် အလတ်စားလုပ်ငန်းများအတွက် လုပ်ငန်းခွင်အန္တရာယ်ကင်းရှင်းရေး စီမံခန့်ခွဲမှုစနစ် (144 pages) မတ်လ၊ ၂၀၁၉ ခုနှစ်

၁၀။​ တစ်ကိုယ်ရည်ကာကွယ်ရေးပစ္စည်းများ (179 pages) - နိုဝင်ဘာလ၊ ၂၀၁၉

၁၁။ ဝန်ချီစက်အကြောင်း သိကောင်းစရာ (52 pages)  - ဇူလိုင်လ၊ ၂၀၂၀           

၁၂။ မြေတူးစက်အကြောင်း သိကောင်းစရာ (42 pages)  - ဇူလိုင်လ၊ ၂၀၂၀

၁၃။ ဖောက်ကလစ်အကြောင်း သိကောင်းစရာ (38 pages)  - ဇူလိုင်လ၊ ၂၀၂၀

၁၄။ ငြမ်း အကြောင်း သိကောင်းစရာ (166 pages) - ဇွန်လ၊ ၂၀၂၂

၁၅။ ISO 45001 - လုပ်ငန်းခွင်အန္တရာယ်ကင်းရေးနှင့် ကျန်းမာရေး စီမံခန့်ခွဲမှုစနစ် - ဒီဇင်ဘာလ၊ ၂၀၂၃

ထို့ပြင်ရေးသားပြီး မထုတ်ဝေသည့် စာအုပ်များလည်း ရှိပါသေးသည်။

§  OSHA 3990-03: 2020_Guidance on Preparing Workplaces for Covid 19 (ကိုဗစ် ၁၉ အတွက် လုပ်ငန်းခွင်များ၌ ပြင်ဆင်ခြင်း လမ်းညွှန်)

Working Safely During Covid 19 in Offices and Contact Centres – 2021 (ကိုဗစ်၁၉ ကပ်ရောဂါကာလ အတွင်း ထိတွေ့နိုင်သော ဌာနများနှင့် ရုံးခန်းများ၌ အန္တရာယ်ကင်းစွာ အလုပ်လုပ်ခြင်း)

ထုတ်ဝေစရိတ်ပြန်ရရန် မသေချာသေးသဖြင့် မထုတ်နိုင်ဘဲ ဆိုင်းထားရသည့် စာအုပ်များ

 

၁၆။ ဂွန်ဒိုလာနှင့် အန္တရာယ်ကင်းစွာ အလုပ်လုပ်ခြင်း (၂၀၂၀ ကတည်းက ရေးထား၊ ခုထိစာအုပ်ဖြစ်မလာသေး )

၁၇။ ဓာတ်ငွေ့ဖြင့် ဖြတ်ခြင်း၊ ဂဟေဆော်ခြင်း (၂၀၂၁ ကတည်းက ရေးထား။ ခုထိစာအုပ်ဖြစ်မလာသေး )

 

နောက်ပြီး Safety ဆောင်းပါးများချည်းစုပြီး စာအုပ်တစ်အုပ် ထုတ်နိုင်ပါသေးသည်။ စာမျက်နှာ ၅၀၀ လောက်ရှိပါသည်။

စာအုပ်ကြီး သိပ်ထူ၍ စာအုပ်ဈေးကြီးမည်ဆိုလျှင် သက်ဆိုင်ရာ ကဏ္ဍများခွဲလျက် ၂ အုပ်၊ ၃ အုပ်စာလောက် ထုတ်နိုင်ပါသည်။

 

ထို့ပြင် ကျွန်ုပ်ရေးထားသည့် အင်ဂျင်နီယာဆိုင်ရာ ဆောင်းပါးပေါင်း ၂၀ လောက်ရှိပါသည်။ ၎င်းတို့ကို စုပြီးတော့လည်း စာအုပ် လုပ်လို့ရပါသည်။

 

အရေးကြီးသည်မှာ ဝယ်လိုအားဖြစ်၏။

 

စာအုပ်ထုတ်တာ ဘာမှ မခဲယဉ်းပါ။ ပိုက်ဆံရှိလျှင် စာအုပ်ထုတ်လို့ရပါသည်။

သို့သော် စာအုပ်ထုတ်ပြီး ဝယ်မည့်သူမရှိ၍ စာအုပ်များ ပုံနေလျှင် တွက်ခြေမကိုက်ပါ။ ပိုက်ဆံများ အိပ်နေပါမည်။

 

အားပေးသူအားလုံးကို ကျေးဇူးတင်ပါသည်။

 

ကျေးဇူးတင်ပါသည်။

 

အေးငြိမ်း

၁၃ ဒီဇင်ဘာလ၊ ၂၀၂၃