ဘ၀ခါးခါး (ကိုလှစိုး-၁)

နာမည် - ကိုလှစိုး
အသက် - ၃၅
ပညာအရည်အချင်း - အခြေခံပညာ အထက်တန်း
လက်ရှိအလုပ်အကိုင် - ကျပန်း
လစာ -

၁၆၊ ၁။ တစ်ဝက်တစ်ပျက်ဖြင့် ပြန်ခဲ့ရသော စင်ကာပူခရီး

နိုင်ငံခြားထွက်မယ် ဆိုတော့ ပထမဆုံး ပတ်စ်ပို့ လုပ်ရတာပေါ့။ ပတ်စ်ပို့လုပ်မယ် ဆိုတော့ ပုံစံ ၁၇ လုပ်ရမယ်တဲ့။ ဒါနဲ့ မြို့နယ်မှာ ပုံစံ ၁၇ ယူပြီး ပတ်စ်ပို့ရုံးလာ။ ကိုယ်ကလည်း တစ်ခါမှ မလုပ်ဖူးတော့ အဲဒီရုံးရှေ့မှာ စုစု စုစုနဲ့ အတင်းဝိုင်းခေါ်နေကြတဲ့ ပွဲစားတွေကို ပုံစံယူပြီး ဖြည့်ခိုင်းရတယ်။ ပတ်စ်ပို့လုပ်ဖို့ သူတို့ကိုပဲ အပ်လိုက်တယ် ဆိုပါတော့။ နှစ်သောင်းပေးရတယ်။ နှစ်လ နီးပါးကြာမှ ပတ်စ်ပို့ရတယ်။
ကျွန်တော် စင်ကာပူသွားမယ်လုပ်တော့ ဟင်္သာတက အစ်ကိုကြီးက သူ့အသိတစ်ယောက်နဲ့ ဆက်သွယ်ပေးတယ်။ မမြင့် တဲ့။ သူ့ယောက်ျားက စင်ကာပူမှာ အလုပ်လုပ်နေတာ။ အဲဒီ မမြင့်က ရန်ကုန်က အေးဂျင့်တစ်ခုရဲ့ လက်ခွဲဆိုပါတော့။ သူက ဟင်္သာတက လူရှာပြီး ရန်ကုန်အေးဂျင့်ကနေ တစ်ဆင့် စင်ကာပူကို လူပို့တယ်။ အဲဒီ မမြင့်က ရန်ကုန်က အေးဂျင့်ဆီလွှတ်ပြီး သင်တန်း တက်ခိုင်းတယ်။ ရန်ကုန်အေးဂျင့်က လမ်း ၅၀ မှာ။
သင်တန်းက တောင်ဒဂုံ စက်မှုဇုံမှာ။ သင်တန်းက Welding သင်တန်း။ သင်တန်းကြေးက ၅ သောင်း ပေးရတယ်။ အဲဒီ မှာပဲ အိပ်၊ အဲဒီမှာပဲ စားပေါ့။ စစချင်း တစ်ပေလောက်ရှိတဲ့ သံပြားတွေကို Gas cutter နဲ့ ဖြတ်ရတယ်။ အစပိုင်းတော့ ဘယ် အဆင်ပြေမလဲ။ တစ်ရက်နှစ်ရက်လောက် ရှိတော့မှ သဘောတရား နားလည်သွားပြီး ဖြတ်စတွေလည်း ညီလာတယ်။ သံပြားကို ကျွမ်းကျွမ်းကျင်ကျင် ဖြတ်တတ်သွားတော့ ပိုက်လုံးတွေကို ဖြတ်ရတယ်။ ပိုက်လုံးတွေကို ၄၅ ဒီဂရီ၊ ၉၀ ဒီဂရီ အနေအထားနဲ့ ဖြတ် ရတယ်။ Bevel ထိုးရတယ်။ (Bevel ထိုးသည် ဆိုသည်မှာ ပိုက်လုံးနှင့် ပိုက်ဆက်ပစ္စည်းများ ဆက်ရာတွင် ဂဟေဆော်ရန်အတွက် ပိုက်နှုတ်ခမ်းကို ၄၅ ဒီဂရီ နှုတ်ခမ်းလုံးပေးခြင်းကို ခေါ်သည်။) စသဖြင့် တစ်ဆင့်ပြီး တစ်ဆင့်သင်ပေးသွားတာပေါ့။
တစ်ပတ်တစ်ခါ လက်တွေ့စစ်ဆေးတယ်။ ဘယ်သူ ဂဟေကောင်းကောင်း ဆော်နိုင်သလဲ ပေါ့။ အဲဒီ welding သင်တန်း ကို နှစ်လ တက်လိုက်ရတယ်။
သင်တန်းလဲ တက်ပြီးရော။ အင်တာဗျူးလာမယ်တဲ့။ Pipe Fitter နဲ့ ခေါ်မယ်။ ခု လူ ၃၀ ရှိတဲ့အနက် ၁၅ ယောက် အင်တာဗျူးရမယ် တဲ့။ အင်တာဗျူးတော့ ကျွန်တော်ကျတယ်။ မပါဘူး။ သူတို့က မင်းလုပ်တာကိုင်တာတော့ သဘောကျပါတယ်။ ဒါပေမဲ့ အင်္ဂလိပ်လိုပြောတာ အားနည်းတယ်၊ လေ့ကျင့်လိုက်ဦး တဲ့။
အင်တာဗျူးမပါဘူး ဆိုတော့ နည်းနည်းတော့ စိတ်အားငယ် သွားတာပေါ့။ အိမ်ကလည်း သွားစေချင်နေပြီကိုး။ သူတို့ ကတော့ ပြောပါတယ်။ ကိစ္စမရှိဘူး။ နက်ဖြန်ကာ အင်တာဗျူးတစ်ခု ထပ်ရှိသေးတယ် တဲ့။ Carpenter တဲ့။ အမှန်ဆို လက်သမား ကို ကျွန်တော် သိပ်စိတ်ပါတာ မဟုတ်ဘူး။ ဒါပေမဲ့လည်း အင်တာဗျူးဝင်လိုက်တယ်။ အဲဒီမှာ သစ်၊ သံ၊ တူ၊ ဆောက်၊ လွှ စသဖြင့် ပေးထားပြီး သေတ္တာလေးတွေ ရိုက်ပြရတယ်။ စွန်မြီးစကေး (လက်ယှက်ထိုး) နဲ့ ရိုက်ပြရတယ်။
သူတို့က မင်း ဒါမျိုးတွေ အရင်တုံးက လုပ်ဖူးသလား ဆိုတော့ လက်တွေ့တော့ မလုပ်ဖူးဘူး။ ပုသိမ်မှာတုံးကတော့ ပရိ ဘောဂ အရောင်းအ၀ယ်လုပ်တော့ လက်သမားတွေလုပ်နေတာ အနီးကပ်မြင်ဖူးတယ် ပေါ့။ ကျွန်တော် တတ်သလောက် မှတ်သ လောက် လုပ်ပြလိုက်တော့ သူတို့လည်း ကြိုက်တာနဲ့ရွေးလို့ ပါသွားရော ဆိုပါတော့။ အင်တာဗျူးလာတာက တရုတ် မန်နေဂျာ တစ်ယောက်၊ HR (Human Resources) ကတစ်ယောက်၊ မြန်မာ စူပါဗိုက်ဆာ တစ်ယောက်။
လုပ်ရမှာက သင်္ဘောကျင်းမှာ။ Keppel Sea Scan တဲ့။ အင်တာဗျူးအောင်တော့ သူတို့က နောက်နှစ်ပတ် သုံးပတ် လောက်ကြာရင် သွားရလိမ့်မယ်။ ပိုက်ဆံပြန်ယူပါ တဲ့ ပြောလို့ ကျွန်တော် ရွာပြန်ပိုက်ဆံယူတယ်။ အေးဂျင့်ဖီးက လေယာဉ် လက်မှတ် အပါအ၀င် စုစုပေါင်း စင်ကာပူဒေါ်လာ ၃၈၀၀ နဲ့ ညီမျှတဲ့ မြန်မာငွေ ၂၉ သိန်းကျော် ပေါ့။ ရွာမှာ ပိုက်ဆံပြန်ယူပြီး ဟင်္သာတလာတော့ ဟင်္သာတက အေးဂျင့် မမြင့် က နင်တို့ အဲဒီပိုက်ဆံတွေနဲ့ ရန်ကုန်သွားရင် စိတ်မချရဘူး။ သူ့ကိုပေး၊ သူလွှဲပေးမယ် လို့ပြောလို့ သူ့ကို ပေးလိုက်တယ်။
နောက်နေ့ ကျွန်တော်တို့ ရန်ကုန်ရောက်လို့ မေးကြည့်တော့ အေး၊ ဟုတ်တယ်။ မင်းတို့ဘို့ အေးဂျင့်ဖီး ရပြီးပြီ လို့ပြောတယ်။ သူတို့ကပဲ ဘာတွေ ဘာတွေ ၀ယ်ရမယ် ဆိုတာ စာနဲ့ရေးပေးလိုက်တယ်။ အဲဒါတွေ လိုက်ဝယ်တယ်။ နောက် စားဘို့သောက်ဖို့ ငါးခြောက်ငါးခြမ်းတွေဝယ်၊ ငါးပိကြော်၊ ငံပြာရည်ကြော်တွေ လုပ်ပြီး သွားရမဲ့ရက်ကို အဆင်သင့် စောင့်နေတာ ပေါ့။
မြမင်းသရဖူမှာ ဆေးစစ်ရသေးတယ်။ ဆေးစစ်ခက ရှစ်ထောင် ပေးရတယ်။ ဆေးစစ်ပြီးတော့ အားလုံး အဆင်သင့် ပြင်ထားကြ။ သန်ဘက်ခါ ထွက်ရမယ် တဲ့ ပြောတယ်။ ထွက်ရမဲ့နေ့မတိုင်မီ တစ်ည အေးဂျင့်ရုံးခန်းမှာ အားလုံး စုအိပ်ကြတယ်။ အင်တာဗျူးအောင်တာ ၁၂ ယောက် အနက် ပထမ ၉ ယောက်က မနေ့ကတည်းက သွားနှင့်ပြီ။ ကျွန်တော်တို့ အသုတ်မှာတော့ ၃ ယောက်ပဲ ကျန်တော့တယ်။ မှတ်ရလွယ်အောင်လို့ ကျွန်တော်တို့ သုံးယောက်ကို ဦးထုပ် အဖြူတွေ ဆောင်းပေးလိုက်တယ်။
ကျွန်တော် စင်ကာပူသွားတာ ၂၀၀၅ ခုနှစ် ၉ လပိုင်း။ စင်ကာပူရောက်တော့ Tampines Village မှာ စုနေရတယ်။ ရောက်ခါစမှာ သုံးဘို့ တစ်ယောက်ကို ၅၀ စီ ထုတ်ချေးတယ်။ နောက်ပြီး ရေဘိုး၊ မီးဘိုးပေးရမယ် လို့လည်း ပြောတယ်။ မင်းတို့ရောက်လာရင် အဆင်သင့် သုံးနိုင်အောင် ငါတို့ ထမင်း ပေါင်းအိုး၊ ဂက်စ်မီးဖို၊ ရေခဲသေတ္တာ၊ အ၀တ်လျှော်စက် စတာတွေ ၀ယ်ပေးထားတယ်။ မင်းတို့အားလုံး စုပြီးထည့်ရမယ်။ လကုန်ရင် အဲဒါတွေအတွက် လခထဲကဖြတ်မယ် လို့ပြောတယ်။
အခန်း နှစ်ခန်းပေးတယ်။ ကျွန်တော်တို့အခန်းမှာ လောလောဆယ် ၆ ယောက်။ နောက်တော့ ဆယ်ယောက် ဖြစ်လာ တယ်။ ဟိုတစ်ခန်းမှာ ၇ ယောက် နေရတယ်။ နောက်နေ့ကျတော့ ဆေးစစ်သွားရတယ်။ ဆေးအောင်ပြီးပြန်တော့ Low Levy ဖြေဘို့ဆိုပြီး တစ်ပတ် training သွားရတယ်။ welding ဆော်တာ လေ့ကျင့်ရတယ်။ တစ်ပတ်ပြီးလို့ စစ်လိုက်တော့ ကျွန်တော် အောင်တယ်။
အောင်ပြီး နောက်တစ်နေ့မှာ ရုံးကို သွားရတယ်။ ရုံးမှာ ကျွန်တော်တို့ကို သူတို့ကုမ္ပဏီရဲ့ စည်းမျဉ်းစည်းကမ်းတွေ ဖတ်ပြ တယ်။ အဲဒီအထဲမှာ အခန်းခ ဖြတ်မယ် ဆိုတာရယ်၊ တစ်လကို ဒေါ်လာ ၅၀ ကုမ္ပဏီက မဖြစ်မနေ စုပေးမယ် ဆိုတာလည်း ပါတယ်။ ဖတ်ပြပြီး ကျွန်တော်တို့ကို လက်မှတ်ထိုးခိုင်းတယ်။

မှတ်ချက်။ ။ Work Perimit Holder အလုပ်သမားများအတွက် အခန်းခကို ကုမ္ပဏီမှသာ ကျခံရမည် ဖြစ်ပါသည်။ အလုပ်ရှင်သည် အလုပ်သမားများထံမှ အခန်းခ ဖြတ်ပိုင်ခွင့်မရှိ။ (ရည်ညွှန်း - Foreign Workers Employment Act)

မနက် ၅ နာရီဆို အိပ်ယာကထ။ ထမင်းအိုးတည်။ ထမင်းချိုင့်လေးတွေထည့်။ ပြင်ဆင်ပြီး အလုပ်သွားတာပေါ့။ လုပ်ရတာက မနက် ၇ နာရီခွဲကနေ ပုံမှန် အလုပ်ချိန်ဆို ညနေ ၄ နာရီခွဲအထိ။ အိုဗာတိုင်ရှိရင်တော့ ညနေ ၆ နာရီခွဲထိ ဆင်းရတယ်။ တစ်ခါတလေတော့ ည ၉ နာရီထိ ဆင်းရတယ်။ များသောအားဖြင့်တော့ ညနေ ၆ နာရီခွဲ ထိ ဆင်းရတယ်။
ညနေ ၇ နာရီခွဲကျော်လောက် အိမ်ပြန်ရောက်တယ်။ ရောက်ရောက်ချင်း ထမင်းအိုးလေး ကောက်တည်။ ရေမိုးချိုးပြီးတဲ့ အချိန်ကျ ထမင်းကျက်။ ကိုယ့်ပါလာတဲ့ ငါးပိကြော်၊ ငံပြာရည်ကျော် လေးတွေနဲ့စား။ ဟင်းမရှိတော့တဲ့ သူတွေကျတော့လည်း ကြက်ဥလေးကြော် ပေါ့။ ဖြစ်သလို စားလိုက်ကြတယ်။ စားသောက်ပြီး ဂစ်တာတီးတဲ့လူက တီး။ သီချင်းဆိုတဲ့သူက ဆို။ ထမင်း မစားသေးပဲ ခြင်းခတ်တဲ့သူက ခတ်။ တခြားအခန်း လျှောက်လည်ပြီး ည ၉ နာရီကျော်မှ ပြန်လာ။ ညှော်တွေ လုပ်တဲ့သူက ရှိသေးတယ်။ ဒီကြားထဲ အရက်ဝိုင်းဖွဲ့တဲ့သူက ဖွဲ့။ ဗီဒီယိုကြည့်နေတဲ့သူက ဂစ်တာတီးနေတဲ့သူကို ဟေ့ကောင်၊ ဒီမှာ ဗီဒီယို ကြည့်နေတယ်။ တိုးတိုးဆို ဆိုပြီး လှမ်းအော်။ ဘာကွ၊ ဒါ မင့်အိမ်မဟုတ်ဘူး။ မင်းအိမ်ပြန်ရောက်မှ အေးအေးဆေးဆေး ကြည့်။ ဒီမှာတော့ မရဘူး ဆိုပြီး စကားများလိုများ။ ဘုရားရှိခိုးတဲ့သူကလည်း သြကာသ၊ သြကာသ နဲ့ အတင်းအော်ဟစ်ပြီး ရှိခိုးလို ခိုး။ အိပ်နေတဲ့ သူကလည်း အောင်မယ်မင်း၊ ခုမှ ဘုရားဒကာနဲ့ တွေ့နေရပြန်ပြီ။ တိုးတိုးလုပ်ကြကွ နဲ့ ပျော်စရာလည်းကောင်း၊ စိတ်ညစ်ဖို့လည်း ကောင်းပေါ့ အစ်ကိုရာ။
Tampines မှာ သိပ်မကြာလိုက်ဘူး။ Jurong East က IMM နောက်မှာရှိတဲ့ dormetry တွေဆီ ပြောင်းရတယ်။
လုပ်ရတာက သုံးထပ်သားတွေကို cutter နဲ့ဖြတ်ပြီး သင်္ဘောပေါ်မှာ အခန်းတွေဖွဲ့တယ်။ နံရံကပ် ဘီရိုတွေ၊ တပ်ရတယ်။ အလှဆင်တာတွေပေါ့၊ လုပ်ရတယ်။ ကိုးရီးယားကလာတဲ့ ကြိတ်သားတွေနဲ့လည်း လုပ်ရတယ်။ နောက်တော့ အလုပ်ပြောင်းသွား တယ်။ လက်သမားအဖြစ်နဲ့ ပရိဘောဂတွေ လုပ်နေရာကနေ insulation ကပ်ရပြန်ရော။
မြန်မာပြည်မှာတုံးကတော့ ဒီ insulation ဆိုတာ လုပ်ဖူးဘို့ မပြောနဲ့၊ ကြားဖူးတာတောင် မဟုတ်ဘူး။
သင်္ဘောနံရံတွေမှာ welder က သံငုတ်လေးတွေ ဂဟေဆော်ပေးသွားတယ်။ ကျွန်တော်တို့က အဲဒီနံရံတွေကို insulation ကပ်ရတာ။ Insulation လုပ်ရတဲ့ အပြားကြီးတွေက အ၀ါရောင်။ အဲဒါကြီးတွေကို လိုသလောက် ဓါးနဲ့ဖြတ်ပြီး ကပ်ရ တယ်။ အဲသလို ဓါးနဲ့ဖြတ်လိုက်ရင် ၀ါဝါအမှုံ့တွေ ထွက်လာတယ်။ အရမ်းယားတဲ့ အမှုံ့တွေပေါ့။ ဘာနဲ့တူသလဲ ဆိုတော့ ခွေးလယားသီး အပွေးတွေနဲ့ တူတယ်။ သူက အမှုံ့မဟုတ်ဘူး။ ဆူးလေးတွေ။ ခါပစ်လို့မရဘူး။
အလုပ်များပြီးသွားပြီဆိုရင် ယားတာ ကျွန်တော်တို့မှာ မနေနိုင်ဘူး။ ဒီဆူးလေးတွေက ရေနဲ့ဆေးပစ်လို့လည်း ရတာ မဟုတ်ဘူး။ အရေပြားမှာ စိုက်ဝင်နေတာ။ ကပ်ရုံကပ်နေတာ မဟုတ်တော့ ဘယ်လိုခါခါ၊ ခါလို့ကတော့ လုံးဝမရဘူး။ နောက်မှ အဲဒီက ၀ါရင့် ကုလားတွေက ပြောပြလို့ insulation လုပ်တဲ့နေရာမှာသုံးတဲ့ တိပ်တွေနဲ့ ကပ်ယူရတယ်။ အဲဒီတိပ်တွေက ကျွန်တော်တို့ဆီက ဒန်အိုးဖာတဲ့ တိပ်တွေနဲ့တူတယ်။ အဲဒီ တိပ်တွေနဲ့ ကပ်လိုက်တော့မှ ယားတာ နည်းနည်းသက်သာသွားတယ်။ ဒါပေမဲ့ လုံးဝပျောက်သွားတာတော့ မဟုတ်ဘူး။
ဆိုးတာက အ၀တ်အစားတွေမှာ ကပ်နေတာပဲ။ သူက ဘယ်လိုမှ လျှော်လို့မရတော့ အ၀တ်တွေ ၀တ်လိုက်ရင် အရမ်းယားတယ်။ ကျွန်တော်ဆိုရင် ယားလို့ကုပ်ရာကနေ လက်မှာ အနာတွေဖြစ်လို့ ဆေးခန်းသွားပြလိုက်ရသေးတယ်။ ဒါပေမဲ့ ဆေးခန်းက အနာပျောက်အောင်ပဲ လုပ်ပေးနိုင်မှာပေါ့။ မယားအောင် ဘယ်တတ်နိုင်မလဲ။ ကျွန်တော်တို့က နေ့တိုင်း ဒါ ကိုင်နေရ တာ ဆိုတော့ ပျောက်လဲ ခဏပဲ။ ကျွန်တော့်လက်မှာ မြန်မာပြည် ပြန်လာတဲ့ထိ အနာတွေ မပျောက်ဘူး။ ပျောက်သွားလိုက်၊ ပြန်ပေါ်လာလိုက်။ အနို့ ယားတော့ မနေနိုင်ဘူး၊ ကုတ်ကရော။ ကုတ်တော့ ပြန်ဖြစ်မှာပဲ။
ဟောဒီမှာကြည့်ပါဦး။ ကျွန်တော့လက်မှာ ခုထိ အမာရွတ်တွေ ရှိတုံး။
အဲဒီလိုလုပ်ရင်း ကျွမ်းကျင်လာတော့ ကိုယ့်ဟာကိုယ် လုပ်နိုင်လာတယ်။ သူများနောက် လိုက်စရာ မလိုတော့ဘူး။ သင်္ဘောအသစ်ပေါ် တက်ရတယ်။ Insulation မရှိတဲ့အခါတော့ welder တွေနောက် လိုက်ရတယ်။ သူတို့လိုတာ ဖြတ်တောက်၊ tacking တွဲပေး။ သူတို့ ဆော်ပြီးသား welding သားတွေကို grinding လိုက်တိုက် စသဖြင့်ပေါ့ လုပ်ရတယ်။
ဆေးခွင့် တစ်ရက်ယူရင် စုံစမ်းပြီး နေမကောင်းတာ မှန်ရင် အဲဒီရက်အတွက် လခပေးတယ်။ ဒါပေမဲ့ ညာပြီး ခွင့်တင်တာ ဆိုရင်တော့ မပေးဘူး။ သုံးရက်အထိ ပျက်ခဲ့ရင် သတိပေးပြီး မလိုက်နာရင် ပြန်လွှတ်တယ်။ ဟို ပဲခူးက ကောင်တစ်ယောက် အကြောင်းပြောရဦးမယ်။ သူက အခန်းထဲက သူငယ်ချင်းတစ်ယောက်က အိမ်ကို ငွေပြန်မလွှဲဘဲ စုထားတာသိတယ်။ စုထားတော့ ဘဏ်စာရင်းထဲမှာက ပိုက်ဆံအတော်များနေပြီပေါ့။ နောက်ပြီး သူငယ်ချင်းချင်းဆိုတော့ သူ့ဘဏ်ကဒ်ရဲ့ password လဲ သိတယ်။
တစ်နေ့တော့ အားလုံးအလုပ်သွားနေတုံး သူက နေမကောင်းဘူး ဆိုပြီး အလုပ်မဆင်းပဲ စောစောက သူငယ်ချင်းရဲ့ သေတ္တာသော့ကိုဖျက်၊ ဘဏ်ကဒ်ကိုယူ၊ ရှိသမျှငွေတွေ အကုန်ထုတ်တယ်။ ဟိုကောင်လဲ အလုပ်ကပြန်လာရော သေတ္တာသော့ ပျက်နေတာတွေ့လို့ စစ်လိုက်တော့ ဘဏ်ကဒ် အခိုးခံရတာ သိရော။ ဒီနေ့အဖို့ သူတစ်ယောက်ပဲ အလုပ်မဆင်းတာကိုး။ ရှင်းနေတာပဲ။ အဲဒီတင် မန်နေဂျာတို့၊ စူပါဗိုက်ဆာတို့က သူ့ကို ချော့ချည်တစ်လှည့် ချောက်ချည်တစ်ခါနဲ့ စစ်တော့ ဒီကောင် သူ့လိပ်ပြာ သူမလုံဖြစ်ပြီး ၀န်မခံဘဲ ထွက်ပြေးသွားတယ်။ Overstay ဖြစ်သွားတာပေါ့။
တွဲပြီး လုပ်ရတာတော့ အစုံပဲ၊ ဘင်္ဂလား၊ နီပေါ၊ အိန္ဒိယ၊ မြန်မာ စသဖြင့်အစုံပဲ။ အဲဒီလို လုပ်နေရင်း ၉ လကျော်၊ ဆယ်လထဲရောက်လာတော့ ကျွန်တော်နဲ့ ကုလားတစ်ယောက်နဲ့ ရန်ဖြစ်တယ်။ ကျွန်တော် လှေခါးပေါ်မှာ အလုပ်လုပ်နေတုံး ကုလားတစ်ယောက်လာပြီး လှေခါးကို လှုပ်ချပြီး ပြဿနာလာရှာတယ်။ ဆဲလဲ ဆဲတယ်။ တစ်နေ့မဟုတ် တစ်ရက်မဟုတ် ဆိုတော့ နောက်နေ့တွေမှာ ကျွန်တော် ဆက်ပြီး သည်းမခံနိုင်တော့ဘူး။ တတိယမြောက်နေ့မှာ ကျွန်တော် လှေခါးပေါ်က ခုန်ဆင်း လာပြီး သူ့ကိုပြန်ပြီး ဆဲ။ ဒီတင် ကုလားက screw driver ကိုင်ပြီး အတင်းပြေးလာတော့ ကျွန်တော်လည်း လက်ထဲရှိတဲ့ Grinder နဲ့ ရိုက်လိုက်တာ ကုလားနှာနုထိပြီး သွေးတွေ တော်တော်များများ စီးကျလာတယ်။
အဲဒီမှာက ကုလားတွေများတယ်။ ဒါဏ်ရာကတော့ သိပ်မကြီးကျယ်လှဘူး။ ဒါပေမဲ့ သွေတွေ အရမ်းကျနေတော့ ပြဿနာက အတော်ကြီးသွားတယ်။ ဒါကို သူဌေးသိတော့ ကျွန်တော်တို့နှစ်ယောက်လုံးကို ခုနစ်ရက်တိတိ အပြစ်ပေးတဲ့ အနေနဲ့ အလုပ်ပိတ်ထားလိုက်တယ်။ သူတို့က အတူတူ လုပ်တဲ့အလုပ်သမားတွေ၊ မန်နေဂျာတွေ၊ စူပါဗိုက်ဆာကို ခေါ်။ သေသေချာချာ စုံစမ်းပြီး ကုလားရော၊ ကျွန်တော့်ကိုပါ ပြန်ပို့ဘို့ လုပ်တယ်။
ကျွန်တော်တို့က ကန်ထရိုက်မပြည့်ဘဲ ပြန်ရတာမို့လို့ လေယာဉ်လက်မှတ်ဘိုးကို လခထဲကဖြတ်မယ် လို့ပြောတယ်။ ဒါပေမဲ့ တစ်လကို ၅၀ စုထားတာတွေ နဲ့ လခကိုတော့ လေဆိပ်ရောက်ရင် ပြန်ပေးမယ် ပေါ့။

မှတ်ချက်။ ။ အလုပ်သမားတစ်ဦး၏ နေရပ်ပြန်စရိတ်ကို အလုပ်ရှင်ကသာ ကျခံရပါမည်။ (Ref: Employment of Foreign Manpower Act (Chapter 91A), First Schedule, 21.)

ပြောပြီး ကျွန်တော်တို့ကို Gang Star တွေလက်ထဲ အပ်လိုက်တယ်။ ဗလကောင်းကောင်း အကောင်ကြီး သုံးယောက်။ သူတို့က ကျွန်တော်တို့ကို တစ်နေရာ ခေါ်သွားတယ်။ ဘယ်နေရာမှန်းတော့ မသိဘူး။ ကုလားကတော့ သူတို့ လေယာဉ်က အရင် ထွက်တာမို့ သူအရင် ပြန်သွားရတယ်။ ကျွန်တော်ကနောက်မှ ပြန်ရတယ်။
အဲဒီလိုနဲ့ ကျွန်တော် စင်ကာပူကနေ မြန်မာပြည် ပြန်ရောက်ခဲ့တယ်။ စင်ကာပူကိုသွားတုံးက ကုန်တာ စုစုပေါင်း သိန်း ၃၀ ကျော်။ ဒါပေမဲ့ စင်ကာပူမှာနေခဲ့တဲ့ ၁၁ လအတွင်း အိမ်ကိုပြန်ပို့နိုင်ခဲ့တာ ၂၇ သိန်း။ ဆိုတော့ အရင်းတောင် မကျေဘူး။

ဘ၀ခါးခါး (ကိုမိုးသက်)

နာမည် - ကိုမိုးသက်
အသက် - ၂၉
ပညာအရည်အချင်း - ၀ိဇ္ဖာဘွဲ့ (သမိုင်း)
လက်ရှိအလုပ်အကိုင် - Seaman (under sea service)
လစာ - S$ 700.00

ကျွန်တော် ဒီအကြောင်းတွေကို ပြောချင်နေတာ ကြာပြီဗျ။ နိုင်ငံခြား၊ နိုင်ငံခြားနဲ့ တခြားလူတွေ အထင်ကြီးနေသလို ဘာမှ မဟုတ်ဘူး ဆိုတဲ့အကြောင်း ပြောပြချင်တာ။ ခုတော့ အကြောင်းအပေါင်းသင့်လို့ ပြောခွင့်ရတော့မှာပေါ့ ဟု ကိုမိုးသက် က ပြောပါသည်။ သူက သင်္ဘောသားဖြစ်ရန် လိုအပ်ချက် တစ်ခုဖြစ်သော Sea Service ယူရန် စင်ကာပူမှ Off Shore ကုမ္ပဏီတစ်ခု တွင် လာရောက် လုပ်ကိုင်နေသူ ဖြစ်ပါသည်။ သူပြန်ပြောပြသည့် သူ့ဘ၀အကြောင်းမှာ အောက်ပါအတိုင်း ဖြစ်ပါသည်။

၁၅၊ ၁။ မလေးရှားသို့ သွားခြင်း

၂၀၀၅၊ ၅ လပိုင်း ၂၈ ရက်နေ့မှာ ကျွန်တော် မလေးရှားကို သွားတယ်။ မလေးရှားသွားတာတော့ အဖေ့အသိ အဆက် အသွယ်နဲ့ သွားတာပဲ။ သူက မင်း မလေးရှားသွားရင် စုစုပေါင်း ၈ သိန်းလောက် ကုန်မယ်။ နေစရာပေးမယ်။ အစားကျွေးမယ် ပြောတယ်။ ကျွန်တော်ကလည်း ပိုက်ဆံရမယ်ဆို လုပ်မယ် ပေါ့။ သူပြောတဲ့ အချိန်ကနေ ပါမစ် ကျလာတဲ့အချိန်ထိ ဘာမှ သိပ်မကြာဘူး။ လေးလလောက်ပဲ ကြာတယ်။ သူပြောတာ တော့ စားသောက်ဆိုင်မှာ လုပ်ရမယ် လို့ပြောတယ်။
သွားရမှာက စုစုပေါင်း ၄ ယောက်။ အဲဒါကို နှစ်ယောက်တစ်တွဲစီ လွှတ်တယ်။ ကျွန်တော်တို့ အဖွဲ့ထဲက ၆ ယောက်က အရင် သွားနှင့်ပြီ။ ရန်ကုန်လေယာဉ်ကွင်းထိတော့ အိမ်က လိုက်ပို့ကြတယ်။ အားလုံး ရှောရှောရှူရှူပါပဲ။ မလေးရှားလေယာဉ်ကွင်း ရောက်တော့ ညနေ ၆ နာရီလောက် ရှိပြီ။ မလေးရှားက အေးဂျင့်ကို ကျွန်တော်တို့ရောက်ပြီ ဆိုတဲ့အကြောင်း ဖုံးဆက် အကြောင်းကြားတယ်။ အေးဂျင့်က တရုပ်။ လာခဲ့မယ် ခဏစောင့်ဦးတဲ့ ပြောတယ်။
ကျွန်တော်တို့လည်း စောင့်တာပေါ့။ တရုပ် ရောက်လာပါတယ်။ ရောက်တော့ သူကပြောတယ်။ သူဌေးက ဆီလန်ဂေါက လာရမှာ။ အရမ်းဝေးတယ်။ မင်းတို့ ဒီမှာ နှစ်ရက်လောက် စောင့်ရလိမ့်မယ် တဲ့။ ပြောပြီး ဟမ်ဘာဂါတို့၊ ရေဗူးတို့ပေးတယ်။ ကျွန်တော်တို့လည်း စားသောက်ပြီး အိပ်တယ်။
အိပ်တယ် ဆိုတာဗျာ၊ ကျကျနန မဟုတ်ပါဘူး။ အဲယားကွန်းခန်းကြီးထဲက သမံတလင်းပေါ်မှာ ဒီအတိုင်း တန်းစီ အိပ်ရတာ။ အဲဒီမှာ မြန်မာတွေ အများကြီးပဲ။ မိန်းကလေးတွေရော၊ ယောက်ျားလေးတွေ ရော။ ကုလားတွေရော။ အစုံပဲ။ တချို့ဆို သူဌေးလာမခေါ်လို့တဲ့။ ခုနစ်ရက်ရှိပြီ။ တချို့ကျတော့ သူဌေးက လာမခေါ်တော့လို့ လေယာဉ်ကွင်းက လှည့်ပြန်သွားရတဲ့ သူတွေလည်း အများကြီး။ ကျွန်တော်တို့ အဲဒီမှာ တစ်ရက်ပဲ စောင့်ရပါတယ်။
နောက်နေ့မနက်ကျတော့ သူဌေးက လာခေါ်လို့ စက်ရုံရောက်သွားရော။ သူတို့ပြောသလို စားသောက်ဆိုင်တော့ မဟုတ်ဘူး။ အချိုရည် စက်ရုံ။
အလုပ်ကတော့ ဘာမှ ပင်ပင်ပန်းပန်း လုပ်ရတာ မဟုတ်ပါဘူးဗျာ။ စက်ထဲက ထွက်လာတဲ့ အချိုရည် ပုလင်းတွေကို တံဆိပ်ကပ်၊ အဖုံးတွေကို ပလတ်စတစ်နဲ့ပိတ်။ ပိတ်တယ် ဆိုတာ gun နဲ့ ရိုက်ပြီး ပိတ်ရတာ။ လွယ်ပါတယ်။ ဒါပေမဲ့ လုပ်တာတော့ တစ်နေကုန်ပဲပေါ့။ မနက် ၈ နာရီကနေ ညနေ ၅ နာရီထိ။ အိုဗာတိုင် ရှိရင်တော့ ည ၉ နာရီထိ လုပ်ပေးရတယ်။ ၉ နာရီကျော်သွားရင် ညစာ ထမင်းတစ်နပ် ကျွေးတယ်။
လခက တစ်နေ့ကို ၁၆ ကျပ် (၁၆ ရင်းဂစ်) ရတယ်။ အိုဗာတိုင် ဆင်းရရင် တစ်နာရီကို ၃ ကျပ်၊ သုံးနာရီကို ၁၀ ပေးတယ်။ ပျမ်းမျှ တစ်လကို ၇၀၀ - ၈၀၀ လောက် ရတယ်။ စားတာတော့ ကိုယ့်ဟာကိုယ် ချက်စားပေါ့။ စားစရိတ်က အရမ်း သက်သာတယ်။ တစ်လ ၄-၅၀ လောက်ဆို လောက်တယ်။
မလေးရှားမှာတော့ ဘာလုံခြုံမှုမှ မရှိဘူး။ အချိန်မရွေး လုတာတို့၊ ဓါးပြတိုက်တာတို့ ခံရနိုင်တယ်။ တစ်ခါက ကျွန်တော်တို့ ဓါးပြတိုက် ခံရတယ်။ အဲဒီနေ့က လခ ထုတ်တဲ့နေ့။ နေရတာက စက်ရုံနဲ့ ကပ်လျှက် ကွန်တိန်နာမှာ။ အဲဒီမှာ လုံခြုံရေး အစောင့်လည်း ရှိတာပဲ။ Security ဆိုတဲ့ကောင်တွေက အလကား။ ဘိန်းစားကောင်တွေ။ ဘိန်းမူးပြီး အိပ်နေတာ များတာပဲ။
အဲဒီနေ့ ည နှစ်နာရီလောက်ကြီး ကားနှစ်စီးနဲ့ အိန္ဒိယ ကုလားတွေ ရောက်ချလာတယ်။ သူတို့ တံခါးခေါက်လို့ ကျွန်တော်တို့ကလည်း မသိတော့ ဖွင့်ပေးလိုက်တယ်။ ကဲ မင်းတို့ ရှိသမျှ ပိုက်ဆံ အကုန်ပေးတဲ့။ ခပ်တည်တည်ပဲ။ အဲဒီတော့မှ ကျွန်တော်တို့လည်း ဓါးပြတိုက်မှန်း သိရတာ။ ကျွန်တော်တို့လည်း လိမ်ရတာပေါ့။ အာ၊ ငါတို့မှာ ပိုက်ဆံဘယ်ရှိမလဲ ဆိုတော့ သူတို့က ဓါးထုတ်ပြီး ထောက်တယ်။ မင်းတို့ ပိုက်ဆံ ပေးမလား မပေးဘူးလား တဲ့။
ကျွန်တော်တို့ က ၆ ယောက်၊ ဒီကောင်တွေက ၁၀ ယောက်လောက် ရှိတယ်။ ဓါးတွေနဲ့ဆိုတော့ ဘယ်တတ်နိုင်မလဲ။ ပိုက်ဆံတွေ ထုတ်ပေးလိုက်ရတယ်။ ကိုယ်ထုတ်ပေးတာတောင် မဟုတ်ပါဘူးလေ။ သူတို့ဟာသူတို့ အကုန် မွှေနှောက်ရှာဖွေပြီး ယူသွားတာ။ သူတို့ မနက်လင်းအားကြီး ၃ နာရီကျော်လောက် ပြန်သွားတယ်။
သူတို့ပြန်တော့ ကျွန်တော်တို့ သူဌေးကို ဖုံးလှမ်းဆက်တယ်။ ဆက်တော့ သူဌေးနဲ့ရဲတွေ ရောက်ချလာတယ်။ ဒါပေမဲ့ ဘာတတ်နိုင်မလဲ။ ဟိုကောင်တွေက ထွက်ပြေးသွားပြီ။ ဒါပေမဲ့ ကျွန်တော်တို့ကို လခတွေ အကုန်ပြန်ထုတ် ပေးပါတယ်။
သူဌေးက စိတ်မချလို့ ဆိုပြီး အဲဒီနေရာမှာ ကျွန်တော်တို့ကို ဆက်မထားတော့ဘူး။ အခန်းတစ်ခန်း ငှားပေးတယ်။ စက်ရုံကနေ နာရီဝက်လောက် လမ်းလျှောက်ရတယ်။ အခန်းကတော့ တော်တော်လေး သန့်တယ်။ ငှားခ တစ်လကို ၃၀၀ ပေးရတယ် တဲ့။ စုစုပေါင်း ၆ ယောက်နေရတယ်။
စက်ရုံနဲ့ အဲဒီ အခန်းကြားမှာ ရထားလမ်း ခုံးကျော်တံတား တစ်ခုရှိတယ်။ အဲဒီ ရထားလမ်းမှာကလည်း မကြာခဏ ယာဉ်တိုက်မှုဖြစ်ပြီး လူသေတတ်တယ်။ အဲဒီ ခုံးမရောက်ခင် ကားလမ်းမကြီး တစ်ခုရှိတယ်။ အဲဒီ ကားလမ်းကလည်း ကား အသွားအလာ အရမ်းများတယ်။ လူကူးစရာ နေရာမရှိဘူး။ ကားလမ်းကူးဘို့ တစ်ခါတလေ နာရီဝက်လောက် စောင့်ရတယ်။
အဲဒီ အခန်းရောက်ပြီး သိပ်မကြာပါဘူး။ လေးလလောက်ကြာတော့ တစ်ခါ ၀ိုင်းလုပြန်ရော။ ဒီတစ်ခါ လုတာက အင်ဒိုနီးရှား ကုလားတွေ။ ရထားလမ်း ခုံးအဆင်းမှာက မီးမရှိဘူး။ မှောင်မဲနေတယ်။ အဲဒီနေရာကနေ စောင့်ပြီးလုတာ။ ကျွန်တော်တို့လည်း တော်တော်လန့်သွားတယ်။ ဒါနဲ့ သူဌေးကို မင်း ငါတို့ကို အိမ်ထိလိုက်ပို့ပါ။ အဲဒီလို လိုက်မပို့နိုင်ရင်တော့ ငါတို့ အလုပ်မဆင်းနိုင်ဘူး လို့ ပြောတယ်။ ဆိုတော့ ညပိုင်း ၉ နာရီတို့ ဘာတို့ ဆင်းရရင် သူဌေးက သူ့ကားနဲ့ လိုက်ပို့တယ်။
ဆိုးတာက မလေးရှားမှာက ဘတ်စ်ကားပေါ်မှာတောင် မြန်မာလို မပြောရဲဘူး။ ကားပေါ်မှာကို ပေါ်တင်လုတာ။ အရမ်းကြမ်းတယ်။ ဂျိုဟိုးလောက်ဆို သိပ်မဆိုးဘူး။ ကွာလာလမ်ပူ ဘက်မှာဆို အရမ်းဆိုးတယ်။ ပိုက်ဆံဆိုရင် ဒီ စင်ကာပူမှာလို ပေါ်တင်ကိုင်လို့ မရဘူး။ ခြေအိတ်ကြားထဲ ထည့်ထားရတယ်။
ဒီလို ထည့်ရခြင်းကလည်း အကြောင်း နှစ်ခုရှိတယ်။ တစ်ခုက လုမှာကြောက်လို့။ နောက်တစ်ခုကတော့ ရဲ ရန် ကြောက်လို့ပဲ။ ဘယ်လောက် ဆိုးသလဲဆို တစ်ယောက်ယောက်နဲ့ ရန်ဖြစ်လို့ မကျေနပ်ရင် ပိုက်ဆံ ၅၀၀ လောက်ပေးပြီး ရှော့ ပစ်လိုက်လို့ ရတယ်။ ကျွန်တော်တို့ဆီမှာ မြန်မာပြည်က ဖိုက်တာတွေ ရှိတာပဲ။ ဒါပေမဲ့ ဒီကောင်တွေနဲ့ ပြိုင် မမိုက်ရဲဘူး။
ဒီကောင်တွေက သေမထူး၊ နေမထူး ဆိုတဲ့ အကောင်တွေ။
ကျွန်တော် အဲဒီစက်ရုံမှာ ၂ နှစ်ကြာခဲ့တယ်။ သက်တမ်း ထပ်မတိုးတော့ဘူး။ သူဌေးကတော့ တိုးစေချင်တယ်။ ဒါပေမဲ့ ကျွန်တော် အဲဒီမှာ ဆက်မလုပ်ချင်တော့ဘူး။ ဒုတိယနှစ်မှာတော့ လခကို ၈၅၀ ထိ တိုးပေးတယ်။ ဒါပေမဲ့ဗျာ၊ စုမိတယ် မရှိပါဘူး။ ပျင်း၊ ပျော်၊ ပျက်၊ ပြေး ဆိုတဲ့ စကားလိုပေါ့။ ရောက်စကတော့ ပျင်းလို့ မနေတတ်ဘူး။ နောက်တော့ ပျော်သွားတယ်။ အပျော်လွန် တဲ့ နောက်တော့ ပျက်တော့တာပဲ။ အဲဒီတော့ အဲဒီမှာ မနေနိုင်တော့ဘူး။ တစ်ခါထဲ ပြေးရတဲ့ဘ၀ ရောက်တာပဲ။
ကျွန်တော်မြင်တာကတော့ မလေးရှားမှာ လုပ်ဖူးသူတစ်ယောက်အနေနဲ့ ဘယ်နိုင်ငံမှာ လုပ်ရလုပ်ရ လုပ်နိုင်သွားပြီ။ ဒါ့ထက်ဆိုးစရာ မရှိနိုင်တော့ဘူးလို့ ဒီလိုပဲထင်တယ်။ အနို့ အဲဒီမှာလုပ်ရတာ အင်မတန် အန္တရာယ်များတယ်။ ကျွန်တော်တို့ ရောက်တဲ့အချိန်မှာ မြန်မာတစ်ယောက်နဲ့ အင်ဒိုနီးရှား နှစ်ယောက် ရန်ဖြစ်ကြတယ်။ ပထမ မြန်မာက ထိုးလိုက်တာ အင်ဒိုနီးရှား ကောင် ကွဲပြဲသွားတယ်။ ဒါပေမဲ့ ဟို အင်ဒိုတစ်ယောက်က အဲဒီမြန်မာရဲ့ မျက်နှာကို အက်စစ်နဲ့ပက်တာ မျက်လုံးလည်း ကန်းသွားတယ်။ မျက်နှာတစ်ခုလုံးလည်း ရစရာမရှိဘူး။
ကျွန်တော်ဆိုလိုချင်တာက မလေးရှားမှာ လုံခြုံမှုမရှိဘူး။ ကျီးလန့်စာ စားနေရတယ်။ မြန်မာပြည်က မလေးရှားသွားဘို့ လုပ်နေသူတွေကို ကျွန်တော်ပြောချင်တာကတော့ မသွားပါနဲ့။ အန္တရာယ်က လက်တစ်ကမ်းမှာ ရှိနေပါတယ် ဆိုတာပဲ။

၁၅၊ ၂။ စင်ကာပူ တွင် သင်္ဘောသားဖြစ်ရန် ကြိုးစားခြင်း

အမှန်ကတော့ ကျွန်တော်ဖြစ်ချင်တာက သင်္ဘောသား။ ဆယ်တန်းအောင်တော့ သင်္ဘောလိုင်းလိုက်ဖို့ ကျောင်းတက်ရ လောက်အောင် အမှတ်ကမမီဘူး။ ဒါနဲ့ အေးဂျင့်တွေ လျှောက်မေးတာပေါ့။ ဘယ်အေးဂျင့် မေးလိုက်မေးလိုက် သင်တန်းတွေ တက်ရမယ်။ တစ်နှစ်စောင့်ရမယ် ဆိုတာချည်းပဲ။ အဲဒီ ၂၀၀၅ ခုနှစ်တုံးက အေးဂျင့်ဖီးက ၄၅ သိန်း။ သင်္ဘောပေါ် အရောက်ပေါ့။ ပိုက်ဆံကုန်မှာကလည်း စိုးသေးတော့ တော်တော်နဲ့ မလုပ်ဖြစ်ဘူး။
သင်္ဘောသားဖြစ်ဖို့ ပထမဆုံး Eye Test အလျင်ဖြေရတယ်။ ဖြေခ နှစ်သောင်းပေးရတယ်။ သုံးခါ ဖြေရတယ်။ သင်္ဘောကျင်းမှာပဲ ဖြေရတာ။ ဘာမှ အထွေအထူးတော့ မဟုတ်ပါဘူး။ မီးရောင်တွေကို အရောင်မှန်မှန် မြင်မမြင် စစ်တာ။ အစိမ်းရောင်လား။ အနီရောင်လား။ Eye Test အောင်မှ သင်္ဘောသား Appointment ၀ယ်ရတယ်။ အဲဒီ Appointment စာရွက်ကို ၃ သိန်း နဲ့ ၀ယ်ရတယ်။ သူက သပ်သပ်ဝယ်ယူ ရတာ။ Appointment စာရွက်ရပြီ ဆိုရင် CDC စာအုပ် ထုတ်လို့ရပြီ။ အဲဒါတွေ လုပ်လိုက်တာ စုစုပေါင်း ၁၈ သိန်းလောက် ကုန်တယ်။
အဲဒါရပြီးရင် သင်တန်းတွေ တက်ရမယ်။ တစ်နှစ်။ ကြိုးချည်နည်း၊ ဖြေနည်း။ အင်္ဂလိပ်စာ သင်တန်း စသဖြင့်ပေါ့။ ကျွန်တော် မတက်ခဲ့ဖူးလို့ သေသေချာချာတော့ မပြောပြနိုင်ဘူး။
သင်္ဘောသား ဖြစ်ရေးအတွက် လိုက်စုံစမ်းတာ စုံနေတာပဲ။ တော်တော်နဲ့ကို အဆင်မပြေနိုင်ဘူး။ ကျွန်တော်က မလေးမှာ လုပ်လာတာ ဆိုတော့ အဲဒီလို ဟိုလိုလို ဒီလိုလိုနဲ့ ယောင်ခြောက်ဆယ် ဖြစ်နေတာကို သည်းမခံနိုင်တော့ဘူး။ အလုပ်မလုပ်ပဲ လေနေတဲ့ ဒါဏ်ကို မခံစားနိုင်တော့ဘူး ဆိုပါတော့။ အဲဒါနဲ့ မထူးဘူးဆိုပြီး စင်ကာပူသွားလို့ရမဲ့ လမ်းကြောင်း လိုက်ရှာတယ်။
အဲဒီမှာ လန်ကစ္စတာလမ်းက အေးဂျင့်တစ်ခု နဲ့ သွားတွေ့တယ်။ သူက စင်ကာပူကို လူတွေအများကြီး ပို့နေတာ။ ခုဆို သူဌေးဖြစ်နေပြီ။ သူ့ဆီမှာ စင်ကာပူလာနိုင်ဘို့ welding သင်တန်း တက်ရတယ်။ သင်တန်းကြေး တစ်သိန်းခွဲ သွင်းရတယ်။ ဘာမှ ရေရေရာရာ မဟုတ်ပါဘူး။ ဆရာတွေကလည်း သူရို့စိတ်ကူးရှိရာ သင်ချင်တာသင်တာပဲ။
သိပ်မကြာပါဘူး။ Seaman တစ်ယောက်လိုတယ် တဲ့။ သတင်းရတယ်။ ပတ်စ်ပို့စာအုပ်ကလည်း seaman စာအုပ်နဲ့မှ ရမှာကိုး။ အဲဒီစာအုပ်က ကျွန်တော်တစ်ယောက်ထဲရှိတာ ဆိုတော့ ကျွန်တော့်ကို သူတို့အင်တာဗျူးတယ်။ သူဌေးက ဗျူးတာ။ ကျွန်တော်က မလေးရှား အတွေ့အကြုံ ရှိထားတာဆိုတော့ အရွေးခံရတယ်။ ရွေးလည်းပြီးရော တင်လိုက်တာ။ ဘာမှ မကြာလိုက်ဘူး။ ဒီနေ့တင်၊ နက်ဖြန်လို IPA ကျလာတာပဲ။ IPA Letter ကို စင်ကာပူကနေ Fax နဲ့လှမ်းပို့ပေးလိုက်တယ်။
အေးဂျင့်ဖီးက ၃၅ သိန်းပေးရတယ်။ လခက Basic Pay ၇၀၀၊ allowance က ၁၀၀။ ပေါင်း ၈၀၀ ပေါ့။ နေတာ သူတို့စီစဉ်ပေး တယ်။ အချိန်ပို ဆင်းရတာနဲ့ဆို တစ်လကို ၁၄၀၀၊ ၁၅၀၀ လောက် ထုတ်ရပါတယ်။
ကျွန်တော်ကလည်း သဘောကျတယ်။ မြန်မာပြည်မှာ တစ်နှစ်နေပြီး သင်တန်းတွေ လျှောက်တက်နေမဲ့ အစား ဒီအလုပ်ကို တစ်နှစ်လုပ်ပြီး အတွေ့အကြုံယူတာကျတော့ ပိုက်ဆံလည်းရတယ်။ လက်တွေ့လည်း တတ်သွားတာပေါ့။ တက်ရမဲ့ သင်တန်းတွေကတော့ ကြိုးချည်နည်းတို့ ဘာတို့၊ သင်္ဘောနဲ့ပတ်သက်တာတွေပေါ့။ ဒါတင်မရဘူး။ သင်္ဘောကျင်းတွေမှာလည်း Dock ဆင်းရမယ်။ နောက်ပြီး အင်္ဂလိပ်စာ သင်တန်းလည်း တက်ရဦးမယ်။
ပြောပါတော့ အဲဒီလိုနဲ့ စင်ကာပူကို ဇူလိုင်လ ၂၈ ရက်၊ ၂၀၀၈ မှာ ထွက်ခဲ့တယ်။
လုပ်ရတာက သင်္ဘောကြီးတွေပေါ်ကို မော်တော်ဘုတ် (motor boat) ကလေးတွေနဲ့ သွားပြီး ကုန်ခြောက်တွေ သွားပို့ရတယ်။ ဘီစကစ်၊ အအေးဗူး စတဲ့ အစားအသောက်နဲ့ လူ့အသုံးအဆောင်တွေ သွားသွား ပို့ပေးရတာ။ နောက် သူတို့ပေးလိုက်တဲ့ D.O (Delivery Order) စာရွက်စာတမ်းတွေ ပြန်ယူလာ စသဖြင့်ပေါ့။ ပို့ခယူတာ တော်တော်များတယ်။ ပစ္စည်းကမှ ၃၀၀ ကျော်လောက် တန်တာ။ သင်္ဘောနဲ့ တစ်နာရီလောက် မောင်းရတဲ့ ခရီးကို ၅၅၀ လောက် တောင်းတယ်။ သုံးနာရီ မောင်းရတဲ့ခရီး ဆို ၁၀၀၀ ကျော်ပေးရတယ်။
သူတို့အတွက် အရေးကြီးတာက ပစ္စည်းမဟုတ်ဘူး။ ပစ္စည်းတွေထက် ပိုအရေးကြီးတာက D.O။ ဒါနဲ့မှ သူတို့ ပိုက်ဆံ ပြန်တောင်းလို့ ရမှာကိုး။ အဲဒီ D.O မှာ လက်မှတ်ထိုးဘို့၊ နောက်ပြီး သင်္ဘောတံဆိပ်တုံးပါဘို့ အရေးကြီးတယ်။ ကုန်ကုန်ပြောရရင် ပစ္စည်းရေထဲကျသွားတောင်မှ ပိုက်ဆံတောင်းလို့ရတယ်။
ပြောရဦးမယ်။ တစ်ခေါက်မှာ Tanker သင်္ဘောကြီးပေါ် ပိုက်လုံးတွေ ပို့ရတယ်။ အဲဒါ ကရိန်းကနေ ဘယ်လိုဘယ်လို လွတ်ကျသလဲတော့ မသိဘူး။ ပိုက်ပြုတ်ကျပြီး ဘုတ်(Boat) ပေါက်သွားတယ်။ ဘုတ်ထဲ ရေတွေဝင်တော့ အသက်ကယ်လှေ တွေပေါ် စုပြုံတိုးတက်ကြတာပေါ့။ ဘုတ်ပေါ်မှာက အသက်ကယ် လှေတွေရှိတယ်။ နောက် အဲဒီဘုတ်နဲ့တွဲထားတဲ့ ကြိုးကိုဖြတ်ချ။ မချရင် ဘုတ်က တန်းလန်းကြီး ဖြစ်နေမှာကိုး။ အသေအပျောက် မရှိပေမဲ့ ပထမဆုံး အတွ့အကြုံဆိုတော့ ကျွန်တော့်မှာ အတော့်ကို သည်းထိတ်ရင်ဖို ဖြစ်သွားတယ်။ ဘုတ်တွေမှာ အရေးပေါ် ခလုတ်ရှိတယ်။ အဲဒီခလုတ်ကို နှိပ်လိုက်ရင် နာရီဝက် အတွင်း ကင်းလှည့်နေတဲ့ ရဲသင်္ဘောတွေ ရောက်လာတတ်တယ်။
သင်္ဘောတွေပေါ်မှာက ဖိလစ်ပင်းများတယ်။ မြန်မာတွေလည်း ပါတတ်တယ်။ တစ်ခါကဆိုရင် သင်္ဘောတစ်စီးလုံး မြန်မာတွေချည်းပဲ။ သင်္ဘောကက်ပတိန်ကစ မြန်မာ။ ကိုယ်ကတော့ ကိုယ့်မြန်မာချင်း ဆိုပြီးတော့ ကိုယ့်အလုပ် ဟုတ်ဟုတ် မဟုတ်ဟုတ် ၀ိုင်းလုပ်ပေးတယ်။ အဲဒီမှာ Chief Officer ကလည်း မြန်မာပဲ။ သူက ဟေ့ကောင်၊ ဒီပစ္စည်းတွေ ချပေး တဲ့။ အလိုဗျာ၊ ကျွန်တော်တို့အလုပ်က သင်္ဘောဆီ လာပို့ပေးရုံပဲ။ ကျွန်တော် စေတနာရှိရင် ချပေးချင် ချပေးမယ်ပေါ့။ ဒါပေမဲ့ တကယ် ယူရမှာက သူတို့။ ခုတော့ အကြောကြီးနဲ့ ကျွန်တော့်ကို ချပေး တဲ့။
ကျွန်တော်လည်း စိတ်တော်တော် အချဉ်ပေါက်သွားတာနဲ့ ဦး လို့။ ဘာဖြစ်လို့ ဒီလို ပြောရတာလဲ။ ဦးတို့မယူလို့ ကျွန်တော်တို့ ပြန်ယူသွားရင်လည်း ဘာမှ မဖြစ်ဘူး လို့ ပြန်ပြောလိုက်တယ်။ မင်းတို့ပို့တဲ့ပစ္စည်း မင်းတို့မချပေးလို့ ဘယ်သူ ချပေး မလဲ တဲ့။ သူက မာရေကျောရေနဲ့။ မသကာ ညီလေးရေ၊ အစ်ကိုတို့ကိုတော့ ဒါတွေ ကူချပေးကွာ ဆိုလည်း ကျွန်တော်တို့ နေပါ့ မလားဗျာ။ တခြားဟာတွေတောင် ၀ိုင်းလုပ်ပေးနေသေးတဲ့ဟာ။
ဦးတို့ မယူချင်လဲ နေ။ ကျွန်တော်တို့ ပိုက်ဆံ claim လုပ်ရမှာ ဒီပစ္စည်းတွေနဲ့ မဟုတ်ဘူး။ ဟောဒီ D.O နဲ့ လို့ပြောလိုက်မှ သူတို့ဟာ သူတို့ သယ်တော့တယ်။ အဲဒီလိုလည်း ကြုံရသေးတယ်ဗျာ။
Anchorage (အပြည်ပြည်ဆိုင်ရာ ရေပိုင်နက်တွင် သင်္ဘောကြီးများ ကျောက်ချရပ်နားရာ နေရာ) ကျတော့ ဟို့ ပင်လယ် ထဲရောက်သွားပြီ။ အရမ်းအန္တရာယ်များတော့ ကျွန်တော်တို့လို အတွေ့အကြုံမရှိသေးတဲ့ သူတွေ မလွှတ်ဘူး။ အတွေ့အကြုံ ရင့်ပြီးတဲ့သူတွေပဲ လွှတ်တယ်။
အရင်တုံးကတော့ Pasir Panjan Ferry Terminal ကနေ သွားရတယ်။ ဒါပေမဲ့ ခုတော့ Penjuru Terminal ကိုပြောင်း လိုက်တယ်။ အဲဒီမှာ ကျွန်တော်တို့ရုံးခန်းလည်း အဲဒီမှာပဲ။ အဲဒီမှာ ပစ္စည်း supply လုပ်တဲ့ ကုမ္ပဏီတွေချည်း စုနေတယ်။ စုစုပေါင်း ၁၃ ခုလောက်ရှိတယ်။ ကျွန်တော်တို့က ပစ္စည်း supply လုပ်ရတာ သီးသီးပဲ။ တခြားဘာမှ မလုပ်ရဘူး။
ပစ္စည်းပို့ဘို့ ဘုတ်တစ်ခေါက်ထွက်ရင် လူ ၃ ယောက်ပါတယ်။ ဘုတ်မောင်းတဲ့သူ တစ်ယောက်ရယ်။ အောက်က ချိတ်ပေးမဲ့လူ တစ်ယောက်။ အပေါ်တက် ဖြုတ်ရမဲ့လူ တစ်ယောက်။
ပင်လယ်ထွက်ရတာ အရမ်း အန္တရာယ်များတယ်။ တစ်ခါတုံးကဆို ကျွန်တော်တို့ ဘုတ်မှာ။ အောက်က ပစ္စည်းချိတ်ပေး တဲ့သူကို ချည်တဲ့ခါးပတ်ကြိုးနဲ့ ရိုက်မိတာ နှာခေါင်းရိုး ကျိုးသွားတယ်။ ကြိုးကကျအလာ ဘုတ်ကအစောင်း ဆိုတော့ ကြိုးအဖျားနဲ့ ခတ်သွားတာ။
တစ်ခါတစ်ခါ ပစ္စည်းတင်နေတုံး မိုးက သည်းကြီးမည်းကြီးရွာ။ လှိုင်းကလည်း အရမ်းလူးနေတယ်။ ကျွန်တော်တို့ Life Jacket (သက်ကယ်အင်္ကျီိ) တွေ ၀တ်ထားရတယ်။ ပင်လယ်ထဲလဲ ပြုတ်ပျက် ကျတာပဲ။ သေကံမရောက် သက်မပျောက်လို့သာ။ တစ်ခါတော့ အိန္ဒိယ Boarding Officer တစ်ယောက်ဆို သင်္ဘောပေါ်တက်သွားရင်း gangway (ကုန်းဘောင်) ပြတ်ကျတာ။ gangway က စိတ်မချရဘူး။ ပင်လယ်ရေတွေနဲ့ အမြဲထိနေတော့ သံချေးတွေကိုက်ပြီး ဆွေးနေပြီ။
သွားတာတော့ အင်ဂျင်နီယာတွေနဲ့ သုံးယောက် သွားတာပဲ။ ဒါပေမဲ့ ဒီကောင့်အလှည့်မှာ ပြတ်ကျတာ။ သူလည်း gang way နဲ့ လွတ်ရာ ပင်လယ်ထဲကို ခုန်ချသွားတယ်။ မဟုတ်လို့ gangway နဲ့သာ ရိုက်မိရင် သေပြီ။ သူတို့သုံးယောက်လုံးမှာ Life Jacket မပါဘူး။ တော်သေးတာပေါ့။ သူက ရေကူးတတ်လို့။ သူပြုတ်ကျသွားတာနဲ့ ဘောတွေ ပစ်ချပေးလိုက်တယ်။ တော်သေး တယ်။ ဘာမှ မဖြစ်ဘူး။
အဲဒီမှာ ရဲ ကင်းလှည့်သင်္ဘောတွေ ရောက်လာတယ်။ ရဲတွေက ကက်ပတိန်ကို မေးတာပေါ့။ ဘယ်လိုဖြစ်တာလဲ လို့။ တကယ်ဆို officer အနေနဲ့ တိုင်လို့ရတာပေါ့။ ဒါပေမဲ့ သူလည်း တိုင်တော မနေတော့ဘူး။ သူတို့နဲ့ ကျွန်တော်တို့နဲ့က ကိုင်းကျွန်း မှီ၊ ကျွန်းကိုင်းမှီ လုပ်နေကြရတာကိုး။ ဒါနဲ့ ပြီးသွားရော ဆိုပါတော့။
မလွယ်ဘူးဗျို့။ ရေထဲမှာ လုပ်နေရတာ။ အန္တရာယ်ချည်းပဲ။
တစ်ခါတလေ super tanker ကြီးတွေဆီ သွားပို့ရတယ်။ နောက်ပြီး ဒီကောင်ကြီးတွေက empty (ကုန်မပါ၊ ဗလာ သင်္ဘော) တွေ။ သင်္ဘောကကြီးလို့ နဂိုကတည်းက မြင့်ပြန်။ ကုန်မတင်ထားလို့ ရေပေါ်ပေါ်နေပြန် ဆိုတော့ အမြင့်ကြီးတွေ။ ပြုတ် ပျက်သာ ကျလို့ကတော့ ရှင်နိုင်စရာ လမ်းမရှိဘူး။ ကုန်တင်ထားရင် ရေထဲကို သုံးပုံနှစ်ပုံလောက် မြုပ်နေလို့ တော်သေးတယ်။
အလုပ်ချိန်ကတော့ မနက် ၈ နာရီကနေ ညနေ ၅ နာရီပဲ။ ဒါပေမဲ့ ပစ္စည်းမပို့ရတဲ့ နေ့တွေဆို အားနေတယ်။ ကွန်တိန်နာ ထဲမှာ တစ်နေကုန် ကော်ဖီသောက်လိုက်၊ စာဖတ်လိုက်နဲ့ အချိန်ဖြုန်းရတာပဲ။ ဒီနေ့ဆို အလုပ်မရှိလို့ နေ့ခင်း ၁၂ နာရီကတည်းက ကျွန်တော်တို့ အပြင်ထွက် လည်နေတာပဲ။
လုပ်သက် တစ်နှစ်ရရင် တုံးတစ်တုံး ထုပေးတယ်။ ကုမ္ပဏီနဲ့ သင်္ဘောက ထုပေးတာ။ လုပ်သက် သုံးနှစ်ရလို့ တုံးသုံးတုံး ထုပြီးသွားရင် စာမေးပွဲ ဖြေလို့ရပြီ။ ဒါပေမဲ့ အဲဒီ တုံးကလည်း အလကားတော့ မရဘူး။ အမေရိကန် ဒေါ်လာ ၂၀၀ နဲ့ ၀ယ်ယူရ တာ။ ပိုက်ဆံပေးရတာတော့ သိပ်မများပါဘူး။ လုပ်ရတာကတော့ အသက်နဲ့ရင်းပြီးကို လုပ်ရတာပဲ။ ကျွန်တော်ကတော့ သေမှာ သိပ်ကို မကြောက်တော့ဘူး။ ဘာဖြစ်လို့လဲ ဆိုတော့ မလေးရှားမှာလုပ်ပြီး တစ်နှစ်ပြည့်တဲ့နေ့မှာ ကားမှောက်တယ်။ ဘီးပေါက်ပြီး မှောက်တာ။ ကံကောင်းလို့ပေါ့။ အကုန်သေကုန်တော့မလို့။ သူဌေးကလည်း တော်ပါတယ်။ ကားမှောက်တဲ့ နေရာ ချက်ချင်းလိုက်လာပြီး အကုန်လုပ်ကိုင် ပေးတယ်။ အဲဒီကတည်းက ကျွန်တော်သေမှာ မကြောက်တတ်တော့ဘူး။ သေတစ်နေ့ မွေးတစ်နေ့ပဲ လို့ သဘောထားတတ်လာ တယ်။
မနက်ဖြန်နေ့ခင်း ၂ နာရီမှာ ပင်လယ်ဆင်းရမယ်။ ကျွန်တော်တို့အဖို့တော့ ရိုးနေပါပြီ။ သင်္ဘောသားဖြစ်လည်း တစ်ချိန်လုံး ပင်လယ်ထဲ နေရမှာပဲ မဟုတ်လား။
ဒါကတော့ ကျွန်တော့်ရဲ့ သင်္ဘောသား တစ်ပိုင်း ဘ၀အတွေ့အကြုံလေးတွေပေါ့ဗျာ။ သင်္ဘောသားစစ်စစ်တွေဆို ကျွန်တော့်ထက် ပိုဆိုးမလား မပြောတတ်ဘူး။

သုံးသပ်ချက်

ကိုမိုးသက်မှာ စင်ကာပူတွင် လုပ်နေသည် ဆိုသော်ငြားလည်း ကုန်းပေါ်တွင် လုပ်နေရခြင်းမဟုတ်။ သင်္ဘောသား ဖြစ်ရေးအတွက် ပင်လယ်တွင်းဆင်းကာ sea service ယူနေသူ ဖြစ်သဖြင့် အခြား ကုန်းပေါ်တွင် လုပ်ကိုင်နေသူများနှင့် အတွေ့အကြုံခြင်း မတူပါ။ သို့သော် အသက်နှင့်ရင်းကာ လုပ်နေရသော သူတို့ဘ၀ကို အများသိနိုင်ရန် ကြားညှပ်၍ ဖော်ပြ ပေးလိုက်ခြင်း ဖြစ်ပါသည်။

၂၀၁၂၊ ရေကြည်ကုန်းဘုန်းကြီး နှင့် ရှမ်းဘုန်းကြီး အိပ်မက်များ

၂၀၁၂ ကျရင် ကမ္ဘာကြီးပျက်မယ် ဆိုတာ တကယ်လားဗျ ဟု မိတ်ဆွေတစ်ဦးက တစ်နေ့တွင် မေးလာပါ၏။ ထို မိတ်ဆွေမှာ မြန်မာပြည်မှ အင်ဂျင်နီယာဘွဲ့ ရရှိလာခဲ့သူ ဖြစ်ပါသည်။
ကျွန်တော့်မှာ စင်ကာပူပိုင် Pulau Ular ကျွန်း၊ ဓါတုဗေဒ စက်ရုံ ဆောက်လုပ်ရေး လုပ်ငန်းတွင် သွားရောက် အလုပ်လုပ်နေရသည် ဖြစ်ရာ ထို ကျွန်းသို့နေ့စဉ် သင်္ဘောဖြင့် သွားရသည်။ သင်္ဘောစီးရန် နာရီဝက်မျှ တန်းစီရသည် ဖြစ်ရာ ထိုသို့ တန်းစီရင်း နေ့စဉ် တွေ့ရာမှ ထို သူနှင့် မိတ်ဆွေ ဖြစ်လာခဲ့ခြင်း ဖြစ်ပါသည်။ ထိုမိတ်ဆွေ မေးလိုက်သော မေးခွန်းပေါ် အခြေခံ၍ ကျွန်တော့်တွင် တွေးစရာ တော်တော်များများ ရလာခဲ့ပါသည်။
ထို မိတ်ဆွေကိုမူ အချိန်လည်း သိပ်မရသည်နှင့် အတိုချုံးကာ ဖြစ်နိုင်၊ မဖြစ်နိုင်ကို သူများပြောတာတွေ လိုက် နားယောင် နေတာထက် မိမိကိုယ်တိုင် ခိုင်လုံသော သတင်း အချက်အလက်များ ကို လေ့လာပြီး မိမိဉာဏ်နှင့် ချင့်ချိန် ယုံရန် ပြောလိုက်ပါသည်။ သည် ၂၀၁၂ တစ်ခုထဲ မဟုတ်ပါ။ အခြားကိစ္စများကိုလည်း မိမိဉာဏ်နှင့် ချင့်ချိန် ယုံကြည်ကြရန် အရေးကြီးပါသည်။
ယခုတလော ထို ၂၀၁၂ အကြောင်း သတင်းစာ၊ ဂျာနယ်၊ မဂ္ဂဇင်း၊ အင်တာနက် နှင့် အီးမေးလ် များတွင် အတွေ့ရ များလာခဲ့ပါသည်။ အထူးသဖြင့် ၂၀၁၂ အကြောင်း ရိုက်ကူးထားသော ရုပ်ရှင်ကြောင့် ပို ဖြစ်နိုင်ပါသည်။ ထို ၂၀၁၂ တွင် ကမ္ဘာပျက်မည် ဆိုသည်နှင့် ပတ်သက်၍ မြတ်နိုးခင် က http://www.anyarnwaytamarmyay.blogspot.com/ တွင် အကျယ်တ၀င့် ရှင်းလင်းပြောပြထားပါသည်။ ကျွန်တော် ပြောလိုသည်မှာ ၂၀၁၂ အကြောင်း မဟုတ်၍ ဤနေရာတွင် ချန်လှပ် ခဲ့ပါမည်။
ကျွန်တော့်အနေနှင့်မူ ၂၀၁၂ တွင် ကမ္ဘာပျက်မည် ဟု ပြောသည်ကို မထူးဆန်း။ ထူးဆန်းနေသည်မှာ ထို ကမ္ဘာပျက် မည် ဆိုသည်ကို ယုံယုံကြည်ကြည်နှင့် တုန်လှုပ် ချောက်ချားစွာ ပြောဆိုနေသူ အများစုမှာ ပညာတတ်များ ဖြစ်နေခြင်း ပင် ဖြစ်ပါသည်။
သို့ဆိုလျှင် ပညာ ဟူသည် အဘယ်နည်း။ ပညာဟူသည်မှာ အမှားအမှန်ကို ဝေဖန် ပိုင်းခြားနိုင်စွမ်း ဟု အဓိပ္ပာယ် ဖွင့်ပါသည်။ သို့အတွက် ပညာတတ် ဟူသည် အမှားအမှန်ကို ဝေဖန်ပိုင်းခြား သုံးသပ်နိုင်စွမ်းရှိသူ ဟု မှတ်ယူရမည် ဖြစ်ပါ သည်။ ထိုကြောင့်ပင် ထို ပညာတတ် ဆိုသူများက ရှမ်းဘုန်းကြီး အိပ်မက်များကို စွဲစွဲလမ်းလမ်း ယုံကြည်နေခြင်း၊ ဇူလိုင်လ ၂ ရက်နေ့တွင် ဆူနာမီ တိုက်မည် ဆိုသည်ကို စွဲလန်းကြောက်လန့်စွာ email များ အဆက်မပြတ် ပေးပို့ခြင်း၊ အောက်တိုဘာ ၁၅ ရက်နေ့တွင် နေ့တာသည် ၂၅ နာရီ ဖြစ်မည်ဆိုသည်ကို ထူးထူးဆန်းဆန်း ဖြစ်နေခြင်း၊ ၂၀၁၂ ခုနှစ်တွင် ကမ္ဘာပျက်မည် ဆိုသည်ကို ထိတ်လန့် ချောက်ချားနေခြင်း တို့အား ကျွန်တော် အလွန် အံ့သြမိပါသည်။
ထိုကဲ့သို့ ဆိုလျှင် ပညာ ဟူသော အဓိပ္ပာယ်နှင့် ပညာတတ် ဟူသော အဓိပ္ပာယ်တို့ အကြား ကွဲလွဲမှု တစ်စုံတစ်ရာ တော့ ရှိနေပြီ ဟု ကျွန်တော် သံသယ ဖြစ်မိပါသည်။
ယနေ့ခေတ်သည် ယခင်ကာလများက ကဲ့သို့ သတင်း အချက်အလက်များကို ခဲခဲယဉ်းယဉ်း ရှာဖွေနေရသော ကာလ မဟုတ်ပါ။ မိမိသိလိုသည်ကို အင်တာနက် စာမျက်နှာပေါ်တွင် စာလုံးအနည်းငယ်မျှ ရိုက်ထည့်လိုက်ရုံမျှနှင့် ပညာရှင်ပေါင်းစုံ ၏ အချက်အလက်ပေါင်းစုံ၊ သတင်းပေါင်းစုံ ကို အလွယ်တကူ ဖတ်ရှုနိုင်ပါသည်။ သို့သော် ထို အချက်အလက်များ မှန်မမှန်၊ စိတ်ချရ မချရ ဆိုသည်မှာ မိမိ၏ ဉာဏ်ဖြင့် ဝေဖန်ပိုင်းခြားဘို့ ဖြစ်ပါသည်။

ကျွန်တော် လေးမျက်နှာမြို့တွင် နေခဲ့စဉ်ကာလက ဖြစ်ပါသည်။ ၁၉၈၃ ခုနှစ်လောက်က လေးမျက်နှာမြို့၏ မြစ်တစ်ဖက်ကမ်း တွင်ရှိသော ရေကြည်ကုန်းရွာမှ ဘုန်းကြီးသည် ရေမန်း အလွန်စွမ်းသည် ဆိုသဖြင့် အနယ်နယ် အရပ်ရပ်မှ ကားကြီးကားငယ် အသွယ်သွယ်ဖြင့် လာရောက် ကြသော ဖြစ်ရပ်တစ်ခု ကြုံခဲ့ဖူးပါသည်။ ထို ရေမန်းကို သောက်လိုက်လျှင် ရောဂါမျိုးစုံတို့ ပျောက်ကင်းကာ စီးပွား လာဘ်လာဘတို့ တိုးပွားသည် ဟူ၏။ လာသည့်သူများ အလွန်များသဖြင့် ကွင်းလယ် တွင် မဏ္ဍပ်ကြီး ထိုးလျှက် လူများကို ရေခွက်များကိုင်ကာ တန်းစီထိုင်စေပြီး ဘုန်းကြီးက ထို ရေခွက်များကို လက်နှင့် လိုက်ထိ ပေးရသည် ဆို၏။ နောက် လူများသထက် များလာသောအခါ ဘုန်းကြီးမှာ ရေခွက်များကို ထိပေးခြင်းငှာ မတတ်သာတော့ဘဲ ရေကန်ကိုမန်းပေး၊ ထိုမှ နောက်တွင်မတော့ ရေတွင်းကို မန်းပေးကာ ထိုရေတွင်းမှ ရေများကို ရေမန်းအဖြစ် ခပ်ယူကြသည် ဟူ၏။ ထိုကဲ့သို့ ရေမန်းယူရန် လာကြသူအများထဲတွင် ပညာတတ် အများအပြား ပါဝင်ပါသည်။
ကျွန်တော် ငယ်စဉ်က ကျွန်တော်တို့ရွာနှင့် သိပ်မဝေးလှသော ရွာကြီးတစ်ခုတွင် ဇော်ဂျီပေါ်ခဲ့ဖူးသော ဖြစ်ရပ် တစ်ခု လည်း ကြားဖူးခဲ့ပါသည်။ ကျွန်တော့် ဖခင်ကြီးများ လက်ထက် ဖြစ်ပါ၏။ ထို ဇော်ဂျီပေါ်သည့် ရွာနှင့် ကျွန်တော်တို့ ရွာမှာ မိုင် ၂၀ ခန့်မျှသာ ဝေးသည်ဖြစ်ရာ ကျွန်တော်နှင့် ဦးလေးတော်သူ ဦးရွှေကွယ်က ကိုယ်တိုင်သွားကြည့်ပါသည်။ သူပြန်လာသော အခါ ပြောပြသည်မှာ အောင်မယ်လေးကွာ၊ ငါ့နှယ်၊ ဇော်ဂျီဆိုလို့ သွားကြည့်ပါတယ်။ တို့ရွာက သောက်ရူး လှရွှေ ဖြစ်နေတာ ကိုး။ အလိုကွယ်၊ ဒီကောင်က အ၀တ်နီကြီး တကားကားနဲ့ တယ်ကောင်းစားနေပါကလား ဟူ၏။ ထို လှရွှေ ဆိုသူမှာ အလုပ်ကို လက်ကြောတင်းအောင် လုပ်သူမဟုတ်။ မည်သူကမှ လူရာမသွင်း။ ဘာမှ အသုံးကျသူ မဟုတ်ရကား ကျွန်တော်တို့ ရွာတွင် စားပေါက်မချောင်၍ တစ်နယ်ရပ်ခြားသွားကာ သူဉာဏ်ရှိသလို လုပ်စားနေခြင်း ဖြစ်ပါသည်။
၁၉၉၅ ခုနှစ်ပတ်ဝန်းကျင် ကလည်း တောင်ငူတွင် သူနှင့် ဖက်အိပ်လိုက်လျှင် ရောဂါပျောက်သည် ဆိုသော မိန်းကလေး တစ်ဦး ပေါ်ခဲ့ပါသေးသည်။ ဤနေရာသို့လည်း လူအများ အုတ်အော် သောင်းတင်း သွားရောက်ခဲ့ကြပါ၏။
သူများပြောတာ ဟုတ်မဟုတ် ကိုယ်ပိုင်ဉာဏ်နှင့် ချင့်ချိန်မယုံတတ်သူများကြောင့် ကျွန်တော်တို့ မြန်မာပြည်တွင် ဤကဲ့သို့ လုပ်စားနေသူ ဘုန်းကြီးပုဂ္ဂိုလ်၊ လူပုဂ္ဂိုလ်များ နေရာအနှံ့ ပေါ်ပေါက်နေခြင်း ဖြစ်ပါသည်။

ယခုခေတ်သည်ကား email များကို အင်တာနက်မှ တစ်ဆင့် လွယ်ကူလျှင်မြန်စွာ လူပေါင်းများစွာသို့ စက္ကန့်ပိုင်း အတွင်း ပို့နိုင်နေပြီ ဖြစ်ရာ သတင်း နှင့် အချက်အလက်များမှာ ချက်ခြင်း ပျံ့နှံ့ပါသည်။ ထိုသတင်း၊ အချက်အလက်များ ထဲတွင် ကောင်းတာလည်း ပါ၊ မကောင်းတာလည်း ပါ၊ မှန်တာလည်း ပါ၊ မမှန်တာလည်း ပါပါသည်။
ဥပမာ - လက်ကိုင်ဖုံးနှင့် စကားပြောလျှင် ဖုံးမှ ထုတ်လွှင့်သော ရေဒီယို သံလိုက်လှိုင်းများကြောင့် ဦးဏှောက်ကို ပျက်စီးစေသည်၊ ကင်ဆာဖြစ်စေသည် ဟူသည့် သတင်းများမှာ အင်တာနက် စာမျက်နှာများပေါ်တွင် အများအပြား ရေးသား ထားသော်လည်း အခြေအမြစ်မရှိ၊ မှန်လည်း မမှန်ပါ။ သို့သော် ထိုသတင်းမှားကို ထုတ်လွှင့်သူမှာ လူအထင်ကြီးစေရန် အချက်အလက်များ နှင့်တကွ ရေးသားထားသဖြင့် အသေးစိတ် မလေ့လာသူများအနေနှင့် ဒွိဟ ဖြစ်စရာ ဖြစ်ပါသည်။
ထို့ပြင် ကွန်ပြူတာနှင့် အိုင်တီ နည်းပညာများသည်လည်း မယုံကြည်နိုင်လောက်အောင် ဖြစ်ပေါ် တိုးတက်လျှက် ရှိရာ အချို့သော သတင်းများမှာ လူအများကို ထင်ယောင်ထင်မှား ဖြစ်စေရန် လှည့်စားနိုင်ပါသည်။ ဓါတ်ပုံနှင့် ဗီဒီယိုများကို အပြင်တွင် တကယ် ဖြစ်ပျက်နေဟန် ဖန်တီးနိုင်ပါသည်။ ထို ဓါတ်ပုံနှင့် ဗီဒီယိုကို ကြည့်လိုက်ရသဖြင့်လည်း ယုံကြည်ရန် လွယ် ကူလှပါသည်။
ဥပမာ - မည်သည့်တိုင်းပြည်၊ မည်သည့်မြို့တွင် မည်သူသည် လူများကို သတ်ဖြတ်ပြီး ရေခဲသေတ္တာအတွင်း သိုလှောင်ကာ စားသောက်နေသည်။ မည်သည့်တိုင်းပြည်တွင် ကလေးအသေများကို ခုတ်ထစ် ချက်ပြုတ်ကာ ထူးဆန်းသော အစားအသောက် အနေနှင့် ရောင်းချနေသည် ဟူသော သတင်းမျိုးများ။
ဤသတင်းများသာ မှန်ခဲ့ပါက နေ့စဉ်ထုတ် သတင်းစာကြီးများတွင် ပါလာရမည် အမှန် ဖြစ်ပါ၏။ ထိုသတင်းစာကြီး များမှ သတင်းထောက်များသည်ကား အလွန်ထက်မြက်လှသူများ ဖြစ်လေရာ ချောင်ကြိုမြောင်ကြားတွင် ဖြစ်ပျက်နေသည် များကိုပါ ထောက်လှမ်းနိုင်စွမ်း ရှိသဖြင့် ဤမျှ ရုပ်ပျက် ဆင်းပျက် အဖြစ်အပျက်များကို မသိ ဆိုသည်မှာ မဖြစ်နိုင်ပါ။

ပြီးခဲ့သည့် နှစ်အနည်းငယ်က ကျွန်တော့်ထံ ၀င်လာသော email တစ်စောင်တွင် စင်ကာပူ East Coast ကမ်းခြေတွင် ငါးမန်း ပေါ်ပြီး အပန်းဖြေသူများကို တိုက်ခိုက် သတ်ဖြတ်ကြောင်း ဓါတ်ပုံနှင့်တကွ ဖော်ပြထားပါသည်။ ဤသတင်းကို မိတ်ဆွေများ သို့ forward လုပ်လိုက်သောအခါ မိတ်ဆွေတစ်ဦးက ဤသတင်းမှာ လုပ်ကြံထားသော သတင်းမှား ဖြစ်ကြောင်း အသိပေး လာပါ၏။ အကယ်၍သာ ဤသတင်းမှန်လျှင် Strait Times သတင်းစာကြီးတွင် ပါလာရမည် မုချ ဖြစ်ပါသည်။
ထို့ပြင် မကြာခဏ လက်ခံရရှိတတ်သော email တစ်ခုမှာ ရှမ်းဘုန်းကြီး အိပ်မက်များ ဖြစ်ပါသည်။ ထိုစာများကို ကျွန်တော် အလယ်တန်းကျောင်းသား ဘ၀ကပင် စတင် တွေ့ရှိခဲ့ရပါသည်။ ရွှေပေလွှာ ဟု အမည်ရပါ၏။ ဤစာကို ခုနစ်စောင် ကူးပြီး ဝေပါ။ ဤကဲ့သို့ ကူးပြီး ဝေသဖြင့် အနှီရွာမှ အနှီမည်သော သူမှာ ငါးသိန်းထီပေါက်၍ နေ့ချင်းညချင်း ချမ်းသာသွား သည်။ မည်သည့်ရွာမှ မည်သူသည်ကား စာကိုမဝေမိသဖြင့် သားဖြစ်သူ သေဆုံးရသည် ဟူသော စာမျိုး ဖြစ်ပါ၏။
ယခု ရွှေပေလွှာများတွင် ဗုဒ္ဓပုံတော်များ၊ ဆရာတော်ကြီးများ ပုံများပါ ပါပါသည်။ Apple ကုမ္ပဏီမှ Designer က သူ့မျက်နှာကို ဗုဒ္ဓ၏ ပုံတော်တွင် ထည့်သွင်းလိုက်သော အခါ ကမ္ဘာတစ်ဝှမ်းမှ ဗုဒ္ဓဘာသာဝင် အများ မခံမရပ်နိုင် တုံ့ပြန်ထား တာ ဖတ်ရပါသည်။ သို့သော် ထိုသူတို့ ကိုယ်နှိုက်က ဘုရားပုံကို ရွှေပေလွှာများ အဖြစ် အသုံးချနေခြင်းကို ကျွန်တော် နားမလည်နိုင်ပါ။
ဗုဒ္ဓပုံတော်ကို လူအများကြည်ညိုနိုင်စေရန် တစ်ဦးနှင့် တစ်ဦး email များ ပို့ခြင်းမှာ အလွန် ကျေးဇူးတင် ၀မ်းမြောက် ဖွယ် ဖြစ်ပါ၏။ သို့သော် အဆောင်လက်ဖွဲ့ အနေနှင့် အသုံးချရန်ကား မသင့်တော်လှပါပေ။

လွန်ခဲ့သည့်လကမူ ဘာသာရေး ဆိုင်ရာ တိုက်ခိုက်မှုများ တွေ့လိုက်ရပါသည်။ မည်သူက အစပျိုးလိုက်သည် မသိပါ။ ထို email များတွင် ဘာသာတစ်ခုနှင့် တစ်ခု ယုံထင် ကြောင်ထင် ဖြစ်စေရန်၊ ရန်ဖြစ်စေရန်၊ အဓိကရုဏ်းများ ဖြစ်ပေါ်စေရန် နှိုးဆွထားသော အကြောင်းအရာ များစွာ ပါဝင်ပါသည်။ email မှာ forward လုပ်ထားသော mail ဖြစ်၍ mail ပါ address များကို ကြည့်လိုက်ခြင်းဖြင့် ကမ္ဘာတစ်ဝှမ်းရှိ သူများထံ ပျံ့နှံ့နေပြီ ဖြစ်ကြောင်း သိနိုင်ပါသည်။
အလွန်အောက်တန်းကျသော လုပ်ရပ်များ ဖြစ်ပါ၏။ အရေးကြီးသည်မှာ ဤ mail များကို ရရှိလာလျှင် ကောင်းသည်၊ ဆိုးသည် မိမိဉာဏ်ဖြင့် ဝေဖန်ပြီး အခြားသူများသို့ မပို့သင့်ပါက မိမိဘာသာ သိမ်းလိုသိမ်း၊ မသိမ်းလိုလျှင်လည်း တစ်ခါတည်း delete လုပ်ပစ်လိုက်သင့် ပါသည်။ မိမိ နားမလည်သော၊ မကျွမ်းကျင်သော အကြောင်းအရာတစ်ခုကို လျှောက်ဖွဘို့ မသင့်ပါ။
လူအများ၏ အသိဉာဏ်ကို ထင်ယောင်ထင်မှား ဖြစ်သွားလျှင်၊ အသိမှားများကို စွဲမြဲယုံကြည် သွားလျှင် မိမိတွင်လည်း တာဝန် မကင်းပါ။
မိတ်ဆွေအားလုံးသည် မိမိ ပညာအဆင့်အတန်းနှင့် လျော်ညီစွာ ပိုင်းခြားဝေဖန် သုံးသပ်တတ်သူများ ဖြစ်လာကြပါ စေကုန်သတည်း။

အေးငြိမ်း
၁၄ - ၁၁ - ၂၀၀၉