Apply Workplace Safety and Health in Construction Sites (ACS) သင်တန်း

စင်ကာပူ ဆောက်လုပ်ရေးလုပ်ငန်းများတွင် လုပ်ကိုင်ရန် ယခုမှ စရောက်လာသည့် လုပ်သားများသည် အလုပ်မဝင်မီ ယခင် အခေါ် CSOC ယခု ACS သင်တန်းကို တက်ကြရ၏။ အောင်မြင်ကြရ၏။ ထိုသင်တန်း တက်ရောက်အောင်မြင်ပြီး Safety Pass ရမှသာ လုပ်ငန်းခွင်သို့ ဝင်ခွင့်ရှိ၏။ ဤသည်မှာ ဥပဒဖြစ်၏။ ထိုသင်တန်း မတက်ဘဲ အလုပ်လုပ်ခွင့်မရှိ။ လုပ်လျင် အရေးယူခံရမည်။

ထိုသင်တန်းကို အင်္ဂလိပ်၊ မြန်မာ၊ ထိုင်း၊ တရုတ် (မန်ဒရင်း)၊ တမီလ်၊ ဟင်ဒီ၊ ဘန်းဂလား၊ မလေး ဘာသာများဖြင့် သင်ကြား ပို့ချပေး၏။ အချို့သင်တန်းကျောင်းများတွင် ဗီယက်နမ်ဘာသာပါ ရှိ၏။ သို့သော် ဗီယက်နမ်ဘာသာကို ဘာသာပြန်နှင့် သင်ပေးသည် ဟု သိရ၏။

သင်တန်းမှာ ၂ ရက်သင်တန်းဖြစ်ပြီး ပထမနေ့တွင် စာချည်းသင်၏။ ဒုတိယနေ့တွင် မနက်ပိုင်း၌ လက်တွေ့လုပ်ရပြီး နေ့ခင်း ပိုင်းတွင် စာမေးပွဲဖြေရ၏။ လက်တွေ့မှာ PPE, Safety Signage, Gas Meter Reading, Fire Extinguisher, Work At Height စုစုပေါင်း ၆ မျိုးဖြစ်၏။ ထို့ပြင် Experiential Learning station ၆ ခုတွင်ပါ လေ့လာကြရ၏။ သို့သော် Experiential Learning အတွက် စာမေးပွဲမရှိပါ။

သင်တန်း၌ သင်ခန်းစာ ၄ ခုပါပြီး အောက်ပါခေါင်းစဉ်တို့ ဖြစ်၏။

၁။ ဥပဒေ၊ နည်းဥပဒေ နှင့် ထိုဥပဒေများက ပေးအပ်ထားသည့် တာဝန်ဝတ္တရားများနှင့် ရပိုင်ခွင့်ရှိသော အခွင့်အရေးများ

၂။ လုပ်ငန်းခွင်၌ အန္တရာယ်ကင်းအောင် မည်ကဲ့သို့ လုပ်ကြရမည်

၃။ အမြင့်၌ အလုပ်လုပ်သည့်အခါ အန္တရာယ်ကင်းအောင် မည်ကဲ့သို့ လုပ်ကြရမည်

၄။ အရေးပေါ်အခြေအနေ၌ မည်ကဲ့သို့ တုံ့ပြန်မည်

စာမေးပွဲမှာ လက်တွေ့ + စာတွေ့ စာမေးပွဲ ဖြစ်၏။ လက်မှတ်ရရန် လက်တွေ့ရော၊ စာတွေ့စာမေးပွဲပါ အောင်ရ၏။ လက်တွေ့စာမေးပွဲထက် စာတွေ့စာမေးပွဲက ပိုခက်၏။ လက်တွေ့စာမေးပွဲမှာ မနက်ပိုင်း လုပ်ကြရသည့် လက်တွေ့သင်ခန်းစာ ၆ မျိုး ကို မိမိတကယ်လုပ်တတ်ကြောင်း လုပ်ပြကြရတာ ဖြစ်၏။ လက်တွေ့စာမေးပွဲတွင် ၃ ခါ မှားခွင့်ပေး၏။ ၃ ကြိမ်မှားလို့မှ မအောင်လျင် ကျမည်။ သို့သော် လက်တွေ့စာမေးပွဲတွင် ကျသူ မရှိသလောက် ဖြစ်ပါသည်။

စာတွေ့စာမေးပွဲတွင် မှားမှန်ရောထွေး အမှန်ရွေး (MCQ – Multiple Choice Questions) အပုဒ် ၄၀ ဖြေကြရ၏။ ယခင်အခါ ကာလများက စာမေးပွဲကို Optical Answer Sheet ပေါ်တွင် မှန်သည့်အဖြေကို ခဲနှင့်ခြစ်ကာ ဖြေကြရ၏။ မေးခွန်းမှာလည်း မေးခွန်း အစုံ ၂၀ ရှိပါက နံပါတ်တွေသာ ပြောင်းသွားသည်၊ ထို အစုံ ၂၀ စလုံး မေးခွန်း ၄၀ မှာ အတူတူပင် ဖြစ်၏။ ထို့ပြင် မေးခွန်းများကို စာရွက် ပေါ်၌ ပုံနှိပ်ဖော်ပြထားခြင်း ဖြစ်သဖြင့် မည်သည့် မေးခွန်းများဖြစ်သည်ကို ကြည့်လို့ရ၏။

သို့သော် ၂၀၂၄ ခုနှစ် ဇန္နဝါရီလ ၁ ရက်နေ့မှစကာ စာမေးပွဲကို စာရွက်ပေါ်တွင် ဖြေသည့်စနစ်မှ တက်ဘလက်သုံး၍ online ဖြေသည့်စနစ်သို့ ပြောင်းလိုက်၏။ ဖြေသည့်ပုံစံပါ ပြောင်းသည်မဟုတ်။ မေးခွန်းပုံစံများပါ ပြောင်းသွား၏။

ဖြေဆိုနည်း စနစ်အသစ်တွင်ပါသည့် မေးခွန်းများမှာ ယခင် CSOC မေးခွန်းများထက် ပိုခက်သွား၏။ အချို့မှာ သင်သည့် အထဲမှာ မပါ။ မိမိဗဟုသုတ၊ အသိဉာဏ်ကို သုံးကာ ဖြေကြရ၏။

မေးခွန်းတွင် Generic Question နှင့် Applied Question ဟု နှစ်ပိုင်းပါ၏။ ယခင်ကမူ မေးခွန်း ၄၀ ၌ အောင်မှတ် ၆၀% ကို မည်သည့်နည်းနှင့် ရ ရ၊ အောင်၏။ ဆိုလိုသည်မှာ မေးခွန်း ၄၀ ၌ ၂၄ ပုဒ်မှန်လျင် အောင်ပြီ။

ယခုမူ ဤသို့မဟုတ်တော့။ Generic Question တွင် မေးခွန်း ၂၀၊ Applied Question တွင် မေးခွန်း ၂၀ ပါလေရာ တစ်ပိုင်း စီတွင် ၆၀% ဖြစ်သော ၁၂ ပုဒ်စီမှန်မှ အောင်မည်ဖြစ်၏။

o Generic Question တွင် အပုဒ် ၂၀ လုံးမှန်ပြီး Applied Question တွင် ၁၁ ပုဒ်ပဲ မှန်ပါက စုစုပေါင်း ၃၁ ပုဒ် မှန်သည့်တိုင် ကျမည်။

o Applied Question တွင် ၁၅ ပုဒ် မှန်ပြီး Generic Question တွင် ၁၀ ပုဒ်ပဲ မှန်ပါက စုစုပေါင်း ၂၅ ပုဒ် မှန်သည့်တိုင် ကျမည်။

Generic Question ဆိုသည်မှာ အကယ်၍ အလုပ်ရှင်သည် Risk Assessment ကို ရေးဆွဲမထားဘဲ အလုပ်လုပ်လျင် မည်မျှ ဒဏ်ရိုက်မည်နည်း ဆိုသော မေးခွန်းမျိုးဖြစ်၏။ ၎င်းမှာ ဗဟုသုတအလို့ငှာသာ ဖြစ်လျက် လုပ်ငန်းခွင်၌ လက်တွေ့ အသုံးချလို့ မရ။

Applied Question ဆိုသည်မှာ အဆောက်အုံ ဖြိုဖျက်သည့်အခါ အန္တရာယ်ကင်းအောင် မည်ကဲ့သို့ လုပ်ရမည်နည်း ဆိုသည့် မေးခွန်းမျိုး ဖြစ်၏။ တကယ် လုပ်ငန်းခွင်၌ လက်တွေ့ အသုံးချရမည့် မေးခွန်းမျိုး ဖြစ်၏။

အဆိုးဆုံးကား တလွဲ ဘာသာပြန်များ ဖြစ်၏။ မေးခွန်းများကို မြန်မာဘာသာဖြင့် ရေးထားသည့်တိုင် အချို့မေးခွန်းများမှာ ဘာကို ဆိုလိုသလဲဆိုတာ မနည်း စဉ်းစားယူရ၏။ အင်္ဂလိပ်စာလုံးများကို မြန်မာအက္ခရာများဖြင့် ဖလှယ်လိုက်သည့်အခါ ကိုးယို့ ကားရား စာလုံးများ ဖြစ်လာလေ၏။ နမူနာပြရလျင် ‘PPE’ ဟူသည့် အင်္ဂလိပ်စာလုံးကို မြန်မာအက္ခရာနှင့် ဖလှယ်လိုက်ရာ ‘ဏဏန’ ဖြစ်သွားလေ၏။ အနှီ ‘ဏဏန’ ကို မည်ကဲ့သို့ နားလည်ရပါမည်နည်း။

စာမေးပွဲဖြေရန် တက်ဘလက်ပေါ်၌ ဖြေမည့်သူက မိမိ၏ IC No./FIN No. ဖြင့် log in ဝင်ရ၏။ Log in ဝင်ရန် password ကို ဖြေခါနီး ၅ မိနစ်အလိုမှ ထုတ်ပေး၏။ Password ကို စာမေးပွဲခန်းစောင့်သည့် ဆရာက မိမိဘာသာ generate လုပ်ယူရ၏။

ဖြေဆိုသူက မိမိ၏ IC No./FIN No. ဖြင့် log in ဝင်လိုက်သည့်အခါ ကျချင်ရာ မေးခွန်း (question set) ကျလာမည်။ မည်သည့် question set ကျမည်ကို မည်သူမှ မသိနိုင်။ ကျချင်ရာကျမည်။ ဖြေဆိုသူသည် မိမိအတွက် ရလာသည့် မေးခွန်းအစုံကို ဖြေ ဆိုရန်သာ ဖြစ်၏။

ဖြေသည့်အခါ ဥပမာ စာမေးပွဲချိန်သည် ညနေ ၆ နာရီမှ ၇ နာရီ ဖြစ်သည်ဆိုပါစို့။ ၆ နာရီအတိကျမှ log in ဝင်လို့ရ၏။ စောပြီး ဝင်ချင်လို့မရ။ မိနစ် ၆၀ အချိန်စေ့လျင်လည်း အလိုအလျောက် log out ဖြစ်သွားမည်။ မပြီးသေးလို့ ခဏစောင့်ပါအုံး ဟု တောင်းဆို လို့မရ။

တက်ဘလက်ပေါ်တွင် ကျန်နေသည့်အချိန်ကို count down timer ဖြင့် ပြနေ၏။ ဖြေဆိုသူများသည် အချိန်မစေ့မီ ၅ မိနစ်၊ ၄ မိနစ်အလို၌ မိမိအဖြေလွှာကို submit လုပ်ကြရမည်။ အချိန်စေ့ခါနီး ၁ မိနစ်လောက်အလိုကျမှ တင်ပါက အင်တာနက်ပြဿနာ တက်ပြီး အဝိုင်းလည်နေ၍ အချိန်မီ မတင်လိုက်နိုင်လျှင် ဒုက္ခများလိမ့်မည်။

သို့သော်လည်း လူ ၂၀ ဖြေလျင် အနည်းဆုံး ၁၅ ယောက်လောက်တော့ အောင်ပါသည်။ အချို့အတန်းများ၌ တန်းလုံးကျွတ် အောင်ပြီး တစ်ခါတလေ ၂ ယောက်လောက် ကျသည်လည်း ရှိ၏။ ဆယ်တန်းအောင်ပါသည် ဆိုသူများလည်း ကျ၏။ ဘွဲ့ရ ဆိုသူများလည်း ကျ၏။ ထို့ကြောင့် ကျောင်းကောင်းကောင်း မတက်ခဲ့ရ။ ၃ - ၄ - ၅ တန်း လောက်သာ တက်ခဲ့ဖူးသူများ အောင်ဘို့ ခဲယဉ်းပါသည်။

ကျေးဇူးတင်ပါသည်။

အေးငြိမ်း

၉ ဩဂုတ်လ၊ ၂၀၂၅

စင်ကာပူမှ ပြစ်မှု၊ ပြစ်ဒဏ်များ

မီးရထားခြံဝင်းကို သံဖြတ်ပလာယာဖြင့် ဖြတ်ဝင်ကာ မနေနိုင်မထိုင်နိုင် ရထားတွဲများကို ဆေးမှုတ်သွားသော ဆွစ်လူမျိုး တစ်ဦးကို ထောင်ဒဏ် ၇ လ ချလိုက်သည့်သတင်း သည်ကနေ့ထုတ် mypaper သတင်းစာတွင် ဖတ်လိုက်ရသဖြင့် ရေးချင်နေတာကြာပြီ ဖြစ်သော စင်ကာပူမှ ပြစ်မှု၊ ပြစ်ဒဏ်များအကြောင်း ရေးလိုက်ခြင်း ဖြစ်ပါ၏။

ပထမဦးဆုံးပြောလိုသည်မှာ စင်ကာပူကား ပြစ်ဒဏ်ချပြီဆိုလျှင် မှတ်လောက်သားလောက်အောင် ရက်ရက်ရောရောနှင့် သာသာထိုးထိုးလေး ချတတ်သည့်သဘောရှိကြောင်း သိထားကြရန် ဖြစ်ပါ၏။ နောက်ပြီး ကိုယ်ချမှတ်ထားသည့် ပြစ်ဒဏ်ကို မည်သည့်အကြောင်းမျိုးနှင့်မှ ပြန်လည်ရုပ်သိမ်းပေးခြင်း၊ အသနားခံလွှာကြောင့် လျှော်ပစ်ခြင်းမျိုး အင်မတန် လုပ်ခဲသည် ဆိုခြင်းဖြစ်ပါသည်။ (သာမန်အမှုကို မဆိုထားနှင့်။ သေဒဏ်ကိုတောင် အသနားခံ၍ မရပါ။)

လွန်ခဲ့သော ဇူလိုင်လက ကျွန်တော်တို့ အင်္ဂလိပ်စာဆရာမ၏ မိတ်ဆွေ၊ Work Permit Holder တစ်ဦးကို ရဲဖမ်းသွား သဖြင့် ကူပါဦးဟု sms ပို့လာပါ၏။ ကျွန်တော်က ဘာကိစ္စလဲ၊ ဘာညာ မေးနေတုံး ရှိသေး တော်တော်ကြာတော့ sms ပြန်လာပါ၏။ မတော်ရာသွား ရှူရှူပေါက်မိသဖြင့် ဖမ်းကြောင်း၊ တရားရုံးကိုခေါ်သွားရာ ဒဏ်ငွေ S$1000 တပ်ရိုက် လိုက်ကြောင်း၊ သူ့ သူငယ်ချင်းများစုကာ ထိုငွေကို ပေးလိုက်သဖြင့် ပြန်လွတ်လာပြီ ဖြစ်ကြောင်းများ ဖြစ်ပါ၏။ စင်ကာပူဒေါ်လာ ၁၀၀၀ ဘိုးသာ ရှူးရှူးပေါက်ရရင်ဖြင့် မြို့တော်ရန်ကုန်မှာ ရှိသမျှ အိမ်သာအားလုံးကို တစ်သက်တာ ကန်ထရိုက်ဆွဲပြီးတောင် ပေါက်လို့ရသည်။

ယခုနှစ်ဆန်းပိုင်းက ကျွန်တော့်ညီတစ်ဝမ်းကွဲနေသော dormitory တစ်ခုမှ ကုလားတစ်ယောက်သည် တရုတ်မ တစ်ယောက်ကို ဘာသွားလုပ်သည်မသိ။ ရဲဖမ်းသဖြင့် ၅၀၀ လျော်လိုက်ရသေးသည်။ ကျွန်တော် ECC Project တွင် လုပ်နေစဉ်ကလည်း ပရောဂျက်ထဲမှ မြန်မာကောင်လေးတစ်ဦး Orchard တွင် အမှိုက်ပစ်မိသဖြင့် ဒဏ်ငွေ ၂၀၀ ဆောင် လိုက်ရကြောင်း သူပြောပြ၍ သိခဲ့ရသည်။

အသက် ၃၂ နှစ်ရှိ Fricker ဆိုသူ ဆွစ်လူမျိုးမှာ ရထားဝင်းအတွင်း ဖောက်ထွင်းဝင်မှုကြောင့် ထောင်ဒဏ် ၂ လ၊ ရထားတွဲများ ဆေးမှုတ်မှုကြောင့် ထောင်ဒဏ် ၃ လ စုစုပေါင်း ၅ လ မူလက အချခံထားရသူဖြစ်ပါသည်။ ယခုမှ တရားသူကြီးက ဖောက်ထွင်းဝင်မှုအတွက် ထောင် ၂ လဆိုတာ နည်းလွန်းသည် ဟု တွေးပြီး ၂ လအစား နှစ်ဆတိုးကာ ၄ လ ချလိုက်ခြင်း ဖြစ်ပါသည်။ သို့အတွက် ၄ လ + ၃ လ = ၇ လ ဖြစ်သွားရခြင်း ဖြစ်ပါ၏။ (ခုနက ကျွန်တော်ပြောခဲ့သလို သာသာထိုးထိုးလေး ချတတ်တယ်ဆိုတာ မလွန်ပါဘူးနော။) နေဦး၊ မပြီးသေးဘူး။ ထောင်ဒဏ်အပြင် ကြိမ်ဒဏ် ၃ ချက်လည်း ပါသေး၏။

စင်္ကာပူသည် ကမ္ဘာ့ ရာဇဝတ်မှုအနည်းဆုံး နိုင်ငံများ၌ တစ်နိုင်ငံဖြစ်သည်ဟု United Nations Office on Drugs and Crimes က ကြေငြာခဲ့၏။

၁၉၉၄ ခုနှစ်က အသက် ၁၈ နှစ်သာရှိသေးသော အမေရိကန် နိုင်ငံသား Michael Peter Fay ကိုလည်း (အမေရိကန်သမ္မတ ဘီလ်ကလင်တန်က ငယ်ရွယ်သေးသူဖြစ်သဖြင့် ကြိမ်ဒဏ်မပေးပါရန် မေတ္တာရပ်ခံချက်ကို ပယ်ချကာ) ကြိမ်ဒဏ် ၄ ချက်နှင့် ထောင် ၂ လ ချခဲ့ပါသည်။ (မူလပြစ်ဒဏ်မှာ ကြိမ်ဒဏ် ၆ ချက်၊ ထောင် ၄ လ နှင့် $2200 ဖြစ်ပြီး စင်ကာပူသမ္မတ နှင့် အမေရိကန်သမ္မတတို့၏ သနားကြင်နာမှုကြောင့် ပြစ်ဒဏ်ကို လျှော့ချခဲ့ခြင်း ဖြစ်၏။)

Michael Fay နှင့်အတူ အခြား နိုင်ငံခြားသား လူငယ် ၈ ဦးလည်း ပါသေး၏။ ၁၅ နှစ်သားအရွယ် မလေးလူမျိုး နှစ်ဦး၊ ၁၆ နှစ်အရွယ် သြစတေးလျလူမျိုး၊ ၁၆ နှစ်နှင့် ၁၈ နှစ် အသီးသီးရှိ အမေရိကန် နှစ်ဦး၊ ၁၆ နှစ်အရွယ် ဟောင်ကောင်သားနှင့် ထိုင်းသံအမတ်၏သား တို့ဖြစ်သည်။ သူတို့သည် ကား ၆၇ စီးကို ဆေးများဖြင့်လိုက်မှုတ်ခြင်း၊ အုတ်ခဲကျိုးများ၊ ကြက်ဥများဖြင့်ပေါက်ခြင်း၊ ဆိုင်းဘုတ်များကို ဖျက်ဆီးခြင်း တို့ ပြုလုပ်ခဲ့ကြသည်။

၁၉၉၉ ခုနှစ်မှ ၂၀၁၀ အတွင်း စင်္ကာပူသည် ပြည်သူပိုင်ပစ္စည်းကို ဖျက်လိုဖျက်ဆီးလုပ်သူ နိုင်ငံခြားသား (အနည်းဆုံး) ၂၀ ဦးကို ကြိမ်ဒဏ်ချမှတ်ခဲ့ပြီး ဖြစ်၏။

ကလေးများနှင့် အမျိုးသမီးများကို ကြိမ်ဒဏ်မပေးပါ။ တစ်ကြိမ်ထည်း ရိုက်နိုင်သော အများဆုံးကြိမ်ဒဏ်မှာ ၂၄ ချက် ဖြစ်ပါသည်။ ကြိမ်လုံးအရွယ် အစားမှာ အရှည် ၁.၂ မီတာ (၃ ပေနှင့် ၁၁ လက်မ)၊ အထူ ၁.၃ စင်တီမီတာ (လက်မဝက်) ဖြစ်၏။ (Ref: Prison Regulations 132(2))၊ ကြိမ်ကို ပျော့ပြောင်းစေရန် တစ်ညလုံး ရေစိမ်ထားပြီး ရိုက်ခြင်း ဖြစ်ပါသည်။ ကြိမ်ဒဏ်မပေးမီ ကြိမ် ရိုက်ခံရန် သင့်မသင့် ဆရာဝန်က အလျင်စစ်ပါသည်။ ကြိမ်ရိုက်ခံနိုင်ရန် ကျန်းမာရေးအခြေအနေ ကောင်းသည်ဟု ထောက်ခံချက်ရမှ ရိုက်ခြင်း ဖြစ်ပါသည်။ ကြိမ်ဒဏ်တစ်ချက်နှင့် တစ်ချက်အကြား မိနစ်ဝက်ခန့် ခြားပါသည်။

၁၉၈၈ ခုနှစ် ဧပြီလ ၈ ရက်နေ့က လက်နက်ကိုင် ဒါးပြတိုက်မှုဖြင့် အသက် ၂၆ နှစ်ရှိသူ Quek Kee Chong ကို Changi အကျဉ်းထောင်တွင် တစ်နေ့ထဲ ကြိမ်ဒဏ် ၄၈ ချက် ကျခံစေခဲ့သဖြင့် ၎င်းက တင်ပါးအသားများကို ဆိုးရွားစွာ ပျက်စီး စေမှုဖြင့် စင်ကာပူအစိုးရကို တရားစွဲခဲ့သည်။ ဥပဒေအရ တစ်ကြိမ်လျှင် ၂၄ ချက်ထက် မများစေသော ကြိမ်ဒဏ်ကိုသာ ကျခံစေရမည် ဖြစ်ပါသည်။

ကြိမ်ဒဏ်ပေးနိုင်သော အမှုများမှာ Criminal Procedure Code အရ ၃၀ ခန့်ရှိပါသည်။ ထိုအထဲတွင် လူသတ်မှု၊ လူဆိုးဂိုဏ်း၊ မူးယစ်ဆေးမှု၊ အများပြည်သူပိုင်ပစ္စည်းများအား ဖျက်ဆီးမှု (ထိုဖျက်ဆီးမှုများတွင် မြန်မာပြည်၌ အများဆုံး တွေ့ရတတ်သည့် နံရံများတွင် အရုပ်များဆွဲခြင်း၊ စာများရေးခြင်း၊ ပိုစတာများကပ်ခြင်း၊ ဒါးနှင့်ခြစ်ခြင်း၊ ထိုင်ခုံကို ဒါးနှင့်ခွဲခြင်း၊ ဆေးမှုတ်ခြင်း စသည်တို့ ပါဝင်ပါသည်။)၊ မုဒိန်းမှု၊ ဖောက်ထွင်းမှု၊ ဒါးပြမှု၊ ခိုးမှု၊ ပြည့်တန်ဆာ အရောင်းအဝယ်လုပ်မှု စသည်တို့ကို ကြိမ်ဒဏ် ပေးနိုင်ပါသည်။ Mandatory ကြိမ်ဒဏ်ဟူသည် ဥပမာ - မူးယစ်ဆေး(အချို့ပမာဏ) လက်ဝယ်တွေ့ရှိခြင်းတွင် ကြိမ်ဒဏ်မှအပ အခြားပြစ်ဒဏ် မရှိခြင်း၊ overstay ရက် ၉၀ ကျော်သည်နှင့် ကြိမ်ဒဏ် ၃ ချက် ကျခံရမည်ဟု အလိုလိုသတ်မှတ်ပြီးသားဖြစ်ခြင်း စသည်တို့ကို ခေါ်ပါသည်။ ၁၉၉၄ ခုနှစ်က ၆၄၆ ရက် ကျော်လွန်နေထိုင်ခဲ့သော အသက် ၄၅ နှစ်အရွယ် ပြင်သစ်နိုင်ငံသားတစ်ဦးကို ကြိမ်ဒဏ် ၅ ချက်နှင့် ထောင်ဒဏ်၈ လ ကျခံစေခဲ့၏။

ကြိမ်ဒဏ်ပေးနိုင်သော ပြစ်မှုများနှင့် ကြိမ်ဒဏ်အရေအတွက်ကို http://www.corpun.com/sgjur2.htm တွင် ကြည့်နိုင်ပါသည်။

ပုံမှန်အားဖြင့် ကြိမ်ဒဏ်ပေးနိုင်သည့် အသက် မှာ ၁၈ နှစ်မှ ၅၀ အတွင်း ဖြစ်၏။ ၁၆ နှစ်အထက် ၁၈ နှစ် အောက်အတွင်း ဆိုလျှင် အများဆုံးကြိမ်ဒဏ်ကို ၁၀ ချက်ဟု သတ်မှတ်ထားပါသည်။ သေဒဏ်ကျခံပြီးသူများကို ကြိမ်ဒဏ်မပေးပါ။

မှတ်တမ်းများအရ ကြိမ်ဒဏ်ပေးခဲ့သော ပြစ်မှုများမှာ ၁၉၈၇ ခုနှစ်တွင် ၆၀၂၊ ၁၉၈၈ ခုနှစ်တွင် ၆၁၆၊ ၁၉၉၂ ခုနှစ်တွင် ၁၄၂၂၊ ၁၉၉၃ ခုနှစ်တွင် ၃၂၄၄၊ ၂၀၀၆ ခုနှစ်တွင် ၅၉၈၄၊ ၂၀၀၇ ခုနှစ်တွင် ၆၄၀၄ (၇ ရက်တစ်ပတ်လျှင် ကြိမ်ဒဏ် ၁၂၀ နှုန်း) မှု ဖြစ်ပါသည်။ များသောအားဖြင့် ကြိမ်ဒဏ်ကို Changi Prison တွင်ပေးပါသည်။

ဓါတ်လှေခါးအတွင်း အမျိုးသမီးတစ်ဦးကို နသားပါးယားလုပ်မှုဖြင့် အသက် ၁၈ နှစ်အရွယ် Goh Cheng Yew ဆိုသူ ကို ကြိမ်ဒဏ် ၃ ချက်နှင့် ထောင် ၆ လ ကျခံစေခဲ့သည်။ အမျိုးသမီး တစ်ဦးဦး၏ ကိုယ်ခန္ဓာအစိတ်အပိုင်းတစ်ခုခုကို နသားပါးယား လုပ်လိုစိတ်နှင့် ထိ၊ ကိုင် သူအား ကြိမ်ဒဏ် ၃ ချက်နှင့် ထောင် ၉ လ ကျခံစေရန် ၂၀၀၆ ခုနှစ် ဧပြီလ ၁ ရက်နေ့ မှ စတင်သတ်မှတ်ခဲ့သည်။

 

 

အေးငြိမ်း (လေးမျက်နှာ)

၁၉ သြဂုတ်၊ ၂၀၁၀ က ရေးခဲ့သော ပို့စ်ကို အနည်းငယ် ပြန်ပြင်ထားပါသည်။

 

 

ရပ်ကွက်ထဲမှာ ဒီလိုပဲ ရှိတယ်

တစ်နေ့သ၌ ကျွန်ုပ် မတစ်ထောင်သားများနှင့် အလုပ်ရှုပ်နေစဉ် တီတီဟု မတ်စိဝင်လာသဖြင့်ကြည့်မိ။ ပြောစရာရှိလို့ပါ ဒဲ့စ်။​ မမလေးနှစ်ယောက်က မတ်စိပို့၏။

 

ခဏနေပါအုံး၊ စာသင်နေလို့။ ကော်ဖီဘရိတ်မှ ပြန်ခေါ်လိုက်မယ် ဆိုတာကို မြန်မြန်လုပ်ပါ၊ ပြောချင်လှပြီ ဆိုဘာလာ့စ်။ အောင်မငီး။

 

သူတို့ပြောတာကို ပြန်ဖောက်သည်ချရလျှင် အောက်ပါအတိုင်း ဖြစ်ချေသည် တမုံ့။

 

ဖြစ်ရပ် (၁)

-------------

 

အလုပ်ရှင်က အေးဂျင့်ကို တိုင်၏။ ဟဲ့ - နင့် ဟိုအကောင်ဟာ တစ်ပတ်မှာ အင်္ဂါ၊ ဗုဒ္ဓဟူး၊ ကြာသပတေး ၃ ရက်ပဲ အလုပ်ဆင်းတယ်။ နောက်ပြီး အဆောင်မှာလဲ ပြန်မအိပ်ဘူးပြောတယ်။ အဲဒီကောင် ဘယ်ပျောက်နေသလဲ။

 

စုံစမ်းကြည့်တော့ -

 

အိမ်အကူ ကောင်မလေးတစ်ယောက်က အဖွားအိုကြီး တစ်ယောက်ကိုပဲ ကြည့်ရ၏။ တစ်အိမ်လုံးမှာ သူနဲ့ အဖွားအို နှစ်ယောက်ထဲ။ တခြား ဘယ်သူမှ မရှိ။

 

သည်တော့ ဟိ၊ ငါတော့ လုပ်ချင်တိုင်းလုပ်လို့ရပြီ။ ပွတာပဲ ဆိုကာ ကောင်လေးတစ်ယောက်နှင့် အချိန်းအချက်လုပ်၏။ ရွာမှာ မိန်းမနှင့်၊ ကလေးရှိသော ကောင်လေးက ဟိ၊ ကော်တာပဲ။ အလကားစားရပြီ ဆိုကာ ကောင်မလေးနှင့် အချိန်းအချက်လုပ်ပြီးသကာလ ကောင်မလေးရှိရာ အိမ်သို့သွားသည်ဆို၏။

 

ကောင်လေးက ဘယ် ဒီလောက် အခွင့်အရေးကြီးရနေမင့်ဟာ၊ နင်ရို့ နှစ်ပဲခြောက်ပြားအလုပ်လောက်ကို ဘာလုပ်ဖို့တုံး ဆိုပြီး သောကြာ၊ စနေ၊ တနင်္ဂနွေ၊ တနင်္လာ ၄ ရက်ဆက်ပြီး (မှတ်ကရော) အလုပ်မသွားဘဲ အသားကုန် မူစကူဒူးကြလေသော ဟူသတတ်။ (မူစကူဒူး = ထမင်းတွေဟင်းတွေ ချက်ပြုတ်စားကြ၊ သီချင်းတွေဆိုကြ၊ ထင်သာဖဲ I don’t know. )

 

ဆိုတော့ အလုပ်မဆင်းလို့ ဒီအကောင် ဘယ်ရောက်နေသလဲ၊ အဆောင်ကကောင်တွေ မေးတော့လည်း ဘယ်သွားမှန်း ဘယ်သူမှမသိ၊ ဆိုတော့ အလုပ်ရှင်က အေးဂျင့်ကို လှမ်းတိုင်တာ ဖြစ်၏။

 

ကတောက်စ်၊ မိုက်သခွာ

 

 

ဖြစ်ရပ် (၂)

------------

 

ဟေ့ရောင်၊ ထရမ့်မိန်းမက မိုက်သကွ။

မင်းနှယ်ကွာ၊ တခြား ကြိုက်စရာရှားလို့ အဖွားကြီးမှ သွားကြိုက်ရသလား။

အာ ဒါကတော့ ငါကြိုက်လို့ ကြိုက်တယ်ပြောတာကွာ။

စောက်ရူး

ဘာခွ၊ မင်း ဘာပြောလိုက်တယ်။

တခြား အပျိုအရွယ်ချောချော လှလှလေးတွေ ဒီလောက်ရှိပါရက်ကနဲ့ ဟို့က အဖွားကြီးကို သွားကြိုက်တာ စောက်ရူးမို့လို့ ကြိုက်တာပေါ့ကွ။

အေဘေး ခွပ်

ဘာ၊ မင်းက ငါ့ကိုထိုးတယ်။ ခွပ်

ဘုန်း

အုပ်

ခွပ်

.

.

.

ဟဲ့ ဟဲ့ ဟိုအကောင်တွေ တော်ကြ၊ တော်ကြ

(ရဲက လာဖြန်ဖြေသည်ဆို၏။)

ထိုးကြကြိတ်ကြရင်း ရဲမျက်နှာ ဖြတ်အုပ်မိသည် ဆို၏။ (မတော်တဆ ဖြတ်ရိုက်မိတာလား၊ ဆွဲထိုးတာလား မပြောတတ်။)

ရဲက သူတို့ကို ဘာမှ ပြန်မလုပ်။

 

နောက်နေ့ကျ အဖမ်းခံရ၏။

ဒေါ်လာ ၄၅၀၀ ဒဏ်ဆောင်မလား၊ ထောင် ၂ လ (၂ လ လား၊ ၂ နှစ်လား သေသေချာချာ မပြောတတ်) အကျခံမလား မေး၏။

ရွာက အမျိုးတွေနှင့် ပြန်တိုင်ပင်တော့ ဘာတဲ့၊ ဒဏ်ငွေ ၄၅၀၀ ဆောင်ပါ့မယ် ဆိုလား

ဘာတွေဆက်ဖြစ်သလဲတော့ ကျွန်ုပ်မသိ

 

အဲသည့်ကောင်လေးမှာ ခြင်းကြားထမ်း (ဟုတ်ပေါင်) စစ်ထဲဝင်ရမှာစိုး၍ သူ့မိဘများက အိမ်ရောင်းကာ စင်ကာပူ လွှတ်လိုက်တာဆို၏။ ရောက်တာ ဘာမှမကြာသေး။ အခု ပြဿနာ တက်သည်။

 

ဆိုတော့ ဗမှားပြည်ပြန်ပြီး ခြင်းကြားထမ်းပေတော့။

 

 

ဖြစ်ရပ် (၃)

------------

 

လူများ သားသမီးတွေ ကံကောင်းပုံများ ပြောပါတယ်။

တခါတလေ အမှားတရံသည်လည်း အမှန်တရား ဖြစ်လာတတ်ချေသေး၏။

 

ကောင်မလေးကို မြန်မာအေးဂျင့်က ဆေးရုံမှာလုပ်ရမယ် ဆိုပြီး လိမ်လွှတ်လိုက်၏။ အေးဂျင့်ဖီးလည်း အများကြီး ပေးလိုက်ရ၏။

 

တကယ်လုပ်ရတော့ အနှိပ်ခန်းမှာ လုပ်ရ၏။ ဆိုင်ရှင်အဖွားကြီးက ဟိုဟာဖြတ်၊ ဒီဟာဖြတ်နှင့် ငုတ်တုတ်ပဲ ကျန်တော့၏။

 

အနှိပ်ခန်းမှာ အလုပ်လုပ်ရင်း ဆိုင်မှာလုပ်နေသော မလေးတရုတ် ကောင်လေးတစ်ယောက်နှင့် ငြိကာ ညားလေ သတည်း။

 

မလေးကောင်လေးနှင့် ညားတော့ မလေး PR ဖြစ်။ ကောင်လေးက စလုံး PR ဆိုတော့ စလုံး PR ထပ်တင်။

တူနယ်တဲ့နယ်။

 

ကံထမ်းလာတာ မမြင်ရဘူးဆိုတာ အဟုတ် ဟု မမလေးက ပြော၏။

 

ရပ်ကွက်ထဲမှာ ဒီလိုပဲ ရှိတယ်။

ကျွန်တော်တို့ ရပ်ကွက်ထဲမှာ ဒီလိုပဲ။

 

မအားတာနဲ့ တက်သုတ်ရိုက်ပြီး ခပ်တိုတိုပဲ ရေးလိုက်ရပါကြောင်း။

 

လူအချင်းချင်း လှည့်ပတ်ခြင်း၊ ကင်းရှင်းကြပါစေ။

မြေနိုးတွေလဲ ကျားတွေဆွဲ၊ ငရဲကိုလည်း လားပါစေ။

 

အေးငြိမ်း

၁၈ ဇူလိုင်လ၊ ၂၀၂၅

ကွန်ဖိုင်းစပေ့စ်အတွက် လေလိုအပ်ချက်

နိဒါန်း

 

မှတ်ချက်။        ။ ယခင်က ကွန်ဖိုင်းစပေ့စ်ကို အလုံပိတ်အခန်း၊ ကန့်သတ်ထားသောနေရာ စသဖြင့် ကျွန်ုပ် ဘာသာပြန် ခဲ့ပါ၏။ သို့သော် အလုံပိတ်အခန်းနှင့်လည်း မလုံလောက်၊ ကန့်သတ်ထားသော နေရာဟု ဘာသာပြန်လျင်လည်း မဆီလျော်လှသောကြောင့် မူရင်းစကားလုံးကိုပဲ အသံလှယ်ကာ သုံးလိုက်ပါသည်။ ဥပမာ - ပလတ်စတစ်၊ ရေဒီယို၊ မော်တော်ကားတို့ ကဲ့သို့တည်း။

 

ကွန်ဖိုင်းစပေ့စ်တွင် ၁။ လေထုအန္တရာယ် (atmospheric hazard) နှင့် ၂။ လေထုမဟုတ်သော အန္တရာယ် (Non-atmospheric hazard) ဟု နှစ်မျိုးရှိ၏။

 

ထိုအန္တရာယ်နှစ်မျိုးအနက် လေထုအန္တရာယ်က ပိုပြီး အန္တရာယ်များ၏။ အဘယ်ကြောင့်ဆိုသော် လေထု အန္တရာယ်က ချက်ချင်း၊​ မိနစ်ပိုင်းအတွင်း သေနိုင်သောကြောင့် ဖြစ်၏။

 

ထို့ကြောင့် တခြားအန္တရာယ်တွေအသာထား၊ ကွန်ဖိုင်းစပေ့စ်အတွင်း ဝင်တော့မည်ဆိုလျင် လေထုကို ဦးစွာ စစ်ရတာ ဖြစ်၏။ ကွန်ဖိုင်းစပေ့စ်အတွင်း ဝင်ရောက်ခွင့်ကို လေထုစစ်ဆေးပြီးမှ ထုတ်ပေးရတာ ဖြစ်၏။

 

သို့ဆိုလျင် ကွန်ဖိုင်းစပေ့စ်အတွင်းမှလေသည် အန္တရာယ်ကင်းသည့်လေ ဖြစ်ဖို့ အရေးမကြီးပါသလော။ အမှန်တကယ်ပင် အရေးကြီးလှ၏။

 

ကွန်ဖိုင်းစပေ့စ်အတွင်း၌ လေထုအန္တရာယ် အမျိုးအစား သုံးမျိုးရှိ၏။

၁။ အောက်ဆီဂျင် နည်းခြင်း/များခြင်း

၂။ အဆိပ်ငွေ့များ ရှိနေခြင်း

၃။ မီးလောင်ပေါက်ကွဲစေတတ်သည့် ဓာတ်ငွေ့များ ရှိနေခြင်း တို့ ဖြစ်၏။

 

အခန်းကို ကြာရှည်ပိတ်ထားခြင်းကြောင့် ပြင်ပ လေကောင်းလေသန့် မဝင်နိုင်ခြင်း၊ ဘက်တီးရီးယားပိုးများ ပေါက်ဖွား ရှင်သန် နေထိုင်ခြင်း၊ သံချေးတက်ခြင်းစသည့် အကြောင်းများကြောင့် ကွန်ဖိုင်းစပေ့စ်အတွင်း၌ အောက်ဆီဂျင် လျော့နည်း ကျဆင်းတတ်၏။

 

လူတို့သည် အောက်ဆီဂျင်ဖြင့် အသက်ရှင်နေကြရတာ ဖြစ်၏။ အောက်ဆီဂျင်မရှိလျင် ချက်ချင်း သေနိုင်၏။ ထို့ကြောင့် ကွန်ဖိုင်းစပေ့စ်အတွင်း၌ အသက်ရှင်ရန် အောက်ဆီဂျင် အလုံအလောက် ရှိနေဘို့ အလွန်အရေးကြီး၏။ အောက်ဆီဂျင်ရရန် လေကောင်းလေသန့်ကို မှုတ်သွင်းပေးရမည်။

 

လေကောင်းလေသန့် မှုတ်သွင်းပေးခြင်း၏ ဘေးထွက်ကောင်းကျိုးမှာ ကွန်ဖိုင်းစပေ့စ်အတွင်းမှ မကောင်းသည့်လေများ၊ အဆိပ်အတောက်လေများကိုလည်း တပါတည်း မှုတ်ထုတ်လိုက်ခြင်း ဖြစ်၏။ တစ်နည်းအားဖြင့် လေကောင်းလေသန့်ကို ကွန်ဖိုင်းစပေ့စ်အတွင်း မှုတ်သွင်းလိုက်ပါက အဆိပ်ငွေ့များလည်း ထွက်သွားမည်။ အောက်ဆီဂျင်လည်းရမည်။

 

သို့ဆိုလျှင် မည်မျှကြီးသော ကွန်ဖိုင်းစပေ့စ်အတွက် မည်မျှလေမှုတ်သွင်းပေးရမည်နည်း။ မည်မျှကြီးသော လေမှုတ်စက် ဘယ်နှစ်လုံးဖြင့် မှုတ်သွင်းရမည်နည်း။ ကွန်ဖိုင်းစပေ့စ်၌ ဆေးသုတ်/ဂဟေဆော်နေပါက ထိုဆေးငွေ့/ဂဟေဓာတ်ငွေ့ များကို စုပ်ထုတ်ရန် မည်သည့်အရွယ်ရှိ လေစုပ်စက်မည်မျှ သုံးရမည်နည်း စသည်တို့ကို တွက်ကြည့်ရန်လို၏။

 

၁။ လေပေးစနစ်

 

အောက်ပါအတိုင်း လေပေးစနစ် နှစ်မျိုးရှိ၏။

 

၁၊ ၁။ Single Unit

 

ဤစနစ်တွင် ပြင်ပမှ လေကောင်းလေသန့်ကို ကွန်ဖိုင်းစပေ့စ်အတွင်း မှုတ်သွင်းပေး၏။

 

၁၊ ၂။ Tandem Unit

 

ဤစနစ်တွင် ပြင်ပမှ လေကောင်းလေသန့်ကို ကွန်ဖိုင်းစပေ့စ်အတွင်း မှုတ်သွင်းပေး၏။ တပြိုင်နက်တည်းတွင် ကွန်ဖိုင်းစပေ့စ်အတွင်းမှ အဆိပ်ငွေ့များကိုလည်း လေစုပ်ပန်ကာဖြင့် စုပ်ထုပ်ပေး၏။

 

၂။ လေမှုတ်/စုပ်ပေးသော ကိရိယာအမျိုးအစားများ (Types of Air Moving Devices)

 

၂၊ ၁။ ပန်ကာ (Axial Fans)

 

ထိုအမျိုးအစားပန်ကာသည် လေကို အဖြောင့်အအတိုင်း မှုတ်ပေး၏။ ၎င်းကို လေမှုတ်သွင်းပေးခြင်း အတွက်သော် လည်းကောင်း၊ လေစုပ်ထုတ်ခြင်းအတွက်သော် လည်းကောင်း အသုံးပြုနိုင်၏။

 

 ၂၊ ၂။ Cenrifugal Fans

 

ထိုအမျိုးအစားပန်ကာသည် လေကို အလယ်မှ စုပ်ယူ၍ ဘေးမှ မှုတ်ထုတ်ပေး၏။ ၎င်းကို လေမှုတ်သွင်းပေးခြင်း အတွက်သော် လည်းကောင်း၊ လေစုပ်ထုတ်ခြင်းအတွက်သော် လည်းကောင်း အသုံးပြုနိုင်၏။

၂၊ ၃။ In-Line Axial Fans

 

လေမှုတ်သွင်းပေးရမည့်နေရာသည် ဝေးပါက လေစီးဆင်းမှု လျော့ကျမသွားရလေအောင် လေပိုက်အလယ်၌ ထိုပန်ကာမျိုးတစ်လုံး ထပ်ထည့်ပေးရ၏။

 

၂၊ ၄။ Venturi Air Blower

 

Venturi air blower က ဖိသိပ်ထားသည့်လေ (compressed air) ကို လေပိုက်များ (venturi tube) သုံးလျက် ပို၍များပြားသည့် လေပမာဏကို သွင်း/ထုတ် ပေး၏။ ၎င်း၌ လေကိုမှုတ်/စုပ်ရန် ပန်ကာများ မပါ။ လေယာဉ် ဂျက်အင်ဂျင်များကဲ့သို့ လေကို တွန်းထုတ်တာ ဖြစ်၏။ များသောအားဖြင့် ကွန်ဖိုင်းစပေ့စ်အတွင်းမှ အဆိပ်ငွေ့များကို အလျင်အမြန် စုပ်ထုတ်နိုင်ရန် သုံး၏။

 

၂၊ ၅။ Pneumatic Circular Jet Fan

 

ဤအမျိုးအစားပန်ကာကို အထက်ဖော်ပြပါ Venturi air blower နှင့် တွဲသုံး၏။ 

၃။ လေလှယ်ထုတ်ခြင်း (ACH - Air Change per hour)

 

ကွန်ဖိုင်းစပေ့စ်အတွင်းမှ လေအား မည်မျှလှယ်ထုတ်ရမည်ကို ဥပဒေ/Code of Practice စသည်တို့ဖြင့် အတိအကျ ပြဌာန်းထားတာ မတွေ့မိပါ။ အချို့က 5 Air Change, အချို့က 6 – 7 Air Change, အချို့ဆိုလျင် 20 Air Change ထိ ဆိုပါသည်။ သို့သော် ကျွန်ုပ်အနေနှင့် ဆိုရပါမူ 20 Air Change မှာမူ အလွန်များပါသည်။ 5 – 6 Air Change ဆို လုံလောက်ပါသည်။ ရှင်းပြပါမည်။

 

ကျေးလက်တောရွာများ၌ သောက်ရေကို မြေအိုးများဖြင့် ထည့်သောက်ကြ၏။ သို့သော် ထိုရေအိုးကို တစ်ခါမှ မလှယ်ဘဲ ကုန်ခါနီးတိုင်း ဖြည့်သောက်နေတာမဟုတ်။ သုံးရက်တစ်ခါ လေးရက်တစ်ခါ ရေအိုးအတွင်းမှ ရေအားလုံးကို သွန်ထုတ်ကာ ဆေးပစ်ကြရ၏။ အကယ်၍ လေးရက်တစ်ခါ လဲသည်ဆိုပါစို့။ ဤသည်ကို 4 water change per week ဟု ခေါ်ပါမည်။  

 

ထို့အတူပင် လူတို့၏ ကျန်းမာရေးအတွက် ကွန်ဖိုင်းစပေ့စ်အတွင်းမှ လေကို အားလုံးထုတ်ကာ လေသစ်ဖြင့် အစားထိုး ခြင်းကို air change ဟု ခေါ်၏။ ကွန်ဖိုင်းစပေ့စ်အတွင်းမှ လေအားလုံးကို တစ်နာရီလျင် ၆ ခါ အစားထိုး လဲလှယ်ပါက ၎င်းကို 6 ACH (6 Air Change per hour) ဟု ခေါ်၏။

 

Air Change တွက်တာ မခဲယဉ်းပါ။ ကွန်ဖိုင်းစပေ့စ်၏ ထုထည်ကို သိလျင် တွက်နိုင်ပါသည်။ ကွန်ဖိုင်းစပေ့စ်၏ ထုထည်ပမာဏရှိသော လေကို ကွန်ဖိုင်းစပေ့စ်အတွင်းသို့ မှုတ်သွင်းလိုက်ပါ။ ထိုအခါ 1 air change ဖြစ်သွားမည်။ ထိုကဲ့သို့ တစ်နာရီလျင် ၆ ခါ မှုတ်သွင်းပါက 6 Air Change ဖြစ်မည်။

 

ကွန်ဖိုင်းစပေ့စ်သည် လေးထောင့်ပုံစံဖြစ်ပါက အလျား x အနံ x အမြင့် ဆိုလျင် ကွန်ဖိုင်းစပေ့စ်၏ ထုထည်ရ၏။ ကွန်ဖိုင်းစပေ့စ်ထဲမှာ တိုင်ကီရှိလို့ တိုင်ကီအရွယ်အစားကို ပြန်နုတ်ရမည် ဘာညာ၊ ဘာမှ ခေါင်းစား မနေပါနှင့်။ ကွန်ဖိုင်းစပေ့စ်၏ အလျား၊ အနံ၊ အမြင့်တို့ကိုသာ မြှောက်လိုက်ပါ။ ရပါသည်။

 

အကယ်၍ မြေအောက်ရေလှောင်ကန်အတွင်း ဆင်းမည်ဆိုပါက ထိုရေလှောင်ကန်ကို တိုင်းကြည့်ပါ။ အလျား ၁၂ ပေ၊ အနံ ၈ ပေ၊ အမြင့် ၅ ပေ ရှိသည်ဆိုကြပါစို့။ ရေကန်၏ ထုထည်မှာ 12 x 8 x 5 = 480 cubic feet (၄၈၀ ကုဗပေ) ဖြစ်ပါမည်။

 

ထိုရေလှောင်ကန်အတွင်း ဆင်းလုပ်မည့် အလုပ်သမားများအတွက် 6 air change လေမှုတ်သွင်းပေးချင်သည် ဆိုပါစို့။

 

6 air change ဖြစ်၍ တစ်နာရီအတွင်း လှယ်ထုတ်ပစ်ရမည့် လေထုထည်စုစုပေါင်းမှာ 480 x 6 = 2880 ft³ (၂၈၈၀ ကုဗပေ) ဖြစ်၏။

 

တစ်နာရီလျင် မိနစ် ၆၀ ရှိ၏။

လေမှုတ်စက်အရွယ်အစား (capacity) ကို CFM (Cubic feet per minute) ဖြင့် ဖော်ပြ၏။

တစ်နာရီလျင် မှုတ်သွင်းရမည့်လေပမာဏမှာ ၂၈၈၀ ဖြစ်၍ တစ်မိနစ်အတွက်ဆိုလျင် ၂၈၈၀ ကို ၆၀ နှင့်စားလျင် ၄၈ ရပါမည်။

 

ကွန်ဖိုင်းစပေ့စ် အတွင်း၌ ငြမ်းစင်များ၊ ပိုက်များ၊ မီးခံအဝတ် (fire blankets) များ စသည်တို့ရှိနေပါက လေစီးဆင်းမှုကို အနှောက် အယှက် ဖြစ်စေသည့်အတွက် Safety factor ၁၅% ပေါင်းထည့်ဝယ်ပါ။

48 x 0.15 = 7.2. ထို့ကြောင့် လေမှုတ်စက် အရွယ်အစားမှာ 55.2 CFM ဖြစ်၍ 55 CFM ကို ဝယ်ပါ။

 

၄။ အဆိပ်ငွေ့ထုတ်လွှတ်သော လုပ်ငန်းများအတွက် လေလိုအပ်ချက်

 

အထက်တွင် ဖော်ပြခဲ့သော လေလဲလှယ်နှုန်း ACH မှာ သာမန်အလုပ်များသာလုပ်သော၊ အဆိပ်ငွေ့ထုတ်လွှတ်ခြင်း မရှိသော လုပ်ငန်းများအတွက် ဖြစ်၏။ သို့သော် အဆိပ်ငွေ့ထွက်သည့် အလုပ်များ (ဥပမာ - ဂဟေဆော်ခြင်း၊ ဆေးသုတ်ခြင်း၊ ဓာတုဆေးရည်ဖြင့် ဆေးကြောခြင်း စသည့်လုပ်ငန်းများ) အတွက်မူ ထုတ်လွှတ်သော အဆိပ်ငွေ့ ပမာဏပေါ်မူတည်၍ လေမှုတ်သွင်းခြင်း၊ လေစုပ်ထုတ်ခြင်း စသည်တို့ လုပ်ရ၏။ 

 

လေမှုတ်သွင်းပေးရန် အခြေအနေ သုံးရပ်ရှိ၏။

၁။ Contaminant free condition – မည်သည့် အဆိပ်အတောက် ဓာတ်ငွေ့မှ မထုတ်လွှတ်ခြင်း

Static Condition – One Time Release (တစ်ကြိမ်တည်းသာ ထုတ်လွှတ်ခြင်း)

၂။ Dynamic Condition – Continuous Release (ဆက်တိုက် ထုတ်လွှတ်ခြင်း)

 

၄၊ ၁။ Contaminant free condition – မည်သည့် အဆိပ်အတောက် ဓာတ်ငွေ့မှ မထုတ်လွှတ်ခြင်း

 

မည်သည့်အဆိပ်အတောက် ဓာတ်ငွေ့မှ မထုတ်လွှတ်သော သာမန် အလုပ်လုပ်နေသည့် အလုပ်သမားတစ်ယောက် အတွက် လေ 1.4 m³/min (50 ft³/min) လို၏။ အကယ်၍ ဂဟေဆော်နေသည့် အလုပ်သမားတစ်ဦးအတွက် 10 m³/min (353 ft³/min) လို၏။

 

၄၊ ၂။ Static Concentration – One Time Release (တစ်ကြိမ်တည်းသာ ထုတ်လွှတ်ခြင်း)

 

အဆိပ်ငွေ့ကို တစ်ကြိမ်ထုတ်လွှတ်လိုက်၏။ သို့သော် နောက်ထပ်မံ မပို့လွှတ်တော့ ဆိုလျင် လေလိုအပ်ချက်ကို အောက်ပါအတိုင်း တွက်၏။

Q = လိုအပ်သော လေ ပမာဏ (m³/min) (တစ်မိနစ်ရှိ ကုဗမီတာပေါင်း)

V = ကွန်ဖိုင်းစပေ့စ်၏ ထုထည် (m³) (ကုဗမီတာ)

T = လိုအပ်သည့်အချိန် (မိနစ်)

C_O = Concentration, ppm (from)

C = Concentration, ppm (to)

 

၄၊ ၃။ Dynamic Conditions – Continuous Release (ဆက်တိုက် ထုတ်လွှတ်ခြင်း)

Q = လိုအပ်သော လေပမာဏ (lit/min) (တစ်မိနစ်ရှိ လီတာပေါင်း)

MW = molecular weight

E = constant generating rate (gm/min)

C = permissible exposure concentration (ppm) at 25°C and 760 mmHg

 

အကယ်၍ အလုပ်သမားများသည် ကွန်ဖိုင်းစပေ့စ်အတွင်း ဆေးသုတ်နေသည် ဆိုပါစို့။ ထိုဆေးမှ ဇိုင်လင်း (Xylene) ဓာတ်ငွေ့ထွက်၏။ ဇိုင်လင်းဓာတ်ငွေ့၏ PEL မှာ 100 ppm ဖြစ်၏။ ထိုအခါ ထိုဆေးသုတ်နေသည့် နေရာသို့ ဆေး တစ်လီတာတိုင်း လေ 1000 m³ မှုတ်သွင်းပေးရန် လို၏။

 

(၅) ထိရောက်သော လေပေးသွင်းမှု (Effective Ventilation)

 

ထိရောက်သော လေပေးသွင်းမှု ဖြစ်စေရန် လေမှုတ်စက်၊ လေစုပ်စက်တို့၏ အနေအထား။ လေမှုတ်ပိုက်အဝ နှင့် လေစုပ်စက် အဝ ထားသိုမှုတို့ အရေးကြီး၏။

 

ကွန်ဖိုင်းစပေ့စ်အတွင်း ပေးမည့်လေသည် လေကောင်းလေသန့်ဖြစ်ရမည်။ ထို့ကြောင့် ကွန်ဖိုင်းစပေ့စ်အတွင်းမှ မှုတ်ထုတ်လိုက်သော လေဆိုးလေညစ်များ ကွန်ဖိုင်းစပေ့စ်အတွင်း ပြန်ဝင်မလာစေရန် အရေးကြီး၏။ ထို့ကြောင့် လေစုပ်စက်၏ အဝသည် စုပ်ထုတ်လိုက်သော လေနှင့် မနီးစေရ။ မှုတ်ထုတ်လိုက်သည့် လေ၏ လားရာနှင့် စုပ်ယူမည့် လေတို့သည် ဆန့်ကျင်ဘက်၌ ဖြစ်ရမည်။

 

ထို့ပြင် ကွန်ဖိုင်းစပေ့စ်အတွင်း၌ မည်သည့်ဓာတ်ငွေ့များ ရှိသည်ကိုလည်း သိထားရန်လို၏။ အချို့ဓာတ်ငွေ့များသည် လေထက်ပေါ့၍ အချို့ဓာတ်ငွေ့များသည် လေထက် လေး၏။ လေထက်ပေါ့သော ဓာတ်ငွေ့များကို စုပ်ထုတ်ရန် ထားသည့် လေစုပ်ပိုက်အဝ နေရာနှင့် လေထက်လေးသော ဓာတ်ငွေ့များကို စုပ်ထုတ်ရန် ထားသည့် လေစုပ်ပိုက်အဝ နေရာတို့ မတူ။

 

လေမှုတ်စက်၊ လေစုပ်စက်များကို မည်ကဲ့သို့ စီစဉ်ထားရှိရမည်ကို အောက်တွင် ပုံများဖြင့် ပြထားပါ၏။

မှတ်ချက်။        ။ ဤ လေသွင်းလေထုတ်ပုံများကို WSH Council ၏ Technical Advisory on Working Safely in Confined Spaces စာအုပ်မှ ရယူထားပါသည်။

 

အေးငြိမ်း (လေးမျက်နှာ)