Free Thinker: ကိုဗစ်၁၉ နှင့် အောက်ဆီဂျင်အကြောင်း သိကောင်းစရာ (၃)

(၈) လုပ်ငန်းသုံးအောက်ဆီဂျင်ဓာတ်ငွေ့နှင့် ကျန်းမာရေးသုံးအောက်ဆီဂျင်ဓာတ်ငွေ့တို့ ကွာခြားပုံ

Ref:

https://www.ima-india.org/ima/pdfdata/Industrial%20Oxygen%20vs%20Medical%20Oxygen.pdf

ကျန်းမာရေးသုံးအောက်ဆီဂျင်၌ အနံ့မရှိ။

ကျန်းမာရေးသုံး အောက်ဆီဂျင်မှာ မူလကတည်းက ကျန်းမာရေးအတွက်သုံးရန် ရည်ရွယ် ထုတ်လုပ်ထားခြင်းဖြစ်၏။ ကျန်းမာရေးသုံး အောက်ဆီဂျင်ကို ကျန်းမာရေးသုံး ဖိညှစ်စက် (medical air compressor) များဖြင့် ထုတ်လုပ်၏။ ကျန်းမာရေးသုံး ဖိညှစ်စက်များမှာ ဆီမပါသော သို့မဟုတ် ဆီကိုနည်းနိုင်သမျှနည်းအောင် သုံးထားသည့် ဖိညှစ်စက်များ ဖြစ်၏။ အိုးအတွင်းပိုင်းတွင် သံချေးမတက်စေရန် ကျန်းမာရေးသုံး အောက်ဆီဂျင်အိုးများကို ရေမထိစေရ။

ကျန်းမာရေးသုံး အောက်ဆီဂျင် ထည့်မည့်အိုးများကို လုံးဝသန့်ရှင်းနေစေရန်၊ အညစ်အကြေးများ လုံးဝကင်းစင်နေစေ ရန်၊ ကျန်းမာရေးကို ထိခိုက်စေမည့် အခြား မည်သည့်ပစ္စည်းမှ ရောပါမလာစေရန် အိုးသန့်ရှင်းမည့်နည်းလမ်းများကို တင်းကြပ်သည့် ဥပဒေ၊ စည်းမျဉ်း၊ လုပ်ထုံးလုပ်နည်းများ ချမှတ်ထားရ၏။

ကျန်းမာရေးသုံးအောက်ဆီဂျင်ကို ခရိုင်ယိုဂျဲနစ်အိုး (cryogenic cylinder) များ၌ ထည့်သွင်းသိုလှောင်ရ၏။ အောက်ဆီဂျင်အိုးအတွင်း အခြား မည်သည့် အညစ်အကြေးမှ မရှိစေရ။ (free from any contaminants.)

စက်မှုလုပ်ငန်းသုံးအောက်ဆီဂျင်ကို ထုတ်လုပ်ရာတွင် ချောဆီသုံး ဖိညှစ်စက်များ သုံး၏။ သို့အတွက် ထွက်လာသည့် အောက်ဆီဂျင်တွင် ဆီအညစ်အကြေးများ ရောပါလာနိုင်၏။ လုပ်ငန်းသုံးအောက်ဆီဂျင်မှာမူ မီးရှို့ရန်အတွက် သီးသီးသာ ဖြစ်၍ ကျန်းမာရေးသုံးအောက်ဆီဂျင်လောက် သန့်ရှင်းရန်မလို။ ၎င်းကိုထည့်မည့် ဓာတ်ငွေ့အိုးကိုလည်း အထူးတလည် သန့်ရှင်းနေစရာမလို။

စက်မှုလုပ်ငန်းသုံးအောက်ဆီဂျင်ကို ဓာတ်ငွေ့ဖြင့်ဖြတ်ခြင်း၊ ဓာတ်ငွေ့ဖြင့်ဂဟေဆော်ခြင်း လုပ်ငန်းများအတွက် သုံး၏။ စက်မှုလုပ်ငန်းသုံးအောက်ဆီဂျင်သည် ကျန်းမာရေးလုပ်ငန်းသုံး အောက်ဆီဂျင်လောက် သန့်ရှင်းမှုမကောင်း။ လုပ်ငန်းသုံး အောက်ဆီဂျင်ကို အသက်ရှူရန် ရည်ရွယ်ချက်ဖြင့် ထုတ်လုပ်ထားခြင်း မဟုတ်မူ၍ အသက်ရှူရန် အသုံးပြုခြင်းအတွက် မသင့်တော်လေ။

လုပ်ငန်းသုံးဓာတ်ငွေ့အိုးကို ကျန်းမာရေးသုံးဓာတ်ငွေ့အိုးအဖြစ် ပြောင်းလဲ အသုံးပြုတော့မည်ဆိုလျှင် အိုးအတွင်း၌ အညစ်အကြေး လုံးဝကင်းစင်နေရန် သန့်ရှင်းရေးအတွက် တင်းကြပ်သော အစီအမံများ ချမှတ်ကာ လက်တွေ့လည်း လုပ်ဆောင်ရန် လို၏။

သို့သော် မြန်မာနိုင်ငံ၌ ဤကဲ့သို့လုပ်ဆောင်ရန် စည်းမျဉ်းများရော၊ လုပ်ပုံကိုင်နည်း အစီအမံများပါ မရှိသည်ဖြစ်၍ ခြုံပြီး ပြောရပါမူ လုပ်ငန်းသုံးဓာတ်ငွေ့အိုးကို ကျန်းမာရေးသုံးဓာတ်ငွေ့အိုးအဖြစ် သုံးစွဲရန် လုံးဝ မသင့်တော်ပါဟု ဆိုရမည်သာ ဖြစ်၏။

အများလေ့လာနိုင်ရန် ဓာတ်ငွေ့အိုး အရွယ်များကို ဖော်ပြလိုက်ပါသည်။ သို့သော် နိုင်ငံကိုလိုက်၍ ဖော်ပြချက်များ ကွာဟနိုင်ပါသည်။

(၈) အောက်ဆီဂျင်ကို အန္တရာယ်ကင်းစွာအသုံးပြုနည်း

အောက်ဆီဂျင်အိုးကို မကိုင်တွယ်မီ သင့်လက်များကို သန့်ရှင်းရန် လို၏။ အယ်လ်ကိုဟောပါသည့် လက်သန့်ဆေးရည် ဖြင့် သန့်စင်ပါ။ လက် လုံးဝသွေ့ခြောက်သွေ့သွားမှ ကိုင်ပါ။ လက်ကို moisturizer သို့မဟုတ် sun cream လိမ်းထားပါ က လက်ကို လုံးဝ သွေ့ခြောက်သည်ထိ သုတ်ပစ်ပါ။

အောက်ဆီဂျင်ဓာတ်ငွေ့အိုးကို ကိုင်တွယ်ရာတွင် သင့်လက်၌ မည်သည့်ဆီမှ ပေကျံမနေပါစေနှင့်။ အောက်ဆီဂျင် ဓာတ်ငွေ့အိုးကို ဆီ၊ အမဲဆီများလုံးဝမထိပါစေနှင့်။ (အောက်ဆီဂျင်နှင့် အမဲဆီထိမိပါက ပြင်းထန်စွာ ပေါက်ကွဲတတ်၏။)

အောက်ဆီဂျင်သည် ကိုယ်တိုင်မီးမလောင်နိုင်။ သို့သော် မီးလောင်မှုကို အားပေး၏။ ထို့ကြောင့် အောက်ဆီဂျင်များ ယိုစိမ့်လျက် အခန်းတွင်း၌ စုပြုံမနေစေရန် အထူးသတိပြုပါ။ အခန်းတွင်းလေထု၌ အောက်ဆီဂျင်ပါဝင်မှု ၂၃.၅% ထက်ပိုပါက ပစ္စည်းများသည် အလွန်မီးလောင်လွယ်သည့်ပြင် အလွန်ပြင်းထန်စွာလည်း လောင်ကျွမ်းနိုင်၏။

အောက်ဆီဂျင်စုစက်များအနေနှင့် မထောင်းတာလှသော်လည်း အောက်ဆီဂျင်အိုး ဖြစ်ပါမူ အထူးသတိထား ကိုင်တွယ်ရန်လို၏။

အောက်ဆီဂျင်အိုးထားမည့်နေရာတွင် မီးလောင်လွယ်သည့်/မီးလောင်နိုင်သည့် ပစ္စည်းများ (ဥပမာ - ဓာတ်ဆီ) မရှိစေရ။

အောက်ဆီဂျင်အိုးသည် မီးလောင်လွယ်သည့်/မီးလောင်နိုင်သည့် ပစ္စည်းများမှ အနည်းဆုံး ပေ ၂၀ အကွာတွင် ရှိရမည်။

အောက်ဆီဂျင်အိုးကို လဲမကျစေရန် သေချာစွာ တုပ်နှောင်ထားရမည်။

အောက်ဆီဂျင်အိုးကို လေဝင်လေထွက်ကောင်းသည့်နေရာ၌ ထားရမည်။

နိဂုံး

ကိုဗစ်ရောဂါသည် အလွန်ရှုပ်ထွေး၏။ ကုစရာဆေးလည်း သတ်သတ်မှတ်မှတ် မရှိ။ လူနာ၏ အခြေအနေကိုကြည့်ကာ မည်သို့ကုသရမည်ကို ဆရာဝန်များက ဆုံးဖြတ်ရတာ ဖြစ်၏။ ကိုယ့်ဘာသာကိုယ် ဟိုဆေးကောင်းတယ်၊ ဒီဆေးသောက် ရမယ်ဟု ပေါက်တတ်ကရများ မလုပ်ပါနှင့်။ ဆရာကယ်မှ အနာအယ် လိမ့်မည်။

!!!!! ****** <<< အထူးအားဖြင့် ပြောလိုသည်မှာ ဖေ့စ်ဘုတ်မှ ဂျင်းများကို မယုံပါနှင့်။ >>> ****** !!!!!

§ နေထိုင်မကောင်းဖြစ်လာပြီဆိုလျှင် ဆရာဝန် အမြန်ပြပါ။

§ Swab test ရနိုင်လျှင် swab test စစ်ပါ။

§ ကိုဗစ်စစ်ဆေးစရာမရနိုင်လျှင် အခြားသူများနှင့် မရောပဲ သီးသန့်နေပါ။

§ မိမိအိမ်၌ဖြစ်လျှင်ပင် အခြားသူများနှင့် ရောမနေပဲ သီးသန့်ခန်း၌ ခွဲနေပါ။ သီးသန့်ခန်းမရနိုင်ပါက အနည်းဆုံး ၁ မီတာ (၃ ပေ) ခွာနေပါ။

§ မိမိနေရာ အခန်းသည် လေဝင်လေထွက် ကောင်းရမည်။

§ အနည်းဆုံး (၁၄) ရက် တခြားသူများနှင့် လုံးဝ မဆက်ဆံ/မထိတွေ့ပါစေနှင့်။ သင့်မိသားစုဝင်တွေကိုပင်လျှင် အနည်းဆုံး (၁) မီတာ (၃ ပေ) အကွာမှသာ ဆက်ဆံပါ။

§ မလိုအပ်ဘဲ စကားမပြောပါနှင့်။

§ ပါးစပ်နှင့်နှာခေါင်းကို မျက်နှာအကာ အမြဲတပ်ထားပါ။

ကိုဗစ်ဖြစ်လျှင် ဗိုင်းရပ်စ်ပိုးကြောင့် လူနာသည် အောက်ဆီဂျင်လိုနိုင်၏။ သို့တိုင် အားလုံးမလိုပါ။ ကိုဗစ်လူနာများ၏ ၁၀ မှ ၁၅% သာ အောက်ဆီဂျင်ပေးရန် လို၏။

ယခုအခါ မြန်မာနိုင်ငံတွင် ကိုဗစ်ရောဂါဖြစ်ပွားမှုနှုန်းမှာ လျင်မြန်စွာ မြင့်တက်လာလေရာ အသက်ရှူရ ခက်နေသူများ အတွက် အောက်ဆီဂျင်ကို ရသည့်နည်းဖြင့် သယ်ယူရန် ကြိုးစားကြသည်ကို တွေ့မြင်နေရ၏။ ဤသည်မှာ အလွန် အန္တရာယ်များလှ၏။ မိမိ အောက်ဆီဂျင်ထည့်မည့်အိုးကို ယခင်က ဘာဓာတ်ငွေ့များ ထည့်ခဲ့သည်ကို သိပါသလော။ ထိုအိုးမှထွက်လာမည့် အောက်ဆီဂျင်၏ သန့်စင်မှုကို မည်ကဲ့သို့ တိုင်းပါသနည်း။

အောက်ဆီဂျင်ကို အဆုပ်အတွင်းသို့ တိုက်ရိုက်ပို့ပေးသည်ဖြစ်ရာ ထိုအောက်ဆီဂျင်၌သာ အဆိပ်အတောက် ဓာတ်ငွေ့ များ ပါလာပါက လူနာကို ကယ်ရာမရောက်၊ အမြန်သေတွင်းသို့ပို့ရာ ရောက်မည်ဖြစ်ကြောင်း သတိပေးလိုက်ပါ၏။

အောက်တွင် ဖေ့စ်ဘုတ် ပို့စ်တစ်ခုကို တွဲတင်ပေးလိုက်ပါသည်။ သတိထားနိုင်ရန် ဖြစ်ပါ၏။