ကျွန်ုပ်တို့အတွက် မျှော်လင့်ချက်ရောင်ခြည်

(၁)

NLD ပါတီမှ ရွေးကောက်ခံမည့် ကိုယ်စားလှယ်လောင်းများစာရင်း ထွက်ပေါ်လာချေပြီ။

၎င်းတို့သည် ကျွန်ုပ်တို့၏ ကိုယ်စားလှယ်များဖြစ်၏။

၎င်းတို့သည် ကျွန်ုပ်တို့၏ မျှော်လင့်ချက်များဖြစ်၏။

၎င်းတို့သည် ကျွန်ုပ်တို့ သားမြေးများ၏ အနာဂတ်များ ဖြစ်၏။

၎င်းတို့သည် ကျွန်ုပ်တို့တိုင်းပြည်ကို စနစ်ဆိုးကြီးမှ​ ရုန်းထွက် လွတ်မြောက်လာအောင် ပုခုံးဖြင့် ထမ်းတင်ပေးမည့်သူများ ဖြစ်ကြကုန်၏။

၎င်းတို့ အနိုင်ရရေးမှာ ကျွန်ုပ်တို့၏ သမိုင်းပေးတာဝန် ဖြစ်၏။

ထို့ကြောင့် ဦးဏှောက်ရှိသော ကျွန်ုပ်တို့/သင်တို့သည် သူတို့ကိုသာ ပုံအော မဲထည့်ကြရမည်။

မြန်မာပြည်၏ အနာဂတ် ပုံပေါ်လာအောင်၊ လက်ရှိစနစ်ဆိုးကြီးကို ပြုပြင်ပစ်ရအောင် NLD အစိုးရဖွဲ့နိုင်ရေးသည် သေရေးရှင်ရေးတမျှ အရေးကြီးလှ၏။

လက်ရှိ အဖြစ်အပျက်များကို အသင်တို့ နည်းနည်း စနည်းနာကြည့်ပါ။

နိုင်ငံကို ပြုပြင်ပြောင်းလဲလာအောင် လုပ်ဆောင်ရာတွင် NLD သာ ခြေအပေါ်ဆုံးဖြစ်သည်ကို သင်တို့ အမြင်ဖြစ်၏။

တခြားဟာ မကြည့်ပါနှင့်။

မနေ့တစ်နေ့က အမရပူရမှာ တာကျိုးသွားသည့်ကိစ္စကို ကြည့်ပါ။

သူတို့ဘယ်လိုလုပ်ခဲ့ကြသနည်း။ ၎င်းတို့သည် အပြောမဟုတ်။ အလုပ်နှင့် သက်သေပြကြသူများ မဟုတ်ကုန်လော။

(စကားစပ်၍ ပြောရလျှင် မြို့တော်ဝန်ကြီးနှင့် ကျွန်ုပ် အတိုင်းအတာတစ်ခုထိ ရင်းနှီးခင်မင်ပါသည်။ တာကျိုးသည့်ရက် မတိုင်ခင်ကလေးကမှ သူ့ဇနီးဆုံးထားတာ ဖြစ်၏။ တာကျိုးတော့ ညကြီးမင်းကြီး ပေါက်ချလာ၏။ သူ၏ ညှိုးငယ်နေ သည့်မျက်နှာကိုမြင်ရ၍ အမှန်တကယ်ပင် ကျွန်ုပ် အလွန်စိတ်မကောင်းဖြစ်မိ၏။ မီးသတ်အပါအဝင် ဝိုင်းကြဝန်းကြသူ   များအားလုံးကိုလည်း ကျေးဇူးတင်ပါသည်။)

နောက်တစ်ခုက တစ်ကမ္ဘာလုံး ကပ်ဆိုက်ခဲ့ရသည့် ကိုဗစ်၁၉ ကိစ္စ။

ကျွန်ုပ်သည်လည်း မြန်မာပြည်အစိုးရ၏ ကိုဗစ်၁၉ ကိုင်တွယ်မှုကို တစေ့တစောင်း အကဲခတ်ကြည့်နေမိသည်သာ ဖြစ်၏။

စိတ်အကျေနပ်ကြီးမဟုတ်တောင် အများကြီး ကောင်းပါသည်။

ကိုဗစ်သည် သောင်းနှင့်ချီဝင်လာသည့် နိုင်ငံခြားပြန်များမှ အများအပြား ကူးစက်နိုင်၏။

အထူးသဖြင့် မြဝတီနယ်စပ်မှနေ၍ ထိုင်းမှ ပြန်လာသူများကို ကြည့်ပြီး ကျွန်ုပ်မှာ ရင်တမမ ဖြစ်နေခဲ့တာ ဖြစ်၏။ 

သို့တိုင် အခြေအနေမှာ ကျွန်ုပ်ထင်ထားသလောက် ဆိုးရွားမလာခဲ့။

အသင်တို့သည် ယခု ကိုဗစ် ၁၉ နှင့် ၂၀၀၈ ခုနှစ်က ဖြစ်ခဲ့သည့် နာဂစ်မုန်တိုင်း သဘာဝဘေးဒုက္ခများ၌ အစိုးရ ကိုင်တွယ် လုပ်ဆောင်ပုံများကို နှိုင်းယှဉ်ကြည့်လိုက်လျှင်ပင် မည်သူ့ကို မဲပေးရမည်နည်းဆိုသည်ကို ပြတ်ပြတ်သားသား မြင်နိုင်ပါသည်။ 

(၂)

အသင်တို့အနေနှင့် NLD အစိုးရ၏ ကိုင်တွယ်ပုံများ၊ အချို့သော ခေါင်းဆောင်ပိုင်းမှ ပုဂ္ဂိုလ်ကြီးများ၏ လုပ်ပုံကိုင်ပုံများကို ကြိုက်မှာမဟုတ်ကြောင်း ကျွန်ုပ်သိပါ၏။

သို့သော် အသင်တို့သည် သူတို့ကို ခွင့်လွှတ်လိုက်ကြပါဘိ။

သူတို့သာမဟုတ်။

အသင်တို့ ကျွန်ုပ်တို့သည် စနစ်ဆိုးကြီး၏ ဖိနှိပ်မှုအမျိုးမျိုးအောက်တွင် မည်ကဲ့သို့ နေထိုင်ခဲ့ရသည်ကို အသင်တို့ အသိပင် မဟုတ်ပါလော။ 

ကျွန်ုပ်တို့သည် မမွေးမီကတည်းကပင် မဆလ စနစ်ဆိုးကြီးအောက်၌ မျက်စိပိတ်၊ နားပိတ်၊ ရှိသမျှ ဒွာရ (၇) ပေါက်လုံး အပိတ်ခံထားခဲ့ကြရသည် မဟုတ်တုံလော။ ကျွန်ုပ်တို့ပတ်ဝန်းကျင်မှာ လေ့လာစရာဆို၍ မဆလကထုတ်သည့် ဝါဒဖြန့်စာအုပ်များကလွဲ၍ မည်သည့်စာအုပ်များ ရှိခဲ့ပါသနည်း။ အသိပညာကြွယ်ဝလာလျှင် အုပ်ချုပ်ရခက်မည်စိုး၍ မဆလ၊ နဝတ အစိုးရတို့သည် သင်တို့၊ ကျွန်ုပ်တို့အပါအဝင် တစ်တိုင်းပြည်လုံးကို အသိပညာနည်းအောင်၊ နလဘိန်းဒုံးများဖြစ်အောင် လုပ်ထားခဲ့ကြသည် မဟုတ်လော။ ၎င်းတို့၏ ပြည်ပအားကိုး ပုဆိန်ရိုး၊ အဆိုးမြင်ဝါဒီများအား တိုက်ဖျက်ကြ အစရှိသည့် ဝါဒဖြန့် မှိုင်းလုံးများကိုသာ ကျွန်ုပ်တို့ ဦးဏှောက်အတွင်းသို့ တွင်တွင်ရိုက်ထည့်ခဲ့ကြကုန်သည် မဟုတ်လော။

နောက်ဘုန်းကြီး နှစ်ချက်ခေါက်ဆိုသလို မဆလ၏အမွေကို ဆက်ခံသော နဝတ တက်လာသည့်အခါ မြန်မာ့ပညာရေးမှာ ရေစုန်မျောရုံမျှမက အီးတွင်းထဲကိုပါ ပစ်ချခံခဲ့ရလေ၏။ ယနေ့ (၂၄ ဇူလိုင်၊ ၂၀၂၀) တိုင် ထိုအီးတွင်းထဲက ရုန်းမထွက်နိုင်သေးဆိုလျင် အသင်တို့ ငြင်းကြမည်လော။

၎င်းတို့သည် အသင်တို့ကျွန်ုပ်တို့၏ တောက်မည့်မီးခဲ တရဲရဲကလေးများကို မတောက်နိုင်အောင် ပြာဖြင့်ဖုံးခဲ့ကြ၏။ ရေဖြင့်ဖြန်းကာ အညွန့်ချိုးခဲ့ကြ၏။ 

သဟာနှင့်များတောင် သင်တို့က သူတို့ထံမှ ဘာများ မျှော်လင့်နေချင်ပါသေးသနည်း။

ခွင့်လွှတ်လိုက်ကြပါဘိ။

မုဆိုးစိုင်သင်ဆိုသလို သူတို့အလုပ်က သူတို့ကို သင်ပေးလိုက်ပါလိမ့်မည်။

သူတို့ကို သင်ယူခွင့်ကလေးများ ဆက်လက် ပေးလိုက်ကြပါကုန်လော။

(၃)

၂၀၁၅ တုန်းက ကျွန်ုပ်တို့ တစ်တိုင်းပြည်လုံးသည် မျှော်လင့်ချက်ကြီး တခွဲသားနှင့် NLD ကို ပုံအော မဲထည့်ခဲ့ကြ၏။

NLD အစိုးရတက်လာပြီဟေ့ ဆိုသည်နှင့် အသင်တို့ ကျွန်ုပ်တို့သည် မြန်မာပြည်ကြီးကို တာဝတိံသာနတ်ပြည်က နတ်ရေကန်ထဲ ကန်ချလိုက်သလို ဝုန်းကနဲ စနစ်များသည်လည်းကောင်း၊ လူများသည်လည်းကောင်း အကုန်ပြောင်းကုန်ကြမည် ဟု မှတ်ထင်ခဲ့ကြ၏။

ကိုယ်မျှော်မှန်းထားသလို ဖြစ်မလာသည့်အခါ အသင်တို့သည် ငါတို့လက်သန်းကို မင်ပေရကျိုးမနပ် ဟု စိတ်ပျက်ကြ ကုန်၏။

စိတ်မပျက်ကြပါကုန်လင့် မိတ်ဆွေများ။

ဒေါ်အောင်ဆန်းစုကြည်သည် ဘုရားမဟုတ်။

NLD သည်လည်း ဘုရားမဟုတ်။

သို့နှင့်များတောင် ၁၉၆၂ ခုနှစ်မှ ၂၀၁၅ ခုနှစ်တိုင် နှစ်ပေါင်းရာစုနှစ်တစ်ဝက်ကျော်ကျော် ဖျက်ဆီးထားခဲ့သည့် အိမ်စုတ်ကြီးကို နေ့ချင်းညချင်း ပြင်နိုင်မည်ဟု မျှော်လင့်ထားခြင်းမှာ ကျွန်ုပ်တို့၏ မိုက်မဲမှုသာ မဟုတ်ပါလော။

လီကွမ်ယုသည်လည်း စင်ကာပူကို အာဏာရှင်စနစ်နှင့် အုပ်ချုပ်ခဲ့တာ ဖြစ်၏။

သူသည် သူ့ကို ဖီလာကန့်လန့်လုပ်သူများအား အပြတ်အသတ်၊ နလံမထူနိုင်အောင် နှိပ်ကွပ်ကာ ထောင်ထဲ ထည့်ထား ခဲ့၏။ ဤသည်ကို ကျွန်ုပ်ကတော့ အလွန်သဘောကျ၏။

၎င်းသာ ပျော့စိပျော့ညံ့လုပ်နေ၍ နောက် ရွေးကောက်ပွဲတွင် ရှုံးနိမ့်သွားပါက သူချမှတ်ခဲ့သော စီမံကိန်းမှန်သမျှ ပျက်စီး သွားနိုင်သည်။ သူ့အိပ်မက်များအားလုံး ရေစုန်မျောသွားနိုင်သည်။ ယနေ့ စင်ကာပူဆိုတာ ဖြစ်လာမှာမဟုတ်။

ထို့ကြောင့် သူချမှတ်ထားသည့် စနစ်များကို အကောင်အထည်ဖော်နိုင်ဘို့ရာ သူ့ပါတီ ဆက်တိုက် အနိုင်ရနေဘို့၊ အစိုးရဖွဲ့နိုင်ဘို့လို၏။ 

စနစ်တစ်ခုကို အကောင်အထည်ဖော်ဘို့ဆိုတာ ၃-၄-၅ နှစ်နှင့် လုပ်လို့ရတာမဟုတ်။

အနည်းဆုံး အနှစ် (၃၀) လုပ်ရသည်။

သို့အတွက် အနှစ် (၃၀) တို့ကာလပတ်လုံး သူ့လက်ထဲမှာ အာဏာရှိနေဘို့လို၏။

နောက်ပြီး ခေါင်းဆောင်လုပ်မည့်သူသည် ပြတ်သားဘို့လို၏။ 

SIA ပိုင်းလော့များ ဆန္ဒပြစဉ်က မစ္စတာလီပြောပုံကို ကျွန်ုပ်အလွန်သဘောကျမိ၏။

ကိုယ့်ကိုယ်ကိုယ် ယုံကြည်ချက်အပြည့်ရှိခြင်းနှင့် ဘာမဆိုရင်ဆိုင်မည်ဟူသော သတ္တိကို သူ့မျက်နှာတွင် တွေ့ရ၏။

သူ၏လေသံ၊ မျက်နှာအမူအရာ၊ ပြောပုံဆိုပုံတို့မှာ တကယ့် စံနမူနာ ယူလောက်ပါပေသည်။

ခေါင်းဆောင်ဆိုသည်မှာ အဲသလို ဖြစ်နေရမည်။

စာလည်းအတော်ရှည်သွားပြီမို့ နိဂုံးချုပ်ပါမည်။

တိုင်းပြည်တစ်ခုကို ထူထောင်ဘို့ရာ အနည်းဆုံး အနှစ် (၃၀) လိုကြောင်း အထက်တွင် ကျွန်တော် ပြောခဲ့၏။

ထို့ကြောင့် မြန်မာပြည်ကြီး လူလူသူသူ ဖြစ်လာစေဘို့ NLD သည် အနည်းဆုံးအားဖြင့် အနှစ် (၃၀) အစိုးရဖြစ်နေဘို့လို၏။

NLD သည် အနည်းဆုံး ရွေးကောက်ပွဲ (၆) ဆက်မျှ ဆက်တိုက် အနိုင်ရစေဘို့ -

တစ်နည်းအားဖြင့် ဟိုအကောင်တွေ လွှတ်တော်အနားကို ယောင်လို့တောင် သီမလာနိုင်စေဘို့ -

အသင်တို့ ကျွန်ုပ်တို့တွင် အလုံးစုံ တာဝန်ရှိ၏။

အသင်တို့သည် ဘာမှ တွေဝေမနေကြကုန်လင့်။

NLD ကိုသာ စုပြုံ မဲထည့်ကြကုန်လော့။

ကျေးဇူးတင်ပါသည်။

အေးငြိမ်း

၂၄ ဇူလိုင်၊ ၂၀၂၀ 

ကျွန်ုပ်၊ ပုံစံ (၁၅) နှင့် မြန်မာနိုင်ငံ ရုံးပြင်ကနားများ အကြောင်း

(၁)

၂၀၂၀ ရွေးကောက်ပွဲ၌ ပြည်ပရောက်နိုင်ငံသားများ မဲပေးနိုင်စေရေးအတွက် သက်ဆိုင်ရာနိုင်ငံရှိ မြန်မာသံရုံးသို့ ပုံစံ (၁၅) ဖြင့် လျှောက်ထားရ၏။ 

ဂဏန်း၊​ ပုတ်သင်၊ ဝါးပင်၊ လိပ်မျိုး၊ နွားသိုး၊ ခွေးအ တည်းဟူသော လူ (၆) မျိုးထဲ၌ပါသည့် ဟိုအကောင်များ နောက် တစ်ခေါက် ပြန်ရောက်လာမည်ကို သေမလောက် ကြောက်လှသော ကျွန်ုပ်သည်လည်း စင်ကာပူရှိ မြန်မာနိုင်ငံသားများ မဲပေးနိုင်ရေးအတွက် တတ်စွမ်းသမျှ အကူအညီ ပေးနေပါ၏။ ကျွန်ုပ်အကူအညီပေးသလို သူတို့အချင်းချင်းလည်း အကူအညီပေးကြပါ၏။ တစ်ယောက်က နီးစပ်ရာသူငယ်ချင်းများထံမှ အချက်အလက်များစုကာ ကျွန်ုပ်ဆီ ပို့ပေး၏။ 

များသောအားဖြင့် အကူအညီတောင်းခံလာသူများမှာ အလုပ်သမားများ၊ အိမ်အကူများ ဖြစ်သဖြင့် ပညာနည်းသူများ ဖြစ်ကြ၏။ သို့အတွက် ပြဿနာပေါင်းစုံလည်း တွေ့ရ၏။

ပုံစံ (၁၅) တွင်ဖြည့်ရသည့်အချက်အလက်များမှာ သိပ်မများသလို လူတိုင်းသိနိုင်သည့် ယေဘူယျအချက်အလက်များ လည်း ဖြစ်၏။ ကိုယ့်နာမည်၊ မိဘများနာမည်၊ ကိုယ့်မွေးသက္ကရာဇ်၊ ကိုယ့်မှတ်ပုံတင်နံပါတ်၊ မြန်မာပြည် နေရပ်လိပ်စာ၊ စင်ကာပူနေရပ်လိပ်စာ၊ ဖုန်းနံပါတ်၊ လက်မှတ် . . သည်မျှသာဖြစ်ပါ၏။ ပညာအခြေခံလေး အနည်းအပါးမျှ ရှိလျှင်ပင် သည်အချက်များကို ဘယ်စာရွက်စာတမ်းမှ လှန်စရာမလိုဘဲ သည်အတိုင်း ကောက်ကက် ဖြည့်လိုက်လို့ ရသည်သာ ဖြစ်၏။

သို့သော် ၎င်းတို့အတွက်မူ အဲသလောက် မလွယ်ပါ။

နေရပ်လိပ်စာပေးတော့ ဒက္ခိဏခရိုင်၊ နေပြည်တော် ဟု ပေး၏။ 

ရပ်ကွက်ပါတော့ လမ်းနာမည်မပါ၊ အိမ်နံပါတ်မပါ။

အိမ်နံပါတ်၊ လမ်းနာမည်ပါတော့ ရပ်ကွက်မပါ။

တချို့ကျတော့ မြို့နယ်ပဲပါသည်။ ပြည်နယ်/တိုင်း မပါ။

တချို့ကျတော့ ပြည်နယ်/တိုင်း ပါပါ၏။ မြို့နယ်မပါ။

ရွာကလူတွေအများစုက ကျေးရွာအုပ်စု ထည့်မပေး။

ကျေးရွာအုပ်စုဆိုတာကိုတောင် မသိသူများလည်း ပါ၏။

စင်ကာပူက လိပ်စာကျတော့ postal code ကို ကိုယ့်ဘာသာရှာထည့်ရသည်။ အဲသလောက်က ပြဿနာမရှိပါ။

နောက်ပြီး မှတ်ပုံတင်နံပါတ် . . 

တချို့ကျတော့ ရှေ့က တိုင်း/ပြည်နယ် ဂဏန်းတွေမပါ။

တချို့ကျတော့ နောက်က ဂဏန်းတွေမပါ။

ဟဲ့၊ ဂဏန်းတွေမပါဘူး၊ ပြန်တောင်းပေးအုံးဆိုတော့ တောင်းပေးပါ၏။

မသင်္ကာလို့ အဲဒါ ဘယ်သူ့နံပါတ်တွေလဲ မေးတော့ သူ့အဖေနံပါတ် ဟု ဆို၏။

ဟဲ့ . . . သူ့အဖေနံပါတ်ကို ငါက နင့်ဂျီးဒေါ် သွားပေးရမှာလား။ သူ့နံပါတ်တောင်းပေး ဟု ဒေါကန်ရပြန်၏။

လက်မှတ်ထိုးပေးပါဆိုတော့ ထိုးပေးပါ၏။ 

လက်မှတ်က ပုရွက်ဆိတ်၏ လက်သန်း လက်သည်းခွံလောက်သာ ရှိ၏။

ဟဲ့ . . လက်မှတ်တောင်းနေတယ်လေ . . ဆိုတော့ . . ဟင်၊ အဲဒီမှာ ပေးပြီးပြီ ဆို၏။

သူပြောလို့ အတင်းပြူးပြဲပြီးလိုက်ရှာတော့ ဟို့ . . . . . . .. စာရွက်အောက်ဆုံးမှာ အပိန်ဆုံးနှမ်းစေ့၏ သုံးပုံတစ်ပုံမျှရှိသော လက်မှတ်ကို မြင်ရ၏။ 

အဲသလောက် အကြီးကြီးထိုးရသလား၊ မင်ကုန်နေမယ်။ ခပ်သေးသေးပဲထိုးပေး ဆိုတော့ ရယ်နေသည့် အီမိုဂျီလေးပို့၏။

ကျွန်ုပ်မှာ အငိုမျက်လုံး၊ အပြုံးမျက်နှာ ဖြစ်ရပြန်၏။

ပတ်စ်ပို့၊ workpass များအား ဓာတ်ပုံရိုက်တာကိုလည်း ဘယ်လိုရိုက်ပါဟု အသေအချာ ညွှန်ပြထားပါ၏။ သို့သော် ကျွန်ုပ်ရေးထားတာကို ဘယ်နှယောက်များ ဖတ်ပါသနည်း။ ဓာတ်ပုံကလည်း ဒီဇိုင်းမျိုးစုံနှင့်လာ၏။

အချို့ဓာတ်ပုံများမှာ ကျွန်ုပ်သား၏ နှာခေါင်းပေါက်ဝလောက်သာ ရှိ၏။

အတော်များများ ပုံများကတော့ တစောင်းဖီလာများ ဖြစ်၏။

ဟိုတစ်ယောက်ကတော့ ပတ်စ်ပို့ဓာတ်ပုံပို့ပါဆိုတော့ ပို့ပါ၏။ တကယ့် ပတ်စ်ပို့ဆိုဒ်ရိုက်ထားသည့် ဓာတ်ပုံပို့၏။ အောင်မယ် နက်ခတိုင်တွေ၊ ကုတ်တွေနဲ့ မောင်မင်းကြီးသားက ခန့်ခန့်ကြီးပါလားဗျို့။

ကိုယ့်လူ၊ ပတ်စ်ပို့ဓာတ်ပုံတောင်းနေတယ် ဆိုတော့ ပို့ပြီးပြီဆရာ၊ အဲဒီမှာ နှစ်ယောက်စလုံးပုံ ပို့ထားတယ် ဆို၏။

ဟုတ်ပါ့၊ နောက်တစ်ယောက်မှာ ဖီးမေးဖြစ်၏။ ကုတ်နှင့်၊ ပြင်ဆင်ထားတော့ တကယ့် အလန်း။

နာ ရှင်ချင်တယ်။ အဲဒီဓာတ်ပုံပြောတာမဟုတ်ဘူး လကွ။

ကိုရင့် ပတ်စ်ပို့စာအုပ်ကိုယူ။ အလင်းရောင်ကောင်းကောင်းရတဲ့နေရာကိုသွား။ ဓာတ်ပုံပါတဲ့စာမျက်နှာကိုလှန်။

ဖုန်းကိုယူပြီး ရိုက်ပို့ဟု သေသေချာချာပြောမှ ပတ်စ်ပို့စာအုပ်ပုံ ရ၏။

ဟမ်မှာလှေးလှေး။ မလွယ်။ မလွယ်။ တကယ့်ကို မလွယ်။

သူတို့ဘာသာ ပုံစံတွေဖြည့်ပြီး သံရုံးကို ကိုယ်တိုင်သာ သွားတင်လျှင်ဖြင့် . . . 

တွေးကြည့်ရုံဖြင့် သံရုံးကလူတွေကို ကျွန်ုပ် အလွန်သနားမိလေတော့၏။

(၂)

အမှန်က သနားမိသည်မှာ ကိုယ့်ကိုယ်ကိုယ် ဖြစ်၏။

မြန်မာပြည် အစိုးရရုံးကလူတွေ ဘာကြောင့် သည်မျှ စနစ်ဆွေး၊ ခေတ်ဆွေးကြီးကို မက်မောတွယ်တာနေကြပါလိမ့်ဟု ကျွန်ုပ် ယနေ့ထိတိုင် တွေးလို့မရ။

မြန်မာပြည်ထဲက အစိုးရရုံးတွေကိုတော့ ထားလိုက်ပါတော့။ ဘယ်တိုင်းပြည်မှ မရောက်ဖူးလို့။ သူများတွေ ဘာတွေ လုပ်နေတယ်ဆိုတာကို မလေ့လာဘဲ ၁၉ ရာစုလယ်လောက်က စနစ်ဆွေး၊ ခေတ်ဆွေးထဲမှာ အိပ်ပျော်နေတုံးမို့ ထားပါတော့။ ထားလိုက်ပါတော့။ ကိုယ်ဘာမှတတ်နိုင်သည့် ကိစ္စမဟုတ်လို့ မနိုင့်ရင်ကာ ခွင့်လွှတ်နိုင်ပါသေးသည်။

စင်ကာပူနိုင်ငံထဲမှာရှိနေပြီး စင်ကာပူနိုင်ငံမှာ နေနေသည့်လူများဖြစ်နေသည့်တိုင် စင်ကာပူနိုင်ငံ၊ မြန်မာသံရုံးက လူတွေသည် မြန်မာပြည်က ၁၉ ရာစုစနစ်တွေအတိုင်း လိုက်လုပ်နေတာကိုဖြင့် ကျွန်ုပ်မှာ အသည်းယားလှ၊ အဲလေ တစ်ကိုယ်လုံး ယားလှ၏။

ကျောင်းအပ်တွေ လက်ခံပြီဆိုတော့ ဟိုတစ်နေ့က သားအတွက် (မြန်မာပြည်အစိုးရကျောင်း) ကျောင်းသွားအပ်၏။

ကျောင်းအပ်ရာတွင် ပူးတွဲပေးပို့ရသည့် စာရွက်စာတမ်းများမှာ . . . 

ကျောင်းသား၏ ပတ်စ်ပို့ နှင့် Student Pass 

အဖေ၏ ပတ်စ်ပို့ နှင့် စင်ကာပူတွင်နေသည့် အထောက်အထား (PR Card)

အမေ၏ ပတ်စ်ပို့ နှင့် စင်ကာပူတွင်နေသည့် အထောက်အထား (PR Card)

(ယခုမှ စာတစ်ရွက်လျော့သွားတာ ဖြစ်၏။ ယခင်အခါကာလများက သံရုံးသို့သွားလျှင် အခွန်ဆောင်ထားသည့် စာရွက်များပါ ယူသွားရလေ့ရှိ၏။ ဘာမှ $$ရေးပါသည့် လုပ်ရပ်မဟုတ်။)

စုစုပေါင်း (၃) စုံတင်ရတာဆိုတော့ စာရွက်များမှာ မနည်းလှ။

ကျွန်ုပ်က အိမ်ပေါ်တွင် စားလိုက်၊ အိပ်လိုက်၊ ဂိမ်းဆော့လိုက်နှင့် အလွန်ဇိမ်ကျနေသော ခန္ဓာကိုယ် ကီလို ၁၀၀ လောက် ရှိသည့် မယားပါတူကို လွှတ်လိုက်၏။

သံရုံးရောက်တော့ ဖုံးဆက်၏။ ပုံစံ (၇) ပေးပါဆိုလား။ 

ပုံစံ (၇) ဆိုသည်မှာ Re-entry permit ဖြစ်၏။ 

ဤသည်မှာ ဘာမှ $$ရေးမပါသည့် လုပ်ရပ်ဖြစ်၏။ Re-entry permit မရှိဘဲ စင်ကာပူအစိုးရက နေခွင့်ပေးထားသည် လို့များ ထင်နေသလား မပြောတတ်။ နောက်ပြီး မိတ္တူကူးခက တစ်မျက်နှာ ငါးမူးခင်ဗျ။

(ဗမာပြည်ကနေ စင်ကာပူပြန်လာတော့လည်း လေဆိပ်မှာ ပတ်စ်ပို့နှင့်အတူ Re-entry permit ကို တောင်း၏။ ကာယကံရှင်နိုင်ငံဖြစ်သည့် စင်ကာပူကတောင်မှ တစ်ခါမှ Re-entry permit ကို မတောင်းဖူးပါ။ အဲသဟာကို မြန်မာပြည်က တောင်းရသည်ဆိုတော့ ဩော် - သူရို့နိုင်ငံသားတွေကို ဟိုတိုင်းပြည်ဝင်ခွင့်မရရှာမှာ စိတ်ပူပေးသဟဲ့ ဟု ကျွန်ုပ်မှာ သူတို့ကို ကျေးဇူးတင်ရမည့်အစား မလိုအပ်သည့် ၆လုပ်များ လုပ်ခြင်းအတွက် ခေါင်းကို သုံးချက်လောက် ခေါက်ချင်မိလေ၏။)

သည် ပုံစံ (၁၅) တင်တာ၊ ကျောင်းအပ်တာတို့ကို ကျွန်ုပ်သာ လုပ်ခွင့်ရမည်ဆိုလျှင် ဘာမှ သည်လောက် ၆လုပ် ရှုပ်စရာ အကြောင်းမရှိပါ။ သည်ခေတ်ကြီးမှာ ပုံစံဖြည့်တာ၊ စာရွက်စာတမ်းတွေ attach လုပ်တင်တာတို့ကို ဘာမှ စာရွက်ကြီး ပရင့်ထုတ်၊ လက်မှတ်ထိုးနေစရာမလို။ အင်တာနက်ဖောင်ဖြည့်တာသည် ဘယ် ဟိုက်ယားတက်ခနော်လော်ဂျီ (တံတွေး စင်လိုက်တာကွာ၊ ငါ့လခွမ်းတဲ့မှ) မှ မလိုပါ။ ပီဘိ ဘေ့ဇစ် အလုပ်များ ဖြစ်၏။ သင်တို့မလုပ်တတ်လျှင် အကူအညီ တောင်းလိုက်ပါ။ စင်ကာပူတွင် ကိုယ့်ထမင်းကိုယ်စားပြီး ကြီးဒေါ့်နွားကျောင်းပေးမည့်သူတွေ ရိုက်သတ်လို့ မကုန်နိုင်အောင် ရှိ၏။

၎င်းတို့သည် အဘယ်ကြောင့် သစ်တောပြုန်းတီးမည့် အလုပ်များကို လုပ်ချင်နေရသည် ဆိုခြင်းကို ကျွန်ုပ် နဖူးပေါ် လက်တင်၍သော်လည်းကောင်း၊ လက်ပေါ် နဖူးတင်၍သော်လည်းကောင်း အပြန်ပြန် အလှန်လှန် စဉ်းစားကြည့်မိ၏။ ဘယ်လိုမှ အဖြေမထွက်။ 

၎င်းတို့သည် အဘယ်ကြောင့် စာရွက်ကြီးများကို လှန်ကြည့်ရမှ အားရပါးရ ရှိရပါသနည်း။ ငွေသားကို ပွတ်ကြည့်လိုက်ရမှ ပယ်ပယ်နယ်နယ် ရှိရပါသနည်း။ 

သံရုံးတွင် ဘဏ်စာရင်းတစ်ခု ဖွင့်ထားလိုက်ပြီး အွန်လိုင်းငွေလွှဲသည့်စနစ် လုပ်ထားလိုက်ပါက သံရုံးသို့ ငွေသွင်းစရာ ရှိလျှင် ထမင်းစားနေရင်း လွှဲလို့ရသည်။ ဘတ်စကား၊ ရထားစီးရင်းလွှဲလို့ရသည်။ ကောင်လေးနှင့် အီစီကလီ လုပ်နေရင်း လွှဲလို့ရသည်။ သူငယ်ချင်းများနှင့် ဘီယာသောက်နေရင်း လွှဲလို့ရသည်။ ယုတ်စွအဆုံး အီးပါနေရင်းတောင် လွှဲလို့ရသည်။

ဘာမှ သည်မျှ ဝေးလံခေါင်ဖျားလှသည့် နေရာကြီးကို တကူးတက သွားနေစရာမလို။

(၃)

ထို့ကြောင့် NLD ကိုသာ မဲထည့်ကြပါကုန်။ (ဟင် . . . . မင်းဟာကလည်း အရင်းမရှိ၊ အဖျားမရှိ။) ဆောရီး။

ငါ့ကိုက ကုသိုလ်ကံဆိုးလှပါတယ် . . အီးဟီးဟီး . . . . . 

ဟုသာ ငိုချင်းချလိုက်ကြပါကုန်။

ဝမ်းနည်းပါသည်။

အေးငြိမ်း

၂၃ ဇူလိုင်၊ ၂၀၂၀

စင်ကာပူတွင် အလုပ်လုပ်နေသူတိုင်း သိသင့်သိထိုက်သော အကြောင်းအရာများ

Mediafire Link:

https://www.mediafire.com/file/6mxcnisp8qupwyq/Work_Passess_In_Singapore.pdf/file

Youtube link:

https://www.youtube.com/watch?v=w-mBeDNxJ1I&feature=youtu.be

Diploma Courses @ Ever Safe Academy

အမျိုးတို့ရေ -

Ever Safe Academy မှာ အောက်မှာဖော်ပြထားတဲ့ ဒီပလိုမာသင်တန်းတွေ စဖွင့်ပါတော့မယ်။

1. Diploma in Mechanical Engineering 

2. Diploma in Electrical Engineering

3. Diploma in Computer Science and Engineering

4. Diploma in Quantity Surveying

5. Diploma in Civil Engineering

6. Diploma in Web Technology

7. Diploma in Human Resource Management

တစ်နှစ်သင်တန်းဖြစ်ပြီး Online Webinar Class တွေဖြစ်လို့ ကိုယ့်အိမ်ကနေကိုယ် လေ့လာလို့ရမှာ ဖြစ်ပါတယ်။

ကျွန်တော်က Mechnical Engineering Diploma သင်တန်းမှာ Engineering Maths နဲ့ Engineering Drawing သင်ပါမယ်။

မကြာခင် သင်တန်းတွေစဖွင့်တော့မှာ ဖြစ်လို့ စိတ်ဝင်စားသူများ အခု စာရင်းပေးလို့ရပါပြီ။

ကျေးဇူးတင်ပါတယ်

အေးငြိမ်း

၁၅ ဇူလိုင်၊ ၂၀၂၀

၂၀၂၀ တွင်လည်း ကျွန်ုပ်တို့သည် NLD ကိုသာ ဆက်လက် မဲထည့်ရလိမ့်ဦးမည် ဆိုခြင်းအကြောင်း

NLD ကို လော်သည့်စာများ ရေးချင်သော်လည်း ယခုတလော ကျွန်ုပ်သည် ဘာမှန်းမသိသောကိစ္စများဖြင့် မအားလပ်နိုင် အောင်ရှိသောကြောင့် မရေးဖြစ်နိုင်အောင် ရှိချေ၏။ ယခုမူ အိပ်နေရင်းတန်းလန်း ဆီးချိုကျလာသည့်အတွက် သကြား ထ, စားရာမှ ပြန်အိပ်မရသောကြောင့် ဤစာကို ရေးလိုက်ရပြန်ချေသည် တမုံ့။

အမှန်က ကျွန်ုပ်ပင် ရေးစရာမလိုပါ။ အနှီမကောင်းဆိုးဝါးများ အဘယ်မျှ ယုတ်မာခဲ့သနည်း ဆိုသည်ကို မိတ်ဆွေတို့ အားလုံး သိနှင့်ကြပြီး ဖြစ်ပါသည်။ သို့သော် ကျွန်ုပ်တို့တိုင်းပြည်အပေါ် ၎င်းတို့ အဘယ်မျှယုတ်မာခဲ့သည်ဆိုသည်ကို ချမရေးလိုက်ရလျှင် ကျွန်ုပ် ပြန်အိပ်လို့ရတော့မည် မဟုတ်တော့သောကြောင့် အန်ထုတ်လိုက်ရခြင်း ဖြစ်ပါ၏။

ကျွန်ုပ်အဖို့မူ မြစ်ဆုံကိစ္စကဲ့သို့သော ထွေးမရ၊ အံမရပြဿနာတုံးကြီးကို ဖန်းတီးခဲ့တာ တစ်ခုတည်းနှင့်ပင် ၎င်းတို့ကို မဲမထည့်ရန် အကြောင်း လုံလောက်နေချေပြီ။ မြစ်ဆုံအတွက် ၎င်းတို့သည် အဘယ်မျှ ပညာမဲ့လိုက်ပါသနည်း။ အဘယ်မျှ အမြော်အမြင် နည်းလိုက်ပါသနည်း။ အဘယ်မျှ ဦးဏှောက်မရှိလိုက်ပါသနည်း။ အဘယ်မျှ မိုက်မဲလိုက်ပါသနည်း။ အဘယ်မျှ ဆိုးရွားယုတ်မာလိုက်ပါဘိသနည်း။

ဤကိစ္စကို ဘယ်လိုရှင်းကြမည်နည်း။ ယခုထက်တိုင် အဖြေမရှိသေးပါ။ ဤကမ္ဘာပေါ်တွင် ပေါ်ခဲ့ဖူးသမျှ ကမ္ဘာ့ အယုတ်ဆုံးခေါင်းဆောင် ဆိုသူတို့ပင် ၎င်းတို့ကို ဖင်ဖျားကို မမီသေးချေ။ (ကန်တော့ပါရဲ့၊ မိတ်ဆွေများ) ၎င်းတို့သည်ကား အယုတ်တကာ့ထိပ်ခေါင် ဖွတ်မင်းနောင်များ ဖြစ်လေတော့၏။

ဟိုတလောက မြစ်ဆုံကိစ္စ ဘယ်လောက်လျော်ရမလဲ။ ငါတို့ပြည်သူတွေ တစ်ယောက် ဘယ်လောက်စု လျော်လိုက်လျှင် ဖြစ်နိုင်သည် . . . . . စသဖြင့် ဖေ့စ်ဘုတ်တွင် ဖတ်လိုက်ရပါ၏။ ဤသည်ကိုကြည့်ခြင်းအားဖြင့် ကျွန်ုပ်တို့ပြည်သူများသည် ဤမြစ်ဆုံကိစ္စကြီးသာ ပြေလည်သွားမည်ဆိုလျှင် မိမိအိပ်ကပ်ထဲမှ ချွေးနည်းစာကလေးများကိုပင် အစိုးရသို့ ရက်ရက်ရောရော လှူဒါန်းရန် ဝန်မလေးကြ ဆိုသည်ကို အထင်းသား မြင်နိုင်ပါ၏။ ကျွန်ုပ်သည် ထို မြစ်ဆုံပြဿနာကြီး အား ဖန်တီးခဲ့သူများကို ပါးချချင်သလောက် ကျွန်ုပ်တို့တိုင်းသူပြည်သားများအား ချစ်ခင်လေးစားမိလေ၏။

ကျွန်ုပ်တို့တိုင်းသူပြည်သားများ သည့်ကလောက် ပူပင်သောကများပြီး သည်မျှ အရေးတကြီးဖြစ်နေချိန်တွင် ထို ပြဿနာ ၏ ဖန်တီးရှင်ကြီးများမှာမူ နည်းနည်းကလေးမှ $$ဂရုမစိုက်ဘဲ နေနိုင်အားလှပေစွ။ အခွက်ပြောင်လှပေစွ။ အရှက် မဲ့လှပေစွ၊ နောင်တမရနိုင်အားလှပေစွ။ ၎င်းတို့သည် ကျွန်ုပ်တို့ကို ကွယ်ရာမှနေ၍ နှုတ်ခမ်းတစ်ဖက်ကိုမဲ့ကာ လှောင်ပြုံးပြုံးနေမှာ မြင်ယောင်မိပါသေးတော့၏။

ဟိုတစ်နေ့က လူရာချီသေခဲ့သည့် ဖားကန့်ကိစ္စမှာလည်း ၎င်းတို့၏ စနက်မကင်းဟု ဆို၏။ ကျွန်ုပ် သေသေချာချာမသိပါ။ ၎င်းတို့သည် ပိုက်ဆံသာရမည်ဆိုလျှင် မဟုတ်တာမှန်သမျှ အကုန်လုပ်ကြသည်သာ ဖြစ်၏။ ရှေ့ရေး၊ နောက်ရေး၊ ဘေးရေး၊ အပေါ်ရေး၊ ဘာအရေးမှ ထည့်မစဉ်းစား၊ အဲလေ စဉ်းစားနိုင်လောက်အောင်လည်း ပညာကမရှိ။ ငါတကောကောဘို့ လောက်သာ သိကြသူများ ဖြစ်၏။ ထိုဖားကန့်ကိစ္စကိုသာ သည်အတိုင်းသာ လွှတ်ပေးထားလိုက်မည် ဆိုပါက နောင် ၅ နှစ်လောက်ကြာသည့်အခါ မဟာတာပနငရဲသို့ပင် လှေခါးထောင်ကာ ဆင်းနိုင်သည့်အခြေသို့ ဆိုက်သွား ပေလိမ့်မည်။

အခုတလော ဖေ့စ်ဘုတ်မှာ ပွထနေသည့် နေပြည်တော်မှ ဘုရားဆင်းတုတော်ပုံများကိုလည်း ကြည့်ပါ။ ဤပုံများမှာ ယခုမှ ပွထလာတာ မဟုတ်။ ယခင်နှစ်များကလည်း အုတ်အော်သောင်းတင်း ဖြစ်ခဲ့ဖူးသေး၏။

ဤသည်ကို ကြည့်ခြင်းအားဖြင့် ထိုသူတို့သည် ၎င်းတို့ အာဏာရရေးအတွက်ဆိုလျှင် သာမန်လူများကို မဆိုထားပါနှင့်။ ကိုယ်ကိုးကွယ်သည့် ဘုရားကိုပင် မဟုတ်တန်းလျားများ လုပ်ရန်၊ ချနင်းရန်၊ လက်ကိုချိုးပြီး ပေါက်တတ်ကရများလုပ်ရန် အနည်းငယ်မျှ မနှောင့်နှေးဆိုသည်ကို ဧရာဝတီမြစ်ထဲမှာ ဝေလငါးကြီး ကူးလာသကဲ့သို့ အလွန်အင်မတန်မှပင် ထင်ရှား လှပါပေတော့၏။

အစိုးရနေရာကို အလိုရှိလျှင် လူထုက ချစ်ခင်နှစ်သက်လာအောင် လုပ်ရမည်။ တိုင်းပြည်အပေါ် စေတနာကလေး နှစ်ပဲ ဘိုးလောက် ထားသင့်သည်။ ပညာဉာဏ်ကလေး (၄) တန်းအောင် ခလေးလောက်တော့ ရှိသင့်သည် ဆိုသည်ကို လူတိုင်း သိ၏။ သို့သော် ဤမျှရိုးစင်းလှသည့် သီအိုရီကလေးကိုပင် ၎င်းတို့မသိချေ။ မသိ၍သာ ကောင်းမွန်မှန်ကန်သောနည်း အားဖြင့် အာဏာရအောင် မကြိုးစားဘဲ မဟုတ်တန်းလျား ယတြာများလုပ်ကာ ကြိုးစားခြင်းမဟုတ်တုံလော။ ဤမျှလောက် ဦးဏှောက်မဲ့သူများ၊ ပညာမဲ့သူများ၊ ဆင်ခြင်တုံတရား မဲ့သူများ၏ လက်ထဲသို့ အာဏာကို ပြန်ထည့်ကြဦးမည်ဆိုလျှင် သင်တို့လောက်မိုက်မဲသူ ဤလောက၌ ရှိမည် မဟုတ်ချေ။

လူတစ်ဦးတစ်ယောက်၏ ပညာဉာဏ်၊ အရည်အချင်း၊ တွေးခေါ်မြော်မြင်နိုင်စွမ်းတို့ကို ၎င်းတို့ပြောသည့် စကားများ အားဖြင့် ခန့်မှန်းနိုင်သည်သာ ဖြစ်၏။ ယခု ထိုသည့် (so called) လူကြီးဆိုသူများ ပြောဆိုနေကြသည်များကို နည်းနည်း လောက်နားစွင့်ကြည့်စမ်းပါ။

ကျွန်တော်မှတ်မိသမျှ ထိုလူကြီးများပြောသည့်စကားများတွင် မှတ်စရာသားစရာဆို၍ ဘာတစ်ခွန်းမှ မတွေ့မိပါ။ ကျွန်ုပ်တွေ့သမျှတော့ အနှီလူဂျီးဆိုသူများ ပြောသမျှမှာ ဟာသပြက်လုံးများ အဆင့်ထက် မပိုပါ။ ကျွန်ုပ်သည် ၎င်းတို့ကို ကြည်ညိုချင်ပါသဖြင့် ၎င်းတို့ ပညာရှိဆန်ဆန်၊ လူကြီးလူကောင်းဆန်ဆန် ပြောသည့် စကားများရှိပါက မိတ်ဆွေတို့ ကျွန်ုပ်ကို ပြန်လည် ဝေမျှပေးစေလိုပါသည်။

သို့သော် ကျွန်ုပ် သဘောကျမိမလိုလို ရှိတာတစ်ခုတော့ ရှိ၏။ ဘာတဲ့ . . . သူတို့နဲ့ ပလဲနံပသင့်သွားရင် ကေတီဗီ အတူတူ သွားလို့ရတယ်၊ အရက်အတူတူသောက်လို့ရတယ်. . . .ဆိုလား။ နိပ်ဟ။ ကျွန်ုပ်မှာ သီချင်းဆိုဝါသနာပါသူတစ်ဦး ဖြစ်ရကား ၎င်းတို့နှင့်အတူ ကေတီဗီတွင် တွံတေးသိန်းတန်၏ “ထွေးညိုလေးရယ် . . သေးဆိုတာ မတ်တတ်ပေါက်ရ . . ဟ ဟ . . ဒယ်” ဆိုသည့်သီချင်းကို ဟဲရန် ကြံစည်မိလေသောဟူ၏။ သို့သော် ၎င်းတို့ဘီယာတစ်လုံးပြီးတစ်လုံးမှာကာ ဆို့သမျှ ကျွန်ုပ်ကချည်း ဒိုင်ခံရှင်းရမည့်အရေး မျှော်တွေးမိသောကြောင့်သာ ထို အကြံကို လက်လျှော့ရလေတော့သည်။

တစ်လ ဆယ်သိန်းလဲရ၊ ကေတီဗီအတူဆိုဘို့ အခွင့်အရေးလဲရ။ မဆိုးပါဘူး။ မမကြီး၏ လွှတ်တော်တက်ရသည့် ရည်ရွယ်ချက်ကို သိရသည့်အခါ ကျွန်ုပ်မှာ ကျွတ် ကျွတ် ကျွတ် ဟု သုံးကြိမ်တိုင်တိုင် စုပ်သတ်မိလေသော ဟူ၏။

ဒါဖြင့် မင်းက NLD ကို လွှတ်ကြိုက်သပေါ့လေ ဟတ်လား။

ဆြာရယ် - ကျွန်တော်ဖြင့် တစ်ခါမှတောင် ပါးစပ်မဟဖူးပါကလား ခင်ဗျာ။

YBS စပြီဟေ့ဆိုတော့ အရပ်များရင်လည်း ကူပါ။ လူများရင်လည်း ဝိုင်းပါ ဖြစ်ခဲ့ရသည့် အဖြစ်အပျက်အတွက် ကျွန်ုပ်သည် အဆိုပါ မောင်ရင်ဖြိုးကို နားရွက်တံတွေးဆွတ်ကာ ထိုင်ထ အခါ ၂၀၀ လောက်လုပ်ခိုင်းချင်မိလေ၏။ သို့တိုင် မနေ့ညကမှ မက်သည့်အိပ်မက်ကို မစဉ်းစားမဆင်ခြင်အဲ အရမ်းရောကာရော ထ ထ လုပ်တတ်သည့် လူကြီးမင်း၏ အမှားမှာ သံလမ်းနှင့်မတော်လို့ဆိုလား၊ သုံးလို့စားလို့မရသော ရထားတွဲကြီးများကို သည်အတိုင်း ကျီးထိုးထိုး၊ လောက်ကိုက်ကိုက် ပစ်ထားရသည်နှင့်စာလျှင် ခွင့်လွှတ်နိုင်ပါသေးသည်။

ဆရာမများကို ရည်းစားစကားပြောခိုင်းသည့် ကိစ္စမှာ တစ်နိုင်ငံလုံးလှည့်ကာ ပါးရိုက်မည့် ကိစ္စထက်စာလျှင် အများကြီး တော်ပါသေးသည်။

စာလည်းအတော်ရှည်သွားပြီမို့ နိဂုံးချုပ်ပါမည်။

နေပူတော် ဟိုမူကြိုကျောင်းက ဟိုခလေးမလေး ဟဝှာလုပ်ခံရသည်ကို တရားခံဘယ်သူလဲ သိလျက်နှင့် စောင့်ကြည့်နေခဲ့ ရသည့်ကိစ္စ၊

ဟဝှာ ၁၈ ယောက်ကို ဟိုဒင်းလုပ်ခဲ့တာတောင် Government hostel ၌ အစိုးရကျွေးသည့်ထမင်းကိုစားလျက် အိပ်လိုက်နှပ်လိုက်နှင့် လူကြားကောင်းရုံ ဒဏ်ကလေးမဖြစ်ညစ်ကျယ် ချသည့်ကိစ္စ . . .

(မှတ်ချက်။         ။ Government hostel ဟူသည့် အသုံးအနှုန်းမှာ ကျွန်ုပ်ပြောခြင်းမဟုတ်ပါ။ ကျွန်ုပ် စင်ကာပူပိုလီတွင် Safety Officer သင်တန်းတက်စဉ်က သင်တန်းဆရာတစ်ယောက် ပြောသည့် အသုံးအနှုန်း ဖြစ်ပါသည်။ ကျွန်ုပ်က ကြိုက်လှသဖြင့် ယူသုံးခြင်းဖြစ်ပါ၏။)

. . . စသည့် စသည့် တရားဥပဒေကို ကျော်ချင်သလိုကျော်၊ ခွချင်သလိုခွနေသည့် ကိစ္စများမှာ NLD သည် တင်းပြည့် ကျပ်ပြည့် အစိုးရမဟုတ်သေးသောကြောင့် ဖြစ်သည်ဟု ကျွန်ုပ်ကတော့ သည်လိုပင် ယူဆပါသည်။

ဆိုတော့ တင်းပြည့်ကျပ်ပြည့် အရပ်သားအစိုးရဖြစ်လာစေရန်၊ မြန်မာနိုင်ငံတဝှမ်းလုံးတွင် အရပ်သားအစိုးရ၏ အာဏာသက်ရောက် စေရန်၊ ဤကဲ့သို့ တင်းပြည့်ကျပ်ပြည့်အစိုးရ မဖြစ်နိုင်စေရန် ပိတ်ပင်တားဆီးထားသည့် မှော်စာအုပ်အစိမ်းကြီးကို မည်သည့် အစွယ်မှမရှိတော့ဘဲ မြွေစွယ်ကျိုးကဲ့သို့ ဖြစ်စေရန်၊ NLD က အစိုးရဖွဲ့နိုင်ရေးသည် သေရေးရှင်ရေးတမျှ အရေးကြီးပါသည်။ (ညွန့်ပေါင်းတွေ၊ ညွန့်ပက်တွေ လာမပြောပါနှင့်။ ကျွန်ုပ်ကတော့ ဘာနှင့်ပေါင်းတာမှ မကြိုက်ပါ။)

ဤသည်မှာ ကျွန်ုပ်တို့အရေး၊ သင်တို့အရေး၊ သင်တို့ကျွန်ုပ်တို့၏ သားစဉ်မြေးဆက်များအရေး ဖြစ်၏။

မိတ်ဆွေတို့ လူရွေးမမှားပါစေလင့်။

ယခု အစိုးရထဲမှ အချို့လူများကို သင်တို့မကြိုက်မှန်း ကျွန်ုပ်သိပါသည်။

သင်တို့လိုပဲ ကျွန်ုပ်လည်း မကြိုက်ပါ။

သို့သော် သင်တို့သည် လူရိုးဗလချီးနမ်းများကို ရွေးမည်လား။

တိုင်းပြည်ကို ရောင်းစားမည့်၊ အရေဆုတ်မည့်၊ သူတို့ယောက္ခမက ပေးထားသည့် အမွေပစ္စည်းနှယ် ပြုမူမည့် လူ့ဗရုတ်သုက္ခများကို မဲပေးမည်လား။

မြစ်ဆုံကဲ့သို့သော မဖြေရှင်းနိုင်သည့် ပြဿနာကြီးများ နောက်ထပ် မပေါ်ပေါက်စေရေးအတွက် နည်းလမ်းတစ်ခုသာ ရှိပါသည်။ ဤနည်းမှာ ထိုအကောင်များကို မည်သည့်နည်းနှင့်မျှ အာဏာပြန်မရလာစေရန် တားဆီးရေးပင် ဖြစ်ပါသတည်း။ ဤသည်မှာ နိုင်ငံသားအားလုံး၏ တာဝန်ပင် ဖြစ်ပါကြောင်း။

သင်တို့၌ ရွေးချယ်စရာများများမရှိ။

တစ်ခုတည်းသာရှိပါသည်။

အဘယ်ကိုရွေးရမည်ကို မိတ်ဆွေတို့သိပါသည်။

ကျေးဇူးတင်ပါသည်။

အေးငြိမ်း

၉ ဇူလိုင်၊ ၂၀၂၀

စံနှုန်း၊ ကျွမ်းကျင်မှုစံနှုန်းများနှင့် ကျွမ်းကျင်မှုအကြောင်း အသိပညာမျှဝေရေး အစီအစဉ်

Standards; Competency Standards and Competency

Power Point Presentation file download link:

https://www.mediafire.com/file/oy5keojvv0yg6um/Importance_of_National_Competency_Stds.pdf/file

နေ့ရက်။ ။ ၅၊ ဇူလိုင်၊ ၂၀၂၀ (တနင်္ဂနွေ)

အချိန်။ ။ (မြန်မာ) နေ့လယ် ၁ နာရီခွဲမှ ၃ နာရီခွဲ

(စင်ကာပူ) နေ့လယ် ၃ နာရီမှ ၅ နာရီ

Youtube link:

https://www.youtube.com/watch?v=LK64twTp5Ec&feature=youtu.be

၂၀၂၀ ရွေးကောက်ပွဲ ကိစ္စ

စလုံးကအမျိုးတို့ရေ -

ဟောဒီ link မှာ ပုံစံ (၁၅) download လုပ်လို့ရပါပြီ။​ 

http://www.myanmarembassy.sg/downloads/GeneralElection/2020/ElectionForm-15.pdf

ဖြည့်ထားတဲ့ နမူနာပုံစံကို ပူးတွဲဖော်ပြထားပါတယ်။

နောက်ပြီးတော့ -

၁။ ပုံစံဖြည့်ပြီးသား ပုံစံ (၁၅)

၂။ ပတ်စ်ပို့ မိတ္တူ

၃။ စင်ကာပူမှာ နေထိုင်ကြောင်းအထောက်အထား မိတ္တူ နဲ့ ဖုန်းနံပတ်

(ဝပ်ပါမစ်၊ S Pass, EP, PR, Student Pass, Dependant Pass, Long Term Pass စသည်) - - - တို့ကို

သံရုံး email ဖြစ်တဲ့ webmaster@mesgservice.com ကို - - 

ဇူလိုင်လ ၁၆ ရက်နေ့ကနေ ဩဂုတ်လ ၅ ရက်နေ့အတွင်း - - 

ပို့ပေးရပါမယ်။

ကြိုတင်မဲပေးရမယ့်ရက်ကို ထပ် ကြေငြာပါမယ် တဲ့။

ပုံစံမှာ - 

------------------------------------ မြို့နယ်ကော်မရှင် အဖွဲ့ခွဲဆိုတာ ပါပါတယ်။

အဲဒါက ကိုယ်နေတဲ့ နေရပ်လိပ်စာပါတဲ့ မြို့နယ်ကော်မရှင်ပါ။ 

ကျွန်တော်က ကမာရွတ်မှာနေတော့ “ရန်ကုန်တိုင်းဒေသကြီး၊ ကမာရွတ်” လို့ ဖြည့်မှာပေါ့ဗျာ။

ပြည်သူ့လွှတ်တော် မဲဆန္ဒနယ် (၃၃၀) ကို ဒီမှာ ကြည့်လို့ရပါတယ်။

https://uec.gov.mm/show_data_content.php?name=111_2020%20Attach.pdf&type=page_multiple_photo&code=202&sno=4731&token=21b2286f7e2443ac1c67d201b9ed0c57abd09a2cf9d377e6cf5904d9798ac3fc4067ad2c5c397120610dd4e6f085f8eeede19fe4f6580efb83efa3441e373276

အမျိုးသားလွှတ်တော် မဲဆန္ဒနယ် (၁၆၈) နယ်ကို ဒီမှာ ကြည့်လို့ရပါတယ်။

https://uec.gov.mm/show_data_content.php?name=112_2020%20Attach.pdf&type=page_multiple_photo&code=202&sno=6644&token=aae452ad6b5cf2b6c919175e9448593bd6d14fadfa2b1ce8d94fb17da8b524b5d9432e4b6d658aa85994495cf0f0bb3a5df4322e282a7a811184af240ecae5a0

တိုင်းဒေသကြီးလွှတ်တော်သို့မဟုတ်ပြည်နယ်လွှတ်တော် မဲဆန္ဒနယ်  (၆၄၄) နယ်ကို ဒီမှာ ကြည့်လို့ရပါတယ်။

https://uec.gov.mm/show_data_content.php?name=113_2020%20Attach.pdf&type=page_multiple_photo&code=202&sno=154&token=7c2821d3a96363fe39d6f74b8cd3d45c7faeeacedce3d4af1f9448357850367acef2f76c02b348112c1472e3f8ed81559f090f1a92e3a2d90e369d5a1bb6027f

တိုင်းဒေသကြီးလွှတ်တော် သို့မဟုတ်  ပြည်နယ်လွှတ်တော် တိုင်းရင်းသားလူမျိုးမဲဆန္ဒနယ်  ( ၂၉ ) နယ်ကို ဒီမှာ ကြည့်လို့ရပါတယ်။

https://uec.gov.mm/show_data_content.php?name=114_2020%20Attach.pdf&type=page_multiple_photo&code=202&sno=9085&token=e826db3778e7aa34caaba9b75c5f8d7a03763437b030c34674b71fce1e7dd7284794381f3ef60fb4aa4f167a8c004fb88ef02badd96ca833d603b5d257489c6c

နိုင်ငံသားတစ်ယောက်၏ တာဝန်ကို ကျေပွန်လိုက်ကြပါစို့။

ကျေးဇူးတင်ပါတယ်

အေးငြိမ်း

၃ ဇူလိုင်လ၊​ ၂၀၂၀