အသင်တို့ အမှိုက်ကို တွေ့ကရာမပစ်ခြင်းသည် ပိုက်ဆံကိုချွေတာရာရောက်သည် ဆိုခြင်းအကြောင်း

အလုပ်သမားများအားသင်ရသော သင်တန်းတွင် စင်ကာပူ၌ လိုက်နာရမည့် စည်းမျဉ်းစည်းကမ်းများအကြောင်းပါ သင်ရ လေရာ ကျွန်ုပ်က စင်ကာပူတွင် အမှိုက်ကို တွေ့ကရာပစ်ခဲ့သည်ရှိသော် ဒဏ်ငွေ စင်ကာပူဒေါ်လာ ၂၀၀၀ ထိ တပ်ရိုက်နိုင်ကြောင်း ပြော၏။

 

ထိုအခါ သင်တန်းသားများထဲမှ စကားကို အ,ထစ် အ,ထစ်နှင့် မြန်မြန်ပြောတတ်သော ကောင်လေးတစ်ယောက်က ထလာကာ တစ်ခုခုပြော၏။ သူ ဘာပြောမှန်း ကျွန်ုပ်က နားမလည်။ ဘာပြောတာလဲကွ ဆိုတော့ သူ့ဘေးက ကောင်လေးတစ်ယောက်က သူ စီးကရက်တိုပစ်မိ၍ ဒဏ်ငွေ ၃၀၀ ဆောင်ရတာ ပြောသည့်အကြောင်း ဘာသာပြန် ပြသဖြင့် သိရ၏။ 

 

ဘယ်လိုဖြစ်တာတုံးကွ၊ လုပ်စမ်းပါအုံး ဆိုတော့ သူ စီးကရက်သောက်ပြီး စီးကရက်တိုကို လမ်းပေါ်ပစ်ချကာ ဖိနပ်နှင့် နင်းလိုက်စဉ် “Excuse me” ဆိုပြီး လူတစ်ယောက်အနားကပ်လာကာ ကပ်ကလေးတစ်ခု ထုတ်ပြသည်ဆို၏။ ထို့နောက် ထိုသူက blah blah blah နှင့် ရှင်းပြ၏။ တစ်လုံးကမှ နားမလည်။ နောက်တော့ စာရွက်ဖြတ်ပိုင်းလေး ထုတ်ပေးလို့ ကြည့်လိုက်တော့မှ သဘောပေါက်။ 

 

အောင်မငီး၊ ခုနင်က စီးကရက်တို ပစ်ချမိလို့ ပိုက်ဆံ ၃၀၀ ဘိုးနပ်စ်ပေးသွားမှန်းသိရ။ 

 

၂၀၁၉ ခုနှစ် မေလ ၃ ရက်နေ့က Jurong East တွင် အမျိုးသားတစ်ဦး ရပ်ထားသော သူ့ကားဆီလျှောက်လာရင်း လက်ယားလာ၍ သားရေကွင်းနှစ်ကွင်းကို ရှေ့နောက်ပစ်လိုက်သည်ဆို၏။ ဤသည်ကို NEA officer မြင်လေသော် $300 ဒဏ်ရိုက်လေ၏။ 

https://www.straitstimes.com/singapore/environment/man-fined-300-for-shooting-2-rubber-bands-onto-public-road

 

ထိုနှစ် ၂၀၁၉ မေလ ၁၆ ရက်နေ့ကလည်း Woodland တွင် အမျိုးသားနှစ်ယောက် အအေးသောက်ပြီး ဘူးများကို အနီးရှိ ထင်းရူးသေတ္တာပုံးပေါ် တင်ခဲ့မိသဖြင့် တစ်ဦးလျှင် စလုံး ၃၀၀ ဒဏ်ရိုက်ခံရလေသည်။ 

 

၂၀၁၈ ခုနှစ်အတွင်း အမှိုက်ပစ်သူ ၃၉၀၀၀ ကို NEA က ဖမ်းဆီးအရေးယူခဲ့၏။ 

https://www.straitstimes.com/singapore/environment/litterbugs-going-out-of-fashion-as-nea-turns-to-tech-issuing-7000-more-fines

 

အများပြည်သူပိုင်နေရာ၌ အမှိုက်ပစ်ပါက ပထမအကြိမ် S$2000, ဒုတိယအကြိမ် S$4000, တတိယနှင့် နောက်အကြိမ် များအတွက် S$10,000 ထိ ဒဏ်ရိုက်နိုင်၏။ အလုပ်ကြမ်းလည်း ခိုင်းနိုင်၏။

 

ကျွန်ုပ်တို့ စာသွားသင်နေသည့် Ever Safe သင်တန်းကျောင်းက ဂျူကွန်းတွင်ရှိ၏။ ထိုနေရာက Ever Safe တွင် သင်တန်းပေါင်းများစွာကို လူမျိုးပေါင်းများစွာတို့ လာတက်၏။ များသောအားဖြင့် အလုပ်သမားများ ဖြစ်၏။

 

ဆေးလိပ်သောက်တတ်သူများက ကျောင်းရှေ့ သရက်ပင်အောက်တွင် ဆေးလိပ်သောက်ကြ၏။ တချို့က ပလက်ဖောင်း ၌ထိုင်လျက်၊ တချို့က ဝင်းအပြင်ဘက် ရေမြောင်းလက်တန်းများကို မှီလျက် ဆေးလိပ်သောက်ကြ၏။ 

 

NEA officer ကလည်း လူဗားခင်ဗျာ။

ဗမာပြည်က မော်တော်ပီကယ်တွေဆီမှာ သင်တန်း ၃ နှစ်လောက် သွားတက်ထားသလား အောက်မေ့ရ။

ဘယ်သူ့ကို ဘယ်နားဖမ်းရမလဲဆိုတာ အင်မတန် အကင်းပါးလေ၏။ 

သူတို့က ဟိုနားသည်နား မယောင်မလည်၊ ဟိုသွားတော့မလို ဒီသွားတော့မလို လျှောက်နေ၏။ ရင်ဘတ်မှာ ဟိုအပြားကြီး ချိတ်မထားသဖြင့် သူတို့ကို NEA officer မှန်း ဘယ်သူမှ မသိနိုင်။ အနို့ ထလိန်နင်စင်တာဆိုတော့ လူပေါင်းစုံ လာကြသကိုးစ်။

 

ဆိုတော့ တီးဘရိတ်နားခိုက် အပြင် ဆေးလိပ်ထွက်ရှူ (ဆေးလိပ်ငွေ့ကို ရှူတာပဲဖြစ်မပေါ့ဗျာ။ ဘယ့်နှာလုပ် သောက်မတုံး။ အဟက်စ်) ကြ၏။ 

 

ထိုနံရောအခါတွင် ကတွတ်ပေါက်က ဗျိုင်းစောင့်သလို စောင့်နေသည့် ကိုNEA officer က excuse me ဆိုပြီး ပြုံးဖြဲဖြဲနှင့် အနားကပ်လာ၊ ကပ်ကလေးပြလျက် ဘောင်ချာလေး ဆုတ်ပေးလေ၏။ 

$500

အောင်မငီး၊ တေဗျဇီ။

 

ခုမှ ရှင်ဂပူရောက်ခါစ။ အလုပ်ဆိုလို့ တစ်ရက်ကမှ မလုပ်ရသေး။

ပိုက်ဆံဆိုလို့ တစ်ပြားမှ မဝင်သေးမီ အစိုးရကို $500 ကွန်ထရီဘျူ့စ်လိုက်ရလေ၏။ 

အမျှ အမျှ အမျှ ယူတော်မူကြပါ။

ဆာဒူး၊ ဆာဒူး၊ ဆာဒူး

(မြန်မာပြည်မှာတုံးက သာဓု၊ သာဓု လုပ်နေပြီး စင်ကာပူရောက်မှ ဆာဒူး ဆာဒူး လုပ်နေတဲ့လူတွေကို သောက်မြင်ကပ်ချက်တော့။ ငှက်ပျောမှန်းမသိ၊ ချေးမှန်းမသိဆိုတာ သူတို့ကို ပြောတာ။ အဟိ)

 

အဲလေ အလှမ်းမတော် $200။ Orchard မှာ ဆေးလိပ်သောက်တဲ့နေရာကနေ ခြေတစ်လှမ်းကျွံမိလို့ $200 ဒဏ်ရိုက်ခံရတဲ့ သူမျိုးလည်း ရှိပါသေး။ 

https://www.straitstimes.com/singapore/man-claims-he-was-fined-200-despite-having-one-foot-outside-smoking-area-nea-says-he-was

 

ဖိုင်းများဖြင့် ပြည့်နှက်နေသည့် စလုံးတွင် အသင်တို့သည် “အပစ်မတော် ၃၀၀” မဖြစ်ရလေအောင် သတိပြုဆင်ခြင်းကာ နေထိုင်ကြပါ ဆိုသည့်အကြောင်း။

 

လူအချင်းချင်း ဖိုင်းရိုက်ခြင်း ကင်းဝေးကြပါစေ။ (ဟုတ်ပေါင်)

 

အေးငြိမ်း

၁၅ အောက်တိုဘာလ၊ ၂၀၂၃