ဘုန်းမောင့်တစ်ယောက်ထဲရယ်

ကျွန်ုပ် ဗန်းမော်တင်အောင် ၏ “ဘုန်းမောင့်တစ်ယောက်ထဲရယ်” ကို ဖတ်ဖို့ ရှာဖွေကြည့်သည့်အခါ -

Myanmar ebook library ၌ epub အနေနှင့် တင်ထားတာတွေ့ရ၏။ အဖုံးတွင် စိတ်ကူးချိုချို အနုပညာ၊ ဆဋ္ဌမအကြိမ် ဟု ဖော်ပြထား၏။

https://www.mm-lib.com/book/200

 ဖတ်ကြည့်တော့ အရင်ဖတ်ဖူးထားတာနှင့် မတူသည်ကို သတိပြုမိ၏။ ၎င်းတို့က စာကိုပြန်ရိုက်ပြီး တင်ထားသည်ဖြစ်ရာ ဤစာသားများမှာ စိတ်ကူးချိုချိုကထုတ်ထားသည့် စာအုပ်ပါ စာသားများအတိုင်း ဟုတ်သလား မဟုတ်ဘူးလား ဆိုသည် ကိုတော့ စိတ်ကူးချိုချိုက စာအုပ်ကို မဖတ်ဖူး၍ ကျွန်ုပ်မသိပါ။ 

 

သို့နှင့် ထပ်ရှာကြည့်တော့ mmteashop က စာရိုက်ကာ pdf လုပ်ထားတာတစ်ခု သွားတွေ့ပြန်၏။ သူလည်း မထူးပါ။ စာများမှာ epub က စာသားများအတိုင်း ဖြစ်၏။ mmteashop စာအုပ်မျက်နှာဖုံးတွင်မူ “ဘုန်းမောင်တစ်ယောက်ထဲ ရယ်” ဟု ရေးထားလေရာ အတော်ဆိုးပါသည်။ “ဘုန်းမောင့်တစ်ယောက်တည်းရယ်” နှင့် “ဘုန်းမောင်တစ်ယောက်ထဲ ရယ်” အဓိပ္ပာယ် အတော်ကွာ၏။ ဤကဲ့သို့ ပြီးစလွယ်လုပ်သည့် အလုပ်မျိုးကို ကျွန်ုပ် နည်းနည်းမှ မနှစ်သက်ပါ။

https://zarmanee.files.wordpress.com/2011/07/e18098e180afe18094e180b9e180b8e180b1e18099e180ace18084e180b9e18090e18085e180b9e180b1e1809ae180ace18080e180b9e18091e180b2e1809be1809a.pdf

 

ထိုစာနှစ်အုပ်ကိုဖတ်ပြီး ကျွန်ုပ် မကျေနပ်နိုင်ပါ။ အဘယ်ကြောင့်ဆိုသော် “ဘုန်းမောင့်တစ်ယောက်ထဲရယ်” ထဲက စာသားများကို ကျွန်ုပ် မှတ်မိနေသဖြင့် မူရင်းစာအုပ်ကော်ပီကို ထပ်ရှာပြန်ပါ၏။ ထိုအခါ အောက်ပါ FB link တွင် စာအုပ်ကို scan လုပ်ထားသည့် pdf file တစ်ခုကို ကျေးဇူးတင်စွာ ရပြန်ပါ၏။ ထိုစာအုပ်မှာ ၂၀၁၂၊ နိုဝင်ဘာလ၊ လင်းယုန်စာပေက ထုတ်ထားသည့် စာအုပ်ကို scan ဆွဲထားတာ ဖြစ်၏။

https://m.facebook.com/familybooks53/posts/3194278430794084/

 အထက်တွင်ဖော်ပြခဲ့သည့် epub စာအုပ်တွင်ရော၊ mmteashop စာအုပ်တွင်ပါ အမှာစာများ တစ်ခုမှ ထည့်မထား။ လင်းယုန်စာပေကထုတ်သည့် စာအုပ်ကို scan ဆွဲထားသည့် pdf တွင်မူ အမှာစာအားလုံးပါ၏။

 

ကျွန်ုပ်မူ “ဘုန်းမောင့်တစ်ယောက်တည်း” ကို တစ်မျိုးသာဖတ်ဖူးပါ၏။ ယခု epub နှင့် mmteashop ပါ စာသားများကိုမူ ယခုမှ တအံ့တဩဖတ်ဖူးရတာ ဖြစ်ပါ၏။ 

 

နောက်တစ်ခုမှာ အကယ်၍သာ အသင်တို့သည် ဗန်းမော်တင်အောင်၏ စာအုပ်များကို ဖတ်ဖူးသူဖြစ်ပါက ၎င်း၏ အရေးအသားကို သတိပြုမိပါလိမ့်မည်။ အောက်တွင် ဗန်းမော်တင်အောင်၏ အရေးအသားအနည်းငယ်ကို ပြထားပါ၏။

 

“အင်မတန်ရင်းနှီးသော မိတ်ဆွေချင်းမို့သာပဲ သူသည် ကိုဘုန်းနိုင်ကို ယခုကဲ့သို့ လာရောက် ကြည့်ရှုကာ အားပေးခြင်း ဖြစ်လေသည်။”

“သူ့ရောဂါကိုလည်း ကိုဘုန်းနိုင်သည် ကောင်းစွာပဲ သိပါသည်။”

“သူသည် စိတ်ချုံးလူချုံးဖြစ်ကာ ဗုန်းဗုန်းကြီး လဲကျသွားခြင်းပဲ ဖြစ်လေသည်။”

“ဒါပေမဲ့တော့ကာ ဗမာပြည်က တက္ကသိုလ်ကျောင်းစရိတ်သည် အင်မတန်ပဲ ဈေးကြီးလှပါဘိသည်။”

 

epub နှင့် mmteashop မှ စာအုပ်များတွင် ဗန်းမော်တင်အောင့် ရေးဟန်များကို ကျွန်ုပ် မတွေ့မိပါ။ နောက်မှ သူ့ အရေးအသားကို သူမကြိုက်၍ ပြန်ပြင်ရေးထားတာ ဆိုလျှင်တော့လည်း မပြောတတ်ပါ။ 

 

လွန်ခဲ့သော ၁၀ နှစ်ခန့်က ကျွန်ုပ် ဆရာကြီးရွှေဥဒေါင်း၏ ‘တစ်သက်တာမှတ်တမ်းနှင့် အတွေးအခေါ်များ’ စာအုပ်ကို အင်တာနက်မှ download လုပ်ခါ ဖတ်ခဲ့ဖူးပါ၏။ စာရိုက်သည့်အဖွဲ့က Myanmar Cupid Forum ထင်ပါသည်။​ မေ့နေပြီ။ ထိုစာအုပ်ကိုလည်း ကွန်ပြူတာစာစီထားရာ စာရိုက်သူ၏ အမှားအယွင်း အကျအပေါက် များစွာတွေ့ရသဖြင့် အတော်လေး စိတ်မသက်မသာ ဖြစ်ခဲ့ဖူးပါ၏။ 

 

ထိုသို့ဆိုလိုက်သဖြင့် ထိုအမှားများကြောင့် ထိုစာများကို ကျွန်ုပ် နားမလည်တော့ပြီလားဟု အသင်တို့ မေးစရာရှိပါ၏။ နားတော့လည်ပါ၏။ ပမာပြရလျှင် အသင်တို့သည် အင်မတန် အရသာရှိလှသော ဒံပေါက်ထမင်းကို စားနေစဉ် မကြာခဏ ခဲ ကိုက်မိပါက အသင်တို့ ဘယ်လိုနေမည်နည်း။ ယခုလည်း အဲသလိုပဲ ဖြစ်ပါ၏။

 

ထိုစာအုပ်များကို ကွန်ပြူတာစာပြန်စီသူများသည် အဘယ်ရည်ရွယ်ချက်နှင့် စာပြန်စီကြသည်ကို ကျွန်ုပ် မသိပါ။ ကျွန်ုပ် သဘောကို ပြောရပါလျှင် ထိုစာအုပ်များကို ဖြန့်ဝေလိုပါကလည်း စာတစ်အုပ်လုံးကို scan ဆွဲလိုက်တာက အချိန်ကုန် လည်း သက်သာ၏။ လူလည်း သက်သာ၏။ ကုန်ကျစရိတ်လည်း ပိုနည်း၏။ 

 

စာအုပ်မျှဝေသူများကို ကျေးဇူးတင်ချင်ပါသည်။

သို့သော် သေသေသပ်သပ်၊ သပ်သပ်ရပ်ရပ်၊ အမှားအယွင်းကင်းကင်းကလေး ဖတ်ရလျှင် အပြည့်အဝ ကျေးဇူးတင်ရမည် ဖြစ်ပါ၏။

ယခုမူ ကျေးဇူးတင်သည့်တိုင် အောင့်သက်သက်နှင့် တင်ရတာဖြစ်၏။

 

အသင်တို့သည် မည်သည့်ပုံစံနှင့် ကျေးဇူးတင်ခံရတာကို အလိုရှိပါသနည်း။

ဤသည်မှာ အသင်တို့ပေါ်သာ မူတည်ပါသည်။

 

ကျေးဇူးတင်ပါသည်။

 

အေးငြိမ်း

၂၁ အောက်တိုဘာလ၊ ၂၀၂၃