Safety အရေးကြီးသည် ဆိုခြင်း အကြောင်း

Safety သည် အမှန်တကယ်ပင် ကျွန်ုပ်တို့ဘဝအတွက် အရေးကြီးလှ၏။

(အစိုးရဌာနများ အပါအဝင် မြန်မာတစ်နိုင်ငံလုံးက Safety ကို လုံခြုံရေးဟု ဘာသာပြန်ခြင်းကိုမူ ကျွန်ုပ် အလွန် နားခါးလှ၊ သောက်မြင်ကပ်လှ၊ မုန်းလှကြောင်း ဤနေရာကနေ ကြေငြာပါရစေခင်ဗျား။)

 

No job is so important that it can’t be done safely. ဟူသော စကားသည်ရှိ၏။

 

မြန်မာလို -

 

“အန္တရာယ်ကင်းအောင် မလုပ်နိုင်သရွေ့ကာလပတ်လုံး ဘယ်အလုပ်ကမှ သေလောင်းပျောက်ဝ အရေးကြီးတယ်ဆိုတာ မရှိ။” 

 

- ဟု ဖြစ်၏။ 

 

(၁) လုပ်ငန်းခွင်၌ သေခြင်းသည် ကိုယ်လော်မာခြင်းကြောင့် ဖြစ်၏။

 

စင်ကာပူ၌ ၂၀၂၃ ခုနှစ် ဇန္နဝါရီလ ၁၂ ရက်နေ့က ဘဒုတ်ကွန်ဒို ၄ လွှာမှနေ၍ အသက် (၃၇) နှစ်ရှိ မြန်မာအလုပ်သမား တစ်ဦး ပြုတ်ကျသေဆုံးမှု ဖြစ်ခဲ့၏။ 

 

https://www.channelnewsasia.com/singapore/workplace-death-fatality-myanmar-worker-dies-fall-four-storeys-bedok-condominium-painting-3206166

 

၎င်းက ဂွန်ဒိုလာကို အသုံးပြုလျက် ဆေးသုတ်နေခဲ့ရာ မမီသည့်နေရာကို ဆေးသုတ်ရန် ဂွန်ဒိုလာမှ အဆောက်အဦပေါ် သို့ တက်။​ နံရံနိမ့် (parapet wall) ကို ကျော်ခွလျက် ၃ ထပ်မှ ၄ ထပ်သို့တက်။ ၄ ထပ်ရှိ အကာအရံမရှိသော ကြမ်းခင်း အစွန်းမှနေ၍ ပြုတ်ကျသေဆုံးခြင်း ဖြစ်၏။ (WSC Council ကပုံကို ပူးတွဲဖော်ပြထားပါသည်။)

ဂွန်ဒိုလာကို အသုံးပြုလျှင် - 

(၁) ဂွန်ဒိုလာထဲမှာပဲ နေရမည်။ 

(၂) ကိုယ်သိုင်းကြိုးကို အသက်ကယ်ကြိုးတွင် အမြဲချိတ်ထားရမည်။ 

 

သေဆုံးသူသည် - 

(၁) ဂွန်ဒိုလာထဲမှ မထွက်ရဆိုသည့် စည်းကမ်းကို ချိုးဖောက်သည်။ 

(၂) ကိုယ်သိုင်းကြိုးကို အသက်ကယ်ကြိုးတွင် အမြဲချိတ်ထားရမည် ဟူသည့် စည်းကမ်းကို ချိုးဖောက်သည်။

 

စည်းကမ်းကိုချိုးဖောက်တော့ ဘာဖြစ်သတုံး။

သေသပေါ့။

 

မတော်တဆမှု အများစုမှာ အခြားသူကြောင့်ဖြစ်တာမဟုတ်။ မိမိကြောင့် ဖြစ်တာဖြစ်၏။ ကိုယ်လော်မာလို့ ကိုယ်သေသည်။ ဘယ်သူမှ​ တွန်းချတာမဟုတ်။ သူ့ကို အပြင်ထွက်လုပ်ပါလို့ ဘယ်သူကမှ ခိုင်းတာမဟုတ်။ သူအပြင်ထွက်လုပ်လို့ အလုပ်ပိုပြီးသွားတော့လည်း သူဌေးက သူ့ကို တစ်လစာ အပိုဆောင်းပေးမှာ မဟုတ်။ သူ ဂွန်ဒိုလာ အပြင်ထွက်လုပ်လို့ အလုပ်ပြီးသွားလျှင်လည်း ဘယ်သူကမှ ချီးမွမ်းထောပနာ ပြုနေမှာမဟုတ်။

 

အကယ်၍ ဆေးသုတ်ဘို့ လက်လှမ်းမမီလျှင် ကြီးကြပ်သူကို ပြောရမည်။ သူတို့စီစဉ်ပေးလိမ့်မည်။ ကိုယ့်အထင်နှင့်ကိုယ် ရမ်းမတုတ်ပါနှင့်။ သေတတ်သည်။

 

(၂) လေထုအန္တရာယ်

 

ယခု ၂၀၂၃ ခုနှစ် ဧပြီလက ယုဇနဥယျာဉ်မြို့တော်၌ အိပ်နေစဉ် လူသုံးဦး သေဆုံးခဲ့၏။ ဤသည်မှာ တစ်မိသားစုလုံး လည်း ဖြစ်နိုင်၏။ ဤဖြစ်ရပ်ကို အသေးအဖွဲကိစ္စတစ်ရပ်ဟု မထင်ပါနှင့်။ တစ်အိမ်သားလုံး သေတာဖြစ်၏။ 

ဖြစ်ပုံမှာ ပူသဖြင့် လေအေးပေးစက်ဖွင့် အိပ်၏။ မီးမလာတော့ လေအေးစက်ကို မီးစက်မောင်းပြီး ဖွင့်၏။ အခင်းဖြစ်ပွားရာသို့ ကိုယ်တိုင်ကိုယ်ကျ သွားမကြည့်နိုင်သဖြင့် သေဆုံးရခြင်းအကြောင်းကို အတိအကျ မပြောနိုင်သော် လည်း ကာဘွန်မိုနောက်ဆိုဒ် အဆိပ်သင့် သေဆုံးခြင်းဖြစ်ဖို့ များပါသည်။ သတင်းထဲ၌ “တိုက်ခန်းအတွင်း မီးစက်နှိုး၍” ဟု ရေးထားရာ အကယ်၍သာ မီးစက်ကို တိုက်ခန်းအတွင်း နှိုးထားပြီး အိပ်တာဆိုလျှင် ကာဘွန်မိုနောက်ဆိုဒ်ကြောင့် သေကြတာ သေချာပါသည်။ 

 

ကာဘွန်မိုနောက်ဆိုဒ်သည် မပြည့်ဝသော လောင်ကျွမ်းခြင်း (inplete combustion) ကြောင့် ဖြစ်၏။ အရာဝတ္ထုများကို မီးလောင်သည့်အခါ အရာတိုင်းကို အပြည့်အဝ လောင်ကျွမ်းသွားခြင်း (complete combustion) မဟုတ်။ အချို့အရာ များကို တစိတ်တပိုင်းသာ လောင်၏။ အပြည့်အဝလောင်လျှင် ထွက်လာသည့် မီးခိုးမှာ ကာဘွန်ဒိုင်အောက်ဆိုဒ် (CO₂) ဖြစ်၏။ တစိတ်တပိုင်းလောင်လျှင် ထွက်လာသည့် မီးခိုးမှာ ကာဘွန်မိုနောက်ဆိုဒ် (CO) ဖြစ်၏။

 

မည်သည့်မီးလောင်ခြင်းမှ အပြည့်အဝလောင်ကျွမ်းခြင်း မဟုတ်။ မီးလောင်သည့်အခါတိုင်း၌ တစိတ်တပိုင်း လောင်ကျွမ်းမှု ရောပါနေမြဲဖြစ်၏။ ထို့ကြောင့် မီးခိုးတိုင်း၌ ကာဘွန်မိုနောက်ဆိုဒ်ပါသည်ဟု မှတ်ယူထားကြရမည်။ ထို့ကြောင့် ထင်းမီး၊ ထမင်းချက်သည့်မီး၊ အမှိုက်ရှို့သည့်မီး၊ ကား၊ ရထား၊ ဆိုင်ကယ်၊ မီးစက်စသည့် အင်ဂျင်များ စသည့် မီးခိုးထွက်သည့် နေရာတိုင်း၌ ကာဘွန်မိုနောက်ဆိုဒ် ရှိနေနိုင်၏။

 

ဆိုးသည်မှာ ကာဘွန်မိုနောက်ဆိုဒ်သည် အရောင်မရှိ၊ အနံ့အရသာ မရှိ။ ထို့ကြောင့် ဓာတ်ငွေ့တိုင်းသည့်မီတာ မရှိဘဲ ကာဘွန်မိုနောက်ဆိုဒ်ရှိနေကြောင်း မသိနိုင်။ 

 

လွန်ခဲ့သည့် ၂၀၁၅ ကလည်း တာမွေမြို့နယ် ၁၅၇ လမ်းတွင် လေအေးစက်တပ်ထားသည့် အိမ်ခန်းအတွင်း၌ အိပ်ပျော်နေ စဉ် မိသားစုဝင် ၄ ဦး သေဆုံးခဲ့၏။ 

 

၂၀၁၂ ခုနှစ်က မိတ္ထီလာမြို့နယ်၊ အုံတုံကျေးရွာတွင် အိမ်သာကျင်းဆင်းဆယ်ရာမှ လူ (၅) ဦး တပြိုင်နက် သေခဲ့၏။ ထိုနှစ် နိုဝင်ဘာလက မန္တလေးတိုင်း၊ ငါန်းဇွန်မြို့နယ်၊ ကမ္မကျေးရွာတွင် အိမ်သာကျင်းအတွင်း လူ (၃) ဦး သေခဲ့၏။

 

လေထုအန္တရာယ်တွင် နှစ်မျိုးရှိ၏။

တစ်မျိုးမှာ အောက်ဆီဂျင်ပြတ်ခြင်း ဖြစ်ပြီး နောက်တစ်မျိုးမှာ အဆိပ်ငွေ့များ ရှိနေခြင်း ဖြစ်၏။ 

အောက်ဆီဂျင် အလုံအလောက်မရလျှင်လည်း သေတတ်သည်။

အဆိပ်ငွေ့များကို ရှူမိလျှင်လည်း သေတတ်သည်။

လေထဲ၌ အောက်ဆီဂျင်မည်မျှရှိသည်ကို နှာခေါင်းဖြင့် ရှူရုံမျှနှင့် မသိနိုင်သကဲ့သို့ လေထဲတွင် မည်သည့် အဆိပ်ငွေ့များ ရှိနေသည်ကိုလည်း နှာခေါင်းဖြင့် ရှူကြည့်ရုံမျှဖြင့် မသိနိုင်။ မီတာဖြင့် တိုင်းတာကြည့်မှသာ သိနိုင်၏။

အကယ်၍ ဘာမီတာမှ မရှိဆိုလျှင် အကောင်းဆုံးနည်းလမ်းမှာ လေမှုတ်သွင်းပေးခြင်းဖြစ်၏။ 

လေမှုတ်သွင်းလျှင် လေကောင်းလေသန့်ရ၏။ လေကောင်းလေသန့်ဆိုသည်မှာ အောက်ဆီဂျင်ဖြစ်၏။ လေမှုတ်သွင်း ပေးလိုက်ခြင်းအားဖြင့် မကောင်းသည့် အဆိပ်ငွေ့များကိုပါ မှုတ်ထုတ်ပစ်လိုက်နိုင်၏။

 

 (၃) မသိတာ အခက်ဆုံး

 

များမကြာသေးမီက လားရှိုးတွင် 33kV ဓာတ်အားလိုင်းမှ ဓာတ်ကြိုးကို တက်ဖြတ်ရာ ဓာတ်လိုက်သေကြောင်း ဖတ်ရ၏။ ဤသည်မှာ မရှိတာထက် မသိတာခက်ခြင်းတည်း။ ဗို့အား သုံးသောင်းကျော်ရှိသည့် ဓာတ်ကြိုးကို ကိုင်ဘို့ မဆိုထားဘိ။ အနီးသို့သွားလျင်ပင် ဓာတ်လိုက်သေတတ်သည် ဆိုတာ သိထားပါက ထိုလူသည် ဤမျှအမိုက်ခံကာ ဓာတ်ကြိုးကို တက် ဖြတ်ပါမည်လော။

နောက်ပြီး ရွှေပြည်သာမှာ ဓာတ်တိုင်ပေါ် သတိလစ်နေသည့် EPC ဝန်ထမ်းကို ဝါးလုံးနှင့် ထိုးချရသည် ဆို၏။ ဓာတ်တိုင်ပေါ် ဓာတ်လိုက်သေသည့် မသာများမှာ မနည်းလှ။ သို့တိုင် မည်သူမှလည်း အရေးမစိုက်ကြ။ ဓာတ်လိုက်လျှင် သေတတ်သည်ကို ၎င်းတို့သိ၏။ သို့တိုင် လူကြီးဆိုသူများကလည်း ဓာတ်လိုက်မသေအောင်လုပ်ဖို့ ဂရုစိုက်ဖော်မရ။ အင်ဂျင်၂၀၀ များကလည်း ငါ့အလုပ်မဟုတ်ပါဘူးကွာ ဟု သဘောထားသလား မပြောတတ်။ ဓာတ်တိုင်ပေါ်တက်သူများ ကလည်း အိုကွာ၊ ငါ ဒါမျိုးတက်လုပ်လာတာ အံခွနေပြီ။ ဘာဆန်းသတုံး ဆိုကာ တက်လုပ်သည် ထင်ပါ၏။

လူသေသည့်တိုင် မြန်မာပြည်၌ကား သိပ် အဆန်းတကြယ် လုပ်မနေပါ။

‘ဝေါင်မယ်လေး ကိုဟိုဒင်းရဲ့ - အသေစောလို့ နှမြောလှချည်ရဲ့’ ဟု ဝတ်ကြေတန်းကြေ ခုနစ်အိမ်ကြား အော်ငိုပြလိုက်၊ နောက်ပြီး ဘုန်းကြီးပင့်၊ အမျှ အမျှ အမျှ လုပ်လိုက်လျှင် ကိစ္စပြီးပြီ။

 

နောက်ပြီး ဖွဘုတ်မှာ မိတ်ဆွေတို့ တွေ့လိုက်ပါလိမ့်မည်။

ပင်းတယမြို့နယ်၊ ပွေးလှမြို့၊ ရေဂနိုင်ကျောင်း ထီးတင်ပွဲ ဟူ၏။ ဘုန်းကြီးမှာ ပန်းရထားပေါ်ကနေ ဂျွမ်းထိုးမှောက်ခုံ ဈာန်ပျံပြသည့် ဗီဒီယိုကို တွေ့ရတော့ ကျွန်ုပ်မှာ ဆရာဇော်ဂျီ၏ “သူလည်းလေ လောကီသားပေမို့၊ ကြွားချင်လှ ပေလိမ့်မယ်” ဟူသည့် ကဗျာကို ပြေး သတိရမိသော ဟူသတတ်။

https://www.youtube.com/watch?v=bS7E0xfB24I

ထို့ပြင်လည်း နောက်ဘုန်းကြီးတစ်ပါးက မင်းလောက်တော့ ငါလည်း အပျော့ပေါ့လကွ ဟု အားကျမခံ မြေတူးစက် မြေတူးခွက်ပေါ် တက်လျက် လူအများကို ပိုက်ဆံများ ကြဲပြလိုက်၏။ စူ့ထွက်စူ လူဇွမ်းဂေါင်း ကြီးများပါပေတကား။

EPC က လူများမှာ အလွန် အမြော်အမြင်ကြီးလှပေ၏။ အကယ်၍ EPC ကနေ အလုပ်ပြုတ်သွားလျှင် စားဝတ်နေရေး အတွက် ပူပန်စရာမလို။ ဆပ်ကပ်ပြစားလို့ရအောင် အလုပ်လုပ်ရင်းလေ့ကျင့်၊ ဆပ်ကပ်လေ့ကျင့်ရင်း အလုပ်လုပ်ကြ လေ၏။

သို့သော် ကျွန်ုပ်က အဝေးကနေ ဓာတ်ပုံကြည့်ပြောရတာ ဖြစ်သဖြင့် သိလျက်နှင့် လုပ်တာလား။ မသိလို့ လုပ်တာလား ဆိုတာကို ကံသေကံမ မပြောနိုင်။ သူတို့ကိုယ်တိုင်မှ သိပေလိမ့်မည်။ 

 

(၄) အသက်ကို ပြန်ဝယ်ချင်လို့မရ

 

ဤဒွန္နယာကြီးတွင် အသင်တို့သည် အခြားအရာများကိုသာ ဝယ်ချင်ဝယ်လို့ ရပေမည်။ အသက်ကိုတော့ အမေရိကန် ဒေါ်လာ သန်းပေါင်း ငါးသောင်းလောက် ပေးသည့်တိုင် ပြန်ဝယ်ချင်လို့ မရနိုင်ပါ။ တစ်နည်းအားဖြင့်လည်း အသက် ဆိုတာ ထွက်သွားပြီဆိုလျှင် ဘယ်နည်းနှင့်မှ ပြန်သွင်းလို့ မရတော့ ဆိုသည်ကိုလည်း သတိချပ်စေချင်ပါသည်။

 

ထို့ကြောင့် အသင်တို့သည် အမေမွေးတုံးက ပါလာသည့် အသက်ကလေးကို မည်သည့်နည်းနှင့်မှ ထွက်မသွားစေရန် အထူး ဂရုစိုက်ကြရလိမ့်မည်။

 

အဲလေ အသက်မှသာ မဟုတ်ပါ။ မအေမွေးတုံးက ပါလာသည့် အရာများကို မည်သည်နှင့် အစားထိုးလို့ ရပါသနည်း။ 

သွားကျိုးလျှင် သွားစိုက်လို့ရ၏။ သို့တိုင် မအေမွေးတုံးက ပါလာသည့် သွားကို မမီနိုင်။

ခြေကျိုးလျှင် ခြေတုတပ်နိုင်၏။ သို့သော် ခြေတုသည် မွေးရာပါ ခြေထောက်ကို မီပါမည်လား။

 

ဘုန်းကြီးများသည်လည်း ငါတို့ သင်္ကန်းဝတ်ထားသဖြင့် ဘာမှ မဖြစ်နိုင်ဟု မတွက်ပါနှင့်။ ပြုတ်ကျလျှင်တော့ သေမည်သာဖြစ်ကြောင်း ကျွန်ုပ်က ကောင်းကောင်းကြီး သတိပေးလိုက်ပါ၏။

 

သို့တိုင် အချို့သော အသက်များမှာ မြန်မြန်ထွက်မှ (၇) ရက်သားသမီးတို့ စိတ်ချမ်းသာမှာလည်း ရှိသေး၏။ 

ဤသည်ကို အသင်တို့ သိပါသည်။ ဒဲ့ပြောရလျှင် ဟိုမေဘေး ခွေးအောင်လှိုင်နှင့် ခွေးကောင်စီအပေါင်းတို့၏ အသက်များမှာမူ မြန်မြန် ထွက်လေ၊ ကောင်းလေ ဖြစ်၏။ ထို့ကြောင့် ၎င်းတို့အသက်ကလေးများ အမြန် ထွက်ရအောင် ကျွန်ုပ်တို့ နည်းပေါင်းစုံနှင့် ကြိုးပမ်းကြရမည်။

 

သဗ္ဗေသတ္တာ၊ သတ္တဝါ။ ချမ်းသာ သုခ မြဲပါစေ။

(ဟို ဂန်းမသားတွေ မပါ။)

 

အေးငြိမ်း

၃၁ ဇူလိုင်လ၊ ၂၀၂၃

Stillwater

Mektub

(From Quran 7:157)

 

Acceptance.

Accept your fate.

You just embrace your fate and learn to live in peace with it.

It’s about letting go of all of that shame and guilt that pushes you down and keep you down and makes you feel so powerless.

Powerless and Forgotten.

And that makes living really hard.

 

It doesn’t matter that I am innocent, Dad.

It’s not about justice.

It’s about finding peace.

 

များသောအားဖြင့် ကျွန်ုပ်ကြိုက်သည်မှာ စွန့်စားခန်း၊ ထိုးခန်းကြိတ်ခန်း၊ ဆော်ပလော်တီးခန်းများဖြင့် ပြည့်နှက်နေသည့် ရုပ်ရှင်ကားများ ဖြစ်၏။ 

 

သို့သော် ဟိုတစ်နေ့ကတော့ Stillwater ကို အမှတ်တမဲ့ ကြည့်မိ၏။ ဘာကားမှန်းသိလို့မဟုတ်။ ကျွန်ုပ်ကြိုက်သည့် မင်းသား (Matt Damon) ဖြစ်၍ ကောင်းမည်ထင်လို့ ကြည့်ခဲ့တာဖြစ်၏။

 

အလုပ်ကတဖက်၊ အိမ်ပြန်ရောက်တော့လည်း သောက်တလွဲတွေကြောင့် ရုပ်ရှင်မကြည့်ရ။ 

ဆိုတော့ အားသည့်အချိန်ကလေးများ၌ အပြေးအလွှား ကြည့်ရတာဖြစ်သဖြင့် ၅ ရက်လောက် ကြာ၏။ 

 

မေတ္တာဘွဲ့မဟုတ်သော မေတ္တာဘွဲ့ဇာတ်ကားကောင်း တစ်ခု ဖြစ်၏။ 

ဖခင်တစ်ဦး၏ မေတ္တာကို နက်ရှိုင်းစွာ တွေ့နိုင်ပါမည်။

 

ဇာတ်လမ်းကတော့ . . .

(အဟိ) အရသာပျက်မှာစိုးလို့ မပြောတော့ပါ။

 

Recommended.

 

(မင်းသမီးတွေကလည်း ဆိုးလိုက်ပါတဲ့ ရုပ်၊ ယခွမ်းဒဲ့မှ)

 

အေးငြိမ်း

27/07/2023

လောကပါလတရား (၂) ပါး

ကျွန်ုပ်သည် အလုပ်သမားများအတွက် အန္တရာယ်ကင်းရေးသင်တန်းများ သင်ရာ၌ သက်ဆိုင်ရာအခန်းများတွင် ၎င်းတို့၏ ပညာဗဟုသုတများကို တီးခေါက်ကြည့်လေ့ရှိ၏။ ဤကဲ့သို့ တီးခေါက်ကြည့်ရာ ကြီးကြပ်ရေးမှူးသင်တန်း၌ ကြီးကြပ်ရေးမှူးတစ်ယောက်တွင် ရှိသင့်ရှိထိုက်သည့် ဗဟုသုတ၊ အလုပ်သမားများအတွက် အလုပ်သမားအဆင့် ဗဟုသုတ စသည်တို့ ဖြစ်၏။

 

ဤသို့ မေးစမ်းရာတွင် အတော်များများမှာ ယေဘူယျ သိသင့်သိထိုက်သည့် ဗဟုသုတကလေးများကိုပင် မှန်အောင် မဖြေနိုင်ကြတာကို အံ့ဩဘွယ်ရာ မကောင်းလှစွာ တွေ့ရ၏။​ 

 

AWSHCS (Apply WSH in Construction Site) သင်တန်း ဒုတိယနေ့၌ လက်တွေ့လုပ်ခြင်း၊ စာမေးပွဲဖြေခြင်းတို့ လုပ်ရ ၏။ ပုံမှန်သာ လုပ်သွားပါက သတ်မှတ်ထားသည့်အချိန်ထက် အနည်းဆုံး တစ်နာရီမျှ ပိုနေလေ့ရှိ၏။ ထိုပိုနေသည့် အချိန် များ၌ ကျွန်ုပ်က သင်တန်းသားများနှင့် စကားစနေ ပြောလေ့ရှိ၏။ (စကားစနေဆိုရာ၌ စနေနေ့၌သာ စကားပြောခြင်း မဟုတ် ဆိုသည်ကို မိတ်ဆွေတို့ သဘောပေါက်လိမ့်မည် ထင်ပါ၏။ ဤကား စကားချပ်) များသောအားဖြင့် ပြောသည့် အကြောင်းအရာများမှာ မြန်မာပြည်ကြီး ယခုကဲ့သို့ ဒုက္ခပေါင်းစုံ တွေ့ကြုံနေရသည်မှာ ဟို ခွားသဒေါင်းဇေးအုပ်စုကြောင့် ဖြစ်ကြောင်း၊ ထို့ကြောင့် ၎င်းတို့မသာပေါ်ရေးမှာ တိုင်းသူပြည်သားအားလုံး၏အရေး ဖြစ်ကြောင်းများ ဖြစ်၏။ သည်သို့ပြောရာတွင် မပါမဖြစ်ပါရသူ တစ်ဦးကား ဒေါင်းဇားဂိုဏ်းချုပ် ဆန်းဝင်း ဖြစ်၏။ (Sun = နေ)

 

ကျွန်ုပ်က စင်ကာပူနိုင်ငံအကြောင်း အပြည့်အစုံသိလိုလျှင် ကျွန်ုပ်၏ဘလော့တွင် ရေးထားကြောင်း၊ စာဖတ်ဝါသနာ ပါသူတို့ ဖတ်ကြည့်နိုင်ကြောင်း အစချီလျက် -

 

ကိုင်း - စာဖတ်ဝါသနာပါသူ ဘယ်နှစ်ယောက်ရှိသလဲ၊ လက်ထောင်ကြည့်စမ်းပါအုံး ဆိုတော့ သူ့ငါကြည့်၊ ငါ့သူကြည့်။ တစ်ယောက်မှ လက်ထောင်တာမရှိ။ ဘာစာအုပ်တွေများ ဖတ်ဖူးသလဲဟု တစ်ယောက်ပြီးတစ်ယောက် လိုက်မေးကြည့် တော့ အချစ်ဝတ္ထုအနည်းအပါး ဖတ်ဖူးပါတယ်ဟု ဖြေ၏။ ဝိုး - တယ်ဟုတ်ပါလား။ အဲဒါဆို စာရေးဆရာနာမည်နဲ့ စာအုပ် နာမည်လေး တစ်ခုလောက် ပြောပြပါလားဆိုတော့ အင်း . . . အဲစ် . . မေ့နေပြီ ဆို၏။ တစ်ယောက်ကတော့ စာရေးဆရာ နာမည်နှင့် စာအုပ်နာမည် ပြောပါ၏။ ကျွန်ုပ် တစ်ခါမှ မကြားစဖူး။ သူပြောတာကလည်း ဗလုံးဗထွေး၊ နှစ်ခါသုံးခါ ပြန်မေးတာတောင် နားမလည်။ တစ်ယောက်က အဲဒါ တစ္ဆေသရဲတွေအကြောင်း ရေးထားတာ ဆို၏။

 

Singapore Standard အရ လက်ရမ်းတန်းအမြင့်မှာ အနည်းဆုံး ၁ မီတာရှိရမည်။ ၁ မီတာ ဘယ်လောက်မြင့်သလဲ ဆိုတော့လည်း သိသူရှာမှရှား။ တချို့ကတော့ ၃ ပေဟု ပြော၏။

 

ပြီးခဲ့သည့် အပတ်ကတော့ ကျွန်ုပ်က သူတို့ကို လောကပါလတရား (၂) ပါးအကြောင်း ပြောပြ၏။ 

 

ဟောဒီလောကကြီးကို မပျက်စီးစေရအောင် ထိန်းကျောင်းထားတဲ့ တရား (၂) ပါးရှိတယ်။ အဲသဟာကို လောကပါလ တရား (၂) ပါးလို့ ခေါ်သကွဲ့။ အဲသဟာတွေကတော့ - 

 

၁။ ဟိရီ နှင့်

၂။ ဩတ္တပ္ပ တို့ ဖြစ်သကွဲ့။

 

ကိုင်း - ကိုယ့်လူတို့ ဟိရီနဲ့ ဩတ္တပ္ပဆိုတာ ဘာတုံး။ ဆိုတော့ -

မကောင်းမှုလုပ်ရမှာကို ရှက်တာနဲ့ မကောင်းမှုလုပ်ရမှာကို ကြောက်တာ ဟု တစ်ယောက်က ဖြေ၏။ 

အဲ့လယ် -ဘယ်ဆိုးလို့ဒုံးစ်။

 

ဟုတ်တယ်။

ဟိရီ - ဆိုတာ မကောင်းမှုလုပ်ရမှာကို ရှက်တာ

ဩတ္တပ္ပ - ဆိုတာ မကောင်းမှုလုပ်ရမှာကို ကြောက်တာ

 

အဲဒီတရားနှစ်ပါးမရှိရင် လောကဟာ အလုံးစုံ ပျက်သုဉ်းခြင်းကို ဆိုက်တယ်။

အခု မြန်မာပြည်ကြီး ဘာကြောင့် ဒီလောက် ဒုက္ခသုက္ခတွေ ရောက်နေရသလဲဆိုတော့ -

လူတွေဟာ မကောင်းမှုလုပ်ရမှာကို မရှက်ကြတော့ဘူး။ မကောင်းမှုလုပ်ရင် ဖြစ်လာမယ့် ဆိုးကျိုးတွေကို မကြောက်ကြ တော့ဘူး။

 

လူတွေဟာ မကောင်းမှုလုပ်တာကို အမွန်အမြတ် တန်ဘိုးထားနေကြတယ်။ မကောင်းမှုလုပ်တာကို မှန်တယ်လို့ ထင်နေ ကြတယ်။ မကောင်းမှုလုပ်မှ ဂုဏ်ရှိတယ်။ မကောင်းမှုလုပ်လို့ ပိုက်ဆံများများရတဲ့သူတွေကို အားကျနေကြတယ်။ မကောင်းမှုလုပ်ဖို့အတွက် ဝိုင်းပြီး တွန်းအားပေးကြတယ်။

 

မကောင်းမှုလုပ်တာကို ဘယ်သူကမှ ဝိုင်းပြီး ရှုတ်ချတာ၊ တားမြစ်တာ၊ အရေးယူတာ စတာတွေ မလုပ်ကြဘူး။ 

မကောင်းမှုလုပ်တာကိုပဲ ဝိုင်းပြီး ချီးကျူးနေကြတယ်။ 

 

ဒီကနေ့ခေတ် မြန်မာအသိုင်းအဝိုင်းမှာ ရိုးသားတဲ့သူတွေဟာ ငတုံးတွေ ဖြစ်နေတယ်။ ရိုးရိုးသားသား လုပ်ကိုင်စားတာကို ဂုဏ်ငယ်တယ် ထင်ကြတယ်။ မကောင်းမှုနဲ့ ပိုက်ဆံများများ ရှာနိုင်တာကို အားကျနေကြတယ်။

 

ကလေးတွေဟာလည်း ကိုယ့်ပတ်ဝန်းကျင်မှာ လူကြီးတွေ မကောင်းမှုလုပ်တာကို အမြဲမြင်တွေ့နေရတော့ အတုမြင်၊ အတတ်သင်လာကြတယ်။ အဲဒါဟာ နိုင်ငံ့အနာဂတ်အတွက် အတော်ဆိုးတယ်။ ဘာဖြစ်လို့လဲဆိုတော့ သူတို့ဟာ သိပ် မဝေးတော့တဲ့တချိန်မှာ လူကြီးတွေဖြစ်လာတော့မှာ မို့လို့ပဲ။ 

 

ဆိုတော့ ဘာတွေကို မရှက်ကြ/မကြောက်ကြဘူးလဲ တဲ့။

 

§  ပြန်ဆပ်ပါ့မယ်လို့ ကတိတွေ အထပ်ထပ်ပေး၊ ငွေချေးယူပြီးတော့ ပြန်မဆပ်ပဲနေတာကို မရှက်တာ၊ ရှက်ရ ကောင်းမှန်းလည်း မသိတာ။

§  တန်ရာတန်ကြေးပေးဝယ်ပါလျက် ဝယ်တဲ့သူကို ပစ္စည်းအမှန်အကန်မပေးဘဲ ညာရောင်းတာကို မရှက်တာ။

§  အလေး/တင်းတောင်း အပြည့် ချိန်/ချင်တွယ် မပေးတာ။ ရေထိုးတာ/အလေးခိုးတာ/အတိုင်းအတာတွေ လျှော့ပေးတာကို မရှက်တတ်ကြတာ။

§  အလုပ်အပ်ထားတဲ့သူက သဘောတူထားတဲ့အတိုင်း ပိုက်ဆံအပြည့်ပေးထားပါလျက်ကနဲ့ ကောင်းကောင်း မွန်မွန် လုပ်မပေးဘဲ ဖြစ်ကတတ်ဆန်းလုပ်ပေးလိုက်တာကို မရှက်တာ။

§  သင်တန်းကြေးကို အပြည့်ယူထားပါလျက် ကျကျနန ကောင်းကောင်းမွန်မွန် သင်မပေးတာကို မရှက်တာ။

§  လခအပြည့်ယူထားပါလျက် ကျရာတာဝန်ကို ကျေပွန်အောင် မထမ်းဆောင်တာကို မရှက်တာ။

§  ဘာအကြောင်းပြ/ညာအကြောင်းပြ အကြောင်းအမျိုးမျိုးပြပြီး အလှူခံနေတာ၊ တနည်းအားဖြင့် ညာတာပါတေး နဲ့ ပိုက်ဆံတောင်းနေတာကို မရှက်တာ။ ပေါ်တင်ကြီး သူတောင်းစားအလုပ် လုပ်နေတာကို ရှက်ရကောင်းမှန်း မသိတာ။

§  ဘုရားတည်တာကို အယောင်ပြပြီးတော့ အများသူငါလှူဒါန်းထားတဲ့ အလှူငွေတွေ ဘုံးရမှာကို မရှက်တာ။

§  မောင့်ကျက်သရေခေါင်းပေါင်းကြီးတွေဆောင်း၊ ရွှေရောင်တဝင်းဝင်း တိုက်ပုံကြီးတွေဝတ်၊ ဘာကောင်ကြီး ညာကောင်ကြီးရာထူးတွေယူထားပြီး ကြောင်သူတော် ကြွက်သူခိုးလုပ်။ နိုင်ငံဘဏ္ဍာတွေကို ခိုးဝှက်နေတာကို မရှက်တာ။

§  မဟုတ်မှန်းသိလျက်နဲ့ ဗြောင်ညာ/ဗြောင်လုပ်ရမှာကို မရှက်တာ။

 

-        ပြောရမယ်ဆိုရင်တော့ အများကြီးပဲ။ နောက်ပြီးတော့ ဩတ္တပ္ပတရား။

 

§  သူ့ကို ဒီလိုလုပ်လိုက်ရင် နောင်တချိန်ကျ ငါလဲ အဲသလိုပြန်ခံရမယ်ဆိုတဲ့ ဝဋ်ကြွေးကို မကြောက်တာ

§  ဒီလို မဟုတ်တာလုပ်တဲ့အတွက် ငါဟာ မကောင်းတဲ့ ဘုံဘဝမှာ ခံစားရလိမ့်မယ် ဆိုတာကို မကြောက်တာ

 

အဲသလောက်သာ မကသေးဘူး။

 

ဆယ်တန်းအောင်လက်မှတ်ကြီးကိုင်ထားပြီး ဆယ်တန်းနဲ့ညီမျှတဲ့ အသိပညာ၊ ဗဟုသုတမရှိရင် ‘ငါဟာ ဆယ်တန်းသာ အောင်လာတယ်၊ ဒါလေးတောင်မှ မသိပါလား’ လို့ ကိုယ့်ကိုယ်ကိုယ် ရှက်တတ်ရမယ်။

အင်ဂျင်နီယာဘွဲ့ကြီးရပြီး အင်ဂျင်နီယာနဲ့ပတ်သက်တဲ့ အသိပညာ၊ ဗဟုသုတတွေမရှိရင် ‘ငါဟာ အင်ဂျင်နီယာ ဘွဲ့လက်မှတ်ကြီးသာ ကိုင်ထားတယ်၊ အင်ဂျင်နီယာနဲ့ပတ်သက်တဲ့ အသိပညာ ဗဟုသုတတွေ ငါ့မှာ မရှိပါကလား’ လို့ ကိုယ့်ကိုယ်ကိုယ် ရှက်တတ်ရမယ်။

 

ပညာရေးစနစ် မကောင်းတာ ခင်ဗျားတို့အသိ။ ပညာရေးစနစ်ကြီးကို ကျုပ်တို့ ဘာလုပ်လို့ ရသတုံး။ ဘာမှ လုပ်လို့ မရဘူး။ အဲဒါကြောင့် - 

 

ပညာရေးစနစ်မကောင်းတာကို အပြစ်ပုံချမနေဘဲ ငါတို့ ကိုယ့်ဘာသာကိုယ် ကြိုးစားကြမှပဲ လို့ သဘောပိုက်ကြရမယ်။ ကြိုးစားကြရမယ်။ ကျောင်းမှာ သင်ပေးသမျှနဲ့ မလုံလောက်ဘူးဆို ကိုယ့်ဘာသာ လေ့လာကြရမယ်။ သင်ယူကြရမယ်။ အဲသလို လေ့လာသင်ယူချင်စိတ် ရှိလာအောင်လည်း လူကြီးမိဘ ဆိုသူတွေက ညွှန်ကြားပြသ ပေးကြရမယ်။

 

အခု ခင်ဗျားတို့ စင်ကာပူရောက်လာကြပြီ။ စင်ကာပူဆိုတာ လေ့လာရင် လေ့လာသလောက်၊ ကြိုးစားရင် ကြိုးစား သလောက် တက်လမ်းရှိတဲ့နိုင်ငံ ဖြစ်တယ်။ အဲဒါကြောင့် အလကားမနေပါနဲ့။ လေ့လာပါ။ မှတ်သားပါ။ သင်တန်းတွေ တက်ပါ။ စင်ကာပူလာတာ ပိုက်ဆံတင်မဟုတ်ဘဲ အသိပညာပါ တိုးပွားဘို့ဆိုတာ မမေ့ပါနဲ့။ လေ့လာမှတ်သားခြင်း အားဖြင့် ကိုယ့်အရည်အသွေးကို ကိုယ်ကိုယ်တိုင် မြှင့်တင်ကြရမယ်။

 

ကျွဲကူးရေပါ ရလာမဲ့ အကျိုးအမြတ်ကတော့ မြန်မာပြည်ကို အပြီးပြန်သွားတဲ့အခါမယ် စင်ကာပူမှာ လေ့လာလို့ ရလာတဲ့ အတတ်ပညာတွေကို မြန်မာပြည် တည်ဆောက်ရေးမှာ ပြန်ပြီး အသုံးချနိုင်မယ်။

 

နောက်ဆုံးပြောချင်တာကတော့ -

 

မကောင်းမှု လုပ်ကြတဲ့နေရာမှာ များသောအားဖြင့် ပိုက်ဆံနဲ့ ပတ်သက်နေတယ်။ အဲသဟာကြောင့် -

ငါဟာ ပိုက်ဆံကို ဘယ်တော့မှ မတရားသဖြင့် မရှာဘူး။ 

ငါဟာ သမ္မာအာဇီဝအလုပ်နဲ့ပဲ ပိုက်ဆံရှာမယ်။ 

ငါ့ ကိုယ်စွမ်းကိုယ်စနဲ့၊ ငါ့ရဲ့ ကာယအား၊ ဉာဏအားနဲ့ပဲ ပိုက်ဆံရှာမယ်လို့ ဒီကနေ့ကစ သန္နိဋ္ဌာန် ချလိုက်ပါ။

 

ဒီကနေ့သင်လိုက်တဲ့ သင်တန်းမှာ တခြား ဘာမှ မရချင်နေ။

အခုပြောလိုက်တဲ့ တစ်လုံး ရသွားရင် ကျေနပ်ပါပြီ။

 

အားလုံးကို ကျေးဇူးတင်ပါတယ်။

 

အေးငြိမ်း

၁၈ ဇူလိုင်လ၊ ၂၀၂၃

စိတ်ပျက်စရာကောင်းလိုက်ပါတဲ့ ကောင်တွေရဲ့ အကြောင်း

အတော်စိတ်ပျက်စရာကောင်းတဲ့ကောင်တွေ။

သောက်ဆံသာလိုချင်တာ။

ဘာမှလဲ မသိဘူး။ ဘာမှလဲ မလေ့လာဘူး။ 

လေ့လာချင်စိတ်လဲ မရှိဘူး။ လေ့လာချင်စိတ် မရှိတာ အဆိုးဆုံးပဲ။

မြန်မာစကားမှာ “မရှိတာထက်၊ မသိတာခက်” ဆိုတာရှိတယ်။

မသိတာကို သိအောင်သင်ပေးလို့ရတယ်။ မသိချင်တာကို ဘာမှ လုပ်လို့မရဘူး။

ပြဿနာတက်တော့မှ အောင်မယ်လေး၊​ ဘလေးနဲ့။

 

ခုနက ကောင်လေးတစ်ယောက်လာတယ်။

သူ့ accident report တင်ထားတဲ့အကြောင်း သိချင်လို့ လာမေးတာ။

 

သူ accident ဖြစ်တာကို သူတို့ကုမ္ပဏီက MOM ကို အကြောင်းမကြားဘူး။ သူ့ကို အကျိုးအကြောင်းမေး၊ ကိုယ်ပဲ စာရေးပေးလိုက်ပြီး MOM ကို report လုပ်ခိုင်းထားတာ။

 

အမှန်က လူကိုယ်တိုင်လာစရာတောင် မလိုဘူး။ သူ့ SingPass နဲ့ ဝင်ကြည့်လို့ရတယ်။

ဒါပေမဲ့ SingPass က စလုံးရောက်စက လုပ်ထားတာဆိုတော့ သူ့ password ကို ပြန်ပြောင်းခိုင်းနေတယ်။

Password ကလည်း လွယ်လွယ်နဲ့ ပြောင်းလို့ရတာ မဟုတ်ဘူး။

ကင်မရာရှေ့မှာ လူကိုယ်တိုင် လာထိုင်ပြီး အခွက်ကြီးကို ပြရသေးတာ။

အဲဒါကြောင့် သူ့ကို လာခိုင်းရတာ။

 

ဆိုပါတော့။

သူရောက်တော့ သူ့ Singpass ကို ပြန်ပြောင်းဘို့ ကြိုးစားကြည့်တယ်။ 

 

စင်ကာပူမှာက သူခိုးတွေများတော့ password ကို နှစ်ဆင့်ခံလေ့ရှိတယ်။

2FA လို့ ခေါ်တယ်။ Two-factor Authentification. 

ပထမ password နဲ့ ဝင်ရတယ်။ ဝင်ပြီး နောက်တစ်ဆင့် ဖုန်း message ထဲဝင်လာတဲ့ OTP (One Time Password) နဲ့ ထပ်ဝင်ရတယ်။ အဲဒါကြောင့် ကိုယ့်ဖုန်းဟာ အမြဲ update ဖြစ်နေဘို့ လိုတယ်။

 

Password အသစ်ပြောင်းပြီး သူ့မျက်နှာကြီး ကင်မရာရှေ့ပြလိုက်တော့ သူ့ဖုန်းထဲကို sms OTP ပို့တယ်။ 

Message ရောက်မလာလို့ ဖုန်းနံပတ်ကြည့်လိုက်တော့မှ ဖုန်းက ဟို့အရင် စလုံးရောက်စက ဖုန်းနံပတ်ကြီး ဖြစ်နေတယ်။ 

အဲဒီနံပတ်ကြီးက သေနေတာ ကြာလှပြီတဲ့။ အနို့ ဖုန်းနံပတ်အသစ်ရလာရင် ၅ ရက်အတွင်း update လုပ်ရမယ်လို့ မင်းတို့ကို ငါ သင်တန်းတုံးက မပြောလိုက်ဘူးလား ဆိုတော့ ရီဖြဲဖြဲလုပ်နေတယ်။

 

ကိုယ်က စိတ်က အတော်တိုတတ်တဲ့ကောင် ဆိုတော့ စိတ်တိုလာပြီ။

 

အဲဒါနဲ့ FWMOMCare ကို ဖွင့်ခိုင်းတယ်။ မရှိဘူး။

ဟဲ့ကောင်၊ ဘာတွေလုပ်ရမယ်ဆိုတာကို ငါ သင်တန်းတုံးမှာတုံးက အဲဒါတွေ ဗီဒီယိုဖွင့်ပြပြီး အကုန်လုံးရှင်းပြ ထားတယ်လေကွာ၊ ဘာတစ်ခုမှ​ လုပ်မထားဘူးလား ဆိုတော့လဲ စပ်ဖြဲဖြဲနဲ့။

ကျော့်ဖုန်းက စုတ်နေလို့ အဲဒါတွေ လုပ်လို့မရဘူး . . . ဆိုပါလား။

ကြည့်လိုက်တော့ ဖုန်းထဲမှာ တခြား apps တွေ အပြည့်။

 

ဘာပြောတယ်ကွ၊ ဟေ့ကောင် မင်း ဟောဒီ SingPass တို့၊ SGWorkPass တို့၊ POSB Apps တို့တောင် install လုပ်လို့ ရသေးတာ။ ဘာဖြစ်လို့ FWMOMCare လုပ်လို့ မရရမလဲ၊ ငါ့ကိုပေးဆိုပြီး download လုပ်။ Install လုပ်ပေးလိုက်တယ်။

နောက်ပြီး register လုပ်ဖို့ အချက်အလက်တွေဖြည့်တော့ လိပ်စာပါ ဖြည့်ရတယ်။

မင်း အခုနေတဲ့ နေရပ်လိပ်စာပြော ဆိုတော့ ငမ် - သိပု။

 

သေလိုက်ပါလားကွ။ မင်းတို့အဆောင်မှာနေတဲ့ တစ်ကောင်ကို လှမ်းဖုန်းဆက်မေးဆိုတော့ . . . FB Messenger ကနေ ဆက်တယ်။ ကြားတချက်၊ မကြားတချက်။ Message ကနေ ရိုက်ပို့လိုက်ကွ လို့ အော်လိုက်တယ်။

ပို့လို့မရဘူး တဲ့။

 

ဘာကွ။ ဗီဒီယိုကောတော့ ခေါ်လို့ရတယ်။ မင်းဂျီးဒေါ်ကြောင့် message က ပို့လို့မရရမှာလား ဆိုတော့မှ အဆောင်ထဲ ဝင်တဲ့ pass card ကို ဓာတ်ပုံရိုက်ပို့လိုက်တယ်။ ကတ်ပေါ်မှာလဲ T&C ကလွဲလို့ ဘာမှ မပါဘူး။

စိတ်ပျက်ချက်တော့။

 

ကိုင်း - ကိုယ့်လူ ကိုယ်လုပ်ပေးနိုင်တာကတော့ အဲသလောက်ပဲ။ လမ်းကုန်နေပြီ။ ဘာမှ​ ဆက်လုပ်လို့မရတော့ဘူး။

မင်း MOM ကို သွားပြီး SingPass အတွက် ဖုန်းနံပတ် သွားပြောင်းချေ လို့ပဲ ပြန်လွှတ်လိုက်ရတော့တယ်။

 

အမှန်ဆို ဒီအကြောင်းတွေ SIP သင်တန်းမှာတုံးက အကုန် ကိုယ်ရှင်းပြပြီးသား။

တစ်ယောက်ကမှ သေသေချာချာ နားထောင်တာမရှိဘူး။

မနေ့ကသင်တဲ့အတန်းဆို စုစုပေါင်း ၂၄ ယောက်။

အကုန်လုံး ကင်မရာနဲ့ ဝေးတဲ့ ဘယ်/ညာ အခန်းနံရံတွေရယ်၊ ဟို့နောက်ဘက်က ခုံတန်းတွေရယ်မှာပဲ သွား ထိုင်နေတာ။ ကိုယ်နဲ့နီးတဲ့ ကင်မရာရှေ့မှာ တစ်ယောက်မှ မရှိဘူး။

 

ဒီမှာပြောတဲ့အကြောင်းအရာတွေဟာ အရေးကြီးတယ်။ သေသေချာချာ ဂရုစိုက်နားထောင်ပါလို့ မင်းတို့ကို ပြောပြီးသား။ 

ငါကတော့ ပိုက်ဆံယူထားတဲ့အတွက် အဲဒီပိုက်ဆံနဲ့တန်အောင် အပြည့်ပြောမှာပဲ။ နားထောင်တာ မထောင်တာ မင်းတို့အပိုင်း ဆိုပြီး ပြောလိုက်တယ်။ 

 

တခြားတိုင်းပြည်တွေမှာ စင်ကာပူမှာလို “စင်ကာပူမှာ ဟောသလိုနေရထိုင်ရမယ်၊ ဘယ်လိုစည်းမျဉ်းစည်းကမ်းတွေ ရှိတယ်၊ အလုပ်လုပ်နေတဲ့ သူတွေအနေနဲ့ ကိုယ့်ရပိုင်ခွင့်တွေ ဘာတွေရှိတယ်” စတာတွေကို သင်ပေးတဲ့ သင်တန်းတွေ ရှိပါသလား။

ရော့ဟဲ့၊ ယူဟဲ့ ပေးနေတာတောင် မယူချင်ဘူးဆိုတော့လဲ မင်းတို့ သဘောပဲပေါ့ကွာ။

နောက် ကိုယ့်ဆီလာ အကူအညီ မတောင်းပါနဲ့။

တစ်ပြားမရ နှစ်ပြားမရ။ ဘယ်ခွေးမသားကိုမှ အကူအညီ မပေးတော့ဘူး။

 

မကြိုက်တဲ့လူ ဆဲသာသွားပေရော့။

 

အေးငြိမ်း

၇ ဇူလိုင်၊ ၂၀၂၃