စဉ်ဆက်မပြတ် တိုးတက်ရေး သို့

(၁) လူသည် အမှားနှင့် မကင်းနိုင်

အခါတစ်ပါးသော် မြတ်စွာဘုရား၏ လက်ယာရံ အဂ္ဂသာဝကကြီး ဖြစ်တော်မူသော အရှင်သာရိပုတ္တရာကို ရှင်သာမဏေငယ်လေး တစ်ပါးက သင်္ကန်းရုံတာ မညီသည့်အကြောင်း ထောက်ပြ ပြောဆိုလေ၏။

ထိုအခါ ရှင်သာရိပုတ္တရာကိုယ်တော်မြတ်ကြီးသည် သာမဏေငယ်ကလေး၏ စကားကို ကောင်းစွာနာယူလျက် သင်္ကန်းကို ပြင်ရုံလေ၏။ သင်္ကန်းကို ပြင်ရုံသည်သာ မဟုတ်သေး။ သင်္ကန်းကို ပြင်ရုံပြီးသည့်အခါ သာမဏေငယ်ကလေး ရှေ့သို့သွားကာ ညီပါပြီလား ငါ့ရှင်ဟု ရိုသေစွာလျှောက်ထားလျှက် သာမဏေငယ်ကလေးက ညီပါပြီဆိုမှ လိုရာခရီးကို ဆက်လေ၏။

ရှင်သာရိပုတ္တရာဆိုသည်မှာ ဘုရားရှင်သာသနာ၌ ဘုရားရှင်ပြီးလျှင် ဉာဏ်ပညာအကြီးမားဆုံး ပုဂ္ဂိုလ်ကြီး ဖြစ်၏။ ထိုကဲ့သို့သော ပုဂ္ဂိုလ်ကြီးပင်လျှင် မိမိအမှားကို ထောက်ပြလာသော သာမဏေငယ်ကလေးအား မင်းဘာကောင်လဲ၊ ငါဘာကောင်လဲ မလုပ်။ မိမိအမှားကို ကောင်းစွာနာခံကာ ပြင်ဆင်လေ၏။

ဤသည့်အဖြစ်အပျက်ကလေးကို ကျွန်ုပ်တို့ လွန်စွာ နမူနာယူစရာ ကောင်းလှ၏။

ISO Standard ဖြစ်သော ISO 45001 သည်လည်း PDCA Cycle ကို အခြေခံ၏။ ဤ cycle ၏ အခြေခံမှာ မိမိအမှားကို ရှာဖွေကာ ပြန်လည်ပြင်ဆင်ခြင်းဖြင့် စဉ်ဆက်မပြတ် တိုးတက်မှုကို ရစေရန် ဖြစ်၏။

လူသည် အမှားနှင့်မကင်းနိုင်။ တစ်ခုမဟုတ်တစ်ခု မှားနိုင်သည်သာ ဖြစ်၏။ အကယ်၍ တစ်စုံတစ်ယောက်က  မိမိအမှားကို ထောက်ပြပြောဆိုလာသည်ဖြစ်အံ့။ ထိုသူကို ရန်လိုစရာ၊ အမုန်းပွားစရာ၊ ဒေါသ ဖြစ်စရာမလို။ အကယ်စင်စစ် ကျေးဇူးပင် တင်ရဦးမည်ဖြစ်၏။ မိမိအမှားကိုသိပြီး ပြင်နိုင်လျှင် အမှန်ကို ရောက်နိုင်လေသည်။ အမှန်ကိုရောက်မှ တိုးတက်မည်။

အမှားကို ထောက်ပြမည့်သူ မရှိဘဲ ဟုတ်ပါ့ဘုရား၊ မှန်ပါ့ဘုရား၊ အားလုံးကောင်းပါသည်ဘုရားဟု ဝိုင်းညာနေကြမည်ဆိုလျှင် တစ်သက်လုံး အမှားကြီးကို အမှန်ထင်နေကာ ရေစုန်မျောဘွယ်ရာ၊ ဇောက်ထိုးမိုးမျှော် ကျသွားဘွယ်ရာ ရှိလေသည်။

(၂) WSH ဂျာနယ်

WSH ဂျာနယ်ကို ၂၀၁၇ ခုနှစ် ဒီဇင်ဘာလက စတင်ထုတ်ဝေခဲ့သည်ဖြစ်ရာ ယခုဆိုလျှင် ၂ နှစ်ခွဲရှိပြီဖြစ်၏။ ဂျာနယ်ထုတ်ဝေရခြင်း၏ အဓိကရည်ရွယ်ချက်မှာ မြန်မာပြည်သား လူအများတို့ကို အန္တရာယ်ကင်းရေးနှင့် ပတ်သက်၍ ဗဟုသုတများ ရစေလိုခြင်းဖြစ်၏။ 

အမှန်တကယ်ဆိုရပါမူ မြန်မာနိုင်ငံတွင် လုပ်ငန်းခွင်အန္တရာယ်ကင်းရေးနှင့်ပတ်သက်သည့် စာအုပ်စာတမ်း များမှာ လက်ချိုးရေ၍ ရသည့်အခြေအနေတွင်ပင် ရှိပါသေးသည်။ ဤကြီးမားလှသော ကွက်လပ်ကြီးကို ဖြည့်ဆည်း ဘို့ရန် WSH ဂျာနယ်က ကြိုးပမ်းနေခြင်းဖြစ်ကြောင်း စာဖတ်ပရိသတ်များကို သိစေလိုပါသည်။

ထိုမျှမက ဂျာနယ်ဟူသည် လစဉ်ထွက်နေခြင်းဖြစ်သဖြင့် နောက်ဆုံးရ သတင်းအချက်အလက်များကိုလည်း ဖော်ပြနိုင်သေးသည်ဖြစ်ရာ မြန်မာနိုင်ငံသား စာဖတ်ပရိသတ်များအနေနှင့် ခေတ်နှင့် မျက်ချည်မပြတ်တော့ချေ။ လုပ်ငန်းခွင် အန္တရာယ်ကင်းရေးနှင့် ပတ်သက်၍ မိမိတို့၏ အတွေ့အကြုံဗဟုသုတများကိုလည်း WSH ဂျာနယ်တွင် မျှဝေနိုင်ပါသေး၏။ 

လုပ်ငန်းခွင် အန္တရာယ်ကင်းရေးနယ်ပယ်မှာ လွန်စွာကျယ်ဝန်းလှသည်ဖြစ်ရာ တစ်ဦးတစ်ယောက်တည်းနှင့် နယ်အားလုံးကျွမ်းကျင်ဘို့ရာ မဖြစ်နိုင်။ Specialist ဟူသည် နယ်ပယ်တစ်ခု၌သာ ကျွမ်းကျင်လိမ္မာနိုင်မည်။ နယ်စုံသွားပြီဆိုလျှင် Specialist မဖြစ်နိုင်တော့ချေ။ ထို့ကြောင့် နယ်ပယ်စုံမှ ကျွမ်းကျင်သူများ ရေးသားထားသည့် ဆောင်းပါးများကို WSH ဂျာနယ်မှ ကြိုဆိုပါသည်။

သို့သော် ရေးသားထားသည့်အချက်အလက်များကိုမူ ခိုင်မာသည့် ရင်းမြစ်များမှ ရယူရန်နှင့် ထိုသတင်း အချက်အလက်ကို မည်သည့်နေရာမှ ရယူထားကြောင်း ရည်ညွှန်းစာရင်းကိုလည်း ဆောင်းပါးအဆုံး၌ ထည့်ပေးရန် လိုပါသည်။ သို့မှသာ အကယ်၍ တစ်စုံတစ်ယောက်က မေးလာခဲ့ပါက မည်သည့်စာအုပ်ထဲမှ ရယူထားကြောင်း ပြန်လည် ဖြေရှင်းနိုင်မည်ဖြစ်၏။ ထို့ကြောင့် WSH ဂျာနယ်သို့ ဆောင်းပါးပေးပို့သူအားလုံးကို ဆောင်းပါးအဆုံး၌ ရည်ညွှန်း စာအုပ်စာတမ်းစာရင်း ထည့်ပေးပါရန် မေတ္တာရပ်ခံပါ၏။

မြန်မာနိုင်ငံတွင် ဂျာနယ်တစ်စောင်အနေနှင့် ရပ်တည်ရေးမှာ မည်မျှခက်ခဲကြောင်း ထုတ်ဝေသူများသာ သိပါသည်။ WSH ဂျာနယ်သည်လည်း ဂျာနယ်လေးအသက်ဆက်နေရေးကို မနည်းရုန်းကန်ရပါသည်။ ယခုဆိုလျှင် ထုတ်ဝေစကာလများကထက် စောင်ရေရော၊ စာမျက်နှာကိုပါ လျှော့ချလိုက်ရပါသည်။ အရှုံးများပါက ကြာကြာ ရပ်တည်နိုင်ရန် မလွယ်ပါ။ 

(၃) စဉ်ဆက်မပြတ် တိုးတက်ရေး

ကျွန်ုပ်တို့သည် မိမိတို့သိထားသမျှကို မြန်မာနိုင်ငံသားတို့ အကျိုးစီးပွားအလို့ငှာ WSH ဂျာနယ်မှနေ၍ ပြန်လည် ဝေငှပေးနေခြင်းမျှသာ ဖြစ်ပြီး မည်သူမျှ ပါမောက္ခကြီးများ မဟုတ်ကြပါ။ ကျွန်ုပ်တို့သည် အကောင်းဆုံးဖြစ်အောင် ကြိုးစား ရေးသားကြပါ၏။ သို့တိုင် ကျွန်ုပ်တို့ရေးသားထားသည့် ဆောင်းပါးများထဲတွင် ပမာဒလေခ အမှားများ ပါနိုင် သေးသည်သာ ဖြစ်၏။ 

အကယ်၍ စာဖတ်သူများအနေနှင့် ကျွန်ုပ်တို့ စာများထဲတွင် သံသယရှိစရာများ၊ မှားနေသည်ဟု ယူဆစရာများ ပါလာပါက WSH ဂျာနယ် အယ်ဒီတာအဖွဲ့ (ဖုန်းနံပါတ် - ၀၉ ၈၉၄၁၇ ၄၅၉၀ / ၀၉ ၇၉၀၉၈ ၅၄၆၄၊ email: publication@wshmyanmar.com) ထံသို့လည်းကောင်း၊ WSH ဂျာနယ် ဖေ့စ်ဘုတ်၊ messenger မှ တဆင့် လည်းကောင်း ဆက်သွယ်အကြံပြုနိုင်ကြပါ၏။ 

ဤသို့ပေးပို့ရာတွင် ထုတ်ဝေသည့်လ၊ ခုနှစ် သို့မဟုတ် အတွဲ၊ အမှတ်။ စာရေးဆရာအမည်၊ ဆောင်းပါးနာမည်။ စာမျက်နှာနံပါတ်နှင့်တကွ မှားနေသည့် အကြောင်းအရာ။ အဘယ်ကြောင့်မှားနေသည်။ အမှန်က မည်သည်ဖြစ်၍ မည်သည့်စာအုပ်ထဲတွင် မည်ကဲ့သို့ ရေးသားထားကြောင်း စသဖြင့် အကျိုးအကြောင်း ခိုင်ခိုင်လုံလုံနှင့် တင်ပြလာလျှင် ကျွန်ုပ်တို့က WSH ဂျာနယ်တွင် လေးစားစွာဖြင့် ဖော်ပြပေးသွားမည် ဖြစ်ပါသည်။ ဤနည်းအားဖြင့် ကျွန်ုပ်တို့ ဂျာနယ်လည်း အမှားကင်းစင်ပြီး အရည်အသွေးပိုမိုပြည့်ဝသည့် ဂျာနယ်တစ်ခုဖြစ်လာနိုင်မည် ဖြစ်ပါသည်။

ထိုမျှသာမက ဂျာနယ်ပိုမိုတိုးတက်ကောင်းမွန်လာစေရေးအတွက် အကြံကောင်း၊ ဉာဏ်ကောင်းများလည်း ပေးကြစေလိုပါသည်။ စီးပွားရေးလုပ်ငန်းရှင်များအနေနှင့်လည်း မိမိတို့၏ စီးပွားရေး ကြော်ငြာများ ထည့်ခြင်းဖြင့် WSH ဂျာနယ်ကို ချီးမြှောက်စေလိုပါသည်။ 

ကျေးဇူးတင်ပါသည်။

Sky Scraper နှင့် သာထီဖိုးဖာထီ

သောက်မြင် ကပ်လွန်းမက ကပ်လာသောကြောင့် အသားကုန် ဆော်ပလော်တီးပါမည်။

 

(၁) ငါမလုပ်ရဲတာ နှင့် ပတ္တမြားဂူတို့ အကြောင်း

 

အရေးကြီးသည့် စာတမ်းတစ်စောင် ဘာသာပြန်ပေးနေရသောကြောင့် ကျွန်ုပ် အလွန်အလုပ်ရှုပ်လျက် ရှိပါ၏။ စာတမ်း ကလည်း အမေရိကန်က ဥပဒေဖြစ်၍ မနည်းနားလည်အောင် ကြိုးစားနေရ၏။ ဝါကျတစ်ခုကို စာကြောင်း ဆယ်ကြောင်း လောက်ရှိ၏။ ထို့ကြောင့် ဖေ့စ်ဘုတ်ကို တတ်နိုင်သမျှ မေ့ပစ်နိုင်အောင် ကြိုးစားပါ၏။ သို့သော် အီးမေးတွင် ဘာတဲ့ ဖီးမာရှယ်ဆိုလား ပုဂ္ဂိုလ်က သာထီဖိုးဖာထီ ဆိုလားကို ဘာအကြောင်းပြချက်မှ မရှိဘဲ ခေါ်တွေ့မည်ဆိုသည့်သတင်း ဖတ်ရတော့ အင်း၊ ယုတ်ကွက်တွေတော့ လာဦးမည် ဆိုကာ သည်ကနေ့မနက် ဖေ့စ်ဘုတ် ဖွင့်ကြည့်မိ၏။

 

ဘာတဲ့ . . .

. . . . မလုပ်ရဲဒါ ဘာမှ မရှိဘူး။

အောင်မငီး၊ လန့်ထှာတော်။ (ကလူ ကလူ)

(သူ့ကြုံးဝါးပုံကလည်း ရုပ်ရှင်ထဲက လူမိုက်တွေအတိုင်းပဲနော်၊ စဒါဘာ၊ စဒါဘာ)

 

. . . . မလုပ်ရဲတာ ဘာမှ မရှိဘူး။

ယုံပါတယ်ခင်ဗျာ။

လူအုပ်ကြီးထဲလဲ သေနတ်နဲ့ တည့်တည့်ပစ်ရဲပါတယ်။

ဘုန်းကြီးတွေကိုလည်း ဝါးရင်းတုတ်နဲ့ ဆော်ရဲပါတယ်။

ဘုရားတွေတောင်မှ လက်ကိုချိုးရဲပါတယ်။

လယ်မြေတွေကိုလည်း ငါ့မြေဆိုပြီး အတင်းသိမ်းရဲပါတယ်။

ဧရာဝတီမြစ်ကြီးကိုလည်း စိနတို့ဆီ ရောင်းစားရဲပါတယ်။

မြန်မာပြည်ကြီးကိုခါးလည်က ဖြတ်ပြီး ဓာတ်ငွေ့ပိုက်လိုင်းကြီးလည်း သွယ်တန်းဘို့ ခွင့်ပေးရဲပါတယ်။

မြန်မာပြည်မှာရှိသမျှ သစ်တောတွေကိုလည်း ပြောင်အောင် ခုတ်ရဲပါတယ်။

မြန်မာပြည်က ထွက်သမျှ သယံဇာတတွေကိုလည်း အကုန်ဖော်ပြီး ရောင်းစားရဲပါတယ်။

မြန်မာပြည်မှာရှိသမျှ စီးပွားရေးလုပ်ငန်းတွေကိုလည်း လက်ဝါးကြီးအုပ်ပြီး တစ်ဆွေလုံး တစ်မျိုးလုံး ဝအောင် ကျွေးထားရဲပါတယ်။

လူကြီးမင်း မလုပ်ရဲတာ ဘာမှမရှိပါဘူး။

(အဲ . . ဟိုလေ၊ လက်နက်ကိုင်အဖွဲ့တို့၊ ဓာတ်ခဲတို့အကြောင်းတော့ မပြောကြေးနော် . . . နော်လို့)

 

ဟို - နေရင်းထိုင်ရင်း အကုသိုလ်တွေ အတုံးလိုက် အတစ်လိုက် ဝင်နေတဲ့ ငနဲတစ်ယောက်ရှိသေးတယ်။

ဘာတဲ့ . . . ပြည်သူ့အတိုင်ပင်ခံ ပုဂ္ဂိုလ် ဆိုပါလား။

ဘူးထွားဟားဟားဟား။

နေပါအုံး ဘယ်ပြည်သူတွေကများ ဘယ်တုံးက သည်ဘွဲ့ကြီးကို အပ်နှင်းလိုက်ပါလိမ့်။

သာထီဖိုးဖာထီ က ဘွဲ့ပေးထားတာ ဆိုရင်တော့လည်း ပြောစရာမရှိဘူးပေါ့နော်။

နိုင်ငံတော်အတိုင်ပင်ခံ ပုဂ္ဂိုလ် ဆိုတဲ့ရာထူးကို အားကျမယ်ဆိုလည်း ကျစရာဘဲပေါ့နော်။

(ရာထူးထွင်ချင်လဲ ကွကိုယ် ထွင်ပါလား။ ယောက်ျားကြီးတန်မဲ့ ထမီရေသီနားကပ်လိုက်ပြီး တု တာ $$ရှက်ကလည်း နည်းနည်းမှ မရှိဘူးနော်။)

ဒါပေမယ့် တန်ရာတန်ရာလုပ်ပါကွယ်။

မတန်မရာလုပ်ရင် ချီးအန်သေတတ်တယ်ကွဲ့ ကောင်လေးရဲ့။

ခေါင်းသာ ဖြူနေတယ်၊ ခုထိ မက်ကျူးဝါးက မဖြစ်သေးဘူး။ သနားလိုက်တာ။

နေ့ရှိသရွေ့ သူတစ်ပါးကို စောင်းမြောင်းဆဲဆို၊ အပြစ်ပြော၊ FB live တွေလွှင့်။

အောင်မယ် တရားတောင် စွဲမယ်ဆိုပါလား။

ဖျား . . . ဖျား . . . ရင်တွေပန်းတွေ တုန်ထှာ။ (ရင်ကတော့ ဟုတ်ပါရဲ့။ မဆီမဆိုင် ဘာဖြစ်လို့ ပန်းက တုန်မှန်းမသိ။)

အဲလေ သူဆဲမယ်ဆိုလည်း ဆဲချင်စရာကိုး ခင်ဗျာ။

အခု ပြည်သူ့အစိုးရတက်လာတော့ အရင်ကလို သူလုပ်ချင်တာတွေကို ရော့၊ အင့် ဆိုပြီး ပိုက်ဆံပေး လုပ်လို့မှ မရတော့ဘဲကိုး။ ဘယ်လောက်တောင် မကျေနိုင်၊ မချမ်းနိုင်တွေ ဖြစ်နေလိုက်မလဲနော်။

ကျိတ်မနိုင် ခဲမရ ဆိုတဲ့စကားလုံးကို သူ့ဘို့ထွင်ခဲ့တာ ထင်ပါရဲ့။

ည ည ရော ကောင်းကောင်းမှ အိပ်ပျော်ရဲ့လားမသိ။ သနားပါတယ်။ 

သူ့ ဣဿာ၊ မစ္ဆေယျစိတ်တွေဟာ သူ့ကို နေ့ရောညပါ နှိပ်စက်နေမှာ။ ကျွတ် to the power 3.

 

ဒီကဗျာလေး ဖတ်ကြည့်ပါ။

 

မှန်ရွှေဂူ ပတ္တမြားကိုလ

ဝက်များက ငြူစူစွာ

ညွန်လူးကာ တိုက်မြဲ

ပွတ်လေလေ

ရွှေဂူမှာ အရောင်ထွက်တယ်

ရှေးကထက် ကဲ။       ။

 

တောထဲမှာ ပတ္တမြားနဲ့လုပ်ထားတဲ့ ဂူတစ်ခုရှိတယ်။ ပတ္တမြားဆိုတော့ အရောင်တွေနဲ့ တောက်ပြောင်နေတာပေါ့။

အဲဒါကို ဝက် (အီအီးစားတဲ့ဝက်) တွေက မနာလိုကြဘူး။

အဲဒီတော့ ရွှံ့နွံအိုင်ထဲသွားပြီး တစ်ကိုယ်လုံးကို ရွှံ့နွံတွေနဲ့လူး။

နောက်ပြီးတော့ ပတ္တမြားဂူကို သူတို့ ကိုယ်လုံးတွေနဲ့ပွတ်။

ဒါပေမယ့် ပတ္တမြားဂူက သူတို့ပွတ်လေ၊ အရောင်ထွက်လေ။

 

ခင်ဗျားနာနာဆဲလေ။ ကျုပ်တို့ခေါင်းဆောင် အရောင်ထွက်လေ။

ကျေးဇူးပါ ပြေသူ့အတိုင်ဘင်ဂံ ပုဂ္ဂိုလ်ဂျီး ခညာ။

 

ဖူး . . ခုမှ နည်းနည်းပေါ့သွားတယ်။

 

(၂) Sky Scraper နှင့် သာထီဖိုးဖာထီ

 

များမကြာမီက Netflix တွင်တင်သည့် Sky Scraper ရုပ်ရှင်ကို ကျွန်တော်ကြည့်၏။ ကောင်း၏။ ဇာတ်ကားအစမှ အဆုံးထိ သဲထိတ်ရင်ဖို ရိုက်ပြထားသည်မှာ သဘောကျဖွယ် ဖြစ်၏။

 

ရုပ်ရှင်တို့ထုံးစံအတိုင်း မသမာသူတို့က အသားကုန် ယုတ်မာကြ၏။​ အဖွဲ့ကလည်း လက်နက်၊ နည်းပညာ၊ လူအင်အား တောင့်လှ၏။ သို့ပေမယ့် ဟဲဟဲ၊​ ဘယ်ရမတုံးခညာ။​ ဒီက ရွှေဘပဲ။ လူမိုက်တို့၏ တိုက်ခိုက်မှုကို ရွှေဘသည် အလူးအလဲ ခံရလေ၏။ သေလုမျောပါးခံရ၏။ သို့သော် နောက်ဆုံးတော့ ရွှေဘနှင့် သူ့မိသားစုများ အောင်ပွဲခံလိုက်နိုင်သည်သာ ဖြစ်လေ၏။

 

ရုပ်ရှင်မှန်သမျှ အားလုံးချုပ်ကြည့်လျှင် မည်သည့်နိုင်ငံက မည်သည့်ကားပင်ဖြစ်ပါစေ၊ သည်သဘောချည်းသာဖြစ်၏။ တစ်နည်းအားဖြင့် ဓမ္မနှင့် အဓမ္မတို့၏ အားပြိုင်မှုကို ဖော်ကျူးထားကာ နောက်ဆုံးတော့ ဓမ္မကို အနိုင်ပေးလိုက်၏။

 

Act of Valor ကတော့ မူးယစ်ရာဇာတို့နှင့် အမေရိကန် ကွန်မန်ဒိုတို့၏ အားပြိုင်ပွဲ ဖြစ်၏။ သူလည်း ကောင်းပါသည်။ ဖြစ်ရပ်မှန်ကို အခြေခံ ရိုက်ထားတာ ဖြစ်၏။ သို့သော် ကြေကွဲဖွယ်ရာဇာတ်လမ်းလေးနှင့် အဆုံးသတ်သွား၏။

 

ယခု ကျွန်ုပ်တို့ တိုင်းပြည်တွင်လည်း ၂၀၂၀ ရွေးကောက်ပွဲတည်း ဟူသည့် ဇာတ်ကားတွင် ဓမ္မနှင့် အဓမ္မတို့၏ အားပြိုင်မှု များကို အထင်းသား မြင်နိုင်ပါ၏။ 

 

ဟိုဘက်ရွာသားတို့သည်လည်း ရသမျှနည်းပေါင်းစုံသုံးကာ အသားကုန် ယုတ်ကြလိမ့်မည်။

ဤသည်မှာ သူတို့အလုပ် သူတို့လုပ်တာဖြစ်၏။

ယုတ်ကြလိမ့်မည်ဟု သုံးရခြင်းမှာ ၎င်းတို့အဘိဓာန်တွင် တရားမျှတသောနည်း၊ သူ့ထက်သာအောင်လုပ်ပြခြင်းဖြင့် ပြည်သူများ၏ မဲကို ရအောင်ယူနည်း ဟူသည့် စကားလုံးများ ပျောက်ကွယ်နေသောကြောင့်တည်း။

 

မဲစာရင်းများ သည်မျှမှားနေတာကို ရိုးရိုးသားသားမှားသည်ဟု ထင်ရလောက်အောင် ကျွန်ုပ်သည်မျှ မတုံးသေးပါ။

အဘယ်ကြောင့် ဦးတင်မောင် နှင့် ဒေါ်ဝင်းတို့ သည်မျှ များနေရဘိသနည်း။

အဘယ်ကြောင့် မွေးသက္ကရာဇ်များ ဇောက်ထိုးမိုးမျှော် ဖြစ်နေရဘိသနည်း။

အဘယ်ကြောင့် မှတ်ပုံတင်နံပတ်တွင် ဂဏန်းများမှာ သုညချည်း ဖြစ်နေရသနည်း။

 

မတော်တဆအမှားဆိုသည်မှာ မှတ်ပုံတင်နံပါတ် ၁၂၃၄၅၆ ကို ၁၂၃၅၄၆ ဟု ရေးမိတာမျိုးသာဖြစ်မည်။

ဦးတင်မောင်ကို ဦးသင်မောင် ဟု ရေးမိတာမျိုးသာဖြစ်မည်။

ဤသည့်အမှားများကို ရိုးရိုးသားသားမှားပါသည်ဟု အသင်တို့သည် ချေးကိုငုံ၍ ပြောအံ့။

ကျွန်ုပ်ကတော့ ချေးအရသာကို ကြိုက်လို့သာ ငုံသည်ဟု မှတ်ထင်ပါမည်။

 

ငါတို့အာဏာရလျှင် ဘာလုပ်ပြမည်၊ ညာလုပ်ပြမည်ဟု ပေါက်တတ်ကရတွေ လာပြောမနေပါနှင့်။

အကျွန်ုပ်တို့ တစ်သက်လုံး အသင်တို့သာ တိုင်းပြည့်အာဏာကို ကိုယ့်ယောက္ခမဆီက ရသည့် အမွေကဲ့သို့ လက်ဝါးကြီး အုပ်ထားခဲ့တာ မဟုတ်လော။ အဲသည်တုံးကတော့ မလုပ်ခဲ့ဘဲ၊ ခိုးဘို့လောက် စဉ်းစားနေပြီး ဘာအခုမှ လုပ်ပြချင်ရသေးသနည်း။ 

အမှန်တကယ် လုပ်ပြချင်သည်ဆိုလျှင်တောင်မှ ကျွန်ုပ်တို့ ယုံလောက်အောင် စကားကို ပြောပါလော့။

အရည်အချင်းရှိသူမှန်လျှင် ယခု သင်တို့ပြောနေသည့် ကလေးကစားစရာ စကားမျိုးကို ပြောလိမ့်မည်မဟုတ်။

သင်တို့ပြောစကားအရ သင်တို့ အရည်အချင်းကို ကျွန်ုပ်တို့ ခန့်မှန်းနိုင်သည်သာ ဖြစ်၏။

 

အချို့က ဘယ်ပါတီက ဘယ် အမတ်လောင်းဟာဖြင့် လူတော်ကလေး ဖြစ်သည် ဆို၏။

ထို့ကြောင့် ထိုလူတော်ကလေးကို မဲထည့်မည်ဟု ဆိုကြ၏။

ထိုလူတော်ကလေးသည် ထိုပါတီ၏ လောင်းရိပ်မှ လွတ်နိုင်ပါမည်လား။

ထိုပါတီ၏ ဆုံးဖြတ်ချက်ကို လွန်ဆန်နိုင်ပါမည်လား။ 

မိမိယုံကြည်ချက်ကို မိမိဘာသာ လွတ်လွတ်လပ်လပ် လုပ်နိုင်မည်ဟု အသင်တို့ ထင်ပါသလား။

 

အချို့ကလည်း ၎င်းတို့ဒေသမှ အာဏာရပါတီ၏ လွှတ်တော်ကိုယ်စားလှယ်ကို စိတ်ပျက်ကြကုန်၏။

လူထုမကြိုက်သော လွှတ်တော်ကိုယ်စားလှယ်ကိုပင် ပြန်လည် ရွေးချယ်ထားသဖြင့် စိတ်ကုန်ကြကုန်၏။

ဤသည်မှာ NLD ၏ ကိစ္စဖြစ်၏။

ကျွန်ုပ်တို့ ဘာမှတတ်နိုင်သည့်အလုပ် မဟုတ်။

 

သို့သော် မိတ်ဆွေတို့ စဉ်းစားကြည့်ကြပါဘိ။

ယခုပင်လျှင် NLD အစိုးရ လုပ်လို့မရသည့် ကိစ္စတွေ အများကြီးရှိသည်။

နေပြည်တော် မူကြိုကျောင်းမှ​ သူငယ်မကလေးကိစ္စ ဘာတတ်နိုင်ပါသနည်း။ အဘယ်ကြောင့်နည်း။

ဖားကန့်တွင် အဝီစိရောက်အောင် မနိုင့်ရင်ကာ ကျောက်တွေတူးနေသည့်ကိစ္စ အဘယ်ကြောင့် လက်ပိုက် ကြည့်နေရပါသနည်း။ အသင်တို့တောင် သည်ကိစ္စသိသေးလျှင် NDL အစိုးရအနေနှင့် မသိဘူးဆိုတာ လုံးဝ မဖြစ်နိုင်။​ မတတ်နိုင်၍ လက်လျှော့ထားတာ ဖြစ်ပါလိမ့်မည်။ ကျွန်ုပ်မသိပါ။

အဘယ်ကြောင့်နည်း။

 

(၃) အပ္ပမာဒေန၊ သမ္ပာဒေထ

 

ယခုလက်ရှိ NLD သည် တင်းပြည့်ကျပ်ပြည့် အစိုးရမဟုတ်။ 

ပြောရလျှင် သူတို့ကိုယ်သူတို့တောင် အပြည့်အဝ အစိုးရသေးတာမဟုတ်။

အစိုးရအဖွဲ့ထဲမှာပင်လျှင် NLD အစိုးရကို နာမည်ပျက်အောင်၊ ဒုက္ခများအောင်၊ အကျဉ်းအကျပ်ဖြစ်အောင် လုပ်နေသူတွေ တစ်နည်းအားဖြင့် Sky Scraper ရုပ်ရှင်ထဲကလို ပူးသတ်နေသူတွေ အများကြီးရှိသည်။

သဟာနှင့်များတောင်မှ ဘာကိုများ သင်တို့က မျှော်မှန်းနေပါသေးသနည်း။

 

ကျွန်ုပ်တို့ ပထမဆုံးလုပ်ရမည်မှာ NLD ကို ရာနှုန်းပြည့် အစိုးရဖြစ်လာစေရေးပင် ဖြစ်၏။ 

ဤသို့ဖြစ်ရေးမှာ ဘုံမဟုတ် ပတ်မဟုတ် အစိတ်သားကို ကန်ထုတ်ပစ်ဖို့ လို၏။

ဤအစိတ်သားကို ကျွန်ုပ်တို့ လူထုအားဖြင့်သာ ကန်ထုတ်ပစ်နိုင်၏။

 

အသင်တို့သည် တွေဝေမနေကြကုန်လင့်။

အမေရိကန်တွင် ရူးကြောင်ကြောင်တစ်ယောက် အစိုးရအဖွဲ့ခေါင်းဆောင်ဖြစ်လာသဖြင့် အဘယ်မျှ ပြဿနာတွေ တက်နေရသနည်းဆိုသည်ကို သင်တို့ မျက်မြင်ကိုယ်တွေ့ဖြစ်၏။ 

အသင်တို့သည် လူရွေးမမှားကြကုန်လင့်။

 

အင်မတန်ချစ်စရာကောင်းသည့် အင်ဒီယာဂန္ဒီ အဘယ်ကဲ့သို့ လုပ်ကြံခံခဲ့ရသည်ကို အသင်တို့ သိပါသည်။

အနီး၌ရှိနေတိုင်း လူယုံဟု အသင်တို့သည် စိတ်ချမနေကြကုန်လင့်။

“မလုပ်ရဲတာ ဘာမှ မရှိဘူး” ဆိုသည်မှာ စိန်ခေါ်လိုက်သည့် စကားဖြစ်၏။

လုပ်လို့ရတာမှန်သမျှ အကုန်လုပ်လိမ့်မည်။

အနာဂတ်ကိစ္စ၊ တိုင်းပြည်ကိစ္စ၊ ကောင်းတာဆိုးတာ ဘာမှ စဉ်းစားနေလိမ့်မည် မဟုတ်။

ဆိုလိုသည်မှာ သူ့လမ်းတွင် ရှုပ်နေတာမှန်သမျှ အကုန်ရှင်းပစ်ဘို့ ဝန်လေးနေမှာ မဟုတ် ဆိုသည်ကို ပွင့်ပွင့်လင်းလင်း ထုတ်ပြောလိုက်ခြင်းဖြစ်၏။ 

 

အသင်တို့သည် နေ့ညဉ့်မပြတ် သတိရှိကြကုန်လော့။

လူယုတ်ဆိုတာ ချိုပါတာမဟုတ်။

 

ဓမ္မကသာ အောင်ပွဲခံရမည်။

 

ကျေးဇူးတင်ပါသည်။

 

အေးငြိမ်း

၁၅ ဩဂုတ်လ၊ ၂၀၂၀

 

ဒီနေ့သွားတွေ့တဲ့ (၃၄)ပါတီ (သို့) ဒီမိုကရေစီနဲ့ တွဲဖက်မစားသုံးသင့်သောပါတီများ
Credit - Myanmar Harp Media မှကူးပြီးအမှတ်စဉ်တပ်ထား။

(၁)ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ ဥက္ကဋ္ဌ ဦးသန်းဌေး၊
(၂)တိုင်းရင်းသားစည်းလုံးညီညွတ်ရေးပါတီ တွဲဖက်အတွင်းရေးမှူး ဦးနေဝင်း၊
(၃)အမျိုးသား ဒီမိုကရေစီပါတီသစ် ဥက္ကဋ္ဌ ဦးသိန်းညွန့်၊
(၄) အမျိုးသားတိုးတက်ရေးပါတီ ဥက္ကဋ္ဌ ဒေါက်တာ နေဇင်လတ်၊
(၅)ခေတ်သစ်ပြည်သူ့ပါတီ ဥက္ကဋ္ဌ ဦးထွန်းအောင်ကျော်၊
(၆)အမျိုးသားဒီမိုကရေစီ အင်အားစုပါတီ ဥက္ကဋ္ဌ ဦးခင်မောင်ဆွေ၊
(၇)ပြည်သူ့ ရှေ့ဆောင်ပါတီ ဥက္ကဋ္ဌ ဒေါက်တာ ဒေါ်သက်သက်ခိုင်၊
(၈)အမျိုးသား နိုင်ငံရေးမဟာမိတ်များ အဖွဲ့ချုပ် ဥက္ကဋ္ဌ ဦးသိမ်းကြည်၊
(၉)အင်းအမျိုးသားဖွံ့ဖြိုးတိုးတက်ရေးပါတီ ဥက္ကဋ္ဌ ဦးဝင်းမြင့်၊
(၁၀)ဒီမိုကရက်တစ်ပါတီ(မြန်မာ) ဒုတိယဥက္ကဋ္ဌ ဦးတင့်ဆွေ၊
(၁၁)လီဆူအမျိုးသားဖွံ့ဖြိုးတိုးတက်ရေး ပါတီ(ဒူးလေးပါတီ)ဥက္ကဋ္ဌ ဦးရွှေမင်း(ခ)ဆီဖာလာလူ၊
(၁၂)ကရင်အမျိုးသားဒီမိုကရက်တစ်ပါတီ နာယက ဦးစောထွန်းကြည်၊
(၁၃)ကယားပြည်နယ်ဒီမိုကရက်တစ်ပါတီ ဥက္ကဋ္ဌ ဦးဖိုးရယ်၊
(၁၄)ဝံသာနုဒီမိုကရက်တစ်ပါတီ ဥက္ကဋ္ဌ ဒေါ်နန်းရွှေကြာ၊
(၁၅)" ၀ "အမျိုးသားပါတီ ဒုတိယဥက္ကဋ္ဌ ဦးရန်ကျော်၊
(၁၆)ပအိုဝ်းအမျိုးသားအဖွဲ့ချုပ် (PNO) ပါတီ ဒုတိယဥက္ကဋ္ဌ ဦးခွန်မောင်သောင်း၊
(၁၇)ဒီမိုကရေစီနှင့်ငြိမ်းချမ်းရေးပါတီ ယာယီ ဥက္ကဋ္ဌ ဦးမျိုးညွန့်၊
(၁၈)မြိုတိုင်းရင်းသားဖွံ့ဖြိုးရေးပါတီ ဒုတိယဥက္ကဋ္ဌ ဦးကျော်ထွန်းခိုင်၊
(၁၉)ရခိုင်ပြည်နယ်အမျိုးသား အင်အားစုပါတီ ဥက္ကဋ္ဌ ဦးအေးကြိုင်၊
(၂၀)ခေတ်သစ်ပြည်ထောင်စုပါတီ ဥက္ကဋ္ဌ ဦးအောင်သန်း၊
(၂၁)ဗမာပြည်သူ့ပါတီ ဥက္ကဋ္ဌ ဦးအောင်သန်းတင့်၊
(၂၂)မတူကွဲပြားခြင်းနှင့် ငြိမ်းချမ်းရေးပါတီ ဥက္ကဋ္ဌ ဒေါ်စန္ဒာဦး၊
(၂၃)ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီ အတွင်းရေးမှူး ဦးပိုက်ထွေး၊
(၂၃)ကိုးကန့်ဒီမိုကရေစီနှင့် ညီညွတ်ရေးပါတီ ဥက္ကဋ္ဌ ဦးထွန်းနိုင်၊
(၂၄)မြန်မာနိုင်ငံတောင်သူလယ်သမား၊ အလုပ်သမားပြည်သူ့ပါတီ ဥက္ကဋ္ဌ ဦးအောင်မျိုးခိုင်၊
(၂၅)၈၈ မျိုးဆက်ဒီမိုကရေစီပါတီ ဒုတိယဥက္ကဋ္ဌ ဦးသောင်းဦး၊
(၂၆)လူထုပါတီ ဥက္ကဋ္ဌ ဦးပါစီပြည်ဟိန်း(ခ)ဦးမျိုးမင်းထွန်း၊
(၂၇)မြန်မာပြည်သူ့ဒီမိုကရက် တစ်ပါတီ ဥက္ကဋ္ဌ ဦးဌေးကျော်၊
(၂၈)ပြည်သူ့အလုပ်သမားပါတီ ဥက္ကဋ္ဌ ဦးကျော်ဇင်၊
(၂၉)ပြည်သူ့အကျိုးပြု ကျောင်းသားများပါတီ ဒုတိယဥက္ကဋ္ဌ ဒေါ်ခင်စန်းမူ၊
(၃၀)ပြည်သူ့အင်အားပါတီ ဥက္ကဋ္ဌ ဦးဌေးအောင်၊
(၃၁)ပြည်ထောင်စုလယ်သမား၊ အလုပ်သမား အင်အားစုပါတီ ဥက္ကဋ္ဌ ဦးမင်းသူ၊
(၃၂)အမျိုးသား တိုးတက်မြင့်မားရေးပါတီ ဥက္ကဋ္ဌ ဦးကျော်စိန်၊
(၃၃)မြန်မာနိုင်ငံတောင်သူလယ်သမား ဖွံ့ဖြိုးတိုးတက်ရေးပါတီ ဥက္ကဋ္ဌ ဦးကျော်စွာစိုး၊
(၃၄)အခြေခံလူတန်းစားဘ၀မြင့်မားရေးပါတီ အထွေထွေ အတွင်းရေးမှူး ဦးကျော်မြင့်(ခ)မိုက်ကယ် ကျော်မြင့်

 

GCE (O) မြန်မာစာ အကြောင်း သိကောင်းစရာ

(၁) စင်ကာပူမှ GCE (O) 

 

ယခုအခါ ကမ္ဘာ့နိုင်ငံ တော်တော်များများသည် အင်္ဂလန်နိုင်ငံ၊ ကင်းဘရစ်တက္ကသိုလ်မှ ရေးဆွဲထားသည့် အခြေခံ ပညာရေးစနစ်ဖြစ်သော GCE (O) General Certificate of Education (Ordinary) Level ကိုလိုက်နာလက်ခံ ကျင့်သုံးလျက် ရှိကြကုန်၏။

 

ထိုနိုင်ငံများတွင် စင်ကာပူနိုင်ငံသည်လည်း တစ်နိုင်ငံ အပါအဝင်ဖြစ်လေရာ စင်ကာပူနိုင်ငံ အခြေခံပညာကျောင်းမှ ကျောင်းသားကျောင်းသူများသည် စင်ကာပူ-ကင်းဘရစ် GCE (O) စာမေးပွဲကို ဖြေကြရမည်ဖြစ်၏။

 

GCE (O) ဘာသာတွဲများမှာ အလွန့်အလွန်၊ အလွန်အလွန့်ကို များပြားလှလေရာ ထိုအထဲမှ ဘာသာရပ်များကို ဖော်ပြရလျှင် အောက်ပါအတိုင်း ဖြစ်၏။ 

 

ပထမ မည်သည့်အခြေခံပညာကျောင်းများ၌မဆို သင်ကြရသော အင်္ဂလိပ်၊​ သင်္ချာ၊​ ဓာတုဗေဒ၊ ရူပဗေဒ၊ ဇီဝဗေဒ၊ လူမှုရေးသိပ္ပံ၊ ပထဝီ၊ သမိုင်း စသည့် အခြေခံဘာသာရပ်များ ပါ၏။

 

ထို့နောက် အထူးပြုဘာသာရပ်များဖြစ်သည့် အင်္ဂလိပ်စာပေ၊ ဂီတ၊ အခြေခံဒီဇိုင်း၊ ဒီဇိုင်းနှင့်နည်းပညာ၊ အနုပညာ၊ စာရင်းကိုင်ပညာ၊ အစားအသောက်နှင့် အာဟာရဗေဒ၊ အစ္စလာမ် ဘာသာရေးဆိုင်ရာ ဗဟုသုတ၊ အီလက်ထရောနစ်၊ အားကစားပညာသိပ္ပံ၊ တွက်ချက်ခြင်း၊ စီးပွားရေးပညာ၊ ပြဇာတ် စသည်တို့ပါ၏။

 

ထို့ပြင် စင်ကာပူကျောင်းသားများမှာ အမေ့လျှာ (ဟုတ်ပေါင်) mother tongue ဘာသာရပ်များကိုပါ မယူမနေရ ယူကြရ လေရာ များသောအားဖြင့် စင်ကာပူနိုင်ငံသုံး အဓိကဘာသာစကားများဖြစ်သည့် တရုတ်၊ မလေး၊ တမီလ် ဘာသာများကို ယူကြ၏။ သို့သော် နိုင်ငံခြားသား ကျောင်းသားများအဖို့ အခြား မိမိကြိုက်နှစ်သက်ရာ ဘာသာများကိုလည်း ယူနိုင်သေး ရာ ထိုဘာသာတို့တွင် အာရဗီ၊ ဘဟာစာအင်ဒိုနီးရှား၊ မြန်မာ၊ စပိန်၊ ဂျပန်၊ ဂျာမန်၊ ပြင်သစ်၊ ထိုင်း၊ ဟင်ဒီ၊ အူရဒူး၊ ဂူဂျရတ်တီ၊ ပန်ချာပီ၊ ဘင်ဂလီ စသည့်ဘာသာရပ်တို့ ပါ၏။

 

သို့တိုင် ထိုဘာသာအားလုံးကို ကျောင်းများတွင် သင်ပေးသည်တော့မဟုတ်ပါ။ တရုတ်၊ မလေး၊ တမီလ် နှင့် အခြား ဘာသာ အနည်းငယ်မျှကိုသာ သင်ပေးပြီး ကျန်သည့်ဘာသာများကိုမူ ကိုယ့်ဘာသာ လေ့လာကြရကုန်၏။ 

 

အချို့မိဘများကမူ တရုတ်စကားတတ်လျှင် တရုတ်မနှင့်ငြားနိုင် (ဟုတ်ပေါင်) အလုပ်အကိုင်အခွင့်အလမ်း ပိုကောင်းသည်ဆိုကာ မိမိတို့ သားသမီးများကို တရုတ်ဘာသာစကား ယူခိုင်း၏။ အချို့ကျတော့လည်း ကိုယ်က မြန်မာ မို့လို့ မြန်မာစာတတ်ကောင်းသည် ဟု ယူဆကာ ကိုယ့်သားသမီးများကို မြန်မာစာ ယူခိုင်း၏။

 

မြန်မာစာကို ကျောင်းများက သင်မပေးပါ။ ကိုယ့်ဘာသာ အပြင်တွင် လေ့လာရ၏။ လေ့လာနေကြောင်းကိုလည်း ကျောင်းကို အထောက်အထားတစ်ခု ပြရ၏။ ကိုယ့်ဘာသာ အပြင်တွင် ဖြေ၍ ရလာသည့် မြန်မာစာရမှတ်များကို ကျောင်းများက အသိအမှတ်မပြုပါ။ ထိုစာမေးပွဲရလဒ်များကိုလည်း တင်ပြစရာမလိုပါ။

 

ယခုအခါ စင်ကာပူမှ GCE (O) စာမေးပွဲများ စပါတော့မည်။ ဘာသာရပ်များ များပြားလှသလို စာမေးပွဲဖြေရသည့် ကာလမှာလည်း ကြာမြင့်လှ၏။ 18/6/2020 မှ စလိုက်သော စာမေးပွဲများမှာ 12/11/2020 ထိတိုင် ဖြစ်၏။ GCE (O) စာမေးပွဲအချိန်ဇယားကို အောက်ပါ link တွင် ကြည့်နိုင်/download လုပ်နိုင်ပါ၏။

 

Ref:

 

https://www.seab.gov.sg/docs/default-source/examination-timetable/2020gceoexamtimetable.pdf

 

စင်ကာပူမှ စာမေးပွဲများကို စင်ကာပူ စာစစ်ဌာန ဘုတ်အဖွဲ့က စစ်ဆေးသည်ဖြစ်ရာ ထိုစာစစ်ဌာန website တွင် စာမေးပွဲ လမ်းညွှန်များကို ဖတ်နိုင်/ဒေါင်းနိုင်ပါ၏။

 

Singapore Examinations and Assessment Board

 

https://www.seab.gov.sg/home/examinations/gce-o-level/o-level-syllabuses-examined-for-school-candidates-2021

 

(၂) GCE (O) မြန်မာစာ

 

GCE (O) မြန်မာစာ တွင် မည်သည်တို့ ဖြေရမည်ကို အောက်ပါ link တွင် download လုပ်ယူနိုင်ပါ၏။

 

https://www.seab.gov.sg/docs/default-source/national-examinations/syllabus/olevel/2020syllabus/3249_y20_sy.pdf

 

(၃) နာရီမေးခွန်းဖြစ်ပြီး စုစုပေါင်း အမှတ် (၁၀၀) ပေးမည်။

 

မေးခွန်းမှာ ရိုးရှင်းပါသည်။ မေးခွန်းအမျိုးအစား (၄) မျိုးသာပါ၏။

 

၁။ မြန်မာလိုဆို စာစီစာကုံး (Composition) 

သို့သော် သူက စာစီစာကုံးထက် ပိုမိုကျယ်ပြန့်ပါသည်။ အသေးစိတ်ရှင်းပြပါမည်။

 

၂။ မြန်မာ = ==> အင်္ဂလိပ် ဘာသာပြန်

 

၃။ အင်္ဂလိပ် = ==> မြန်မာ ဘာသာပြန်

 

၄။ မေးခွန်းတို

 

+++++++++++++

 

၁။ စာစီစာကုံး (Composition) 

 

Composition တွင် ၅ ပုဒ်ပေးထားပြီး ကြိုက်နှစ်သက်ရာ နှစ်ပုဒ် ရေးရမည်။ တစ်ပုဒ်လျှင် ၂၅ မှတ်နှင့် ၂ ပုဒ်ကို အမှတ် (၅၀) ဖြစ်၏။ စုစုပေါင်းမှ အမှတ် (၁၀၀) သာဖြစ်လေရာ composition မှာ ရမှတ်၏ ထက်ဝက်ရှိလေရာ ဤအပိုင်းကို အထူး အလေးထား လေ့ကျင့်သင့်ပါသည်။

 

ထို (၅) ပုဒ် တွင် အောက်ပါတို့ပါ၏။

·       မိမိ၏ထင်မြင်ချက် (ဥပမာ - ယခု ကိုဗစ် ၁၉ ဖြစ်လာသည့်အခါ လူအများ မည်ကဲ့သို့ ဒုက္ခရောက်ကြရသနည်း။ ကမ္ဘာ့ စီးပွားရေးအပေါ် ရိုက်ခတ်ချက်၊ ကိုဗစ် ၁၉ ကြောင့် မည်သည့် အကျိုးကျေးဇူးများ ရနိုင်သနည်း။)

·       တစ်ဦးနှင့်တစ်ဦး ပေးစာ (ဥပမာ - ရန်ကုန်တွင် တက္ကသိုလ်တက်နေသည့် တူမလေးထံ ကောင်းကောင်းနေဘို့၊ ပျံတံတံ နံ့တံ့တံ့မလုပ်ဘို့ လေးမျက်နှာမြို့နေ ဘကြီးက ပေးစာ)

·       အဖြစ်အပျက်တစ်ခု ဖြစ်ပျက်ခဲ့သည်ကို ပြန်ပြောခြင်း (ဥပမာ - မဲစာရင်းတွင် မိမိမယားမှာ ဦးတင်မောင်နှင့် ငြားထားကြောင်း ဘွင်းဘွင်းကြီး ပေါ်လာ၍ အိမ်ဘေးမှ လင်မယား ထသတ်ကြပုံ)

·       အဖြစ်အပျက်တစ်ခုခုကို ဖော်ပြခြင်း (ဥပမာ - ကားတိုက်ခြင်းကဲ့သို့သော အဖြစ်အပျက်တစ်ခုခု)

·       တစ်ဦးနှင့်တစ်ဦး အတင်းတုတ်ပုံ (ဥပမာ - ဟို ယုန် ဆိုတဲ့အကောင်ဟာ ကွကိုယ်အေးအေးဆေးဆေး ယာခင်းထဲမှာ မုန်လာဥ ခိုးစားနေတာမဟုတ်ဘူး။ အခု နားမလည်၊ ပါးမလည်နဲ့ မတော်တရော်တွေ လျှောက်လုပ်တော့ တစ်ခါတည်း ရေဝေး ရောက်သွားတော့တာပဲ။ အေးလကွာ၊ ဟို နိမ့်နိမ့် ဘာဆိုလဲ၊ မိန်းမကြီးကလည်း သူ့မျက်နှာ ဖောသွပ်သွပ်ကြီးနဲ့ သေခါနီးမှ ထပြီး ပေါတောတောတွေ လျှောက်လုပ်တော့ တခါတည်း လူထု သေးခွက်ထဲ ပက်လက်မျောတော့တာဘဲ . . စသည်။)

 

မှတ်ချက်။       ။ စာမေးပွဲဖြေမည့် ကျောင်းသားများ စကား အချီအချပြောပုံကို မည်ကဲ့သို့ရေးရမည် ဟု နမူနာပြခြင်းမျှ ဖြစ်၍ မည်သူတစ်ဦးတစ်ယောက်ကိုမှ​ ထိခိုက်စေရန် မရည်ရွယ်ပါ။ တိုက်ဆိုင်မှုများရှိလျှင် ခွေးလွှတ်ကြပါကုန်။ 

(အဲဒါ - သူတို့ပြောနေကျ)

 

၂။ မြန်မာ = ==> အင်္ဂလိပ် ဘာသာပြန်

 

မိုးမိုး (အင်းလျား)၊ မစန္ဒာ၊ ဂျူး၊ နေဝင်းမြင့်၊ မင်းသုဝဏ်၊ မြသန်းတင့်တို့၏ ဝတ္ထုတိုများထဲမှ ကောက်နုတ်ကာ မေးတတ်ပါ သည်။ တခါတရံတွင် မည်သည့်နေရာမှ ယူထားသည်ကို ပြဆိုမထားပါ။ 

 

ဝတ္ထုများတွင် စကားပြောများ၊ နေ့စဉ်သုံးနှုန်းသည့် အသုံးအနှုန်းများ ပါသဖြင့် ကျောင်းသားများအနေနှင့် ထိုစကားလုံးများကို သေချာစွာ သိထားရန်လိုပါသည်။ မဟုတ်ပါက ဆိုလိုချက်ကို မရောက်ဘဲ ခါးတောင်းကျိုက်တလွဲ၊ -င်တလွဲ ဖြစ်သွားနိုင်ပါသည်။ ထို့ကြောင့် ဤ နံပါတ် (၂) ပုစ္ဆာအတွက် ဝတ္ထုတိုများဖတ်ကာ လေ့ကျင့်ထားရန် လိုပါသည်။

 

သို့သော် ဤအပိုင်း၌ အချို့ ဝေါဟာရများ (ဥပမာ - ကပ်သီးကပ်သပ်၊ ကချောက်ကချက်၊ ကလေကဝ) ကလွဲ၍ ကလေးများအတွက် သိပ်အခက်အခဲ မရှိပါ။ အင်္ဂလိပ်လို ရေးရတာဖြစ်၍ သူတို့ ရေးတတ်ကြပါသည်။

 

၃။ အင်္ဂလိပ် ===> မြန်မာ ဘာသာပြန်

 

ကျွန်တော့ အတွေ့အကြုံအရ ကျောင်းသားများအဖို့ ဤမေးခွန်းမှာ အခက်ဆုံးဖြစ်၏။ နိုင်ငံခြားတွင်နေသည့် ကလေးများမှာ အင်္ဂလိပ်ဝေါဟာရများနှင့်သာ ကြီးပြင်းလာရသည်ဖြစ်၍ အင်္ဂလိပ်စာလုံးကို သင့်တော်သည့် မြန်မာ စကားလုံးနှင့် ပြန်ဆိုဖော်ပြဘို့ရာ သိပ်မလွယ်လှပါ။ (၎င်းတို့ကို မဆိုထားပါနှင့်။ ဆရာ့ဆရာကြီးများဟု ၎င်းတို့ကိုယ် ၎င်းတို့ ခံယူထားသူများပင်လျှင် အင်္ဂလိပ်မှ မြန်မာဘာသာကို ၆ကျိုးနဲပုံစံဖြင့် ပြန်ဆိုထားကြောင်း ကျွန်ုပ်တို့ တွေ့ခဲ့ ရဖူးပေါင်းများလှပြီ။)

 

၄။ မေးခွန်းတို

 

စာပိုဒ်တစ်ခု ပေးထားပြီး (ဤစာပိုဒ်မှာလည်း မြန်မာစာရေးဆရာများ၏ ဝတ္ထုတို၊ ဝတ္ထုရှည်များထဲမှ ကောက်နုတ် ဖော်ပြထားခြင်း ဖြစ်ပါသည်) မေးခွန်းများ ဖြေခိုင်းခြင်း ဖြစ်၏။

 

ဤတွင် နှစ်ပိုင်းပါ၏။

ပထမတစ်ပိုင်းမှာ စာပိုဒ်ကိုဖတ်၍ နားလည်ခြင်း ဖြစ်ပြီး -

ဒုတိယတစ်ပိုင်းမှာ မေးခွန်းကို ပုံကျပန်းကျ ပြန်ဖြေနိုင်ခြင်း ဖြစ်၏။

အချို့မေးခွန်းများမှာ စာပိုဒ်ထဲမှ စာကြောင်းကို ကူးချ ဖြေဆိုနိုင်သော်လည်း မေးခွန်းတော်တော်များများမှာ ကိုယ့်စကားနှင့်ကိုယ် ပြန်ဖြေရတာဖြစ်၍ မြန်မာလို ကောင်းကောင်း စာစီတတ်ဘို့ အရေးကြီးပါသည်။

 

မေးခွန်းတို (၈) ပုဒ် (၉) ပုဒ်ခန့် မေး၏။ တစ်ပုဒ်လျှင် (၁) မှတ် (၂) မှတ် (၃) မှတ် စသဖြင့် ပေး၏။

 

အမှတ်ခွဲဝေပုံ

 

မေးခွန်း (၁) – composition - တစ်ပုဒ် (၂၅) မှတ် နှင့် (၂) ပုဒ် = အမှတ် (၅၀)

မေးခွန်း (၂) - မြန်မာ ==> အင်္ဂလိပ် ဘာသာပြန် - (၁၀) မှတ်

မေးခွန်း (၃) – အင်္ဂလိပ် ==> မြန်မာ ဘာသာပြန် - အမှတ် (၂၀)

မေးခွန်း (၄) - မေးခွန်းတို - အမှတ် (၂၀) 

 

နိဂုံး

 

အင်္ဂလိပ်စကားပြောနိုင်ငံများတွင် နေထိုင်သည့် မြန်မာကလေးငယ်များကို မြန်မာလို မပြောတတ်ရကောင်းလား၊ မြန်မာစာ မတတ်ရကောင်းလား ဟု အပြစ်ပြောလို့မဖြစ်။ သူတို့ကြီးပြင်းရသည့် ပတ်ဝန်းကျင်၏ အငွေ့အသက်များ သူတို့ အပေါ်ရိုက်ခတ်မှာ မြေကြီးလက်ခတ်မလွဲပါ။

 

မြန်မာမိဘများကတော့ ကိုယ့်မြန်မာလူမျိုး စရိုက်၊​ အငွေ့အသက်ကလေးများ၊ မြန်မာ့ယဉ်ကျေးမှုကလေးများ မိမိတို့ သားသမီးများတွင် ရှိစေချင်ကြသည်။ ထို့ကြောင့် မြန်မာစာကို သင်စေချင်ကြသည်။ သို့သော် ကလေးများအတွက် သိပ်မလွယ်လှပါ။

 

မလွယ်ဆိုပြီး ပစ်ထားလို့လည်းမဖြစ်။ ပဲပင်ပေါက်နှင့်ဘူးသီးကြော် လန်းဂွစ်ရှ်များကိုတောင် တတ်သေးလျှင် အဘယ်ကြောင့် မြန်မာစာကို မတတ်မရှိရမည်နည်း။

 

ကျေးဇူးတင်ပါသည်။

 

အေးငြိမ်း

၉ ဩဂုတ်လ၊ ၂၀၂၀

အကျင့်ဆိုသည်မှာ ဖျောက်နိုင်ခဲသည် ဆိုခြင်းအကြောင်း

(၁) ကျွန်ုပ်တို့ရွာ

--------------------

 

ကျွန်ုပ်တို့ရွာမှာ ဧရာဝတီတိုင်း၊ လေးမျက်နှာမြို့နယ်အတွင်းရှိ ဝါးတောကွင်းကျေးရွာ ဖြစ်၏။ ကြွားရမည်ဆိုလျှင် ကျွန်ုပ်တို့ရွာမှာ လေးမျက်နှာမြို့နယ်အဆုံး၊ အနောက်ရိုးမတောင်ခြေတွင်ရှိပြီး ကျွန်ုပ်တို့ရွာ၏ ဟိုမှာဘက်တွင် ဘာရွာမှ မရှိတော့ဘဲ တောကြီးမျက်မည်းသာ ရှိတော့၏။ 

(တောကြီးမျက်မည်းဆိုသည်မှာ ယခင် ကျွန်ုပ်တို့ငယ်စဉ်အခါကာလက ဖြစ်ပြီး ယခုမတော့ မြန်မာနိုင်ငံမှ အခြား ဒေသများနည်းတူ အဘတို့ကောင်းမှုဖြင့် တောလည်းမကြီး၊ မျက်လည်း မမည်းနိုင်တော့ဘဲ တောလေးမျက်ဖြူ ဖြစ်နေချေပြီ။ ဤကား စကားချပ်)

 

ကျွန်ုပ်တို့ရွာမှနေ၍ အနောက်ရိုးမကို တစ်ညအိပ်မျှကျော်လျှင် ရခိုင်ပြည်နယ် ဂွမြို့သို့ ရောက်သည်ဟု ကျွန်ုပ်တို့ ရွာသားများ ပြောသံကြားဖူးပါ၏။

 

ကျွန်ုပ်မှာ ငယ်စဉ်က ရိုးမတွင်းဝင်ပြီး ကျားဖမ်းဘို့ စိတ်ကူးယဉ်မိသေးသော်လည်း ထိုစဉ်က ကတွတ်ပီမှာ မသေးမျှင်နှင့် မငြားသေးသောကြောင့် အမဲပစ်ထွက်ရန် နားပူမည့်သူမရှိ။ လူပျိုပီပီ ရွာရိုးကိုးပေါက်လျှောက်ကာ အချိန်ဖြုန်းနေသဖြင့် ကျွန်ုပ်မှာ တောပစ်ထွက်ရန် အဖော်မရှိ၍ ကျားပစ်မည့်အကြံကို လက်လျှော့ထားရခြင်း ဖြစ်လေသည်။ အဖော်လိုက်မည့် ဗိုက်ကလေးမှာလည်း ထိုစဉ်က ပုဆိုးကွင်းသိုင်းကာ ဂွေးတန်းလန်းနှင့် ဂွေလှိမ့်တုံးပင် ရှိသေး၏။

 

တောင်ရိုးနား ကပ်နေပေမင့် ကျွန်ုပ်တို့ရွာမှာ ရွာကြီးဖြစ်၏။ ဗကပ သူပုန်များကို နှိမ်နှင်းရန် ဆင်မင်းစစ်ဆင်ရေးဖြင့် စစ်တပ်က ရွာကို အသစ်ပြန်တည်ပေးသွားသည်ဖြစ်ရာ ရွာမှာ လေးထောင့်စပ်စပ် ပုံကျပန်းကျဖြစ်၏။ 

 

ရွာမှာ နီလာလမ်း ၊ဆင်မင်းလမ်း၊ ချစ်မြေလမ်းတည်းဟူသော အလျားလိုက် လမ်းမကြီး သုံးခု။ ပတ္တမြားလမ်း၊ ရွှေလမ်း၊​ရတနာလမ်းတည်းဟူသော ကန့်လန့်ဖြတ်လမ်းမကြီး သုံးခု၊ ထိုလမ်းမကြီးများအကြားတွင် မိုးထိလမ်း၊ ကျိန်တလီလမ်း၊ သံလမ်း၊ ကိုင်းတောင်လမ်း စသော လမ်းသွယ်ကလေး ၁၀ ခု၊ အိမ်ယာကွက်ပေါင်း ၂၂၈ ကွက်တို့ဖြင့် စနစ်တကျ တည်ထားတာ ဖြစ်၏။

 

ရွာလယ်တွင် ဘုန်းတော်ကြီးကျောင်း၊ ဘောလုံးကွင်း၊ အစိုးရမူလတန်းကျောင်း၊ ဆေးခန်း၊ သမဝါယမဆိုင်၊ စာကြည့်တိုက်၊​ ဈေးနေရာ စသဖြင့် အစုံရှိ၏။ 

 

အဘယ်ကြောင့် ကျွန်ုပ်တို့ရွာအကြောင်းကို ဤမျှ ကြွားလုံးထုတ်နေရသနည်း ဆိုလျှင် ကျွန်ုပ် ယခုပြောပြမည့် အကြောင်းအရာမှာ ယုံတမ်းပုံပြင်မဟုတ်။ ဤမည်သော ဝါးတောကွင်းရွာကြီးမှ တကယ့် အဖြစ်အပျက်ဖြစ်ကြောင်း သက်သေထူလို၍ ဖြစ်သတည်း။

 

(၂) သူတို့ညီအစ်ကိုတစ်သိုက်

-----------------------------------

 

ကာယကံရှင်များ၏ ဂုဏ်သိက္ခာကို ထောက်ရှု၍ နာမည်ရင်းများကို မဖော်ပြဘဲ နာမည်ပြောင်များဖြင့်သာ ပြောပါအံ့။ သည်ဇာတ်လမ်းကို ဖတ်မိလျှင် သူတို့ ဘယ်သူဆိုတာ ကျွန်ုပ်တို့ရွာသားများကတော့ ကောင်းကောင်း သိပါသည်။

ကျွန်ုပ် ယခုပြောရခြင်းမှာ ၎င်းတို့ကို သိက္ခာချလို၍ မဟုတ်။ အဘယ်ကြောင့်ဆိုသည်ကို စာဆုံးလျှင် မိတ်ဆွေတို့ နားလည်သွားပါလိမ့်မည်။

 

အဖေနာမည်ကို မြန်မာပြည်မှ ကျောင်းသားများ၏ ဘုံအဖေ ဖြစ်သော “ဦးဘ” ကို ယူသုံးပါမည်။ မိခင်ကတော့ “ဒေါ်ညို” ပေါ့ဗျာ။

(စာရေးခါနီး သူတို့နာမည်တွေ မေ့နေလို့ နှမတွေကို လှမ်းမေးရသေးတယ်။)

 

ဦးဘ နှင့် ဒေါ်ညိုတို့တွင် သားသုံးယောက်၊ သမီးနှစ်ယောက် ရှိ၏။

သားများကို မောင်ဝ၊ မောင်လှ၊ မောင်မြ ဟု နာမည်ပေးပါမည်။ သမီးများမှာ ဤဇာတ်လမ်းနှင့်မဆိုင်သဖြင့် မေ့ထားကြပါစို့။

 

မောင်ဝ၊ မောင်လှ၊ မောင်မြတို့ ညီအစ်ကို သုံးဖော်မှာ ဇ ရှိသူများဖြစ်၏။ 

တောသူတောင်သားတို့သဘာဝ အိမ်ကိုဧည့်သည်လာလျှင် အိမ်မှကြက်ကို ရိုက်သတ်ကာ ချက်ကျွေးလေ့ရှိ၏။

တောဖြစ်၍ ဟင်းကျွေး ငတ်လှသည်။

ထို့ကြောင့် မောင်ဝ၊ မောင်လှ၊ မောင်မြတို့ ညီအစ်ကိုများမှာ ဧည့်သည်မျှော်လေ့ရှိ၏။

 

သို့သော် သူတို့အိမ် ရောက်လာသည့် ဧည့်သည်များမှာ မသက်သာလှပါ။

ဧည့်သည်များ ကြက်သားဟင်းနှင့် လွေးကောင်းနေတုံး မောင်ဝတို့ ညီအစ်ကိုတစုက အိမ်အောက်မှနေ၍ “ဒို့ဘို့ချန်ထားအုံး၊” “ဒို့ဘို့ ချန်ထားအုံး” နှင့် ဧည့်သည်များ၏ ဖင်ကို ဒုတ်နှင့် ထိုးကာ သတိပေးကြ၏။

(တောဆိုတော့ လျှပ်စစ်မီး မရှိသဖြင့် အဲယားကွန်းတပ်မည့် အကြံကို လက်လျှော့ကာ သဘာဝ လေဝင်လေထွက် ကောင်းအောင် ဝါးကြမ်းခင်း ခင်းထားကြတာ ဖြစ်၏။)

သည်တော့ စားပါအုံးဟု အိမ်ရှင်များက လောကွတ်ချော်သည့်တိုင် ဧည့်သည်များမှာ မချိသွားဖြဲနှင့် ဝလိုက်ရသည်ချည်း ဖြစ်၏။

 

ယောင်လို့များ ငှက်ပျောဖီးများဝယ်ကာ ယူမလာလေနှင့်။ အိမ်ပေါ်မှာ စကားကောင်းနေတုံး မောင်မြတို့ညီအစ်ကို တစ်စုက အိမ်အောက်မှနေကာ ငှက်ပျောသီးများကို ခြွေစားပြီးနှင့်လေပြီ။ ကိုင်း - စကားလဲ ကောင်းပါရဲ့။ ပြန်လိုက်အုံးမယ်ဟု အိမ်ပေါ်မှဆင်းကာ ငှက်ပျောဖီးကို ဆွဲလိုက်လျှင် ငှက်ပျောဖီးမှာ အသီးများ ပျောက်ချင်းမလှပျောက်လျက် အညှာများသာကျန်တာ တွေ့ရလိမ့်မည်။

 

ဤမျှဆိုလျှင်ပင် မောင်ဝ၊ မောင်လှ၊ မောင်မြတို့ ညီအစ်ကိုများအကြောင်း အတန်အသင့် ရိပ်မိပြီ။

 

(၃) ဖျောက်ရခက်လှသည့် ဝါသနာ

------------------------------------------

 

၎င်းတို့၏ အဖေ၊ အမေ၊ နှမများမှာ ရိုးသားသူများ ဖြစ်သည့်တိုင် မောင်ဝ၊ မောင်လှ၊ မောင်မြတို့ ညီအစ်ကိုတသိုက်မှာမူ ဘယ်ဘဝက ပါရမီကြောင့်မသိ။ ခိုးတာ အလွန်ဝါသနာပါလှ၏။

 

ခိုးတာမိ၏။ အပြစ်ပေး၏။ သို့သော် နောက်တစ်ခါ ပြန်ခိုးတာသာ ဖြစ်လေသည်။

သို့တိုင် ရွာမှာ သူတို့ညီအစ်ကိုများကြောင့် စိတ်အနှောက်အယှက်ဖြစ်ရသည်၊ ခွန်းကြီးခွန်းငယ် စကားများကြရသည်ဟု တစ်ခါဖူးမှ ကျွန်ုပ် မကြားမိခဲ့ဖူးပါ။ သူတို့က ဝါသနာအရသာ ခိုးတာဖြစ်ပြီး တပါးသူနစ်နာလောက်အောင် ခိုးတာ မဟုတ်၍ ဖြစ်ပါလိမ့်မည်။ ကျွန်ုပ်က ငယ်သေးတော့ မသိပါ။

 

သူတို့ညီအစ်ကိုတစ်သိုက် ဘုန်းကြီးကျောင်းတွင် ကျောင်းတက်နေစဉ် တစ်ခါသော် မောင်လှကို ခိုးမှုဖြင့် လက်ပူးလက်ကြပ် မိသည်ဆို၏။ 

 

သည်တော့ ဆရာတော်ဘုရားက “သည်လောက် ခိုးချင်လှတဲ့ကောင်၊ မှတ်လောက်သားလောက်ရှိအောင် ဆုံးမမှဘဲ” ဆိုကာ မောင်လှကို တိုင်တွင်ဖက်စေလျက် ကြိမ်ဖြင့် အသားကုန် သမလေ၏။ 

မောင်လှလည်း အောင်မယ်လေး၊ ဘလေးဖြင့် ကော့နေအောင် ခံရ၏။

 

ရိုက်လို့မောသွားတော့ ဆရာတော်ဘုရားက မောင်လှကို ကြမ်းပြင်ပေါ်ချကာ မေး၏။

“ဟဲ့ - ငလှ”

“ဘုရား”

“နင် နောက်ကို ခိုးချင်စိတ် ရှိသေးရဲ့လား”

“မှန်လှပါ၊ နည်းနည်းတော့ ရှိပါသေးတယ် ဘုရား”

 

ကြိမ်ဖြင့် အသားကုန်သမလို့ သေလုမျောပါးဖြစ်နေတာတောင် ခိုးချင်စိတ် မပျောက်သေးသည့် မောင်လှကို ဆရာတော်လည်း လက်မြှောက်လိုက်ရလေသတည်း။

 

(၄) ယုံရခက်သူများ

------------------------

 

နိဂုံးချုပ်ပါမည်။

 

“သည်တစ်ခါတော့ ကျွန်တော်တို့ မခိုးတော့ပါဘူး ခင်ဗျ” ဆိုသံ သဲ့သဲ့ကြားမိလိုက်ပါ၏။

စားနေကျ ကြောင်ဖားများမှာ ဘယ်လို အချောင်စားရမည်ကို သိနေသဖြင့် ကြွက်မခုတ်တော့ဘဲ ခိုးစားဘို့သာ ချောင်းနေတတ်ပါသည်။

ခိုးဖူးသူများသည်လည်း မခိုးတော့ပါဘူးဟု မည်မျှပင် ကြိမ်ပြောနေသည်ဖြစ်စေ အချိန်တန်တော့ ခိုးမှာသာ ဖြစ်၏။

မြေကြီးကို လက်နှင့်ပုတ်က လွဲချင်လွဲဦးမည်။

အနို့ အကျင့်က ပါနေသကိုး။

 

သည်တော့ သင်တို့သည် သူခိုးကို ဘဏ္ဍာစိုးမခန့်မိဘို့ အရေးကြီးလှ၏။

ခိုးတာဝါသနာပါနေသဖြင့် သူတို့ကို မခိုးပါနှင့်ဟု ရှိခိုးတောင်းပန်နေလို့မရ။

သူတို့ကို ခိုးခွင့်မရအောင် တားဆီးဘို့အရေးမှာ သင်တို့ ကျွန်ုပ်တို့အရေး ဖြစ်ချေသည်။

 

သည်မျှဆိုလျှင် အဘယ်ကြောင့် သည်စာကို ကျွန်ုပ် ရေးရကြောင်း သင်တို့ သဘောပေါက်ပါပြီ။

သူတို့အကြောင်းကို ခုတုံးလုပ်ကာ ရေးသဖြင့် ကိုလှတို့ညီအစ်ကိုတစ်သိုက် ကျွန်ုပ်ကို စိတ်မခုဟု ယူဆပါသည်။

ကျွန်ုပ်သည်ပင်လျှင် အသက် ၆၀ ပြည့်တော့မှာမို့ သူတို့လည်း အသက် ၇၀ ကျော်နေပါရော့မည်။ ရှိရော ရှိကြသေးရဲ့လား မသိ။

 

သူခိုးများအသင်း မဲထည့်ခြင်း၊ ကင်းရှင်းကြပါစေ

 

အေးငြိမ်း

၆ ဩဂုတ်လ၊ ၂၀၂၀