ခရစ္စတိုဖာပေါက်ကျိုင်း ၏ အတ္ထုပ္ပတ္တိ (၂၆)

  (၁၀၁) အီးစီစီမှ အပြန်ခရီး

            ညနေပိုင်း အလုပ်ပြီးသောအခါ ၆ နာရီ သို့မဟုတ် ၆ နာရီခွဲထွက်သော မော်တော်နှင့် ကျွန်တော်ပြန်လိုက်လေ့ရှိ၏။ ညနေ ၆ နာရီ ဆိုလျှင် ဗမာပြည်၌ နေ၀င်ပြီး ဖြစ်သော်လည်း စင်ကာပူတွင်မူ နေမ၀င်သေးပါ။ အနောက်ဖက်ကောင်းကင်တွင် နေမင်းကြီးသည် တိမ်များ နောက်ကွယ်၌ ပုန်းကွယ်နေသဖြင့် တိမ်တိုက်များမှာ ငွေနားကွပ်ထားသကဲ့သို့ အလွန်လှပလျှက် ရှိပါသည်။ လေ အနည်းငယ်ထန်နေသဖြင့် ပင်လယ်ရေမျက်နှာပြင်မှာ လှိုင်းကြက်ခွပ်များဖြင့် ပြည့်လျှက်ရှိသည်။ Auto Batam သင်္ဘောသည် ရေပြင်ကိုခွဲကာ လျှင်မြန်စွာ ခုတ်မောင်း လျှက်ရှိ၏။

အဝေးတွင် ကျောက်ချထားသော သင်္ဘောကြီးများကို ပင်လယ်အတွင်း ဆင်ကြီးများ ရပ်နားနေသကဲ့သို့ လည်းကောင်း။ တောင်ပူစာကြီးများ ပေါ်ထွက်နေသကဲ့သို့လည်းကောင်း မြင်ရပါသည်။ Penguin သင်္ဘောတစ်စီးမှာ ရေမှုန်များကို တဖွားဖွားဖြစ်ပေါ် စေလျှက် စင်ကာပူမှ ပြန်လာသည်ကို တွေ့ရသည်။

အချို့သော (မော်လမြိုင်ဘက်မှ လေသံနှင့်ပြောရလျှင်) ကျွန်းသားကလေးများမှာ ရေပြင်ပေါ်သို့ မ၀ံ့မရဲနှင့် ခေါင်းပြူလျှက် ကြည့်နေကြပါသည်။ သူတို့အပေါ်တွင်မတော့ ရေတိမ်အချက်ပြ မီးတိုင်လေးများကို တွေ့ရပါသည်။ ကျွန်တော်တို့သင်္ဘောမှာ ထို ကျွန်းပေါက် စနကလေးများကို ရှောင်ကွင်းမောင်းနှင်နေရသည်ဖြစ်ရာ သင်္ဘောဦးမှာ အရှေ့ဘက်ကို ဦးတည်လိုက်၊ အနောက်ဖက်ကို ဦးတည်လိုက်၊ တခါတခါ မြောက်ဖက်အရပ်ကို ဦးတည်လိုက်။

စင်ကာပူမှ ပြန်လည်ထွက်ခွာသွားသော ကုန်တင်သင်္ဘောကြီးများကို တွေ့ရသကဲ့သို့ စင်ကာပူ ဆိပ်ကမ်းများဆီသို့ တရွေ့ရွေ့နှင့် ချဉ်းကပ်လာသော သင်္ဘောကြီးများကိုလည်း တွေ့ရပါသည်။ ထို သင်္ဘောကြီးများ၏ နံဘေးတွင်မူ သင်္ဘောကြီးများကို တွန်းလာသည့် ဆွဲသင်္ဘောကလေးများကို ဆင်သေကြီးကို ၀ိုင်းတွတ်နေသော ငါးများသဖွယ် တွေ့ရပါသည်။

ပီအက်စ်အေဆိပ်ကမ်းတွင်တော့ အပေါ်ပိုင်းအ၀ါ၊ အောက်ပိုင်းအပြာရောင်သုတ်ထားသည့် မော်တော်ကားတင် ဧရာမ သင်္ဘောကြီးတစ်စီး ဆိုက်ကပ်ထားပြီး ဆိပ်ကမ်းရှိကွက်လပ်ကွင်းပြင်တွင် ယခုမှရောက်လာသော မော်တော်ကားအသစ်ကျပ်ချွတ်များကို ရာပေါင်းများစွာ တန်းစီရပ်ထားသည်ကို တွေ့ရပါသည်။ လည်ပင်းဆန့်တန်းထားသော ကရိန်းကြီးများမှာ ကွန်တိန်နာကြီးများကို သင်္ဘောပေါ်မှယူလိုက်၊ ဆိပ်ကမ်းတွင်ချလိုက်ဖြင့် အလုပ်ရှုပ်လျှက်ရှိလေသည်။

တခါတလေ အလုပ်များမပြီးပြတ်သေးလျှင်တော့ ည ၇ နာရီခွဲ သို့မဟုတ် ၈ နာရီမှ ကျွန်တော် ပြန်ပါသည်။ ထို အခါများတွင် မီးများထွန်းထားသော Jurong Island ကို အလွန်လှပစွာတွေ့ရပါသည်။ Jurong Island သည်ကား ကျွန်းတစ်ကျွန်းလုံး ဓါတုဗေဒ စက်ရုံများ၊ ရေနံချက်စက်ရုံများဖြင့် ပြည့်နှက်လျှက်ရှိရာ ထို စက်ရုံများတွင် မီးများကိုအလျှံပယ်ထွန်းထားသဖြင့် ညဘက်ကြည့်လိုက်လျှင် သီတင်းကျွတ်လ မီးထွန်းပွဲနှင့်ပင် တူပါသေးတော့သည်။

ငါးဖမ်း မော်တော်ဘုတ်ကလေးများမှာမူ ဟိုမှသည်မှ လူးလာခေါက်တုံ့ သွားလာနေပါ၏။

သင်္ဘောပေါ်လိုက်ပါလာသူများမှာ မနက်ပိုင်း လာစဉ်ကကဲ့သို့မဟုတ်တော့ပဲ စကားပြောသူ၊ သီချင်းနားထောင်သူ စသဖြင့် အတန်ငယ် ဆူညံလျှက်ရှိပါသည်။ သို့နှင့် ဆိပ်ကမ်းသို့သင်္ဘောဆိုက်သောအခါတွင် တစ်ဦးနှင့်တစ်ဦး အတင်းတိုးဝှေ့ကာ အပြေး ဆင်းသွားကြပါသည်။ ကျွန်တော်ကဲ့သို့ လူရှင်းအောင်စောင့်ကာ အေးအေးဆေးဆေးမှ ဆင်းလာကြသူများလည်းရှိပါ၏။

မနက်က လာစဉ်ကကဲ့သို့ပင် မှတ်တိုင်၌ဘတ်စ်ကားစောင့်ရပါသည်။ အဆင်ပြေလျှင် ခဏသာစောင့်ရသော်လည်း များသော အားဖြင့်မူ မိနစ် ၂၀ ခန့် စောင့်ရ၏။ ကျွန်တော်က အလုပ်ရှုပ်မခံတော့ဘဲ ထမင်းကို အပြင်တွင်သာ စားလိုက်ပါသည်။ သည့်အတွက် ထမင်းစားဘို့ အဆင်ပြေမည့်နေရာကို ကြည့်ထားရသည်။ တခါတလေတော့လည်း ကြုံသလိုတည့်သလို စခန်းသွားလိုက်ပါသည်။

၁၇၅ ဘတ်စ်ကားစီးလျှင် Clementi ဘူတာသို့ရောက်၏။ ထို ဘူတာအနီး Hawker Centre မှ Chicken Rice မှာ အခြား နေရာများထက် ပိုကောင်းပါသည်။ ကြက်သားလည်းများသလို ပဲပင်ပေါက်ကလေး၊ သခွားသီးကလေး၊ နံနံပင်ကလေးများနှင့် ဖြစ်ပါ၏။ ထူးခြားသည်မှာ ဟင်းချို ဖြစ်ပါသည်။ အလကားပေးသော သူရို့ဟင်းချိုမှာ အခြားဆိုင်များတွင် သီးသန့်ရောင်းသော ဟင်းချိုကဲ့သို့ သောက်လို့ကောင်းပါ၏။ Chicken Rice တစ်ပွဲကို ၃ ကျပ် ၃၀ ဖြစ်ပါသည်။ စားရတာတန်ပါ၏။ တစ်ရက်ခြားနှစ်ရက်ခြား ကျွန်တော် စားလေ့ ရှိသည်။

သို့သော် တစ်မျိုးတော့ဆန်းသည်။ စင်ကာပူတွင် fruit များကို ဟင်းချက်တာ မိတ်ဆွေတို့ ရိပ်မိပါလိမ့်မည်။ ၀က်သားထဲတွင် နာနတ်သီးထည့်ချက်တာမျိုး ဖြစ်ပါ၏။ သည်ဆိုင်မှဟင်းချိုသည်လည်း တခါတလေ မြေပဲနှင့် ကြက်ခြေထောက်ကို ရောပြုတ်ထားသည်။ တခါတလေတော့ ပြောင်းဖူးနှင့် ကြက်ခြေထောက်ဖြစ်ပြီး အချို့ရက်များတွင် သခွားချိုသီး (old cucumber) နှင့် ကြက်ခြေထောက်ကို ရောပြုတ်ထားတာ တွေ့ရပါသည်။ မည်သို့ပင်ဖြစ်စေ သောက်လို့ကောင်းပါသည်။ မြေပဲဟင်းချိုဆိုလျှင် မြေပဲဆန်အများကြီး ထည့်ပေးပါ၏။ ကျွန်တော်က မြေပဲကြိုက်သူဖြစ်လေရာ ထိုဟင်းချိုကို အလွန်သဘောကျသည်။ သူတို့ဆိုင်တွင်အမြဲစားသဖြင့် သူတို့နှင့်ပင် မိတ်ဆွေ ဖြစ်နေပါပြီ။

ဆိုင်များထဲတွင် ကျွန်တော်ကဲ့သို့ပင် အလုပ်မှအပြန် ထမင်းဝင်စားသူများကို တွေ့ရပါသည်။ အချို့မှာ ဘီယာပုလင်းများ ထောင်လျှက်။ ဆိုင်အပြင်ဘက် စားပွဲဝိုင်းကြီးတစ်ဝိုင်းတွင်မူ တရုတ်အဖိုးကြီးတစ်ဦးသည် အင်တင်နာထောင်ထားသော ရေဒီယိုကို ရှေ့ချကာ ထမင်းစားလျှက်ရှိ၏။ ရေဒီယိုမှ တရုတ်သီချင်းသံများ ကြားနေရသည်။ အဖိုးကြီးဖြစ်နေပြီဆိုတော့ ကိုယ့်ကိုယ်ကိုယ် သိပ်မထိန်းနိုင်။ ခါးမှာ ကုန်းလျှက် မျက်နှာနှင့် စားပွဲမျက်နှာပြင်မှာ တပြေးထည်း ဖြစ်နေ၏။ ဘေးနားတွင်မတော့ ထမင်း၊ ဟင်းများ ပြန့်ကျဲလျှက်။

၎ ပုလင်းထက် မနည်းသော ဘီယာပုလင်းခွံများကို စားပွဲပေါ်ထောင်လျှက် တရုတ်အဖိုးကြီးတစ်ဦးနှင့် မလေးအဖိုးကြီးနှစ်ဦးတို့မှာ ဟောင်ဖွာ ဟောင်ဖွာနှင့် စကားပြောလျှက်ရှိပါ၏။ မလေးလို ပြောနေကြခြင်းဖြစ်ပါသည်။ တရုတ်လို ကာနီနာဟုဆဲသံလည်း တခါတရံ ကြားရတတ်သေးသည်။ ကျွန်တော့်ဘေးစားပွဲတွင်တော့ တရုတ်စုံတွဲမှာ ချစ်နလံထရင်း တွတ်ထိုးနေပါ၏။ ငါးကင်တစ်ပွဲမှာကာ ထမင်းတစ်ယောက် တစ်လုံးစီနှင့် ထမင်းကို တူနှင့်ပက်ကာပက်ကာစားရင်း ရှေ့ရေးကို ဆွေးနွေးနေသည်ထင်ပါ၏။

အချို့ရက်များတွင် ကျွန်တော် Shimizu ဘတ်စ်ကားကြုံနှင့် လိုက်တတ်ပါသည်။ တစ်ခုကောင်းသည်မှာ သူက ဘယ်မှမရပ်ပဲ Jurong East MRT ထိ တောက်လျှောက်မောင်းသဖြင့် အချိန်ကုန်သက်သာပါသည်။ သို့သော် Jurong East MRT မှ Chicken Rice ကမူ မစွံပါ။ ဟင်းချိုလည်းမပါ။ ကြက်သားကလည်း Clementi မှ ဆိုင်နှင့်စာလျှင် တစ်ဝက်ခန့်သာ ရှိပါ၏။ သို့သော် ဈေးကမူ သုံးကျပ်ဖြစ်၏။ Clementi မှဆိုင်နှင့် ယှဉ်လိုက်မည်ဆိုပါက နှစ်ကျပ်လောက်သာ တန်ပါသည်။

တခါတရံ နစီလာမား ( အုန်းထမင်းနှင့် ကြက်ကြော်) စား၊ တခါတလေတော့ Laksa (ဗမာပြည်မှ အုန်းနို့ခေါက်ဆွဲကဲ့သို့) စားပါသည်။ နေ့တိုင်းစားနေရတော့ တခါတလေ ဘာစားရမှန်းတောင် မသိပါ။ ဆိုင်များအား လျှောက်ကြည့်ပြီး မရွေးတတ်တော့သည့်အဆုံး နီးရာဆိုင်ဝင်၊ တည့်ရာ ကောက်ကက်မှာစားလိုက်ပါတော့၏။

စားသောက်ပြီးနောက် MRT နှင့် ပြန်ခဲ့ပါသည်။ ရထားပေါ်မှ ခရီးသည်များမှာ နံနက်ကကဲ့သို့ ရွှင်ရွှင်ပြပြ မရှိတော့။ ပင်ပန်း နွမ်းနယ်သည့်သဏ္ဍာန် ပေါက်နေပါသည်။ အားလုံးမှာ မနက်က အလုပ်သွားစဉ်ကကဲ့သို့ သုတ်သီးသုတ်ပြာ မဟုတ်တော့ဘဲ အေးအေး ဆေးဆေး ဖြစ်သွားပါပြီ။ အနို့ သည်အိမ် ဘယ်ထွက်ပြေးမှာမှမဟုတ်တာ။ အချို့လက်များတွင် ကြွပ်ကြွပ်အိတ်အနီများဖြင့် ညစာကို ဆွဲလာတာ တွေ့ရတတ်ပါသည်။ တစ်နေ့လုံး အလုပ်လုပ်နေရတာဗျာ။ ပင်ပန်းတာပေါ့။ ဘယ် ချက်စားနေတော့မလဲ။ အိမ်ပြန်ရောက်တော့ ၈ နာရီခွဲ။ ရေမိုးချိုး၊ ဘာညာသာရကာ ဟိုလုပ်၊ သည်လုပ်နှင့် ၉ နာရီ ခွဲပါသည်။ အင်တာနက်ဖွင့်။ အီးမေးစစ်။ မြန်မာပြည်သတင်းများဖတ်။ မဟုတ်ကမဟတ်ကများပါလာလျှင် တစ်ယောက်တည်းကြိတ် ဒေါသထွက်။ ပေါက်တတ်ကရများပြောတာတွေ့ရလျှင် တစ်ယောက်ထဲ ကြိတ်ပြုံး။ စာရေးစရာရှိလျှင် ရေး။ သည်လိုနှင့် ၁၁ နာရီကျော်တော့ အိပ်။ တစ်နေကုန်။ နောက်နေ့ကျတော့လည်း သည်အချိန်ထ။ သည် အလုပ်ကိုသွား။ သည်လူများနှင့်ဆက်ဆံ။ သည်ပြဿနာများတွေ့။ အချိန်တန်တော့ အိမ်ပြန်။

ဤသည်မှာပင် ကျွန်ုပ်တို့ စင်ကာပူရောက် မြန်မာများ၏ တစ်နေ့တာ ဘ၀သံသရာ ဖြစ်ပါတော့သတည်း။ 

 

(၁၀၂) အီးစီစီ မြန်မာမိသားစု

            ကျွန်တော်တို့ရောက်စက သည်ကျွန်းပေါ်မှာ ဘာမှမရှိသေး။ သဲသောင်ပြင်ကြီးမျှသာ ရှိသေးသည်။ ထို့အတူ အလုပ်လုပ်သူ ဦးရေမှာလည်း သိပ်မများလှသေး။ သည်ပရောဂျက်၌ လာရောက်လုပ်ကိုင်နေသည့် ကုမ္ပဏီများတွင် မြန်မာများလည်း အများအပြား ရှိလေသည်။ ဂျေဗီတွင် မြန်မာအရာရှိသုံးဦးရှိ၏။ တစ်ဦးမှာ ဦးမြင့်လွင် ဖြစ်ပြီး နောက်တစ်ဦးကတော့ ဦးနေမင်းဟိန်း ဖြစ်သည်။ ကိုနွယ်ဝင်းမှာမူ Safety ဌာနတွင် သင်တန်းပြသည်။ အီးစီစီရောက်သူမှန်သမျှ သူနှင့်လွတ်ကင်းရသူမရှိ။ သူ့ကိုဖြတ်ပြီးမှ အလုပ်လုပ်ခွင့် ရသည်။

သည်တွင်စကားစပ်၍ပြောရလျှင် ဦးနေမင်းဟိန်း ဆိုသည်မှာ သူ့နာမည်အစစ်မဟုတ်။ သူ့နာမည်အရင်းက ကိုနေ၀င်း ဖြစ်၏။ သို့သော် သိတော်မူကြသည့်အတိုင်း နေ၀င်း ဟူသော အမည်မှာ မြန်မာလူမျိုးတိုင်း အော့နှလုံးနာလျှက်၊ ကြားရသည့်နေရာတွင် ဖနောင့်နှင့်ပေါက်ချင်စရာ အမည်နာမဖြစ်လေရကား ကိုနေ၀င်းမှာလည်း သူ့နာမည်ကို အမုန်းကြီးမုန်းသည့် သကာလ စင်ကာပူရောက်သည့် အခါ နေ၀င်းကို ဖျောက်လျှက် နေမင်းဟိန်းဟု လုပ်လိုက်လေတော့သည်။

            ဦးမြင့်လွင်မှာ ခပ်ပျော်ပျော်သမားဖြစ်သည်။ သူက ကိုအော်ဒီနေတာ ဆိုတော့ သည်ပရောဂျက်တွင်လုပ်သမျှလူအားလုံး သူနှင့် လွတ်ကင်း၍မရနိုင်။ သူ့ဆီသို့သာ ဦးတိုက်ကြရလေ၏။ ထိုအခါ သူက သူ့ဆီရောက်လာသမျှလူအားလုံးကို ခင်ဗျားက ဘယ်သူတုံး၊ ဘာတွေလုပ်သတုံး၊ ဘာလူမျိုးလဲ၊ ဘယ်မှာနေသလဲ ဟု မေးမြန်းစပ်စုသည်။ မြန်မာဆိုလျှင် ဆွဲစိတော့၏။ ကျွန်တော်က မြန်မာပါဟု ဆိုလိုက်လျှင် ဟာဟုတ်လား၊ နာမည်ဘယ်လိုခေါ်လဲ။ ဟဲ့၊ ဘယ်သူရေ ဟောဒီမှာ သူကတော့ ဘယ်ကုမ္ပဏီက ကိုဘယ်သူတဲ့။ ဘာတွေလုပ်တာ စသဖြင့် မိတ်ဆက်ပေးကာ မြန်မာအသိုင်းအ၀ိုင်း ချဲ့ထွင်ရေးလုပ်ငန်းကို တစိုက်မတ်မတ်လုပ်သတည်း။ ဦးမြင့်လွင် ကောင်းမှုကြောင့် အီးစီစီပရောဂျက်ရှိ မြန်မာများမှာ သူ့ငါသိ၊ ငါ့သူသိနှင့် အချိန်တိုအတွင်းမှာပင် အားလုံးမိတ်ဆွေအပေါင်းအသင်းများ ဖြစ်ကုန်ကြလေသည်။  

            ထိုမျှသာမကသေး။ သူက ဒီမယ်ကိုအေးငြိမ်း၊ ဒီမှာလုပ်နေတဲ့ မြန်မာအလုပ်သမားလေးတွေ အများကြီးရှိတယ်။  ကျွန်တော်တို့ လူကြီးတွေစုပြီး တစ်ခုခုလဲကျွေးရင်း၊ သူတို့နဲ့ဆုံရအောင်။ နောက်ပြီး သူတို့လိုအပ်တဲ့ အခက်အခဲတွေလည်း ကူညီလို့ရတာပေါ့ ဟု တိုင်ပင် လေရာ ကျွန်တော်တို့ကလည်း ကောင်းပါလေ့ဟု သဘောတူလျှက် ရက်အချိန်းအချက်လုပ်ကာ ပိုက်ဆံစုကြသည်။ အကျွေးအမွေးကိုတော့ သိပ်ခေါင်းစားစရာမလိုဘဲ ဆိုင်များမှမှာသည်။ ပထမဦးဆုံးပွဲတွင် မြန်မာဆိုင်တစ်ခုမှ (နာမည်တော့မပြောပြစေနှင့်) မုန့်ဖက်ထုပ်နှင့် ဘာလဲ မှာလိုက်သည်။ အာလာမ။ မြန်မာဆိုတော့ မြန်မာကိုမှ မနှိပ်ကွပ်။ ဘယ်သူ့နှိပ်ကွပ်မလဲ ဟု တရားသေယူဆထားသည့် ထုံးစံအတိုင်း အသားလွတ် ဆော်ပလော်တီးထည့်လိုက်၏။ သည်တစ်ပွဲနှင့်ပင် ကျွန်တော်တို့ အတော်လေးအီစလန်ဝေသွားသည်။ တစ်ခါဆက်ဆံ၊ ဆယ်ခါလံ ဟူသောမူကိုလက်ကိုင်ထားသည်ထင့်။ နောက်ပွဲများတွင် မြန်မာဆိုင်မှမှာမည်ဆိုပါက ကျွန်တော်ပိုက်ဆံတစ်ပြားမှ မထည့်နိုင်ပါ ဟု အမုန်းခံကာ ကျွန်တော်ကြေငြာလိုက်သည်။ သည်တော့မှ အခြားသူများကလည်း သူတို့မကျေနပ်ချက်များကို ရင်ဖွင့်လာသည်။ ဤသည်မှအစပြု၍ နောက်ပိုင်းလုပ်သောပွဲများတွင် ကန်တင်းမှ ကုလားဆိုင်တွင်သာ မှာတော့သည်။ ကောင်းလည်းကောင်းသည်။ ဈေးလည်းသက်သာပါ၏။ (မြန်မာဆိုတာနော်၊ ရောက်တဲ့နေရာမှာ မျိုးကိုမစွန့်ဘူး။ ကျွန်တော်လည်း မြန်မာစစ်စစ်ပါဘဲခင်ဗျ။)

            လုပ်သည့်အချိန်မှာ နေ့ခင်း ထမင်းစားချိန်ဖြစ်သည်။ ကျွန်တော်က မရှက်မကြောက် လူများကြားထဲလိုက်လံ ဆော်သြကာ ကောင်လေးများကို တစ်နေရာထဲ စုခိုင်း၊ နောက်မှာထားသော အစားအသောက်များ ကျွေးမွေးလျှက် ကိုယ့်ကိုယ်ကိုယ်မိတ်ဆက်ကာ သာရေး၊ နာရေးအပါအ၀င် အခက်အခဲတစုံတရာရှိပါက ကျွန်တော်တို့ဆီလာခဲ့ပါမည့်အကြောင်း၊ တတ်နိုင်သမျှ နှုတ်၏စောင်မခြင်း၊ လက်၏ စောင်မခြင်းများ ပြုလုပ်ပေးပါမည့်အကြောင်းများပြော၏။

            နောက်တော့ သည်လိုပွဲများလုပ်လျှင် လူစုရလွယ်စေရန် ဦးမြင့်လွင်ကပင် ကမကထလုပ်ပြီး ကုမ္ပဏီများမှ ကြီးကြီးမာစတာများ စာရင်းပြုစုကာ ကော်မတီလေးတစ်ခု ဖွဲ့လိုက်သည်။ သည်တော့ လူစုလိုလျှင်၊ အကြောင်းကိစ္စတစ်ခုခု အကြောင်းကြားလိုလျှင် သည်လူကြီး များကို ပြောလိုက်လျှင် ပြီးတော့၏။ ထိုစဉ်က ဖွဲ့ထားသောအဖွဲ့၌ JV မှ ဦးမြင့်လွင်၊ ကိုနေမင်းဟိန်း၊ ကိုနွယ်ဝင်း။ Rotary Engineering မှ ဦးသန်းထွန်းမြင့်၊ ဦးဝင်းမြင့်။ Jireh မှ ဦးဝင်းတင်။ Shimizu မှ ဦးသန်းမြင့်ဦး၊ ဦးသန်းဝင်း။ Sankyu မှ ကိုဇော်ဝင်းနိုင်။ Leads Engineering မှ ကိုသိန်းလှိုင်။ UTOC မှ ဦးစောဝေ။ HSL Construction မှ ဦးလှလွင်။ PEC မှ ကိုလှိုင်သူထွန်း။ Meisei မှ ကိုတင့်လွင်။ Mun Song မှ ကိုအောင်ကျော်ခိုင်။ Well Transport မှ ကိုမြတ်မင်းဦး။ Hai Leck မှ ကိုစိုးရဲ။ JEL မှ ဦးဝင်းလွင် နှင့် Union Alloy မှ ကျွန်တော်တို့ ဖြစ်လေသည်။ သို့သော်လည်း ကျွန်တော်တို့ ကုမ္ပဏီတွင် မြန်မာဟူ၍ များများစားစားမရှိ။ ကျွန်တော်တို့ subcon ဖြစ်သည့် Wecom မှ ကိုဇေယျာထွန်း တစ်ယောက်သာရှိသည်။ ကိုဇေယျာထွန်းမှာ ရွှတ်နောက်နောက်နှင့် အလွန်ဖင်ပေါ့သူ ဖြစ်လေသည်။

 

၂၀၀၇ ခုနှစ်လောက်ကတော့ ပရောဂျက်တစ်ခုလုံးမှ လူ ၃၀၀၀ လောက်သာရှိသည်။ မြန်မာအရေအတွက်မှာလည်း ၁၀၀ ခန့်သာ ဖြစ်၏။ သို့သော် ၂၀၀၉ ခုနှစ်ရောက်သော် ပရောဂျက်မှလူအင်အားမှာ စုစုပေါင်း တစ်သောင်းကျော်ဖြစ်ပြီး မြန်မာဦးရေမှာလည်း ၈၀၀ ခန့် ဖြစ်လာသည်။

            ဦးမြင့်လွင်၏ အကြံပေးမှုဖြင့် ကျွန်တော်တို့လည်း ကထိန်ပွဲကလေး၊ ၀ါဆိုပွဲကလေး၊ စားပွဲသောက်ပွဲကလေးများ ကျင်းပကြသည်။ ဦးမြင့်လွင်မှာ အစ္စလာမ်ဘာသာဝင်ပင်ဖြစ်သော်လည်း ကျွန်တော်တို့ကို ကထိန်ပွဲလုပ်ဘို့၊ ၀ါဆိုပွဲလုပ်ဘို့ အမြဲသတိပေးသည်။ နောက်ပြီး ပရောဂျက်ထဲမှ မြန်မာတစ်ယောက်ယောက် နေမကောင်းထိုင်မသာ ဖြစ်လျှင်သော်လည်းကောင်း၊ သူတို့မိသားစုဝင်တစ်ဦးဦးဆုံးပါးလျှင် သော်လည်းကောင်း အလှူငွေများကောက်ခံကာ ၀ိုင်းဝန်းပံ့ပိုးကြသည်။

အီးစီစီကောင်းမှုကြောင့်၊ တစ်နည်းအားဖြင့်လည်း ဦးမြင့်လွင်၏လှုံ့ဆော်မှုကြောင့် ကျွန်တော့်မှာ မိတ်ဆွေသစ်အများကြီး တိုးရ သည်။ မြန်မာအဖွဲ့အစည်းလေး သိုက်သိုက်ဝန်းဝန်းနှင့်ဆိုတော့ ပျော်စရာလည်းကောင်းပါ၏။ သည်တော့ ကန်တင်းတွင်ထမင်းစားရင်း မြန်မာအလုပ်သမားကလေးများနှင့် တွေ့ဆုံကာ သူတို့အကြောင်း တစေ့တစောင်းမေးမြန်းဖြစ်ပါသည်။ သည်တော့ သူတို့အကြောင်း အနည်းငယ်သိလာရ၏။

            စင်ကာပူသို့လာ အလုပ်လုပ်သည်ဆိုသော်လည်း လာသည့်သူတိုင်းအဆင်ပြေသည်ဟု မထင်မှတ်ကြပါလင့်။ အဆင်ပြေသူများ ရှိသလို အဆင်မပြေသူများလည်း အများကြီးရှိပါသည်။ မသိနားမလည်မှုကို အခွင့်ကောင်းယူကာ သူတစ်ပါးမျက်ရည်များနှင့် ပိုက်ဆံရှာသူ များအကြောင်းကိုလည်း ပိုပြီးသိလာရသည်။ လောကတွင်မတရားမှုများကို မြင်တွေ့လာရသည့်အခါတိုင်း မည်သူ့ကို အပြစ်တင်ရမှန်းမသိ။ ကိုယ်ကြီးပွားချမ်းသာရေးအတွက် သူတစ်ပါးကိုဒုက္ခရောက်စေသူ အနှီယမမင်း၏ သားသမီးမြေးမြစ်များကို ကျွန်တော် တတောင်နှင့် ထောင်းလိုလှပါသည်။ ထိုသူများကို အလွန်လည်းစက်ဆုပ်ရွံရှာမိပါ၏။ သည်ကိစ္စများအတွက် မည်သူ့မှာတာဝန်ရှိပါသနည်း။ ဘုရားသခင်ကိုပဲ အပြစ်တင်ရမည်လော။ 

            ထိုအခါ မျက်လုံးအပြူးသားနှင့် ထိုသကောင့်သားကလေးများအတွက် ငါတတ်နိုင်တာ တစ်ခုခုလုပ်ပေးရလျှင် ကောင်းမည်ဟု     စိတ်ကူးရလေ၏။ ဘာလုပ်ရကောင်းမလဲ စဉ်းစားတော့ သူတို့ကို စင်ကာပူတွင် ဆက်အလုပ်လုပ်မည်ဆိုပါက သည့်ထက်ပိုကောင်းမည့် လခလည်းပိုရနိုင်စေမည့် အလုပ်များအတွက် နတ်လမ်းညွှန်ပေးရလျှင် ကောင်းလေစွဟု တွေးမိလေ၏။ ထို့ပြင်တ၀ ၂၀၀၈ ခုနှစ် အောက်တိုဘာလတွင် မိတ်ဆွေများ၏ ကောင်းမှုဖြင့် ခေတ်ပြိုင်နှင့်လျှပ်တပြက်ဂျာနယ်များတွင်ပါသည့် ဆရာဦးအောင်သင်းနှင့် အင်တာဗျူး ဆောင်းပါးကိုဖတ်မိပြီး စင်ကာပူတွင်အလုပ်လုပ်နေသူများအတွက် သူတို့ဘ၀တိုးတက်ရာတိုးတက်ကြောင်း စာတစ်ပုဒ်ရေးထုတ်ရန် ကြိုးစားပါလေတော့သည်။ ဤသည်ပင်လျှင် “အနာဂတ်တစ်ခု ဖန်တီးတည်ဆောက်ခြင်း” စာအုပ်၏ အစဖြစ်ပါတော့သည်။

 

(၁၀၃) အနာဂတ်တစ်ခု ဖန်တီးတည်ဆောက်ခြင်း စာအုပ်ရေးခြင်း

            သူတို့ကိုပေးရမည့် အဓိကအချက်မှာ စင်ကာပူတွင် မည်ကဲ့သို့သောအလုပ်များရနိုင်သည်။ သည်အလုပ်များလုပ်ရန် မည်သည့် လက်မှတ်များလိုသည်။ မည်သည့်အလုပ်ကတော့ မည်မျှလခရနိုင်သည် စသည်တို့ပင်ဖြစ်၏။ ထို့ကြောင့် ဆောင်းပါးရေးရန်လိုသည့် အချက်အလက်များ စတင်စုဆောင်းပါသည်။ ကျွန်တော် သည်ဆောင်းပါးစတင်ပြုစုတာ ၂၀၀၈ ခုနှစ် အောက်တိုဘာလ နောက်ဆုံးပတ်။

            အမှန်ပြောရလျှင် ကျွန်တော်ကိုယ်တိုင်လည်း ယခုသည်ဆောင်းပါးမရေးမီက ထိုအချက်အလက်၊ သတင်းပလင်းများကို ရေရေ ရာရာသိသည်မဟုတ်ပါ။ ဆောင်းပါးရေးရန် လိုက်လံရှာဖွေစုဆောင်းတော့မှ သိလာရတာဖြစ်ပါသည်။ စင်ကာပူမှာကတော့ လွယ်ပါသည်။ မည်သူ့မှ လိုက်မေးနေစရာမလိုပါ။ သက်ဆိုင်ရာ အင်တာနက် website များကို သွားရောက်မွှေနှောက်လိုက်လျှင် လိုချင်တာအကုန်ရပါ သည်။ ကျွန်တော်အဓိကကြည့်ရမည့် website များမှာ MOM, ICA, BCA, NTUC Learning Hub စသည်တို့ ဖြစ်ပါသည်။ လခအကြောင်း ကတော့ သူတို့စာရင်းပြုစုထားတာပင်ရှိသော်လည်း နိုင်ငံခြားသားအလုပ်သမားများနှင့် မနီးစပ်ပါ။ သာမန်အလုပ်သမားအဆင့်ကတော့ တကယ်လက်တွေ့လုပ်နေသူများကို လိုက်လံစုံစမ်း မေးမြန်းရပါသည်။

            ကျွန်တော်စတင်ရေးစဉ်က ၀ပ်ပါမစ်များအတွက် ရည်ရွယ်ရေးခြင်းဖြစ်သဖြင့် စင်ကာပူတွင် ထုတ်ပေးသည့် Workpass အမျိုးအစားများနှင့် ၎င်းတို့အကြောင်းအသေးစိတ်၊ ၀ပ်ပါမစ် ဆိုတာဘာကိုခေါ်သည်။ ဘယ်လိုလူမျိုးတွေကို ၀ပ်ပါမစ် ထုတ်ပေးသည်။ ၀ပ်ပါမစ်သမားတို့၏ ရပိုင်ခွင့်၊ ၀ပ်ပါမစ်အတွက် အလုပ်ရှင်မှတာဝန်ယူရသည့်အပိုင်း၊ အလုပ်ရှင်ဘက်မှ မည်သည့်အရာများကို ထောက်ပံ့ ပေးရမည်။ အချိန်ပိုမည်မျှဆင်းလျှင် မည်မျှရသင့်သည်။ အခွန်ကို မည်သို့ဆောင်ရမည်။ မည်သည့်နေရာများ၌ မည်သည့် သင်တန်းများ တက်နိုင်သည်။ မည်သည့်လက်မှတ်ရှိလျှင် လခမည်မျှရသော အလုပ်များရနိုင်သည် - စသည်တို့ကို အသေးစိတ်ဖော်ပြထားပါသည်။ စုစုပေါင်း A4 size နှင့် စာမျက်နှာ ၄၀ ခန့်ရှိ၏။

၎င်းကိုစာအုပ်ချုပ်ကာ သူတို့ကို ဝေပေးသည်။ ပထမ A4 နှင့်ချုပ်ရာ ဖတ်ဖို့ရာ သိပ်အဆင်မပြေ။ ကိုင်လို့တွယ်လို့မကောင်း။ ထို့ကြောင့် A5 အရွယ်ပြန်ပြင်ကာ စောင်ရေတော်တော်များများ ကော်ပီကူးပေးလိုက်သည်။ မိမိနှင့်နီးစပ်ရာ မိတ်ဆွေသူငယ်ချင်းများ အားလည်း ဝေမျှဖတ်ရှုရန် မှာလိုက်ပါသည်။

            ထိုစာအုပ်ကလေးကို ကိုဌေးဝင်းနိုင်သို့ပြသောအခါ သူက ဒီလိုဖြင့်ကိုအေးငြိမ်းရယ်။ စင်ကာပူမှာ နေတဲ့ထိုင်တဲ့အကြောင်းတွေ ကိုပါ ကုန်ကျစရိတ်တွေနဲ့တကွရေးလိုက်ရင် ပိုပြည့်စုံသွားတာပေါ့ဗျာ ဟု အကြံပြု၏။ ကျွန်တော်လည်း သဘောတူပါသည်။ သို့သော် ပြဿနာက အချိန်အခက်အခဲဖြစ်၏။

 

 ပြင်တာဆင်တာ၊ စားတာသောက်တာ၊ သွားတာလာတာအားလုံး အပါအ၀င် အလုပ်ချိန်အတွက် မနက် ၅ နာရီခွဲကနေ ည ၉ နာရီ ခန့်ထိ ပေးထားရရာ အချိန်ပိုဟူ၍ လုံးဝနီးပါးလောက်မရှိ။ ညဘက် ၂ နာရီခွဲ ၃ နာရီမျှသာ အချိန်ရရာ စာရေးချိန်အလွန်နည်းပါသည်။

            သို့သော်လည်းပေါ့လေ။ တစ်ခုကောင်းသည်မှာ ကျွန်တော်က နှစ်နာရီမှတစ်ခါ ဂက်စ်သွားတိုင်းရတာဆိုတော့ သွားချိန်လာချိန် နှုတ်လိုက်လျှင်ပင် အနည်းဆုံး တစ်နာရီကျော်ကျော် အနားရသည်။ ထိုတစ်နာရီကျော်အတွင်း၌ ကျွန်တော်စာရေးသည်။ ဤသည်မှာ အလုပ်ချိန်အတွင်းစာရေးသည်ဖြစ်၍ အလီဘာဘာလုပ်သည်ဟု စွပ်စွဲနိုင်ပါသည်။ သို့သော် ကျွန်တော် လုပ်စရာရှိတာအားလုံးလုပ်ပြီး အားနေသည်ဆိုမှ ရေးခြင်းဖြစ်ပါသည်။ နောက်ပြီး ခိုးကြောင်ခိုးဝှက်ရေးခြင်းမဟုတ်ပါ။ ရုံးခန်းထဲထိုင်ရေးခြင်းဖြစ်သည့်အတွက် ကျွန်တော် စာရေးတာ အားလုံးသိပါသည်။ သူတို့လာမေးလျှင်လည်း ကျွန်တော်ဘာတွေကို ဘာ့ကြောင့်ရေးနေသည်ဆိုသည်ကို သူတို့အား ရှင်းပြပါသည်။ သူတို့ကလည်း ဘာမှမပြောပါ။ ထို့ကြောင့် ဤကဲ့သို့အလုပ်ချိန်အတွင်းစာရေးတာ ကျွန်တော်ကိုယ့်လိပ်ပြာကိုယ် သန့်ပါ သည်။ ထို့ပြင်တ၀ ကျွန်တော့်အကျိုးစီးပွားအတွက်၊ ပိုက်ဆံရလိုမှုအတွက် ရေးခြင်းမဟုတ်ဘဲ မြန်မာလူငယ်လူရွယ်တို့အကျိုးရှေးရှူရေးခြင်း ဖြစ်သဖြင့်လည်း စိတ်လုံပါသည်။

            ဒါပေသိ၊ အလုပ်ထဲမှာရေးရတာဆိုတော့ အဘယ်မှာလျှင် စိတ်ဖြောင့်ဖြောင့် ရေးနိုင်ပါမည်နည်း။ ဟိုလူက လာမေးလိုက်။ ဟိုဟာ လာပြောလိုက်။ ဟိုလူဝင်၊ ဒီလူထွက်။ ဆိုတော့ အလုပ်ထဲ၌ စာရေးသည်ဆိုခြင်းထက် အချက်အလက်များစုသည်ဆိုခြင်းက ပိုမှန်ပါလိမ့် မည်။

            သည်တော့ သည်စာအုပ်ရေးတာ ၂၀၀၈ ခုနှစ်နိုဝင်ဘာမှ ၂၀၀၉ ခု ဇူလိုင်လထိ ၉ လတာမျှကြာပါသည်။ စာအုပ်ရေးပြီးတော့ ထုတ်ဝေရေးအတွက် စုံစမ်းပါသည်။ ကိုဌေးဝင်းနိုင်က သူ့မ်ိတ်ဆွေ ကိုမိုးမင်းသိန်းနှင့် ချိတ်ပေးသည်။ သူတို့က ရိုက်ရုံသာရိုက်ပေးပြီး ကုန်ကျ စရိတ်နှင့် ဖြန့်ချီရေးကို ကိုယ့်ဘာသာကိုယ်တာဝန်ယူလုပ်မှာ ဖြစ်ပါသည်။ 

            သို့သော်ထုတ်ဝေရေး၌ ကိစ္စအတော်များပါသည်။ ၂၀၀၉၊ သြဂုတ်လမှစလုပ်တာ ၂၀၁၀ ဇန္န၀ါရီမှ စာအုပ်ထွက်လာသည်။ ဆိုတော့ စုစုပေါင်း ၆ လကြာသည်။ ကျွန်တော့်မှာ စိတ်လည်းမော၊ လူလည်းမောပါ၏။ ကိုမိုးမင်းသိန်းကို စာအုပ်ကိစ္စဖုံးဆက်တိုင်း ဖုံးကအမြဲလိုလို (လူကြီးမင်းခေါ်ဆိုသော ဖုံးမှာ ဆက်သွယ်မှုပြင်ပ ဧရိယာကိုရောက်နေပါတယ်ရှင်) ဟုနှင့်သာ အမြဲတိုးသည်။ ဖုံးခေါ်နေသည့်တိုင် ပြန်မထူးပါ။ ဆက်သွယ်လို့ ရပြန်တော့လည်း အသံက ၀ူးဝါးဝူးဝါးနှင့် ပြတ်ပြတ်သားသား မကြားရ။ အိမ်လိုက်သွားတော့လည်း ပြန်မအိပ်တာ ကြာပြီဗျ။ ဘယ်သွားတယ် မသိဘူးဗျ စသည်ဖြင့်သာ ဖြစ်ပါ၏။

သည်စာအုပ်ကို ထွက်ချင်လို့သာအတင်းတွန်းလုပ်နေရသည်။ စိတ်ကျေနပ်မှု နည်းနည်းမှမရှိပါ။ ပိုက်ဆံဆိုတာကတော့ လျှောကနဲ၊ လျှောကနဲထွက်သွားတာ။ စာအုပ် ၁၅၀၀ ရိုက်တာ စင်ကာပူဒေါ်လာ ၇၀၀၀ (ကျပ် သိန်း ၅၀ ကျော်) ကုန်ပါသည်။ ထွက်တော့သာ အလုံးလိုက်အခဲလိုက် ထင်သာမြင်သာထွက်သွားသည်။ ပြန်ဝင်လာတော့ ငါးသောင်းဝင်၊ တစ်သိန်းဝင်။ ဆိုင်များက အများဆုံးရှင်းပေးပါမှ ၃ သိန်း ဖြစ်၏။ သည်တော့ ထိုပြန်ဝင်လာသောပိုက်ဆံများမှာ ဈေးသုံးထဲသို့ရောက်သွားသဖြင့် ပြန်မမြင်ရတော့ပါ။ ညီမဖြစ်သူကတော့ စုပေးထားပါသေး၏။ သို့သော် တစ်နှစ်ကျော်မှအရင်းကျေသဖြင့် အဘယ်မှာလျှင် တစ်နှစ်ပြည့်အောင် စောင့်နေနိုင်ပါ မည်နည်း။

စာအုပ်ဈေးအနည်းငယ်ကြီးသွားသည်မှာ ကျွန်တော်က ပုံအားလုံးကို ရောင်စုံနှင့်ရိုက်သောကြောင့် ဖြစ်ပါသည်။ အဖြူအမဲပုံ များကိုတော့ အာရုံမလာပါ။ နဂိုကတည်းက အမြတ်မကျန်ချင်နေပေ့စေ။ ရောင်စုံရိုက်မည်ဟု စိတ်ကူးထားတာ ဖြစ်ပါသည်။ တကယ်ရိုက် တော့လည်း အဖြူအမဲစာအုပ်ဈေးနှင့် အရမ်းမကွာလှပါ။ သို့သော် ဆွဲဆောင်မှုခြင်း အများကြီးကွာပါသည်။

ထို့ပြင် စာပေစိစစ်ရေးမှ ပြန်ကျလာသည့် စာမူကို ကျွန်တော့်ကိုမပေးပါ။ ကျွန်တော်က မေးသောအခါ ဗမာပြည် ကို မြန်မာနိုင်ငံလို့ ပြောင်းပေးပါ။ ထိုင်ဝမ်ကို တရုတ်ပြည် (တိုင်ပေ) လို့ပြောင်းပါ။ ကျန်တာ ဘာမှမပြင်ရပါဟု ဆိုပါသည်။ ကျွန်တော်လည်း အဟုတ်မှတ်လို့ သူပြောတာလောက်တင် ပြင်ပေးလိုက်၏။ သို့သော် စာအုပ်ထွက်ပြီးနောက်ပိုင်း သူ့ဆီမှ ဖလင်များ၊ စာမူအကြမ်းများ၊ ထို စာပေစိစစ်ရေး မှပြန်ကျလာသောစာမူများကို အားလုံးပြန်တောင်းတော့မှ သူပြောတာတင်မဟုတ်ဘဲ အချို့ပုံများကိုပါ ဖြုတ်ခိုင်းထားတာတွေ့ရပါသည်။ သို့သော် စာအုပ်ကထွက်နေပြီ။ တော်ပါသေး၏။ ဘာပြဿနာမှ မတက်လိုက်လို့။ လုပ်ပုံတွေပြောပါတယ်။

ဖြန့်တာကို ရာပြည့်သို့ ကော်မရှင်စားနှင့်ပေးဖြန့်ခိုင်းသည်။ ကိုယ်ကစာပေနယ်ထဲ တစ်ခါမှမလုပ်ဖူးသဖြင့် ဖြန့်နေကျဖြစ်သော သူတို့ကို အဖြန့်ခိုင်းခြင်း ဖြစ်ပါသည်။ သူတို့က နာမည်ကြီးဆိုတော့ ဆိုင်စုံတင်ပေးမည်၊ အထက်မြန်မာပြည်၊ အောက်မြန်မာပြည် အကုန် ဖြန့်မည်အထင်နှင့် ပေးခြင်းဖြစ်၏။ စာအုပ်များပေးစဉ်ကလည်း သူတို့ကိုလည်း နယ်စုံ၊ ရန်ကုန်မှ ဆိုင်စုံတင်ပေးပါဟု မှာလိုက်ပါသည်။ စာအုပ် ၄၅၀ ပေးခဲ့၏။ သူတို့ကို ဖြန့်ခိုင်းအပြီး နောက် ၃-၄ လလောက်ကြာတော့ ရန်ကုန်မှဆိုင်များသို့ လိုက်စုံစမ်းကြည့်ပါသည်။ မြို့ထဲမှ ဆိုင်များ၊ ဆင်ခြေဖုံးမှဆိုင်များသို့ လိုက်မေးကြည့်၏။ ကျွန်တော့် စာအုပ်ကိုမတွေ့ရပါ။ ကျွန်တော်လည်း ထိုလူများကို စိတ်ကုန်လှသဖြင့် စာအုပ်ထုပ်ကြီးကို အငှားကားနှင့်တင်ကာ မမနှင့် မောင်နှမနှစ်ယောက် မြို့ထဲမှဆိုင်များမှ စကာ တစ်ဆိုင်ဝင် တစ်ဆိုင်ထွက် လိုက်ဖြန့်ပါ သည်။

ပထမဦးဆုံး စ,၀င်တာ စာပေလောက စာအုပ်ဆိုင်များနှင့် ပန်းဆိုးတန်းမှ ဆိုင်များဖြစ်ပါသည်။ စာပေလောက ကလည်း မြိ့ထဲမှာ တင် စာပေလောက (၁) (၂) (၃) (၄) (၅) ဟု ဆိုင်ခွဲ ၅ ခုရှိသည်။ ကျွန်တော်တို့က သည်ဆိုင်ခွဲအားလုံး အတူတူပဲ။ စာပေလောက လက်ခွဲ များဟု ထင်သည်။ မဟုတ်ပါ။ အချို့စာပေလောကဆိုင်များမှာ နာမည်ပင်တူသော်လည်း စာပေလောက ပင်မဆိုင်၏ ဆိုင်ခွဲမဟုတ်ပါ။ ထို့ကြောင့် သူတို့ကို သပ်သပ်ပေးရသည်။ စာပေလောက ပင်ရင်းဆိုင်ကတော့ သူတို့ဆိုင်ခွဲ ၁၂ ခုရှိသည်။ အားလုံးတင်ပေးပါမည် ဆိုကာ စာအုပ်တော်တော်များများ ယူထားလိုက်ပါသည်။

နောက် ပန်းဆိုးတန်းမှ ပညာရွှေတောင်၊ အမေ့အိမ် စသည့်ဆိုင်များသို့ လိုက်တင်သည်။ အားလုံးဖော်ဖော်ရွေရွေပင် ဖြစ်ပါသည်။ မြေနီကုန်းမှဆိုင်တွင်လည်း တင်သည်။ သို့သော် စူပါမားကက်များအတွင်းမှ စာအုပ်ဆိုင်များသို့လိုက်မေးရာ သူတို့က စာအုပ်ဖြန့်သည့် ကိုယ်စားလှယ်များ၏ စာအုပ်များကိုသာတင်ပါသည် ဆိုသဖြင့် မတင်ခဲ့ရပါ။ သို့သော် မြေနီကုန်းမှ ဒဂုံစင်တာ ထင်ပါသည်။ သူကမူ ဘယ်ဂျာနယ်ဆိုပါလိမ့်၊ အဲဒီဂျာနယ်ကနေတင်ပါ၊ ရပါတယ်။ သူတို့ဆက်ပေးပါမယ်ဆိုသဖြင့် သူတို့ဆိုင်တွင် တင်ရပါသည်။

အများဆုံးရောင်းရသည့်ဆိုင်များမှာ ပညာရွှေတောင်၊ အမေ့အိမ် နှင့် စာပေလောကတို့ ဖြစ်ပါသည်။ သို့နှင့် ၂၀၁၀ခုနှစ် ဇွန်လ၏ တစ်ခုသောနေ့ရက်တွင် ကျွန်တော့် အနာဂတ်တစ်ခုစာအုပ်မှာ အရောင်းရဆုံး နံပါတ် (၇) ဖြစ်ကြောင်း MRTV 4 တွင်ဖော်ပြသည်ဟု မမတို့က ဖုံးဆက်ပါသည်။ များမကြာမီ ဇူလိုင်လသို့ရောက်သောအခါ ကျွန်တော့်စာအုပ်မှာ အရောင်းရဆုံး နံပါတ် (၂) တွင်ရှိသည်ဟု ကိုနွဲ့ဝင်းက အီးမေးပို့လာပါ၏။ မမတို့ကလည်း ပြောပြသည်။ သည်သို့ကြားရသည့်အခါ ကျွန်တော်အလွန်ဝမ်းမြောက်ဝမ်းသာ ဖြစ်မိပါသည်။

အနာဂတ်တစ်ခု ဖန်တီးတည်ဆောက်ခြင်းကို ရေးတာ ပိုက်ဆံလိုချင်လို့မဟုတ်ပါ။ စင်ကာပူသို့ အလုပ်လုပ်ရန်ဖြစ်စေ၊ ပညာသင် ကြားရန်ဖြစ်စေ။ ဆေးကုရန်ဖြစ်စေ၊ ယုတ်စွအဆုံး အလည်လာလိုလျှင်ဖြစ်စေ၊ စင်ကာပူဆိုတာ ဘယ်လိုရှိသည်။ ဘယ်လိုစည်းမျဉ်း စည်းကမ်းတွေရှိသည်။ ဘယ်လိုသယ်ယူပို့ဆောင်ရေး စနစ်တွေရှိသည်။ သူတို့ဘယ်လိုနေကြ စားကြသည်။ ကုန်ဈေးနှုန်းများ၊ လေယာဉ် လက်မှတ်ခများ၊ ဗီဇာလျှောက်ပုံလျှောက်နည်း။ စင်ကာပူအကြောင်း အားလုံးကို မသိတာမရှိရလေအောင် အသေးစိတ် ရေးထားတာ ဖြစ်ပါ သည်။ စင်ကာပူလမ်းညွှန်အဖြစ် အခြားသူများရေးထားတာ ရှိပါသည်။ ကျွန်တော်လည်း ဖတ်ဖူးပါသည်။ သို့သော် ယှဉ်ကြည့်ပါခင်ဗျား။ ကျွန်တော်ကြွားပြောတာမဟုတ်ပါ။ ကျွန်တော် စင်ကာပူကိုလာမည်ကြံစဉ်က စင်ကာပူဆိုတာ ဖြူသလား၊ မဲသလား။ ဘယ်လိုနေပါလိမ့်၊ ဘယ်အလုပ်လုပ်လို့ လခဘယ်လောက်ရပါလိမ့်။ ဘာဆိုဘာမှ မသိပါ။ ထို့ကြောင့် ဤစာအုပ်ကို ရေးခြင်းဖြစ်ပါသည်။

စ,ရေးခါစကမူ သည်မျှလောက် စုံစုံပါလိမ့်မည်ဟု ကျွန်တော်ကိုယ်တိုင်ပင် မထင်မိပါ။ ကျွန်တော်ရေးပြီးသမျှကို ကျွန်တော့် ဘလော့ပေါ်တင်လိုက်တော့ အပေါင်းအသင်း မိတ်ဆွေများက လာဖတ်လျှက် ဟိုဟာလေးထည့်ရင်ကောင်းမယ်၊ ဒီဟာလေးထည့်ရင် ကောင်းမယ်နှင့် ထပ်ထည့်ရင်း သည်မျှ စုံစုံလင်လင်ဖြစ်သွားခြင်း ဖြစ်ပါသည်။ သို့သော် စာအုပ်ပြီးသွားသည့်တိုင် ကျွန်တော့်မှာ သိပ် မကျေနပ်သေးပါ။ ထပ်ထည့်ချင်တာ အတော်များများ ကျန်ပါသေးသည်။ သို့သော် စာအုပ်မှာ သိပ်ထူသွားပြီဖြစ်သဖြင့် အရှိန်သတ်ထား လိုက်ခြင်းဖြစ်ပါ၏။

  သည်စာအုပ်ထုတ်လိုက်တာ အတွေ့အကြုံအများကြီးရပါသည်။ စာရေးဆရာများကိုလည်း အတော့်ကို ကိုယ်ချင်းစာမိသွားရ ပါသည်။ အရောင်းရဆုံး နံပါတ်(၂) ချိတ်တဲ့စာအုပ်တောင် အရင်းကျေဘို့ တစ်နှစ်လောက်ရောင်းယူရရင် နံပါတ်မချိတ်တဲ့စာအုပ်တွေ ဘယ်နှယ်နေပါလိမ့်။ စာရေးဆရာတွေ သနားပါတယ်ဟယ် ဟု မမက ပြောပါသည်။ ညီမဖြစ်သူ မာမူကြီးကလည်း အေးဟယ်၊ ကိုယ်တောင် စာအုပ် ၄-၅၀၀၀ တန်ဆို ၀ယ်ချင်တာတောင် ကိုင်ကြည့်လိုက်၊ ပြန်ချလိုက်နဲ့ မ၀ယ်ဖြစ်တာ များသေးတာ။ အခု ၅၅၀၀ တန်ကို ဒီလောက် ရောင်းရတယ်ဆိုတာ နင့်နှယ်၊ နည်းတဲ့ရောင်းအားမဟုတ်ဘူးဟဲ့ - ဟု ဆိုပါသည်။

သည်စာအုပ်နှင့်ပတ်သက်၍ ကျွန်တော်ကျေနပ်မိသည်မှာ စာဖတ်သူများထံက အသံများဖြစ်ပါသည်။ ကျွန်တော်က စာအုပ်ထဲ၌ ရန်ကုန်အိမ်လိပ်စာထည့်ပေးထားရာ စာအုပ်ဖတ်မိသူ လူငယ်များထံမှ ဤစာအုပ်သည် ၎င်းတို့အတွက် အလွန်အဖိုးတန်ကြောင်း၊ သူတို့ ဘ၀တိုးတက်ရေးအတွက် များစွာမှအထောက်အကူဖြစ်ကြောင်း စာရေးလာကြပါသည်။ စင်ကာပူမှ စာဖတ်သူများကလည်း ကျွန်တော့် ဘလော့မှ ဖုံးနံပါတ်အတိုင်း ကျွန်တော့်ထံဖုံးဆက်ပြောပါသည်။ ဤသည်ပင်လျှင် ကျွန်တော်ရေးရခြင်း၏ အဓိကရည်ရွယ်ချက်ဖြစ်လေရာ ငွေရေးကြေးရေး အရှုံးအမြတ်ကို မေ့ထားလျှက် ကျွန်တော့်ကြိုးစားအားထုတ်မှုတို့ အတန်ခရီးပေါက်မှန်းသိရခြင်းကပင်လျှင် နောက်ထပ် စာအုပ်များထပ်မံရေးသားဘို့ အင်အားများကို ဖြစ်စေပါသည်။

သို့သော် ကျွန်တော်မကြိုက်တာတစ်ခု ရှိပါသည်။ ပုံနှိပ်မှတ်တမ်းတွင် စာအုပ်ဈေးနှင့် အုပ်ရေကို အတိအကျ၊ အမှန်အတိုင်း မဖော်ပြတာဖြစ်၏။ အမှန်တကယ် စာအုပ်ဈေးမှာ ၅၅၀၀ ကျပ် နှင့် အုပ်ရေ ၁၅၀၀ ဖြစ်ပါသည်။ သို့သော် ပုံနှိပ်မှတ်တမ်းတွင်မူ တန်ဖိုး - ၅၀၀၀ ကျပ် နှင့် အုပ်ရေ ၁၀၀၀ ဟု ဖော်ပြထားပါသည်။ ကျွန်တော်လှမ်းဖုံးဆက်တော့ ဘာတဲ့၊ အခွန်ရှောင်ဘို့ဆိုလား၊ ဒါထုံးစံပါ ဟု  ဆိုပါသည်။ ဤသည်ကို ကျွန်တော်နည်းနည်းမှ မကြိုက်ပါ။ သူ့ဟာသူ ထုံးစံမကလို့ ဘာကြီးဖြစ်နေဖြစ်နေ။ မဟုတ်တဲ့ထုံးစံကိုတော့ ကျွန်တော်မလိုက်နိုင်ပါ။ ဆောင်ရပါစေ။ ကျသမျှအကုန်ဆောင်မယ်။ အမှန်အတိုင်းသာထည့်ပါ ဆိုသည့်တိုင် ကျွန်တော်ပြောသည့်အတိုင်း ဖြစ်မလာပါ။ ဤကဲ့သို့ မဟုတ်သည့်ထုံးစံကြီးကို ကျွန်တော်တို့လူမျိုးများသည် လျှာတွေ့နေသည်မှာ အဘယ်မျှကြာနေပြီ ဖြစ်ပါသနည်း။ ယခုဆိုလျှင် ယဉ်ကျေးမှုတစ်ခုအဖြစ်ဖြင့်ပင် အမြစ်တွယ်နေလေပြီလော။

ကျွန်တော်ကတော့ ခေါင်းမာသူဖြစ်သည့်အတိုင်း စာအုပ်ဈေးနှုံးများကို ရောင်းဈေး ၅၅၀၀ ဟု စတစ်ကာနှင့် အကုန်ပြန်ပြောင်း ပစ်ပါသည်။ သို့သော် ယခုထိ ကျွန်တော်ထုတ်ဝေခဲ့သည့်စာအုပ်များကို အခွန်မဆောင်ခဲ့ရပါ။ မမကို ဘယ်လိုအခွန်ဆောင်ရမလဲ၊ စုံစမ်း လိုက်စမ်းဟု ပြောသည့်တိုင် ဟဲ့၊ အခွန်ဆောင်တယ်ဆိုတာ လွယ်လွယ်လေးမအောက်မေ့နဲ့ ဆိုသဖြင့် ကျွန်တော်လည်း ထပ်မမေးတော့ပါ။ ပိုက်ဆံပေးတာတောင် ဘာကြောင့်ခက်နေရပါသနည်း။ အခွန်ဆောင်ဘို့ကို လွယ်လွယ်ကူကူလုပ်ပေးမထားလျှင် ပိုက်ဆံပေးရမည့်ကိစ္စ၊ အဘယ်သူသည် တကူးတက ဒုက္ခခံကာ လိုက်လုပ်နေပါမည်နည်း။ အဲလေ၊ သည်အခွန်မဆောင်လျှင် ဒဏ်ငွေဘယ်မျှပေးရမည်။ ထောင်ဘယ်နှနှစ်ချမည်ဟု အတင်းအကျပ် မလုပ်သရွေ့ကာလပတ်လုံးပေါ့။ သည်လိုဆိုလျှင် ယနေ့ ပလူပျံအောင်ထွက်နေသည့် စာအုပ်များ၊ ဂျာနယ်များရော မည်ကဲ့သို့အခွန်ဆောင်ကြပါသနည်း။ ကျွန်တော်မသိပါ။

            ယခု စင်ကာပူနှင့် မြန်မာပြည်တို့တွင် နိုင်ငံရေးအခြေအနေများ၊ ဥပဒေများမှာ အတော်များများပြောင်းသွားပြီဖြစ်ရာ ၂၀၀၉ ခုနှစ်က ရေးခဲ့သည့် ကျွန်တော့်စာအုပ်ပါ အချက်အလက်များမှာ နောက်ကျကျန်ရစ်ခဲ့ပြီဖြစ်ပါသည်။ သို့အတွက် အချက်အလက်သစ်များနှင့် ထပ်မံ ထုတ်ဝေရန် စိတ်ကူးရှိပါသော်လည်း ယခုထိ မလုပ်ဖြစ်သေးပါ။ ထို့ပြင်တ၀ ယခုပြန်ဖတ်လိုက်တော့ ထိုစဉ်က ရေးသားထားသည်များကို လည်း သဘောမကျတော့ပါ။ ပြင်စရာများစွာ ရှိနေပါသည်။ သို့သော် အခြားစာအုပ်များရေးနေသဖြင့် ထိုစာအုပ်ကို ပြန်မလုပ်ဖြစ်ပါ။ အချက်အလက်သစ်များကိုတော့ အတော်များများပြင်ပြီးဖြစ်ပါသည်။ ထုတ်ဝေသူရှာရပါမည်။ ပျဉ်ဘိုးနားလည်သွားပြီဖြစ်သဖြင့် ထပ်မံ၍ ကိုယ်တိုင်ထုတ်ဘို့ရာ မကြိုးစားချင်တော့ပါ။

 

(၁၀၄) နာဂစ်အရေးတွင် ပါဝင်လှုပ်ရှားကြခြင်း

            မိတ်ဆွေတို့သိကြသည့်အတိုင်း ၂၀၀၈ ခုနှစ် မေလ ၂ ရက်၊ သောကြာနေ့တွင် မြန်မာပြည်အနောက်တောင်ပိုင်း၊ ဧရာဝတီတိုင်းမှ နာဂစ် မုန်တိုင်းဝင်ကာ မြန်မာပြည်ကို မွှေသွားပါသည်။ လူပေါင်း ၁၃၈၀၀၀ ခန့်သေကြေပျက်စီးခဲ့ရသည်။ အပျက်အစီးကို  အမေရိကန် ဒေါ်လာ ၁၀ ဘီလျံကျော်ဟု ခန့်မှန်းပါသည်။ မြန်မာပြည်သမိုင်းတွင်မတော့ အဆိုးရွားဆုံးသော သဘာဝဘေးအန္တရာယ်ကြီးပင် ဖြစ်ပါသည်။ လေတိုက်နှုန်းမှာ တစ်နာရီလျှင် ၁၀၅ မိုင်မှ ၁၃၅ မိုင်ထိရှိပါသည်။ ဧရာဝတီတိုင်းမှ ဘိုကလေး၊ လပွတ္တာ၊ မြောင်းမြ၊ ကွမ်းခြံကုန်းတို့တွင် အပျက်အစီးအများဆုံးဖြစ်သည်။

            အင်တာနက်ကောင်းမှုကြောင့် ကျွန်တော်တို့ နာဂစ်သတင်းများကို အချိန်နှင့်တပြေးညီ သိခွင့်ရပါသည်။ သည်သတင်းများကို ဖတ်ရသည့်အတွက် ကျွန်တော်အလွန်ဝမ်းနည်းကြေကွဲရပါသည်။ မင်းဆိုးမင်းညစ်၏ဒဏ်ကို အလူးအလဲခံနေရသော ကျွန်တော်တို့ တိုင်းသူ ပြည်သားများကို နာဂစ်က အညှာအတာကင်းမဲ့စွာ ရိုက်ပုတ်နင်းချေ၊ ၀ါးမြိုသွားခဲ့ချေပြီ။   

ထို့ထက်ပို၍ ကျွန်တော်စိတ်မကောင်းဖြစ်ရသည်မှာ မုန်တိုင်းက နင်းချေဖျက်ဆီးသွားသဖြင့် ဘ၀ပျက်နေရရှာသော ထိုဒုက္ခသည် များကို နိုင်ငံတကာက လူသားချင်းစာနာစိတ်ဖြင့် အကူအညီများပေးပါမည်ဟု လာသည်ကို နိုင်ငံ့၏ အရိပ်ကိုမျှနင်းခွင့်မပေးတာကို ဖြစ်ပါ သည်။ သူများကိုကူညီခွင့် မပေးတာတင်မဟုတ်။ ကိုယ်ကိုယ်နှိုက်ကလည်း ဘာမှရေရေရာရာ အရေးယူဆောင်ရွက်ခြင်းမပြုဘဲ ကိုယ်အာဏာတည်မြဲရေးအတွက် မဲပေးဘို့ကိုသာ အတင်းရောအဓမ္မပါ လုပ်ပါသည်။ သည်သတင်းများကိုဖတ်ပြီး ကျွန်တော့်မှာ စိတ်မကောင်းလွန်းသဖြင့် မျက်ရည်များ တောက်တောက် တောက်တောက်ကျပါသည်။ ငါတို့နိုင်ငံသူ နိုင်ငံသားတွေဟာ ဘယ်ဘ၀က ၀ဋ်ကြွေးကြောင့်များ ဒီလောက်ပေးဆပ်နေရပါလိမ့်။ ၀ဋ်ရှိခဲ့ရင်လည်း ဒီဘ၀ ဒီမျှနဲ့ကျေပါစေဘုရား ဟု မြတ်စွာဘုရားထံ အခါခါဆုတောင်းမိ ပါသည်။

            ဒုက္ခသည်များအတွက် နိုင်ငံတကာအကူအညီများကို ညောင်ပင်လေးဈေးတွင် ရောင်းချစားသောက်ကြသည်ကို လည်းကောင်း။ ဒုက္ခသည်များအတွက် ပေးလိုက်သော မီးစက်များ၊ မိုးကာဖျင်စများကို သူတို့အတွက် သယ်သွားသည်ကိုလည်းကောင်း သိရသည့်အခါတွင်မူ သြော်၊ ဒီလူတွေ လူစင်စစ်မှဟုတ်ရဲ့လား။ လူဆိုရင်တောင် ကိုယ်ပိုင်စိတ်မရှိတော့ဘဲ ဘီလူးသရဲစီးနေတာဖြစ်မည်ဟု သည်လိုပင် မြင်မိပါ သည်။  

            နာဂစ်အရေးတွင် ကျွန်တော်တို့ မြန်မာလူမျိုးများ၏ စိတ်ရင်းစေတနာကို အထင်းသားမြင်နိုင်ပါသည်။ မာရ်နတ်၏ မြေးမြစ်များနှင့် ဒေ၀ဒတ်၏ သမီးယောက်ဖတစ်စုတို့မှလွဲ၍ ကျန် ပြည်တွင်းပြည်ပမှ ရဟန်းရှင်လူ၊ မြန်မာအများစုတို့မှာ မိမိတို့စွမ်းအားရှိသမျှ ငွေအား၊ လူအားစိုက်ထုတ်ကာ အင်တိုက်အားတိုက် လုပ်ကိုင်ဆောင်ရွက်ကြပါသည်။ ဤအချိန်တွင် မြန်မာပြည်သူအများစုမှာ ကိုယ့်အရေးကို မေ့ထားလျှက် နာဂစ်ဒေသမှပြည်သူများ အကြောင်းသာ ခေါင်းထဲထည့်ထားကြပါသည်။ ကျွန်တော်တို့သည်လည်း အခြားသူများကဲ့သို့ပင် သည်ကိစ္စ၌ ကိုယ်ဖိရင်ဖိ နေ့မအားညမအား အားတက်သရော လုပ်ခဲ့ကြ၏။

            သည်ကဲ့သို့လုပ်ခဲ့သည်များမှာလည်း ကျွန်တော့်သမိုင်းကြောင်းပင်ဖြစ်လေရာ ဤနေရာ၌ ခရေစေ့တွင်းကျမဟုတ်တောင် ရုပ်လုံး ပေါ်သည်ထိ ဖော်ပြပါမည်။  

            မုန်တိုင်းကျတယ်တဲ့ဟေ့ ဆိုသည်နှင့် ကျွန်တော်လည်း အပေါင်းအသင်းမိတ်ဆွေများကို အတင်းတိုက်တွန်းကာ မိမိနှင့်နီးစပ်ရာ မိတ်ဆွေသူငယ်ချင်းများထံ (မြန်မာများရော၊ နိုင်ငံခြားသားများပါ) အလှူခံခိုင်းပါသည်။ မိတ်ဆွေများကလည်း အားတက်သရောလှူပါသည်။ ကျွန်တော်တို့အလှူခံတာ စုစုပေါင်း စင်ကာပူဒေါ်လာ တစ်သောင်းနှစ်ထောင်ကျော် ရ၏။ စနေဓမ္မမိတ်ဆွေများအဖွဲ့၏ ၂၀၀၈ခုနှစ် မတ်၊ ဧပြီ၊ မေ သုံးလစာကို ချက်ချင်းလှူလိုက်ပါသည်။

            ခက်တာက မုန်တိုင်းကြောင့် ဖုံးလိုင်းများပြတ်သွားသဖြင့် အိမ်နှင့်အဆက်အသွယ် လုပ်လို့မရ။ သို့သော် ကျွန်တော်တို့ စနေဓမ္မ မိတ်ဆွေများအဖွဲ့ ပင်တိုင်အလှူရှင် မလွင်လွင်မိုး၏ညီမ မမျိုးမျိုးတို့ကလည်း သူတို့မင်္ဂလာဈေးမှ ဈေးသူဈေးသားများထံ အလှူခံကာ ထိုဒေသသို့သွားရောက်၍ ကိုယ်ထိလက်ရောက် လှူဒါန်းနေသည့်အတွက် သူတို့မှတစ်ဆင့် ဆက်သွယ်လှူဒါန်းရပါသည်။

            မလွင်လွင်မိုးက မြောင်းမြတွင် ဒုက္ခသည်များကိစ္စကို ဦးဆောင်ဦးရွက်လုပ်ကိုင်ပေးနေသည့် ကိုကြည်လင်ရှိကြောင်း နှင့် သူ့ဖုံးနံပါတ်ကို ပေးပါသည်။ ကျွန်တော်လည်း ကိုကြည်လင့်ဆီဖုံးဆက်ရာ သူက မြောင်းမြတွင် ဒုက္ခသည်စခန်း ၃၀ ခန့်၌ ဒုက္ခသည်ပေါင်း လေးသောင်းလောက်ရှိကြောင်း၊ အဓိကလိုအပ်နေသည်မှာ အမျိုးသားများအတွက် ပုဆိုးများဖြစ်ကြောင်း။ မုန်တိုင်းအတွင်း အားနည်းသူ ကလေးများနှင့် အမျိုးသမီးများ အတော်များများသေဆုံးကုန်ကြသည်ဖြစ်ရာ ဒုက္ခသည်များတွင် အမျိုးသား အများဆုံးဖြစ်နေသည်။ အသက်ကို လုခဲ့ရသဖြင့် အ၀တ်အစား ဘာမှမကျန်ခဲ့။ ထို့ကြောင့် အ၀တ်တစ်ထည်၊ ကိုယ်တစ်ခုသာ ဖြစ်လေရာ မိုးစိုလို့မှ လဲစရာမရှိ ဖြစ်ရသည်။ ထို့ကြောင့် ပုဆိုးများ အလျင်စလို လိုအပ်နေပါသည်ဟု ဆိုသည်။ ကျွန်တော်က ထမင်းစားဘို့ ဆန်ရှိပါသလား မေးရာ သူက လောလောဆယ် အစိုးရကပေးထားသော ဆန်များရှိသေးကြောင်း၊ ထို့ကြောင့် လှူမည်ဆိုပါက ပုဆိုးများဦးစားပေး လှူရန်ပြောပါသည်။ ထို့ကြောင့် ကျွန်တော်ကလည်း မမျိုးမျိုးမတစ်ဆင့် မမကို ပန်းကန် ၂၀၀၀၊ ဇွန်း ၂၀၀၀၊ ဟင်းပန်းကန် ၂၀၀၀ ၀ယ်ပြီး ပိုတာကို ပုဆိုးများ ၀ယ်သွားရန် မှာပါသည်။ သို့သော် ကျွန်တော်ပို့လိုက်သောပိုက်ဆံလောက်နှင့် ဤမျှမရနိုင်မှန်း နောက်မှသိရပါ၏။ လှူချင်ဇောနှင့် လောဘတကြီးမှာလိုက်တာ ဖြစ်ပါသည်။  

            သို့တိုင် ကျွန်တော်သူတို့ဆီဖုံးဆက်တော့ မြန်မာစံတော်ချိန် ညနေ ၃ နာရီတီးနေပြီ။ သူတို့က နက်ဖြန်မနက် အစောကြီး ၃ နာရီလောက်ထသွားမှာ ဖြစ်သည့်အတွက် လုပ်စရာ အများအပြားကျန်သေးသဖြင့် ကျွန်တော်မှာသမျှ အကုန်မ၀ယ်နိုင်ခဲ့ပါ။ ကျန်ငွေကို နောက်တစ်ခေါက်မှ ၀ယ်လှူရပါသည်။ မင်္ဂလာဈေး ဆိုင်များကလည်း လှူကြပါသည်။ ပုဆိုးရောင်းသောဆိုင်က ပုဆိုးအစည်းလိုက်၊ အင်္ကျီ ရောင်းသည့်ဆိုင်က အင်္ကျီပါကင်လိုက် လှူပါသည်။ မင်္ဂလာဈေးသူဈေးသားများကတော့ ပစ္စည်းသာလှူသည်မဟုတ်၊ လှူသည့်နေရာသို့ သူတို့ ကိုယ်တိုင်လိုက်ပါကာ အထုပ်အပိုးများကို ကိုယ်တိုင်ထမ်း၊ ကိုယ်တိုင်ချ၊ ကိုယ်တိုင်ဝေကြပါသည်။ ထိုမျှသာမက သူတို့အလှူခံရာ ငွေသား ချည်းပင် သိန်း ၃၀၀ ကျော်ရသည်ဟု ဆိုပါသည်။ ထိုငွေများကိုမူ နာဂစ်ဒဏ်ခံဒေသများသို့ တပည့်တပန်းများနှင့်တကွ ကိုယ်တိုင်သွား ရောက်ကာ အင်တိုက်အားတိုက်လှူဒါန်းနေသည့် သပိတ်အိုင်ဆရာတော်သို့ လှူလိုက်သည်ဟု ဆိုပါသည်။ သည်သတင်းများကြားရပြန်တော့ ကျွန်တော့်မှာ အလွန်ဝမ်းသာပီတိ ဖြစ်မိပါသည်။ ယမမင်း၏ သားသမီးမြေးမြစ်များပင် ရှိလင့်ကစား ကျန်မြန်မာပြည်သား အများစုမှာ လူကောင်းသူကောင်းများဖြစ်ကြပါသည်။  

ဆက်ပါဦးမည်။

 

အေးငြိမ်း (လေးမျက်နှာ)
၆ - ၁၂ - ၂၀၁၂။ ည ၁၁း၁၃ မိနစ်
Blk 663D, Jurong West St. 65
#15 – 233
Singapore 644663
Tel: (65) 97303027
Email: y_nyein@yahoo.com.sg

          aye475@gmail.com

Website: http://shwenyein.blogspot.com