(၁)
ဟိုတစ်နေ့က Safety သင်တန်း၌ သင်တန်းသားတစ်ယောက်ကို မေးကြည့်၏။
“မင်း ဗမှားပြည်မှာတုံးက ဘာတွေ လုပ်ခဲ့တာတုံးကွ”
“ကျော် မော်တော်ဆိုင်ကယ် ပြင်တယ်”
“ဟေ - တယ်ဟုတ်ပါလားကွ၊ မင်း မော်တော်ဆိုင်ကယ် ပြင်တတ်တယ်ပေါ့”
“အာ - သိပ်ပြင်တတ်တာပေါ့၊ ကျွန်တော်ဆိုင်ကယ်ပြင်တာ ၅ နှစ်မကတော့ဘူး”
“ကိုင်းကွာ၊ ဒါဆို ငါ့ကို ကာဘရိုက်တာတစ်လုံး ဘယ်လိုအလုပ်လုပ်သလဲဆိုတာ ရှင်းပြစမ်းပါအုံး”
“ငမ် - အဲ အင်း ဟိုဟာ . . . “
“ဘာတုံးကွ၊ အဲအင်း ဆိုတာ၊ မင်း ကာဘရိုက်တာကို သိသလား”
“ဟီး သိပုစ်”
“ငမ် - ဟကောင်၊ မင်း ကာဘရိုက်တာမသိဘဲနဲ့ ဘယ်လို ဆိုင်ကယ်ပြင်သတုံးကွ၊ ဒါဆိုကွာ၊ ကလပ်တစ်ခု အလုပ်လုပ်ပုံလေး ပြောပြစမ်းပါ”
“ငင့် - ဘာတုံး ကလပ် ဆိုတာ”
“တေဗျဇီ၊ ငါ့လူရယ်၊ ကာဘရိုက်တာလဲမသိ၊ ကလပ်လဲမသိဘဲ ဘယ်လိုလုပ် ဆိုင်ကယ်ပြင်သတုံးကွာ”
နောက်တစ်ယောက် -
“ကိုယ့်လူက ဗမာပြည်မှာတုံးက ဘာလုပ်ခဲ့တာလဲ”
“မီးဆင်တာ၊ ကျွန်တော် မီးဆင်တဲ့အတွေ့အကြုံ ဆယ်နှစ်လောက်ရှိတယ်”
“အဲ့လယ် - တယ်ဟုတ်ပါလား (မီးချောင်းကို လက်ညှိုးထိုးပြလျက်) ဟောဒီ အိမ်သုံးမီးဟာ ဗို့အားဘယ်လောက် ရှိသလဲ”
“ငါးဗို့”
“မြတ်ချွာဖျား၊ သေချာရဲ့လား ကိုယ့်လူရယ်။”
“ဟုတ်တယ်၊ အိမ်သုံးမီးက ငါးဗို့ရှိတယ်”
ကျွန်ုပ်ကိုများ ပြောင်နေသလားဟု သူ့မျက်လုံးများကို စိုက်ကြည့်လိုက်ရာ သူ တကယ်ပြောနေမှန်း သိရ။
(၂)
အသင်တို့ စက်အသစ်ကလေးတစ်လုံးရလာပြီဆိုလျှင် (တရုတ်စက်များမပါ) မောင်းလို့ မကောင်းပါသလော။
အမှန်ပင် ကောင်း၏။
သို့သော် နှစ်အတန်ကြာ သုံးပြီးသွားသည့်အခါ စက်က ကကျိုးကကြောင် ဖြစ်လာ၏။ တစ်ခါတလေ မောင်းနေရင်း စက်ရပ်သွား၏။ တစ်ခါတလေ နှိုးလို့မရ။
အဘယ်ကြောင့်နည်း။
ကြာလာသည့်အခါ လည်ပတ်၊ လှုပ်ရှားနေသည့် အစိတ်အပိုင်းများ ချို့ယွင်းလာ၏။ စားသွား၏။ ချောင်သွား၏။
ဆီလိုင်းများတွင် ချေးပိတ်၏။ မီးလိုင်းတွင် ကာဘွန်ချိုးများကပ်၍ မီးမကူးတော့။
ဤသည်ကို စက်ပျက်သည်ဟု ခေါ်၏။
စက် အဘယ်ကြောင့် ပျက်ရသနည်း။
မူလထုတ်လုပ်လိုက်သည့် ဒီဇိုင်းအတိုင်း၊ အတိုင်းအတာအတိုင်း မရှိတော့၍ ၊ ကောင်းကောင်း အလုပ်မလုပ်နိုင်တော့၍ ဖြစ်၏။
ထိုအခါ စက်ကို ပြန်ကောင်းလာအောင် ပြင်ပေးရ၏။
သို့ဆိုလျှင် စက်ပြင်ခြင်း ဟူသည် အဘယ်နည်း။
ပျက်စီးချို့ယွင်းနေသည့် အစိတ်အပိုင်းကို ထုတ်လုပ်လိုက်စဉ်ကပုံစံအတိုင်း၊ အတိုင်းအတာအတိုင်း ရစေရန် ပြန်လည် ပြင်ဆင်ပေးခြင်းကို စက်ပြင်သည်ဟု ခေါ်၏။
ဆရာဝန်များ ဆေးကုပေးခြင်းသည်လည်း အတူတူပင် ဖြစ်၏။
ရောဂါဖြစ်သည် ဆိုခြင်းမှာ မအေမွေးတုံးက ပါလာသည့် ခန္ဓာကိုယ် အစိတ်အပိုင်းများ ချို့ယွင်းကာ မဲလ်ဖန်ရှင်းနီး (ဟုတ်ပေါင်) ကောင်းကောင်း အလုပ်မလုပ်တော့ခြင်း ဖြစ်၏။ ဥပမာ - ဆေးလိပ်သောက်သည့်အခါ မီးခိုးထဲတွင် ပါလာသည့် ကာဘွန်များ လေအိတ်နံရံများတွင်ကပ်၍ လေအိတ်များက အောက်ဆီဂျင်ကိုလည်း စုပ်မယူနိုင်၊ ကာဘွန်ဒိုင်အောက်ဆိုဒ်ကိုလည်း ကောင်းကောင်း မထုတ်နိုင် ဖြစ်၏။ ဤကဲ့သို့ပျက်စီးသွားသည့် လေအိတ်ကလေးများ များလာသည့်အခါ အဆုပ်ကင်ဆာ ဖြစ်တော့၏။
ဆေးကုသည်ဆိုခြင်းမှာ ချို့ယွင်းသွားသည့် ခန္ဓာကိုယ် အစိတ်အပိုင်းကို မအေမွေးလာစဉ်ကအတိုင်း ပြန်ရလာစေရန် ပြုလုပ်ပေးခြင်းသာ ဖြစ်သတည်း။
ထို့ကြောင့် ဆေးကျောင်းသားများသည် လူ့ဗိုက်ထဲမှာ ဘာတွေ ဘယ်လိုတပ်ဆင်ထားသည်ကို သိနိုင်ရန် ရင်ကိုခွဲ၍ အသည်းကိုနုတ်ယူ (ဟုတ်ပေါင်၊ မွှားကုန်ပြီ) ရင်ကိုခွဲ၍ သေချာဂဏ ကြည့်ကြရခြင်း ဖြစ်သည် မဟုတ်တုံလော။
ထို့အတွက် စက်ပြင်မည့်သူသည် ထိုစက်၏ နဂိုမူလဒီဇိုင်း အဘယ်ကဲ့သို့ ရှိနေကြောင်း သိမထားသင့်ပါသလော။
အမှန်ပင် သိသင့်လေ၏။
စက်၏ မူလအခြေအနေ အဘယ်ကဲ့သို့ရှိသည်ကို မသိဘဲ သင်တို့သည် မည်ကဲ့သို့ စက်ကို ပြင်ပါမည်နည်း။ ပြောပြကြပါကုန်လော့။
တကယ်တတ်သိနားလည်သူကို Competent person ဟု ခေါ်၏။
Competent person ဆိုသူသည် စာတွေ့ရော လက်တွေ့ပါ နှစ်မျိုးစလုံး နားလည် တတ်ကျွမ်းထားရမည်။
အင်ဂျင်တစ်လုံးကို ပြင်မည့်သူသည် အင်ဂျင်တစ်လုံးတည်ဆောက်ပုံကို သေချာဂနစွာ သိရှိနားလည်ထားရမည်။ သို့မှသာ ပြစ်ချက်ကို သေသေချာချာ ရှာနိုင်မည်။ အင်ဂျင်ထဲ ဘာတွေပါမှန်းမသိဘဲ ဘယ်လိုပြင်မည်နည်း။ ဟိုရမ်းထိုး၊ ဒီရမ်းထိုး လို့ကတော့ ကောင်းလာဘို့ထက် ပိုဆိုးဘို့သာ များ၏။
အထက်ဖော်ပြပါ သကောင့်သားကလေးများသည် သိသင့်သိထိုက်သည့် အခြေခံ သဘောတရားကလေးများကိုသော်မှ မသိဘဲ ရမ်းတုတ်နေကြ၏။
ဤသည်မှာ အဘယ်ကြောင့်နည်း။
၎င်းတို့ကို ကျကျနန သင်ကြား လေ့ကျင့်ပေးလိုက်ခြင်းမဟုတ်ဘဲ သူများလုပ်တာကြည့်ပြီး မှတ်သားခြင်းကို အဟုတ်ကြီး ထင်နေကြသောကြောင့် ဖြစ်၏။ သည်လိုဖြစ်လျှင် သည်ကြိုးကိုဆက်ရမည်ဟု မှတ်ထားမည်။ သို့သော် ဘာကြောင့် ဆက်ရသည်ကို မသိ။
ကျေးလက်တောရွာများမှ ဒေါက်တာရမ်းကုများသည်လည်း အလားတူပင် ဖြစ်၏။
ဆရာဝန်က ဒီရောဂါကို ဒီဆေးပေးလိုက်တာ မှတ်ထားပြီး သူကလည်း ဤရောဂါမျိုးဖြစ်လျှင် ဤဆေးပေးရမည်ဟု တရားသေမှတ်ကာ ကုခြင်း ဖြစ်သတည်း။ သည့်ထက်မပို။
စက်ပြင်ဆရာများက စက်ကိုပြင်သည်။ ဆရာဝန်များက လူကိုပြင်သည်။
စက်ပြင်ဆရာများက စက်ကိုဖွင့်ပြီး အထဲက ကလီစာတွေကို ကြည့်၏။
ဆရာဝန်များက ဗိုက်ကိုဖွင့်ပြီး အထဲက ကလီစာတွေကို ကြည့်၏။
မတူပါသလော။ အတူတူပင် ဖြစ်၏။
(၃)
ပြန်ကောက်ရလျှင် ပြင်ဆင်ခြင်းဟူသည် စက်ရုံကထွက်လာသည့် အော်လဂျင်နယ်အတိုင်း ရအောင် ပြန်လုပ်ရခြင်း ဖြစ်၏။ အော်လဂျင်နယ်အတိုင်း မရလျှင်သော်မှ ၎င်းနှင့် အနီးစပ်ဆုံးတူအောင် လုပ်ရ၏။ သို့မှ စက်ပြန်ကောင်း၏။
အစားထိုးလျှင်သော်မှ မူရင်းပစ္စည်းနှင့် အစားထိုးနိုင်လျှင် ကောင်း၏။
မာစီးဒီးကားမှ ပစ္စည်းကိုလဲလျှင် မာစီးဒီးကား ပစ္စည်းနှင့်သာ လဲရ၏။
မာစီးဒီးချင်းတူလျင်သော်မှ မော်ဒယ်ချင်း တူပါအုံးမှ။
မာစီးဒီးကားကို ဟွန်ဒါဖစ်ပစ္စည်းနှင့်သာ လဲလှယ်တပ်ဆင်လိုက်ပါက -
မင်းသားခေါင်းပေါင်းထားပြီး တောင်ပို့နှစ်လုံးကို ဖော်ထားသည့် (ဘာခေါ်မလဲ) ကိုဝတ်ထားသော ဟိုမော်ဒယ်လို ဖြစ်သွားချေမည်သာတည်း။
ကျေးဇူးတင်ပါသည်။
အေးငြိမ်း
No comments:
Post a Comment