ကျွန်ုပ်နှင့် ကိုသောင်းတန် (၁)

(၁)

 

သေမင်းသည် လူကောင်းများကိုသာရွေးခေါ်လျက် အဘယ်ကြောင့် Myay နိုး များကို မခေါ်ရဘိသနည်း။

အသင်သည် ကိုသောင်းတန်ကို မခေါ်ဘဲလျက် မြင်းပေါင်ကိုင် ကို ခေါ်သွားတော့ ဘာဖြစ်သွားမှာ မို့လို့နည်း။

ကိုသောင်းတန် ကွယ်လွန်သည့်အတွက် ကျွန်ုပ်သည် မျက်ရည်များစွာ ကျရဘိ၏။

အကယ်၍ ကိုသောင်းတန်အစား မြင်းပေါင်ကိုင်သာ သေမည်ဆိုပါက ကျွန်ုပ်သာမဟုတ်။ ဘလိတ်ဒန့်ဆွဲကာ လိုက်ဘ်လွှင့်မည့်သူ အတော်များပေလိမ့်မည်။

 

အို . . အရှင် သေမင်း

အသင့်အား ကျွန်ုပ် နားကျည်းမုန်းတီးလှပါဘိ။

ဤကမ္ဘာမြေအား အကျည်းတန်စေသူများကို အသက်ရှည်ခွင့်ပေးလျက် . . .

ဤကမ္ဘာမြေအား အကျိုးပြုနေသူများကို အဘယ်ကြောင့် ခေါ်ယူသွားရဘိသနည်း။

အသင်ကား မတရားလှပေစွ။

အသင်ကား မျက်နှာလိုက်လွန်းလှပေစွ။

 

(၂)

 

ကျွန်ုပ်စင်ကာပူမြေကို စခြေချမိတာ ၁၉၉၈ ခုနှစ် ဇွန်လ ၁၃ ရက်နေ့။ 

Tellus ကို ရောက်လာတာ ကျွန်တော်တို့က ပထမဆုံးအသုတ်။

ကိုသောင်းတန်တို့က ဒုတိယ အသုတ်။

ကျွန်ုပ်တို့ရောက်စက Yishun မှာ နေရ၏။ သိပ်မကြာမီပင် Block 521, Upper Jurong Road ကို ပြောင်းရ၏။ 

Blk 521 ရောက်တော့ ကျွန်ုပ်တို့နှင့် ကိုသောင်းတန်တို့အုပ်စု တစ်ခန်းထဲ၌ အတူတူ စု နေကြရ၏။ 

ဤမှစ၍ ကျွန်ုပ် ကိုသောင်းတန်နှင့် စတင် သိကျွမ်းခဲ့၏။ 

သို့သော် ကျွန်ုပ်မှတ်မိသလောက် Tellus မှာ ရှိစဉ်က ကျွန်ုပ်နှင့် ကိုသောင်းတန်တို့ သည်လောက် သိပ်ပြီး ခင်ခင်မင်မင် မရှိလှသေးပါ။

Tellus မှ ထွက်လာပြီး တစ်ယောက်တစ်ကွဲစီ ဖြစ်သွားသည့်အခါကျမှ​ဖြစ်၏။

ကိုသောင်းတန်နှင့် ကျွန်တော် ညီအစ်ကိုအရင်းတမျှ ချစ်ခင်သွားအောင် စေ့ဆော်သည့်အရာမှာ စနေဓမ္မမိတ်ဆွေများအဖွဲ့ ၏ လှုပ်ရှားမှုများဖြစ်၏။

 

သည်တွင် စနေဓမ္မမိတ်ဆွေများအဖွဲ့ စတင် သန္ဓေတည်လာပုံကို ပြောပြပါရစေ။

စနေဓမ္မမိတ်ဆွေများအဖြစ် စုစည်းရန် စတင်လာရခြင်းမှာ ကျွန်ုပ်တို့ကြောင့်မဟုတ်။ 

အောင် တို့ အဖွဲ့ကြောင့် ဖြစ်၏။

အောင် ဆိုသည်မှာ တရုတ်လို Ong ဖြစ်ပြီး သူတို့အဖွဲ့ထဲတွင် မင်း (Meng) နှင့် ရှယ်လီ (Sherley) တို့လည်းပါသည်ဟု မှတ်မိနေပါသေး၏။ သူတို့က မင်္ဂလာပါ၊ ကျွန်တော့်နာမည် အောင် စသဖြင့် မြန်မာလို တစ်လုံးစ၊ နှစ်လုံးစ တတ်၏။

 

အောင်တို့က ကျွန်တော်တို့ရှိရာ Blk 521 ရှိအခန်းသို့ လာပြီး သူတို့ Tao တရားပွဲများသို့ လိုက်ရန် လာခေါ်လေ့ရှိ၏။ 

ကျွန်တော်တို့လည်း လိုက်သွား၏။ ကိုသောင်းတန်လည်း ပါ၏။

တာအိုတရားပွဲများသို့ အခြား မြန်မာများလည်း လာကြ၏။ 

ထိုအထဲတွင် ကိုရေချမ်းတို့လည်း ပါ၏။

ကိုမြင့်သိန်းက တရားပွဲမှာ အင်္ဂလိပ်လိုပြောတာကို မြန်မာပြန်ပြ၏။

ဤမှစကာ ကျွန်တော်၊ ကိုသောင်းတန်၊ ကိုရေချမ်း၊ ကိုမြင့်သိန်းတို့ မိတ်ဆွေအရင်းအချာများ ဖြစ်သွားလေတော့ သတည်း။

 

Tellus တွင် (၂) နှစ်လုပ်ခဲ့ပြီး ကျွန်တော် Union Alloy သို့ ရောက်သွား၏။ နေရသည်မှာ Kallang Way ၌ ဖြစ်၏။

ကျွန်တော်တို့လုပ်ရသည်မှာ Jurong Island ၌ ဖြစ်၍ ပြန်သည့်အခါ Boon Lay သို့ ဖြတ်ပြန်ရ၏။

 

ထိုစဉ်က ယခု Jurong Point မှာ ပီဘိ သေးသေးကလေး ဖြစ်ပြီး ဘတ်စ်ကားဂိတ်မှာလည်း ကွင်းပြင်ထဲ၌ မြန်မာပြည်မှ ကားဂိတ်များလိုပင် ဖြစ်၏။ 

Jurong Point အပြင်ဘက် ကပ်လျက်တွင် ကော်ဖီဆိုင်ကလေး တစ်ဆိုင်သည် ရှိ၏။

စနေနေ့ ညနေများ၌ ကိုသောင်းတန်က ထိုကော်ဖီဆိုင်ကလေးတွင် ထိုင်၏။

ကျွန်တော်လည်း အလုပ်ကအပြန် ထိုကော်ဖီဆိုင်ကလေးတွင် ဝင်ထိုင်ကာ ကိုသောင်းတန်နှင့် ထွေရာလေးပါး စကားများ ပြောကြ၏။

 

အစပိုင်း၌ ကျွန်ုပ်တို့လည်း တာအိုတရားပွဲများသို့ ပုံမှန်လိုက်ကြသေး၏။

သို့သော် နောက်ပိုင်းတွင် သူတို့ပြောသည့် အကြောင်းအရာများ၌ ကျွန်ုပ်တို့ သိပြီးသား အကြောင်းအရာများ ထပ်နေသည် ဖြစ်သောကြောင့် သူတို့တရားပွဲသွားပြီး အချိန်ဖြုန်းမည့်အစား ကျွန်ုပ်တို့ ကိုယ့်ဘာသာ စာအုပ်ဖတ်လျက် ဆွေးနွေးကြခြင်းက ပိုပြီး အကျိုးထူးလိမ့်မည်ဟု တိုင်ပင်ကြ၏။

 

သို့နှင့် ကျွန်ုပ်၊ ကိုသောင်းတန်၊ ကိုရေချမ်း၊ ကိုမြင့်သိန်း တို့ စနေနေ့ညနေတိုင်း အနှီ ကော်ဖီဆိုင်ကလေးတွင် ပုံမှန် ဆုံဖြစ်ကြလေ၏။ ကျွန်ုပ်တို့စကားဝိုင်းသို့ တခါတရံ ကိုဉာဏ်ပိုစသော အခြားသူများလည်း ပါတတ်ပါသေး၏။ မည်သူများလာသည် ဆိုသည်ကိုတော့ ကောင်းကောင်းမမှတ်မိတော့ပြီ။

 

စတုံးကတော့ တရားဆွေးနွေးဘို့ စတာပါဘဲ။ သို့သော် တရားကတော်တော် တောရောက် တောင်ရောက်တွေသာ များပါ၏။ နောက်တော့ (ကိုသောင်းတန်ပင် ထင်ပါသည်) ကျွန်တော်တို့ တစ်ယောက်ကို အစိတ်လောက် စုပြီး မြန်မာပြည်မှာ လိုအပ်နေတဲ့နေရာတွေလှူရင် မကောင်းဘူးလားဗျ ဟု အကြံပြုရာ အားလုံးကပင် မဆိုင်းမတွ သဘောတူလျက် ချက်ချင်း အကောင်အထည် စဖော်ကြ၏။

 

နောက်တော့ အများနှင့်ဆက်သွယ်ရာတွင် လွယ်ကူစေရန် အဖွဲ့နာမည်ပေးရေး တိုင်ပင်ကြ၏။ စနေနေ့ ညနေတိုင်း မိတ်ဆွေများ တွေ့ဆုံပြီး တရားဓမ္မအကြောင်းများ ဆွေးနွေးကြရာမှ ဖြစ်ပေါ်လာသည့် အဖွဲ့ကလေးဖြစ်၍ ကျွန်ုပ်ကပင် “စနေဓမ္မမိတ်ဆွေများအဖွဲ့” ဟု နာမည်ပေးလိုက်၏။

 

ဆက်ပါဦးမည်။

 

အေးငြိမ်း

၂၉ ဒီဇင်ဘာလ၊ ၂၀၂၁