ဇာတာ

ဗေဒင်ဆရာတစ်ယောက်၏ ဇာတာအကြောင်း

 

နှစ်သစ်အကြောင်း ရေးရင်း ဇာတာအကြောင်းရေးထားသည့် ဖေ့စ်ဘွတ်တစ်ခုကို အမှတ်မထင် တွေ့မိတော့ အတော်လေးတောင် လန့်သွားမိပါ၏။ ရေးသူကား ဗေဒင်ဆရာတစ်ဦး ဖြစ်၏။ သူက မိုးကြိုးပစ် ထန်းလက်နှင့်ကာ ဆိုသည်ကို မြတ်စွာဘုရားပါ ဆွဲထည့်လျက် ဘုရားကပဲ ဇာတာကို စခဲ့သလိုလို ရေးထား၏။ ဤကဲ့သို့ မဟုတ်က မဟတ်ကများကို ကျွန်ုပ်မနှစ်သက်ပါ။ 

 

နောက်ပြီးတော့ သူက ဇာတာတစ်စောင် တွက်ရတာ ဘယ်လောက်ခဲယဉ်းကြောင်း ပြလိုသဖြင့် ဘာတွေတွက်ရတယ် ဆိုတာ စာရင်းချပြထား၏။ စုစုပေါင်း ၅၁ ခုတောင်ရှိ၏။ အောင်မငီး

 

ဟောဒီမှာသူ့စာရင်း -

 

၁။ အာယနာ / ၂။ သာယနာ / ၃။ ရဝိဖုဋ / ၄။ ဒိနန္ဓ / ၅။ နိသဒ္ဓ / ၆။ နေ့ဗဟို / ၇။ ညဗဟို / ၈။ တက္ကလ / ၉။  ကျော်နာရီ / ၁၀။ လဂ်စီးနက္ခတ် / ၁၁ ။ ဟောရတ် / ၁၂။ တြွင်း / ၁၃။ နဝင်း / ၁၄။ မွန်းတည့်နက္ခတ် / ၁၅။ တိထီ / ၁၆။ မြင်နက္ခတ် / ၁၇။ စင်နက္ခတ် / ၁၈။ ပြည်စန်း / ၁၉။ တိုင်ဦး / ၂၀။ ဓာတ်တိုင် / ၂၁။ စုတ်တိုင် / ၂၂။ ဆီတိုင် / ၂၃။ မိတ္တုတိုင် / ၂၄။ အထွန်း / ၂၅။ ၁နွေဘုတ္တိ / ၂၆။ ၂လာၤဘုတ္တိ / ၂၇။ ၃င်္ဂါဘုတ္တိ ၂၈။ ၄ဟူးဘုတ္တိ / ၂၉။ ၅တေးဘုတ္တိ / ၃၀။ ၆ကြာဘုတ္တိ / ၃၁။ စနေ ဘုတ္တိ / ၃၂။ ရာဟုဘုတ္တိ / ၃၃။ ကိတ် ဘုတ္တိ / ၃၄။ လဂ် ဘုတ္တိ / ၃၅ ။ ပုည / ၃၆။ ဣသရ / ၃၇။ ပဝတ္တိ / ၃၈။ ထီးဖြူ  / ၃၉။ သိရီ / ၄၀။ ဆင်ဖြူ  / ၄၁။ သုဝဏ္ဏ / ၄၂။ ရတနာပုံ / ၄၃။ ရဇိတ / ၄၄။ အဓိပတိ / ၄၅။ ကလိယုဂ် / 

၄၆။ ဘဝါး / ၄၇။ အံသာစက် / ၄၈။ ဘာဝစက် / ၄၉။ နှစ်ကြွင်း / ၅၀။ သုံဒ္ဓဒိန် / ၅၁။ ပဋိသန္ဓေတိုင် 

 

ကျွန်ုပ်အဖို့မူ ထို ၅၁ ခုစလုံးကို သိပါ၏၊ နားလည်ပါ၏။ ၎င်းတို့အဘယ်ဖြစ်သည် သိလိုသူများ ကျွန်ုပ်၏ blog တွင် ရှာဖတ်နိုင်ပါ၏။ မြန်မာနာရီနှင့်ပတ်သက်သည်များကို ကျွန်ုပ်၏ မြန်မာပြက္ခဒိန်စာအုပ်တွင် အသေးစိတ် ရှင်းလင်း ဖော်ပြထား၏။ 

 

၎င်း၏စာရင်းကို မှားသည်ဟု ကျွန်ုပ်မဆိုလိုပါ။ သို့သော် ၎င်းချပြထားသည့် စာရင်းအနက် အချို့မှာ မြန်မာရှင်ဘုရင်များ လက်ထက်၌ သာ မှန်၏။ ယခုခေတ်အတွက် ဘာမှ အဓိပ္ပာယ်မရှိတော့ပါ။ သုံးလို့လည်းမရ။ လူတစ်သောင်းမှာ တစ်ယောက်တောင် နားလည်ဘို့မလွယ်သည့် အရာများ ဖြစ်၏။ ကျွန်ုပ် နမူနာ ပြပါမည်။

 

ရှေးခေတ်က ယခုခေတ်ကဲ့သို့ စက်နာရီများ မပေါ်သေး။ မြန်မာနာရီများကိုသာ သုံးရ၏။ ထို့ကြောင့် မြန်မာနာရီ အသုံးအနှုန်းများဖြစ်သည့် ဒိနန္ဓ၊ နိသဒ္ဓ၊ နေ့ဗဟို၊ ညဉ့်ဗဟို၊ တက္ကာလ၊ ကျော်နာရီ၊ ဘဝါး စသည်တို့ဖြင့် ဖော်ပြရ၏။ ဤသည်ကို အသင်တို့နားလည်ပါသလော။ ကြားဖူးပါသလော။ ၁၉၀၀ ပြည့်နှစ် အကျော်ကာလများကတည်းက မြန်မာ နာရီကို မည်သူမှ မသုံးတော့ပါ။ ရှေးယခင်ဇာတာများ၌ ဤအရာများ ထည့်ခြင်းမှာ အချိန်ကို အတိအကျ ဖော်ပြလိုသဖြင့် ဖြစ်၏။ ခေတ်ပေါ် စက်နာရီများတွင် မနက် ၉ နာရီ ၂၃ မိနစ် ၁၂ စက္ကန့် ဟု ရေးလိုက်ရုံဖြင့် ကိစ္စပြီး၏။

 

သိလိုသူများ ကျွန်ုပ် blog တွင် ဖတ်နိုင်ပါ၏။

https://shwenyein.blogspot.com/2012/07/blog-post_1466.html

 

သို့ဖြစ်လျှင် ထိုဗေဒင်ဆရာသည် အဘယ်ကြောင့် ဤသည်တို့ကို ရေးရပါသနည်း။ သူက ဇာတာလုပ်ရောင်းစားနေတာ ဖြစ်လေတော့ လူရှိန်အောင်ရေးတာ ဖြစ်ပါလိမ့်မည်။  

 

နောက်တစ်ခုက ထန်းဖူးဇာတာ၊ ပေဖူးဇာတာ၊ ကြေးဇာတာတို့ဆိုတာ ဟို့အရင်ခေတ်ကသာ လိုသည်။ ယခု ၂၁ ရာစုမှာ လိုအပ်ပါသလော။ ရိုးရာယဉ်ကျေးမှုတစ်ရပ်အနေနှင့် ထိန်းသိမ်းထားလိုသဖြင့်ဆိုလျှင် ကောင်းမြတ်သော ရည်ရွယ်ချက် ဖြစ်ပါသည်။

 

ရှေးယခင်ကာလများဆီက ကြာရှည်ခံရန် ရေးသားစရာများ မရှိသေးသောကြောင့် ကြာရှည်ခံသည့် ထန်းရွက်၊ ပေရွက်၊ ကြေး စသည်တို့ပေါ်၌ ဇာတာကို ရေးကြရခြင်းဖြစ်၏။ ယခုခေတ်တွင်မူ စာရွက်ပေါ်မှာ ရေးထားစရာတောင် မလိုပါ။ ကွန်ပြူတာနှင့်တွက်လျက် ဖုန်းထဲ၌သော်လည်းကောင်း၊ အင်တာနက် (ဥပမာ - Google drive) ၌ သော်လည်းကောင်း သိမ်းထားနိုင်ပါသည်။ အင်တာနက်မရှိပါဆိုလျှင် စာရွက်နှင့် ပရင့်ထုတ်ပြီး ပလပ်စတစ်လောင်းထားလို့ရ၏။ 

 

ဇာတာဟူသည် မိမိ၏ မွေးသည့် ရက်/လ/နှစ်တို့ကို မှတ်သားထားသည့် အမှတ်အသားတစ်ခုသာ ဖြစ်၏။ သည့်ထက် မပို။ သည်ခေတ်တွင် မိမိ၏ မွေးသက္ကရာဇ်မှာ မွေးစာရင်းဖြစ်၏။ မွေးစာရင်းထက် ပိုပြီး သေချာတာမရှိနိုင်။ ဇာတာ ဖွဲ့လိုပါက ဖွဲ့နိုင်ပါသည်။ သို့သော် ဇာတာမှာ ဗေဒင်တွက်ဖို့အတွက်သာ အသုံးဝင်၏။

 

မြန်မာဝီကီပီးဒီးယားပါ ဇာတာ

 

နောက်တစ်ခုက မြန်မာဝီကီပီးဒီးယားတွင် ဇာတာဆိုတာ ဘာ ဆိုပြီး ရေးထားတာ တွေ့လိုက်ရပြန်တော့ သောက်ကျိုးနဲ့စ် ကျွန်ုပ်မှာ အတော့်ကို ရင်တုန်ပန်းတုန် (ပန်းက ဘာကိစ္စတုန်ရသတုံး၊ မမေးကြပါနှင့်။ ကျွန်ုပ်လည်းမသိပါ။ ဤကား စကားချပ်) ဖြစ်သွားမိလေသော ဟူသတတ်။ 

 

https://my.wikipedia.org/wiki/%E1%80%87%E1%80%AC%E1%80%90%E1%80%AC

 

မြန်မာဝီကီ၌ ဇာတာကို အောက်ပါအတိုင်း ဖော်ပြထား၏။

 

“မြန်မာ ဗေဒင်ပညာရပ်တွင် ဇာတာသည် အရေးပါလှပေသည်။ ဇာတာသည် လူတစ်ယောက် မွေးသော အချိန် ( နာရီ မိနစ် )၊ နေရာပေါ်မူတည်ပြီး ရှေ့ဖြစ်မည့် ကံတရား အကြောင်းကို တွက်ချက်ခြင်းဖြစ်သည်။ လူတစ်ယောက်သည် ဇာတာဖွဲ့ထားပြီး ထိုဇာတာပေါ်မူတည်၍ မိမိ၏ ကံအခြေအနေကို သိရှိနိုင်သည်။ ဇာတာဟူသည် ဂြိုဟ်သွား ဂြိုဟ်လာ ပြက္ခဒိန်ကိုကြည့်ကာ ဗေဒင်ဟောခြင်း ပညာရပ်လည်း ဖြစ်သည်။”

 

သောက်ကယိုးနဲ့စ် . . . 

ဤသည်မှာမမှန်ပါ။ မမှန်ဆိုသည်မှာ မှားတာကိုခေါ်၏။

 

ဝီကီက “ဇာတာသည် လူတစ်ယောက် မွေးသောအချိန် ( နာရီ၊ မိနစ် )၊ နေရာပေါ်မူတည်ပြီး ရှေ့ဖြစ်မည့် ကံတရားအကြောင်းကို တွက်ချက်ခြင်းဖြစ်သည်။” ဆို၏။

 

မှားပါသည်။ ဇာတာသည် လူတစ်ယောက်မွေးသည့်အချိန်ကို အသေးစိတ်ဖော်ပြပြီး ထိုအချိန်ရှိ ကောင်းကင်ဂြိုဟ်နေ များကို ဖော်ပြထားသည့် စာတစ်စောင်ဖြစ်၏။ ရှေ့ဖြစ်မည့်ကံတရားကို တွက်တာမတွက်တာသည် ထိုသူ့အပေါ် မူတည် ပါသည်။ တွက်ချင်လည်း တွက်မည်။ တွက်ချင်မှလည်း တွက်မည်။ ဇာတာဖွဲ့သည်ဆိုတိုင်း ဗေဒင်တွက်တာ မဟုတ်။ 

 

နောက်ပြီး “ဇာတာဟူသည် ဂြိုဟ်သွားဂြိုဟ်လာ ပြက္ခဒိန်ကိုကြည့်ကာ ဗေဒင်ဟောခြင်း ပညာရပ်လည်း ဖြစ်သည်။” ဟု ဆိုသေး၏။ မှားပါသည်။ ဇာတာနှင့် ဗေဒင်မှာ ဆက်စပ်မှုတစ်ခုမျှသာဖြစ်၍ ဇာတာဖွဲ့တာသည် ဗေဒင်ဟောတာ မဟုတ်ပါ။ ငါ သိန်းတစ်သောင်းထီ ပေါက်မှပေါက်ပါ့မလား ဟု သိလိုသူများသာ မိမိဇာတာလေးကို ပိုက်လျက် ဗေဒင် ဆရာများထံ သွားကြတာ ဖြစ်၏။ ဇာတာရှိသူတိုင်း ဗေဒင်မေးချင်မှ မေးပါမည်။ ‘ဇာတာဆိုသည်မှာ ဗေဒင်ဟောခြင်း ပညာရပ်ဖြစ်သည်’ ဆိုသည်ကား အတော့်ကို လွဲသော၊​ မမှန်သော၊ မှားသောစာသား ဖြစ်သတည်း။

 

ဤသည်ကို ကြည့်ခြင်းဖြင့် ထိုဝီကီကို ရေးသူသည် ဇာတာအကြောင်း ဘာမှ မသိဘဲ ကြားဖူးနားဝနှင့် ရမ်းတုတ်ထားခြင်း ဖြစ်ကြောင်း သိသာနိုင်ပါသည်။

 

ပိုဆိုးသည်မှာ ထိုစာကို အဘယ်က ရယူထားသည်ဆိုသည့် Reference ကို ဖော်ပြမထားခြင်းဖြစ်၏။ ဖော်ပြမထား ဆိုကတည်းက ခိုင်မာသည့် စာအုပ်စာတမ်းတစ်ခုခုက ရယူထားခြင်းမဟုတ်ဘဲ ၎င်း စိတ်ထဲထင်ရာ လျှောက်ရေးထား ကြောင်း ခန့်မှန်းနိုင်၏။။

 

ဝီကီပီးဒီးယားကို အချက်အလက်လိုချင်သူတို့ ယူသုံးကြပါလိမ့်မည်။ ကျွန်ုပ်သည်ပင်လျှင် စာများရေးသည့်အခါ အင်္ဂလိပ် ဝီကီပီးဒီးယားကို မီငြမ်းရေးတာ အတော်များပါသည်။ အဘယ်ကြောင့်ဆိုသော် ဝီကီက အကြောင်းအရာ တစ်ခုနှင့် ပတ်သက်၍ ထိုအကြောင်းအရာတို့ကို သက်ဆိုင်ရာ စာအုပ်စာတမ်း, Website တို့ကို ရည်ညွှန်းလျက် စုံစုံလင်လင် စုစည်းပေးထားသည့်အတွက် တစ်ထိုင်တည်းနှင့် လိုတာ အကုန်ရနိုင်သောကြောင့် ဖြစ်၏။ ထို့ကြောင့် ဝီကီ သည် မည်သည့်အကြောင်းနှင့်မှ မမှားသင့်ဟု ယူဆပါသည်။ 

 

မြန်မာဝီကီကို ပြုစုကြကုန်သော ဆရာများအား ကျေးဇူးလည်းတင်ပါသည်။ တတ်နိုင်သမျှ မမှားရန်လည်း သတိပြုကြ ပါရန် ကျွန်ုပ်က မေတ္တာဖြင့် တိုက်တွန်းလိုပါ၏။ အင်္ဂလိပ်ဝီကီတွင် အောက်ခြေ၌ ၎င်းတို့ရယူထားသည့် ရည်ညွှန်း ကိုးကား စာအုပ်စာတမ်း၊ Website, news များအားလုံးကို ပြည့်ပြည့်စုံစုံ ဖော်ပြထား၏။ မြန်မာဝီကီတွင် မည်သည့် နေရာက ရယူထားသည်ကို ဖော်ပြမထား။ ထို အကြောင်းအရာတို့၏ မူရင်း source ကိုပါ ဖော်ပြပေးပါရန် ကျွန်ုပ်က အထူး မေတ္တာရပ်ခံပါ၏။ အင်္ဂလိပ်ဝီကီကို အတုယူကြပါကုန်။ စိတ်ထဲထင်ရာတွေ လျှောက်မရေးကြပါနှင့်။

 

ဆိုတော့ အသုံးတည့်သည်ဖြစ်စေ၊ မတည့်သည်ဖြစ်စေ။ မိတ်ဆွေတို့ ဂျင်းထည့်မခံရစေရန် ကျွန်ုပ်က ‘ဇာတာ’ အကြောင်း ရေးလိုက်ရပြန်ပါချေသည် တမုံ့စ်။

ဇာတာ

 

အကြမ်းဖျဉ်းပြောရလျှင် ဇာတာဟူသည် လူတစ်ဦးမွေးဖွားသည့် နာရီ၊ မိနစ်၊ စက္ကန့်၊ နေ့၊ ရက်၊ လ၊ နှစ် အချိန်နှင့် ထိုအချိန်၌ တည်ရှိသော ကောင်းကင်ဂြိုဟ်နေများကို ဖော်ပြထားသည့် စာတမ်းတစ်စောင် ဖြစ်၏။

 

ဇာတာကို လူများမွေးဖွားခြင်းအတွက် အဓိကထား သုံးသည့်တိုင် အခြားကိစ္စများအတွက်လည်း သုံးသေး၏။

 

ယေဘူယျအားဖြင့် ပြောရလျှင် ဇာတာဆိုသည်မှာ အချိန်တစ်ခု၌ အဖြစ်အပျက်တစ်ခု ဖြစ်ပျက်သည်ကို မှတ်တမ်းတင်ထားသည့် မှတ်တမ်းတစ်စောင် ဖြစ်၏။ 

 

ထိုအဖြစ်အပျက်သည် လူတစ်ယောက်မွေးဖွားလာခြင်း ဖြစ်ချင်ဖြစ်မည်။ အဆောက်အဦတစ်ခု ဆောက်တာ ဖြစ်ချင်ဖြစ်မည်။ ဘုရားတည်တာ ဖြစ်ချင်ဖြစ်မည်။ ဘုရင်တစ်ပါး နန်းတက်တာ ဖြစ်ချင်ဖြစ်မည်။ မြို့တည်တာ ဖြစ်ချင်ဖြစ်မည်။ 

 

မြန်မာနိုင်ငံ လွတ်လပ်ရေးရချိန်ကို ဇာတာဖွဲ့ကာ မြန်မာနိုင်ငံ၏ ရှေ့ရေးကို တွက်ဆနိုင်၏။ ဆရာကြီးများ တွက်ဆကြပါကုန်။

 

ရက်ချုပ်ဟူသည် မွေးစာရင်းမျှသာ ဖြစ်၏။ ဇာတာဟူသည်ကား ထိုမွေးစာရင်းအပြင် ထိုအချိန်၌ရှိသော ကောင်းကင် ဂြိုဟ်နေများကိုပါ ပြထား၏။

 

ကောင်းကင်ဂြိုဟ်နေများကို ပြဆိုရာ၌ စက်တစ်လုံးတည်းဖြစ်ပါက ဧကစက္ကဇာတာ၊ စက်နှစ်လုံးဖြစ်မူ ဒွိစက္ကဇာတာ၊ စက်သုံးဖြစ်မူ တြိစက္ကဇာတာဟု ခေါ်၏။ 

 

စက်တစ်လုံး ဧကစက္ကဇာတာ ၌ ရာသီစက် တစ်ခုသာပါ၏။ 

စက်နှစ်လုံး ဒွိစက္ကဇာတာတွင် ရာသီစက်နှင့် နဝင်းစက်၊ သို့မဟုတ် ရာသီစက်နှင့် ဘာဝစက် တို့ပါ၏။

စက်သုံးလုံးဖြစ်သော တြိစက္ကဇာတာ၌ ရာသီစက်၊ နဝင်းစက်နှင့် ဘာဝစက် တို့ပါ၏။

 

ထိုစက်သုံးစက်သာမက စက် ၈ လုံးပါသည့် အဋ္ဌဝဂ္ဂဇာတာလည်း ဖွဲ့ကြသေး၏။ အဋ္ဌဝဂ္ဂဇာတာမှာ ပိုအသေးစိတ်၏။ အဋ္ဌဝဂ္ဂဇာတာကို ကျွန်ုပ်ကောင်းစွာတွက်တတ်ပါသည်။ သင်ပေးလျှင် ဘာမှ မခဲယဉ်းပါ။

 

ဤ စက်သုံးလုံးအပြင် အဓိပတိတိုင်နှင့် တိုင်ဆယ်ပါးကိုလည်း ထည့်လိုက ထည့်နိုင်၏။ ထိုတိုင်ဆယ်ပါးမှာလည်း ဗေဒင်ဟောရန် အတွက်သာဖြစ်ပြီး မပါမနေရမဟုတ်။ အထက်၌ ဟိုဗေဒင်ဆရာလေး ဖော်ပြခဲ့သည့် ၃၈။ ထီးဖြူ  / ၃၉။ သိရီ / ၄၀။ ဆင်ဖြူ  / ၄၁။ သုဝဏ္ဏ / ၄၂။ ရတနာပုံ စသည်တို့မှာ ထိုတိုင်ဆယ်ပါးပင်ဖြစ်၏။ 

 

ရှေးကလူတို့သည် ဇာတာကို အမြတ်တနိုး တန်ဘိုးထားလျက် အသေအချာ့ကို လုပ်ခဲ့ကြတာဖြစ်၏။

 

ယခင်က ဇာတာကို ထန်းဖူးပေါ်တွင် ရေးသားကြ၏။ ထန်းဖူးဆိုသည့်တိုင် ထန်းရွက်ပေါ် သည်အတိုင်း ပြီးပြီးရော ရေးလိုက်တာမဟုတ်ဘဲ ထန်းရွက်ကို ကြာရှည်ခံအောင်ပြုပြင်ပြီးမှ ထပ်ကာချုပ်လျက် ရေနံဆီစသည်ဖြင့် သုတ်လိမ်းပြီး ပိုးမထိုးအောင် သေချာကျနစွာ ပြုပြင်ထားခြင်းဖြစ်၏။

 

ရေးသားသည့်အခါတွင်လည်း လက်ရေးလက်သားကောင်းကောင်းဖြင့် ကနုတ်၊ ဒေါင်းရုပ် စသည်တို့ပါ ခြံရံလျက် လှလှပပ ရေးကြ၏။ မြတ်စွာဘုရားပုံတော်များလည်း ထည့်ကြ၏။ အဓိပတိတိုင်တောင် ရိုးရိုးမရေးဘဲ ပြဿဒ်ပုံသဏ္ဍာန် ရေးဆွဲ ထည့်သွင်းကြ၏။ စဓဗဝ ကိုလည်း ထည့်သွင်းရေးဆွဲ၏။ မြတ်စွာဘုရား၏ ဖြစ်စဉ်တော်များလည်း ပါ၏။ အင်းကွက်များလည်း ပါ၏။

 

အဘယ်ကြောင့် ထိုသို့ ရေးကြသနည်းဆိုသော် လူတစ်ယောက် လူ့ပြည်လောကထဲဝင်ရောက်လာခြင်းသည် အလွန် ကောင်းမြတ်သော မင်္ဂလာ ဖြစ်၏။ မွေးဖွားချိန်၌ တွက်ချက်ရေးထုတ်လိုက်သော ဇာတာဟူသည် ထိုလူသားကို ကိုယ်စားပြု၏။ ထိုလူသည် လောကအကျိုး သံသရာအကျိုးများကို ဆောင်ကြဉ်းနိုင်ပါစေသတည်း။ စည်းစိမ်ဥစ္စာများနှင့် ပြည့်စုံပါစေသတည်း။ ရတနာသုံးပါးနှင့် နတ်ကောင်းနတ်မြတ်တို့ စောင့်ရှောက်ကြပါစေကုန်သတည်း . . . . စသော ရည်ရွယ်ချက်များနှင့် ရေးဆွဲတာ ဖြစ်၏။ 

 

ရိုးရာယဉ်ကျေးမှုတစ်ရပ်အနေနှင့် ထိန်းသိမ်းထားလိုသူများ ထန်းဖူးဇာတာ လုပ်ထားနိုင်ပါ၏။ ကျွန်ုပ် ရန်ကုန်တွင်ရှိစဉ်က ထန်းဖူးဇာတာများ ဝယ်ခဲ့ဖူးသေးသည် ထင်၏။ မိတ်ဆွေများကို ဇာတာလက်ဆောင် ဖွဲ့ပေးရန် ဖြစ်၏။ (သားက သူ့ဘို့လည်း ဇာတာဖွဲ့ပြီး ဟောစာတမ်းရေးပေးပါ ပူဆာနေ၏။ ဘာတွေ အလုပ်ရှုပ်မှန်းမသိတာနှင့် ခုထိ မလုပ်ဖြစ်။)

 

သင်္ချာပညာရပ် မထွန်းကားသေးသော ယခင်အခါ ကာလများကမူ ဇာတာဖွဲ့ရန် အတော်လေး ခဲယဉ်းပါလိမ့်မည်။ အနို့ ကိုးနဝင်းကို မိုးအလင်းတွက်ရသည် ဆို မဟုတ်လော။

 

ယခုခေတ်တွင်မူ မိမိမွေးသည့် ခုနှစ်၊ လ၊ ရက်၊ နာရီ၊ မိနစ်၊ နေရာတို့ကို ထည့်လိုက်သည်နှင့် ဇာတာထွက်လာသော ပရိုဂရမ်များလည်း ရှိနေပြီဖြစ်ရာ ဇာတာတစ်စောင် ဖွဲ့ဘို့ရာ သည်လောက် မခဲယဉ်းတော့ပါ။

 

သို့သော် ဟဲဟဲ၊ တခါတလေ ခက်ခက်ခဲခဲ လုပ်ယူရတာ ပိုပြီး တန်ဘိုးရှိပါသည်။ ခက်ခက်ခဲခဲရသည့်ပိုက်ဆံမှ ပိုပြီး တန်ဘိုးရှိသည် မဟုတ်လော။ ကျွန်ုပ်သည်လည်း ယခုထိ ဇာတာကို စာရွက်ပေါ်ချကာ လက်နှင့်တွက်ဆဲပင် ဖြစ်၏။ ကျွန်ုပ်ထံတွင် Swiss Ephemeries များကို နှစ်ပေါင်းထောင်နှင့်ချီ down ထားတာရှိ၏။ NASA ထုတ် အနှစ် ၅၀ စာ ဂြိုဟ်သွားစာအုပ်ကြီးလည်းရှိ၏။ ထို့ပြင် မြန်မာပညာရှင်တို့ တွက်ချက်ထားသည့် သံဒိဋ္ဌပြက္ခဒိန် ၁၀ နှစ်တွဲများလည်း နှစ် ၁၀၀ စာလောက်ရှိ၏။ ကျွန်ုပ်သည် ဇာတာဖွဲ့တာ တွက်တာတို့ကို ဝါသနာပါ၏။ သို့သော် အဟောကို သိပ်အားမသန်ပါ။

 

ကျွန်ုပ် ဇာတာအဖွဲ့သင်တာ ဆရာနှင့် သင်တာမဟုတ်။ ဆရာမောက်၏ သံဒိဋ္ဌဇာတာဖွဲ့နည်းကျမ်း စာအုပ်ကို ဖတ်လျက် နေ့မနား၊ ညမအား အသည်းအသန် လေ့လာတွက်ချက်ခဲ့တာဖြစ်၏။ ထို့ကြောင့် ကျွန်ုပ်ဆရာမှာ ဆရာမောက်ကြီး ဖြစ်သတည်း။

 

 

 ဇာတာညံ့လို့၊ ဇာတာဆေးရမယ် ဆိုသည့်စကားများကို အသင်တို့ ကြားဖူးပါလိမ့်မည်။

ဘာမှ ဇာတာကညံ့တာ မဟုတ်ပါ။ ဘာဇာတာကိုမှ ဆေးစရာမလိုပါ။

ဇာတာဟူသည် မိမိမွေးဖွားစဉ်က ကောင်းကင်ဂြိုဟ်နေများဖြစ်၍ ဘာမှပြောင်းစရာအကြောင်းမရှိ။ 

ကောင်းတယ်ဆိုးတယ်ဆိုသည် လက်ရှိအနေအထား၊ ဗေဒင်လိုပြောရလျှင် လက်ရှိဂြိုဟ်များ၏ အစီးအနင်းပင် ဖြစ်၏။

 

ကျွန်ုပ် ဇာတာများအကြောင်း စတင်လေ့လာဖြစ်သည်မှာ စာပေဗိမာန် စာမူဆုရ တင်မမခိုင်(မန်းတက္ကသိုလ်) ၏ မြန်မာ့ဇာတာ စာအုပ်ကြောင့် ဖြစ်ပါသည်။ ဆရာမကြီးကို ကျေးဇူးအထူးတင်ပါ၏။ ဆရာမကြီး၏ ‘ဇာတာပုံစံများ’ စာအုပ်သည် ဇာတာများအကြောင်း ကောင်းစွာသုတေသနပြု ရေးသားထားတာ ဖြစ်၍ မြန်မာ့ယဉ်ကျေးမှုအတွက် များစွာ ကျေးဇူးပြုပါသည်။ လိုအပ်နေသော ကွက်လပ်တစ်ခုကို ဖြည့်ပေးသည်လည်း မည်၏။ သည့်အတွက်လည်း ဆရာမကြီးကို ကျေးဇူးတင်ရပါ၏။

 

 

 ဤသည်မှာ ဖေ့စ်ဘုတ် ပို့စ်တစ်ခုကို ယောင်မှား ဖတ်မိရာမှ ရေးစရာရလာသော အကြောင်းအရာတစ်ခု ဖြစ်ရပြန်ပါကြောင်း . . . 

 

 

အေးငြိမ်း

၁၉ ဧပြီလ၊ ၂၀၂၅