စင်ကာပူက ပါတာညာတေး ကုမ္ပဏီတို့ အကြောင်း

စီနေရီယို (၁)

 

မစ္စတာညာစ်တာ နှင့် မဒမ်ပါစ်တေးတို့သည် ငွေယားကလေး လက်ထဲရှိသည်နှင့် ကုမ္ပဏီထောင်ကြလေ၏။ ကုမ္ပဏီ နာမည်ကို လင်မယားနှစ်ယောက်နာမည်ပေါင်းလျက် ပါတာညာတေးကုမ္ပဏီဟု အမည်ပေးကြ၏။ ဘာလုပ်မလဲ စဉ်းစား ကြတော့ သိပ်ခေါင်းမစားသည့် စာအုပ်ချုပ်သည့်လုပ်ငန်းကို လုပ်ရန် ရွေးကြ၏။ParTar NyarTay Publishing House ပေါ့။

 

စာအုပ်ထုပ်များကို သယ်ရန်၊ ချုပ်ပြီးစာအုပ်များဖြန့်ရန် စသည်တို့အတွက် အလုပ်သမားလို၏။

ဘယ်အလုပ်သမားခေါ်မလဲ စဉ်းစားတော့ ဘိုင်သေရမည့်၊ ပေးသမျှလခလေးယူကာ ခိုင်းသမျှ အသားကုန်လုပ်မည့် မြန်မာပြည်က ကင်ချီလေးများကိုခေါ်ရန် ဆုံးဖြတ်ကြ၏။

 

တစ်ပြားကိုနှစ်ပြားခွာရေးဟူသည့် ကုမ္ပဏီပေါ်လစီအရ ဘာတစ်ပြားမှ မကုန်ကျမည့် အွန်လိုင်းကြော်ငြာများ တင်၏။ 

အီးမေးနှင့် လျှောက်လွှာများ ရသည့်အခါ ဒဘျားမှ မကုန်သည့် Zoom နှင့် အင်တာဗျဲ၏။

ဘာတဲ့ ရာထူးက ‘ဂလပ်ဖစ်ဒီဇိုင်နာ’ ဟူ၏။ S Pass က ဘာဖစ်သယ်၊ ညာဖစ်သယ် ဆိုသည်နှင့် ဝပ်ပါမစ်တင်ပေးတာ လက်ခံလိုက်၏။ 

 

IPA ကျလာတော့ အလုပ်က “ဝယ်ဒါ” ဟူ၏။ ဝယ်ဒါဆိုလို့ ပစ္စည်းတွေလိုက်ဝယ်ရသည့် အဝယ်တော် မထင်ပါနှင့်။ ဟိုသံချောင်းနှင့် ဒီသံချောင်းနှစ်ခုကို ဆက်ရသည့် Welder ဖြစ်၏။ ကိုဟိုနင်းကလည်း IPA မှ ဖတ်တတ်ပါလေစ။ ဘာဖြစ်ဖြစ် စင်ကာပူရောက်ရင်ပြီးရော ဆိုပြီး ထွက်ချလာခဲ့၏။

 

ဒီရောက်တော့ ဘာဂလပ်ဖစ်ကိုမှ ဒီဇိုင်မနာရ။ သူ့ကို DTP (DeskTop Publishing) လုပ်ခိုင်း၏။​ မောင်မင်းကြီးသားက မလုပ်တတ်။ ထိုအခါ . . . 

ထိုအခါစ်ပေါ့ခညာ . . . 

 

ဂလပ်ဖစ်ဒီဇိုင်နာ လုပ်ဖို့ ရည်မှန်းချက်ကြီးနှင့် စလုံးရောက်လာသည့် ငမိုက်သားကလေးမှာ စာရွက်ထုပ်များကိုလည်း ထမ်းရ၏။ စာအုပ်ချုပ်ရာ၌လည်း ဝိုင်းကူရ၏။ ချုပ်ပြီးသားစာအုပ်ထုပ်ကြီးများကိုလည်း ထမ်းပိုးကာ . . . ငင့်စ်

 

ထိုသကောင့်သားကလေးကို မမလေးတစ်ယောက်က ကျွန်ုပ်ထံ ဆောင်ကြဉ်းလာ၏။ ဟောဒီမှာ ဒုက္ခသည်တစ်ယောက်၊​ကျုပ်ကျက်လိပေးပါအုံး ဆို၏။ ရှောက်ခယိုးနဲ၊ ကျုပ်များ “ကုလသမဂ္ဂ ဒုက္ခသည်များဆိုင်ရာ မဟာမင်းကြီး” များ အောက်မေ့နေသလား မပြောဒတ်စ်။

 

“ကိုယ့်လူ အခုမှ ရောက်ခါစ ဘာမှ ထွေလီကာလီတွေ လျှောက်မလုပ်နဲ့အုံး။ တော်ကြာ ခဲတောင့်ခဲယဉ်း စင်ကာပူ ရောက်လာပြီးမှ ပြန်လွှတ်ခံရလို့ ဒွတ်ခ ဖြစ်နေမယ်။ ခုခဏသည်းညည်းခံလုပ်၊ ၄ - ၅ လ လောက်ကြာရင် ကိုယ်လိုချင်တဲ့ အလုပ်သစ်ထပ်ရှာ။ စာချုပ်ထဲမှာ အလုပ်ထွက်ချင်ရင် ဘယ်နှစ်လ ကြိုအသိပေးရမယ်ဆိုတာ ပါတယ်။ အဲဒီကာလ အတိုင်း လုပ်ပေးလိုက်ပြီး နောက်အလုပ်ကိုပြောင်း၊ MOM website မှာ စင်ကာပူက အေးဂျင့်စာရင်းရှိတယ်။ သူတို့နဲ့ ဆက်သွယ်ပြီး အလုပ်ရှာပေါ့။”

 

- ဟု ပြောလွှတ်လိုက်ရလေသော ဟူသတတ်။

 

 

စီနေရီယို (၂)

 

‘ဆရာ့၊ လုပ်ပါအုံး။ ကျနော်တော့ ခုနေ့ခင်းထွက်တဲ့ လေယာဉ်နဲ့ ပြန်ရတော့မယ်၊​ အဟင့် ရွှတ်စ်’

 

၁၅ ရက်နေ့မနက်ပိုင်း စာသင်နေတုံး ငမိုက်သားကလေးတစ်ယောက် ဖုန်းဆက်လာ၏။

 

‘ငမ်၊ ဘယ်လိုဖြစ်တာတုံး ကိုယ့်လူရဲ့’

‘Blah . . . blah . . . blah . . . 

 

ကျွန်ုပ်က ဘလွတ်ဘလွတ်နှင့် စာသင်နေရတော့ သူ့ကို အေးအေးဆေးဆေး စကားမပြောနိုင်။ ထို့ကြောင့် ကျွန်ုပ်ရှိရာသို့ လာခဲ့ရန် မြေပုံနှင့်တကွ ပေးလိုက်၏။ ထမင်းစားချိန်ရောက်တော့ စကားပြောကြ၏။

 

သူက ရောက်တာ ၂ လတောင် မပြည့်သေး။

ပြောတုံးက Welder အလုပ်၊ အခုလုပ်ရတော့ ဆောက်လုပ်ရေးအလုပ်သမား။

 

‘တားက ထိုင်းမှာ ၁၀ နှစ်လောက် ဝယ်ဒင်ဆော်လာတာ။ ဝယ်ဒင်ကောင်းကောင်း ဆော်တတ်တယ်။ အဲဒါ သူတို့က ဝယ်ဒါလုပ်ရမယ်ဆိုလို့လာခဲ့တာ။ အခု ကျွန်တော် ဘိလပ်မြေအိတ်တွေ၊​ သံချောင်းတွေထမ်းရလို့ မလုပ်နိုင်တော့လို့ အေးဂျင့်ကို ထရန်စဖာလက်တာ တောင်းတာ။ အေးဂျင့်က ပေးမယ်ပြောပြီး ခုတော့ အဟင့် ရွှတ်စ်’

 

ခုတော့ ဘာဖြစ်တုံး ကိုယ့်လူရဲ့။

 

အေးဂျင့်ပြောတော့ ထရန်စဖာလက်တာပေးမယ်တဲ့။ အဲဒါ အခုမနက် စာလာပေးတော့ သူပြောတဲ့ ထရန်စဖာလက်တာ မဟုတ်ဘူး။ အလုပ်ဖြုတ်တဲ့စာနဲ့ လေယာဉ်လက်မှတ်။ ကနေ့ညနေထွက်မဲ့လေယာဉ်နဲ့ ပြန်ရမယ်။

 

အနို့ ကိုရင့် IPA ထဲမှာ Construction Worker လို့ရေးထားပါလားကိုယ့်လူရဲ့။ Construction Worker ဆိုရင်တော့ ဆောက်လုပ်ရေးအလုပ်တွေ ခိုင်းမှာပေါ့။

 

Construction Worker တော့ဟုတ်တယ်လေ။ ဒါပေမယ့် သူတို့က ဝယ်ဒင်ဆော်ရမယ်ပြောလို့ တားလည်း လာခဲ့တာ။ အခုတော့ အဟင့် ရွှတ်စ်

 

အခု ကိုရင်ရောက်တာ ၃ လ တောင်မပြည့်သေးဘူး။ ဘာကိစ္စ transfer letter သွားတောင်းတာလဲ။ နည်းနည်းပါးပါး အခြေအနေကြည့်ကျက်လုပ်မှပေါ့။ ဒီအလုပ်မှာသည်းခံလုပ်။ နောက်တော့မှ ကိုယ်လိုချင်တဲ့အလုပ်ကို အေးဂျင့်နဲ့ရှာ။ အလုပ်ရပြီဆိုတော့မှ transfer letter တောင်းရတာ။ အခု ဘာလုပ်လို့ရတော့မတုံး။ ညနေပဲ ပြန်ရတော့မှာ။

 

တား ဆက်နေလို့ မရတော့ဘူးလားငင်။

 

ဟောဒီ Special pass ထဲမှာ 15/04/2025 နောက်ဆုံးထားပြီး စင်ကာပူက ထွက်ပေးပါလို့ ရေးထားတယ်။ ဒီနေ့ ၁၅ ရက်ဖြစ်နေပြီ။ အဲဒါမှ ကိုရင် စင်ကာပူထဲမှာဆက်နေရင် overstay နဲ့ အဖမ်းခံရလိမ့်မယ်။ ညနေထွက်နဲ့ လိန်ဘျံကြီးနဲ့သာ ဒိုးလိုက်တော့။ နောက်မှ အခြေအနေကြည့်ပြီး ပြန်လာ။

 

 

(၃)

 

အသင်တို့ စင်ကာပူလာဘို့ဆိုတာ လွယ်တာမဟုတ်။ ကျွန်ုပ်မေးကြည့်တော့ တချို့ဆို သိန်း ၃၀၀ လောက်တောင် ကုန်သည်ဆို၏။ သိန်း ၃၀၀ ဆိုတာ အိမ်တစ်လုံးစာလောက်ရှိ၏။ 

 

အသင်တို့သည် စင်ကာပူမလာမီကတည်းက သေသေချာချာ မေးမြန်းစုံစမ်းကြပါ။

ကိုယ်လုပ်ရမည့်အလုပ်၊ ကိုယ်လုပ်ရမည့် ကုမ္ပဏီ၊ ရမည့်လခ၊ နေရထိုင်ရမည့်ပုံစံနှင့် အခြား ခံစားခွင့် စသည်များ၊ သိသင့်သိထိုက်သည်များကို စုံစေ့အောင်မေးပြီးမှလာပါ။

 

IPA ထဲမှာ ဖော်ပြထားသည်တို့ကို နားလည်သဘောပေါက်အောင် ဖတ်ပါ။ မသိလျှင် အေးဂျင့်ကို မေးပါ။

စင်ကာပူရောက်ပြီးမှဆို ဘာမှ လုပ်လို့မရတော့။

 

စင်ကာပူရောက်ပြီဆို သည်အလုပ်ကို မကြိုက်လျှင်တောင် ၃ - ၄ - ၅ လ တန်သည် သည်းခံလုပ်ပါ။ နောက်အလုပ်ရဘို့ သေချာပြီဆိုမှ ကုမ္ပဏီပြောင်းဘို့ စဉ်းစားပါ။ ကိုယ့်ရှေးရေး မသေချာသေးပဲ ပေါက်ကရတွေ လျှောက်လုပ်လျှင် ကိုယ်က နာဘက်ကချည်းဆိုတာ သတိရပါ။

 

ပြောရတာလည်း မော့ဗာ့။​ ယခွမ်း

 

အေးငြိမ်း

၂၆ ဧပြီ၊ ၂၀၂၅

ကျွန်ုပ် ထန်းရည်သောက်ခြင်း အကြောင်း

စင်ကာပူက သင်တန်းတွေကို သင်တဲ့သူက စာမေးပွဲစစ်လို့မရ။ စာမေးပွဲစစ်တဲ့သူက သင်လို့မရ ဆိုတော့ မနေ့က ကျွန်ုပ် မနက်ပိုင်းသင်ပြီး ထမင်းစားချိန်မှာ ပြန်လာခဲ့ရ၏။ မပြုံးကလည်း ‘ကိုအေးငြိမ်းရေ၊ လကုန်ရင်တော့ စာအုပ်တွေ အိမ်ပြန်ပို့တော့မှာနော်။ လမကုန်ခင်လာယူလှည့်ပါ’ ဆိုတာကြောင့် ကျွန်ုပ်လည်း အချိန်းအချက်လုပ်လျက် ညနေပိုင်းတွင် ပင်နင်စူလာ၌ စာအုပ်များ သွားယူ၏။ ကျေးဇူးပါ မပြုံး

တောင်မြို့ဆရာတော်ဘုရားကြီး၏ ‘တစ်ဘဝသံသရာ’၊ နန္ဒာသိန်းဇံ၏ ‘ဘဝအဓိပ္ပာယ်နှင့် ဘဝသစ္စာ’၊ ရွှေဥဒေါင်း၏ စုံထောက် မောင်စံရှားပေါင်းချုပ်၊ သော်တာဆွေ၏ ကျွန်တော့်ဘဝဇာတ်ကြောင်း၊ ကြေးမုံဦးသောင်း၏ စာအုပ်များ အပါအဝင် စာအုပ် ၃၀ ခန့် မ,လာခဲ့၏။ 

 

ကျွန်တော့်ဘဝဇာတ်ကြောင်းကို ကျွန်ုပ် အသက် ၁၃ - ၄ - ၅ နှစ်လောက် ကတည်းက မြဝတီ၊ ငွေတာရီ မဂ္ဂဇင်း အဟောင်းများထဲ၌ ဖတ်ခဲ့ဖူး၏။ အတော်လည်း ကြိုက်၏။ (စကားစပ်၍ ပြောရလျှင် ထိုမဂ္ဂဇင်းများမှာပါသည့် သခင်တင်မြ၏ ဘုံဘဝမှာဖြင့် အခန်းဆက် ဆောင်းပါးများကိုလည်း ကျွန်တော် အတော် ကြိုက်ခဲ့ပါသည်။)

 

“တစ်ဘဝသံသရာ” နှင့် “ဘဝအဓိပ္ပာယ်နှင့် ဘဝသစ္စာ” တို့ကို ၁၉၈၃ - ၈၄ ခုနှစ်အခါ ကာလများဆီက ဖတ်ခဲ့ဖူး၏။ ဘဝအဓိပ္ပာယ်နှင့် ဘဝသစ္စာမှာ နန္ဒာသိန်းဇံ၏ မဟာဝိဇ္ဇာဘွဲ့ယူကျမ်း ဖြစ်ပြီး ကျွန်ုပ်မှာ ကြိုက်လွန်းသဖြင့် ၂ ခေါက် လောက် ဖတ်ဖြစ်ခဲ့၏။ ယခုတစ်ခေါက် ပြန်ဖတ်ရဦးမည်။ ငယ်စဉ်က ဖတ်လို့နားမလည်ခဲ့သည်များကို ယခုအခါ ပြန်ဖတ်လျင် နားလည်နိုင်လိမ့်မည်ဟု ယူဆပါသည်။

 

ကျွန်ုပ်အလွန်နှစ်သက်ခဲ့သော စုံထောက်မောင်စံရှားပေါင်းချုပ် စာအုပ်ကြီးမှာလည်း ကျွန်ုပ်အတွက် ရတနာတုံးကြီးပင် ဖြစ်ပါတော့၏။ အမှန်ပြောရလျှင် ဆရာကြီးရွှေဥဒေါင်း၏ စာအုပ်များ (ဥပမာ - ရူပနန္ဒီ၊ ရူပကလျာဏီ) မှာ ကျွန်ုပ်အတွက် ဘယ်နှစ်ခေါက်ဖတ်ဖတ် ရိုး၍မသွားသော စာအုပ်များ ဖြစ်၏။

 

ပရိတ်ကြီးနိဿယျမှာ ငယ်စဉ် လိမ္မာတုံးဘဝက ဖတ်ခဲ့ဖူး၏။ အခု ထို တရားစာအုပ်များ မဖတ်ဖြစ်တာ ကြာပါပြီ။ အသက်ကြီးလာတော့ အတွေ့အကြုံတွေရင့်လာပြီ။ ငယ်ငယ်တုံးကလောက် မလိမ္မာတော့။ အဟိ

 

စာအုပ်တွေအတွက် ကျေးဇူးပါ မပြုံး။

 

 

 ငင့် - ထန်းရည်သောက်ပါမယ်ဆိုမှ ဘာကိစ္စ စာအုပ်တွေအကြောင်း လျှောက်ပြောနေရတာတုံး။

 

ခဏလေးစောင့်ပါအုံးခည။

 

စာအုပ်တွေယူပြီးတော့ သားဘို့ မုန့်ဖက်ထုပ်ဝယ်၏။ ဆိုင်ထဲ ဟိုဟိုဒီဒီလျှောက်ကြည့်ရင်း ထန်းရည်ကို သွားသတိရ၏။

ဒီမှာ ထန်းရည်ဘူးရတယ်မဟုတ်လား ဆိုတော့ ဆိုင်ရှင်အမျိုးသမီးက မျက်လုံးကြီးပြူးပြီး ကြည့်နေ၏။ ‘မြူ’ ဆိုတဲ့ ထန်းရည်လေ၊ သံဘူးနဲ့လာတယ် ဆိုတော့ ကောင်မလေးတစ်ယောက်က ရှိတယ် ရှိတယ်ဟု လိုက်ပြ။ 

ငင့်စ်၊ တစ်ဘူး ၄ ကျပ်ဆိုပါလား။

အဲသဟာနဲ့ ၂ ဘူးဝယ်ခဲ့၏။ 

 

(ထိုဆိုင်ရှေ့မှ စားသောက်ဆိုင်တွင်လည်း ထန်းရည်ဘူးများတွေ့သဖြင့် မေးကြည့်ရာ ၅ ကျပ် ဆို၏။ ဟိုက်ရော၊ ခြေလှမ်း ၁၀ လှမ်းလောက်နှင့် ၁ ကျပ်ကွာသည်။ ပထမဆိုင်တွင် ဝယ်ခဲ့မိသဖြင့် ကျွန်ုပ်လည်း ကိုယ့်ကိုယ်ကိုယ် ကျေးဇူးများပင် တင်မိလေသော ဟူသတတ်။ ဤကား စကားချပ်)

 

 

သောက်ကြည့်တော့ အင်း၊ တစ်ခုခုလိုနေသလိုပဲ။ အပင်ပေါ်က ခုမှချလာတဲ့အရည်နဲ့တော့ ဘယ်တူလိမ့်မတုံးကွာ ဟု သားကို ပြောရ၏။ သူလည်း ကြိုက်ပါသည်။ မြန်မာပြည်ပြန်စဉ်က သူက ငယ်သေးတော့ ထန်းရည်နှင့် မိတ်ဆက် မပေးခဲ့ရ။

 

ကျွန်ုပ်ရွာရောက်တိုင်း ထန်းရည်သောက်၏။ ကျွန်ုပ်သည် ထန်းရည်ကို ကြိုက်၏။ အထူးသဖြင့် မနက် ၁၀ နာရီ ၁၁ နာရီ လောက်ထန်းရည်ကို အလွန်ကြိုက်ပါသည်။ ထိုထန်းရည်အရသာကို ကျွန်ုပ်တို့က ‘ချိုပြင်း’ ဟု ကင်မွန်းတပ်၏။ အမျိုးသမီးများလည်း သောက်ကြ၏။ ချိုပြင်းသည် သိပ်မမူးပါ။

 

ဗုဒ္ဓဘာသာ ကျမ်းဂန်များအရ သုရာ ၅ မျိုး၊ မေရယ ၅ မျိုး၊ မဇ္ဇ စသည်တို့ရှိ၏။ ဆန်ကိုချက်ထားသည့်အရက်မှာ သုရာ ဖြစ်ပြီး စပျစ်သီးကိုဖောက်ထားသည့်ဝိုင်မှာ မေရယ ဖြစ်၏။ မူးရစ်စေတတ်သည့် ထန်းရည် စသည်တို့ကို မဇ္ဇခေါ်သည် ဆို၏။

 

အပင်ကကျသည့် ထန်းရည်မှာ အဘယ်ကြောင့် မူးရသနည်း။ 

အပင်က ကျလာသည့် ထန်းရည်ကို အိုးသန့်သန့်နှင့် ခံလျက်သောက်ကြည့်ပါ။ အလွန်ချို၏။ ထို့ကြောင့် ထန်းလျက် ချက်လို့ရသည် မဟုတ်လော။ သို့သော် အနှီထန်းရည်ကို နေနှင့်ချက်လိုက်သည့်အခါ တဖြည်းဖြည်း ပြင်းလာ၏။ နေသိပ်မရင့်သေးသည့် မနက် ၁၀ နာရီ ၁၁ နာရီအချိန်တွင် စတင် အချဉ်ပေါက်လာပြီး အချိုဓာတ်လည်း မပြယ်သေး၊ အရက်ဖြစ်ခါစ။ အလွန်သောက်လို့ကောင်းလှ၏။

 

နေ့ခင်း ၁၂ နာရီကျော်သွားလျင် အချိုဓာတ် လုံးဝပျောက်သွားပြီး အရက်ဖြစ်လာ၏။ သို့တိုင် သိပ်မပြင်းသေး။ သောက်မည်ဆို သောက်နိုင်သေး၏။ အဲ အလွန်ပူပြင်းလှသည့် နေ့ခင်း ၃ နာရီ ၄ နာရီကို ကျော်လာပြီဆိုလျှင်တော့ ၎င်းထန်းရည်သည်ပင်လျင် အရက်ပြင်းကဲ့သို့ ဖြစ်လေ၏။ ဝါးကျည်တောက်ထဲမှ ထန်းရည်ကို ဝါးဆစ်ခွက်ထဲ ငှဲ့ ထည့်လိုက်လျင် ပုဇွန်ဆိတ်ကလေးများကဲ့သို့ တဖြောက်ဖြောက်နှင့်၊ ထန်းရည်ကလေးမှာလည်း ပြာလဲ့လျက် သောက်ချင်စဖွယ်ဖြစ်၏။

 

ထန်းရည်သမားများပြောသည်မှာ ထန်းရည်ကို ပိုပြင်းစေရန် ကျည်တောက်ထဲ၌ ထန်းရည်ချိုးခံထားရသည် ဆို၏။ ကျွန်ုပ် သေသေချာချာ မသိပါ။

 

ကျွန်ုပ် အသက် ၂၆ နှစ်ခန့်အရွယ်က ထန်းရည် အသားကုန် မူးဖူး၏။ မူးလိုက်သမှ ၃ ရက်လောက် အိပ်ရာထဲက မထနိုင်။ ထိုစဉ်က ကျောင်းပြီးသည့်နောက် အလုပ်မရသေး၍ ယောင် 59+1 ဘဝနှင့် ရွာပြန်နေလိုက်၊ လေးမျက်နှာမှာ နေလိုက်၊ ရန်ကုန်လာလိုက်နှင့် ဝေလေလေ လုပ်နေရချိန်ဖြစ်၏။ ရွာမှာနေတုံးက သူငယ်ချင်းများနှင့် နေ့တိုင်းလိုလို ထန်းရည် သောက်ဖြစ်၏။ ထိုစဉ်က နာမည်ကြီးသည့် အာမီရမ်လည်း ချ၏။ သို့သော် ကျွန်ုပ်အနေနှင့်ပြောရပါမူ အာမီရမ်ထက် ထန်းရည်ကို ပိုကြိုက်၏။

 

ခုတော့ အဟင့်၊ ရွှတ်စ်

ကိုဗစ်ကြောင့်ရော၊ ဟို AYoe လုပ်တာနှင့်ရော ဗမှားပြည် ပြန်မရောက်တာ ၅ နှစ်ကျော်ပြီ။ ထန်းရည်နှင့်ဝေးတာလည်း ၅ နှစ်ကျော်ပေါ့ခင်ဗျာ။

 

အခုတော့ အာသာပြေ ‘မြူ’ ကို သောက်ရ၏။ မဆိုးပါ။ ‘အမေမရှိတော့ အဘနှင့်ပျော်’ ရသပေါ့။ (ဟေ့လူတွေ အဘဆိုလို့ ဟို ABay ကိုပြောတယ်လည်း ထင်မနေနဲ့အုံး။ ကျုပ် အဖွားအေ့လင်ကိုပြောတာ။ ခညားတို့ကလည်း ဒုံးဝေ့ဘာ့စ်)

 

ခညားတို့သောက်ချင်သပဆို S$4.00 နော။ မှားမှာစိုးလို့။ ၂ ကျပ်လောက်နဲ့ရတဲ့ဆိုင်ရှိရင်လည်း လက်ကလေးဘာလေး တို့ကြပါအုံ့စ်၊ အဟိ

 

 

ကျေးဇူးတင်ပါသည်။

 

 

အေးငြိမ်း

၂၃ ဧပြီလ၊ ၂၀၂၅

ဆွမ်းဆန်ထဲမှ ကြွက်မချေးတစ်တုံး

ကောင်းသည့်အရာများထဲ၌ မကောင်းသည့်အရာများ ရောပါလာလျင် ကျွန်ုပ်တို့သည် “ဆွမ်းဆန်ထဲ ကြွက်ချေးရောသည်” ဟု ပြောစမှတ် ပြုကြ၏။ 

 

ယောယိမ်းလိုက်၊ ဘသားယိမ်းလိုက် အခြေအနေကြောင့်သာ ကြွက်ချေးဖြစ်လာခဲ့ရသော်လည်း ၎င်း၏ ကြွက်ချေးအဖြစ်ကို မနှစ်သက်သူတို့လည်း ရှိပါ၏။

 

ဤအထဲ၌ ကျွန်ုပ်တို့၏ မိတ်ဆွေကြီးတစ်ဦးသည်လည်း အပါအဝင် ဖြစ်၏။

 

ပြီးခဲ့သည့် ငလျင်က အဆောက်အအုံပြိုကျ၍ စကစအရာရှိတစ်ဦး သေဆုံးသည့် သတင်း ဖတ်လိုက်ရ၏။ 

၎င်းသည် ကျွန်ုပ်တို့၏ မိတ်ဆွေဖြစ်၏။ 

၎င်းသေဆုံးသည့်အတွက် ကျွန်ုပ် အမှန်တကယ့်ကို စိတ်မကောင်းပါ။

၎င်းသည် စကစအရာရှိ ဆိုသော်လည်း ဟိုမြေနိုးတွေလို လူဆိုးတစ်ဦးမဟုတ်ပါ။

နင်ရို့တိုင်းသူပြည်သားတွေ ဒုက္ခရောက်ကြရော့လဟဲ့ ဆိုကာ သေမင်းသည် ABay တွေကိုတော့ မသာဖော်မပေးဘဲ လူကောင်း သူကောင်းများကို ရွေးခေါ်ခြင်းအတွက်လည်း ကျွန်ုပ် မကျေချမ်းပါ။

ငလျင်ကြောင့် သေဆုံးကြရသူများတွင် အခြားတေချင်းဇိုးများ သေသည့်သတင်းကို မတွေ့။ သူတစ်ဦးတည်းကိုသာ တွေ့ရ၍လည်း ကျွန်ုပ်သည် သေမင်းကို အခါခါ ကျိန်ဆဲမိလေ၏။

 

ကျွန်ုပ်သည် ၎င်းနှင့် တစ်နှစ်နီးပါးလောက် ဆက်ဆံလိုက်ရသည် ထင်ပါ၏။ တစ်နှစ်အတွင်း (၇) ကြိမ်လောက် တွေ့ဆုံ၊ စကားစနေ ပြောလိုက်ရဖူးပါ၏။  

၎င်းသည် စစ်သားလူထွက်ပင် ဖြစ်သော်လည်း စိတ်သဘောထား သိမ်မွေ့ပါသည်။ ခွားမသေးတွေကို နေ့တိုင်း ငါနှင့်ကိုင်တုတ်နေသူ ကျွန်ုပ်ထက်ပင် ပိုလို့ ယဉ်ကျေးပါသေး၏။ 

သူပြောသည့် ‘နေ့ခံ၊ ညတစ်ဝက်ခံ’ ဆိုသည့်စကားလေးကို ကျွန်ုပ်ယခုထိ ကြားယောင်နေမိပါ၏။

 

၎င်းသည် မတတ်သာ၍ စကစ၏ အရာရှိတစ်ဦးဖြစ်နေရသော်လည်း သူ့လက်ရှိအခြေအနေကို ပျော်မွေ့ပုံ၊ စိတ်ကျေနပ်ပုံ မပေါ်ပါ။ တစ်နေ့ ကျွန်ုပ်တို့အဖွဲ့နှင့် စကားစနေပြောကြရင်း သူက . . . “ကျွန်တော်တို့ဘဝက နေ့ခံ . . . . “ ဟု စကား အစပျိုးရာ ကျွန်ုပ်က “ညစံ” ဟု စကားထောက်ပေးသည်ကို သူက ဆက်၍ . . . “ညလည်း မစံရပါဘူးဗျာ။ ညတစ်ဝက်ခံ။ အဲဒါကြောင့် ကျွန်တော်တို့ဘဝက နေ့ခံ၊​ ညတစ်ဝက်ခံဗျ” ဟု ဆို၏။ အဘယ်ကြောင့် နေ့ခံ၊ ညတစ်ဝက်ခံရကြောင်းကိုလည်း အသေအချာ ရှင်းပြပါ၏။

 

ကျွန်ုပ်ခန့်မှန်းရသလောက် သူ့မှာ သူများအရာရှိတွေလို ခိုးဝှက်ထားတာတွေလည်း သိပ် များများစားစား ရှိပုံ မပေါ်ပါ။ သို့သော် သူ့အကြောင်း ကျွန်ုပ် ဂဃနဏမသိ၍ တပ်အပ်သေချာတော့ မပြောလိုပါ။

ကျွန်ုပ်ထင်သည်မှာ သူ၏ ရိုးအမှုကြောင့် ချောင်ထိုးထားခြင်း ခံရတာလည်း ဖြစ်နိုင်ပါ၏။ 

 

၎င်းက သူ့ဌာနကို တိုးတက်အောင် မည်ကဲ့သို့ လုပ်ချင်ပုံများလည်း ပြောပြ၏။ သူတို့မှာ မတတ်သာ၍ ခရိုနီ၊ ခရိုပြာ၊ ခရိုမဝါ့တဝါများ၏ ဩဇာကို မတွန်းလှန်နိုင်သေးကြောင်းလည်း ပြောပါ၏။ ကျွန်ုပ်က စင်ကာပူမှ MOM မည်ကဲ့သို့ အာဏာရှိကြောင်း ပြောပြသည်ကို ၎င်းမှာ သွားရည်ယိုကာသာ နားထောင်နေရရှာပါ၏။ 

 

သူက သူ့အရာရှိ စစ်ဆေးရေးမှူးများကို စစ်ဆေးရေးမှူးတွေ လာပြီဟေ့ ဆိုပြီး လန့်ဖြတ်သွားရလောက်အောင် အလွန်စမတ်ကျလှသော ယူနီဖောင်းများ ဝတ်ဆင်ပေး၊ ခေတ်မီ စစ်ဆေးရေးကိရိယာအပြည့်အစုံ တပ်ဆင်သွားလျက် မိမိစစ်ဆေးလိုသည့် လုပ်ငန်း/စက်ရုံ/ဌာနများသို့ ဘယ်သူ့ကိုမှ ကြောက်မနေရဘဲ ရင်ကော့ကာ တကယ့်လက်ရှိ အဖြစ်အပျက် များကို အချက်အလက်အမှန်အကန်များဖြင့် စစ်ဆေးစေလို၏။ ဟိုလူ့ငဲ့ရ၊ ဒီလူ့မျက်နှာထောက်ရ၊ ဟိုလူ့ကြောက်ရဆိုလျှင် မည်သည့်နည်းနှင့်မှ အမှန်အကန် စစ်ဆေးရေးဆိုတာ ဖြစ်လာမည် မဟုတ်။ ဤသည်ကို သူ မကျေနပ်။

 

ကျွန်ုပ်အနေနှင့်မူ ကျွန်ုပ်တို့မိတ်ဆွေကြီးကို ဤတစ်ချက်တည်းနှင့်ပင် ပစ်ကျ သွားပါသည်။ 

ဤသည်မှာ သူက စကားအဖြစ်သာ ပြောတာမဟုတ်။ 

ကျွန်ုပ်တို့ကို ဘီယာသောက်ရင်း သူ့ဘဝအကြောင်း ရင်ဖွင့်နေတာ ဖြစ်၏။

 

နောက်ပြီး သူက နေ့ရှိသ၍ ရုံးသွားပြီး အလုံပိတ်ထားသော ရုံးခန်းအတွင်း၌ လာလာသမျှသော စာများကို ဟုတ်သည်ဖြစ်စေ၊ မဟုတ်သည်ဖြစ်စေ၊ ထိုင် လက်မှတ်ထိုးနေရသည့် ဘဝကိုလည်း စက်ဆုပ်ဟန် တူပါ၏။ ထို့ကြောင့်သာ ‘နေ့ခံ’ ဟူသည့် စကားလုံးကို သုံးတာ ဖြစ်ပါသည်။

 

အခုတော့ ကျွန်ုပ်တို့မိတ်ဆွေကြီးသည် ‘နေ့ခံ၊ ညတစ်ဝက်ခံ’ ဘဝမှ လွတ်သွားပါပြီ။

 

ကျွန်ုပ်တို့မိတ်ဆွေကြီးသည် ၎င်းမနှစ်သက်သော အလုပ်များကို မတတ်သာ၍ အောင့်အည်းသည်းခံ လုပ်နေရသည့်ဘဝမျိုးကို နောင် ဘယ်တော့များမှ မရောက်ရပါစေနှင့်ဟု ဆုတောင်းပါသည်။

 

ထို့ပြင်လည်း -

ဘယ်သောအခါမှ မသူတော်များအသိုင်းအဝန်းသို့ မျက်စိလည်လမ်းမှားကာ မရောက်ပါစေနှင့်ဟုလည်း ဆုတောင်းလိုက်ပါ သတည်း။

 

ဝမ်းနည်းစွာဖြင့်

 

အေးငြိမ်း

၂၁/၀၄/၂၀၂၅

ဇာတာ

ဗေဒင်ဆရာတစ်ယောက်၏ ဇာတာအကြောင်း

 

နှစ်သစ်အကြောင်း ရေးရင်း ဇာတာအကြောင်းရေးထားသည့် ဖေ့စ်ဘွတ်တစ်ခုကို အမှတ်မထင် တွေ့မိတော့ အတော်လေးတောင် လန့်သွားမိပါ၏။ ရေးသူကား ဗေဒင်ဆရာတစ်ဦး ဖြစ်၏။ သူက မိုးကြိုးပစ် ထန်းလက်နှင့်ကာ ဆိုသည်ကို မြတ်စွာဘုရားပါ ဆွဲထည့်လျက် ဘုရားကပဲ ဇာတာကို စခဲ့သလိုလို ရေးထား၏။ ဤကဲ့သို့ မဟုတ်က မဟတ်ကများကို ကျွန်ုပ်မနှစ်သက်ပါ။ 

 

နောက်ပြီးတော့ သူက ဇာတာတစ်စောင် တွက်ရတာ ဘယ်လောက်ခဲယဉ်းကြောင်း ပြလိုသဖြင့် ဘာတွေတွက်ရတယ် ဆိုတာ စာရင်းချပြထား၏။ စုစုပေါင်း ၅၁ ခုတောင်ရှိ၏။ အောင်မငီး

 

ဟောဒီမှာသူ့စာရင်း -

 

၁။ အာယနာ / ၂။ သာယနာ / ၃။ ရဝိဖုဋ / ၄။ ဒိနန္ဓ / ၅။ နိသဒ္ဓ / ၆။ နေ့ဗဟို / ၇။ ညဗဟို / ၈။ တက္ကလ / ၉။  ကျော်နာရီ / ၁၀။ လဂ်စီးနက္ခတ် / ၁၁ ။ ဟောရတ် / ၁၂။ တြွင်း / ၁၃။ နဝင်း / ၁၄။ မွန်းတည့်နက္ခတ် / ၁၅။ တိထီ / ၁၆။ မြင်နက္ခတ် / ၁၇။ စင်နက္ခတ် / ၁၈။ ပြည်စန်း / ၁၉။ တိုင်ဦး / ၂၀။ ဓာတ်တိုင် / ၂၁။ စုတ်တိုင် / ၂၂။ ဆီတိုင် / ၂၃။ မိတ္တုတိုင် / ၂၄။ အထွန်း / ၂၅။ ၁နွေဘုတ္တိ / ၂၆။ ၂လာၤဘုတ္တိ / ၂၇။ ၃င်္ဂါဘုတ္တိ ၂၈။ ၄ဟူးဘုတ္တိ / ၂၉။ ၅တေးဘုတ္တိ / ၃၀။ ၆ကြာဘုတ္တိ / ၃၁။ စနေ ဘုတ္တိ / ၃၂။ ရာဟုဘုတ္တိ / ၃၃။ ကိတ် ဘုတ္တိ / ၃၄။ လဂ် ဘုတ္တိ / ၃၅ ။ ပုည / ၃၆။ ဣသရ / ၃၇။ ပဝတ္တိ / ၃၈။ ထီးဖြူ  / ၃၉။ သိရီ / ၄၀။ ဆင်ဖြူ  / ၄၁။ သုဝဏ္ဏ / ၄၂။ ရတနာပုံ / ၄၃။ ရဇိတ / ၄၄။ အဓိပတိ / ၄၅။ ကလိယုဂ် / 

၄၆။ ဘဝါး / ၄၇။ အံသာစက် / ၄၈။ ဘာဝစက် / ၄၉။ နှစ်ကြွင်း / ၅၀။ သုံဒ္ဓဒိန် / ၅၁။ ပဋိသန္ဓေတိုင် 

 

ကျွန်ုပ်အဖို့မူ ထို ၅၁ ခုစလုံးကို သိပါ၏၊ နားလည်ပါ၏။ ၎င်းတို့အဘယ်ဖြစ်သည် သိလိုသူများ ကျွန်ုပ်၏ blog တွင် ရှာဖတ်နိုင်ပါ၏။ မြန်မာနာရီနှင့်ပတ်သက်သည်များကို ကျွန်ုပ်၏ မြန်မာပြက္ခဒိန်စာအုပ်တွင် အသေးစိတ် ရှင်းလင်း ဖော်ပြထား၏။ 

 

၎င်း၏စာရင်းကို မှားသည်ဟု ကျွန်ုပ်မဆိုလိုပါ။ သို့သော် ၎င်းချပြထားသည့် စာရင်းအနက် အချို့မှာ မြန်မာရှင်ဘုရင်များ လက်ထက်၌ သာ မှန်၏။ ယခုခေတ်အတွက် ဘာမှ အဓိပ္ပာယ်မရှိတော့ပါ။ သုံးလို့လည်းမရ။ လူတစ်သောင်းမှာ တစ်ယောက်တောင် နားလည်ဘို့မလွယ်သည့် အရာများ ဖြစ်၏။ ကျွန်ုပ် နမူနာ ပြပါမည်။

 

ရှေးခေတ်က ယခုခေတ်ကဲ့သို့ စက်နာရီများ မပေါ်သေး။ မြန်မာနာရီများကိုသာ သုံးရ၏။ ထို့ကြောင့် မြန်မာနာရီ အသုံးအနှုန်းများဖြစ်သည့် ဒိနန္ဓ၊ နိသဒ္ဓ၊ နေ့ဗဟို၊ ညဉ့်ဗဟို၊ တက္ကာလ၊ ကျော်နာရီ၊ ဘဝါး စသည်တို့ဖြင့် ဖော်ပြရ၏။ ဤသည်ကို အသင်တို့နားလည်ပါသလော။ ကြားဖူးပါသလော။ ၁၉၀၀ ပြည့်နှစ် အကျော်ကာလများကတည်းက မြန်မာ နာရီကို မည်သူမှ မသုံးတော့ပါ။ ရှေးယခင်ဇာတာများ၌ ဤအရာများ ထည့်ခြင်းမှာ အချိန်ကို အတိအကျ ဖော်ပြလိုသဖြင့် ဖြစ်၏။ ခေတ်ပေါ် စက်နာရီများတွင် မနက် ၉ နာရီ ၂၃ မိနစ် ၁၂ စက္ကန့် ဟု ရေးလိုက်ရုံဖြင့် ကိစ္စပြီး၏။

 

သိလိုသူများ ကျွန်ုပ် blog တွင် ဖတ်နိုင်ပါ၏။

https://shwenyein.blogspot.com/2012/07/blog-post_1466.html

 

သို့ဖြစ်လျှင် ထိုဗေဒင်ဆရာသည် အဘယ်ကြောင့် ဤသည်တို့ကို ရေးရပါသနည်း။ သူက ဇာတာလုပ်ရောင်းစားနေတာ ဖြစ်လေတော့ လူရှိန်အောင်ရေးတာ ဖြစ်ပါလိမ့်မည်။  

 

နောက်တစ်ခုက ထန်းဖူးဇာတာ၊ ပေဖူးဇာတာ၊ ကြေးဇာတာတို့ဆိုတာ ဟို့အရင်ခေတ်ကသာ လိုသည်။ ယခု ၂၁ ရာစုမှာ လိုအပ်ပါသလော။ ရိုးရာယဉ်ကျေးမှုတစ်ရပ်အနေနှင့် ထိန်းသိမ်းထားလိုသဖြင့်ဆိုလျှင် ကောင်းမြတ်သော ရည်ရွယ်ချက် ဖြစ်ပါသည်။

 

ရှေးယခင်ကာလများဆီက ကြာရှည်ခံရန် ရေးသားစရာများ မရှိသေးသောကြောင့် ကြာရှည်ခံသည့် ထန်းရွက်၊ ပေရွက်၊ ကြေး စသည်တို့ပေါ်၌ ဇာတာကို ရေးကြရခြင်းဖြစ်၏။ ယခုခေတ်တွင်မူ စာရွက်ပေါ်မှာ ရေးထားစရာတောင် မလိုပါ။ ကွန်ပြူတာနှင့်တွက်လျက် ဖုန်းထဲ၌သော်လည်းကောင်း၊ အင်တာနက် (ဥပမာ - Google drive) ၌ သော်လည်းကောင်း သိမ်းထားနိုင်ပါသည်။ အင်တာနက်မရှိပါဆိုလျှင် စာရွက်နှင့် ပရင့်ထုတ်ပြီး ပလပ်စတစ်လောင်းထားလို့ရ၏။ 

 

ဇာတာဟူသည် မိမိ၏ မွေးသည့် ရက်/လ/နှစ်တို့ကို မှတ်သားထားသည့် အမှတ်အသားတစ်ခုသာ ဖြစ်၏။ သည့်ထက် မပို။ သည်ခေတ်တွင် မိမိ၏ မွေးသက္ကရာဇ်မှာ မွေးစာရင်းဖြစ်၏။ မွေးစာရင်းထက် ပိုပြီး သေချာတာမရှိနိုင်။ ဇာတာ ဖွဲ့လိုပါက ဖွဲ့နိုင်ပါသည်။ သို့သော် ဇာတာမှာ ဗေဒင်တွက်ဖို့အတွက်သာ အသုံးဝင်၏။

 

မြန်မာဝီကီပီးဒီးယားပါ ဇာတာ

 

နောက်တစ်ခုက မြန်မာဝီကီပီးဒီးယားတွင် ဇာတာဆိုတာ ဘာ ဆိုပြီး ရေးထားတာ တွေ့လိုက်ရပြန်တော့ သောက်ကျိုးနဲ့စ် ကျွန်ုပ်မှာ အတော့်ကို ရင်တုန်ပန်းတုန် (ပန်းက ဘာကိစ္စတုန်ရသတုံး၊ မမေးကြပါနှင့်။ ကျွန်ုပ်လည်းမသိပါ။ ဤကား စကားချပ်) ဖြစ်သွားမိလေသော ဟူသတတ်။ 

 

https://my.wikipedia.org/wiki/%E1%80%87%E1%80%AC%E1%80%90%E1%80%AC

 

မြန်မာဝီကီ၌ ဇာတာကို အောက်ပါအတိုင်း ဖော်ပြထား၏။

 

“မြန်မာ ဗေဒင်ပညာရပ်တွင် ဇာတာသည် အရေးပါလှပေသည်။ ဇာတာသည် လူတစ်ယောက် မွေးသော အချိန် ( နာရီ မိနစ် )၊ နေရာပေါ်မူတည်ပြီး ရှေ့ဖြစ်မည့် ကံတရား အကြောင်းကို တွက်ချက်ခြင်းဖြစ်သည်။ လူတစ်ယောက်သည် ဇာတာဖွဲ့ထားပြီး ထိုဇာတာပေါ်မူတည်၍ မိမိ၏ ကံအခြေအနေကို သိရှိနိုင်သည်။ ဇာတာဟူသည် ဂြိုဟ်သွား ဂြိုဟ်လာ ပြက္ခဒိန်ကိုကြည့်ကာ ဗေဒင်ဟောခြင်း ပညာရပ်လည်း ဖြစ်သည်။”

 

သောက်ကယိုးနဲ့စ် . . . 

ဤသည်မှာမမှန်ပါ။ မမှန်ဆိုသည်မှာ မှားတာကိုခေါ်၏။

 

ဝီကီက “ဇာတာသည် လူတစ်ယောက် မွေးသောအချိန် ( နာရီ၊ မိနစ် )၊ နေရာပေါ်မူတည်ပြီး ရှေ့ဖြစ်မည့် ကံတရားအကြောင်းကို တွက်ချက်ခြင်းဖြစ်သည်။” ဆို၏။

 

မှားပါသည်။ ဇာတာသည် လူတစ်ယောက်မွေးသည့်အချိန်ကို အသေးစိတ်ဖော်ပြပြီး ထိုအချိန်ရှိ ကောင်းကင်ဂြိုဟ်နေ များကို ဖော်ပြထားသည့် စာတစ်စောင်ဖြစ်၏။ ရှေ့ဖြစ်မည့်ကံတရားကို တွက်တာမတွက်တာသည် ထိုသူ့အပေါ် မူတည် ပါသည်။ တွက်ချင်လည်း တွက်မည်။ တွက်ချင်မှလည်း တွက်မည်။ ဇာတာဖွဲ့သည်ဆိုတိုင်း ဗေဒင်တွက်တာ မဟုတ်။ 

 

နောက်ပြီး “ဇာတာဟူသည် ဂြိုဟ်သွားဂြိုဟ်လာ ပြက္ခဒိန်ကိုကြည့်ကာ ဗေဒင်ဟောခြင်း ပညာရပ်လည်း ဖြစ်သည်။” ဟု ဆိုသေး၏။ မှားပါသည်။ ဇာတာနှင့် ဗေဒင်မှာ ဆက်စပ်မှုတစ်ခုမျှသာဖြစ်၍ ဇာတာဖွဲ့တာသည် ဗေဒင်ဟောတာ မဟုတ်ပါ။ ငါ သိန်းတစ်သောင်းထီ ပေါက်မှပေါက်ပါ့မလား ဟု သိလိုသူများသာ မိမိဇာတာလေးကို ပိုက်လျက် ဗေဒင် ဆရာများထံ သွားကြတာ ဖြစ်၏။ ဇာတာရှိသူတိုင်း ဗေဒင်မေးချင်မှ မေးပါမည်။ ‘ဇာတာဆိုသည်မှာ ဗေဒင်ဟောခြင်း ပညာရပ်ဖြစ်သည်’ ဆိုသည်ကား အတော့်ကို လွဲသော၊​ မမှန်သော၊ မှားသောစာသား ဖြစ်သတည်း။

 

ဤသည်ကို ကြည့်ခြင်းဖြင့် ထိုဝီကီကို ရေးသူသည် ဇာတာအကြောင်း ဘာမှ မသိဘဲ ကြားဖူးနားဝနှင့် ရမ်းတုတ်ထားခြင်း ဖြစ်ကြောင်း သိသာနိုင်ပါသည်။

 

ပိုဆိုးသည်မှာ ထိုစာကို အဘယ်က ရယူထားသည်ဆိုသည့် Reference ကို ဖော်ပြမထားခြင်းဖြစ်၏။ ဖော်ပြမထား ဆိုကတည်းက ခိုင်မာသည့် စာအုပ်စာတမ်းတစ်ခုခုက ရယူထားခြင်းမဟုတ်ဘဲ ၎င်း စိတ်ထဲထင်ရာ လျှောက်ရေးထား ကြောင်း ခန့်မှန်းနိုင်၏။။

 

ဝီကီပီးဒီးယားကို အချက်အလက်လိုချင်သူတို့ ယူသုံးကြပါလိမ့်မည်။ ကျွန်ုပ်သည်ပင်လျှင် စာများရေးသည့်အခါ အင်္ဂလိပ် ဝီကီပီးဒီးယားကို မီငြမ်းရေးတာ အတော်များပါသည်။ အဘယ်ကြောင့်ဆိုသော် ဝီကီက အကြောင်းအရာ တစ်ခုနှင့် ပတ်သက်၍ ထိုအကြောင်းအရာတို့ကို သက်ဆိုင်ရာ စာအုပ်စာတမ်း, Website တို့ကို ရည်ညွှန်းလျက် စုံစုံလင်လင် စုစည်းပေးထားသည့်အတွက် တစ်ထိုင်တည်းနှင့် လိုတာ အကုန်ရနိုင်သောကြောင့် ဖြစ်၏။ ထို့ကြောင့် ဝီကီ သည် မည်သည့်အကြောင်းနှင့်မှ မမှားသင့်ဟု ယူဆပါသည်။ 

 

မြန်မာဝီကီကို ပြုစုကြကုန်သော ဆရာများအား ကျေးဇူးလည်းတင်ပါသည်။ တတ်နိုင်သမျှ မမှားရန်လည်း သတိပြုကြ ပါရန် ကျွန်ုပ်က မေတ္တာဖြင့် တိုက်တွန်းလိုပါ၏။ အင်္ဂလိပ်ဝီကီတွင် အောက်ခြေ၌ ၎င်းတို့ရယူထားသည့် ရည်ညွှန်း ကိုးကား စာအုပ်စာတမ်း၊ Website, news များအားလုံးကို ပြည့်ပြည့်စုံစုံ ဖော်ပြထား၏။ မြန်မာဝီကီတွင် မည်သည့် နေရာက ရယူထားသည်ကို ဖော်ပြမထား။ ထို အကြောင်းအရာတို့၏ မူရင်း source ကိုပါ ဖော်ပြပေးပါရန် ကျွန်ုပ်က အထူး မေတ္တာရပ်ခံပါ၏။ အင်္ဂလိပ်ဝီကီကို အတုယူကြပါကုန်။ စိတ်ထဲထင်ရာတွေ လျှောက်မရေးကြပါနှင့်။

 

ဆိုတော့ အသုံးတည့်သည်ဖြစ်စေ၊ မတည့်သည်ဖြစ်စေ။ မိတ်ဆွေတို့ ဂျင်းထည့်မခံရစေရန် ကျွန်ုပ်က ‘ဇာတာ’ အကြောင်း ရေးလိုက်ရပြန်ပါချေသည် တမုံ့စ်။

ဇာတာ

 

အကြမ်းဖျဉ်းပြောရလျှင် ဇာတာဟူသည် လူတစ်ဦးမွေးဖွားသည့် နာရီ၊ မိနစ်၊ စက္ကန့်၊ နေ့၊ ရက်၊ လ၊ နှစ် အချိန်နှင့် ထိုအချိန်၌ တည်ရှိသော ကောင်းကင်ဂြိုဟ်နေများကို ဖော်ပြထားသည့် စာတမ်းတစ်စောင် ဖြစ်၏။

 

ဇာတာကို လူများမွေးဖွားခြင်းအတွက် အဓိကထား သုံးသည့်တိုင် အခြားကိစ္စများအတွက်လည်း သုံးသေး၏။

 

ယေဘူယျအားဖြင့် ပြောရလျှင် ဇာတာဆိုသည်မှာ အချိန်တစ်ခု၌ အဖြစ်အပျက်တစ်ခု ဖြစ်ပျက်သည်ကို မှတ်တမ်းတင်ထားသည့် မှတ်တမ်းတစ်စောင် ဖြစ်၏။ 

 

ထိုအဖြစ်အပျက်သည် လူတစ်ယောက်မွေးဖွားလာခြင်း ဖြစ်ချင်ဖြစ်မည်။ အဆောက်အဦတစ်ခု ဆောက်တာ ဖြစ်ချင်ဖြစ်မည်။ ဘုရားတည်တာ ဖြစ်ချင်ဖြစ်မည်။ ဘုရင်တစ်ပါး နန်းတက်တာ ဖြစ်ချင်ဖြစ်မည်။ မြို့တည်တာ ဖြစ်ချင်ဖြစ်မည်။ 

 

မြန်မာနိုင်ငံ လွတ်လပ်ရေးရချိန်ကို ဇာတာဖွဲ့ကာ မြန်မာနိုင်ငံ၏ ရှေ့ရေးကို တွက်ဆနိုင်၏။ ဆရာကြီးများ တွက်ဆကြပါကုန်။

 

ရက်ချုပ်ဟူသည် မွေးစာရင်းမျှသာ ဖြစ်၏။ ဇာတာဟူသည်ကား ထိုမွေးစာရင်းအပြင် ထိုအချိန်၌ရှိသော ကောင်းကင် ဂြိုဟ်နေများကိုပါ ပြထား၏။

 

ကောင်းကင်ဂြိုဟ်နေများကို ပြဆိုရာ၌ စက်တစ်လုံးတည်းဖြစ်ပါက ဧကစက္ကဇာတာ၊ စက်နှစ်လုံးဖြစ်မူ ဒွိစက္ကဇာတာ၊ စက်သုံးဖြစ်မူ တြိစက္ကဇာတာဟု ခေါ်၏။ 

 

စက်တစ်လုံး ဧကစက္ကဇာတာ ၌ ရာသီစက် တစ်ခုသာပါ၏။ 

စက်နှစ်လုံး ဒွိစက္ကဇာတာတွင် ရာသီစက်နှင့် နဝင်းစက်၊ သို့မဟုတ် ရာသီစက်နှင့် ဘာဝစက် တို့ပါ၏။

စက်သုံးလုံးဖြစ်သော တြိစက္ကဇာတာ၌ ရာသီစက်၊ နဝင်းစက်နှင့် ဘာဝစက် တို့ပါ၏။

 

ထိုစက်သုံးစက်သာမက စက် ၈ လုံးပါသည့် အဋ္ဌဝဂ္ဂဇာတာလည်း ဖွဲ့ကြသေး၏။ အဋ္ဌဝဂ္ဂဇာတာမှာ ပိုအသေးစိတ်၏။ အဋ္ဌဝဂ္ဂဇာတာကို ကျွန်ုပ်ကောင်းစွာတွက်တတ်ပါသည်။ သင်ပေးလျှင် ဘာမှ မခဲယဉ်းပါ။

 

ဤ စက်သုံးလုံးအပြင် အဓိပတိတိုင်နှင့် တိုင်ဆယ်ပါးကိုလည်း ထည့်လိုက ထည့်နိုင်၏။ ထိုတိုင်ဆယ်ပါးမှာလည်း ဗေဒင်ဟောရန် အတွက်သာဖြစ်ပြီး မပါမနေရမဟုတ်။ အထက်၌ ဟိုဗေဒင်ဆရာလေး ဖော်ပြခဲ့သည့် ၃၈။ ထီးဖြူ  / ၃၉။ သိရီ / ၄၀။ ဆင်ဖြူ  / ၄၁။ သုဝဏ္ဏ / ၄၂။ ရတနာပုံ စသည်တို့မှာ ထိုတိုင်ဆယ်ပါးပင်ဖြစ်၏။ 

 

ရှေးကလူတို့သည် ဇာတာကို အမြတ်တနိုး တန်ဘိုးထားလျက် အသေအချာ့ကို လုပ်ခဲ့ကြတာဖြစ်၏။

 

ယခင်က ဇာတာကို ထန်းဖူးပေါ်တွင် ရေးသားကြ၏။ ထန်းဖူးဆိုသည့်တိုင် ထန်းရွက်ပေါ် သည်အတိုင်း ပြီးပြီးရော ရေးလိုက်တာမဟုတ်ဘဲ ထန်းရွက်ကို ကြာရှည်ခံအောင်ပြုပြင်ပြီးမှ ထပ်ကာချုပ်လျက် ရေနံဆီစသည်ဖြင့် သုတ်လိမ်းပြီး ပိုးမထိုးအောင် သေချာကျနစွာ ပြုပြင်ထားခြင်းဖြစ်၏။

 

ရေးသားသည့်အခါတွင်လည်း လက်ရေးလက်သားကောင်းကောင်းဖြင့် ကနုတ်၊ ဒေါင်းရုပ် စသည်တို့ပါ ခြံရံလျက် လှလှပပ ရေးကြ၏။ မြတ်စွာဘုရားပုံတော်များလည်း ထည့်ကြ၏။ အဓိပတိတိုင်တောင် ရိုးရိုးမရေးဘဲ ပြဿဒ်ပုံသဏ္ဍာန် ရေးဆွဲ ထည့်သွင်းကြ၏။ စဓဗဝ ကိုလည်း ထည့်သွင်းရေးဆွဲ၏။ မြတ်စွာဘုရား၏ ဖြစ်စဉ်တော်များလည်း ပါ၏။ အင်းကွက်များလည်း ပါ၏။

 

အဘယ်ကြောင့် ထိုသို့ ရေးကြသနည်းဆိုသော် လူတစ်ယောက် လူ့ပြည်လောကထဲဝင်ရောက်လာခြင်းသည် အလွန် ကောင်းမြတ်သော မင်္ဂလာ ဖြစ်၏။ မွေးဖွားချိန်၌ တွက်ချက်ရေးထုတ်လိုက်သော ဇာတာဟူသည် ထိုလူသားကို ကိုယ်စားပြု၏။ ထိုလူသည် လောကအကျိုး သံသရာအကျိုးများကို ဆောင်ကြဉ်းနိုင်ပါစေသတည်း။ စည်းစိမ်ဥစ္စာများနှင့် ပြည့်စုံပါစေသတည်း။ ရတနာသုံးပါးနှင့် နတ်ကောင်းနတ်မြတ်တို့ စောင့်ရှောက်ကြပါစေကုန်သတည်း . . . . စသော ရည်ရွယ်ချက်များနှင့် ရေးဆွဲတာ ဖြစ်၏။ 

 

ရိုးရာယဉ်ကျေးမှုတစ်ရပ်အနေနှင့် ထိန်းသိမ်းထားလိုသူများ ထန်းဖူးဇာတာ လုပ်ထားနိုင်ပါ၏။ ကျွန်ုပ် ရန်ကုန်တွင်ရှိစဉ်က ထန်းဖူးဇာတာများ ဝယ်ခဲ့ဖူးသေးသည် ထင်၏။ မိတ်ဆွေများကို ဇာတာလက်ဆောင် ဖွဲ့ပေးရန် ဖြစ်၏။ (သားက သူ့ဘို့လည်း ဇာတာဖွဲ့ပြီး ဟောစာတမ်းရေးပေးပါ ပူဆာနေ၏။ ဘာတွေ အလုပ်ရှုပ်မှန်းမသိတာနှင့် ခုထိ မလုပ်ဖြစ်။)

 

သင်္ချာပညာရပ် မထွန်းကားသေးသော ယခင်အခါ ကာလများကမူ ဇာတာဖွဲ့ရန် အတော်လေး ခဲယဉ်းပါလိမ့်မည်။ အနို့ ကိုးနဝင်းကို မိုးအလင်းတွက်ရသည် ဆို မဟုတ်လော။

 

ယခုခေတ်တွင်မူ မိမိမွေးသည့် ခုနှစ်၊ လ၊ ရက်၊ နာရီ၊ မိနစ်၊ နေရာတို့ကို ထည့်လိုက်သည်နှင့် ဇာတာထွက်လာသော ပရိုဂရမ်များလည်း ရှိနေပြီဖြစ်ရာ ဇာတာတစ်စောင် ဖွဲ့ဘို့ရာ သည်လောက် မခဲယဉ်းတော့ပါ။

 

သို့သော် ဟဲဟဲ၊ တခါတလေ ခက်ခက်ခဲခဲ လုပ်ယူရတာ ပိုပြီး တန်ဘိုးရှိပါသည်။ ခက်ခက်ခဲခဲရသည့်ပိုက်ဆံမှ ပိုပြီး တန်ဘိုးရှိသည် မဟုတ်လော။ ကျွန်ုပ်သည်လည်း ယခုထိ ဇာတာကို စာရွက်ပေါ်ချကာ လက်နှင့်တွက်ဆဲပင် ဖြစ်၏။ ကျွန်ုပ်ထံတွင် Swiss Ephemeries များကို နှစ်ပေါင်းထောင်နှင့်ချီ down ထားတာရှိ၏။ NASA ထုတ် အနှစ် ၅၀ စာ ဂြိုဟ်သွားစာအုပ်ကြီးလည်းရှိ၏။ ထို့ပြင် မြန်မာပညာရှင်တို့ တွက်ချက်ထားသည့် သံဒိဋ္ဌပြက္ခဒိန် ၁၀ နှစ်တွဲများလည်း နှစ် ၁၀၀ စာလောက်ရှိ၏။ ကျွန်ုပ်သည် ဇာတာဖွဲ့တာ တွက်တာတို့ကို ဝါသနာပါ၏။ သို့သော် အဟောကို သိပ်အားမသန်ပါ။

 

ကျွန်ုပ် ဇာတာအဖွဲ့သင်တာ ဆရာနှင့် သင်တာမဟုတ်။ ဆရာမောက်၏ သံဒိဋ္ဌဇာတာဖွဲ့နည်းကျမ်း စာအုပ်ကို ဖတ်လျက် နေ့မနား၊ ညမအား အသည်းအသန် လေ့လာတွက်ချက်ခဲ့တာဖြစ်၏။ ထို့ကြောင့် ကျွန်ုပ်ဆရာမှာ ဆရာမောက်ကြီး ဖြစ်သတည်း။

 

 

 ဇာတာညံ့လို့၊ ဇာတာဆေးရမယ် ဆိုသည့်စကားများကို အသင်တို့ ကြားဖူးပါလိမ့်မည်။

ဘာမှ ဇာတာကညံ့တာ မဟုတ်ပါ။ ဘာဇာတာကိုမှ ဆေးစရာမလိုပါ။

ဇာတာဟူသည် မိမိမွေးဖွားစဉ်က ကောင်းကင်ဂြိုဟ်နေများဖြစ်၍ ဘာမှပြောင်းစရာအကြောင်းမရှိ။ 

ကောင်းတယ်ဆိုးတယ်ဆိုသည် လက်ရှိအနေအထား၊ ဗေဒင်လိုပြောရလျှင် လက်ရှိဂြိုဟ်များ၏ အစီးအနင်းပင် ဖြစ်၏။

 

ကျွန်ုပ် ဇာတာများအကြောင်း စတင်လေ့လာဖြစ်သည်မှာ စာပေဗိမာန် စာမူဆုရ တင်မမခိုင်(မန်းတက္ကသိုလ်) ၏ မြန်မာ့ဇာတာ စာအုပ်ကြောင့် ဖြစ်ပါသည်။ ဆရာမကြီးကို ကျေးဇူးအထူးတင်ပါ၏။ ဆရာမကြီး၏ ‘ဇာတာပုံစံများ’ စာအုပ်သည် ဇာတာများအကြောင်း ကောင်းစွာသုတေသနပြု ရေးသားထားတာ ဖြစ်၍ မြန်မာ့ယဉ်ကျေးမှုအတွက် များစွာ ကျေးဇူးပြုပါသည်။ လိုအပ်နေသော ကွက်လပ်တစ်ခုကို ဖြည့်ပေးသည်လည်း မည်၏။ သည့်အတွက်လည်း ဆရာမကြီးကို ကျေးဇူးတင်ရပါ၏။

 

 

 ဤသည်မှာ ဖေ့စ်ဘုတ် ပို့စ်တစ်ခုကို ယောင်မှား ဖတ်မိရာမှ ရေးစရာရလာသော အကြောင်းအရာတစ်ခု ဖြစ်ရပြန်ပါကြောင်း . . . 

 

 

အေးငြိမ်း

၁၉ ဧပြီလ၊ ၂၀၂၅

၁၃၈၇ ခုနှစ် နှစ်ဆန်းပိုင်း အတွေး

သည်ကနေ့သည် ၁၃၈၆ ခုနှစ်၏ နောက်ဆုံးရက် ဖြစ်၏။

မနက်ဖြန်သည် ၁၃၈၇ ခုနှစ်၏ ပထမဆုံးရက် ဖြစ်၏။

 

သားသမီးတစ်ဦးဦး မွေးဖွားလာသည့်အခါ ရှေးအခါက လူကြီးများသည် ဗေဒင်ဆရာများထံ၌ ဇာတာ၊ ရက်ချုပ် လုပ်ကြ၏။ ဘယ်နေ့၊ ဘယ်ရက်၊​ ဘယ်ခုနှစ်၊ ဘယ်နှစ်နာရီ၊ ဘယ်နှစ်ဘဝါး၌ မွေးသည်။ အမည်သညာ ခေါ်စရာကား ချစ်လွန်း။ (ဟုတ်ပေါင် ဝတ္ထုနာမည်နဲ့မှားကုန်ပြီ။)

 

ထိုဇာတာသည် မိမိ၏မွေးနေ့၊ မွေးရက်ကို အတိအကျဖော်ပြပေးသည့် မှတ်တမ်းဖြစ်၏။

(ဝီကီပီးဒီးယား၌ ဇာတာအကြောင်း သောက်တလွဲရေးထားသည်ကို ‘ဇာတာ’ ခေါင်းစဉ်ဖြင့် သီးသန့် ရေးပြပါမည်။)

 

အခြားသူများနှင့်မတူ တမူထူးခြားသည့် ကျွန်ုပ်မူကား ဤမည်သော မောင်အေးငြိမ်းကို ဘယ်နှစ်ခုနှစ်၊ ဘယ်လ၊ ဘယ်ရက်၌ မွေးစေ ဟု ကျောင်းကဆရာက သတ်မှတ်ပေးလိုက်၏။ (သတ်မှတ်ပေးလိုက်သည် ထင်ပါ၏။ အမှန်ဆို ကျွန်ုပ်၏ လက်ရှိမွေးနေ့သက္ကရာဇ်ကို ဘယ်သူက ရွေးပေးလိုက်မှန်းတောင် တိတိကျကျမသိ။ ထူးဆန်းပါပေ့ ဆတွတ်ရယ်) ထို့ကြောင့် ကျွန်ုပ်ကို ဟက်ပီးဘတ်ဒေး မလုပ်ကြပါနှင့်။ ကျွန်ုပ်သည် ဘယ်နေ့မွေးမှန်း ကိုယ်တိုင်တောင်မှ သိတာမဟုတ်။ အဟင့် ရွှတ်စ်ခ်

 

ကျွန်ုပ်၏ တရားဝင် မွေးခုနှစ်မှာ ၁၃၂၄ ခုနှစ်ဆို၏။ ဆိုတော့ ၁၃၈၇ - ၁၃၂၄ = ၆၃။ ဟဲ့ သောက်ခွေး။ သင်္ချိုင်းကုန်းနဲ့ အတော်တောင် နီးနေပါပကောလား။ နည်းနည်းပါးပါး လိမ်လိမ်မာမာလေး နေဦးမှ။ ဘုရားလေးဘာလေး ရှိခိုးအုံးမှ။ ကွကိုယ်တော့ ၃၆ လောက် ထင်နေတာ။ အသက်ကလည်း တစ်နှစ်ပြီးတစ်နှစ် မညှာမတာ ကြီးလိုက်လာတာ။ ယခွမ်းဒဲ့မှ။

 

ကျွန်ုပ်သည် ကမ္ဘာမြေပေါ်တွင် မွေးဖွားလာရခြင်းကို သိပ်တော့ နှစ်သက်လှသူ မဟုတ်။ 

အခု ကမ္ဘာ့လူသားဖြစ်နေရသဖြင့် ကျွန်ုပ်အသက် ၆၀ ကျော်ဖြစ်သွားပြီ။

အကယ်၍သာ ကျွန်ုပ်သည် အင်္ဂါဂြိုဟ်သားဖြစ်အံ့။ ကျွန်ုပ်အသက်မှာ အခုမှ ၃၃ နှစ်သာ ရှိဦးမည်။

အကယ်၍သာ ကျွန်ုပ်ကို စနေဂြိုဟ်ပေါ်မှာ မွေးခဲ့လျင် ကျွန်ုပ်အသက်မှာ အခုမှ ၂ နှစ်မျှသာ ရှိသေးသည်။ နောင်နှစ်အများကြီး နေရဦးမည်။ အခုများတော့ . . . ကတောက်စ်

 

ဟုတ်သည်ဖြစ်စေ မဟုတ်သည်ဖြစ်စေ။ ထရမ့်ပဲတက်လာလာ၊ သောက်တလွဲအမိန့်တွေပဲ အမျိုးမျိုးထုတ်ထုတ်။ 

ရေတွေပဲ လျှံလျှံ၊​ ငလျင်တွေလှုပ်လို့ ဘယ်သူတွေပဲ ဒွတ်ခရောက်ရောက်။

မြန်မာပြည် ငလျင်ဘေးအတွက် ဆိုပြီး အိန္ဒိယက လေယာဉ်အစင်းလိုက် ဟို အေရိုးတွေကို လက်ဆောင်ပဲ သွားပေးပေး။

တကယ့်ဒုက္ခသည်တွေဆီ မရောက်ဘဲ နေပူတော်မှာပဲ ကယ်ဆယ်ရေးတွေ လုပ်လုပ်။

 

အချိန်တည်းဟူသော ယန္တယားကြီးကား ဘာကိုမှ မမှုဘဲ အစဉ်တစိုက် မှန်မှန်ကြီး ချီတက်နေလေ၏။

အခုလည်း မပြောမဆို တစ်နှစ်ကုန်ပြန်လေပြီ။

 

ဆိုတော့ သည်တစ်နှစ်အတွင်း ကျွန်ုပ် ဘာတွေလုပ်ဖြစ်ခဲ့ပါသနည်း။

ထုံးစံအတိုင်း ရုပ်ရှင်ကြည့်တာနှင့် စာဖတ်တာ အများဆုံး လုပ်ဖြစ်ပါသည်။

 

သည်တစ်နှစ်အတွင်း ကျွန်ုပ်ဖတ်ခဲ့သည့် စာအုပ်များထဲမှ အကြိုက်ဆုံးစာအုပ်ကို ပြပါဆိုလျင် ‘မြန်မာအက်ဆေး ၁၀၀’ ကို ပြရပါလိမ့်မည်။

 

ရုပ်ရှင်အနေနှင့် “Lost” မဆိုး။

 

နောက်ပြီး ဘာစာအုပ်တွေ ရေးပါသနည်း။ 

အမှန်က ခြင်္သေ့မြို့တော်ကို အပြီးသတ်ရေးဘို့ ဖြစ်ပါသည်။ သို့သော် ထုတ်ဝေမည့်သူမရှိတာနှင့် ဆက်မရေးဖြစ်ဘဲ တိုးလို့တန်းလန်းကြီးနှင့် ရပ်ထားတာဖြစ်၏။ စင်ကာပူက သူတို့ system တွေကို အမြဲတမ်း upgrade လုပ်နေတာ ဖြစ်တော့ ဒီနှစ်ရေးထားတာတွေသည် နောက်နှစ်ကျ အကုန် date out ကုန်သည်။ အမှန်က ကျွန်ုပ် ဤစာအုပ်ကြီးကို ၂၀၁၈ က တစ်ခါ ပြင်ခဲ့သေးသည်။ အခု အဲသည် ၂၀၁၈ version ကို ပြန်ဖတ်ကြည့်လိုက်တော့ အကုန်လိုလို ပြန်ပြင်ရလေသည်။ အတော်များများမှာ အခု သုံးလို့မရတော့။ သည်တော့ . . .

 

တစ်နှစ်ဆိုသည်မှာ ရက်အတော်များသည်လို့သာ ထင်ရတာ။ 

တကယ့်တကယ်ပြန်တွက်ကြည့်လိုက်လျှင် ဟိုလိုလို ဒီလိုလို၊ ယောင်တောင်ပေါင်တောင်နှင့် တစ်နှစ်ပြည့်သွားတာ များသည်။ မယုံလျင် မိတ်ဆွေတို့ နဖူးပေါ်လက်တင်၍ဖြစ်စေ၊ လက်ပေါ်နဖူးတင်၍ဖြစ်စေ၊ တွေးကြည့်စမ်းပါ။ ငါ ဒီတစ်နှစ်လုံး ဘာတွေလုပ်ခဲ့သလဲ။

 

ကျွန်ုပ်က တစ်ပတ်ကို ၇ ရက်လုံး သင်တန်းသွားနေတာဖြစ်သဖြင့် မနေ့ကလည်း ဘလာ ဘလာ ဘလာ၊ ဒီနေ့လည်း ဘလာ ဘလာ ဘလာ၊ မနက်ဖြန်လည်း ဘလာ ဘလာ ဘလာ။ ညကျတော့ တစ်ပတ်ကို ၂ ရက် GCEO မြန်မာစာ သင်၏။ အချိန်အားလေး နည်းနည်းရလျှင် ဟိုမေဘေးတွေကို ငါနဲ့ကိုင်တုတ်ခြင်းဖြင့် အချိန်ကုန်။ ဘုရားတော့ ပျင်းတာနဲ့ တခါမှ မရှိခိုးဖြစ်။ (နတ်ပြည်က နတ်သမီးလေးတွေရေ၊ ဆောရီးပါ၊ ငါ နင်တို့ဆီရောက်ဘို့ သိပ် မသေချာဘူး၊ အဟင့်၊ ရွှတ်စ်) 

 

ဘာမှမပူကြပါနဲ့အမျိုးတို့ -

အခုလာမယ့် ၁၃၈၇ သည်လည်း ဒီအတိုင်း ဟေးလားဝါးလားနှင့် ကုန်သွားဘို့ များပါသည်။

ပြီးတော့ ၁၃၈၈, ၁၃၈၉ . . . . . 

 

နှစ်သစ်မှာ မိတ်ဆွေအားလုံး ဘေးရန်ကင်းကွာ ကျန်းမာလို့ ချမ်းသာကြပါစေ။

(ဟို MayBay တွေအကုန် မာလကီးယားကြပါစေ။)

 

ကျေးဇူးတင်ပါသည်။

 

အေးငြိမ်း

၁၆/၀၄/၂၀၂၅

 

၆၃.၃၆၅=၂၂၉၉၅ ရက်/၈၈ ရက် = ၂၆၁ နှစ် ဗုဒ္ဓဟူးဂြိုဟ်

အင်္ဂါဂြိုဟ် = ၃၃ နှစ် 

စနေ = ၂၂၉၉၅/၁၀၇၅၉ = ၂ နှစ်