SGWork Pass and FWMOMCare

စင်ကာပူ၌ လာရောက် အလုပ်လုပ်ကိုင်နေကြသူ နိုင်ငံခြားသား အလုပ်သမားများသည် Phone Apps သုံးခုကို download လုပ်၊ install လုပ်ထားရန် လို၏။ ထို App များသုံးကာ လုပ်ရမည့် လုပ်ငန်းဆောင်တာများသည် ရှိ၏။ အကယ်၍ ထို apps များ မရှိပါက အခက်အခဲ ပြဿနာများနှင့် ရင်ဆိုင်ရနိုင်၏။ 

 

ထို app သုံးခုမှာ -

၁။ SingPass

၂။ SGWorkPass

၃။ FWMOMCare တို့ ဖြစ်၏။

 

SingPass အကြောင်း ကျွန်ုပ်ရေးခဲ့ပြီးပါပြီ။

ယခု SGWorkPass နှင့် FWMOMCare အကြောင်း ရှင်းပြပါမည်။

 

SGWorkPass

https://www.mom.gov.sg/eservices/sgworkpass

 

ယခင်က ဝပ်ပါမစ်ကတ်ပေါ်၌ မိမိ၏ဓာတ်ပုံ၊ အလုပ်ရှင် (ကုမ္ပဏီ) နာမည်၊ ကုမ္ပဏီလိပ်စာ၊ မိမိ၏ အလုပ်အကိုင် (Occupation), ဝပ်ပါမစ်နံပါတ်၊ ဝပ်ပါမစ် ထုတ်ပေးသည့်ရက်၊ သက်တမ်းကုန်မည့်ရက်၊ မိမိ၏ မွေးနေ့သက္ကရာဇ်၊ FIN No. (Foreign Identification Number), လူမျိုး အစရှိသည့် အသေးစိတ် အချက်အလက်များအားလုံးကို ဖော်ပြထား၏။ 

 

ယခုမူ ဝပ်ပါမစ်ပေါ်၌ ထိုအချက်အလက်များအနက် မိမိ၏ဓာတ်ပုံ၊ အလုပ်ရှင် (ကုမ္ပဏီ) နာမည်၊ မိမိနာမည်၊ ဝပ်ပါမစ် နံပါတ်၊ လုပ်ငန်း (Sector)၊ မိမိ၏ မွေးနေ့သက္ကရာဇ်၊ FIN No.၊ လူမျိုး၊ ကျား/မ စသည်တို့သာ ပါတော့၏။ အရေးကြီး သည့် အချက်တစ်ခုမှာ ဝပ်ပါမစ် သက်တမ်းကုန်မည့်ရက် ဖြစ်၏။ ဝပ်ပါမစ် သက်တမ်းကုန်မည့်ရက်သည် ပတ်စ်ပို့ သက်တမ်းကုန်မည့်ရက် စသည်တို့အပေါ် မူတည်၍ အပြောင်းအလဲ ဖြစ်နိုင်ရာ ယခုအခါ ဝပ်ပါမစ် သက်တမ်းကုန်မည့် ရက်ကို ဝပ်ပါမစ်ကတ်ပြားပေါ်၌ ရေးမထားတော့။ ထို့ပြင် မိမိ၏ အလုပ်အကိုင်ကိုလည်း ဝပ်ပါမစ်ပေါ်တွင် ဖော်ပြ မထားတော့ပါ။ 

 

မိမိ၏ ဝပ်ပါမစ် သက်တမ်းကုန်မည့်ရက် နှင့် အလုပ်အကိုင်ကို သိလိုပါမူ ဝပ်ပါမစ်နောက်ဘက်ရှိ QR Code ကို scan လုပ်ကြည့်ရ၏။ ထို့ပြင် ကိုဗစ်ကာလက အလုပ်သမားများကို ၎င်းတို့၏ ကိုဗစ်ကူးစက်မှုအခြေအနေကိုလိုက်၍ အလုပ်သမားများအား အလုပ်သွားခွင့်ကို ကန့်သတ်ခဲ့၏။ အလုပ်သမားတစ်ဦးသည် အလုပ်သွားတော့မည်ဆိုပါက မိမိ ဝပ်ပါမစ်နောက်ဘက်ရှိ QR Code ကို SGWorkPass ဖြင့် scan လုပ်ကြည့်ရ၏။ အစိမ်းရောင်ပေါ်လာမှ အလုပ်သွားခွင့် ရမည်။ အနီရောင်ပေါ်နေပါက အလုပ်သွားခွင့်မပြု။ အနီရောင်ပေါ်နေလျက်နှင့် အလုပ်သွားပါက WorkPermit cancel လုပ်သည်ထိ အရေးယူခံရမည်။ 

 

ထို့အတွက် SGWorkPass သည် ဝပ်ပါမစ် အလုပ်သမားများအတွက် မရှိမဖြစ် လိုအပ်၏။ နောက် ကောင်းသည့်အချက် တစ်ခုမှာ ဖုန်းထဲ၌ SGWorkPass ကို install လုပ်ထားသည့် အလုပ်သမားသည် ဝပ်ပါမစ်ကတ်ကို သွားလေရာ သယ်သွား စရာမလိုတော့ဘဲ ရဲ (သို့) အစိုးရအရာရှိများက တောင်းဆိုလာပါက SGWorkPass ကို ဖွင့်ပြလိုက်လို့ရ၏။ 

 

အကယ်၍ မိမိ၏ SGWorkPass ၌ Digital Work Permit Card ကို ထည့်လိုပါက သင့်တွင် register လုပ်ထားသည့် SingPass account ရှိထားရမည်။ မည်ကဲ့သို့ ထည့်သွင်းရမည်နည်း။ အောက်တွင် အဆင့်ဆင့် ပြထား၏။

 

၁။ SGWorkPass app ကို ဖွင့်ပါ။

၂။ “I am an MOM-issued pass holder” ကို ရွေးပါ။

၃။ SingPass သို့ log in ဝင်ပါ။

၄။ SingPass log in အချက်အလက်များ ဖြည့်ပါ။

၅။ SingPass သို့ successfully log in လုပ်ပြီးပြီဆိုပါက “Back to SGWorkPass” ကို နှိပ်ပါ။

၆။ ယခုအခါ သင့် SGWorkPass app ၌ သင့် Digital WorkPermit ကို ဖွင့်နိုင်ပါပြီ။

 

မည်ကဲ့သို့လုပ်ရမည်ကို MOM website ၌ ဗီဒီယိုလေးနှင့် ပြထားပါသည်။

 

SGWorkPass app ၏ logo, အခြား SGWorkPass နမူနာများကို MOM website ၌ ကြည့်နိုင်ပါသည်။ Copy right နှင့် ငြိမည်စိုးသဖြင့် ဤနေရာ၌ မဖော်ပြတော့ပါ။

 

FWMOMCare

နိုင်ငံခြားသား အလုပ်သမားများ၌ မရှိမဖြစ် ရှိရမည့် နောက် app တစ်ခုမှာ FWMOMCare ဖြစ်၏။ ဤတွင် FW ဟူသည် Foreign Worker ကို ဆိုလိုသည်။ FWMOMCare ကို 18/05/2020 ၌ စတင်ခဲ့၏။ FWMOMCare သုံးပြီး အောက်ပါတို့ လုပ်နိုင်၏။

 

§  မိမိ၏ အလုပ်အကိုင် အခက်အခဲ ပြဿနာများကို MOM နှင့် ဆွေးနွေးရန် မေတ္တာရပ်ခံခြင်း (MOM အရာရှိက ၃ ရက်အတွင်း အကြောင်းပြန်မည်။) 

§  အန္တရာယ်မကင်းသည့် အခြေအနေ/အပြုအမူများကို MOM သို့ သတင်းပို့ခြင်း

§  နေထိုင်မကောင်းဖြစ်လျင် ဆေးရုံဆေးခန်းသွားရန် ကြိုတင် booking ယူခြင်း (သို့မဟုတ်) tele-consultation ဖြင့် ဆရာဝန်ပြခြင်း

§  MOM ၏ နောက်ဆုံးထုတ် အကြံပြုချက် (advisory) များကို ရယူနိုင်ခြင်း

§  အပန်းဖြေစခန်း (RC) များမှ အားကစားကွင်းများ အသုံးပြုရန် booking လုပ်နိုင်ခြင်း

§  (ကိုဗစ်ဖြစ်လျင်) ကိုဗစ်ဆေးစစ်မှတ်တမ်းကို FWMOMCare ၌ မှတ်တမ်းတင်ရခြင်း

 

FWMOMCare ကို ဘာသာစကား ၆ မျိုးဖြင့် ရနိုင်၏။ 

 

FWMOMCare သုံးပုံသုံးနည်းကို အောက်တွင် အသေးစိတ် ဖော်ပြထားပါသည်။

 

FWMOMCare Register လုပ်ခြင်း

§  FWMOMCare ကို download လုပ်၊ install လုပ်ပါ။

§  Privacy Policy ကို accept လုပ်ပါ။

§  မိမိ၏ FIN No. ဖြင့် ဝင်၍ register လုပ်ပါ။

§  လက်ရှိကိုင်ထားသည့် မိမိ၏ ဖုန်းနံပါတ်ကို ရိုက်ထည့်ပါ။ ထိုအခါ မိမိဖုန်းထဲသို့ ဂဏန်း ၆ လုံးပါ OTP (One Time Password) message ပို့ပေးပါလိမ့်မည်။ ထို OTP ကို ရိုက်ထည့်ပါ။ 

§  ထို့နောက် မိမိအမည်၊ မွေးနေ့သက္ကရာဇ်နှင့် နေရပ်လိပ်စာတို့ရိုက်ထည့်ပြီး Save changes ကို နှိပ်လိုက်လျင် register လုပ်ပြီးပါပြီ။ 

 

နေရပ်လိပ်စာထည့်ရာတွင် အားလုံးရိုက်စရာမလို။ Postal code ကို ရိုက်ထည့်လိုက်ပါက လိပ်စာအပြည့်အစုံကို အလို အလျောက်ထည့်ပေးသွားပါလိမ့်မည်။ 

 

FWMOMCare ကို register လုပ်ပြီးသည်နှင့် စ သုံးလို့ ရပါပြီ။

 

FWMOMCare အသုံးပြုနည်း

ပထမ FWMOMCare app ကို ဖွင့်ပါ။

FIN No. ရိုက်ထည့်ပါ။

သင့်ဖုန်း message ထဲ ရောက်လာသည့် OTP ဂဏန်း ၆ လုံးကို ရိုက်ထည့်ပါ။

ထိုအခါ FWMOMCare ၏ Home Page ကို အောက်ပါအတိုင်း တွေ့ရပါမည်။ (Screen shot 1)

 

ဖုန်းနံပါတ် ပြောင်းခြင်း

ဘယ်ဘက် အပေါ်ဆုံးထောင့်မှ မျဉ်းတိုလေးသုံးကြောင်းကို နှိပ်ပါ။

My Profile ကိုနှိပ်၊ Contact Details မှ Edit ကို နှိပ်၊ ဖုန်းနံပါတ်အသစ် ရိုက်ထည့်။

Save changes ကို နှိပ်၊ သင့် ဖုန်း message ထဲဝင်လာသည့် OTP ဂဏန်း ၆ လုံးကို နှိပ်။

ပြီးပါပြီ။

 

ကိုဗစ် ကာကွယ်ဆေးထိုးမှတ်တမ်း

FWMOMCare Home Screen è Vaccination è Vaccination Records è Covid 19 Vaccination ကို အစဉ်လိုက် နှိပ်သွားပါ။

 

Covid 19 Vaccination အောက်တွင် ရလဒ် သုံးခုတွေ့မည်။

အစိမ်းရောင် - ကိုဗစ်ကာကွယ်ဆေးကို မည်သည့်နေ့က ထိုးထားသည်။

အနီရောင် - ကိုဗစ်ကာကွယ်ဆေး ထိုးမထားပါ။

ခဲရောင် - ကိုဗစ်ဖြစ်ပြီး နလံပြန်ထလာသည့် လူမမာ

 

History ကို နှိပ်လိုက်လျင် မည်သည့်နေ့က မည့်သည့်တံဆိပ် ကိုဗစ်ကာကွယ်ဆေးထိုးထားသည် ဟူသော ကိုဗစ်ကာကွယ်ဆေးထိုးမှတ်တမ်း အားလုံးကို တွေ့ရမည်။

 

ကိုဗစ် ကာကွယ်ဆေးထိုးရန် appointment ယူခြင်း

အကယ်၍ ကိုဗစ်ကာကွယ်ဆေးထိုးရန် appointment ယူလိုပါက -

FWMOMCare Home Screen è Vaccination è Vaccination Appointment ကို အစဉ်လိုက် နှိပ်သွားပါ။

ထိုအခါ မည်သည့်နေ့၊ အချိန်၊ နေရာ၌ ကာကွယ်ဆေးထိုးရမည်ကို Booking Code နှင့်တကွ ဖော်ပြပေးပါလိမ့်မည်။ အကယ်၍ ထိုနေ့/ထိုရက်၌ မအားပါက ရက်ချိန်းပြန်ပြောင်းလို့ရ၏။ ရက်ချိန်းပြောင်းလိုပါက Change Appointment ကို နှိပ်ပြီး ပြောင်းပါ။

 

ကိုဗစ်ကာကွယ်ဆေးထိုးရန် appointment ယူပြီးပါက မည်သည့်နေ့/ရက်/အချိန်/နေရာ၌ ကိုဗစ်ကာကွယ်ဆေး ထိုးရမည့်အကြောင်း အလုပ်ရှင်ကို သတိပေး၊ အကြောင်းကြားပါ။

 

(နေမကောင်းလျှင်) ဆရာဝန်ရှာရန်

အကယ်၍ နေမကောင်းသဖြင့် ဆရာဝန်ပြလိုပါက -

FWMOMCare Home Screen è Find a Doctor ကို နှိပ်လိုက်ပါက သင်၏ PCP (Primary Care Plan) ကို ပြပါ လိမ့်မည်။ 

 

PCP တွင် နည်း ၂ နည်းဖြင့် ဆရာဝန် ပြနိုင်၏။

ပထမတစ်ခုမှာ ဆရာဝန်နှင့် ဗီဒီယိုခေါ်ပြီး စကားပြောခြင်းဖြစ်၏။ အကယ်၍ ဘယ်မှမသွားဘဲ ကိုယ့်အခန်း၌ပင်နေကာ ဆရာဝန်နှင့် ဗီဒီယိုနှင့် စကားပြောလိုသည်ဆိုပါစို့။

 

Video call a doctor. ကို နှိပ်ပါ။

ထိုအခါ ဆရာဝန်အား မိမိရောဂါအကြောင်း ဗီဒီယိုမှ စကားပြောနိုင်မည်။

ဗီဒီယိုခေါ်ပြီး ဆရာဝန်ပြလျှင် $2.00 သာ ပေးရမည်။

 

နောက်တစ်နည်းမှာ ဆေးခန်းသို့ လူကိုယ်တိုင် သွားခြင်းဖြစ်၏။

သင့်တွင် PCP ရှိပါက မည်သည့်ဆေးခန်း သွားရမည်ကို တစ်ခါတည်း သတ်မှတ်ပေးပြီးဖြစ်၏။

ထိုဆေးခန်းက အသွားအပြန် ကားစီစဉ်ပေးပါလိမ့်မည်။

ဆေးခန်းသို့ လူကိုယ်တိုင် သွားပြလျှင် $5.00 ပေးရမည်။

 

မိမိကြိုက်သည့်နည်းကို နှိပ်ပြီး ဆရာဝန်ပြနိုင်ပါသည်။

 

နောက်တစ်ခုက မိမိသူငယ်ချင်း ၁ ယောက် (သို့) ၂ ယောက်ကို သတ်မှတ်ပေးခြင်းဖြစ်၏။

မိမိခင်မင်သူ သူငယ်ချင်းတစ်ယောက်ယောက်ကို “Buddy Nomination” တွင် သတ်မှတ်ပေးနိုင်၏။ 

မကြိုက်တော့ပါက ပြန်ဖြုတ်နိုင်၏။ ပြန်ဖြုတ်လိုလျှင် “Remove Nominated Buddy” ကို ရွေးပါ။

 

ကျန်းမာရေးအခြေအနေကို တင်ပြခြင်း

မိမိ၏ ကျန်းမာရေးအခြေအနေကို Home screen က Report Health ကို နှိပ်၍ တင်ပြနိုင်၏။ ကိုယ်အပူချိန်၊ ချောင်းဆိုးနေသလား၊ လည်ချောင်းနာနေသလား၊ နှာရည်ယိုနေသလား၊ အသက်ရှူကြပ်နေသလား၊ ရင်ဘတ် အောင့်နေသလား၊ အောက်ဆီဂျင် (SpO2), နှလုံးခုန်နှုန်း (BPM) စသည်တို့ ဖော်ပြနိုင်၏။

 

SnapSAFE

FWMOMCare တွင် SnapSAFE လည်းပါ၏။ SnapSAFE ကို သုံးပြီး မိမိပတ်ဝန်းကျင်၌ အန္တရာယ်မကင်းသော အခြေအနေ (unsafe condition), အန္တရာယ်မကင်းသော အပြုအမူ (unsafe act) တို့ကို MOM သို့ report လုပ်နိုင်၏။ ထိုမျှသာမက အကယ်၍ သင့်အား အန္တရာယ်မကင်းသော အခြေအနေတစ်ခုခုတွင် အလုပ်လုပ်ရန် ခိုင်းစေခံရပါကလည်း SnapSAFE ၌ တိုင်ကြားနိုင်၏။

 

Feedback

အကယ်၍ သင်သည် လခကို လခထုတ်ရက်မှ (၇) ရက်အတွင်းမရခဲ့ပါက လခပေးရန် အလုပ်ရှင်ထံ တောင်းဆိုနိုင်၏။ ထိုသို့တောင်းဆိုသည့်တိုင် လခ မရသေးပါက Feedback သုံး၍ MOM ကို တိုင်ကြားနိုင်ပါသည်။

 

Helplines

မိမိ၌ ဒုက္ခသုက္ခများနှင့် ရင်ဆိုင်ကြုံတွေ့နေရပါက အကူအညီတောင်းနိုင်သည့် ဖုန်းနံပါတ်များကိုလည်း ပေးထားပါသည်။

§  MOM Helpline

§  TADM (Tripartite Alliance for Dispute Management)

§  Health Service (24/7)

§  MWC(24/7)

§  Police

§  SCDF

 

အပန်းဖြေစခန်းများ (Recreation Centre)

FWMOMCare Home Screen è Recreation Centre ကို နှိပ်ပြီး အပန်းဖြေစခန်းများကို ရှာနိုင်ပါသည်။

 

Talk To MOM

မိမိ၏ အခက်အခဲ ပြဿနာများကို Talk to MOM သုံးလျက် MOM အရာရှိနှင့် အင်တာဗျူးကာ တင်ပြနိုင်ပါသည်။ မိမိ၏ နာမည်၊ FIN No. ဖုန်းနံပါတ်၊ နေရပ်လိပ်စာ၊ အင်္ဂလိပ်လို ပြောတတ်/မပြောတတ် စသည်တို့ကို ဖော်ပြပြီး submit လုပ်လိုက်ပါက MOM အရာရှိသည် သင့်ကို ၃ ရက်အတွင်း ဆက်သွယ်လာပါလိမ့်မည်။

 

သို့သော် ပထမတစ်ခါ Talk to MOM ကို တင်ပြပြီးပါက နောက်ထပ် ၃ ရက်ကြာမှ နောက်ထပ်တစ်ခုကို တင်ပြနိုင်၏။ 

 

Quick Information

Quick information ၌ FWMOMCare, Work Pass Related, Employment Related, News Related FAQ ဟု ၄ ခု ရှိ၏။ သက်ဆိုင်ရာကဏ္ဍအလိုက် မိမိနှစ်သက်ရာ ရွေးချယ်ဖတ်ရှုနိုင်၏။

 

FWMOMCare သုံးပုံသုံးနည်း Youtube ဗီဒီယို

https://www.youtube.com/watch?app=desktop&v=bkLUI3ma_lw&t=0s

 

ကျေးဇူးတင်ပါသည်။

 

အေးငြိမ်း

26/02/2025

6:52 pm

ES JooKoon

Primary Care Plan (PCP)

Ref:

https://www.mom.gov.sg/primary-care-plan/what-is-pcp

 ၂၀၂၂ ခုနှစ် ဧပြီလ ၁ ရက်နေ့မှစကာ ဆောက်လုပ်ရေးလုပ်ငန်း၊ သင်္ဘောကျင်း၊ ကုန်ထုတ်လုပ်ငန်း (ထိုလုပ်ငန်းသုံးမျိုးကို စင်ကာပူ၌ CMP ဟု ခေါ်၏။ C = Construction, M = Marine, P = Process) ၌ လုပ်ကိုင်နေသူ အလုပ်သမားများ၊ ၇ ယောက်နှင့်အထက်ရှိသည့် အလုပ်သမားဆောင်၌ နေသူ အလုပ်သမားများအတွက် Primary Care Plan ဝယ်ရန် ကုမ္ပဏီများသို့ MOM က ညွှန်ကြားခဲ့၏။ ဤသည်မှာ မကျန်းမမာဖြစ်ပါက အခက်အခဲ တစုံတရာမရှိဘဲ ဆေးကုနိုင်စေရန် MOM က လုပ်ပေးထားသည့် Primary Healthcare System (PHS) ဖြစ်၏။

 

ဤအစီအစဉ်က အလုပ်ရှင်များနှင့် အလုပ်သမားများအတွက် -

§  ကြီးမားသောရောဂါဖြစ်ပွားမှုနှင့် လုပ်ငန်းခွင်အနှောင့်အယှက်ဖြစ်နိုင်ခြေများကို လျှော့ချနိုင်စေရန် တက်ကြွသော ပြည်သူ့ကျန်းမာရေး စောင့်ကြည့်မှုကို ပံ့ပိုးကူညီရန်

§  မမျှော်လင့်သော ဆေးကုသစရိတ်များမှ ကာကွယ်ရန်နှင့် စိတ်အေးချမ်းသာမှုကို ပံ့ပိုးရန် 

 

အခြား WP အလုပ်သမားများနှင့် S Pass ကိုင်ထားသူများ PCP ကို မဝယ်လည်း ရပါသည်။ သို့သော် ပိုမိုကောင်းမွန်သည့် ကျန်းမာရေးစောင့်ရှောက်မှုများအတွက် ဝယ်ယူထားရန် တိုက်တွန်းပါ၏။ 

 

PCP ကို ဝပ်ပါမစ်ကတ် (သို့) S Pass ကတ် မရသေးမီ (သို့) သက်တမ်းမတိုးမီ ဝယ်ထားရန်လို၏။ PCP ဝယ်ပြီးပြီ ဆိုသည်နှင့် အလုပ်ရှင်များသည် MOM website ၌ declare လုပ်ရ၏။ 

 

PCP သက်တမ်းမှာ ၁၂ လ ဖြစ်၏။​ အလုပ်ရှင်က အဆုံးသတ်လိုက်သည်မှအပ ၁၂ လ ပြည့်သည်နှင့် နောက်ထပ် ၁၂ လ ကို အလိုအလျောက် သက်တမ်းတိုးမည်။

 

PCP ဝယ်ရမည့်နေရာကို ဇုံ ၆ ခုခွဲထားရာ အောက်ပါအတိုင်း ဖြစ်၏။

ဤဇုံများမှ ဂဏန်းများမှာ စာပို့သင်္ကေတ (postal code) များဖြစ်၏။ ဥပမာအားဖြင့် Zone E ၌ နေသူအလုပ်သမား၏ စာပို့သင်္ကေတမှာ ၆၂ နှင့် ၆၃ ဖြစ်၏။ ထို Zone E ၌ နေသူအလုပ်သမားအတွက် Fullerton Healthcare Group ၌ PCP ကို ဝယ်ရမည်။ 

 

ဈေးမှာ အလုပ်သမားတစ်ဦးအတွက် တစ်နှစ်စာကို $108 မှ $138 ထိ ဖြစ်၏။ မည်သို့ဝယ်ရမည်ကို MOM Website ၌ အပြည့်အစုံ ဖော်ပြထား၏။ 

 

PCP အောက်၌ အောက်ပါ ဆေးကုသမှုများ အကြုံးဝင်၏။

 

§  ဝပ်ပါမစ်လျှောက်ရန် (သို့) သက်တမ်းတိုးရန် လိုအပ်သည့် ဆေးစစ်ဆေးမှု

§  သာမန် ဖျား၊ နာ၊ ခေါင်းကိုက်၊ ဗိုက်နာ

§  ဆီးချို၊ သွေးတိုးစသည့် နာတာရှည်ရောဂါများ

§  နှစ်စဉ် ဆေးစစ်ဆေးခြင်း (တစ်ကြိမ်သာ)

§  (PCP ဝယ်ယူထားသည့် ဇုံအတွင်း၌) Telemedicine နှင့် ဆေးပို့ပေးခြင်း

(Telemedicine အကြောင်း သီးသန့်ရေးပါမည်။)

§  Specialist appointment မှလွဲ၍ အလုပ်သမားများကို အဆောင်နှင့် ဆေးခန်းအသွားအပြန် ပို့ဆောင်ပေးခြင်း

§  အရေးပေါ်အခြေအနေများတွင် ဆေးရုံပို့ပေးခြင်း

PCP အောက်၌ ဝန်ဆောင်မှုပေးသည့် ဆေးကုသမှုစာရင်း အပြည့်အစုံကို MOM Website ၌ download လုပ်ယူနိုင်၏။ (မည်ကဲ့သို့လုပ်ရမှန်း မသိသူများ ကျွန်ုပ်ထံမေးလျှင် ပို့ပေးပါမည်။)

 

PCP အောက်၌ ဆေးကုသခြင်းကို နည်းနှစ်နည်းဖြင့် ပြုလုပ်နိုင်၏။ 

၁။ Telemedicine

၂။ အထက်ဖော်ပြပါ ဆေးခန်းများသို့ လူကိုယ်တိုင်သွား၍ ဆရာဝန်နှင့် ပြခြင်း

 

Telemedicine နှင့် ဆရာဝန်ပြခြင်း

 

Telemedicine နှင့် ဆရာဝန်ပြခြင်းကို သက်ဆိုင်ရာဇုံများအလိုက် အောက်ပါ link များ၌ ပြုလုပ်နိုင်၏။

 

StarMed Specialist Centre

https://starmedspecialist.com/teleconsultation-english

 

SATA CommHealth

 

Fullerton Healthcare Group

https://www.fullertonhealth.com

 

St Andrew’s Mission Hospital

https://pinnaclefamilyclinic.com.sg/samwmc

 

သို့မဟုတ်ပါကလည်း screen shot ဖြင့် ပြထားသည့် QR code ကို scan လုပ်၍ appointment ယူနိုင်ပါ၏။

 

Telemedicine နှင့် ဆရာဝန်ပြပါက $2.00 သာ ပေးရပါမည်။

ရွှေ့ပြောင်းလုပ်သားများအတွက် ဆေးခန်းများ Medical Centres for Migrant Workers (MCMWs) သို့ လူကိုယ်တိုင် သွားပြခြင်း

 

သက်ဆိုင်ရာဇုံအလိုက် သတ်မှတ်ပေးထားသည့် ဆေးခန်းများသို့ လူကိုယ်တိုင် သွားပြနိုင်၏။ ဆေးခန်းဖုန်းနံပါတ်များကို ဖုန်းဆက်၍ appointment ယူပါ။ Screen shot တွင် ဆေးခန်းများ၏ hotline ဖုန်းနံပါတ်များ ဖော်ပြထားပါသည်။ အလုပ်သမားဆောင် (dormitory) များ၌နေသော အလုပ်သမားများဖြစ်ပါက ဆေးခန်းများက သွား/ပြန် ကားစီစဉ် ပေးပါမည်။ ဆေးခန်းသို့ လူကိုယ်တိုင် သွားပြပါက $5.00 (Wow) ပေးရပါမည်။

 

အကယ်၍ အလုပ်သမားသည် PCP အောက်၌ အကြုံးမဝင်ပါက MOM Medical centre များ (သို့) MOM-designated GP ဆေးခန်းများသို့ သွားပြနိုင်ပါ၏။ ထိုဆေးခန်းများမှာ အထက်ဖော်ပြပါ ဇုံအလိုက်ရှိသည့် ဆေးခန်းများက စီမံပေးထားခြင်း ဖြစ်၏။ ထိုက်သင့်အားလျော်စွာသော ဆေးကုသစရိတ် ပေးရပါမည်။

သို့မဟုတ်ပါကလည်း screen shot ၌ ပြထားသည့် QR code ကို scan လုပ်၍ telemedicine service ကို ရယူနိုင်ပါသည်။

 

ပိုမိုသိရှိလိုပါက -

https://www.mom.gov.sg/faq/primary-care-plan/what-options-are-there-for-my-workers-who-are-not-covered-under-pcp

 

ဆေးခန်းများစာရင်းမှာ အတန်ငယ်များပြားလှသဖြင့် အပြည့်အစုံ မဖော်ပြတော့ပါ။ MOM Website ၌ ဖော်ပြထားပါ၏။ မည်ကဲ့သို့ရှာရမှန်းမသိသူများ ကျွန်ုပ်ထံ​ လှမ်းမေးနိုင်ပါ၏။ 

 

ကျေးဇူးတင်ပါသည်။

 

အေးငြိမ်း

12:49 pm @ ES Joon Koon

25/02/2025

အဖြတ်အတောက်မှားသဖြင့် အဓိပ္ပာယ် ပြောင်းသွားရပုံ အကြောင်း

ကျွန်ုပ် မြန်မာအက်ဆေး ၁၀၂ ကို ဖတ်နေ၏။ ပြီးခါနီးပါပြီ။

အက်ဆေးအရေးအသားမှာ ချစ်စရာ ဖြစ်၏။ မိမိပတ်ဝန်းကျင်မှအကြောင်း၊ မိမိနှင့် ရင်းနှီးသူ၊ ကျွမ်းဝင်သူတစ်ယောက် အကြောင်း စသည်တို့ကို ရေးသားထားတာဖြစ်၏။

 

ထိုအကြောင်းသည် စာအုပ်တစ်အုပ်အကြောင်း ဖြစ်ချင်ဖြစ်မည်။ မိမိမိတ်ဆွေတစ်ဦးအကြောင်း ဖြစ်ချင်ဖြစ်မည်။ ပန်းကလေးတစ်ပွင့်အကြောင်း ဖြစ်ချင်ဖြစ်မည်။ သစ်ပင်လေးတစ်ပင်အကြောင်း ဖြစ်ချင်ဖြစ်မည်။ ကြောင်ကလေး တစ်ကောင်အကြောင်း ဖြစ်ချင်ဖြစ်မည်။ မိုးရွာနေသည့်အကြောင်း ဖြစ်ချင်ဖြစ်မည်။ ကျပ်တန်လေးတစ်ရွက်၊ ဘောပင်လေးတစ်ချောင်းအကြောင်း ဖြစ်ချင်ဖြစ်မည်။ ယုတ်စွအဆုံး မြက်ပင်ကလေးတစ်ပင်အကြောင်းပင် ဖြစ်နိုင်ပါ၏။

 

အက်ဆေးကို ဘာလို့ရေးသနည်းဆိုသော် ရေးချင်လို့ရေးတာ ဖြစ်သည်ဟု ဖြေရပါမည်။

မိမိပတ်ဝန်းကျင်၌ မြင်/တွေ့/ကြား/သိ/ခံစားမိသည်တို့ကို မိမိခံစားရသည့်အတိုင်း မိတ်ဆွေတို့ကို ပြန်ပြောပြတာ ဖြစ်၏။

အက်ဆေးဆိုသည်မှာ အင်္ဂလိပ်စကားလုံးဖြစ်၍ မြန်မာလို ရသစာတမ်းဟုလည်း နာမည်ပေးကြ၏။ 

 

အက်ဆေးမှာ ယခုမှ ပေါ်လာတာမဟုတ်ဘဲ ဟို့ယခင် ခေတ်စမ်းစာပေခေတ်ကတည်းက ပေါ်ထွန်းခဲ့တာ ဖြစ်၏။ 

ထိုအက်ဆေးစာတမ်း တော်တော်များများကို ယခင် အထက်တန်းမြန်မာစာ၌ သင်ကြားခဲ့၏။

 

ယခု ကျွန်ုပ်ပြောလိုသည့် အကြောင်းအရာမှာ အက်ဆေးအကြောင်းမဟုတ်။

အထက်၌ ကျွန်ုပ်ပြောခဲ့သည့် မြန်မာအက်ဆေး ၁၀၂ မှ အဖြတ်အတောက်မှားပုံအကြောင်း ဖြစ်၏။

သို့တိုင် မြန်မာအက်ဆေး ဟု ဆိုထားသဖြင့် အက်ဆေးဆိုတာ ဘာဆိုတာကို နည်းနည်း လေရှည်ခြင်းဖြစ်၏။

 

ထို မြန်မာအက်ဆေး ၁၀၂ ကို ဦးဖိုးကျား၏ ရခိုင်ပြည် စစ်တွေမြို့သို့သွားခြင်း နှင့် ဖွင့်ထား၏။

ပထမဆုံးစာမျက်နှာကို ဖတ်လိုက်မိစဉ်ပင် ကျွန်ုပ်စိတ်၌ အတော် ခိုးလိုးခုလု ဖြစ်သွားမိလေ၏။  

ဤသည်မှာ စာစီသူ၏အမှား ဖြစ်၏။

 

စာ၌ ဤသို့ ရေးထား၏။

တကြောင်းလည်း ရှေးအစစွာက မျောက်ဖိုနှင့် ဆတ် မသင့်မြတ်၍ ရသော မျောက်ဆတ်၊ ကပြားဘီလူး ငရက္ခိုင်ဆိုသူ . . . 

ဖမ်းဆီးစားသောက်နေရာ ရသေ့နှင့် ဆတ် မသင့်မြတ်၍ရသော လူဆတ် ကပြား မာယာရုမင်းသားက . . . .  

 

ဤတွင် -

မျောက်ဖိုနှင့် ဆတ် - မသင့်မြတ်မှတော့ ဘယ့်နှာလုပ် ကလေးရပါမတုံး။

 

နောက်ပြီး

ရသေ့နှင့် ဆတ် - မသင့်မြတ်ပါကလည်း ကလေးမရနိုင်။

 

အမှန်မှာ -

မျောက်ဖိုနှင့် ဆတ်မ သင့်မြတ်၍ရသော မျောက်ဆတ် (မျောက်ဆတ်ဆိုသည်မှာ မျောက်နှင့်ဆတ် ကပြား ကို ဆိုလို၏။)

ရသေ့နှင့် ဆတ်မ သင့်မြတ်၍ရသော လူဆတ် (လူဆတ်ဆိုသည်မှာ လူနှင့်ဆတ် ကပြား ကို ဆိုလို၏။) - ဖြစ်ရမည်။

မျောက်ဖိုနှင့် ဆတ်မ သင့်မြတ်သည် ဆိုခြင်းမှာ အနှီမျောက်နှင့်ဆတ်မ တို့ နသားပါးယားကြခြင်းကို ဆိုလို၏။

ရသေ့နှင့် ဆတ်မ သင့်မြတ်သည် ဆိုခြင်းမှာလည်း ထိုရသေ့နှင့်ဆတ်မ တို့ နသားပါးယားကြခြင်း ဖြစ်၏။ (နသားပါးယားတယ်ဆိုတာ ဒချိတာပေါ့ဗျာ။ ယခွမ်း)

 

ဟိုတလောက မောင်သာရလား၊​ မောင်သာနိုးလား ကောင်းကောင်းမမှတ်မိ။

ဆရာကြီးက ဆောင်းပါးရေးကာ မဂ္ဂဇင်းတိုက်သို့ ပို့၏။ 

မဂ္ဂဇင်းတိုက်က သူ့စာများကို စာလုံးပေါင်းများ ပြင်လိုက်၏။

ဆရာကြီး ဒေါခီး၍ အယ်ဒီတာချုပ်ထံ စာ အရှည်ကြီးရေး၏။

အယ်ဒီတာချုပ်ကလည်း ဆရာကြီးထံ ခေတ်အသုံးအနှုန်းအတိုင်း သတ်ပုံကျမ်းအတိုင်း ပြင်ရပါသည်ဟု စာအရှည်ကြီး ရေးကာ အကြောင်းပြန်လိုက်၏။

 

၂၀၀၇ - ၂၀၀၈ လောက်က စာရေးဆရာကြီးတစ်ဦးက ကျွန်ုပ်တို့အဖွဲ့အကြောင်း စာရေးချင်သပ ဆို၍ ကျွန်ုပ်က ကျွန်ုပ်တို့ အဖွဲ့အကြောင်း အပြည့်အစုံ ရေးပေးလိုက်၏။ ကျွန်ုပ်ရေးထားသည့်စာများကို တစ်လုံး တစ်ပါဒမှ မပြင်ပါနှင့် ဟုလည်း စာရေးပေးလိုက်၏။

 

သို့တိုင် မဂ္ဂဇင်းထဲ၌ ထိုဆောင်းပါး ပါလာ၍ ဖတ်ကြည့်လိုက်တော့ ကျွန်ုပ်စာများကို ပြင်ထားတာ တော်တော်များများ တွေ့လိုက်၍ ကျွန်ုပ်လည်း အတော် ဒေါသထွက်သဖြင့် ထိုစာမျက်နှာများကို ပရင့်ထုတ်၊ မင်နီများတားလျက် ထိုဆရာကြီးထံ အတော် ပြင်းပြင်းထန်ထန်လေး ရေးလိုက်၏။ ဆရာကြီးက ထို့အတွက် တောင်းပန်ပါသည်ဟု စာပြန်ရေးတော့ ကိုသောင်းတန်က ထိုကဲ့သို့သော ဆရာကြီးကို ကျွန်ုပ်က ထိုကဲ့သို့ရေးလိုက်ခြင်းအတွက် အပြစ်တင်၏။ ကျွန်ုပ်ကတော့ ကိုယ်မှားသည်မထင်ပါ။ အစကတည်းက မပြင်ပါနှင့်ဟု စကားခံထားတာကို ကျွန်ုပ်ကို အသိမပေးဘဲ ပြင်တာ ကျွန်ုပ်က လက်ခံရပါမည်လား။ 

 

စင်ကာပူတွင် ကော်ဖီဆိုင်နှင့် စားသောက်ဆိုင်များ တွဲထားသည့် ဆိုင်ကြီးကို Kopitiam ဟု ခေါ်၏။ ဤသည်ကို အနှီ ဆရာကြီးက သူ့သဘောနှင့်သူ Coffee Team ဟု ပြင်၏။ ဤသည်ကို ကျွန်ုပ်က ပြုံးပြုံးလေးနှင့် ရပါတယ်ခင်ည ဟု ဆိုရပါမည်လော။

 

ဆရာမကြီး ‘ခင်နှင်းယု’ ၏ ‘ဥဩတွန်တဲ့ လရာသီ’ ဝတ္ထုထဲတွင်လည်း စင်ကာပူနှင့်ပတ်သက်သည့် အမှားများ ပါပါသည်။ သို့သော် ကျွန်ုပ် မရေးချင်ပါ။ စာရေးဆရာဟူသည် မိမိရေးမည့် အကြောင်းအရာကို ဂဃနဏသိထားရန်လိုသည်ဟု ကျွန်ုပ်ကတော့ သည်အတိုင်း ခံယူပါသည်။

 

သို့သော်လည်း ‘မြန်မာအက်ဆေး ၁၀၂’ တွင် အထက်ဖော်ပြပါ တစ်နေရာကလွဲ၍ ကျန်နေရာများတွင်မူ အမှားပါတာ မရှိသလောက် ဖြစ်ပါ၏။

 

ကျွန်ုပ်သည် စာကလေးများကို ချစ်၏။ (စာကလေးဆိုတာ ဟို တံစက်မြိတ်စွန်းမှာ ကျိကျိ ကျိကျိ လုပ်နေတဲ့ အကောင်လေးတွေကို ပြောတာမဟုတ်ဘူး။ အက္ခရာတွေနဲ့ရေးထားတဲ့ စာလုံးတွေကိုပြောတာဗျ။ ယခွမ်း)

သို့အတွက်လည်း အမှားကင်းစင်သည့် စာများကိုသာ ဖတ်လို၏။ 

 

ဟိုးယခင်က ထုတ်ဝေခဲ့သည့် ကျမ်းကြီးကျမ်းခိုင် တော်တော်များများ ကျွန်ုပ် ဖတ်ဖူးပါ၏။ စာတွေ ကျကျန်ခဲ့တာ။ အမှားအယွင်းတွေပါတာ အတော့်ကို နည်းလှ၏။ လုံးဝ မပါဟုပင် ဆိုနိုင်၏။ အဘယ်ကြောင့်ဆိုသည်ကို အထက်တွင် ရည်ညွှန်းခဲ့သည့် မဂ္ဂဇင်းတိုက်ကိုပို့သော ဆရာကြီး၏ စာထဲ၌ အပြည့်အစုံ ရှင်းပြထား၏။

 

‘မြန်မာအက်ဆေး ၁၀၂’ ကို ကျွန်တော် အလွန်နှစ်သက်ပါ၏။ ဤစာအုပ်ကို စီစဉ်ပေးသူ စိတ်ကူးချိုချိုကိုလည်း ကျေးဇူးတင်ပါ၏။

 

အခုက အဖွင့်စာမျက်နှာမှာ သည်လိုအမှားကြီးပါသွားတော့ မြင်မြင်ချင်း ဆောက်နှင့်ထွင်းလိုက်သလို ဖြစ်သွား၍ ရေးလိုက်ရခြင်း ဖြစ်ကြောင်း - 

 

ကျေးဇူးတင်ပါသည်။

 

အေးငြိမ်း

၁၃ ဖေဖော်ဝါရီ ၂၀၂၅