ဝေါဟာရကိစ္စ နှင့် ဓာတ် အကြောင်း

ကျွန်တော် စာများ၊ စာအုပ်များရေးသောအခါ များစွာသောအင်္ဂလိပ်စာလုံးများကို ဘာသာပြန်ရန် အခက်အခဲ ဖြစ်ရသည်။ ဥပမာ - အင်္ဂလိပ်စာလုံး structure မှာ ဘာကိုဆိုလိုမှန်း သိ၏။ သို့သော် မြန်မာဘာသာပြန်သည့်အခါ မည်ကဲ့သို့ ဆီလျော် အောင် ဘာသာပြန်ရမည်ကို အတော်ခေါင်းခဲရသည်။ structure ကို မြန်မာလို အဆောက်အအုံဟု အဘိဓာန်များက ဖွင့်ဆို၏။ သို့သော် အင်္ဂလိပ်လို structure က အတော်အသုံးကျယ်ပြန့်သည်။ နေရာကိုလိုက်၍ အဓိပ္ပာယ်ကွဲသွား၏။ structure ဆိုတိုင်း အဆောက်အအုံဟု ဘာသာပြန်လို့မရ။

Superstructure ကို အပေါ်ထပ်အဆောက်အအုံဟု ဘာသာပြန်၏။ ကျွန်တော်သဘောမကျပါ။ သို့သော် ကိုယ်ကလည်း ဘာဝေါဟာရမှ မတီထွင်တတ်သဖြင့် အသာငြိမ်နေရသည်။ သံချောင်းကြီးများဖြင့် ဆင်ထားသော အကွက်၊ အတန်းကြီးများကို steel structure ဟု ခေါ်၏။ ၎င်းကို သံမဏိအဆောက်အအုံဟု ဘာသာပြန်လျှင် တက်တက်စင် လွဲပေမည်။ သံမဏိ အဆောက်အအုံဟု ဆိုလိုက်လျှင် စာဖတ်သူများ၏စိတ်ထဲ၌ သံမဏိများဖြင့် တည်ဆောက်ထားသော အဆောက်အဦကြီးကို ပြေးမြင်မိမှာဖြစ်၏။ ထို့ပြင် သံမဏိများဖြင့် တည်ဆောက်ထားသော အဆောက်အဦကြီးကိုလည်း steel structure ဟု ခေါ်ကြလိမ့်မည် မထင်ပါ။

ကိုယ့်အနေနှင့် ဝေါဟာရတစ်လုံးလောက်တောင် ဖြစ်ဖြစ်မြောက်မြောက် မတီထွင်နိုင်သည့်အခါကျမှ ကျွန်တော် ရှေးလူကြီး များကို ကျေးဇူးတင်မိရသည်။ ရှေးလူကြီးများတီထွင်ခဲ့သော ဝေါဟာရများအနက်မှ ဓာတ် ကိုသုံးထားသော ဝေါဟာရ အနည်းငယ်ကို စေ့ငုကြည့်ကြပါစို့။

လျှပ်စစ်ကို တစ်နေရာမှ တစ်နေရာသို့ သယ်ဆောင်ပေးသောကြိုးကို ဓာတ်ကြိုး ဟု တီထွင်ခဲ့ကြ၏။ (လျှပ်စစ်) ဓာတ်များ စီးဆင်းနေသောကြိုး ဟု အဓိပ္ပာယ် ရပေလိမ့်မည်။

ထိုဓာတ်ကြိုးများကို သွယ်တန်းရန်ထောင်ထားသော တိုင်ကြီးကျတော့ ဓာတ်တိုင်။

ဟော လျှပ်စစ်ကို သိုလှောင်ပေးထားသော ဘက်ထရီတုံးကလေးကျတော့ ဓာတ်ခဲ တဲ့။

ထိုဓာတ်ခဲများထည့်ထိုးလိုက်သဖြင့် အလင်းရောင်ထွက်လာသော အချောင်းကြီးကျတော့ ဓာတ်မီး ဆိုပါလား။

လျှပ်စစ်ကို သွားကိုင်မိသဖြင့် ဒန်တန့်တန်ဟု သချီးယိုးဒယားက,သွားတာကျတော့ ဓာတ်လိုက်သည် တဲ့။

ကောင်းသဗျာ။

ကျစ်ကျစ်လျစ်လျစ်နဲ့ လိုရင်းလည်းရောက်။ ခေါ်ရမှတ်ရလည်းလွယ်။

သို့သော် သည်ခေတ်တွင် သည်လိုတီထွင်တာကို လွယ်လွယ်နှင့်လက်ခံပါ့မလားဟု ကျွန်တော်ကတော့ သံသယဖြစ်မိသည်။

စက်နှင့်မောင်းကာ အထက်တက်၊ အောက်ဆင်းလုပ်သော ဘီရို၊ ဟုတ်ပေါင် အခန်းကလေး၊ သို့မဟုတ် သေတ္တာကလေးကို ကျတော့ ဓာတ်လှေခါး ဟု နာမည်ပေးခဲ့ကြသည်။

သည်ခေတ်တွင်သာကျွန်တော်က (ထိုအရာကလေးကို ဓာတ်လှေခါး ဟု နာမည်ပေးလျင် မကောင်းပါလော) ဟု ဖေ့စ်ဘုတ်တွင် တင်လိုက်ပါက ၀ိုင်းဝန်းဆွမ်းကြီးလောင်းကြမည့်သူများမှာ နည်းလှမည်မဟုတ်ပါ။ လှေခါးဆိုတာ အထစ်တွေ ပါရမှာကွ၊ စက်သီးကြိုးနဲ့ ဆွဲတင်တဲ့ သေတ္တာကို မင်းမို့လို့ လှေခါးလို့နာမည်ပေးချင်တယ်။ အတော်ဒူတဲ့ကောင်။ မသကာ စက်သေတ္တာဆို နည်းနည်းတော်သေး ဟု ၀ိုင်းဝန်းကွန်မင့်ပေးကြ၊ ဖဲ့ကြရွဲ့ကြမည့်သူများ အတော်များပေလိမ့်မည်။

လျှပ်စစ်နှင့်မောင်းနှင်သောရထားကျတော့ ဓာတ်ရထားဟု သမုတ်ကြ၏။ ထို့ကြောင့် သည်နေရာမှာ ဓာတ်ဆိုတာ လျှပ်စစ်ကို  

ဆိုလိုသည်ဟု အကြမ်းဖျဉ်း သတ်မှတ်လို့ရပါ၏။ သို့တိုင် သည်အသုံးများတွင်သာမှန်သည်။ ဓာတ်ဆိုတိုင်း လျှပ်စစ်ဟုတော့ တရားသေ မှတ်ယူလို့မရ။

မြန်မာစကားတွင် ဓာတ်နှင့်ပတ်သက်သော ဝေါဟာရ အတော်များ၏။

ဝမ်းလျှောတာကို ဓာတ်ပျက်သည်၊ ဓာတ်လျှောသည်ဟု ခေါ်သည်။

ယခုခေတ် ဘန်းစကားကျတော့ ဓာတ်ပျက်သည် ဆိုခြင်းမှာ အပေါက်အလမ်းမတည့်သည်၊ တလွဲတချော်ဖြစ်သည် စသည့် အဓိပ္ပာယ်များရ၏။ သို့သော် သည့်ထက်ပိုအဓိပ္ပာယ်ရပါသေးသည်။ နမူနာအားဖြင့်ပြရလျှင် -

“သား SAEIS စာမေးပွဲဖြေရန်အတွက် စာသင်ခြင်း၊ စစ်ဆေးခြင်းများ လုပ်ပေးနေရခြင်းအားဖြင့် မအားလပ်သောကြောင့် ၀ါသနာပါသည့် စာရေးခြင်းတည်းဟူသော အမှုကို အောင့်အည့်ချုပ်တည်းထားရလေရာ ကျွန်ုပ်မှာ အတော်ဓာတ်ပျက်လျက် ရှိလေသည်။”

ဓာတ်ချုပ်သည်ဆိုခြင်းမှာ ၀မ်းချုပ်တာကို ခေါ်တာဖြစ်၏။

ဝမ်းလျှောနေသူများအားတိုက်သော သကြားနှင့်ဆားရောထားသည့်ရေကို ဓာတ်ဆားရည်ဟု ခေါ်လေ၏။ ဟုတ်ဟုတ်သေးတော့။

ဟော - နေမကောင်းသူများအား နလံပြန်ထလာစေရန် ဟောဒါ၊ ဟောဒါတွေ စားပေး၊ ဒါတွေတော့မစားနဲ့ဟု ဘိန်းဓော ဆရာကြီးများက ရွေးချယ်ပေးသော အစားအသောက်စာရင်းကိုကျတော့ ဓာတ်စာ ဟုခေါ်သတတ်။ ထိုဆရာကြီးများက ထိုကဲ့သို့ ဒါစား၊ ဒါမစားနဲ့ဟု လမ်းညွှန်ခြင်းကို ဓာတ်စာပေးသည်ဟု ဝေါဟာရတွင်၏။

ရောဂါဖြစ်သူ၊ နေမကောင်းသူများအား ဘာရောဂါဖြစ်သလဲဟု ဆီးဝမ်းသွေးစသည်တို့ကိုကျတော့ ဓာတ်ခွဲခန်းသို့ သွားစစ်ရလေသည်။ ဘယ်ဓာတ်တွေချို့ယွင်းနေသလဲဟု ခွဲခြမ်းစိတ်ဖြာကြည့်သောကြောင့် ဓာတ်ခွဲခန်းဟု ခေါ်၏။ ကြိုက်သဗျာ။

ရောဂါရှာတာတင်မဟုတ်။ ဟိုပစ္စည်းနဲ့ သည်ပစ္စည်းစပ်လျှင် ဘာဖြစ်မတုံး ဟု လျှောက်လက်တည့်စမ်းကြည့်သော အခန်းကို လည်း ဓာတ်ခွဲခန်းဟုပင် ခေါ်လေသည်။

ဓာတ်ပေါင်းဖို ဆိုသည်မှာ နျူကလီးယားဓာတ်အားပေးစက်ရုံကို ခေါ်၏။ မည်သည့်ဓာတ်ကိုပေါင်းလိုက်သလဲ တော့ ကျွန်တော်လည်း မသိ။

အဆုတ်ထဲ ဘာဖြစ်နေသလဲဟု အိတ်စရေးရိုက်ကြည့်တာကျတော့ ဓာတ်မှန်ရိုက်တယ် ဟု ခေါ်ကာ ဓာတ်မှန်ရိုက်ရာမှ ထွက်လာသော ဖလင်ပြားကျတော့ ဓာတ်မှန် ဟု ခေါ်ပြန်သည်။ ထိုဖလင်ပြားမှာ မှန်ပင်မဟုတ်လင့်ကစား စကားလုံးလေးကား အတော်လှလေ၏။ ခေါ်နေကျသွားတော့ ဓာတ်မှန်ဆိုလျှင် လူတိုင်းသိသည်။ ဘယ်သူကမှ မင်းဟာ ကြည့်လို့မှမရဘဲကွ၊ ဘာကိစ္စမှန်လို့ခေါ်ရမလဲဟု ကွန်ပလိန်းတက်မနေ။

အိတ်စရေး၊ ဂမ်မာရေးတို့ကဲ့သို့ မျက်စိဖြင့်မမြင်ရသော ရောင်ခြည်ကို ဓာတ်ရောင်ခြည်ဟု ခေါ်သည်။ သို့တိုင် မြတ်စွာဘုရား၏ ကိုယ်တော်မှထွက်သော အရောင်အ၀ါများကိုလည်း ဓာတ်ရောင်ခြည်ခေါ်သေးသည် (ထင်ပါ၏)။

ကင်ဆာဖြစ်တယ်ဆိုသည်မှာ တစ်ရှူးများ ပုံမှန်မဟုတ်စွာ ပွားများထွက်လာခြင်း ဖြစ်၏။ ထိုအခါ ထို တစ်ရှူးများကို လျှပ်စစ်ဖြင့် ဓာတ်လိုက်စေလျှက် အပူပေးကာ သတ်ပစ်ရသည်။ ဤသည်ကို မြန်မာများက ဓာတ်ကင်တယ် ဟု ဆိုလေသည်။ အမှန်က ဓာတ်ဖြင့် ကင်တာမဟုတ်။ ကင်ဆာကလပ်စည်းများအတွင်း လျှပ်စစ် လွှတ်လိုက်တာသာ ဖြစ်လေသည်။ သို့သော် မည်သူမှ ဓာတ်လွှတ်တယ် မခေါ်။ ဓာတ်ကင်တယ်ဆိုလျှင်ပင် ဘာကိုဆိုလိုကြောင်း လူအများ နားလည်ကြတော့၏။

ထို့ပြင်လည်း ကင်မရာဖြင့် ဖျတ်ကနဲရိုက်၊ ၎င်းပုံကို ဓာတ်ဆေးရည်ထဲထည့်ဆေးလိုက်သဖြင့် ပုံပေါ်လာသော စက္ကူကျတော့ ဟော - ဓာတ်ပုံတဲ့။ ဒါလည်းမဆိုး။ ကျွန်တော်သာဆို တစ်ခေါင်းလုံးသာဖြူသွားမည်။ ထိုစာရွက်ကလေးကို ဘယ်လိုခေါ်ရမလဲ ဟု နာမည်ပေးရန် ဘယ်လိုနည်းနှင့်မှ အကြံမထွက်နိုင်။

ဒါတင်ဘာဟုတ်ပါအုံးမတုံးဗျာ။

ဆူနေသောရေကိုအတော်ကြာသည့်တိုင် ပူနေအောင်ထိန်းထားနိုင်သော အလုံပိတ်ဘူးကျတော့ ဓာတ်ဘူးဟူ၏။

အသံချဲ့စက်ခေတ်ဦး ဟိုးတုံးက သစ်သားသေတ္တာထဲထည့်၊ သံပတ်ကြီးကိုလက်နဲ့လှည့်ဖွင့်ပြီး လော်ကြီးနဲ့ အသားကုန် အော်တဲ့စက်ကို ဓာတ်စက် ဟု အမည်ပေး၏။ ထိုစက်ပေါ်တင်ပြီးလှည့်၊ အပ်နဲ့ထောက်လိုက်တော့ အသံထွက်လာတဲ့အပြားကို ကျတော့ ဓာတ်ပြား ဟု ခေါ်လေသည်။ အောင်မယ်၊ ဓာတ်ပြားရအဆိုတော်ဆိုတာ ဟိုတုံးက နှယ်နှယ်ရရ အဆိုတော် မဟုတ်ဘဲကိုးခင်ဗျ။ ဒီခေတ်ကလေးတွေ သိချင်မှသိမှာမို့ ဓာတ်ပြားရအဆိုတော်ကို နည်းနည်းလောက် ရှင်းပြပါရစေ။

ဓာတ်ပြားဖြင့်အသံသွင်းရန် ထိုခေတ်က အတော်ဈေးကြီးပေလိမ့်မည်။ ထို့ကြောင့် တော်ရုံတန်ရုံအဆိုတော်လောက်ကို ဓာတ်ပြားဖြင့် အသံသွင်းမပေး။ တစ်နည်းအားဖြင့် အသံမသွင်းနိုင်။ အသံကောင်း၊ အဆိုကောင်းလွန်းလို့ ဓာတ်ပြားနဲ့တောင် အသံသွင်းထားရတဲ့အဆိုတော်ကို ဓာတ်ပြားရအဆိုတော်ဟုခေါ်ကြောင်း တွံ - အသင် လုံကလေး၊ လုံမကလေးတို့သည် ဂဏှာဟိ - မှတ်ကြလေကုန်လော့။

ယခင်က ဖလင်လိပ်ကြီးကို တချွပ်ချွပ်လှည့်ကာ ပိတ်ကားပေါ်သို့ ကာဗွန်မီးဖြင့်ထိုးလျက် အရုပ်လည်းကြည့်ရ၊ အသံလည်း ကြားရသော ရုပ်ရှင်ကို ကျုပ်တို့တောကလူတွေက ဓာတ်ရှင်ဟု ခေါ်လေသည်။ အဘယ်ဓာတ်က အဘယ်ကဲ့သို့ရှင်သည်ကို ကျွန်ုပ်လည်း ခွဲဝေပိုင်းခြား မပြတတ်။ ထွက်လာသည့်အရုပ်များမှာ အစင်းရာနိုင်းချင်း၊ အစက်အပြောက်နိုင်းချင်းနှင့်။ ပိတ်ကား ပေါ်မှ မင်းသားမင်းသမီးများကလည်း တုန်နေသေးသည်။ အသံကလည်း လေသံများရောလျက် ၀ူးဝါးဝူးဝါး။ ဘာပြောသလဲ မနည်းနားထောင်ယူရ၏။ သို့သော် ယခင်က ထိုဓာတ်ရှင်များမှာ အတော်ကြည့်လို့ ကောင်းလေသည်။ ကွန်ုပ်တို့မှာ ထို ဓာတ်ရှင်ကို ရွာမှ လေးငါးမိုင်မျှဝေးသော အရပ်သို့ သွားကြည့်ကြရ၏။ သို့တိုင် မည်သူမျှ မညည်းညူ။ သွားကြသည်သာ ဖြစ်လေသည်။

ဓာတုဗေဒပစ္စည်းတွေကို ခွဲခြမ်းစိတ်ဖြာတဲ့အခန်းကျတော့ ဓာတ်ခွဲခန်းဟု ခေါ်၏။ သို့သော် ဓာတ်ခွဲခန်းမှ (ခွဲ) ကိုဖြုတ်လိုက်ပြီး ဓာတ်ခန်း ဟု လုပ်လိုက်လျှင်မူ အဓိပ္ပာယ်မှာ အတော်ပြောင်းသွားလေသည်။ ဓာတ်ခန်းကို ဓာတ်နန်းဟုလည်း အဆင့်မြင့်မြင့် ခေါ်တတ်ကြသေး၏။ ဓာတ်ခန်း သို့မဟုတ် ဓာတ်နန်းမှာ ဘာတဲ့၊ ဟိုအထက်ဆရာကြီးများ၊ ဘိုးဘိုးကြီး၊ မယ်မယ်ကြီးများအား ပူဇော်ပသရာ နေရာဖြစ်လေသည်။ ထိုနေရာတွင် ပယောဂပူးကပ်နေသူများကို ကုသပေးသည်။ နတ်နှင့်ပတ်သက်သော အမှုကိစ္စများကို ပြုလုပ်သည်။ အတွင်း (၃၇) မင်း၊ အပြင် (၃၇) မင်း၊ ကိုကြီးကျော်၊ မမနှဲ၊ အနောက်နန်းမတော်၊ အမေရေယဉ်၊ မင်းကြီးမင်းလေး စသူတို့ တခန်းတနား ကျက်စားရာနေရာဖြစ်၏။

ထိုနေရာနှင့်တိုက်ရိုက်ပတ်သက်နေသည့် စကားလုံးတစ်ခုမှာ ဓာတ်စီးသည် ဟူသော ဝေါဟာရဖြစ်၏။ ဓာတ်စီးတယ်ဆိုတာ အထက် ဘိုးတော်၊ ဘွားတော်၊ မင်းကြီး၊ မင်းလတ်၊ မင်းလေး၊ မင်းပေါက်စနတို့က သက်ရှိလူသားကို ပူးကပ်ကာ သားတော် သမီးတော်တို့ ငါ့ကို မခံ့မညားလုပ်ရင်တော့ အကြောင်းပြရသေးတာပေါ့ ညှင်းညှင်းညှင်းဟု မျက်လုံးကိုမှိတ်၊ ဘေးဘယ်ညာ ယမ်းလျက် အသံ ဗလုံးဗထွေးဖြင့် ဓားကြိမ်းကြိမ်းကာ ဘယ်ကောင်မက ဘာဖြစ်တာ၊ ဟိုအကောင် ဘယ်လိုဖြစ်မယ် ဟု အတတ်ဟောခြင်း ဖြစ်လေသည်။

အောင်မယ်၊ ဓာတ်စီးတယ်ဆိုလို့ နှယ်နှယ်ရရမမှတ်ပါနှင့်။ ဓာတ်က စီးချင်တိုင်းစီးလို့ရတာမဟုတ်။ သူတို့နှင့် နီးစပ်သူများသာ စီးလို့ရလေသည်။ ကျွန်တော့်လို ဘိုးတော်၊ ဘွားတော်၊ ပျောက်စေ၊ ရေမန်း၊ အကြားအမြင်၊ နတ်၊ စုံး၊ တစ္ဆေသရဲ၊ သူရဿတီ၊ အမေရေယဉ်၊ မင်းကြီးမင်းလေး၊ နတ်နန်း၊ ကိုးမြို့ ဆိုတာတို့ကို နည်းနည်းကလေးမှ အယုံအကြည်မရှိသော လူ့ခွစာအဖို့ ဓာတ်ကိုစီးဖို့နေနေသာ။ ဓာတ်ပါးချပ်ကြိုးတောင် ကိုင်ခွင့်ရမှာမဟုတ်။

(ပိုသိလိုသူများ ကျော်မြသန်း၏ ကနားစီးမောင်မောင်လတ်၊ နုနုရည်(အင်းဝ) ၏ ပြုံး၍လည်း ကန်တော့ခံတော်မူပါ၊ ငို၍ (ဟုတ်ပေါင်) ရယ်၍လည်း ကန်တော့ခံတော်မူပါ စသည်တို့ကို ဖတ်ပါ။)

နောက်ပြီးတော့ ဘာတဲ့။ အဲဒီ ဓာတ်နန်းကိုသွားတတ်ကြသူများ မကြာခဏ လုပ်တတ်တာ ရှိသေးသည်။ ဓာတ်ရိုက်ဓာတ်ဆင် ဆိုလား။ ဓာတ်ရိုက်ဓာတ်ဆင်ကား စကားလုံးကြားရုံမျှနှင့် အော့နှလုံးနာစရာ ကောင်းလှ၏။ အဘယ်ကြောင့်ဆိုသော် ကောင်းကျိုးချမ်းသာများဖြစ်ထွန်းအောင် လုပ်ရာတွင် ယတြာကိုသုံး၍ မကောင်းသည့်၊ သူတပါးအားထိခိုက်နစ်နာစေလိုသော အကြံအစည်ဖြင့် ပြုလုပ်ရာတွင် ဓာတ်ရိုက်ဓာတ်ဆင် လုပ်တတ်ကြသောကြောင့် ဖြစ်၏။ ဓာတ်ရိုက်ဓာတ်ဆင်ကို ကောင်းအောင်လုပ်ရာတွင် သုံး၍ရသလို မကောင်းအောင်လုပ်ရာတွင်လည်း သုံး၍ရသည်။ ဓာတ်ရိုက်ဓာတ်ဆင်အကြောင်း သိလိုသဖြင့် ကျွန်တော် အသက် အစိတ်၊ ၂၈ နှစ်လောက်က လေ့လာခဲ့ဖူး၏။ ခုတော့ မေ့ကုန်ပါပြီ။

ဤကမ္ဘာလောကကို ကြီးစိုးနေသော ဓာတ်ကြီးများရှိ၏။ ထိုဓာတ်ကြီးများတွင် တည့်သောဓာတ်ရှိသလို မတည့်သောဓာတ် လည်းရှိ၏။ အန္တော၊ ဂဗ္ဘေ၊ စရေ၊ ၀ံသေ ဆိုတာ မိတ်ဓာတ်များ ဖြစ်၍ ဦးဝေ၊ စံကူး၊ ရေဗူး၊ တောသူ ဆိုတာ ဓာတ်ရန်များ ဖြစ်သည်။ ဓာတ်ရိုက်ဓာတ်ဆင်ဆိုသည်မှာ မိမိပျက်စီးစေလိုသူ၏ နာမ်ဓာတ်ကို နှိမ်တာဖြစ်ပါသည်။ အင်းစိန်ဈေးပေါ် ကျောက်ဖရုံသီးတင်ခြင်း၊ ကြက်ဆူပင်စိုက်ခိုင်းခြင်း တို့သည် ဤသဘောဖြစ်၏။ သို့တိုင် သူတို့ဓာတ်ရိုက်ဓာတ်ဆင်တာကတော့ အတော်ချာလှသည်။

အနှီဓာတ်များနှင့် နီးစပ်သော နောက်ဝေါဟာရတစ်ခုမှာ ဓာတ်လုံး ဖြစ်လေသည်။

ဓာတ်လုံး၏ အစွမ်းသတ္တိကား အတော်များလေသည်။ ငယ်စဉ်က ကျွန်တော်ကျက်မှတ်ထားသည်များကို ပြန်လည် ဖောက်သည်ချရလျှင် - ဆောင်ရင်လေးတယ်၊ ပစ်ရင်အဝေးရောက်တယ်။ ရေစိမ်သောက်ရင် သေးပေါက်တယ် ဟူ၏။

ကျွန်တော်မြင်ဖူးသော ဓာတ်လုံးမှာ ကျောက်ခဲကို ရွှေရည်စိမ်ထားသော အလုံးကလေး ဖြစ်၏။ သူကလည်း နှယ်နှယ်မဟုတ်။ ၉၆ ပါးသောရောဂါတို့ကို ဘယ်ဆေးရုံဆေးခန်းမှ သွားစရာမလို၊ ဘယ်ဆရာဝန်မှ ပြစရာမလိုဘဲ ရေစိမ်သောက်ရုံမျှနှင့် ပျောက် ကင်းစေနိုင်သော အစွမ်းရှိလေသည်။ ထိုမျှသာမက မကောင်းဆိုးဝါးတို့ ပူးဝင်လာလျှင်သော်မှ အနှီဓာတ်လုံးဖြင့် ခုတ်ထည့် လိုက်လျှင် အောင်မယ်လေး၊ ဘလေးတကာ ထဘီစွန်တောင်ဆွဲပြေးရသည် ဟု အဆိုရှိ၏။ ဤမျှ အစွမ်းထက်လှသော ထိုအလုံးကလေးကို ဓာတ်လုံးဟု အမည်ပေးခဲ့သော ပညာရှိကြီးများအား ကျွန်ုပ်မှာ အထူးကျေးဇူးတင်မိလေသည်။ ကျွန်ုပ်သာဆို ထို ဘက်စုံသုံးအလုံးကလေးကို မည်ကဲ့သို့ အမည်ပေးရမှန်းမသိသဖြင့် စဉ်းစားရင်း တစ်ခေါင်းလုံး ဖြူသွားစရာ ရှိပေသည်။ (ယခုလည်း မမည်းပါ။)

မြတ်စွာဘုရားနှင့် တပည့်သာဝကများ ပရိနိဗ္ဗာန်ပြုသောအခါ အလုံးကလေးများ ကြွင်းကျန်ရစ်သည်။ ၎င်းတို့ကို  ဓာတ်တော် မွေတော်ဟု ခေါ်ကြ၏။ ဓာတ်ပေါင်းစုဘုရားဆိုသည်ကို ကျွန်တော်အတိအကျ နားမလည်ပါ။ သို့သော် ဓာတ်တော်မွေတော်များ စုပေါင်းဌာပနာထားသော ဘုရားကို ခေါ်သည်ထင်ပါသည်။ တစ်ခါတရံ ထိုဓာတ်တော်များမှ အရောင်အ၀ါတို့ ထွက်သည်ဆို၏။ ၎င်းကို ဓာတ်တော်ကွန့်မြူးသည်ဟု ခေါ်ကြသည်။ အတော်လှသော စကားလုံးကလေး ဖြစ်ပါ၏။

သို့သော် ကောကုသဋ်၊ ကောဏာဂုံ၊ ကဿပ၊ ဂေါတမ ဘုရားလေးဆူ၏ ဓာတ်တော်မွေတော်များ ဌာပနာထားသည့် ရွှေတိဂုံ စေတီတော်ကြီးကိုမူ ဓာတ်ပေါင်းစုဘုရားဟု မခေါ်။ လေးဆူဓာတ်ပုံ ရွှေတိဂုံဟု ခေါ်ကြသည်။ ကျွန်တော်ငယ်စဉ်က လေးဆူ ဓာတ်ပုံဆိုသည်မှာ ဓာတ်ပုံလေးမျိုးကို ဆိုလိုသည်ဟု ထင်မှတ်မှားမိခဲ့၏။

ပညတ်သွားရာ ဓာတ်သက်ပါ ဆိုသည်ကိုတော့ နည်းနည်းရှင်းပြဘို့လိုလိမ့်မည်။

ပညတ်ဆိုသည်မှာ တစ်ခုခုကို အမည်သတ်မှတ်ပေးလိုက်တာ ဖြစ်သည်။ ပညတ်သွားရာ ဓာတ်သက်ပါ ဆိုသည်ကတော့ ထို ပေးထားသော အမည်အတိုင်း လိုက်ဖြစ်တတ်သည် ဟု ဆိုလိုသည်။

ဆိုကြပါစို့။ လူတစ်ဦးကို ငတုံး ဟု ခေါ်ပါများလျှင်၊ သို့မဟုတ် အမည်မှည့်ထားလျှင် ထိုသူမှာ အလိုလိုနေရင်း တုံးသွားတတ် သည်။ ထို့ကြောင့် ရှေးလူကြီးသူမများက စကားကို ကချော်ကချွတ်မပြောသင့်။ စကားဦးမသန်းသင့် ဟု ဆုံးမတတ်ကြ၏။

သိပ်မကြာမီကာလတစ်ခုက စင်ကာပူ တိရစ္တာန်ဥယျာဉ်တွင် ကျားစာကျွေးသော ကောင်လေးတစ်ယောက်ကို ကျားကိုက်သတ် သည့် ဖြစ်ရပ်တစ်ခု ဖြစ်ပွားခဲ့သည်။ နေ့တိုင်းတွေ့ရဖန်များတော့ ကျားနှင့်ကောင်လေးမှာ ရင်းနှီးနေပြီ။ ထိုနေ့က အစာမကျွေးမီ ကောင်လေးက ကျားကို မင်းနဲ့ငါတွေ့ရတာ ဒီနေ့ နောက်ဆုံးပဲပေါ့ကွာ ဟု ပြောသည်ဟု သတင်းစာများက ရေး၏။ ဤသည်မှာ စကားဦးသန်းခြင်းဖြစ်လေသည်။   

နောက်ပြီး ဓာတ်ကူးတယ် ဟု အများသူငါ သုံးတတ်ကြသေး၏။ အကြမ်းဖျဉ်းဆိုရပါမူ တစ်ယောက်ယောက်က တစ်ခုခုကို ကြိုက်၍ နောက်တစ်ယောက်က လိုက်ကြိုက်တာမျိုးကို ဓာတ်ကူးတယ် ဟု ဆိုရပါလိမ့်မည်။ ဤသည်ကို ကျွန်တော်ကတော့ စိတ်ခံစားမှုနှင့် တိုက်ရိုက်ပတ်သက်နေသည်ဟု ဆိုချင်ပါ၏။ ဥပမာ ပျော်ရွှင်နေကြသော ပတ်ဝန်းကျင်ရောက်သွားသူအဖို့ အလိုလို အပျော်များ ကူးစက်လာသည်။ ငိုကြွေးနေသည့် ပတ်ဝန်းကျင်၌ ပျော်ရွှင်နေသူကို အသင်တွေ့ဖူးပါသလော။ ဗုဒ္ဓဘာသာမိတ်ဆွေတို့ လူတိုင်း ဘုရားဖူး သွားဖူးကြပါသည်။ ဘုရားပုရ၀ုဏ်အတွင်း ၀င်လိုက်သည်နှင့် စိတ်မှာ အလိုလို ငြိမ်းချမ်းမှု ရသွားသလို ခံစားရသည်။ ဤသည်မှာ ဘုရားမှ အငြိမ်းဓာတ်များ မိမိထံကူးစက်လာခြင်းဖြစ်၏။

ဓာတ်ကူးခြင်းကို အလွယ်တကူမြင်နိုင်သည့် တစ်နေရာမှာ တစ်ယောက်က သမ်းလိုက်လျှင် အခြားတစ်ယောက်လည်း လိုက်သမ်းလာခြင်း သို့မဟုတ် သမ်းချင်လာခြင်း ဖြစ်၏။

ဓာတ်ခံကောင်းတယ်/မကောင်းဆိုသည်မှာ အဓိကအားဖြင့် ကိုယ်ကျင့်စာရိတ္တနှင့်ပတ်သက်၍သုံးသည် ထင်ပါသည်။ နောက်ပြီး ဉာဏ်ထက်/ပညာတော်တာ မတော်တာများအတွက်လည်း ဓာတ်ခံကောင်းတယ်/မကောင်းဟု သုံးကြ၏။

ဓာတ်ကျတယ်ဆိုတာကျတော့ သဘောကျတာကိုခေါ်ခြင်းဖြစ်ပါလိမ့်မည်။ တချို့စကားလုံးတွေကျတော့ အဓိပ္ပာယ်ဖော်ရန် အတော်ခက်သည်။ ဥပမာ ဓာတ်ပေါက်တယ် ဆိုတာမျိုးဖြစ်၏။ ထိုစကားလုံးမျိုးက နေရာကိုလိုက်၍ အဓိပ္ပာယ်ပြောင်း သွားသည်။ နောက်ပြီး ထိုစကားလုံးများမှာ ယခုမှပေါ်လာသည့် ဘန်းစကားများဖြစ်သည်။

ဓာတ်သိဆိုတာကတော့ တစ်ယောက်ယောက်အကြောင်းကို သေသေချာချာ ကျကျနန၊ အတွင်းသိ၊ အစင်းသိ သိခြင်းကို ခေါ်သည်။ သည်နေရာတွင် ဓာတ်ဆိုသည်မှာ စိတ်ဓာတ်ကိုဆိုလိုတာ ဖြစ်ပါလိမ့်မည်။ ထိုသူ၏ စိတ်ဓာတ်မည်ကဲ့သို့နေသည် ကို သေသေချာချာသိခြင်းကို ဓာတ်သိသည်ဟု ခေါ်တာဖြစ်ပါသည်။

ဗီတာမင်ဓာတ်၊ အသားဓာတ် ဆိုတာများမှာ အာဟာရတန်ဘိုးကို ဖော်ကျူး၏။ သို့သော် ယူရီးယား၊ ပိုတက်စသည့် သဘာဝမဟုတ်သော လူလုပ်မြေသြဇာများကျတော့ ဟော၊ ဓာတ်မြေသြဇာ တဲ့။ နောက်ပြီး အင်မတန် မီးလောင်လွယ်တဲ့ ဟိုအရည်ကျတော့ ဓာတ်ဆီတဲ့။ တယ်လဲအသုံးတည့်တဲ့ ဓာတ် ပေပ ခင်ဗျာ။

ကျွန်တော်တို့ ဆယ်တန်းကျောင်းသားဘ၀က ဓာတုဗေဒ ဆိုတာကြီး သင်ရသည်။ ဘာတဲ့ တိုက်တြေးရှင်းဆိုတာ၊ အရမ်းခက် ဆိုပါလား။ ကျွန်တော်တော့ ဆယ်တန်းသာ အောင်လာရော၊ အဲဒီ တိုက်တြေးရှင်းဆိုတာကြီးကို ဘယ်လိုကျော်လို့ကျော်ခဲ့မှန်း တောင် မသိလိုက်။ ဟိုဓာတ်သည်ဓာတ်တွေအကြောင်း သင်ရသည့်အတွက် ဓာတုဗေဒ ဟု ခေါ်သည်။ ဓာတုဗေဒဆိုတာ ဗမာစကားမဟုတ်။ ဓာတ်ခွဲခြင်းအတတ်ပညာဟု အဓိပ္ပာယ်ရပါလိမ့်မည်။ ဓာတ်ခွဲခြင်းဆိုတာလည်း ဗမာစကားစစ်စစ် မဟုတ် သေး။ ဓာတုဆိုတာ ပါဠိစကားဖြစ်၏။ ဗေဒ ဆိုသည်မှာ ဝေဒ (Veda) ကို မြန်မာမှုပြုထားခြင်းဖြစ်ပြီး အသိပညာဟု အဓိပ္ပာယ် ရသည်။

အဲသည် ဓာတုပစ္စည်းတွေ တစ်ခုနဲ့တစ်ခုရောပြီး တဖျစ်ဖျစ်မည်၊ မီးခိုးတွေထွက်လာတာကျတော့ ဓာတ်ပြုတယ် ဟု နာမည် ပေးသည်။

(မြန်မာနိုင်ငံ အင်္ဂလိပ်ကိုလိုနီလက်အောက်ကလွတ်လာတော့ အင်္ဂလိပ်စကားလုံးများကို မြန်မာဝေါဟာရဖြင့် ဘာသာ ပြန်ဆိုရန် ကြိုးစားကြပုံအကြောင်း လူကလေး၊ လုံမကလေးတို့ လေ့လာသင့်သည်။ ကျွန်တော်ဖတ်ခဲ့တာ အနှစ် ၂၀ ကျော် အစိတ်လောက်ရှိပြီမို့ အခု သိပ်မမှတ်မိတော့။ ခပ်ရေးရေးသာ မှတ်မိတော့သည်။)

အနှီ ဓာတုဗေဒ၊ ရူပဗေဒစသော ပညာများကိုကျတော့ လောကဓာတ်ပညာ ဟု ရှေးလူကြီးများက အနွတ္ထသညာ ပေးကြလေ သေး၏။

ပထ၀ီ၊ တေဇော၊ အာပေါ၊ ၀ါယောဆိုတာကျတော့ ဓာတ်ကြီးလေးပါး ဖြစ်၏။ ဓာတ်သဘောအရ ဟောသည် ကမ္ဘာလောကကြီး ကို ခွဲခြမ်းစိတ်ဖြာကြည့်လိုက်လျှင် ထို ဓာတ်ကြီးလေးပါးကလွဲလို့ ဘာမှ မရှိ။

စိတ်သဘောချင်းတူမျှသူကိုကျတော့ ဓာတ်တူနာမ်တူဟု တင်စားလေသည်။ ဤနေရာတွင်မတော့ ဓာတ်ဟူသည် လူ့ခန္ဓာ ကိုယ်ကို ရည်ညွှန်းပြီး နာမ်ဆိုသည်မှာမူ စိတ်ကို ရည်ညွန်းပါလိမ့်မည်။ ဓာတ်တူနာမ်တူကို မြန်မာစကားလုံးဖြင့် ဖလှယ်လိုက်ရ လျှင် စိတ်တူကိုယ်တူ ဟု ဆိုနိုင်မည်လားမသိ။

ဤသည်မှာ ရှေးလူကြီးများတီထွင်ခဲ့သော ဝေါဟာရပေါင်း မြောက်များစွာအနက်မှ ဓာတ်နှင့်ပတ်သက်သော ဝေါဟာရများ ဖြစ်၏။ စိတ်ကူးမိသမျှ ရေးပါသည်။ အခြား ဓာတ်နှင့်ပတ်သက်သော ဝေါဟာရမျှား ကျန်နိုင်ပါသေးသည်။ မိတ်ဆွေတို့ ကူညီ ရှာဖွေပေးကြပါကုန်။

အထက်ပါရေးသားထားချက်များထဲ၌ အမှားပါကလည်း ပြင်ပေးကြပါကုန်။

ကျေးဇူးတင်ပါသည်။

အေးငြိမ်း

၈ ဇန္န၀ါရီလ၊ ၂၀၁၆။ ၀၀း၅၂ နာရီ